الأحد، 16 نوفمبر 2008

اسمه الكامل انسان

كان عندى من ضمن احلامى الكتير حلم صغير سهل ان اى حد يحققه بس صعب بالنسبة لى .... من فترة طوييييييييلة وانا بقول نفسى احضر حفلة لمحمد منير... طبعا طبعا اول ما تقول كدة تلاقى حد حكمة القرون على وجهه يقول لك ( امممم محمد منير وحفلة بكرة تكبرى وتعقلى ) ....

امبارح حضرت اول حفلة فى حياتى لمنير... واااااااو انا بجد والله مبسوطة بطريقة مش صحية لانى ممكن اتجنن.. اساسا انا مش سهل ان يكون مودى لطيف كدة بس انا فعلا امبارح عشت ساعة من احلى لحظات حياتى...

الحفلة كانت فى مكتبة اسكندرية فى قاعة المؤتمرات بمناسبة الاحتفال الافريقى بالسيد (مو ابراهيم ) صاحب جائزة الحكم الرشيد .. كل دة مش مهم المهم انى حضرت الحفلة..

اولا محمد منير دة شخصية مفتوحة جدا وتحس انه قريب منك كدة وانه بيغنى لك لوحدك.. مش اى حد ممكن يحس اغانى منير.. بيبقى لها طابع كدة عجيب.. الحفلة بدأت بتصفيق رهيييييييييييييب من الجمهور اول ما ظهر على المسرح وانا كمان كنت متحمسة.. غنى اول حاجة اغنية نوبى مفهمتش منها ولا كلمة انا كنت قاعدة عاقلة كدة وساندة على الكرسى عادى... ثانى اغنية غنى علمونى عنيكى الاغنية دى مش معقولة تحفة بس كانت اول مرة اسمعها صراحة... ثالث اغنية بقى يونس يا لهويييييييييييي بموت فى الاغنية دى الموال الاول خطير وبعد كدة وهو بيقول دة حب ايه دة اللى من غير اى حرية لقيت نفسى بقول حرية دى بصوت عاااااااالى والناس كلها كمان بجد كانت لحظة حلوة قوى .. طبعا من اول اغنية يونس لحد اخر الحفلة وانا زاد حماسى بطريقة غريبة وطول الوقت قاعدة على طرف الكرسة وايدى وجعتنى من التصفيق الحاد الحماسى الغريب اول مرة ابقى كدة فى حياتى .. فعلا كانت لحظة حرية اول مرة احس انى كائن حر حرية مطلقة...
منير بقى تشوفه على المسرح.. مجنون رسمى .. وقفته.. رقصه.. تعبيرات وشه.. لبسه.. اكسسواراته.. كله كدة على بعضه حالة حرية مجسدة.. انسان حر وعارف انه حر وبيمارس حريته على مزاجه..
كتير قوى اتفرجت على حفلات فى التليفزيون بس الموضوع مختلف تماما وانت قاعد كدة فى وش المسرح وشايف وسامع كل حاجة لايف..
صوت منير كان احلى من اى تسجيل سمعته لاى اغنية له قبل كدة.. اقوى من اى تسجيل.. انقى من اى تسجيل.. احلى من اى تسجيل..
بغض النظر عن ان طبعا لبسه كله سينييه وغالى جدا بس المظهر كدة كله على بعضه تحس انه دماغ يعنى لو شفت اللبس دة على حد تانى هتقول ماله دة؟؟ لابس كدة ليه؟؟ بس عليه هو لايق جدا جدا..كان ماسك فوطة صغيرة كدة بيمسح وشه وبعدين يحطها فى الارض ويرجع ياخدها تانى يمسح بيها وشه(واحيانا بيمسح فى القميص) .. افراد الفرقة كل واحد فيهم دماغ عازف الجيتار مجنون رسمى تحس انه كان ماشى تايه فى الشارع فجأة لقى نفسه على المسرح.. عازف العود دمااااااااغ لوحده.. عازف الدرامز فيهم واحد لاسع وواحد راكز.. الفرقة كلها كدة حالة غريبة وترتيب الالات على المسرح مالوش حل..
غنى اغانى كتير حلوة طول عمرى بحب اغنية حاضر بس اول مرة احس انى عايزة اعيط وانا بسمعها.. عللى صوتك اصلا بتعمل لى حالة امل رهيبة بس امبارح كان تأثيرها غريب ... شتا....لا بجد اول مرة اعرف ان اغنية شتا اغنية عظيمة كان امبارح مع انى بسمعها كتير .. قلبى مساكن شعبية بقى كنت حاسة انه بيقرا بطاقته فعلا لايقة عليه قوى الاغنية دى ..
قبل ماتخلص الحفلة بشوية قال انه مبسوط وفخور انه بيغنى فى حضرة الفنانة الاسبانية العظيمة ماريا مش عارف ايه كدة وشكرها ورحب بيها وقال انه فخور انها بتسمعه(لما قال كدة اتأكدت انى بحب منير الشخص) ...
الحفلة دى بعيدا عن انها كانت حلم من احلامى واتحقق الا انها خلتنى اكتشف انى انسان حر وانى ممكن اعمل اى حاجة فى الدنيا وانى ممكن اعرف اعمل حياتى واغير المألوف .. ممكن حد يشوف كلامى دة مبالغ فيه بس فعلا انك تحس انك حر دى حاجة حلوة قوى وفعلا فيه مواقف معينة هى اللى بتحط الحقيقة دى فى طريقك... مش هغير نظام بلد بحالها بدماغى لوحدى انا عارفة بس يمكن لو حققت نفسى ابقى مفيدة والناس اللى حوالية تشوف دة وحتى لو محدش شاف كونى ابقى انسان صح دة مفيد لبلدى او انا شخصيا شايفة كدة...
على طول كنت بشوف ان الكلام عن الطاقة الايجابية كلام مش فارغ بس حالم زيادة عن اللزوم وصعب تحقيقه بس بعد جرعة الطاقة الايجابية الفظيعة دى انا مؤمنة بقدرة الاحداث على تغيير نفسية البنى ادم...
شفت امبارح حاجات ضايقتنى بس مش هعلق عليها ولا هحس انها خيابة يعنى مثلا البنت المصرية اللى كانت بتكلم صاحبتها المصرية اللى زيها وبتقول لها هندخل ال (vip) الاول وبعد كدة ال(0invitations ) وبعد كدة باقى ال(guests) بس ابقى (keep the invetation in your hand) وهم الاتنين مصريين وواقفين على ارض اسكندرية الغراء ..ولا هعلق على البنت اللى وقفت وقالت للولاد اللى كانوا قاعدين قدامنا لو سمحت (may i pass) ونطقتها غلط بالمناسبة.. كل دة مش مهم المهم ان فى ناس تانيين مؤمنين انهم مصريين وان مش الدليل على انى مثقفة هو انى اتكلم نص كلامى بلغة تانية...
من الاخر كدة انا امبارح انبسطت جدا وحاسة انه بجد حلم من احلام حياتى اتحقق... ومادام فيه حلم بيتحقق يبقى باقى الاحلام ممكن تتحقق بالتبعية ومفيش حاجة صعبة قوى يعنى ... وان لسة الاغانى ممكنة ...

هناك 44 تعليقًا:

محمود محمد حسن يقول...

انا برضه حضرت الحفلة اللي ما كنتش ححضرها لولا انك قلتيلي يا انجي

انا من الساعة 7 فضلت واقف قدام المكتبة ، الأمن رزل بطريقة غبية جدا ،

كان من احلام حياتي اني اشوف منير بجد ، واسمعه وهوا بيغني ، لما لقيت الناس بتتكلم على دعوات وكده حسيت اني مش حدخل ، وقلت مش مشكلة انا كده كده ناوي الحفلة اللي جاية اسافر القاهرة واحضرها ، بس فضلت واقف ،

عمر اللي كان معايا قالي يلا نروح ، تفتكر حيدخلونا ، زعلت بس قلت لا لازم اقف لغاية الآخر ،

المهم دخلت ، الجو فظيييييييييع ، مكيف وكراسي كتير فاضية ، قعد في تالت صف ، انا كل ده مش متخيل اني حشوف منير وفجأة طلع منير ، غنى اغنية الكون كله بيدور بالنوبي ،

كنت مبسوط اوي ، بجد وكنت منفعل اوي ، وطول الحفلة بصقف واغني ، ومبسوط جدا وفي حالة نشوة غيرة عادية والله ،

لما الحفلة خلصت تخيلت إن منير غنى اربع خمس اغاني بس ، لما عديتهم لقيته غنى اتناشر اغنية كاملين ،

كنت مبسوط اوي فعلا ، متشكرين يا انجي بجد انك نبهتيني للحفلة دي واللي لولاكي ما كنتش حضرتها

حدوته مصرية يقول...

حقيقي فرحانلك يا بنتي و عارف انه حلم لانه كان حلم ليا
و كمان احمدى ربنا زي ماقولتك ان الحفلة فى ظروف احسن كتير من الحفلات الطبيعية بتاعة منير فى الاوبرا

عقبال ما تحضريله دايما و تكوني مبسوطة

SHAPE YOUR LIFE (ABOALI) يقول...

معنى كلمة انسان
انه ينسى
ينسى الحزن
ينسى الالم
ينسى المرض
ينسى الهم
ينسى كل شيىء
ويتذكر كلمة انسان

افرح يا انسان
وعيش كمان وكمان
خلى حلمك حقيقى
وخدنى معاك كمان
عيش وفرح من تانى
اوعى فى يوم تكون انانى
عيش دايما انسان
لسه عنوانك تكريم الرحمانى
يلا عمر وكبر
لسه فى فرح واغانى تانى


حلو الفرح يا انجى
وعجبنى تحقيقك حلمك وتصميمك
ربنا يوفقك

مواطن مصرى نايم يقول...

عيييييييييييييييب
عييييييييييييب
عييييييييييييب
مش كنتى تقولى لى يا انجى
ايوووووووووه
بقى كىده
ماااااااااشى

بس المهم انك كنتى مبسوطة
و بجد محمد منير حد انسان جداااااا

may i pass
كنتى قلتى لها

و الا بلاش
لو كنت انا ممكن كنت ابدعت معاها
و كنت قلت لها باص ياختى و رحمة الله و بركاتة

متعرفينيش انتى فالكلية
ما فيش حد بيسلم منى
ههههههههه

المهم انك اتبسطى يا انجى

alshared يقول...

فيه ناس ربنا بيحبها
وعاشت ليله ماحصلتش
وناس تانيين ربنا برده بيحبهم
بس طول الليل قاعدين يذاكروا علشان كان وراهم النهارده أمتحان
:)

أكيد منير رائع
تدوينه جميله وصلتني أحساس جميل

تحياتي

نعكشة يقول...

مش ابتسامة
ضحكة فظيعة مرسومة علي وشي

انا صراحة مليش في الاغاني خالص
و مليش في منير مع اني اعرف له شوية اغاني
معتقدش اني ممكن ادفع فلوس او حتى عايزة اروح حفلة لأي فونان
بالرغم اني بألف أغاني و بغنيها ( متناقضة جداً انا)

المهم يعني

طبعاً لو قريتي الجملتين دول هتقولي طيب جاية تعلقي لية يا ماما
خليكي في مدونتك يا حجة

انا بجد
بجد
مبسوطة قوي انك مبسوطة
اكيد اتمنيت تكوني مبسوطة و حاسة بحالة الحرية دية من سبب اخر غير الاغاني
بس مش مشكلة
احساس انك مبسوطة و احساس انك عندك طاقة ايجابية بجد مفرحني قوي
معرفش لية
انتي تستاهلي كل خير

اتمنين في نص قرايتي لكلامك انك تخلصي كليتك كدة و تشتغلي الدكتورة النفساوية اللي نفسك فيها
و اتمنيت كمان ربنا يحققلك كل احلامك
مش عشان دايماً اشوفك مبسوطة
توء توء

عشان بتبقي عسولة وانتي مبسوطة

بالنسبة للكلام اللي نصة انجليزي
انا
برغم من اني فاشلة في العربي و الانجليزي
و مش مثقفة ولا متدهولة
في نص كلامي فية كلمات كتير بتبقي تايهة عن دماغي بالعربي
تايهة تايهة
لإني فعلاً انسانة تايهة
فبقول بدالها كلام بالانجليزي
كتير بحاول ادور عالكلمة العربي عشان اقولها
مش عشان انا ثقافتي انجليزي ولا سافرت شوكوسلوفاكيا :D بس عشان انا دماغي كدة
المهم كتير بدور عليها و اقولها ساعات بلاقيها و طبعا بيكون اللي قدامي خلاص زهق مني و طبعا بعد ما بلاقيها و اقولها يقولوليس ماحنا فاهمين
فبطلت ادور و خلاص
خاصتاً اني عندي احساس التهتهة و التوهان في الكلام زي يونس شلبي في مسرحية المشاغبين كدة

مبقولكيش ان كل الناس كدة

بس انا ببرر حاجة بعملها

وبس

عامتاً

يا رب دايما تبقي مبسوط

سلام عليكي

كيكى عوووووو يقول...

هيييييييييييييييييييييية
انا مبسوطة مبسوطة مبسوطة مبسوطة ومزقطقطة اوى اوى اوى اوى علشان انتيختى مبسوطة وسعيدة وطايرة وحالة النفسية الله اكبر مزبطة خالص
******************
5و5 فى وشى
**********************
مايحسد المال الا اصحابة
انوووووووووووووووووووووووووج انا طايرة بجد علشانك ومبسوطة انك غيرتى جو وشوفتى الى بتحبى محمد منير الكينج

mohamed ghalia يقول...

هى الفرقة كلها دماغ
يا بخت منير بالكلام الحلو ده
تحياتى

كيكى عوووووو يقول...

عاااااااااااااا مكملتش التعليق
******************************
يار ب يارب ماتخرجى من الموووووووود دة ابداااا
اقولك حاجة احلى بحبك اوى لمة تبقى مبسووووووطة كدة
***********************
يارب يا محمد يا منير تعمل حفلات كتير فى اسكندارية علشان انوج والله لو عارف انك هتتبسطى كدة هجيبلك تحت البيت ويغنيلك
على لسانى
**********************
انا اكتر واحد بيحبك
امواااااااااااااااااااااة
عووووووووووووووووووووووووووووو

شفـقــة و إحســــان يقول...

ربنا يبسطك كمان وكمان يا جىجى ومبروك انك اخيرا حققتى الحلم وشفتى منير

romansy يقول...

محمد منير يا بختك
محمد منير فنان جميل انا بحب له اغانى كتيره قوى وكلها حاسها
لما النسيم واشكى لمين والدنيا ريشه
اهم حاجه اننا حسينا ازاى انتى كنتى سعيده بالحفله

ربنا يسعدك اكتر واكتر

د/ رامي شهاب الدين يقول...

واضح إنك مجنونة بمنير .. وبصراحة هو يستحق ماهو أكثر كمان ، ماهو الملك هيفضل ملك برده

كان لى نصيب وأحضر له حفلتين ، وبصراحة كان شعورى نفس شعورك وربما أكثر

منير ده حالة فنية لوحده ، المطربين كتروا جدا لدرجة إنك ممكن تتلغبطى فيهم ، لكن مهما كتروا منير هيفضل شئ متفرد ووحيد من نوعه، كل شئ فيه متفرد لبسه ، فرقته، أدائه ، وطبعا أغانيه

مش هقف كتير عند حتة المتأمركين إللى بيظنوا إنهم لما يقولوا كلام إنجليزى فى العربى يبقوا ناس هاى كلاس، لأن ده إن دل على شئ فبيدل على شعورهم بالنقص ، والهبل ده هو إللى بيعوض نقصهم

دمتى بكل الخير .. تحياتى

a7md Helal ( المهم ) يقول...

انا كمان والله بحب منير جدا
خصوصا انه من الاصوات المميزة اللي صعب انك تتلغبطي فيه زي ما قال الدكتور / رامي

Empress appy يقول...

لو سالتينى وقولتى انك بتحبى منير كنت من اسبوعين بس معايا تيكت لحفله له فى الجامعه الالمانيه ومكنتش عاوزة اروح لما يجيلى حاجه هقولك

3omda يقول...

يـــــــــــــــــــــا بختك...

princess يقول...

انتى مش بتبالغى ولا حاجة منير تحفة اساسا وكويس انك اتبسطتى
بالنسبة لموضوع الكلمات الانجليش فى وسط الكلام مش شرط اللى بييهمل ده يبقى بيتمنظر وعلى فكرة بيبان فى طريقة الكلام فى ناس طبيعة دراستها خلت الانجليش بالنسبة ليها طبيعى
وعموما كل واحد حر
ده رايى:)
تحياتى

غير معرف يقول...

الدكتورة

جئت مسلما فقط قبل الرحيل

ولكنى سأتابع من بعيد

ألقاك فى عالم آخر

أحمد بكر يقول...

يا رب يا انوج تحققى بقيت احلامك و صدقينى مفيش حاجه مش ممكنه

Alkomi يقول...

انووووووووووووووج

انتي لسة واصلة

اهلا بيكي في عالم المنايرة يا ستي

المنايرة نوروا بيكي

المهم اخبار صحتك ايه و انتي عاملة ايه دلوقتي

طمنينا عليكي

كيكى عوووووو يقول...

مش عارفة اقولك اية غير هفجرك انتى والولة بتاع النت دة
وش مفروس
عوووووووووووووووووووووووووووو

عالم ماريونت يقول...

انوج
ازيك عاملة اية يا وحشة؟
بقالك كتير مسألتيش
انتي فين؟
انا كمان من احلامي اني احضر حفلة لمنير
لأني من اشد المعجبين بيه
احلى حاجة في منير انه مختلف
اية الجديد اني اعد اغني للمشاعر نفس الكلام المكرر
الاغاني كلها دلوقتي حاجة من اتنين:
يا اما بحبك لدرجة اني خلصت الكلام ومش لاقي حاجة اقولها
يا اما لية يا وحشة تعملي فيا كدة
حاليا انا مش بسمع اي حاجة جديدة
بسمع القديم ومنير وممكن كاظم وهاني شاكر
غير كدة بقى اسطوانات معاده
يارب دايما فرحانة يا انجي

Foxology يقول...

حفلة لمحمد منير = موود عالى جدا فوق الوصف لعدة ايام متتالية :)

تحياتى :)

كراكيب يقول...

جوجااااااااا

حضرتي حفلة لمنير يا باااااااختك
بحقد بحقد
لالالا حقد وغل كمان
يا انجي ده حلم من احلامي برضه اللي لما اتحققت كانت ساعه برضه في جامعه عين شمس
وعايزة اقولك اني كنت رايحة الحفلة مودي زي الزفت والطين والهباب وخرجت منها واحدة تانية تالتة خااااااالص
بهرج وبهزر وبضحك ومودي عالي هاي فاي ناي فعلا يعني وبصراحة وبجد وجداني
حححححححححح الراجل ده فظيع شنيع مريع رهيب يالهوي بجد يعني
الحفلة اللي بجد ببقى نفسي وهموووووت واروحها حفلة الحفلة اللي بيعملها في الأوبرا
بس طبعا انا لو نطقت وقولت لبابا انا عايزة اروح حفلته بتاعت الاوبرا
هيقولي امشي اطلعي برا بيتي لا انتي بنتي ولا انا اعرفك

miro el niro kwaniro

Unknown يقول...

ازيك يا دكتورتنا المبجله


تعرفي بغض النظر عن اختلاف الاراء
انا معتش بسمع اغاني
بس بجد كنت بسمع منير زمان لما كنت بسمع


وخليني بس اعلق علي نقطه تانيه
بحكم الدراسه احيانا بيغلب عليا الكلام الانجليزي وده بيكون محل انتقاد من حد ووالله بيكون غير متعد ولا قصدي اتمنظر بيه

لكن تعرفي لما النقد ييجي من دكتوره
يعني تفهم اوي الكلام ده

معني كده انهم كانوا مستفزين فعلا

بس مش عارف ليه عايز اديهم العذر لانهم لو كانو منظمين للحفله organizers

فطبيعي يكونو قالو الكلمه دي واتقالتلهم مليون مره
وممكن يكونوا مش قاصدين


متضيعيش فرحتك باليوم عشان مواقف بسيطه


ربنا يوفقك


اخوكي برقش

أية عفيفي يقول...

انا حاسه باحساسك ده

لان كان عندى نفس الحلم وحققته بس من بدرى شويه

وحاسك برضو باحساسك وانتى واقفه فى المسرح ومستنيه منير وهو طاله والتصقيف الغير طبيعى الى بتصقفيه من غير ماتحسى انه تصقيف جامد

واحساسك وهو بيغتى اغنيه انتى بتحبيها جدا

واكيد عرفتى برضو الناس الى بتصفر فى الحفلات وتلاقى حد بيصوت بيعملوا ده ليه بيعملوه من غير مايحسوا برضو كل الى جواهم بيطلع

جو الحفلات ده خصوصا لحد بتحبيه بيكون مايتوصفش

ربنا يبسطك كمان وكمان وتحضرى حافله تانيه لمنير

EMMY BABY يقول...

هههههههههههههههههههههههههههه

كل ده لمحمد منير

اعذرينى يا بنتى اصلى مبسمعشى اغانى

بس كويس انك مبسوطة

واضح اوى من كلامك وواضح فعلا انه كان حلم بالنسبالك

ربنا يحققلك احلامك كلها وتكون مفيدة ومصدر طاقة ايجابى

تحياتى

ايمى

2ragooZ يقول...

السلام عليكم
منير .. هذا الفنان الذى يحترم عقليته .. وعقلية مستمعيه .. احبه بالفعل ..
حضرت حفله واحده بصراحه .. بس ما حبيتش الجو ..
ما ليش انا فى جو التنطيط .. والتسقيف ..
بس ده لا يمنع انى تقريبا باسمع منير وبس ..

وبصرف النظر عن اى حاجه

.. يكفينا انك مبسوطه ..

Mero.. يقول...

مع اني مش من محبي منير ولا من هواة اغانيه ..
لكن كفاية انك فرحانة ومبسوطة ..
وجميل انك تشركينا في فرحتك ...
يا رب تفضلي على طول فرحانة .. وتتحقق كل احلامك الجاية يارب ..
سلام

حاسوباتيه يقول...

انا بقى نفسي احضر حفله لعمرو دياب لاني بحبه جدااااااااا

نونو يقول...

انا كمان حضرترة قبل كدة

اتهبلت من احساية وطرقتة
ووقفتة وتلقائيتة

فظيييييييع مش اى حد يحسة اصلا

رئيس جمهوريه نفسى يقول...

عارفة يا انجى بتفكرينى بشبابى زمان ايام الجامعة فى سنة اولى وتانية كانوا ضربتين وراء بعض بخ\حفلتين لمنير ثم فى رابعه كانت حفلة فى بلدنا عشت نفس الاحساس بتاعك حالة التفرد والانعزال عن العالم وانتى بتحسى انى منير بيغنى ليكى انتى بس دوننا عن الالاف اللى حواليكى حالة مش ممكن تعيشيها الا ومنير قدامك على المسرح بتكوني وقتها انسان عادى اول ما يظهر والمايك فى ايده تبتدى تنسحبى خالص لعالم بتاعك انتى لوحدك وتفقدى اى اتصال بالعالم الخارجى غير الصوت الى بيهزك
ومن هنا ومن هذا المنطلق انا نويت والنية لله انى احضر حفلة راس السنة فى الاوبرا قادما من مجاهل الصعيد بس يارب يكون الوقت مناسب

كفايـة طيبـة يقول...

بصي انا عديت على مدونتك كدة بالصدفة

كنت هقرا وامشي

بس اسلوب الحماسة اللى انتى اتكلمتى به شدنى خلانى لازم اعلق

حسيتك قاعدة ادامى وبتتكلمى بمنتهى الحماس والفرحة ومعرفتش امشي غير لما اكمل قراءة البوست كله

ربنا يسعدك ..

منير شخصية تحترم :)

غير معرف يقول...

الله عليكى بجد
عايزة أقولك انى كنت بكره جداا منير .. بس بقالى حوالى كام شهر وانا بقيت بعشقه .. وبحس بالظبط بالكلام اللى بتقوليه ده
وأمنية حياتى انى اروحله حفلة راس السنة فى الاوبرا
مكنتش متخيلة ان اللى بيسمعه حاسس بنفس اللى حساه.... نفس الكلام اللى بتقوليه بالظبط بحسه لما بسمعه .. تحسى انه حر ... حر من كل القيود
:)

بوست جامد جداااا ودماغ :)

عايش علي الهامش يقول...

محمد منير والله رغم اني مش بحب اغاني ليه بس ليه اغاني تحفه هبدو غريب الهيئه لو قلت بكار من روائع محمد منير
والنيل الاغاني دي بتحسسني بصوت النيل ومصر وقلبي مساكن شعبيه بتحسسني اني ماشي في الشارع وسط اهلي محمد منير جماله انه شعبي تحسي كده انه ابن الشعب
صحيح مش بحب الحفلات اللايف دي وجوها بس هنيئا لك الليله الجميله وسيبك من المتامركين بق ولبس ومصريين بطاقه


شكرا لك

قلوب بتغنى يقول...

انجى
صباحو
دى اول مرة فى مدونتك
والموضوع عن منير الى هو عشقىىىى
الموضوع بتاعك جميل لانه عن انسان جميل وانا سمعاه حالا دلوقت حبة حبة على من احب وعيونوا فاضت من العين محبة
اما الناس لى بتستخدم انجلش يمكن يكون موضوع تعليم
مش حكومى زينا

Muhammad Mammdouh يقول...

ربنا يحققلك كل احلامك مع انها لو من النوعية دى تبقى بسيطة قوى بس بجد كلنا لازم نحب منير لانو صوت مصر وكمان عشان هو من قلبو وروحو مصرى والنيل جواه بيسرى مش بكار طبعا ده منير تحياتى

صوت من مصر يقول...

يا بختك
؟
مش لاقى رد

funckydoctor يقول...

الكينج حاجة تانية فعلا
والناس اللى تتكلم انجليش ده سيبك منها أنا لما لسانى بيفلت وا تكلم انجليش باحس انى عكاك :s
يا رب يهدينا

كيكى عوووووو يقول...

البوست دة لسة موجودة
انا بكلمك من السيبر عم حتاتة
وحشتينننننننننننننننننننننننى
اووووووووووووووووووووووووووى
وكان نفسى اوى اكلم معاكى قبل ما امشى
ومعيش رصيد للاسف
عموما يارب اكونى بخير
هحاول ارجع بسرررررررعة
وحشتينى
امواااااااة
عووووووووووووووووووو

غير معرف يقول...

انجى

عارفة انا بحب منير قوى

فى العصر ده مفيش غير

كاظم والاستاذة الكبيرة صاحبة الصوت القوى الكلاسيكى الناغم ( م النغم)
ماجد الرومى
ومنير وأصالة

مرة واحد صاحبى فى حفلة لمنير شفناها على التلفزيون قلى ده شكله أهبل بجد

رحت أنا زعقت فيه وقلتله لازم منير يكون كدة علشان يبقى منير وده ميعنيش أنه مش محترم رغم انه تربية كباريهات (ده من كلام منير عن نفسه) وكمان ديكتاتور فى شغله بس برضو جميل

بالمناسبة يعنى ايه الكام كلمة اللى مش عربى اللى كتباهم دول ؟؟؟

تحيتى

أحمد.... يقول...

دكتورة انجي

تحياتي على البوست الجميل بجد
أنا من اول مرة قريت فيها البوست و بعدها دورت على اغاني لمنير
و بجد يمكن م يومها و انا بسمع له اكثر من الاول و خصوصا اغية حرية

انا كاتب موضوع على مدونتي ارجو تشرفيني هناك

تحياتي

Mahmoud يقول...

انا كمان عاوز احضر حفله من حفلاته بس انا مخاصمه شويه

مـجـنـووون يقول...

يا رب تكوني ديما مبوسطه وتحققي كل أحلامك

**************

والله من تحليلك لمحمد منير ولأفراد الفرقة أتاكدت أنك بجد دكتورة نفسيه ههههههههههههههههههههههههه

****************

تقبلي مروري
مجنووون

msafa يقول...

تعرفى يا انجى انا عمرى ماشوفت منير شخصيا انا سنى اربعين سنه وانا عيشته من اول ما قال يا غنا
بس والله دايما بشوفه فيا