السبت، 31 أغسطس 2013

إلى نورا..عن الحضن

عزيزتي نورا
مساء الخير

بتتكلمي كتير عن الحضن يا نورا..بتقولي انك محتاجة حضن..وكل صحابنا بيقولولك ان هما كمان محتاجين حضن..وانا كمان يا نورا والله محتاجة حضن.

أنا حلمت بيكي يا نورا..حلمت اني ببكي..واني كلمتك ف التليفون مع ان انتي عارفة ان أساساً أنا معييش نمرتك..كلمتك وانا بعيط وبشهق..وانتي كنتي ف كنيسة مع صحابك..قلتيلي انك في كنيسة العدرا اللي في مصر القديمة..انا قلتلك انا مش هعطلك عن صحابك وهسيبك تشوفي الكنيسة بس إدعيلي..إدعيلي في الكنيسة.

بعد الزلزال يا نورا..انتي عارفة ان حصل لي زلزال..بعد الزلزال كنت حاسة اني مقصرة أوي في حق ربنا..وإنه أكرمني من غير أي حق..كانت بتلح عليا فكرة إني زي ما بصلي لربنا ف البيت أو المسجد..إني اروح اعترف في كنيسة..كنت عايزة أروح لربنا بكل الطرق..الموضوع كان بيلح على دماغي بشدة..كنت بفكر في كنيسة جناكليس اللي عند شغلي القديم..عشان شكلها حلو وقديمة ومهيبة..قلت محدش هيكسفني..هيقولوا عليا مجنونة آه بس هيسمعوني..وربنا هيعرف اني بحاول أوصل له بكل الطرق عشان اقوله شكراً.


تعرفي يا نورا..المشكلة اني مبعرفش اتحضن..أنا عندي مشاكل كتير..تربيتي وشكل حياتي وتكويني والخمسة وعشرين سنة اللي فاتوا خلوني غريبة..خلوني مبعرفش اقول كلام حلو..بس ممكن اكتبه..خلوني مبعرفش اتحضن..بس زي أي كائن حي بكون محتاجة الحضن دة..أنا بس محتاجة شوية مجهود يا نورا.

مبعرفش اعمل زيك..مبعرفش اقول انا محتاجة حضن..عندي هوس بالكمال..انا مهووسة يا نورا..كل حاجة لازم تبقى مظبوطة..الحضن لازم يبقى على مقاسي..ولازم مبقاش خايفة افقده..ولازم مندمش بعده..ولازم ولازم ولازم

اللوازم دي كلها مبوظة حياتي..مخلياني لما احب حد معرفش اقوله اني بحبه..عشان لازم حاجات كتير أوي مش مجالها دلوقتي..اللوازم دي مخلياني لما احس اني محتاجة اعيط معيطش ومقولش اني مخنوقة ومتضايقة..مخلياني عندي إحساس طول الوقت بالمسئولية تجاه الآخرين وان محدش مسئول عني.

فاهمة حاجة؟؟؟؟؟؟

بصي يا نورا..أنا كلمتك في الحلم عشان كنت محتاجة مساعدتك..كنت عايزاكي تبقي حكم بيني وبين شخص ما..مع إني مكنتش متخانقة معاه أصلاً..بس يا نورا لما لقيتك مشغولة متكلمتش..عشان حتى في الحلم أنا عارفة ان محدش مسئول عني..محدش المفروض يشيل همي.

إنتي متخيلة مأساة حد بيفكر حتى وهو نايم؟؟ أنا عقلي مسيطر عليا حتى وانا نايمة..متخيلة؟؟

أنا يا نورا زيك..وزي باقي صحابنا اللي بيقولولك انهم محتاجين حضن..الفرق بيني وبينكم إنكم معندكوش وسواس قهري مسيطر على عقولكم طول الوقت..أنا عندي..ماهو برضو الخمسة وعشرين سنة اللي فاتوا مكانوش فيلم كارتون..ولا قضيتهم في ديزني لاند.

معنديش أي فكرة أنا ليه كتبت الكلام دة..وكمان معنديش أي فكرة إنتي هتقريه إزاي..بس انا حسيت بحاجة بتزقني..هوا سبتمبر بيغسلي قلبي كل سنة..وامبارح كانت أول نسمة من الهوا دة..والغريب إن في نفس اللحظة اللي جت لي فيها النسمة دي..كانت بترن أحلى ضحكة ممكن تسمعيها في حياتك.

الحضن ثقل يا نورا زي ما انتي بتقولي..الحضن هو الإيد اللي بتمسك بالونة الهيليوم عشان تنقذها من إنها تطير لوحدها من غير هدف وتفرقع وتموت.

هبقى اكتبلك جوابات كتير لو الفكرة عجبتك.

سلام


........إنجي إبراهيم........

هناك 12 تعليقًا:

علا يقول...

نوران الشملى ؟!

يا ريتنا بنعرف نقول كل اللى عايزين نقوله و نطلب كل اللى محتاجينه :)

Unknown يقول...

آه نوران الشاملي يا علا :)

candy يقول...

جميل .. ومين فينا مش محتاج
معجزة الحضن اللى بيديه ياخده .. رد الفعل هو الفعل.
بذلك، ولأجل الكبرياء ممكن أقول أنا محتاجة أدي حضن فيما أنا محتاجة أخد ;)
فإذا بي باخد عادي :D

غير معرف يقول...

الصديقة إنجى
آ سفة على الإزعاج , و أرجو الأ يضيق صدرك بما أقول.

الله عز و جل خلقنا لنعبده و نوحده و لا نشرك به شيئا و هدانا إلى الإسلام, لا يصح أبدا فى دين الله أن أذهب أن أدعو الله فى كنيسة, أرسل الله رسوله صلى الله عليه وسلم ليخرج الناس من ظلمات الشرك بالله إلى توحيده وعبادته وحده, لا يقبل أى دين عند الله إلا الإسلام فكيف تقولوين أنك تريدين أن تدعين الله فى كنيسة, هل تعتقدين أنك بهذا تشكرين الله, لا والله الذى لا إله إلا هو. أول شئ فى الإسلام هو إخلاص العقيدة لله عز و جل, ما تقولينه هذا قد يقربك من دائرة الشرك لا قدر الله
قال تعالى:
لَقَدْ كَفَرَ الَّذِينَ قَالُوا إِنَّ اللَّهَ هُوَ الْمَسِيحُ ابْنُ مَرْيَمَ ۚ قُلْ فَمَنْ يَمْلِكُ مِنَ اللَّهِ شَيْئًا إِنْ أَرَادَ أَنْ يُهْلِكَ الْمَسِيحَ ابْنَ مَرْيَمَ وَأُمَّهُ وَمَنْ فِي الْأَرْضِ جَمِيعًا ۗ وَلِلَّهِ مُلْكُ السَّمَاوَاتِ وَالْأَرْضِ وَمَا بَيْنَهُمَا ۚ يَخْلُقُ مَا يَشَاءُ ۚ وَاللَّهُ عَلَىٰ كُلِّ شَيْءٍ قَدِيرٌ

قال تعالى: وَمَنْ يَبْتَغِ غَيْر الْإِسْلَام دِينًا فَلَنْ يُقْبَل مِنْهُ وَهُوَ فِي الْآخِرَة مِنْ الْخَاسِرِينَ }
قال تعالى:
( إن الدين عند الله الإسلام وما اختلف الذين أوتوا الكتاب إلا من بعد ما جاءهم العلم بغيا بينهم ومن يكفر بآيات الله فإن الله سريع الحساب )

إبـراهيم ... يقول...

حلوو قووي يا إنجي :)

....
بالنسبة للأخ غير المعرف ..
ربنا ياخدك يا بعييييد

Radwa Sallam يقول...
أزال المؤلف هذا التعليق.
Radwa Sallam يقول...

وانا مليش جواب يا واطيه ؟؟ انا اللي هارياكي احضان وفي الاخر تروحي لنوران؟؟
ايه ده ؟ طب تصدقي تنفع غنوه احضان .. نوران .. وكدزه! :]

اما بالنسبه للاخ الغير معرف اللي ماجرؤش انه يكتب اسمه حتي احب اقوللك خود فشاااااااار .. هه خوود فشااااااار !!

sab7al5air يقول...

هذا النص يحكي عني كثرا شكرا علي قدرتك علي الكتابه وشجاعه المشاركه
تحياتي
كوني بخير

Foxology يقول...

تدوينة عظيمة !

hend anwar يقول...

حلو جرائتك .. وجميل اموضوع

ابو ملك و مريم يقول...

تدوينة انسانية رائعة و تحكى عن مشكلة من مشاكل العصر الحديث و معظمها انسانى فمع تطور العصر و تنامى التكنولوجيا تآكلت الانسانيات كثيرا جدا .
مع اطيب تمنياتى
بالمناسبة .... تعليق الغير معرف صحيح جدا بغض النظر عن اعتراض اصدقائك و متابعينك
نصيحتى لما تحسى الاحساس دة كلمى ربك فى صلاتك او فى ركعوك ....اما اذا اردتى ان تكلميه بشكل غير تقليدى فاذهبى الى الشاطئ و ولى وجهك الى البحر و كلمى ربك و ناجيه و ابكى استغفارا و حمدا" ..

abdullah-blogs يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول
غلا الروح
شات غلا الروح
شات صوتي
شات مغربي