كان عندى من ضمن احلامى الكتير حلم صغير سهل ان اى حد يحققه بس صعب بالنسبة لى .... من فترة طوييييييييلة وانا بقول نفسى احضر حفلة لمحمد منير... طبعا طبعا اول ما تقول كدة تلاقى حد حكمة القرون على وجهه يقول لك ( امممم محمد منير وحفلة بكرة تكبرى وتعقلى ) ....
امبارح حضرت اول حفلة فى حياتى لمنير... واااااااو انا بجد والله مبسوطة بطريقة مش صحية لانى ممكن اتجنن.. اساسا انا مش سهل ان يكون مودى لطيف كدة بس انا فعلا امبارح عشت ساعة من احلى لحظات حياتى...
الحفلة كانت فى مكتبة اسكندرية فى قاعة المؤتمرات بمناسبة الاحتفال الافريقى بالسيد (مو ابراهيم ) صاحب جائزة الحكم الرشيد .. كل دة مش مهم المهم انى حضرت الحفلة..
اولا محمد منير دة شخصية مفتوحة جدا وتحس انه قريب منك كدة وانه بيغنى لك لوحدك.. مش اى حد ممكن يحس اغانى منير.. بيبقى لها طابع كدة عجيب.. الحفلة بدأت بتصفيق رهيييييييييييييب من الجمهور اول ما ظهر على المسرح وانا كمان كنت متحمسة.. غنى اول حاجة اغنية نوبى مفهمتش منها ولا كلمة انا كنت قاعدة عاقلة كدة وساندة على الكرسى عادى... ثانى اغنية غنى علمونى عنيكى الاغنية دى مش معقولة تحفة بس كانت اول مرة اسمعها صراحة... ثالث اغنية بقى يونس يا لهويييييييييييي بموت فى الاغنية دى الموال الاول خطير وبعد كدة وهو بيقول دة حب ايه دة اللى من غير اى حرية لقيت نفسى بقول حرية دى بصوت عاااااااالى والناس كلها كمان بجد كانت لحظة حلوة قوى .. طبعا من اول اغنية يونس لحد اخر الحفلة وانا زاد حماسى بطريقة غريبة وطول الوقت قاعدة على طرف الكرسة وايدى وجعتنى من التصفيق الحاد الحماسى الغريب اول مرة ابقى كدة فى حياتى .. فعلا كانت لحظة حرية اول مرة احس انى كائن حر حرية مطلقة...
منير بقى تشوفه على المسرح.. مجنون رسمى .. وقفته.. رقصه.. تعبيرات وشه.. لبسه.. اكسسواراته.. كله كدة على بعضه حالة حرية مجسدة.. انسان حر وعارف انه حر وبيمارس حريته على مزاجه..
كتير قوى اتفرجت على حفلات فى التليفزيون بس الموضوع مختلف تماما وانت قاعد كدة فى وش المسرح وشايف وسامع كل حاجة لايف..
صوت منير كان احلى من اى تسجيل سمعته لاى اغنية له قبل كدة.. اقوى من اى تسجيل.. انقى من اى تسجيل.. احلى من اى تسجيل..
بغض النظر عن ان طبعا لبسه كله سينييه وغالى جدا بس المظهر كدة كله على بعضه تحس انه دماغ يعنى لو شفت اللبس دة على حد تانى هتقول ماله دة؟؟ لابس كدة ليه؟؟ بس عليه هو لايق جدا جدا..كان ماسك فوطة صغيرة كدة بيمسح وشه وبعدين يحطها فى الارض ويرجع ياخدها تانى يمسح بيها وشه(واحيانا بيمسح فى القميص) .. افراد الفرقة كل واحد فيهم دماغ عازف الجيتار مجنون رسمى تحس انه كان ماشى تايه فى الشارع فجأة لقى نفسه على المسرح.. عازف العود دمااااااااغ لوحده.. عازف الدرامز فيهم واحد لاسع وواحد راكز.. الفرقة كلها كدة حالة غريبة وترتيب الالات على المسرح مالوش حل..
غنى اغانى كتير حلوة طول عمرى بحب اغنية حاضر بس اول مرة احس انى عايزة اعيط وانا بسمعها.. عللى صوتك اصلا بتعمل لى حالة امل رهيبة بس امبارح كان تأثيرها غريب ... شتا....لا بجد اول مرة اعرف ان اغنية شتا اغنية عظيمة كان امبارح مع انى بسمعها كتير .. قلبى مساكن شعبية بقى كنت حاسة انه بيقرا بطاقته فعلا لايقة عليه قوى الاغنية دى ..
قبل ماتخلص الحفلة بشوية قال انه مبسوط وفخور انه بيغنى فى حضرة الفنانة الاسبانية العظيمة ماريا مش عارف ايه كدة وشكرها ورحب بيها وقال انه فخور انها بتسمعه(لما قال كدة اتأكدت انى بحب منير الشخص) ...
الحفلة دى بعيدا عن انها كانت حلم من احلامى واتحقق الا انها خلتنى اكتشف انى انسان حر وانى ممكن اعمل اى حاجة فى الدنيا وانى ممكن اعرف اعمل حياتى واغير المألوف .. ممكن حد يشوف كلامى دة مبالغ فيه بس فعلا انك تحس انك حر دى حاجة حلوة قوى وفعلا فيه مواقف معينة هى اللى بتحط الحقيقة دى فى طريقك... مش هغير نظام بلد بحالها بدماغى لوحدى انا عارفة بس يمكن لو حققت نفسى ابقى مفيدة والناس اللى حوالية تشوف دة وحتى لو محدش شاف كونى ابقى انسان صح دة مفيد لبلدى او انا شخصيا شايفة كدة...
على طول كنت بشوف ان الكلام عن الطاقة الايجابية كلام مش فارغ بس حالم زيادة عن اللزوم وصعب تحقيقه بس بعد جرعة الطاقة الايجابية الفظيعة دى انا مؤمنة بقدرة الاحداث على تغيير نفسية البنى ادم...
شفت امبارح حاجات ضايقتنى بس مش هعلق عليها ولا هحس انها خيابة يعنى مثلا البنت المصرية اللى كانت بتكلم صاحبتها المصرية اللى زيها وبتقول لها هندخل ال (vip) الاول وبعد كدة ال(0invitations ) وبعد كدة باقى ال(guests) بس ابقى (keep the invetation in your hand) وهم الاتنين مصريين وواقفين على ارض اسكندرية الغراء ..ولا هعلق على البنت اللى وقفت وقالت للولاد اللى كانوا قاعدين قدامنا لو سمحت (may i pass) ونطقتها غلط بالمناسبة.. كل دة مش مهم المهم ان فى ناس تانيين مؤمنين انهم مصريين وان مش الدليل على انى مثقفة هو انى اتكلم نص كلامى بلغة تانية...
من الاخر كدة انا امبارح انبسطت جدا وحاسة انه بجد حلم من احلام حياتى اتحقق... ومادام فيه حلم بيتحقق يبقى باقى الاحلام ممكن تتحقق بالتبعية ومفيش حاجة صعبة قوى يعنى ... وان لسة الاغانى ممكنة ...