الثلاثاء، 14 أكتوبر 2008

جريمة قتل

- انا بكرهك.. ايوة بكرهك.. طول عمرى بكرهك..طول عمرك جبانة وحطانى فى وش المدفع.


-..................................................... .


-بكرهك عشان طول عمرك بتضطرينى ادافع عنك.. طول عمرك مستخبية ورايا.


-................................................. .


-ايوة طول عمرك مخليانى انا الوحشة عشان ادافع عنك.. انت طيبة زيادة عن اللزوم يبقى انا لازم اكون جامدة وقوية.. انت حساسة يبقى انا لازم ابقى واقعية..انت غلبانة يبقى انا لازم ابقى قاسية..

طول عمرك هبلك بيعمل لك مشاكل تعمليها وتيجى تستخبى ورايا وانا اضطر ادافع عنك وكل مرة تصعبى علية فادافع عنك بشراسة واخسر ناس عشان خاطرك.

-.............................................. .

-جريك عشان تستخبى ورايا خللى الناس تكرهنى.. انا اللى باتصدى لهم انا اللى بادافع عنك.. انا اللى باخد لك حقك.. انا دايما الغبية فى نظرهم..لبستينى دور مش دورى..طول عمرك بتخلينى اعمل حاجات مش عايزة اعملها.. لو انت مش موجودة فى حياتى كنت هبقى عادية..من غير هبلك انا انسانة طبيعية مش مضطرة ابقى جامدة وقاسية وخشنة.

-.......................................... .

-لا انا خلاص زهقت منك.. مش عايزاكى فى حياتى بعد كدة.

-............................................. .

-بلاش تجبرينى اطردك من حياتى بالفوة لانى والله مش هاتردد اعمل كدة حتى لو فيها قتلك.

-............................................ .

-خلاص مش قادرة والله.. تعبت انت لازم تخرجى من حياتى ..والله مش قادرة اتحمل اكتر من كدة حرام عليكى.

-............................................ .

-انت مصرة متخرجيش من حياتى بمزاجك وانا والله خلاص موافقة اخرجك بالعافية ..معنديش مانع اقتلك.. انت لازم تخرجى من حياتى حتى لو بالغصب..انت اللى اخترتى النهاية دى .





..................................................................................................................................................

ايوة يا دكتور لقيتها واقعة قدام المراية فى اوضتها منتحرة.. قطعت شرايين ايدها بالموس.



تمت



ملحوظة رفيعة: مش لازم تبقى القصة وصف لحالة اللى كاتبها النفسية ومش لازم تبقى بتعبر عن نواياه دى قصة قصيرة عايزة اعرف رأيكم فيها بصراحة فى البناء فى الاسلوب فى السرد فى الحبكة بس كدة...

هناك 54 تعليقًا:

كوارث يقول...

شوقي قال
صلاح أمرك للاخلاق مرجعه .. فقوم النفس بالأخلاق تستقم ..
والنفس من خيرها في خير عافيةٍ والنفس من شرها في مرتع وخم ..
قد تكون الحلول سهلة وبسيطة ومجرد عادات لدى البعض ولكنها على أصحاب المشاكل قسية عاتية كجبال الهيمالايا ..
ولكن لا يعنني أننا اعتدنا المناخ الثلجي أن نكره الربيع !
حد فاهم حاجه ؟

ابن رشد المصري يقول...

أحيانا فعلاً الإنسان بيوصل لحالات صراع مع نفسه بدرجة كبيرة قوى.. بس وصوله للإنتحار على ما أظن ده أكبر دليل على مدى ضعفه ..

موضوع رائع يا دكتورة وأرجو أن تتقبلى تحياتى

حدوته مصرية يقول...

حبكة و سرد و كلام ده و لا اعرف اتكلم فيه

بس عاجبني موضوع الردود بس و ان فى نقط لان حوار التانى مش مهم او ان اللى بقراه هو بس المسموع

كونها قصة دى استنتجتها

بتكلم مين دى اللى قعدت افكر بتكلم امها طيب حد تانى طيب نفسها

نهاية الانتحار متوقعة و عادية

العنوان جريمة قتل مش عاجبني

تحياتي و الى الامام

3omda يقول...

حوار مع النفس ..حلوه قوي بس مش شايفه انك قاسيه اوي علي نفسك..الانسان لازم يكون ليه شخصيه دفينه جوه نفسه علشان يبقي شخص طبيعي.مش ساعات بتشوفي شخص غاضب وسائر وتقولي اعوذ بالله ايه البني آدم ده عامل كده ليه وفجأه تلاقي حد جنبك يقولك "علي فكره ده شخص طيب قوي من جوه...بس الموقف هو اللي عمل كده عمل غلاف علي شخصيته الطيبه علشان يقدر يتعامل مع الناس"

romansy يقول...

انجى
انا متوقعتش ان بطله القصه بتكلم نفسها صحيح فيه اوقات كتير الانسان بيكون حالته النفسيه تعبانه خالص
بس برضه مش مستهله الانتحار
لازم يكون فيه شويه امل
قصتك جميله بس لو فيها سنه تفاؤل تبقى احلى واحلى

EMMY BABY يقول...

يااااااااااااااه النفس اللوامة حلوة بس الاحلى انك تلوم نفسك وتغير مش تستسلم وتيأس وتنتحر ويبقى خسرت دنيتك واخرتك كمان

اسلوبك فى السرد يشد بطريقة غريبة والله


فعلا حوار رائع بالرغم ان النهاية مؤسفة

تحياتى

ايمى

ميرو انتكة يقول...

انجى ازيك يا قمر وحشااااااااااااانى جدا جدا جدا

انا توقعت انها قصة بس بس النهاية صعبة قوى

بس جميل يا انجى ربنا معاكى وحاولى تانى كمان ومستنينك

سلامة سلامة يا حبيبتى

حاسوباتيه يقول...

لو هنكلم على السرد فهي قصه مشوقه وتخلي القارئ يكلمها للاخر لو هكلم عن القصه فهي جميله وصعبه في نفس الوقت بالتوفيق

Mona Shereif يقول...

جميله اوى على فكرة وبجد حباها
بس النهاية صعبة اوووووووووى

طيب هو لو فيه حد كده .. تفتكرى يعمل ايه فى نفسه؟
طبعا غير الانتحار

aboud يقول...

اولا احب احيكى على فكرة انك تكتبى قصة قصيرة و اقولك ان الموضوع هياخد وقت معاك على ما تبقى كويسة اوى فيه لان الواحد بيكتب وبعد كده بيعيد اللى كتبه كذا مرة
ثانيا النقد
كنت اتمنى لو كانت حوار متبادل يعنى نسمع الردود اكيد كانت هتفرق فى المعايشة لانى حسيت انها رسالات موجهة متتابعة لان مينفش تسيبيها نقط لان اكيد فى جزء منها كان مبررات ودفاع عن النفس
كلمات استخدمتيها كتير اوى وكان الاحسن عدم تكرارها اوى كده ( طول عمرك - ادافع عنك - هبلك )
بالنسبة للفكرة فهى انا مش عارف اتقبلها ده لو انا فاهم صح
انا فهمت انها بتكلم نفسها
ايوه فى ناس بتنتحر عشان معدتش قادرة تتعايش مع نفسها اكتر من كده بس مفيش حد فيهم بيتكلم مع نفسه وبيطلب منها تخرج من حياته فلما ميحصلش ينتحر
وبرده لو حد بيكلم حد تانى مش راضى يخرج من حياته بالزوق يقوم يقتله .. صعبة اوى برضه
جملة ( طول عمرى بكرهك ) مش متوافقة مع المضمون لان لو طول عمرها بتكرهها طب ليه كل التضحيات دى من الاول كان هيبقى التصرفات بينهم عنيفة
لكن بكرهك (معناها دلوقتى ) معقولة لان الكراهية كده نتيجة منطقية
النهاية بقى بصراحة معجبتنيش لان الشخص اللى داخل بيقول لقيتها منتحرة بالموس كان عنده برود غير طبيعى فى جملته لا تتناسب وبشاعة المشهد اللى شافه وبعدين مش فاهم هو بيقول لدكتور مين ؟!! وليه ؟!!
فى الحالات دى بيكون ظابط او وكيل النيابة لكن دكتور ده هيبقى فى حالة لو هى لسه عايشة

بس القصة كويسة و لو وضحت بس الفكرة شوية فة الكلام هتبقى احلى و احلى

aboud يقول...

معلش بقى التعليق طويل بس انا اصلى غاوى نقد فما صدقت وهتلاقينى بطلع القطط الفطسانة
بس نسيت اقولك ان العنوان عجبنى جدا جدا لسببين
الاول ان جريمة قتل تعطى غموض كبير يخليك متعرفيش هى قتلت نفسها ولا حد قتلها وده يعمل اثارة لذهن القرئ ويخليه يفكر وده شىء ممتع
الثانى ان حتى الانتحار يعتبر جريمة قتل بل وابشع من كده كمان لان اى جريمة ممكن تتوبى بعده الا دى لان بيكون الوقت فات وكمان ابشع حاجة فيها انها من الانسان فى حق نفسه .
وبس وبالوفيق دايما يا رب

Foxology يقول...

شيزوفرينيا على الصبح :))

والله القصة جميلة اسلوبها فيه تركيز شوية وان فعلا الواحد ممكن يوصل للمرحلة دى

تحياتى :)

mohamed ghalia يقول...

خلاص الموضوع بسيطة خريجها من حياتك.
قصة رائعة واسلوب اروع وأكبر دليل إننا حسناها قوى
تقبلى تحياتى ودمتى بود

غير معرف يقول...

فعلا حلوة اوى
بجد
وكمان بدايتها كمان جامدة
بكرهك...
قصه ممكن تكون بتحصل كل يوم
بس من غير انتحار
سلمت يداك



حزينه

حزينه يقول...

انا اللى علقت فوق بس
مش عارفه ايه اللى حصل


حزينه

princess يقول...

بصى طول الوقت كلنا عايشين فى صراع مع النفس بس بطلة القصة اختارت الطريق السهل مفيش ارادة ولاعزيمة
بس هقولك على حاجة صغيرة كنتى بدل النقط اعملى حوار متكامل عشان نشوف اسباب النص التانى ايه
تحياتى يا انجى

صوت من مصر يقول...

راى ايه
دى حاله اكتئاب انا كنت عايشا ومجربها ومن الاخر حاولى تطلعى منها بسرعه لانها بتطول يلا باى

فارس بلا جواد يقول...

الروح دائما هي المرشد للصواب .. أحيانا تدفعنا علي فعل أشياء قد تبدو غير منطقية ولكنها في النهاية يصدق حدسها
لذلك تلك الأتهامات التي كانت موجهة في قصتك للروح تحمل الكثير من التجني
وحين يشتد الصراع مع الأرواح لهذا الحد ربما بالفعل يكون نتيجته الأنتحار بعد ان فشلت بينهما كل محاولات الصلح
القصة جيدة وفكرتها رائعة .. وانا احب دائما الأفكار المبتكرة .. كان ينقصها ان تكتسب جمال الفصحي
دمتي بكل خير

مواطن مصرى نايم يقول...

جميلة يا انجى بجد
و الله جميلة
الله ينور عليكى
بس حنحكم عليكى من المره الجاية
و حتلاقى بقى نقد لما تزهقى منى
لكن دى بجد جميلة يا انجى
استمرى
و القهوة بتاعتك عندى

حمادة زيدان يقول...

أنووووووووووووووووووووووووووووووووج


المنطقة دي حلوة أوى وبحب دايماً أنخرب فيها ... جميلة جداً والله كنت عملت حاجة كدة شكلها زمان بس كنت أحم أحم بتكلم مع نفسي في مواضيع خاصة

تسلم يا دكتورة نوجا

وسلاموزات بعرض المدونة وطولها

محمود محمد حسن يقول...

انجي ازيك

تجربة كويسة ومميزة ، يا انجي مش لازم اول حاجات نكتبها تبقى كويسة وتنال استحسان الناس ، المهم اننا نحاول

الموضوع كان عايز حبكة اكتر من كده شوية بس هوا حلو على العموم

نعكشة يقول...

توقعت من البداية تكون بتكلم نفسها

:D

خبرة بقة


سلام عليكي

Mahmoud يقول...

اخيرا تدوينه
بقولك صحيح انا اتخيل الموقف ان الشخصيتين هما شخصيه واحده مصابه بالشيزوفرينيا
زى فيلم fight club
مستنى ردك

Mero.. يقول...

يا سلااام
فكرتيني بادوارد نورتون في primal fear
وعشت المشهد مصور :) :)
تسلمو دياتك خيتي ...

elsha3er يقول...

اسلوبك جميل والله استمرى على كدة

احمد الشاعر

Rehab يقول...

انا هبدأ بنفس التعليق بتاعك اللي كتبتهولي علي القصة بتاعتي..
انا عارفة كويس اوي النوع دا من الكره ...
دا بقي اعتقد انه كره النفس للنفس...
يعني لو الانسان عنده انفصام وعايز يتخلص من الشخصية التانية لزم النهاية تكون كدا..
بجد الفكرة حلو مووووووووووت ..
ربنا معاكي ومعايا
وانا مستنيه رايك في باقي القصص والحكاوي بتاعتي..

TIMMY !! يقول...

بصراحة ..

أنا ماليش في القصة و الحبكة و كده ..

بس اللي أقدر أقوله كقاريء .. إن القصة شدتني من أول كلمة : "كرهتك " و فضلت ماشي و راها لحد الآخر :) ..

و يارب المقصود من القصة ما يكونش زي اللي في بالي ..

لأني أعرف واحد كان وصل للدرجة دي ..

بس بدل ما يقطع شرايينه بالموس بقى يعمل self injury بالموس برضه ..

ربنا يهدي الجميع ..

تحيتي

كيكى عوووووو يقول...

اممممممممممممممممممممممممممم
اممممممممممممممممممممممممممممممم
والله يا انجى بقالى نصف ساعة اقول اعلق ولا معلقش...
لانى والله مش لقية كلام..وانتى عارفة اول ما قريتها قولتلك اية؟؟
انوج بجد والله مش عارفة اقو ل اية
لقية بس ملحوظة صغيورة انا معاة الى قالولك ان عنوان القصة مش موفق لسبب من وجهة نظرى انك حرقتى النهاية..
*بكرهك*
يعنى حاجة زى كدة..
من ناحية السرد والحبكة بجد عشرة على عشرة...وبحبك اوى لانك بتعرفى تجيبى المضمون علطووووووووول وتعرفى توصلى الاحساس علطوللللللللل
عاجبنى اوى اخر جملة بتاعت على ما اظن الام..دخلت عليها يا دكتور لقيتها قطعة ايدها بالموس..والله يا بنتى ماشاء الله عليكى تسلمى
.................
اخر حاجة قبل ما نلوم على بطلة القصة؟
ما كنا نشوف الاول اية الظروف الى خلتها تعمل كدة!!!
اةةةةةةةةةةةةةةةة ياما
.........................
سلام يا رخمة علشان كنت عايزك اكلمك والنوبيل مقفول ولمة اجى اسكندرية هقتل الولة بتاع النت قريب
امواااااااااااااة
عووووووووووووووووووووووووووووو

كيكى عوووووو يقول...

يالهووووووووى اية التعليق دة لا وبقولك مش لقية كلام
امال لو كنت لقية كنت هعمل اية
؟؟؟؟
معلش بقى انتيخك واستحمليها
عووووووووووووووووووووووووووو

محمد أسامة رسلان يقول...

لأ ياأستاذة

العملية مش ناقصة كآبة خالص

:)

قريتها بس لا يمكن اقراها تاني

بنت مصريه يقول...

لا والله ينفع تبقى سيناريست
هايله
بس انا ليا سؤال هى التانيه ماتكلمتش
اه مهى جبانه بقى
ههههههههههههههههههه
احييكى يا اوجى

دعاء مواجهات يقول...

حبيبة قلبى وحشانى جدا ومفتقداكى اوى

القصه حلوة اوى وبقترح تسميها إنفجار

لانها بتعبر عن دة

يابنتى انتى خسارة ف الطب

بجد اسلوبك بيعجبنى جدا لانو بجد متميز

بيس ياقمر

اهالينا زهقوا يربونا يقول...

حلوه يا انجي

فكرتنا بكلام نائمه في الارياف

لما كتبت بوست عن نفسها

انا بقراها ولالالالالاخر لحظخ متوقعه انك هتقولى انها نفسك

بس النهايه متوقعه يمكن لانى قريت ششئ مشابه ليها قبل كده

سلام بقه عندنا فرررررررح

Unknown يقول...

كوارث:نعم يا اخويا؟؟؟؟


ابن رشد المصرى:طبعا اتقبل تحياتك وطبعا كلامك صح............


محمد ياسر:واضح فعلا انك متعرفش تتكلم فيه...ماهو دة اللى انا اقصده وشكرا جدا جدا والعنوان كنت اقصد بيه التمويه على الموضوع وبعدين كمان هى بتتعامل مع ذاتها على انها واحدة تانية بتقتلها......


عمدة:لا مش قاسية على نفسى عشان دى قصة عادى مالهاش اى علاقة بى وكلامك صح طبعا بس الضعيف مش بيعرف يوفق....



رومانسى:لو فيها سنة تفاؤل كانت بقت قصة تانية حضرتك.........



emmy baby:شكرا على رايك يا جميل والله بتحرجينى...........

Desert cat يقول...

بصراحة متنبأة لكتابة القصة بمستقبل باهر ان شاء الله
ان الاحداث تشد بطريقة ممتازة
مودتى

تايه في وسط البلد يقول...

اهلا انجي
دي تاني زيارة لي علي فكرة ومش فاكر اذا كنت علقت قبل كده ولا لألكن انا سعيد اني انا هنا
بالنسبة للتدوين انت معاكي حق طبعا انك تحددي طلبك واكيد انت شفتي تعليقات ( خرافية )قبل كده اكدت انك بتكتبي من العباسية مثلا!!
بالنسبة للحبكة يا ستي اريد ان اقول بمنتهي الصراحة انني كنت اعرف من اول التدوين انها تخاطب نفسها وهذا لا سمح الله ليس ذكاء مني او نحوه كل الموضوع ان الحبكة التي تجتذب الانتباه في اتجاه بينما تختتم بمفاجأة قد تم استهلاكها بالكامل - وازعم ان من برع فيها دوما كان د/ نبيل فاروق -وعموما هذا لا ينتقص من موهبتك في شئ وستظلين تبحثين عن اسلوبك الخاص طوال أعوام قادمة حتي تستقري علي شكل يمثل بصمتك السحرية في دنيا الادب

ونصيحة مني اذا ما كنت تهوين الكتابة النفسية هذه فعليك توسيع قائمة قرائاتك لتشمل كافكا وادجار الان بو وستيفن كينج

بالف توفيق وانا اعتز بتعليقك لدي

غير معرف يقول...

عاوزين يا انجى

نشوفك فى فنون التغيير

ابقى طل علينا وقول لى رأيك
فيها وفى البوست الجديد

بعنوان
نسيج جديد

ودمتى بخير

منه مرتجى - عازفة الأوتار يقول...

القصة جذابة جدا
و بدايتها جميلة

بجد حلوة اوى
تسلم ايدك يا جميل


فينك محدش سامعلك صوت
طمنينى عنك يا جميل

ريمان يقول...

هههههههههه

انا اتخديت والله اما دخلت لقيت حد بيقول اكرهك

بس بجد قصه حلوه والله وجميل اوى الصراع اللى فيها

وكمان الفكره جديده

ميه ميه بجد

مع تحياتى

ريمان

Unknown يقول...

ميرو انتكة:معلش هى النهاية صعبة فعلا وانت كمان وحشتينى جدا جدا........


حاسوباتية:والله انا مبسوطة انها عجبتك فعلا يعنى............


sometimes:والله مش عارفة بس ممكن بدل ما ينتحر يموت نفسه هههههه منورة.....


aboud:انا معاك انه بياخد وقت ثانيا بقى انا كنت قاصدة انه ميكونش حوار لانها ملسعتش على الاخر خالص يعنى .. الكلمات المكررة انا معاك فيها جدا جدا ودة غلط منى..لما يكون مكتئب ممكن يطالب نفسه بكدة واكتر من كدة كمان..طول عمرها بتكره نفسها دة عادى لانها مش عارفة تتعايش ومجبرة من زمان بس بتكره نفسها من زمان وفى نفس الوقت بتساعدها من زمان..النهاية ليه باردة؟؟ ممكن تكون دى ممرضة مستشفى ومتعودة على كدة كتير و ممكن تكون حد من اهلها بس بردو مش فارق معاه كتير ممكن تكون واحدة شغالة عندها فى احتمالات كتير ومبررات كتير للبرود..العنوان عجبك اخييييييييرا حاجة عجبتك الحمد لله..شكرا بجد بجد على النقد والله فعلا متشكرة على الوقت والجهد...............


foxology:اه بيقولوا الشيزوفرينيا مفيدة على الريق كدة..شكرا على رايك وتعليقك...........


mohamed ghalia:طب الحمد لله انها عجبتك انا مبسوطة جدا........

Unknown يقول...

مشكلة المدونة بتاعتك يا إنجي، إن عدد الردود علي موضوعاتك -ما شاء الله - كتيرة، لدرجة إن الناس بتكون قتلت الموضوع تعليقا، ومفيش حاجة جديدة أقدر أضيفها، فما ما تزعليش لو ما علقتش علي موضوع عندك، واعرفي ساعتها إني تعليقي وافق تعليق أحدهم، وبالتالي احتفظت بيه لنفسي بدل التكرار.

بالنسبة للقصة، أنا متفق تماما مع "فارس بلا جواد" بالنسبة لموضوع الفصحي، انتي جامدة في الفصحي علي فكرة، جربي تعيدي صياغة القصة بيها، اكيد هاتكون أحسن كتير.

نوسه وريمان فى هاكونا مطاطا يقول...

السلام عليكم

بجد اسلوبك جميل اوى

وقصه فريده من نوعها

مع تحياتى

elsha3er يقول...

اتأخرتى علينا شدى حيلك


احمد الشاعر

د/ رامي شهاب الدين يقول...

القصة بجد راااائعة

من أجمل ماقرأت فى الفترة الأخيرة

يمكن أقوى مافى القصة إنها بتخلى الواحد يتساءل عن الطرف الآخر فى المحادثة ، وفى الأخر خالص تنقلك القصة لملعب تانى خااالص

أهنيكى بشدة على تلك القصة الرائعة

دمتى بكل الود .. تحياتى

Unknown يقول...

حزينة:ليه من غير انتحار؟؟ وارد جدا الانتحار وشكرا على رايك وتعليقك.....


princess:هى اختارا من غير ارادة اصلا هى مجنونة او على الاقل خالص مقربة من الجنان عشان كدة مينفعش يبقى الحوار متبادل وشكرا ليكى.........


فارس بلاجواد:مقدرش اقول غير شكرا.....


مواطن مصرى نايم:فين القهوة يا ابنى؟؟ حاجة غريبة بس انا كفاية عندى التعليق الحلو دة وانا مستعدة للحكم بس لو طلع عندك الشايب هنحكم عليك بردو ماشى؟؟ انا مستعدة لاى نقض ومتشكرة بجد بجد على تشجيعك يا اسلام.......


حمادة زيدان:اهلاااااااااا بطول المدونة وعرضها ومتشكرين على التشجيع ونخرب براحتك يا حمادة بيه........


محمود محمد حسن:انا متفقة معاك طبعا و شكرا على التشجيع وشكرا كمان على رايك...........


نعكشة:خبرة طبعا..منورة يا خبرة.......


roiter:اه هم فعلا شخصية واحدة فعلا بس دة واضح جدا جدا يعنى على العموم منور جدا جدا............


mero:والله مشفتش الفيلم بس واضح انه مدح يعنى على العموم شكرا يا اخ ميرو وماتبقاش تتاخر علينا كدة المدونة كانت مضلمة خالص..........


الشاعر:حاضر هستمر والله متشكرة جدا على التشجيع............

عايش علي الهامش يقول...

كقصه فانا اعتبرها ناجحه جدا كقصه صغيره تليق بمضمون فلسفي جيد ربما ابدو غريبا ان قلت ان النقط في الحوار هي اساس الفلسفه لانها وجهت الحوار لكل قائ انت تنظر داخل نفسك وتبحث هل انت راض عنها
لان اتكلم عن الذهان الواضح في القصه واتمني ان لا اسمع عن انتحار طالبة طب امام المرأه فاخبار الحوادث تحمل الكثير من تلك الاخبار ولكن ان تكون كاتبه لمدونة اسمها هات من الاخر فسيكون الامر شديد الصعوبه لي
شكرا لك

Nabil يقول...

حلوه اوى علي فكره والاسلوب جميل

بس الحقيقه انا عرفت من المقطع التالت انها بتكلم نفسها

كان ممكن اضافة اكثر من التضليل علي القارىء علشان يتصدم لم يعرف انها بتكلم نفسها
انا مش متخصص بس بقولك راى طرأعلي بالى كقارىء

بس بجد والله هى قصه جميله ومضمونها حلو جدا جدا

تحياتى واستمرى للافضل ان شاء الله

funckydoctor يقول...

ايه ده بتكلم نفسها
بس بجد فكرتها رائعة تسلم ايدك

forbidden zone يقول...

سلام
الحوار جميل وبيشد بس حسيت إن القصة عايزة توضيح شويّة لكن الصراع جميل وواضح...
إسراء..أتمنى أن تزوري مدونتي

toufic mamdouh يقول...

حلوة بس عوزة تحبيش يعني مثلا تديلو بالكرسي في دماغه بالسكينه في بطنه عشان يبقي فيه دراما وفي الاخر البطل والبطلة يموتو ويطلع مشهد درمي جامد ياعيني المهم هي حلوة ليكي مستقبل

اقصوصه يقول...

بصراحه القصه مثيره

ومخيفه نوعا ما

بانتظار جديدك

Muhammad Mammdouh يقول...

جامده جدا على فكرة استمرى بس انا فقستها من الاول مش عارف لية

NeRmeeN يقول...

هههههه جامدة اخر حاجة بجد :)

السلام عليكم اولا

ثانيا انا مبسوطة انى وقعت فى مدونتك بالصدفة

ثالثا بقى انا زبونتك من قبل حتى ما اقرا الكلام :]

رابعا بقى بجد قصتك جميلة ..و بسيطة ... وكتير الواحد بتبقى جواه شخصية ضعيفة غلبانة بتوقعه فى مشاكل كتير ..والواحد بيضطر يعمل شخصية تانية تدافع عن الشخصية الهابلة اللى جواه ..ومع الاسف الشخصية القاسية هى اللى بيشوفها الناس

يا نهااااار ازرق...ده انتى حللتينى من غير ما تعرفينى :|

وعجبتنى النهاية ...ماكنتش متوقعة انها هتعمل كده فى الاخر :ي

تحياتى ليكى و لقلمك المبدع:)

elsha3er يقول...

انتى فين طب طمنينا حتى عليكى

احمد الشاعر