الجمعة، 22 أغسطس، 2008

حاجات شبه الخواطر3

الحاجات اللى شبه الخواطر كترت قوى كدة بصراحة بس انا قلت ان الاكتئاب كدة خد وقت اكتر من حقه الصراحة وما ينفعش كدة خصوصا ان الموضوع كبير وانا ما ينفعش افضل قارفة الناس جنبى كدة فقررت انى اخرج من هذه الحالة الشنيعة او على الاقل احاول اخرج منها بس بردو لاااااازم تدعوا لى والنبى -المهم-
طبعا باين من العنوان انى هاكتب حاجات شبه الخواطر وهذه الحاجات هى كالتالى.
اول حاجة عايزاكم تفخروا بية كدة ودة ليييييييييييييييييييييييييييه؟؟؟؟
عشان اختكم عقبال عندكم -لا مش هتجوز بعد الشر- اتنشر لها مقال فى مجلة انترنتية اكتر حاجة فرحتنى ان مكتوب تحت العنوان بقلم انجى ابراهيم .. عجبتنى الجملة بصراحة وكيفتنى قوى عايزاكم بقى تروحوا تشوفوا المقال وتقولوا رايكم بكل صراحةhttp://elkopry.com/index.php?content=26&edit=16 دة لينك مجلة تحت الكوبرى التى شرفت بانها نشرت لى مقال طبعا وواضح انى هاقعد كل المحررين فى بيوتهم(دة تهجيص ماحدش يركز)..
تانى حاجة فى الخواطر عايزة ااكد عليكم دعواتكم عشان غالبا العملية الاسطورية هتكون الاسبوع الجاى-يارب نخلص بقى-
تالت حاجة فى الخواطر بقى شوية تاجات كدة على الماشى اصل نجوم المجتمع اللى زيى مش بيجيلهم تاج وللا اتنين لااا شوية تاجات و مع انى بحب اخلى حياتى الشخصية بعيدا عن الاضواء والشهرة والنجومية وكدة بس دة حق الجمهور علية (كفاية كدة نفخ)
اول تاج من نعكشة......
البنية بقالها كتير ما نزلتش بوست جديد ادعوا لها بقى عشان وحشتنى كتير
التاج بيقول........................
اول سؤال بدأت تدوين من امتى؟ و دخلت العالم دة ازاى؟
بدأت تدوين السنة دى من شهر مايو .... دخلت العالم دة من بابه اكيد يعنى مش من الشباك بس انا كنت مرة باتمشى على شط النت وكنت باعمل سيرش على حاجة وفى نتايج السيرش دخلت بالصدفة مدونة اشرف حمدى و عجبتنى جدا ودورت بقى بعدها وعجبنى الموضوع وقررت انى انشر الكلام بتاعى بدل ماهو محبوس فى الكراسة الخضرا تحت مرتبة سريرى.........
تانى سؤال ايه كان انطباعك فى البداية؟
امممممممم هنكشف الهبل بقى انا انطباعى كان انى باعمل حاجة عظيمة جدا وان دى حاجة مهمة طحن وكنت مبسووووووووووطة جدا جدا طبعا الشعور دة لسة موجود بس مش بنفس درجة الهبل يعنى عارفة انى باعمل حاجة مهمة بس من غير عبط .
تالت سؤال مين اكتر واحد بتهتم بتعليقاته على البوست؟
امممم هم كتير صراحة كتير قوى يعنى كل الناس اللى بحب اقرا لهم يبقى باحترم دماغهم وبالتالى باهتم بتعليقاتهم جدا.
رابع سؤال مين اتعرفت عليه من المدونة ونفسك تتعرف عليه فى الحقيقة؟
هو سؤال غريب صراحة انا اتعرفت على ناس واتكلمنا وبقينا اصحاب يبقى انا كدة عرفت حقيقتهم مش لازم اشوف وشوشهم يعنى بس ممكن نقول مين نفسى علاقاتى معاهم تمتد ونشوف بعض ونتقابل وكدة يبقى دعاء مواجهات و اسامة امين بس دة حاسة انى لو قابلته صدفة هاعرفه و حمادة زيدان وميرو انتكة عسل البت دى و عبد الله غنيم ربنا معاه ويرضيه يارب .
ايه اهم حاجة اتعلمتها من عالم التدوين؟
اممممم اتعلمت ان فى ناس بتفهم على كوكب الارض وان الارواح بتتلاقى فى ملكوت الله على راى خالتى نوسة.
ايه اكتر حاجة كرهتها؟
اكتر حاجة كرهتهااا؟؟؟ لما تبقى فاكر ان الشخص دة كلامه بيعبر عن شخصيته وبعدين تكتشف العكس تماما وان الافكار والكلام كلام فعلا.
ممكن تدى مثال عن اللى بتحلم تلاقيه؟
باحلم يا لهوىىىىى دة انا كدة عايزة مش بوست لا انا عايزة مدونة عشان اتكلم عن احلامى بس اكتر حاجة باحلم بيها دلوقتى ان حالتى النفسية تتحسن واعمل العملية وانجز بقى.
حاسس ان التدوين له تأثير؟
اهو السؤال دة بالذات تعبت من كتر الكلام فيه مع حد كدة شايف عكس رايى(مساء الخير يا بيه) اه شايفة ان ليه تأثير لو ماكانش على المستوى العام يبقى على المستوى الشخصى لانك هتتعلم تقول رايك بحرية وهتتعلم تناقش وتفكر وتتواجد.
قول كلمة اخيرة؟
كلمة اخيرة.
كدة اول تاج خلص
تانى تاج من اسامة امين(ربنا يهديه قولوا امين)
التاج بيقول(يا نهار اسوح دول طلعوا تاجين)
طب اول تاج فى التاجين اول سؤال فيه بيقول هل سبق وفكرت فى افعال مجنونة؟
هاهاهاهااااااى اه طبعا فكرت فى افعال مهبوشة مش مجنونة .
هل نفذت احد هذه الافعال؟
انا نفذت افعال غريبة لكن مش مجنونة صراحة.
ما هو رد فعل من عرفوا بهذه الافعال؟
انا قلت انها افعال غريبة مش مجنونة ومعظمها تتعلق بطول اللسان مع حد ما احترمنيش ويتخاف منه فالناس بقى يقعدوا يقولوا عبيطة انت؟ ايه اللى انت قلتيه دة؟ وكدة يعنى.
ما هو احساسك بعد ان قمت بهذه الافعال؟
ولا حاجة.
هل سبق ووقفت امام المراة لتقول لنفسك انت مجنون؟
ايون حصل طبعا.
تانى تاج من اسامة
لو اعطيتك 3 وردات هتهديهم لمين؟
اه بقى احراج طب بصوا انا هاستثنى اصحابى واخواتى هابقى اجيب لهم انا ورد على حسابى اما ال3 وردات واحدة لماما وواحدة لخالو وواحدة لدكتور احمد خالد توفيق واسلمها له بنفسى (تلكيكة بقى).
لو ورقة فيها 3 سطور هتكتب فيهم ايه؟
يارب ارضينى بما رضيت لى وعافنى فيما ابقيت حتى لا احب تعجيل ما اخرت ولا تاخير ما عجلت..دة دعاء عرفته لى باكينام صاحبتى وعجبنى قوى وباقوله كتير.
ما هو هدفك فى الحياة؟
هدفى؟؟؟ هدفى انى احقق كل اللى انا عايزاه كله كله.
ان شاء الله بكرة احسن من النهاردة مؤمن بالمقولة دى؟
اممم دة على حسب حالتى النفسية صراحة يعنى ماعنديش رد قاطع فى الموضوع دة.
اجمل مقولة سمعتها فى حياتك؟
لا دول كتير بس اخر حاجة سمعتها وعلقت معايا لا يستطيع احد اهانتك الا بمساعدتك.
من المغنى اللى بتحبه جدا واكتر اغنية بتحبها؟
اكتر مطرب محمد منير وكل اغانيه باحبها جدا مفيش حاجة بعينها يعنى.
غزة تمثل لك ايه فى حياتك؟
نتكلم بصراحة؟؟؟ ولا حاجة انا مش بافتكر غزة الا لما اشوف الاخبار واعرف ان فى حاجة حصلت اتاثر شوية وبعدين انسى حاسة انى خلاص فقدت احساسى بالقضية يمكن دة قلة احساس منى بس هى دى الحقيقة.
تعطى لانتمائك لوطنك كام فى المية؟
مش عارفة ايه المعادلة اللى ممكن احسب بيها الانتماء بس اللى اعرفه انى بحب بلدى جدا وحاسة انى ما اقدرش ابيع القضية.
لو تزوجت وانجبت بنتين وولدين هتكون اسماءهم ايه؟
هاهاهاها دة اساسا خيال علمى صراحة بالنسبة لى ولذلك مافكرتش فى اسماء لكن لو حصلت المعجزة يبقى هاسميهم اسماء غريبة واعرفهم معانيها عشان لما حد يعرف اسماءهم يقول الله اسمك حلو يا حبيبى ياترى تعرف معناه يروح ابنى بكل سماجة يقول له اكيد اعرفه بس ياترى يا عمو تعرفه انت؟ رخم قوى الواد دة ابنى بقى.
غشيت فى امتحان وانت صغير؟
تصدقوا لا.
لو اتعرض عليك رشوة كبيرة وانت فى زنقة مالية هتعمل ايه؟
اممم اللى انا متأكدة منه انى لو فضلت زى ما انا انجى بتاعة دلوقتى يبقى اكيد مش هاقبلها بأذن الله لكن مين عارف مش يمكن اتحول وابقى شيخ منصر؟ يعنى من الاخر شخصيتى بتاعة دلوقتى مش هتقبل الرشوة.
قول 3 صفات فى3 كلمات تصف بهم نفسك؟
ايه الرخامة دى يعنى من عينة رقيقة حالمة رومانسية وللا ايه؟؟؟ طب نحاول متسرعة ..عصبية.. قلوقة.
اول مرتب ليك وكان كبير هتجيب ايه ولمين؟
انا فعلا اخدت اول مرتب ليه بس ماكانش كبير جبت لاختى دبدوب كبييير ولماما شيكولاتة كادبورى ولاخويا علبة جل وبابا اخدت منه تمن شحن موبايلى باين.
ايه المجال اللى غير دراستك وشايف نفسك فيه قوى؟
لا تفرق نفسى فيه حاجة وشايف نفسى فيه حاجة تانية يعنى مثلا نفسى اكمل كتابة للابد بس دة مش معناه انى برنارد شو ونفسى اشتغل فى الاذاعة بس دة مش معناه انى امال فهمى يعنى نفسى فى حاجات كتير .
بتحب السفر؟
ايون.
طب دلوقتى حالا ايه المكان اللى نفسك تكون فيه؟
فينيسيا اللى هى البندقية حضرتك ايوة اللى فى ايطاليا دى اييوة هى بتاعة شكسبير اللى فيها مية فى الارض و حاجات كدة الله ينور عليك.
خلصت التاجات هو صراحة كان فى تاجات تانية بس كفاية كدة تنفيخ عليكوا بقى هارحمكوا من الباقيين وابقى اجاوبهم مرة تانية لان ومن يسألنى عن باقى التاجات هأقوله
ولكن هذه قصة اخرى.....................................
اخر حاجة بقى كل سنة واحنا طيبين رمضان قرب خلاص جبتوا الفوانيس وللا ايييييييييييه؟؟؟؟

الثلاثاء، 19 أغسطس، 2008

ادعوا لى

سلامو عليكو... ازيكوا يا بشر..... مش عارفة المفروض اقول ايه او احكى ايه او اهزر وللا اتكلم بجد بس اللى متاكدة منه ان اى حاجة هاقولها هتبقى سخيفة جدا ......... حالتى النفسية زى الطين فى حاجات بالهبل ماكنتش عاملة حسابى عليها حصلت ..العملية اتاجلت عشان حالة قلبى لا تسمح... منسحبة من الحياة بشدة... مش باعمل اى حاجة بالمعنى الحرفى المجرد للكلمة....بانام معظم الوقت بعد ما كان الارق صديقى الصدوق.... مش عايزة ادخل على مدونتى ولا قادرة اتابع مدونات حد .... مش باتفرج على التليفزيون ولا اعرف اخبار اى حاجة فى الدنيا.....تصرفات الناس باخدها على اعصابى وعندى احساس شنيع بالتطنيش..... قربت ابطل كلام حتى.
ايه بقى لازمة الكلام دة؟؟؟؟؟
ادعوا لى ممكن؟؟ بس ادعوا بذمة بالله عليكم... ادعوا ان حالتى تستقر واعمل العملية واخلص ..
انا مش بازور حد انا عارفة بس اعذرونى اول ما افوق وارجع كدة لحالتى الطبيعية هاقرفكم تانى ما تقلقوش..

الخميس، 7 أغسطس، 2008

أجازة اجبارية وقصة قصيرة

سلامو عليكو.. طبعا العنوان عجيب ايه اجازة اجبارية يعنى وايه اللى جاب الاجازة للقصص هى البت دى مش هتبطل فزلكة...
اولا الاجازة دى لها سبب...........استعدوا...............بيان هام..........
يا كل اصحابى وحبايبى المدونين.........ادعوا لى...
ليه؟ عشان يوم السبت اللى بعد الجاى -اللى مش بعد بكرة دة لا اللى بعده ركزوا- هأدخل المستشفى عشان اعمل اول عملية جراحية فى حياتى ان ان ان ( موسيقى مؤثرة) بس ماتخافوش يعنى انا جبت النتيجة من الكنترول وعرفت انى باذن الله هابقى زى الجن وهارجع اقرف فى حضراتكم تانى ولا تقلقوا...
اسمع حد لذيذ بيقول ولما العملية كمان اكتر من اسبوع قرفانا من دلوقتى ليه؟
اقوله لو مش عاجبك اخبط دماغك فى الكيبورد بس فى سبب.. السبب هو انى يوم الحد اللى جاى-اللى هو بعد بعد بكرة دة ركزوا- رايحة مطروح معسكر تبع الجامعة فى الصحراء بقى وخيم وجو تانى عشان كدة قلت رخامة يعنى انزل البوست دلوقتى عشان بدل ما تدعوا لى يومين تدعوا لى اسبوع ويومين مافيهاش حاجة مدونتى وانا حرة فيها.....
طبعا انا عارفة ومتاكدة وموقنة انكم هتفتقدونى عشان كدة بقى قلت اسيبكم تتسلوا فى قصة قصيرة من ابداعاتى و كدة اكون فسرت العنوان.
يللا اسيبكم بقى مع القصة بس ما تنسوش تدعوا لى..............


.........................................................................................................................................................................

فشل
......
انها تعيش ايام من اسعد ايام حياتها . تعرف ان هذه الايام سوف تكون من الذكريات الغالية ذات يوم.
تشعر برضا بالغ عن الحياة وعن ذاتها فقد نجحت بعد جهد جهيد ان تقنع صديقتها باهمية الحياة و تخرجها من حالة الاكتئاب التى كانت تعيش فيها. انها ترى الامان الان كسهم معادلات الكيمياء - رايح جاى- بينها وبين صديقتها فهى تشعر بالامان الشديد بعد ان منحت صديقتها الامان و ساهمت فى زوال الاكتئاب و اثنتها عن الافكار السوداء.
امنت بقدرتها على التاثير فى البشر و بانها تستطيع ان تتفهم و تعالج وتحتوى المواقف العصيبة.. رباه كم يشعرها هذا بالسعادة فبعد صولات وجولات مع صديقتها استطاعت ان تقنعها و بالتدريج اعترفت صديقتها ان الاقتناع تحول الى يقين ان الاكتئاب ليس هو الحل.
.............................................................
-الو.......ايوة يا طنط......هو ليه انت اللى بتردى على الموبايل؟
-اصل احنا فى المستشفى.
-مستشفى؟؟؟ ليه؟؟ خير؟
-شفتى..بنتى كانت عايزة تحرق قلبى عليها..حاولت تنتحر..شفتى صاحبتك كانت عايزة تعمل فية ايه..
.............................................................................
ترتدى ملابسها لتذهب لزيارة صديقتها فى المستشفى للعجب هى لاتشعر بالهلع على صديقتها فقط هى تشعر بالغضب..غضب شديد انها تخيلت ان محاولاتها اقنعت صديقتها وان صديقتها اوهمتها انها اقتنعت..
فشل اخر ينضم الى قائمة فشلها الطويلة..هل هى انانية الى هذا الحد هل يعنيها فشلها اكثر مما تعنيها حالة صديقتها الحقيقية؟
لا تعرف و لكنها سوف تذهب و تمثل دورها الاجتماعى فى الاصابة بالهلع والحزن من اجل صديقتها..لا لن يكون تمثيلا الى هذا الحد هى فعلا حزينة ولكنها تشعر بالفشل امام موقف وضعت فيه وفشلت.
ابتسمت..هى دائما تفشل مع الناس و لكنها تنجح فى الاعتراف بهذا الفشل.
نظرت الى وجهها فى المراة
-نفسى افشل فى الاعتراف بالفشل.