السبت، 28 سبتمبر 2013

حدوتة الست اللي بلا دموع




مش كل الحواديت تنفع تتحكي للعيال الصغيرين..ولا كمان تتحكي للحبيب ولا الحبيبة.

مش كل الحواديت فيها بنات حلوات ونهايات سعيدة وضفادع بتتحول لأمير وسيم ولا جناين وردها دهب.

في حواديت نوعها مختلف..زي حدوتة النهاردة

كان في زمان بنت صغيرة..عندها فستان عليه ورد كتير..البنت دي كانت أصغر اخواتها..ف يوم ميلادها ال12 أمها عملت لها مفاجئة.

طاهرتها.

ختنتها يعني.

البنت محصلهاش حاجة من اللي بنسمعها ف برامج حقوق المرأة..أو يمكن هي مقالتش ان دة حصل؟؟

حاجة واحدة بس اللي اتغيرت فيها..البنت دي فضلت تعيط يوم ما طاهروها..فضلت تعيط كذا يوم..ويوم ما وقف النزيف..وقف العياط.

واللي اتغير فيها انها بطلت تعيط تاني أبداً.

كبرت البنت دي واتجوزت..لا عمرها بكت لا من زعل ولا من فرحة..من يوم النزيف ما وقف وهي دموعها نشفت.

الموضوع مكانش خطير..إيه يعني واحدة مبتعيطش؟؟

دي حتى حاجة حلوة.

المهم..كبرت واتجوزت..وخلفت 3 صبيان..هنا ظهرت مشكلة تانية..الست دي كان نفسها تخلف بنت..بس مش نفسها كدة بالعقل..لا دي كانت هتتجنن وتخلف بنت.

راحت لدكاترة كتير..وحاولت تعمل حقن مجهري ف مركز كبير من اللي بييجوا ف التليفزيون وبيقولوا ف الإعلان انهم ممكن يحددوا جنس المولود..وكل دة فشل.

الموضوع كان مهم بالنسبة لها لدرجة انها طلبت من جوزها الطلاق..هي كانت متعلمة فعارفة ان الراجل هوالسبب ف تحديد نوع المولود..جيناته هي اللي بتقرر.

جوزها بقى هيتجنن..عايزة تطلق منه لمجرد انها عايزة تجيب بنت..دة جنان رسمي دة.

وصلوا ف الآخر لقرار..هيروحوا الملجأ ويتبنوا بنت.

وحصل.

وف أول يوم البنت روحت معاهم البيت..الست دي دخلت أوضتها..جابت الفستان اللي كانت لابساه من كذا سنة وهي بتتختن.

لبسته للبنت..وحضنتها.

وأخيراً عرفت تبكي.


........إنجي إبراهيم........

هناك 3 تعليقات:

Ramy يقول...

الموضوع مكانش خطير..إيه يعني واحدة مبتعيطش؟؟

لأ خالص مهم جداً جداً

عارفه أنا لما بطلت ابكى بطلت أكتب و بطلت أحب و بطلت حاجات كتير

يمكن كتبت التعليق دة لما دمعت

عارفة الدموع مبتتحسسكيش أنك وحيدة

عارفه أنى قريت البوست من تحت لفوق بجد

مجنون بقى

عارفه أنا كنت بأسمع دى و أنا بأكتب التعليق

http://www.youtube.com/watch?v=s7L-kpg-eYs

غير معرف يقول...

الموضوع ماكانش خطير للناس الكاتب بيتبنا كذا وجهة نظر مش ده الراي الشخصي له هو مش موجود في القصه اصلا عشان يعلق مالكم ياجودعان فيه ايه؟ بس يا بت يا اوجي عارفه انك هاتضربيني بس مضطره اقوللك تسلم الايادي طاطاطاطا وانتي هاتفهمي الباقي بقا انا رضوي بس عندي مشاكل في الدخول من هنا عشان البلد اتغيرت :D

Unknown يقول...


thx

كشف تسربات المياة
غسيل خزانات
شركة نظافة عامة