الاثنين، 29 سبتمبر 2008

بطل من ورق

هناك الكثير من الابطال فى هذا العالم .. وهناك ايضا ابطال من ورق فى نفس العالم ولكن تتحدد قيمة هذا البطل حسب نوعية الورق.
هناك بطل يكتسح الساحة الان بطل من ورق هو ولكن الورق هو ما يرفع قيمة هذا البطل.. انه بطل من اوراق العملة.. صنع بطولته ويصنعها من ورق عالى القيمة انه بطل من الفلوس.
انه احمد عز..عفوا المليونير احمد عز..
كل الشعب منذ شهر تقريبا كانوا على قلب رجل واحد.. احمد عز محتكر الحديد..احمد عز مليونير.. احمد عز يستفيد من نفوذه.. احمد عز ظالم.. احمد عز يمتص دماء الغلابة..
كان هذا هو رأى معظمنا او كلنا كما اعتقد ولكن هذا الرأى تغير بمعجزة الهية ما منذ شهر واحد..
قرر المهندس احمد عز ان يمنح الشباب الكثير من الامل..
يتكفل احمد عز بمنح كل شاب من المشاركين فى مشروع ابنى بيتك بطن كامل من الحديد او ما يعادله من اموال..
اقام احمد عز بالمشاركة مع برنامج البيت بيتك مسابقة يمنح فيها كل يوم فى رمضان احد الشباب شقة..
قرر احمد عز ان يمنح من حرموا من الشقة فى المسابقة خمسين الف جنيه بمعنى انه منح ثلاثون شقة وثلاثون مرة خمسين الف جنيه..
قرر احمد عز ان يمنح من فازوا بالشقق اجهزة كهربية بمبلغ خمسة عشر الف جنيه..
افعال خير بالجملة كما هو واضح..
فجأة ودون مقدمات تحول المهندس احمد عز الى بطل قومى و منقذ شعبى و اصبح رجل البر والتقوى.. تغير رأى الجماهير فى احمد عز و اصبحوا يجلونه ويحترمونه ..
شاهدت احمد عز فى احدى حلقات برنامج تليفزيونى فانبهرت بالشخصية الجبارة القوية الواثقة جدا.. رجل يعرف حقا ما يفعله.. رجل لديه عقل يعرف الاستخدام الامثل له..
لقد احكم احمد عز اللعبة .. الان هو فى نظر معظم الناس مظلوم من الصحافة والاعلام خاصة البسطاء الذين لا يعرفوا معنى كلمات مثل احتكار او اسهم او بورصة.. البسطاء الذين لا يعرفوا كم صفرا فى المليون..
جارتنا طفلة تشاهد حلقات المسابقة وهى الان منبهرة اكثر ما يكون بهذا الاحمد عز و امنيتها ان تراه..
سألت صديق لى عن ما اذا كان يشجع فكرة طن الحديد ام لا وكان رده لا طبعا مش طن الحديد بتاع عز هو اللى هيعيشنى..
ولكن كم يوجد مثل هذا الشخص الذى فهمها صح؟على الجانب الاخر هناك الكثيرون يرون ان اللى ييجى منه احسن..
ايهما صاحب وجهة النظر الصحيحة؟
هل طن الحديد مش هو اللى هيعيشنى وللا اللى ييجى منه احسن؟
انا شخصيا ارى ان مشجعى فريق اللى ييجى منه احسن اكثر واعلى صوتا من الاخرين.. فعلا تحول احمد عز الى بطل قومى ..
ما أريد ان اقوله هو ان هذه الاموال التى يوزعها احمد عز علينا بدافع الصدقة وانه رجل خير و انه يساعد الشباب هى فى الاصل اموالنا نحن لقد اخذها منا والان يعطيها لنا بدافع الصدقة.. ولكنه اخذها بذكاء رهيب وايضا يعطيها بذكاء رهيب فلاشعرنا ونحن نسلب اموالنا ولا شعرنا الان باى نوع من المهانة-زى شكة الدبوس- سهلة وبسيطة..
فى اعلان طن الحديد الهدية (ابنى بيتك يا ابن بلدى راحتك انت اهم عندى) اهم من ايه؟؟؟؟؟؟؟
اقصى احلام اى شاب هو ان يبنى بيته وبدون حديد عز يعتبر هذا حلم مستحيل من الواضح فعلا ان راحتنا مهمة جدا.
كل من يفوزون بالشقة فى المسابقة يشكرون فى احمد عز و يدعون له بالخير و يمدحونه فهم لهم سنوات طويلة فى انتظار هذه الشقة.
غيظ عارم ينتابنى من هذا التحول الذكى جدا فى الراى العام تجاه المهندس احمد عز..
انه رجل ذكى جدا اعترف بهذا ولكنى ايضا اعرف انى انا الاخرى ذكية وهناك كثيرون غيرى اذكياء لا يرون احمد عز رجل البر والاحسان انما هو مازال فى انظارنا المهندس المليونير احمد عز ملك الحديد................

الثلاثاء، 16 سبتمبر 2008

قوانين بنكهة الفوضى

انا شخصيا احب الشيكولاتة باللبن وافضل الزبادى بنكهة الفراولة... ولكنى لا احب القوانين بنكهة الفوضى..

احترم القوانين وافهمها جيدا واوافق على تطبيقها اذا ما كانت تحترم ادميتى و اذا ما كانت ليست بنكهة الفوضى ولكن للاسف فان النكهات المتوفرة فى الاسواق حاليا كلها فوضى...

انا مع قانون كادر المعلمين الجديد .. احترم هذا القانون جدا اذا كان هدفه فعلا ان يرفع كفاءة المعلم ويقوى ملكاته ويساعد فى النهوض بالعملية التعليمية.. ولكن اذا اضيف لهذا القانون نكهة الفوضى فقد مغزاه ونكهة الفوضى تتمثل فى ان تتحول اهداف القانون الى ان تكون تعجيز المعلم واختباره فيما يبتعد كل البعد عن مجال تدريسه واختباره بالقلم الرصاص مما يتيح التلاعب بالاجابات - على حسب ما سمعت- وان تخرج نتائج الاختبار موضحة ان معظم المدرسين غير مؤهلون وهذا لكى لا يستفيدوا من العائد المادى المقرر للقانون...
هذه هى الفوضى التى ارفضها.
انا مع قانون المرور الجديد .. احترم هذا القانون اذا كان هدفه فعلا الحفاظ على سلامتى على الطريق ورفع ثمن حياتى كروح لا يجب ان تهدر بفعل الاهمال .. ولكن ما ان اكتشف ان القانون يسرى على ولا يسرى على امثالى من المسنودين .. وانه لا يجب ان يحمل اى منهم حقيبة اسعافات بها ثمانية امتار شاش مفزلن - مضاف له الفازلين- وعندما يكون الهدف من القانون احراز اكبر عدد من المخالفات كاننا فى مباراة تنس طاولة..وان تكون مشكلة السائقين هى ارتفاع سعر اسكات البيه الضابط الى الضعف بعد هذا القانون.
هذه هى الفوضى التى ارفضها.
انا مع انتشار جرائد المعارضة .. وفضح جرائم المجرمين و لكنى لست مع ان يظل العنوان الرئيسى لجريدة معارضة كبيرة موثوق بها يحتوى دائما على اسم جمال مبارك.. دائما المانشيت الرئيسى يحتوى هذا الاسم وغالبا ما تكون القضية ليست حماسية ولا تهمنى بالقدر الكافى.
هذه هى الفوضى التى ارفضها.
اتخيل كل المواضيع السابقة لو نزعت منها نكهة الفوضى كانت ستكون افضل كثيرا..مثلا لو اضفنا اليها نكهة العدل او نكهة الذكاء سوف يقبل عليها امثالى اكثر.. ولن ينتشر هذا الصداع المزمن فى الجرائد والبرامج ولن نفرد حوارات ومناقشات وصفحات لمناقشة قضايا مصيرية مثل:
لماذا يمتحن المعلم بالقلم الرصاص فى امتحانات الكادر؟
ولماذا يجب ان يكون الشاش مفزلنا ولا يقل عن ثمانية امتار وليس عشرة مثلا؟
ولماذا يسافر جمال مبارك الى شرم الشيخ؟
الا تتفق معى فى هذا؟؟؟؟؟؟؟؟؟

الخميس، 11 سبتمبر 2008

الليلة عيد

الليلة عيد.... ليه الليلة عيد؟؟؟ عشان بكرة عيد ميلادى يبقى طبيعى ان البشرية كلها تقيم الافراح وتولم الولائم وكدة يعنى احتفالا بعيد ميلادى........
كبرت انا خلاص بقى عندى عشرين سنة يعنى عهد (اشر ) اللى هو تمنتاشر تسعتاشر خلاص خلص.....
السنة اللى فاتت دى حصلت فيها حاجات كتير .. حاجات وحشة و حاجات حلوة بس الاكتر كانت الحاجات الحلوة او المهمة ......
يعنى السنة اللى فاتت حصل فيها حاجات كتير كانت اول مرة تحصل لى فقط وحصريا (اكسكلوسيف يعنى) ....
مثلا السنة اللى فاتت كانت اول مرة ادون ودى حاجة مهمة جدا على الاقل بالنسبة لى ... اول مرة كائنات بشرية تشاركنى كلامى وارائى ...اول مرة اتصاحب على ناس عمرى ما شفتهم بس احساسى اننا اصحاب قوى ...
كمان السنة اللى فاتت كانت اول مرة اشتغل و اول مرة اسيب الشغل واخد قرار انى هاقفل باب مهم و افتح انا لوحدى باب يمكن صعب لاسباب تتعلق بمصالح الكرامة العليا.......
كمان السنة اللى فاتت كانت اول مرة اعمل عملية واهم حاجة فى الموضوع دة انى اتعاملت مع دكتور نديم اللى هو اساسا محتاج بوست لوحده عشان اوصف كم هو رائع و عظيم و مؤدب و فاهم و طيب و شهم و خدوم و بشوش و زى القمر من الاخر كدة ابن ناس يعنى ماقابلتش زيه كتير وما افتكرش انى هاقابل زيه تانى اصلا.......
انجازاتى بقى السنة اللى فاتت مش كتير ومش مهمة كالعادة طبعا ......
يعنى من عينة انجاز فى كورسات الانجليزى ... قراية رواية يوتوبيا... قرارات فى حاجات مهمة... كدة يعنى.
بس اهم حاجة حصلت ان فعلا السنة اللى فاتت كان لها تاثير شنيع على شخصيتى يعنى حاسة انى بقيت انا حاجات كتير بقت اوضح فى شخصيتى اهتمامات كتير اترسخت عادات ومبادىء ما افتكرش انها هتتغير يعنى من الاخر شخصيتى تبلورت-حلوة تبلورت دى- السنة اللى فاتت بدرجة كبيرة فعلا.... بقيت انجى اللى هى لو حد خيرنى بينها وبين انى اكون اى حد تانى هاختارها هى بكل عقدها وكلاكيعها وكلامها اللى زى الطوب الاسمنتى و وجهات نظرها اللى بتخلى الناس يفكروها يا اما هبلة يا اما جاية حالا من المريخ ....
بقى عندى عشرين سنة بس مش حاسة انى كبرت يعنى ولا حاجة عادى .....
طبعا فى حاجات كتير وحشة حصلت السنة اللى فات بس مش فاكرة منها اى حاجة وكدة احسن اصلا يعنى ...
كلنا نسمع عن ازمة منتصف العمر بس حد سمع عن ازمة مقتبل العمر؟؟؟؟
هاضيفها باسمى لمؤلفات علم النفس ان شاء الله..
المهم كل سنة وانا طيبة ... عايزة اقول لكم ان الهدايا لازم تبقى محترمة يعنى مثلا مثلا ماما جابت لى موبايل فظيع...
يعنى ممكن اقبل هدايا من نفس العينة كدة مش عايزة اتقل عليكوا....... سلام

الأربعاء، 3 سبتمبر 2008

اوراق ملونة

هرع ليلحق باصدقاءه على سطح البناية ليشاركهم صنع زينة الشارع التى يصنعونها كل عام احتفالا بقدوم رمضان.
وصل الى السطح ووجد اكوام الورق الملون التى سوف تتحول الى قصاصات باشكال جميلة يربطها خيط طويل يصل بين المنازل و يهنىء بقدوم شهر رمضان.
طقس سنوى هو .... يجتمع و اصدقاءهمنذ اعوام ..... هو شاب الان تعدى العشرون و لكنه يمارس هذا الطقس السنوى منذ كان طفلا صغيرا.
تامل الاوراق الملونة و رسم على شفتيه ابتسامة.
كل لون من الالوان كان له ما يفسره فى نظره ز له ما يؤكد هذا التفسير من الاحداث.
هذه الورقة الحمراء الكبيرة تذكره بالاندفاع ..الاحمر كان يعنى الاندفاع من وجهة نظره . يتذكر منذ اعوام عندما تشاجر مع صديقه حول من سيعلق هذا الخيط الملىء بالمثلثات الحمراء عند منزله . كانت مشاجرة كبيرة انتهت بخصام بينه وبين صديقه لذلك يمثل له اللون الاحمر الاندفاع. ابتسم وتذكر انه تخلى عن هذا الاندفاع الان و ليس لديه النية لدخول مشاجرة من اجل بعض الاوراق حتى وان كانت حمراء.
جلس على الارض و تناول الورقة الاخرى .. صفراء هى.. كان الاصفر يمثل له المرح والصخب ..لا يعنيه ما يقوله خبراء الالوان عن انه يمثل الحقد والكراهية ..هو كان يرى الاصفر دليل على المرح والصخب والدليل على ذلك ان الاوراق الصفراء التى كان يقصها منذ اعوام هو واصدقاءه كانت مصدر ازعاج دائم للجار الساكن اسفل سطح المنزل مباشرة. فهو يتذكر ليلة السحور التى قام فيها بعمل الزينة من الاوراق الصفراء وما احدثه من صخب هو واصدقاءه مما جعل الجار ينزعج بشدة.
الان هو عاقل لا يستطيع ان يزعج الجيران بدعوى ان الاوراق الصفراء تحتم ذلك.هذا الكلام الان هو هراء اطفال.
اما هذه الورقة الخضراء فتمثل له البراءة .. براءة الايام الاولى عندما كان يسر لاصدقاءه فى هذه الجلسة بادق اسراره التى لاتخرج عن كونها حب مراهق او خطاب وضعه لها فى حقيبتها وهم عائدين من المدرسة..
الان لم يعد برىء ..لا يستطيع ان يسر لاصدقاءه باسراره لانه لم يعد مراهق ولان الامر لم يعد يقتصر على خطاب فى حقيبة..
ترك الاوراق الملونة وهب واقفا انه لا يستطيع ان يشارك فى هذه الجلسة..انه لا يستطيع ان يتفاعل مع الوان هذه الاوراق ..
هو الان كبير وناضج وكان يتفاعل معها عندما كان صغيرا ملىء بالحيوية والصخب و الاندفاع والبراءة ..
عندما كان الطهر والسذاجة هو اسم اللعبة.
الان هو لم يعد هو .. لا يستطيع ان يصنع زينة الشوارع مع اصدقاءه لانه تغير كثيرا.. ولم يعد الاحمر يمثل له الا لون الدم ..و الاصفر الغل والكره..و الاخضر السذاجة والغشم..
حقا لقد تغير كثيرا..اصبح ينتمى لطائفة اخرى من البشر.. طائفة يصعب عليها الاستمتاع بمثل هذه الجلسة الحميمة..طائفة البالغين..
ترك الاوراق ونزل السلم ومشى فى الشارع باتجاه القهوة..هذه هى الجلسة التى يندمج فيها الان..جلسات القهوة ..جلسات البالغين..

الاثنين، 1 سبتمبر 2008

حمد الله على سلامتى

حمد الله على سلامتى .........طبعا العنوان واضح وصريح ولا يحتاج لاى شرح او تحليل........
عملت العملية وبقيت زى الفل والله كان نفسى اجى اطمن الجماهير والحشود الغفيرة اللى افتقدتنى بس لظروف تتعلق بالنحس الكمبيوتر باظ ودخل العناية المركزة لمدة خمس ايام يللا ما علينا مش مهم..........
كل سنة واحنا طيبين بكرة اول يوم رمضان والنهاردة المسحراتى وكدة يعنى.........
طبعا كما لكم ان تراهنوا كان لى مغامرات فظيييييييييييعة فى المستشفى هأموت وأحكى عليها بالتفصيل بس اهم حاجة اتعلمتها انى عرفت قيمتى و انى غالية جدا عند ناس و عرفت حجمى ومكانى عند ناس تانية.......
عايزة بقى اشكر اصدقاء المجتمع التدوينى ميرو انتكة على لفها ورايا بالتليفونات لحد ما تلاقينى وتطمن علية...
أسامة ناصف على وقته اللى منحه لى بكل سماحة.......
وطارق عميرة اللى اهدانى هدية فظيييييييييييييعة(مش هقول عليها لاسباب تتعلق بالرخامة) وانا عند وعدى يا طارق اطلب اى طلب وانا هأنفذه على طووووول.........
اصحابى بقى اللى رجعت لقيتهم قالبين المدونة سؤالات واستفسارات عن صحة السيادة كيكى اللى كانت هتموت لما عرفت موضوع العملية و ماكانتش عارفة تجيبنى ازاى....... .. بجد والله شكرا لاى حد سال عنى و اهتم وكدة يعنى.................
طبعا طبعا الوجود فى المستشفى علمنى حاجات كتير اهمها ما يلى:
-مستحييييييييييل دكتور رفعت اسماعيل يمر على المرضى ودة مش لانه شخصية خيالية لكن لاننا فى اسكندرية ودكتور رفعت فى القاهرة ودة واضح انه سبب وجيه لعدم رؤيتى ليه فى المستشفى.
-ان الممرضات اللى بيمشوا فى الردهة فى نوباتشية الليل مش اشباح ولا حاجة سيبك انت من مشيتهم المتخشبة دى بس هم ناس حقيقيين ومفيش محاولات لقتلك بالمحلول اللى بيعلقوه فى دراعك ولا اى حاجة من دى.
-ان سماع محمد منير بالليل وانت باصص من شباك الغرفة حاجة لذيييييييييذة جدا لوحدك تماما هدوء تام شجن رهييييييب بس طبعا دة كله فى اليوم السابق للعملية لانك بعد العملية مش هتبقى سامع اى حاجة اصلا.
-ان سلسلة سافارى تحفة بجد وخسرت كتييييييير لما ضيعت كل دة وقت ما قريتهاش فيه ودكتور علاء عبد العظيم دة عسل و شخصية طبيعية جدا بس بردو مستحيل تشوفه فى المستشفى.
-ان اللى تاخده بالعتاب مالوش لازمة لانه مش بيبقى طالع من القلب لو شايف انك تستحق اكتر من كدة انسحب بهدوء بس مالوش لازمة العتاب.
-ان مفيش حاجة تستاهل تعب اعصابك وارهاق روحك و قلبك خصوصا لو سبتها على ربنا.
طبعا مفيش داعى اقول انى مارست هوايتى فى الرخامة على دكتور التخدير لما سالنى وجعتك الكانيولا؟؟؟ بصت له انا بكل سماجة وقلت له يعنى انا على سرير العمليات وعارفة انى هاعمل عملية وهيفرق معايا الم الكانيولا؟؟؟
و لا بردو فى داعى اقول انى فضحت الممرضة وهى بتشيل الدرنقة وقعدت اقولها ايييييييييييييه انت بتعملى ايييييييه صاحبتك كل يوم بتغير على الجرح مش بيوجعنى اشمعنى انت حرام عليكى...............
طبعا قبل كل دة وبعد كل دة انا فعلا حسيت بقيمتى و حسيت ان فى حواليا حب بجد و حاجات حلوة وافرحكوا واقولكوا ان الاكتئاب راح فى داهية الله لا يرجعه ودعواتكم وصلت كلها تامة غير منقوصة انا مش عايزة اخلص كلام بس البوست طول قوى كدة وفى مواضيع كتيييييييييييير كانت فى دماغى ونفسى اكتبها يللا كفاية عليكوا كدة يا بشر.
وهكذا رجعت انجى لتنير عالم التدوين مرة اخرى ...........ربنا مايحرمكوش منى قولوا امين.