الثلاثاء، 30 ديسمبر، 2008

فرض عين

تحديث:اجتياح غزة البرى بدأ واسرائيل طالبة تعزيز للقوات وغزة مفيهاش نور ولا ادوية ولا بطاطين ولا اى حاجة ادمية .... معتز الدمرداش فى برنامج تسعين دقيقة استضاف زوجة الضابط ياسر اللى استشهد على الحدود برصاص فلسطينى الناس فى بلدنا عاطفيين وهتصعب عليهم الست دى ومش هيتبرعوا ياريت يا ريت اللى فاهم اللى فيها واللى فاهمين ان دة تشتيت لمشاعر الشعب يفهم اللى مش فاهمين والنبى يا جدعان لموا فلوس وروحوا اتبرعوا حرام كدة والله....صعبان علية العيال اللى بيموتوا حراااااااااام بقى روحوا اتبرعوا بقى عايزين ايه اكتر من كدة.
غزة تم قصفها............. غزة تم سحقها................. غزة تم ضربها........
عادى على فكرة ولا كان فارق معايا خالص كل يوم غزة بيحصل فيها بلاوى..وبعدين انا مقتنعة ان احنا عندنا كوارث كتير وحياتنا صعبة ومحتلين مننا فينا كدة عندنا اكتفاء ذاتى من الاحتلال...
احنا عايشين مأساة وعندنا ناس كتيييييييييييييييييييييييير مش لاقية تاكل وعيال بالهبل نايمين فى الشوارع..مش مع الناس اللى مخليين غزة هى القضية العربية الوحيدة..ولحد يوم الجمعة كنت شايفة انها واخدة اكبر من حجمها..قضية اكل عيش يعنى..اهى مادة للحوار كل واحد يستعرض فيها وطنيته واحساسه الجارف بقوميته العربية وثقافته ومدى المامه بالاحداث الجارية ....فرصة حلوة اوى ان كل واحد يبرهن انه بيتفرج على منى الشاذلى فى العاشرة مساء وكمان معتز الدمرداش فى تسعين دقيقة وانه متابع مجريات الاحداث وتطورات الموقف الراهن...
بس المرة دى غزة بتباد..مش تعاطفا مع اهل غزة تحديدا لكن تعاطفا مع الانسانية نفسها لازم تتكلم..لازم تعمل اى حاجة..على الاقل لازم تتأثر يعنى اضعف الايمان..
طب واحدة زيي انا تعمل ايه؟؟؟؟
انا كنت مستغربة جدا ان الناس بتموت وانا بهرج وعايشة حياتى..بس عادى يعنى الفلسطينيين بيموتوا بسرعة واحنا بنموت ببطء..عادى يعنى احنا زيهم بالظبط عندنا مأساة مسماة مجازا حياة..
بس بعد شوية عرفت بقى حجم المأساة عرفت ان فى ناس بتموت فى الشوارع دة عادى فى غزة بس اللى مش عادى انهم ميموتوش ويتعذبوا..اللى مش عادى ان يبقى فى بنت مرمية تحت جدار بيتها بتصرخ عشان يخرجوها..جدار البيت واقع عليها بتتوجع وهى حية لسة مماتتش الافضل لها انها تموت على الاقل الموت معتاد ومعروف وواضح لكن التعذيب دة هو اللى مش آدمى بالمرة...
اللى مش آدمى اكتر انى اتفرج واقوم اسمع تامر حسنى عشان نفسيتى ترتاح...
أنا بقى قررت قرار بطولى جدا..قررت انى اجمع تبرعات للناس اللى مش لاقية اكل ولا شرب ولا علاج ولا أكفان حتى..قلت هأجمع تبرعات من زمايلى فى الكلية ومن أصحابى و من أهلى..كمان قلت انى هأقول لاصحابى المدونين اللى اعرفهم من العالم الافتراضى بس هم بقوا أشخاص حقيقيين فى حياتى..اصحابى دول بجد مش معارف كدة وجودهم زى قلته..كنت متخيلة انى هلاقى تشجيع وناس تقوللى آه صح موافقين بدل المظاهرات والتنديد بموقف الحكومة اللى احنا مالناش يد فيه..انا مش عايزة من الحكومة تعلن الحرب ومش عايزة اروح احارب ومش عايزة اعمل مظاهرات ...انا عايزة اعمل الصح فى ناس بتتعذب ممكن اخفف عذابهم بفلوس قليلة ...
انا عارفة ان الفلسطينيين مش اطيب شعب ولا هم هيعترفوا بالجميل ولا كمان عايزاهم يبوسوا ايدينا...
عارفة ان الضابط ياسر اللى اتقتل على الحدود قتلته المقاومة الفلسطينية...
عارفة ان فلسطين فيها بدل صراع فلسطينى اسرائيلى صراع فلسطينى فلسطينى على السلطة..
عارفة ان عندهم بلاوى اخلاقية كتير..
بس دة ميمنعنيش انى ارضى انسانيتى واعمل حاجة للناس اللى بيتعذبوا قبل ما يموتوا..
اتفاجأت بردود فعل غريبة من عينة (اه اصلك بنت بقى وعاطفية وكدة)......أو مثلا (الاقربون اولى بالمعروف)
انا اتفاجأت بجد ...اتفاجأت جدا والله...واتصدمت..اه حرية شخصية..اه الحياة اولويات...اه كل واحد له وجهة نظره...اه كل واحد حر........
بس مش قادرة ابطل استغراب للاسف...مش مهم على فكرة.
هلم فلوس أنا...مش كتير بس فلوس وخلاص..وهروح اتبرع بيها..
التبرع لضحايا غزة بيبقى اما فى جمعية الهلال الاحمر او فى حساب جمعية الهلال الاحمر فى اى فرع من فروع بنك مصر...
على فكرة المفتى قال ان فى الظروف دى غزة أولى من أى حاجة تانية بالفلوس بتاعتناو ان دة فرض عين....
خمسة جنيه مش هتأثر معاك ممكن بدل كيس الشيبسى والكانز تتبرع بيهم...كل واحد حر جدا اتبرعوا او متتبرعوش هم كدة كدة هيموتوا.

الأحد، 21 ديسمبر، 2008

المزيد من جابر فى كل يوم


جابر..الا تعرفه؟؟ انه احد بطلى رواية يوتوبيا للرائع العبقرى دكتور احمد خالد توفيق..
لا تحتاج ان تقرأ الرواية كى تتذكر اين رأيت جابر اخر مرة.. فجابر يعيش بيننا انت بالتأكيد تعرفه.هو جارك.. صديقك.. أخوك.. والادهى انه ربما يكون انت.
كى تتاكد من كلامى سوف اصفه لك..وصف جابر على لسانه فى الروايه شخص يعيش بلا مأوى .. بلا مأكل.. بلا مشرب (ربما بضعة ايام)..بلا ثياب.. بلا سقف.. بلا حبيبة.. بلا كرامة.. بلا أسرة.. بلا ثلاجة.. بلا جهاز هاتف.. بلا جهاز تليفزيون.. بلا ربطة عنق..بلا أصدقاء.. بلا حذاء.. بلا سراويل.. بلا فلوجستين (مخدر من ابتكار الرواية).. بلا واق ذكرى.. بلا أقراص للصداع.. بلا مؤشر ليزر.. بلا أحلام.
وعلى لسان بطل الرواية الاخر جابر هو شخص أذناه مليئتان بالصماخ.. اصابع قدميه متقرحة تطل من صندل حقير.. نظارته ملحومة بالنار.. عينه تالفة.. غده أسود.. أخته حيوان مصدور.. طعامه فاسد.. كتبه بالية.. احلامه موءودة.. افكاره عتيقة.. أظفاره مسودة.. شعره مجعد معجون بالتراب.. قومه رعاع.. أصدقاءه حثالة.. برغم هذا يمشى كالبشر و يتكلم كالبشر..
هل مازلت مصر انك لاتعرف جابر؟؟
جابر هو مستقبل معظمنا للاسف..هل تضمن لى انى لن اتحول الى جابر عندما يبيعوا وطنى؟؟ هل تضمن لى الا اتحول الى جابر عندما أصحو لاجد انى لا أمتلك أى شىء حتى مجرد كلمة وطن؟؟
انا لا اريد ان يبيعوا وطنى..و انت لا تريد و لكنه سيباع وسوف نتحول انا وانت الى جابر..
اختناق شديد..اختناق حرفى اشعر به عندما أنظر حولى ولا اجد الا سواد.. فقط اللون الاسود هو المسيطر والظلام هو اسم اللعبة.
لا اشعر بنقمة على سائق التوك توك الذى اشعل فى نفسه النيران لان الضابط صادر الشىء الوحيد الى يملكه فى العالم والذى لم يصبح ملكا له بالفعل بعد. اشعر بالاشفاق عليه و اتمنى ان يرحمه الله اذا مات و هو منتحر.. هذا جابر اخر شعر انه لا يستطيع ان يتمادى اكثر.
قهر هو الذى استشعره الان. قهر شديد عندما ارى اصدقائى يفرون الى بلاد اخرى..قهر عندما ارى احبائى يعانون الاكتئاب وانعدام الحيلة.. قهر عندما ارى نفسى لا اتفاعل..لا اتحمس.. لا اغتاظ.. لا اضحك.. لا ابكى.. وشعور دائم بالنعاس مع استحالة النوم مزيج عبقرى لا يفلح معه كل اقداح القهوة المركزة كى تجعلنى افيق..
يريدون ان يحولونى واصدقائى الى جابر و جابر وجابر.. انا ارفض هم يرفضون نحن نحتج. انا لا أريد ان اكون جابر.فقط الان اعرف انى لا أخاف اى شىء اكثر من ان اكون جابر. ماذا سوف يحدث لى أسوأ من غد مظلم أسود لا اتبين فيه كف يدى و عيناى مفتوحتان؟
(اسألينى يا حبيبتى عاللى داير فى البلاد اللى فيها صادروا حلمى وباعوا صوتى فى المزاد.. اسألينى عن ولاد شفتهم بعنية دول جربوا كل الحلول وبيفشلوا بالاجتهاد)
مقطع من اغنية زحمة لفريق بلاك تيما وضعنى امام ذاتى بشدة.. انا حلمى قد صودر وصوتى بيع فى مزاد ولم يهتم البائع حتى بأن يقبض الثمن. انا وامثالى نجرب كل الحلول ونجتهد ونفشل بجدارة.
(أحكى ليكى الف قصة من حكاوى التعبانين.. اللى عايش نص ميت واالى ميت من سنين.. اللى نص كلامه كحة واللى شاف خمارة راحها واللى اكل العيش دبحها دايرة دور عالسكرانين)
هذه الايام لا اشعر باحتقار لاى شاب فقير مدمن او سارق او أى عاهرة فقيرة.. ربما أكون فقدت عقلى ولكن بالله عليك أى عقل يجب ان احتفظ به بعد كل ما حدث ويحدث؟..هناك من هو ميت منذ سنوات ومن يحيا بيننا نصف ميت والاثنان على قيد الحياة يتنفسون ويجب ان احتفظ بعقلى؟؟ بالتاكيد انت تسخر منى..
(اللى نامية وفيها ثروة من الفلوس تعمل جبال.. اسألينى عن كبارى نايمة تحتيها العيال.. اسألينى عالغلابة واسألينى عالتقال اسألينى عالديابة واسألينى عالفساد)
هناك الكثير ممن لا يجدوا قوت يومهم و هناك بورتو مارينا والرحاب و سان استيفانو وغيرها..أليست مفارقة ان نسمى هذا البلد الذى يمتلك اكثر من الف قناة فضائية بلد نامى؟؟
لا أشمئز مطلقا من اطفال الشوارع أشعر أنى مسؤولة عنهم بشكل ما..انا لا املك اى مستقبل فما بالك بهم؟ لا يعرفون معنى الحياة أصلا..
(فعل وفاعل مفعول بيه..اعرب مجلس شعبك ايه..مجلس طبعا يبقى مضاف شعبك هو المضاف اليه)
لا اعرف متى سوف تعترف الحكومة بالواقع وتنفض ايديها منا تماما ويتم حل كل مجالس الدولة ويتحول الجيش الى فرق حراسات خاصة كما حدث مع جابر وأمثاله فى رواية يوتوبيا ولكن ظنى انه ليس باليوم البعيد وقد حان الوقت لهذه الخطوة بدلا من تلك المسرحيات السخيفة التى نمثلها.
اختناق حقيقى.. صدقنى أنا اختنق.. ما الهدف من كلامى السابق؟؟
ليس هناك هدف محدد فقط أنا اسجل انى لست جابر و لا اريد ان اكون جابر .. انا انسان لى الحق الكلمل فى الحفاظ على ادميتى..سوف احاول ان احتفظ بها مهما كانت العواقب..
انا لست جابر ولن أتحول اليه..أنا اشفق عليه ولكنى لا احبه جابر وافق ان يكون جابر لكنى لا اوافق.. لن انتظر حتى يحولونى ثم اولول واملأ الدنيا عويلا.. أنا معترضة ولن أكون جابر.. حتى وان كان هناك المزيد من جابر فى كل يوم.......

الثلاثاء، 9 ديسمبر، 2008

مذكرات فتاة اخرى

السبت 1 يناير
غريبة ان يصادف اول يوم فى الاسبوع اول ايام السنة. قررت ان اكتب مذكراتى بدءا من هذا اليوم..ليست مذكرات بالمعنى المفهوم هى فقط مجرد تسجيل لاهم ملاحظاتى عن تلك الحياة..سوف اكون مختصرة جدا ولن اكتب اى انطباعات فقط تسجيلات امينة لمواقف ومشاعر..
الاحد 2 يناير
اعمل واعمل واعمل تم اعمل واعمل بعدها اعمل.. لا افعل اى شىء اخر ولكن الغريب اننى لم الحظ هذا الا الان. فقط الان اكتشف اننى لا املك حياة ولا اصدقاء ولا هوايات ولا ابناء ولا اى شىء.. شىء ممل للغاية..
الاثنين 3 يناير
سئمت الملل..الغريب ان هذه المذكرات لم تفدنى على الاطلاق قبل ان اقرر ان اكتبها واجلس لاستجمع افكارى كنت اهم نفسى اننى املك الكثير.. هل اتوقف عن كتابتها لاريح عقلى؟؟ لا انا احتاج الى الحقيقة اذن سوف استمر..
الثلاثاء 4 يناير
هل اريد الحقيقة؟؟؟ اذن لاعترف بها ولالقيها فى وجهى العابس فى المرآة.. هاتفى لا يدق الا لاسباب تتعلق بالعمل. حقيبتى لا تحتوى الا على اوراق تخص العمل.ملابسى ليس بها اى شىء يصلح لسهرة او حتى لنزهة بسيطة. ليس لدى اى معارف من اى نوع حتى جيرانى يتعرفون على وجهى بصعوبة.. هذا هو كل شىء وها هى الحقيقة..
الاربعاء 5 يناير
مرآتى تخبرنى الكثير. هذه هى المرة الاولى التى الحظ فيها اننى تخطيت الاربعين..هناك الكثير من الخسائر فالعمر لا يمضى فى سلام ابدا.اشعر اننى نمت فى العشرين واستيقظت فى الاربعين..ليست لدى اى حياة..ملل..رتابة..اعتيادية.. سئمت فعلا..
الخميس 6 يناير
خرجت -بالطبع وحدى- ابتاع بعض الثياب. ثوب رائع..حذاء عالى.. حقيبة صغيرة.. ادوات ماكياج واكسسوارات رقيقة.. ولكن يبقى السؤال ماذا سافعل بكل هذه الاشياء؟؟؟؟
الجمعة 7 يناير
قررت ان يكون هذا اليوم هو اخر يوم فى هذه الحياة الكئيبة وهو يتزامن بالصدفة مع نهاية الاسبوع.. انا الان فى ابهى صورة ولكن بقى ان اعترف اننى كنت حمقاء لمدة تزيد على العشرين عاما.. ولا استطيع ان اصلح كل شىء الان..بقى حل واحد وحيد سوف افعله راضية...

...............................................................................................................
وقد قررنا نحن التحفظ على محتويات الشقة وغلق القضية لتأكدنا لعدم وجود اى شبهة جنائية وسوف يرفق مع الاوراق الخاصة بالقضية تقرير الطبيب الشرعى الذى أكد انها حالة انتحار.......

تمت

الخميس، 27 نوفمبر، 2008

مدمن

المفترض ان اكون الان اسعد حالا..فأنا اعالج من الادمان الذى كان يفصلنى عن الواقع ويجعلنى احيا فى عالم يخصنى وحدى..انا الان محاط بالناس فى كل مكان بعد ما كنت احيا وحيدا..
الان انا احظى بالتقبل ولكنى للاسف لا احظى بالرضا..انها حقا معادلة صعبة تجسد بكل وقاحة جملة يالسخرية الاقدار فاما ان يتقبلك من حولك مع سخطك على هذا التقبل واما ان تحظى بالرضا ويأتى معها اوبشن الوحدة حقا شىء مضحك ان موقفى يجعلنى اضحك بشدة حتى تسيل دموعى رغما عنى..لقد كنت مدمنا -والحق اقول- كانت اياما سعيدة..
كنت احيا بأفكار المدمن الذى يرى ان الحياة لابد وأن تتحول الى الاروع.. كان ادمانى يعزلنى عن الواقع ويجعلنى اشعر انه لابد من وجود امل ما وهو حتما ات.. كانت هذه هى حالتى شبه الدائمة. كنت فى نظر الاخرين اخرق انانى لايعيش فى عالم الواقع وكان المتحذلقين منهم يصفوا ادمانى على انه هروب بل وامعانا فى الحكمة يخبرنى احدهم ان مبدئى فاسد ومغلوط وانى اتبع مقولة (نبل الغاية يغنى عن شرعية الوسيلة ) غايتى ان اكون سعيد ولكن وسيلتى خاطئة... لهم اقول هراء..كلام فارغ..هذا ليس مبدئى ولم يكن يوما.. ادمانى لم يؤذ احدا غيرى.ولو كنت استطيع الاستمرار فى ادمانى لفعلت..ولكن للاسف المخدر لم يعد يجدى نفعا تعقدت الظروف والاحوال الى الدرجة التى جعلتنى لا استطيع مجاراتها..لم استطع ان استمر..
بدأت اكتئب لا استطيع الحياة هكذا..الحق اقول وقفوا بجانبى و ساندونى ولكن لم تكن هذه هى المساندة التى اريدها ولكن رغما عنى قبلت. وعندما قبلت.ضاع منى الرضا.. وكسبت التقبل.. وخسرت ذاتى.
انا الان احيا على ارض الواقع وسط البشر الحقيقيين. ولكن كم اكره هذه الحياة وكم اكره هذه الوجوه..كم اكره هؤلاء البشر..ولكنى -للاسف- لا املك ترف الاختيار.
لقد وافقت ان اتعافى من ادمانى وهذا هو الطريق الوحيد لا مكان لاى هروب..لقد اغلق الباب الخلفى للابد.
لقد شفيت من ادمانى ولكنى اسجل ان ادمانى كان افضل من هذه الحياة الراكدة..لقد كان ادمانا شرعيا لم اخطىء فى حق احد..لا يجب ان احاسب على ادمانى واكرر مرة اخرى لو لم تتعقد احوالى لظروف خارجة عن ارادتى لاستمررت مدمنا الى الابد ..
ادمانى كان مشروعا..
فقد كنت اتعاطى..........الاحلام..

الأحد، 16 نوفمبر، 2008

اسمه الكامل انسان

كان عندى من ضمن احلامى الكتير حلم صغير سهل ان اى حد يحققه بس صعب بالنسبة لى .... من فترة طوييييييييلة وانا بقول نفسى احضر حفلة لمحمد منير... طبعا طبعا اول ما تقول كدة تلاقى حد حكمة القرون على وجهه يقول لك ( امممم محمد منير وحفلة بكرة تكبرى وتعقلى ) ....

امبارح حضرت اول حفلة فى حياتى لمنير... واااااااو انا بجد والله مبسوطة بطريقة مش صحية لانى ممكن اتجنن.. اساسا انا مش سهل ان يكون مودى لطيف كدة بس انا فعلا امبارح عشت ساعة من احلى لحظات حياتى...

الحفلة كانت فى مكتبة اسكندرية فى قاعة المؤتمرات بمناسبة الاحتفال الافريقى بالسيد (مو ابراهيم ) صاحب جائزة الحكم الرشيد .. كل دة مش مهم المهم انى حضرت الحفلة..

اولا محمد منير دة شخصية مفتوحة جدا وتحس انه قريب منك كدة وانه بيغنى لك لوحدك.. مش اى حد ممكن يحس اغانى منير.. بيبقى لها طابع كدة عجيب.. الحفلة بدأت بتصفيق رهيييييييييييييب من الجمهور اول ما ظهر على المسرح وانا كمان كنت متحمسة.. غنى اول حاجة اغنية نوبى مفهمتش منها ولا كلمة انا كنت قاعدة عاقلة كدة وساندة على الكرسى عادى... ثانى اغنية غنى علمونى عنيكى الاغنية دى مش معقولة تحفة بس كانت اول مرة اسمعها صراحة... ثالث اغنية بقى يونس يا لهويييييييييييي بموت فى الاغنية دى الموال الاول خطير وبعد كدة وهو بيقول دة حب ايه دة اللى من غير اى حرية لقيت نفسى بقول حرية دى بصوت عاااااااالى والناس كلها كمان بجد كانت لحظة حلوة قوى .. طبعا من اول اغنية يونس لحد اخر الحفلة وانا زاد حماسى بطريقة غريبة وطول الوقت قاعدة على طرف الكرسة وايدى وجعتنى من التصفيق الحاد الحماسى الغريب اول مرة ابقى كدة فى حياتى .. فعلا كانت لحظة حرية اول مرة احس انى كائن حر حرية مطلقة...
منير بقى تشوفه على المسرح.. مجنون رسمى .. وقفته.. رقصه.. تعبيرات وشه.. لبسه.. اكسسواراته.. كله كدة على بعضه حالة حرية مجسدة.. انسان حر وعارف انه حر وبيمارس حريته على مزاجه..
كتير قوى اتفرجت على حفلات فى التليفزيون بس الموضوع مختلف تماما وانت قاعد كدة فى وش المسرح وشايف وسامع كل حاجة لايف..
صوت منير كان احلى من اى تسجيل سمعته لاى اغنية له قبل كدة.. اقوى من اى تسجيل.. انقى من اى تسجيل.. احلى من اى تسجيل..
بغض النظر عن ان طبعا لبسه كله سينييه وغالى جدا بس المظهر كدة كله على بعضه تحس انه دماغ يعنى لو شفت اللبس دة على حد تانى هتقول ماله دة؟؟ لابس كدة ليه؟؟ بس عليه هو لايق جدا جدا..كان ماسك فوطة صغيرة كدة بيمسح وشه وبعدين يحطها فى الارض ويرجع ياخدها تانى يمسح بيها وشه(واحيانا بيمسح فى القميص) .. افراد الفرقة كل واحد فيهم دماغ عازف الجيتار مجنون رسمى تحس انه كان ماشى تايه فى الشارع فجأة لقى نفسه على المسرح.. عازف العود دمااااااااغ لوحده.. عازف الدرامز فيهم واحد لاسع وواحد راكز.. الفرقة كلها كدة حالة غريبة وترتيب الالات على المسرح مالوش حل..
غنى اغانى كتير حلوة طول عمرى بحب اغنية حاضر بس اول مرة احس انى عايزة اعيط وانا بسمعها.. عللى صوتك اصلا بتعمل لى حالة امل رهيبة بس امبارح كان تأثيرها غريب ... شتا....لا بجد اول مرة اعرف ان اغنية شتا اغنية عظيمة كان امبارح مع انى بسمعها كتير .. قلبى مساكن شعبية بقى كنت حاسة انه بيقرا بطاقته فعلا لايقة عليه قوى الاغنية دى ..
قبل ماتخلص الحفلة بشوية قال انه مبسوط وفخور انه بيغنى فى حضرة الفنانة الاسبانية العظيمة ماريا مش عارف ايه كدة وشكرها ورحب بيها وقال انه فخور انها بتسمعه(لما قال كدة اتأكدت انى بحب منير الشخص) ...
الحفلة دى بعيدا عن انها كانت حلم من احلامى واتحقق الا انها خلتنى اكتشف انى انسان حر وانى ممكن اعمل اى حاجة فى الدنيا وانى ممكن اعرف اعمل حياتى واغير المألوف .. ممكن حد يشوف كلامى دة مبالغ فيه بس فعلا انك تحس انك حر دى حاجة حلوة قوى وفعلا فيه مواقف معينة هى اللى بتحط الحقيقة دى فى طريقك... مش هغير نظام بلد بحالها بدماغى لوحدى انا عارفة بس يمكن لو حققت نفسى ابقى مفيدة والناس اللى حوالية تشوف دة وحتى لو محدش شاف كونى ابقى انسان صح دة مفيد لبلدى او انا شخصيا شايفة كدة...
على طول كنت بشوف ان الكلام عن الطاقة الايجابية كلام مش فارغ بس حالم زيادة عن اللزوم وصعب تحقيقه بس بعد جرعة الطاقة الايجابية الفظيعة دى انا مؤمنة بقدرة الاحداث على تغيير نفسية البنى ادم...
شفت امبارح حاجات ضايقتنى بس مش هعلق عليها ولا هحس انها خيابة يعنى مثلا البنت المصرية اللى كانت بتكلم صاحبتها المصرية اللى زيها وبتقول لها هندخل ال (vip) الاول وبعد كدة ال(0invitations ) وبعد كدة باقى ال(guests) بس ابقى (keep the invetation in your hand) وهم الاتنين مصريين وواقفين على ارض اسكندرية الغراء ..ولا هعلق على البنت اللى وقفت وقالت للولاد اللى كانوا قاعدين قدامنا لو سمحت (may i pass) ونطقتها غلط بالمناسبة.. كل دة مش مهم المهم ان فى ناس تانيين مؤمنين انهم مصريين وان مش الدليل على انى مثقفة هو انى اتكلم نص كلامى بلغة تانية...
من الاخر كدة انا امبارح انبسطت جدا وحاسة انه بجد حلم من احلام حياتى اتحقق... ومادام فيه حلم بيتحقق يبقى باقى الاحلام ممكن تتحقق بالتبعية ومفيش حاجة صعبة قوى يعنى ... وان لسة الاغانى ممكنة ...

الأربعاء، 5 نوفمبر، 2008

اعلانات مبوبة

اعلانات مبوبة اسم مش مناسب خاااااااالص للكلام اللى هقوله بس انا قلت احط العنوان رخامة يعنى.... هى مش اعلانات هى مناسبات.. او احداث..او حاجات حصلت.. تهنئة ممكن.. يعنى كل واحد يسميها على مزاجه ... نبدأ على بركة الله...
اول حدث واهم واحد فى نظرى هو صدور مجلة ابراج http://abraj-mag.com/abraj/news.php دة لينك المجلة كان نفسى احط صورة المجلة او اخلى اللينك شكله حلو بس قدراتى الالكترونية منعتنى ما علينا المهم بقى ان مجلة ابراج دى مجلة جامدة جامدة يعنى رئيس التحرير هو طارق عميرة ولما يبقى رئيس التحرير هو طارق يبقى طبعا المجلة مستقبلها واضح وبأذن الله هتبقى مشهورة ااااااااوى
الجامد فى الموضوع انى نزل لى مقال على صفحات مجلة ابراج الغراء ياريت تروحوا تشوفوه وبجد المجلة هتعجبكم جامد يعنى .....
ثانى حدث ان طارق كسب فى مسابقة بص وطل اييييييييييييييييييوة هو هو طارق بتاع المجلة دة العادى بتاعه اصلا يعنى ما علينا المهم مبروك يا طارق وعقبال ما تبقى حاجة كدة شبه بهاء طاهر ومتعاملناش وحش عشان طارق بيزعل احنا عارفين ان سيادتك متواضع وهتفضل تعرف امثالنا مبروك يا طارق.....
ثالث حاجة قريت رواية (ان تكون عباس العبد )للكاتب اللى ان شاء الله هيبقى فظيع احمد العايدى الرواية عجيبة فى اسلوبها فى التفاصيل فى اللغة المستخدمة فى الفكرة فى الالفاظ فى الاحداث فى كل حاجة وفعلا بتغير حاجة كدة جواك بعد قرايتها ... الغلاف تصميم احمد اللباد بس معجبنيش خالص لانه فى رايي مش مبتكر ومعرفش ليه دة تانى غلاف لاحمد اللباد يكون حاطط فيه وشوش ناس فى اخر الغلاف من تحت بس الغلاف الخلفى اسود كعادة دار ميريت طبعا حلو اللون بس الاحلى شريحة التليفون المرسومة على الغلاف الخلفى فعلا ملعوبة حلو جدا ومعبرة جامد يعنى الرواية اصدار دار ميريت ومينفعش الخصها لان دة هيبقى سخافة بصراحة ابقوا اقروها....
رابع حاجة شفتوا مؤتمر الحزب الوطنى؟؟؟ كوميديا رهيبة لما كان جمال مبارك بيقول احنا عايزين ايه؟؟ سياسات قديمة كانت بتستخدم زمان وكانت تنفع ايامها؟؟ وللا سياسة جديدة وفكر جديد؟؟ تعالوا نفكر احنا عايزين ايه.. فكرنى بأحمد حلمى فى ظرف طارق وهو بيقول تعالوا نتكلم بصراحة فيها ايه لما نتكلم شوية بصراحة؟؟ وانا ماشى فى شارع امريكا الرئيسى .. لا كوميديان جامد جدا ..طبعا قصدى احمد حلمى..
خامس حاجة واخر حاجة الانتخابات الامريكية... باراك اوباما فاز بالانتخابات.. يعنى امريكا دلوقتى رئيسها زنجى من اصول كينية وابوه مسلم.. رجل بالمواصفات دى قدر يهزم مرشح امريكى نموذجى ابيض انجلوساكسونى من الحزب الجمهورى... الشعب الامريكى اختار الرئيس اللى معاه مصلحته ونحى اى عنصرية على جنب... الشعب الامريكى هو اللى اختار الرئيس بتاعه عن طريق انتخابات حرة نزيهة (مش بيفكرك بحاجة المصطلح دة) ... امريكا فى سنين قليلة قدرت تنهى العنصرية واحنا بقالنا سبعتلاف سنة من ايام الفراعنة كل حلمنا اننا نتحول من بلد زراعى الى بلد صناعى ومش عارفين.. تبقى مهزلة وللا مش مهزلة؟؟؟ مبروك على الشعب الامريكى ادميته ومبروك علينا مؤتمر الحزب الوطنى....
كفاية كدة بقى رغى على دماغكوا يا بشر بس متنسوش تشوفوا المجلة ....... سلام

الاثنين، 27 أكتوبر، 2008

هلاوس شتوية

اليوم هو اليوم الاول الذى اشعر فيه بدخول الشتاء البهيج.. نعم هو بهيج.. انا أراه بهيج .. منظر امواج البحر الثائرة دائما ما يأسرنى.. جلستى المفضلة على شاطىء البحر تكون دائما فى الشتاء حيث لا مجانين كثر يتحملون هذا البرد .. الشوارع المبتلة وانعكاس اضواء السيارات الملونة على ارضية زلقة يكسوها ماء فضى.. ياله من منظر ..
انها اسكندرية حقا.. من قال ان الاسكندرية مصيف او انها رائعة فى الصيف؟؟
ما الروعة فى كل هذا الزحام والجو الحار الخانق؟؟
اسكندرية الجميلة هى اسكندرية الشتاء.. اجسر ان اقول ان الشتاء هو احلى فصول العام اعشق هذا الفصل وانتعش حقا عندما ياتى المطر ..
لا اعرف لماذا يذكرنى هذا الجو الشتوى بذكرى غريبة.. ذكرى هى فى الحقيقة لا تمت لى بأى صلة.. ذكرى فيها شجون غريب..
هذا الجو -ولا اعرف السبب- يذكرنى بقصة حب انتهت ولكن اصحابها لازالوا يذكرونها كأحلى ما حدث لهم..
الشتاء دائما يذكرنى بالصفو والبراءة.. مياه المطر - اعتقد- تغسل الارواح كما تغسل الشجر والشوارع.. دائما ما اشعر ان الشتاء هو الوقت الانسب للابداع فمتى سوف تكون روحك شفافة اكثر من الوقت الذى تسمع فيه زخات المطر وتستشعر نزول القطرات العذبة على وجهك اكثر من هذا الوقت؟؟ دفء الشتاء هو الدفء الحقيقى مع انى اعترف ان هناك انواعا من البرد النفسى لا تجدى معها اى وسائل تدفئة فى الكون.. ايضا الشتاء هو الوقت الامثل كى تشعر بالغربة .. كل هذه الرياح والامطار تهاجمك وحيدا ولا تستطيع مواجهة هذا الشعور الطاغى بانك وحيد ..
ايضا هو الفصل الذى تستطيع ان تذكر نفسك بقصة حب انتهت وطعم غريب للذكرى يجعلك تبتسم رغما عنك حتى وان كانت الذكرى ليست بهذا الحسن..
اذن الشتاء هو انسب الفصول كى تختبر كل هذه المشاعر سويا كل حسب حالته المزاجية ..
يقولون ان محبى الشتاء هم الشخصيات الاكتئابية التى لا تستطيع التكيف وتشعر بالاغتراب.. هل هذا حقيقى؟؟؟
انا شخصيا لا اعرف ولا اريد ان اعرف انا فقط استمتع بوجودى ضمن الكائنات التى تعيش هذا الوقت بكل تفاصيله..
تفاصيل الشتاء بالنسبة لى هى شوارع ذات مناظر خلابة.. بحر ثائر.. ملابس ثقيلة ولكنها لا تمنعك من الشعور بتلك اللسعة الخفيفة.. مشاهدة الطريق من وراء زجاج السيارة الذى تجمعت عليه نقاط المطر..الاستماع الى صوت الامطار خارج النافذة.. كوب شوكولاتة باللبن ساخن ..مكالمة تليفون غير متوقعة تاتيك فى الشارع.. ولا شمسيات على الاطلاق..
الشمسية اختراع مقيت يحرمك فرصة ان تمارس حريتك فى المشى تحت المطر والاستمتاع بهذه اللحظات العذبة وهى فى الاصل شمسية تقى من الشمس وليس من المطر فلماذا نتركها لتفسد علينا هذه اللحظات القليلة؟؟
هذه هى التفاصيل التى اعشقها فى الشتاء والتى احاول ان استمتع بكل منها طوال الشتاء..
اخيرا ولى الصيف الكئيب وبدأ السحر الحقيقى.. فلنستمتع.................

الثلاثاء، 14 أكتوبر، 2008

جريمة قتل

- انا بكرهك.. ايوة بكرهك.. طول عمرى بكرهك..طول عمرك جبانة وحطانى فى وش المدفع.


-..................................................... .


-بكرهك عشان طول عمرك بتضطرينى ادافع عنك.. طول عمرك مستخبية ورايا.


-................................................. .


-ايوة طول عمرك مخليانى انا الوحشة عشان ادافع عنك.. انت طيبة زيادة عن اللزوم يبقى انا لازم اكون جامدة وقوية.. انت حساسة يبقى انا لازم ابقى واقعية..انت غلبانة يبقى انا لازم ابقى قاسية..

طول عمرك هبلك بيعمل لك مشاكل تعمليها وتيجى تستخبى ورايا وانا اضطر ادافع عنك وكل مرة تصعبى علية فادافع عنك بشراسة واخسر ناس عشان خاطرك.

-.............................................. .

-جريك عشان تستخبى ورايا خللى الناس تكرهنى.. انا اللى باتصدى لهم انا اللى بادافع عنك.. انا اللى باخد لك حقك.. انا دايما الغبية فى نظرهم..لبستينى دور مش دورى..طول عمرك بتخلينى اعمل حاجات مش عايزة اعملها.. لو انت مش موجودة فى حياتى كنت هبقى عادية..من غير هبلك انا انسانة طبيعية مش مضطرة ابقى جامدة وقاسية وخشنة.

-.......................................... .

-لا انا خلاص زهقت منك.. مش عايزاكى فى حياتى بعد كدة.

-............................................. .

-بلاش تجبرينى اطردك من حياتى بالفوة لانى والله مش هاتردد اعمل كدة حتى لو فيها قتلك.

-............................................ .

-خلاص مش قادرة والله.. تعبت انت لازم تخرجى من حياتى ..والله مش قادرة اتحمل اكتر من كدة حرام عليكى.

-............................................ .

-انت مصرة متخرجيش من حياتى بمزاجك وانا والله خلاص موافقة اخرجك بالعافية ..معنديش مانع اقتلك.. انت لازم تخرجى من حياتى حتى لو بالغصب..انت اللى اخترتى النهاية دى .





..................................................................................................................................................

ايوة يا دكتور لقيتها واقعة قدام المراية فى اوضتها منتحرة.. قطعت شرايين ايدها بالموس.



تمت



ملحوظة رفيعة: مش لازم تبقى القصة وصف لحالة اللى كاتبها النفسية ومش لازم تبقى بتعبر عن نواياه دى قصة قصيرة عايزة اعرف رأيكم فيها بصراحة فى البناء فى الاسلوب فى السرد فى الحبكة بس كدة...

الأحد، 5 أكتوبر، 2008

تاجات ....هو يعنى ايه تاج؟؟؟

عندى برد شنيع... فعلا يعنى متبهدلة من البرد دة عشان كدة قلت اهيس بقى واجاوب على شوية تاجات...
صحيح نسيت اقولكم كل سنة وانتوا طيبين عملتوا ايه فى العيد؟؟؟ اشتريتوا هدوم جديدة؟؟؟ خرجتوا تتفسحوا؟؟؟؟ اكلتوا فسيخ؟؟؟ اخدتوا العيدية؟؟؟ المهم عملتوا كل دة او ماعملتوش كل سنة وانتوا طيبين..........
زمان زمان يا سادة يا كرام وما يحلى الكلام الا بذكر النبى عليه الصلاة والسلام جالى تاج من علاء صاحب مدونة عايش ولكن..
وجالى كمان تاج من مدونة يوميات نائمة فى الارياف اللى هى رنا ... رنا دى اول موضوع قريته عندها اثر فى قوى يا جماعة والله كان موضوع حلو قوى قوى بجد كان اسمه انا ورنا الموضوع دة مش عايز يطلع من دماغى لحد النهاردة المهم رنا بعتت لى تاج و قلت بقى نزولا على رغبة الجماهير هجاوب التاجات عشان ماتقولوش حرمتكوا من حاجة........
واحد.. اتنين.. تلاتة..تاج علاء
سبع حاجات نفسى اعملهم...(اشمعنى سبعة تحديدا؟)
نفسى يبقى عندى دم شوية زيادة عن كدة فى علاقتى مع ربنا.....
نفسى اكمل دراستى ......
نفسى اشتغل فى مجالى و فى نفس الوقت العائد المادى يكون معقول.....
نفسى اشترى عربية حتى لو نص عمر ......
نفسى ارتقى بمستوايا على كل الاصعدة.......
نفسى اغير الكمبيوتر الزفت بتاعى و اشترى كمبيوتر عنده دم مش بيبوظ كل تسع ساعات.......
نفسى اعمل عملية ليزك (تصحيح ابصار)
سبع حاجات معرفش اعملهم.....
سبعة بس؟؟؟ انا الحاجات اللى معرفش اعملها ممكن تتكتب فى مجلدات بس هحاول احصرهم ..
معرفش انجح فى الاحصاء بسهولة......
معرفش اتعامل مع الفيس بوك نهائى.....
معرفش احسب الفلوس بسرعة......
معرفش امسك اعصابى ولا لسانى....
معرفش اتعامل مع حد باسترخمه......
معرفش اعيش من غير كتابات دكتور احمد خالد توفيق...
معرفش اتخلى عن الحاجات اللى بحبها.....
سبع حاجات دايما بقولهم....
يا راجل؟
يخرب بيت القرف..
بتهرجى/بتهرج..
على فكرة..
المهم..
تقديم الخبر على المبتدأ او الصفة على الموصوف يعنى مثلا جاية انت؟/ بتهرج انت/ جزم هم..
زفت / زفتة الطين ودة مش على الحاجات اللى مش عاجبانى لا مثلا لو باتكلم عن حد مش فاكرة اسمه يبقى عارفاه زفت الطين دة..او مثلا هاتى زفتة الطين اللى جنبك..
سبع مشكلات ممكن تحلهم بالفلوس...
اعتقد معظم المشكلات لها جانب مادى يعنى الفلوس مهمة فى معظم المشكلات...
سبع اماكن بحبهم...
بحرى عند القلعة على الصخور اللى قريبة من البحر..
المنشية..
بيتنا..
اى حتة لى فيها ذكريات حلوة......
سبع اشخاص بحبهم غير عائلتى...
اصحابى كلهم ودول فعلا سبع اشخاص انا اصلى ماليش اصحاب بالهبل يعنى.....
سبع حاجات بحبهم قوى...
القراية..
الافلام الاجنبى..
الكتابة..
النت..
موبايلى..(له ذكرى حلوة معايا)
كل حاجتى لانى بارتبط بالاشياء جدا...
مدونتى حبيبتى..
سبع مدونات بحب اقراهم.......
لا دول كتير مش هينفع اقولهم واحد واحد..
كدة يبقى تاج علاء خلص بالسلامة.. نيجى بقى لتاج رنا..
من انت؟
انا انجى.
بطاقتك الشخصية؟
اسمى انجى...سنى عشرين سنة... ساكنة فى اسكندرية...طالبة فى كلية الاداب قسم علم نفس...
ما هى احلامك؟
لا دول كتير قوى بصراحة ممكن تراجع التاج الاول...
مين اقرب شخص ليك؟
رضوى صاحبتى...
ايه معنى السعادة من وجهة نظرك وحاسس انك سعيد؟
معنى السعادة انك تكون مطمئن ومش خايف ...حاسس انك سعيد؟ انا طول الوقت قلقانة وخايفة وصلت الاجابة؟
امتى حسيت انك ظلمت انسان ومحتاج لحظة غفران؟
كتير ظلمت ماما معايا طول الوقت الحقيقة اصلى شخصية مقرفة جدا..
بتعمل ايه لما بتكون متضايق؟
ولا اى حاجة ساعات لما اكون متضايقة قوى باعيط...
امتى حسيت انك اتظلمت وليه؟
مش فاكرة انى اتظلمت بصراحة...
ايه اكتر احساس بيراودك تجاه نفسك والاخرين؟
اكتر احساس تجاه نفسى انى وحيدة جدا وتجاه الناس حسب مين هو الشخص..
امتى ممكن تتنازل عن حق من حقوقك و ليه؟
ممكن اتنازل لو عشان حد بحبه ...
كدة خلصت التاجات الحمد لله اى خدمة.........

الاثنين، 29 سبتمبر، 2008

بطل من ورق

هناك الكثير من الابطال فى هذا العالم .. وهناك ايضا ابطال من ورق فى نفس العالم ولكن تتحدد قيمة هذا البطل حسب نوعية الورق.
هناك بطل يكتسح الساحة الان بطل من ورق هو ولكن الورق هو ما يرفع قيمة هذا البطل.. انه بطل من اوراق العملة.. صنع بطولته ويصنعها من ورق عالى القيمة انه بطل من الفلوس.
انه احمد عز..عفوا المليونير احمد عز..
كل الشعب منذ شهر تقريبا كانوا على قلب رجل واحد.. احمد عز محتكر الحديد..احمد عز مليونير.. احمد عز يستفيد من نفوذه.. احمد عز ظالم.. احمد عز يمتص دماء الغلابة..
كان هذا هو رأى معظمنا او كلنا كما اعتقد ولكن هذا الرأى تغير بمعجزة الهية ما منذ شهر واحد..
قرر المهندس احمد عز ان يمنح الشباب الكثير من الامل..
يتكفل احمد عز بمنح كل شاب من المشاركين فى مشروع ابنى بيتك بطن كامل من الحديد او ما يعادله من اموال..
اقام احمد عز بالمشاركة مع برنامج البيت بيتك مسابقة يمنح فيها كل يوم فى رمضان احد الشباب شقة..
قرر احمد عز ان يمنح من حرموا من الشقة فى المسابقة خمسين الف جنيه بمعنى انه منح ثلاثون شقة وثلاثون مرة خمسين الف جنيه..
قرر احمد عز ان يمنح من فازوا بالشقق اجهزة كهربية بمبلغ خمسة عشر الف جنيه..
افعال خير بالجملة كما هو واضح..
فجأة ودون مقدمات تحول المهندس احمد عز الى بطل قومى و منقذ شعبى و اصبح رجل البر والتقوى.. تغير رأى الجماهير فى احمد عز و اصبحوا يجلونه ويحترمونه ..
شاهدت احمد عز فى احدى حلقات برنامج تليفزيونى فانبهرت بالشخصية الجبارة القوية الواثقة جدا.. رجل يعرف حقا ما يفعله.. رجل لديه عقل يعرف الاستخدام الامثل له..
لقد احكم احمد عز اللعبة .. الان هو فى نظر معظم الناس مظلوم من الصحافة والاعلام خاصة البسطاء الذين لا يعرفوا معنى كلمات مثل احتكار او اسهم او بورصة.. البسطاء الذين لا يعرفوا كم صفرا فى المليون..
جارتنا طفلة تشاهد حلقات المسابقة وهى الان منبهرة اكثر ما يكون بهذا الاحمد عز و امنيتها ان تراه..
سألت صديق لى عن ما اذا كان يشجع فكرة طن الحديد ام لا وكان رده لا طبعا مش طن الحديد بتاع عز هو اللى هيعيشنى..
ولكن كم يوجد مثل هذا الشخص الذى فهمها صح؟على الجانب الاخر هناك الكثيرون يرون ان اللى ييجى منه احسن..
ايهما صاحب وجهة النظر الصحيحة؟
هل طن الحديد مش هو اللى هيعيشنى وللا اللى ييجى منه احسن؟
انا شخصيا ارى ان مشجعى فريق اللى ييجى منه احسن اكثر واعلى صوتا من الاخرين.. فعلا تحول احمد عز الى بطل قومى ..
ما أريد ان اقوله هو ان هذه الاموال التى يوزعها احمد عز علينا بدافع الصدقة وانه رجل خير و انه يساعد الشباب هى فى الاصل اموالنا نحن لقد اخذها منا والان يعطيها لنا بدافع الصدقة.. ولكنه اخذها بذكاء رهيب وايضا يعطيها بذكاء رهيب فلاشعرنا ونحن نسلب اموالنا ولا شعرنا الان باى نوع من المهانة-زى شكة الدبوس- سهلة وبسيطة..
فى اعلان طن الحديد الهدية (ابنى بيتك يا ابن بلدى راحتك انت اهم عندى) اهم من ايه؟؟؟؟؟؟؟
اقصى احلام اى شاب هو ان يبنى بيته وبدون حديد عز يعتبر هذا حلم مستحيل من الواضح فعلا ان راحتنا مهمة جدا.
كل من يفوزون بالشقة فى المسابقة يشكرون فى احمد عز و يدعون له بالخير و يمدحونه فهم لهم سنوات طويلة فى انتظار هذه الشقة.
غيظ عارم ينتابنى من هذا التحول الذكى جدا فى الراى العام تجاه المهندس احمد عز..
انه رجل ذكى جدا اعترف بهذا ولكنى ايضا اعرف انى انا الاخرى ذكية وهناك كثيرون غيرى اذكياء لا يرون احمد عز رجل البر والاحسان انما هو مازال فى انظارنا المهندس المليونير احمد عز ملك الحديد................

الثلاثاء، 16 سبتمبر، 2008

قوانين بنكهة الفوضى

انا شخصيا احب الشيكولاتة باللبن وافضل الزبادى بنكهة الفراولة... ولكنى لا احب القوانين بنكهة الفوضى..

احترم القوانين وافهمها جيدا واوافق على تطبيقها اذا ما كانت تحترم ادميتى و اذا ما كانت ليست بنكهة الفوضى ولكن للاسف فان النكهات المتوفرة فى الاسواق حاليا كلها فوضى...

انا مع قانون كادر المعلمين الجديد .. احترم هذا القانون جدا اذا كان هدفه فعلا ان يرفع كفاءة المعلم ويقوى ملكاته ويساعد فى النهوض بالعملية التعليمية.. ولكن اذا اضيف لهذا القانون نكهة الفوضى فقد مغزاه ونكهة الفوضى تتمثل فى ان تتحول اهداف القانون الى ان تكون تعجيز المعلم واختباره فيما يبتعد كل البعد عن مجال تدريسه واختباره بالقلم الرصاص مما يتيح التلاعب بالاجابات - على حسب ما سمعت- وان تخرج نتائج الاختبار موضحة ان معظم المدرسين غير مؤهلون وهذا لكى لا يستفيدوا من العائد المادى المقرر للقانون...
هذه هى الفوضى التى ارفضها.
انا مع قانون المرور الجديد .. احترم هذا القانون اذا كان هدفه فعلا الحفاظ على سلامتى على الطريق ورفع ثمن حياتى كروح لا يجب ان تهدر بفعل الاهمال .. ولكن ما ان اكتشف ان القانون يسرى على ولا يسرى على امثالى من المسنودين .. وانه لا يجب ان يحمل اى منهم حقيبة اسعافات بها ثمانية امتار شاش مفزلن - مضاف له الفازلين- وعندما يكون الهدف من القانون احراز اكبر عدد من المخالفات كاننا فى مباراة تنس طاولة..وان تكون مشكلة السائقين هى ارتفاع سعر اسكات البيه الضابط الى الضعف بعد هذا القانون.
هذه هى الفوضى التى ارفضها.
انا مع انتشار جرائد المعارضة .. وفضح جرائم المجرمين و لكنى لست مع ان يظل العنوان الرئيسى لجريدة معارضة كبيرة موثوق بها يحتوى دائما على اسم جمال مبارك.. دائما المانشيت الرئيسى يحتوى هذا الاسم وغالبا ما تكون القضية ليست حماسية ولا تهمنى بالقدر الكافى.
هذه هى الفوضى التى ارفضها.
اتخيل كل المواضيع السابقة لو نزعت منها نكهة الفوضى كانت ستكون افضل كثيرا..مثلا لو اضفنا اليها نكهة العدل او نكهة الذكاء سوف يقبل عليها امثالى اكثر.. ولن ينتشر هذا الصداع المزمن فى الجرائد والبرامج ولن نفرد حوارات ومناقشات وصفحات لمناقشة قضايا مصيرية مثل:
لماذا يمتحن المعلم بالقلم الرصاص فى امتحانات الكادر؟
ولماذا يجب ان يكون الشاش مفزلنا ولا يقل عن ثمانية امتار وليس عشرة مثلا؟
ولماذا يسافر جمال مبارك الى شرم الشيخ؟
الا تتفق معى فى هذا؟؟؟؟؟؟؟؟؟

الخميس، 11 سبتمبر، 2008

الليلة عيد

الليلة عيد.... ليه الليلة عيد؟؟؟ عشان بكرة عيد ميلادى يبقى طبيعى ان البشرية كلها تقيم الافراح وتولم الولائم وكدة يعنى احتفالا بعيد ميلادى........
كبرت انا خلاص بقى عندى عشرين سنة يعنى عهد (اشر ) اللى هو تمنتاشر تسعتاشر خلاص خلص.....
السنة اللى فاتت دى حصلت فيها حاجات كتير .. حاجات وحشة و حاجات حلوة بس الاكتر كانت الحاجات الحلوة او المهمة ......
يعنى السنة اللى فاتت حصل فيها حاجات كتير كانت اول مرة تحصل لى فقط وحصريا (اكسكلوسيف يعنى) ....
مثلا السنة اللى فاتت كانت اول مرة ادون ودى حاجة مهمة جدا على الاقل بالنسبة لى ... اول مرة كائنات بشرية تشاركنى كلامى وارائى ...اول مرة اتصاحب على ناس عمرى ما شفتهم بس احساسى اننا اصحاب قوى ...
كمان السنة اللى فاتت كانت اول مرة اشتغل و اول مرة اسيب الشغل واخد قرار انى هاقفل باب مهم و افتح انا لوحدى باب يمكن صعب لاسباب تتعلق بمصالح الكرامة العليا.......
كمان السنة اللى فاتت كانت اول مرة اعمل عملية واهم حاجة فى الموضوع دة انى اتعاملت مع دكتور نديم اللى هو اساسا محتاج بوست لوحده عشان اوصف كم هو رائع و عظيم و مؤدب و فاهم و طيب و شهم و خدوم و بشوش و زى القمر من الاخر كدة ابن ناس يعنى ماقابلتش زيه كتير وما افتكرش انى هاقابل زيه تانى اصلا.......
انجازاتى بقى السنة اللى فاتت مش كتير ومش مهمة كالعادة طبعا ......
يعنى من عينة انجاز فى كورسات الانجليزى ... قراية رواية يوتوبيا... قرارات فى حاجات مهمة... كدة يعنى.
بس اهم حاجة حصلت ان فعلا السنة اللى فاتت كان لها تاثير شنيع على شخصيتى يعنى حاسة انى بقيت انا حاجات كتير بقت اوضح فى شخصيتى اهتمامات كتير اترسخت عادات ومبادىء ما افتكرش انها هتتغير يعنى من الاخر شخصيتى تبلورت-حلوة تبلورت دى- السنة اللى فاتت بدرجة كبيرة فعلا.... بقيت انجى اللى هى لو حد خيرنى بينها وبين انى اكون اى حد تانى هاختارها هى بكل عقدها وكلاكيعها وكلامها اللى زى الطوب الاسمنتى و وجهات نظرها اللى بتخلى الناس يفكروها يا اما هبلة يا اما جاية حالا من المريخ ....
بقى عندى عشرين سنة بس مش حاسة انى كبرت يعنى ولا حاجة عادى .....
طبعا فى حاجات كتير وحشة حصلت السنة اللى فات بس مش فاكرة منها اى حاجة وكدة احسن اصلا يعنى ...
كلنا نسمع عن ازمة منتصف العمر بس حد سمع عن ازمة مقتبل العمر؟؟؟؟
هاضيفها باسمى لمؤلفات علم النفس ان شاء الله..
المهم كل سنة وانا طيبة ... عايزة اقول لكم ان الهدايا لازم تبقى محترمة يعنى مثلا مثلا ماما جابت لى موبايل فظيع...
يعنى ممكن اقبل هدايا من نفس العينة كدة مش عايزة اتقل عليكوا....... سلام

الأربعاء، 3 سبتمبر، 2008

اوراق ملونة

هرع ليلحق باصدقاءه على سطح البناية ليشاركهم صنع زينة الشارع التى يصنعونها كل عام احتفالا بقدوم رمضان.
وصل الى السطح ووجد اكوام الورق الملون التى سوف تتحول الى قصاصات باشكال جميلة يربطها خيط طويل يصل بين المنازل و يهنىء بقدوم شهر رمضان.
طقس سنوى هو .... يجتمع و اصدقاءهمنذ اعوام ..... هو شاب الان تعدى العشرون و لكنه يمارس هذا الطقس السنوى منذ كان طفلا صغيرا.
تامل الاوراق الملونة و رسم على شفتيه ابتسامة.
كل لون من الالوان كان له ما يفسره فى نظره ز له ما يؤكد هذا التفسير من الاحداث.
هذه الورقة الحمراء الكبيرة تذكره بالاندفاع ..الاحمر كان يعنى الاندفاع من وجهة نظره . يتذكر منذ اعوام عندما تشاجر مع صديقه حول من سيعلق هذا الخيط الملىء بالمثلثات الحمراء عند منزله . كانت مشاجرة كبيرة انتهت بخصام بينه وبين صديقه لذلك يمثل له اللون الاحمر الاندفاع. ابتسم وتذكر انه تخلى عن هذا الاندفاع الان و ليس لديه النية لدخول مشاجرة من اجل بعض الاوراق حتى وان كانت حمراء.
جلس على الارض و تناول الورقة الاخرى .. صفراء هى.. كان الاصفر يمثل له المرح والصخب ..لا يعنيه ما يقوله خبراء الالوان عن انه يمثل الحقد والكراهية ..هو كان يرى الاصفر دليل على المرح والصخب والدليل على ذلك ان الاوراق الصفراء التى كان يقصها منذ اعوام هو واصدقاءه كانت مصدر ازعاج دائم للجار الساكن اسفل سطح المنزل مباشرة. فهو يتذكر ليلة السحور التى قام فيها بعمل الزينة من الاوراق الصفراء وما احدثه من صخب هو واصدقاءه مما جعل الجار ينزعج بشدة.
الان هو عاقل لا يستطيع ان يزعج الجيران بدعوى ان الاوراق الصفراء تحتم ذلك.هذا الكلام الان هو هراء اطفال.
اما هذه الورقة الخضراء فتمثل له البراءة .. براءة الايام الاولى عندما كان يسر لاصدقاءه فى هذه الجلسة بادق اسراره التى لاتخرج عن كونها حب مراهق او خطاب وضعه لها فى حقيبتها وهم عائدين من المدرسة..
الان لم يعد برىء ..لا يستطيع ان يسر لاصدقاءه باسراره لانه لم يعد مراهق ولان الامر لم يعد يقتصر على خطاب فى حقيبة..
ترك الاوراق الملونة وهب واقفا انه لا يستطيع ان يشارك فى هذه الجلسة..انه لا يستطيع ان يتفاعل مع الوان هذه الاوراق ..
هو الان كبير وناضج وكان يتفاعل معها عندما كان صغيرا ملىء بالحيوية والصخب و الاندفاع والبراءة ..
عندما كان الطهر والسذاجة هو اسم اللعبة.
الان هو لم يعد هو .. لا يستطيع ان يصنع زينة الشوارع مع اصدقاءه لانه تغير كثيرا.. ولم يعد الاحمر يمثل له الا لون الدم ..و الاصفر الغل والكره..و الاخضر السذاجة والغشم..
حقا لقد تغير كثيرا..اصبح ينتمى لطائفة اخرى من البشر.. طائفة يصعب عليها الاستمتاع بمثل هذه الجلسة الحميمة..طائفة البالغين..
ترك الاوراق ونزل السلم ومشى فى الشارع باتجاه القهوة..هذه هى الجلسة التى يندمج فيها الان..جلسات القهوة ..جلسات البالغين..

الاثنين، 1 سبتمبر، 2008

حمد الله على سلامتى

حمد الله على سلامتى .........طبعا العنوان واضح وصريح ولا يحتاج لاى شرح او تحليل........
عملت العملية وبقيت زى الفل والله كان نفسى اجى اطمن الجماهير والحشود الغفيرة اللى افتقدتنى بس لظروف تتعلق بالنحس الكمبيوتر باظ ودخل العناية المركزة لمدة خمس ايام يللا ما علينا مش مهم..........
كل سنة واحنا طيبين بكرة اول يوم رمضان والنهاردة المسحراتى وكدة يعنى.........
طبعا كما لكم ان تراهنوا كان لى مغامرات فظيييييييييييعة فى المستشفى هأموت وأحكى عليها بالتفصيل بس اهم حاجة اتعلمتها انى عرفت قيمتى و انى غالية جدا عند ناس و عرفت حجمى ومكانى عند ناس تانية.......
عايزة بقى اشكر اصدقاء المجتمع التدوينى ميرو انتكة على لفها ورايا بالتليفونات لحد ما تلاقينى وتطمن علية...
أسامة ناصف على وقته اللى منحه لى بكل سماحة.......
وطارق عميرة اللى اهدانى هدية فظيييييييييييييعة(مش هقول عليها لاسباب تتعلق بالرخامة) وانا عند وعدى يا طارق اطلب اى طلب وانا هأنفذه على طووووول.........
اصحابى بقى اللى رجعت لقيتهم قالبين المدونة سؤالات واستفسارات عن صحة السيادة كيكى اللى كانت هتموت لما عرفت موضوع العملية و ماكانتش عارفة تجيبنى ازاى....... .. بجد والله شكرا لاى حد سال عنى و اهتم وكدة يعنى.................
طبعا طبعا الوجود فى المستشفى علمنى حاجات كتير اهمها ما يلى:
-مستحييييييييييل دكتور رفعت اسماعيل يمر على المرضى ودة مش لانه شخصية خيالية لكن لاننا فى اسكندرية ودكتور رفعت فى القاهرة ودة واضح انه سبب وجيه لعدم رؤيتى ليه فى المستشفى.
-ان الممرضات اللى بيمشوا فى الردهة فى نوباتشية الليل مش اشباح ولا حاجة سيبك انت من مشيتهم المتخشبة دى بس هم ناس حقيقيين ومفيش محاولات لقتلك بالمحلول اللى بيعلقوه فى دراعك ولا اى حاجة من دى.
-ان سماع محمد منير بالليل وانت باصص من شباك الغرفة حاجة لذيييييييييذة جدا لوحدك تماما هدوء تام شجن رهييييييب بس طبعا دة كله فى اليوم السابق للعملية لانك بعد العملية مش هتبقى سامع اى حاجة اصلا.
-ان سلسلة سافارى تحفة بجد وخسرت كتييييييير لما ضيعت كل دة وقت ما قريتهاش فيه ودكتور علاء عبد العظيم دة عسل و شخصية طبيعية جدا بس بردو مستحيل تشوفه فى المستشفى.
-ان اللى تاخده بالعتاب مالوش لازمة لانه مش بيبقى طالع من القلب لو شايف انك تستحق اكتر من كدة انسحب بهدوء بس مالوش لازمة العتاب.
-ان مفيش حاجة تستاهل تعب اعصابك وارهاق روحك و قلبك خصوصا لو سبتها على ربنا.
طبعا مفيش داعى اقول انى مارست هوايتى فى الرخامة على دكتور التخدير لما سالنى وجعتك الكانيولا؟؟؟ بصت له انا بكل سماجة وقلت له يعنى انا على سرير العمليات وعارفة انى هاعمل عملية وهيفرق معايا الم الكانيولا؟؟؟
و لا بردو فى داعى اقول انى فضحت الممرضة وهى بتشيل الدرنقة وقعدت اقولها ايييييييييييييه انت بتعملى ايييييييه صاحبتك كل يوم بتغير على الجرح مش بيوجعنى اشمعنى انت حرام عليكى...............
طبعا قبل كل دة وبعد كل دة انا فعلا حسيت بقيمتى و حسيت ان فى حواليا حب بجد و حاجات حلوة وافرحكوا واقولكوا ان الاكتئاب راح فى داهية الله لا يرجعه ودعواتكم وصلت كلها تامة غير منقوصة انا مش عايزة اخلص كلام بس البوست طول قوى كدة وفى مواضيع كتيييييييييييير كانت فى دماغى ونفسى اكتبها يللا كفاية عليكوا كدة يا بشر.
وهكذا رجعت انجى لتنير عالم التدوين مرة اخرى ...........ربنا مايحرمكوش منى قولوا امين.

الجمعة، 22 أغسطس، 2008

حاجات شبه الخواطر3

الحاجات اللى شبه الخواطر كترت قوى كدة بصراحة بس انا قلت ان الاكتئاب كدة خد وقت اكتر من حقه الصراحة وما ينفعش كدة خصوصا ان الموضوع كبير وانا ما ينفعش افضل قارفة الناس جنبى كدة فقررت انى اخرج من هذه الحالة الشنيعة او على الاقل احاول اخرج منها بس بردو لاااااازم تدعوا لى والنبى -المهم-
طبعا باين من العنوان انى هاكتب حاجات شبه الخواطر وهذه الحاجات هى كالتالى.
اول حاجة عايزاكم تفخروا بية كدة ودة ليييييييييييييييييييييييييييه؟؟؟؟
عشان اختكم عقبال عندكم -لا مش هتجوز بعد الشر- اتنشر لها مقال فى مجلة انترنتية اكتر حاجة فرحتنى ان مكتوب تحت العنوان بقلم انجى ابراهيم .. عجبتنى الجملة بصراحة وكيفتنى قوى عايزاكم بقى تروحوا تشوفوا المقال وتقولوا رايكم بكل صراحةhttp://elkopry.com/index.php?content=26&edit=16 دة لينك مجلة تحت الكوبرى التى شرفت بانها نشرت لى مقال طبعا وواضح انى هاقعد كل المحررين فى بيوتهم(دة تهجيص ماحدش يركز)..
تانى حاجة فى الخواطر عايزة ااكد عليكم دعواتكم عشان غالبا العملية الاسطورية هتكون الاسبوع الجاى-يارب نخلص بقى-
تالت حاجة فى الخواطر بقى شوية تاجات كدة على الماشى اصل نجوم المجتمع اللى زيى مش بيجيلهم تاج وللا اتنين لااا شوية تاجات و مع انى بحب اخلى حياتى الشخصية بعيدا عن الاضواء والشهرة والنجومية وكدة بس دة حق الجمهور علية (كفاية كدة نفخ)
اول تاج من نعكشة......
البنية بقالها كتير ما نزلتش بوست جديد ادعوا لها بقى عشان وحشتنى كتير
التاج بيقول........................
اول سؤال بدأت تدوين من امتى؟ و دخلت العالم دة ازاى؟
بدأت تدوين السنة دى من شهر مايو .... دخلت العالم دة من بابه اكيد يعنى مش من الشباك بس انا كنت مرة باتمشى على شط النت وكنت باعمل سيرش على حاجة وفى نتايج السيرش دخلت بالصدفة مدونة اشرف حمدى و عجبتنى جدا ودورت بقى بعدها وعجبنى الموضوع وقررت انى انشر الكلام بتاعى بدل ماهو محبوس فى الكراسة الخضرا تحت مرتبة سريرى.........
تانى سؤال ايه كان انطباعك فى البداية؟
امممممممم هنكشف الهبل بقى انا انطباعى كان انى باعمل حاجة عظيمة جدا وان دى حاجة مهمة طحن وكنت مبسووووووووووطة جدا جدا طبعا الشعور دة لسة موجود بس مش بنفس درجة الهبل يعنى عارفة انى باعمل حاجة مهمة بس من غير عبط .
تالت سؤال مين اكتر واحد بتهتم بتعليقاته على البوست؟
امممم هم كتير صراحة كتير قوى يعنى كل الناس اللى بحب اقرا لهم يبقى باحترم دماغهم وبالتالى باهتم بتعليقاتهم جدا.
رابع سؤال مين اتعرفت عليه من المدونة ونفسك تتعرف عليه فى الحقيقة؟
هو سؤال غريب صراحة انا اتعرفت على ناس واتكلمنا وبقينا اصحاب يبقى انا كدة عرفت حقيقتهم مش لازم اشوف وشوشهم يعنى بس ممكن نقول مين نفسى علاقاتى معاهم تمتد ونشوف بعض ونتقابل وكدة يبقى دعاء مواجهات و اسامة امين بس دة حاسة انى لو قابلته صدفة هاعرفه و حمادة زيدان وميرو انتكة عسل البت دى و عبد الله غنيم ربنا معاه ويرضيه يارب .
ايه اهم حاجة اتعلمتها من عالم التدوين؟
اممممم اتعلمت ان فى ناس بتفهم على كوكب الارض وان الارواح بتتلاقى فى ملكوت الله على راى خالتى نوسة.
ايه اكتر حاجة كرهتها؟
اكتر حاجة كرهتهااا؟؟؟ لما تبقى فاكر ان الشخص دة كلامه بيعبر عن شخصيته وبعدين تكتشف العكس تماما وان الافكار والكلام كلام فعلا.
ممكن تدى مثال عن اللى بتحلم تلاقيه؟
باحلم يا لهوىىىىى دة انا كدة عايزة مش بوست لا انا عايزة مدونة عشان اتكلم عن احلامى بس اكتر حاجة باحلم بيها دلوقتى ان حالتى النفسية تتحسن واعمل العملية وانجز بقى.
حاسس ان التدوين له تأثير؟
اهو السؤال دة بالذات تعبت من كتر الكلام فيه مع حد كدة شايف عكس رايى(مساء الخير يا بيه) اه شايفة ان ليه تأثير لو ماكانش على المستوى العام يبقى على المستوى الشخصى لانك هتتعلم تقول رايك بحرية وهتتعلم تناقش وتفكر وتتواجد.
قول كلمة اخيرة؟
كلمة اخيرة.
كدة اول تاج خلص
تانى تاج من اسامة امين(ربنا يهديه قولوا امين)
التاج بيقول(يا نهار اسوح دول طلعوا تاجين)
طب اول تاج فى التاجين اول سؤال فيه بيقول هل سبق وفكرت فى افعال مجنونة؟
هاهاهاهااااااى اه طبعا فكرت فى افعال مهبوشة مش مجنونة .
هل نفذت احد هذه الافعال؟
انا نفذت افعال غريبة لكن مش مجنونة صراحة.
ما هو رد فعل من عرفوا بهذه الافعال؟
انا قلت انها افعال غريبة مش مجنونة ومعظمها تتعلق بطول اللسان مع حد ما احترمنيش ويتخاف منه فالناس بقى يقعدوا يقولوا عبيطة انت؟ ايه اللى انت قلتيه دة؟ وكدة يعنى.
ما هو احساسك بعد ان قمت بهذه الافعال؟
ولا حاجة.
هل سبق ووقفت امام المراة لتقول لنفسك انت مجنون؟
ايون حصل طبعا.
تانى تاج من اسامة
لو اعطيتك 3 وردات هتهديهم لمين؟
اه بقى احراج طب بصوا انا هاستثنى اصحابى واخواتى هابقى اجيب لهم انا ورد على حسابى اما ال3 وردات واحدة لماما وواحدة لخالو وواحدة لدكتور احمد خالد توفيق واسلمها له بنفسى (تلكيكة بقى).
لو ورقة فيها 3 سطور هتكتب فيهم ايه؟
يارب ارضينى بما رضيت لى وعافنى فيما ابقيت حتى لا احب تعجيل ما اخرت ولا تاخير ما عجلت..دة دعاء عرفته لى باكينام صاحبتى وعجبنى قوى وباقوله كتير.
ما هو هدفك فى الحياة؟
هدفى؟؟؟ هدفى انى احقق كل اللى انا عايزاه كله كله.
ان شاء الله بكرة احسن من النهاردة مؤمن بالمقولة دى؟
اممم دة على حسب حالتى النفسية صراحة يعنى ماعنديش رد قاطع فى الموضوع دة.
اجمل مقولة سمعتها فى حياتك؟
لا دول كتير بس اخر حاجة سمعتها وعلقت معايا لا يستطيع احد اهانتك الا بمساعدتك.
من المغنى اللى بتحبه جدا واكتر اغنية بتحبها؟
اكتر مطرب محمد منير وكل اغانيه باحبها جدا مفيش حاجة بعينها يعنى.
غزة تمثل لك ايه فى حياتك؟
نتكلم بصراحة؟؟؟ ولا حاجة انا مش بافتكر غزة الا لما اشوف الاخبار واعرف ان فى حاجة حصلت اتاثر شوية وبعدين انسى حاسة انى خلاص فقدت احساسى بالقضية يمكن دة قلة احساس منى بس هى دى الحقيقة.
تعطى لانتمائك لوطنك كام فى المية؟
مش عارفة ايه المعادلة اللى ممكن احسب بيها الانتماء بس اللى اعرفه انى بحب بلدى جدا وحاسة انى ما اقدرش ابيع القضية.
لو تزوجت وانجبت بنتين وولدين هتكون اسماءهم ايه؟
هاهاهاها دة اساسا خيال علمى صراحة بالنسبة لى ولذلك مافكرتش فى اسماء لكن لو حصلت المعجزة يبقى هاسميهم اسماء غريبة واعرفهم معانيها عشان لما حد يعرف اسماءهم يقول الله اسمك حلو يا حبيبى ياترى تعرف معناه يروح ابنى بكل سماجة يقول له اكيد اعرفه بس ياترى يا عمو تعرفه انت؟ رخم قوى الواد دة ابنى بقى.
غشيت فى امتحان وانت صغير؟
تصدقوا لا.
لو اتعرض عليك رشوة كبيرة وانت فى زنقة مالية هتعمل ايه؟
اممم اللى انا متأكدة منه انى لو فضلت زى ما انا انجى بتاعة دلوقتى يبقى اكيد مش هاقبلها بأذن الله لكن مين عارف مش يمكن اتحول وابقى شيخ منصر؟ يعنى من الاخر شخصيتى بتاعة دلوقتى مش هتقبل الرشوة.
قول 3 صفات فى3 كلمات تصف بهم نفسك؟
ايه الرخامة دى يعنى من عينة رقيقة حالمة رومانسية وللا ايه؟؟؟ طب نحاول متسرعة ..عصبية.. قلوقة.
اول مرتب ليك وكان كبير هتجيب ايه ولمين؟
انا فعلا اخدت اول مرتب ليه بس ماكانش كبير جبت لاختى دبدوب كبييير ولماما شيكولاتة كادبورى ولاخويا علبة جل وبابا اخدت منه تمن شحن موبايلى باين.
ايه المجال اللى غير دراستك وشايف نفسك فيه قوى؟
لا تفرق نفسى فيه حاجة وشايف نفسى فيه حاجة تانية يعنى مثلا نفسى اكمل كتابة للابد بس دة مش معناه انى برنارد شو ونفسى اشتغل فى الاذاعة بس دة مش معناه انى امال فهمى يعنى نفسى فى حاجات كتير .
بتحب السفر؟
ايون.
طب دلوقتى حالا ايه المكان اللى نفسك تكون فيه؟
فينيسيا اللى هى البندقية حضرتك ايوة اللى فى ايطاليا دى اييوة هى بتاعة شكسبير اللى فيها مية فى الارض و حاجات كدة الله ينور عليك.
خلصت التاجات هو صراحة كان فى تاجات تانية بس كفاية كدة تنفيخ عليكوا بقى هارحمكوا من الباقيين وابقى اجاوبهم مرة تانية لان ومن يسألنى عن باقى التاجات هأقوله
ولكن هذه قصة اخرى.....................................
اخر حاجة بقى كل سنة واحنا طيبين رمضان قرب خلاص جبتوا الفوانيس وللا ايييييييييييه؟؟؟؟

الثلاثاء، 19 أغسطس، 2008

ادعوا لى

سلامو عليكو... ازيكوا يا بشر..... مش عارفة المفروض اقول ايه او احكى ايه او اهزر وللا اتكلم بجد بس اللى متاكدة منه ان اى حاجة هاقولها هتبقى سخيفة جدا ......... حالتى النفسية زى الطين فى حاجات بالهبل ماكنتش عاملة حسابى عليها حصلت ..العملية اتاجلت عشان حالة قلبى لا تسمح... منسحبة من الحياة بشدة... مش باعمل اى حاجة بالمعنى الحرفى المجرد للكلمة....بانام معظم الوقت بعد ما كان الارق صديقى الصدوق.... مش عايزة ادخل على مدونتى ولا قادرة اتابع مدونات حد .... مش باتفرج على التليفزيون ولا اعرف اخبار اى حاجة فى الدنيا.....تصرفات الناس باخدها على اعصابى وعندى احساس شنيع بالتطنيش..... قربت ابطل كلام حتى.
ايه بقى لازمة الكلام دة؟؟؟؟؟
ادعوا لى ممكن؟؟ بس ادعوا بذمة بالله عليكم... ادعوا ان حالتى تستقر واعمل العملية واخلص ..
انا مش بازور حد انا عارفة بس اعذرونى اول ما افوق وارجع كدة لحالتى الطبيعية هاقرفكم تانى ما تقلقوش..

الخميس، 7 أغسطس، 2008

أجازة اجبارية وقصة قصيرة

سلامو عليكو.. طبعا العنوان عجيب ايه اجازة اجبارية يعنى وايه اللى جاب الاجازة للقصص هى البت دى مش هتبطل فزلكة...
اولا الاجازة دى لها سبب...........استعدوا...............بيان هام..........
يا كل اصحابى وحبايبى المدونين.........ادعوا لى...
ليه؟ عشان يوم السبت اللى بعد الجاى -اللى مش بعد بكرة دة لا اللى بعده ركزوا- هأدخل المستشفى عشان اعمل اول عملية جراحية فى حياتى ان ان ان ( موسيقى مؤثرة) بس ماتخافوش يعنى انا جبت النتيجة من الكنترول وعرفت انى باذن الله هابقى زى الجن وهارجع اقرف فى حضراتكم تانى ولا تقلقوا...
اسمع حد لذيذ بيقول ولما العملية كمان اكتر من اسبوع قرفانا من دلوقتى ليه؟
اقوله لو مش عاجبك اخبط دماغك فى الكيبورد بس فى سبب.. السبب هو انى يوم الحد اللى جاى-اللى هو بعد بعد بكرة دة ركزوا- رايحة مطروح معسكر تبع الجامعة فى الصحراء بقى وخيم وجو تانى عشان كدة قلت رخامة يعنى انزل البوست دلوقتى عشان بدل ما تدعوا لى يومين تدعوا لى اسبوع ويومين مافيهاش حاجة مدونتى وانا حرة فيها.....
طبعا انا عارفة ومتاكدة وموقنة انكم هتفتقدونى عشان كدة بقى قلت اسيبكم تتسلوا فى قصة قصيرة من ابداعاتى و كدة اكون فسرت العنوان.
يللا اسيبكم بقى مع القصة بس ما تنسوش تدعوا لى..............


.........................................................................................................................................................................

فشل
......
انها تعيش ايام من اسعد ايام حياتها . تعرف ان هذه الايام سوف تكون من الذكريات الغالية ذات يوم.
تشعر برضا بالغ عن الحياة وعن ذاتها فقد نجحت بعد جهد جهيد ان تقنع صديقتها باهمية الحياة و تخرجها من حالة الاكتئاب التى كانت تعيش فيها. انها ترى الامان الان كسهم معادلات الكيمياء - رايح جاى- بينها وبين صديقتها فهى تشعر بالامان الشديد بعد ان منحت صديقتها الامان و ساهمت فى زوال الاكتئاب و اثنتها عن الافكار السوداء.
امنت بقدرتها على التاثير فى البشر و بانها تستطيع ان تتفهم و تعالج وتحتوى المواقف العصيبة.. رباه كم يشعرها هذا بالسعادة فبعد صولات وجولات مع صديقتها استطاعت ان تقنعها و بالتدريج اعترفت صديقتها ان الاقتناع تحول الى يقين ان الاكتئاب ليس هو الحل.
.............................................................
-الو.......ايوة يا طنط......هو ليه انت اللى بتردى على الموبايل؟
-اصل احنا فى المستشفى.
-مستشفى؟؟؟ ليه؟؟ خير؟
-شفتى..بنتى كانت عايزة تحرق قلبى عليها..حاولت تنتحر..شفتى صاحبتك كانت عايزة تعمل فية ايه..
.............................................................................
ترتدى ملابسها لتذهب لزيارة صديقتها فى المستشفى للعجب هى لاتشعر بالهلع على صديقتها فقط هى تشعر بالغضب..غضب شديد انها تخيلت ان محاولاتها اقنعت صديقتها وان صديقتها اوهمتها انها اقتنعت..
فشل اخر ينضم الى قائمة فشلها الطويلة..هل هى انانية الى هذا الحد هل يعنيها فشلها اكثر مما تعنيها حالة صديقتها الحقيقية؟
لا تعرف و لكنها سوف تذهب و تمثل دورها الاجتماعى فى الاصابة بالهلع والحزن من اجل صديقتها..لا لن يكون تمثيلا الى هذا الحد هى فعلا حزينة ولكنها تشعر بالفشل امام موقف وضعت فيه وفشلت.
ابتسمت..هى دائما تفشل مع الناس و لكنها تنجح فى الاعتراف بهذا الفشل.
نظرت الى وجهها فى المراة
-نفسى افشل فى الاعتراف بالفشل.

الأربعاء، 30 يوليو، 2008

يندب فى عينها رصاصة

طبعا انا مش متعودة انزل بوستين فى اسبوع واحد ولا كمان متعودة انى اكتب بالعامية فى موضوع جاد بس انا حاولت استنى شوية عشان اقدر استجمع افكارى واكتب كلام مترتب ويعدى الاسبوع مانفعش-المهم-
زماااااان لما كنا صغيرين فى المدرسة قالوا لنا ان رمز العدالة واحدة ست شكلها برىء ولابسة لبس اشبه بمسوح الرهبان ومغمية عنيها وماسكة فى ايدها ميزان ودة لييييييييييه؟؟؟؟؟
عشان الست دايما حساسة ومرهفة ولابسة محتشم عشان العدالة محترمة ومغمية عنيها عشان ماتفاضلش بين الناس وماسكة ميزان عشان دة يكون الفيصل فى حكمها على الناس ..... دة اللى قالوه لنا زمان...
يوم الاحد اللى فات قلعت الست عدالة مسوح الرهبان و خلعت العصابة اللى على عنيها و رمت الميزان فى الارض وحكمت بالبراءة على ممدوح اسماعيل...
يوم الاحد اللى فات اكتشفت ان المدرسين علمونى غلط وان العدالة عنيها واسعة يندب فيها رصاصة و بتحكم على الناس بمزاجها حسب هم مين وولاد مين...
يوم الحد اللى فات اكتشفت ان العدالة ماسكة فى ايدها بدل الميزان سلسلة مفاتيح عشان تفتح بيها الابواب المقفلة قدام السفاحين...
يوم الحد اللى فات العدالة قتلت اكتر من الف روح مضروبين فى اتنين دول بالتقريب عدد اهالى الضحايا اللى قتلهم السفاح اللى برئته العدالة هو وابنه...
يوم الاحد اللى فات اكتشفت ان انا واللى زيى مالناش سعر و عادى جدا انى اموت وابقى اكل للسمك و احلامى واحلام اهلى تموت ومن بعدها دمى يروح هدر وكرامة اهلى تتداس بالجزم...
يوم الاحد اللى فات اكتشفت ان -على راى صديق لية- ان جزمة ممدوح اسماعيل اغلى منى ومنه...
يوم الاحد اللى فات اكتشفت انى محبطة جدا وان تقريبا مفيش امل...
يوم الاحد اللى فات دخل القاضى الانيق القاعة وقتل من غير دم الاف الناس اللى حسوا ان اولادهم ماتوا تانى قدام عنيهم وكان عزاء من غير اموات...
العدالة يا جماعة طلعت عنيها تندب فيها رصاصة مش مغمية عنيها ولا حاجة ايقوا حاسبوا المدرسين اللى ضحكوا عليكم وانتوا صغيرين... حسبى الله ونعم الوكيل

الجمعة، 25 يوليو، 2008

اختناق

استيقظ من نومه لم يجد احدا من افراد اسرته فى المنزل .. شعر بسرور بالغ هو لا يريد ان يشغل التليفزيون والكاسيت معا ويرقص على طاولة الطعام .. انه فقط يريد ان ينعم بالصمت والوحدة الحقيقية..
اعد لنفسه قدحا من القهوة و خرج الى الشرفة يتامل هذا الصباح الجميل الذى لم يبداه باحساس الاختناق المعتاد ..
مع كل رشفة قهوة تتداعى الافكار..
لماذايشعر بالوحدة وسط اسرته؟
تالم للخاطر..
هو لا يريد هذه الوحدة ولا يتمناها انها وحدة اجبارية و ياليتها وحدة حقيقية فهو محاط بهم طيلة الوقت ولكنه لا يتواصل مع اى منهم.
هو لا يكرههم ابدا فقط تمنى لو تقبلوه و كفوا عن محاولة تعديله فى كل ثانية.
انتهى قدح القهوة فقام وارتدى ملابسه وخرج.
فيما بعد حكى لصديقه هذه المحادثة التى دارت بينه وبين نفسه. استنكر صديقه موقفه و اكد له انهم يحبونه.
ضاق للموقف.
هو يعرف انهم يحبونه هو فقط فى حاجة الى التقبل
-عايز تعيش لوحدك؟ بطولك؟ يا اخى كفاية انك لو بتموت هتلاقى حد منهم يلحقك..................
هم ان يشرح له ان المسافة بينه وبينهم اتسعت لدرجة انهم يمكن ان يكتشفوا جثته بعد فوات الاوان لانه لا يتبادل معهم اى حوار ولكنه عدل عن هذه الفكرة فمهما شرح لن يفهم صديقه اى شىء...........
عاد الى المنزل فوجدهم جميعا سالهم اين كانوا فى محاولة لفتح حوار.. نظروا له فى استغراب
- وانت من امتى يهمك روحنا فين وجينا منين وللا احنا على قد مزاج سعادتك؟
دخل الى غرفته تحاصره الخواطر ..
هل هو سىء الى هذه الدرجة؟مستحيل ان يكونوا كلهم على خطأ وهو الوحيد المصيب .
ربما لا يجب عليهم ان يتقبلوه و يجب عليه هو ان يتغير. يغير اراؤه و افكاره لكى يستطيع التواصل معهم. ولكنه فى هذه الحالة لن يكون هو سوف يصبح اخر .
ان الافكار تخنقه.
يشعر انه محاصر. عقله يحاصره. ضميره يحاصره ونفسه يضيق.
هو بالفعل يختنق بالمعنى الحرفى للكلمة.
لا يستطيع التنفس. هل سيموت الان؟؟؟؟
لو مات عندها سوف يعرف صديقه انه من الممكن ان يموت من الوحدة وهو محاط بالناس...................

الخميس، 17 يوليو، 2008

اللعب الرايق

عيل صغير عمل صوابعه كدهوه مسدس وقال لصاحبه طريخ طراخ..قام صاحبه طاوعه وساق له فيها وعمل له ميت واهله قالوا دة طخه طخ..ادى اصول اللعب الرايق.....................................
الاغنية دى من فيلم رشة جريئة انا بحب الفيلم دة جدا والاغنية انا شايفاها عبقرية-المهم-
لاحظت فى الفترة الاخيرة ان قطاع عريض من الناس بيلعبوا بنفس اصول اللعب الرايق كل منا اختار له دور مقتنع او غير مقتنع به ليس هذا هو ما يهم الاهم ان يلعب دوره ببراعة فى الدور المسنود اليه.
كنت من ايام ضمن ركاب حافلة والسائق كباقى السائقين لا يميزه اى شىء غير عادى وصل السائق الى مكان معين بعدها ينطلق فى طريقه بمحاذاة البحر..استوقفه ضابط مرور اكرر ضابط مرور اخذ الضابط رخص السائق وقال له (لف وانت راجع خدها) ...لف السواق ورجع ياخدها نزل وعدى الطريق اثناء تعديته للطريق رايته يخرج من جيبه 20 جنيه لياخذها الضابط.............................
لماذا؟هذا الضابط يتمتع بالباشوية فى مجتمعنا فلماذا ارتضى لنفسه هذا الدور المهين؟ هذا الشخص عمل نفسه ضابط بينما الحقيقة انه قاطع طريق ...السائق الذى اخرج العشرون جنيها عمل نفسه متضايق بينما هو راضى بهذا الدور.
محمد ابو ياسر البقال المسؤل عن صرف التموين الشهرى للمواطنين ياخذ جنيهان ونصف زيادة عن ثمن التموين الاصلى ويثور عندما يناقشه اى من الافراد المستحقين للتموين ولسان حاله يقوا(بفلوسى يا كلاب) مع انها مش فلوسه .. هذا الرجل عمل نفسه تاجر و بائع بالحلال بينما الحقيقة انه نصاب وكل مواطن لم يبلغ عنه مباحث التموين عمل نفسه مظلوم بينما هو يستطيع ان يرفع هذا الظلم عن نفسه...
لماذا كل منا مستغرق لهذا الدور الذى كتبه لنفسه؟ ويخرجه يوميا بنفس الحرفية؟
هذه نماذج بسيطة للغاية مما يحدث يوميا بيننا على الملأ اصبحت حياتنا كلها لعب رايق ..كل منا معجب بدوره ونتنافس على اينا سوف يبرع اكثر من غيره..عبثية مطلقة.
ما الهدف من كل الكلام السابق؟؟؟؟
لا اعرف ربما اريد ان نكف عن لعب ادوار ملفقة .................. ربما اريد ان نكف عن العبث.................ربما اريد ان ننتبه اكثر لحياتنا الحقيقية.............او ربما بعض التطهير لا ادرى حقا.
كل ما اعرفه اننى سئمت اللعب الرايق................

الخميس، 10 يوليو، 2008

حاجات شبه الخواطر2

انا رجعت بالسلامة الحمد لله .............. رجعت منين؟
ماهو انا كنت غايبة بس مافيش حد كان واخد باله وكله قال احسن اهى غارت بس انا رجعت.... رجعت زى مصاصين الدماء على سهوة
الحاجات اللى شبه الخواطر المرة دى شوية حاجات كدة مالهاش اى اهمية بس قلت احطها عشان مش بحب اجاوب على تاج بس من غير موضوع.............
اول حاجة واهم حاجة ان الشاشة بتاعتى بايظة ادعولها والنبى عشان انا سالفة شاشة صغيرة تقريبا اتنين بوصة ومضيعة خالص بس ان شاء الله شاشتى حبيبتى تتصلح وترجع قبل ما نظرى يروح ادعوا للشاشة اوعوا تنسوا.....................
تانى حاجة شريط تامر الجديد نزل يا جدعان تامر تااااااااااااااامر بيقول لما تحس بظلم وكهر عارفين الكهر دة؟؟؟؟ اللى هو القهر يعنى ما علينا طب شفتوا الردح اللى فى اغنية اسكتى؟؟؟؟ وانا اقصد جمل معينة ياريت اقدر اقولها فى اغنية قصدى بوست وللا ايييييه بقى شفتوا البوسترات يا خرااااابى فاكر نفسه بروس ويليس وللا البوستر اللى لابس فيه تيشرت عليه حروف اسمه تحفة......................
تالت حاجة نتيجتى قربت ادعوا لى انجح واجيب تقدير وانتوا بتدعوا ركزوا مع الاحصاء فى الدعاء ماشى؟
رابع حاجة بقى التاج اساسا البوست دة فاشل وانا باكتبه كده عشان وحشتنى الكتابة والمدونة لانى مش عارفة اركز وانا ممققة عنية فى الكتابة الصغيرة دى وعشان كدة قررت اتحفكوا بتاج انا جالى 3 تاجات واحد من دعاء مواجهات العسل يارب ترجع بقى بالسلامة والتانى من دكتور عمرو فاروق والتالت من التحفة كيكى هانم هارد على تاج الدكتور عمرو عشان هو المختلف والتاجين التانيين هاحطهم فى الخلاط وهارد عليهم على انهم تاج واحد على سبيل الاستعباط ماشى؟
اذكر 3 احلام من ماضيك كنت هتتمسك بايه وتغير ايه؟
اممممممممم احلام الماضى طيب ......... اول حلم كان نفسى ابقى دكتورة طبيبة يعنى.. تانى حلم كان نفسى يبقى عندى عربية .. تالت حلم كان نفسى اتجوز............
دلوقتى اول حلم استبدلته بانى ان شاء الله هاحضر دكتوراه فى العلاج النفسى وهابقى دكتورة بس مش طبيبة..تانى حلم ما اتغيرش فيه اى حاجة لسه هاشترى العربية واسوقها وانا مشغلة محمد منير نعناع الجنينة على اخره..تالت حلم لا تعليق.........................
اذكر 3 احلام تخص مستقبلك؟
نفسى اخد الماجستير والدكتوراه قبل ما اكمل30 سنة..............
نفسى يبقى عندى مركز علاج نفسى...............
نفسى انجح فى الاحصاء.............
اذكر شخصيتين موجودين فى حياتك كان نفسك يتواجدوا من قبل؟
الحمد لله اى حد فى حياتى دلوقتى او جه قبل كدة وخرج او لسة موجود جه فى وقته بالظبط ماكانش ينفع ييجى قبل كدة واى حد لسة ماجاش فى حياتى براحته انا مستنياه......................
شخصين غير متواجدين واتمنى وجودهم؟
راجع اجابة السؤال السابق لسة هاوجع قلبى وعينى واكتب تانى.............
لمن تهدى التاج؟
اهدى التاج لمييييييييييييييييييييين امممممممم اهديه لاسامة صاحب المدونة الخطيرة شمو نشادر ولحمادة زيدان وكيكى لازم ادبسها زى ما دبستنى............
نيجى بقى لتاج كيكى ودعاء........... انا جاوبت على تاج شبهه قبل كدة فطبعا مش هالتزم بالعدد يعنى مش لازم 10 صفات او16 صفة يعنى بلاش رخامة اساسا انا مش عارفة فى حد هيقرا العك دة ليه؟
- لما بازعل باتخرس يعنى لو اتضايقت من حد او حد زعلنى وعمل معايا موقف بايخ باقعد خارسة ومش باتكلم ولا بارد ولما بارد بارد بقرف.
- لما باصاحب حد بارتبط بيه جدا وبيجى لى وسواس قهرى اننا لازم هيحصل حاجة والصداقة دى تروح.
-باخد تصرفات الناس على اعصابى وماباحبش حد يطنشنى.
-متعصبة جدا للستات وباحب اى ست جدعة ومحترمة وتقدر تاخد حقها.
-على طووووووووووول كلامى بيتاخد غلط ودى حاجة بتخلينى هاولع.
-مع انى باخاف على تصرفاتى بس كتير بتخرج منى تصرفات انا شايفاها شخصيتى والباقيين شايفينها بواخة وغلاسة.
-جدعة فى المشاوير وباخلص كل حاجتى وحاجات الناس كمان بنفسى وباتخانق وبازعق وباخد حقى بالذوق وبالعافية وبكل الطرق وحافظة اسكندرية شبر شبر يعنى من الاخر تقدروا تقولوا مسترجلة.
-كل شوية باكتشف حاجة جديدة فى الحياة واخر اكتشافاتى انى اكتشفت ان كل حاجة فى الدنيا ليها تاريخ انتهاء صلاحية كل حاجة كل حاجة حتى العلاقات الانسانية.
كفاية كدة بقى لك عشان عينى وجعتنى من الشاشة الصغيرة دى والله بس والنبى اوعوا تنسوا تدعوا للشاشة ربنا يرجعها بالسلامة قولوا امييييين..

الجمعة، 27 يونيو، 2008

ذهول

انها حقا مذهولة.. كيف ترى نفسها هكذا من الخارج كدور المتفرج مع انها تعرف يقينا انها غير نائمة وبالتالى ليس هذا حلما باى شكل..
انها ترى كادرات هى العامل المشترك فى كل كادر وكل كادر هو بمثابة اسكتش صغير يؤدى امامها.
هذا هو اول كادر.. هذه هى ولكن.. مهلا.. انها اصغر سنا قليلا مراهقة هى.. مراهقة تعسة تقف فى الفصل وتوبخها المعلمة على تقاعسها.. تعود الى مقعدها وتنظر حولها انها الوحيدة المختلفة كلهن جميلات.مهندمات.مرحات.ماعدا هى .. هى غير متميزة فى اى شىء بمعنى ادق هى غير مرئية اصلا...........................................
يتبدل المشهد وسط ذهولها ليتحول الى كادر اخر هنا هى يافعة قليلا .. ايضا غير مميزة فى اى شىء وتوبخ مرة اخرى ولكن من امها.. تلومها على شىء ما هى ترى انه حقها ولكن امها ترى انه ليس لها حقوق من الاصل.. مرة اخرى تعود لمقعدها فى الغرفة تغمض عينيها وتسترجع مشاهد زميلاتها.. مميزات كلهن... منهن الجميلة والمرحة والذكية اما هى فلاشىء يميزها .. لازالت غير مرئية................
مرة اخرى يتغير الكادر فى هذا الكادر هى تصرخ وتولول محاولة اقناع من حولها بشىء ما.. لا يهم ما هو الشىء..لا يهم من هم من حولها.. المهم انه لا احد يعطيها اى اهتمام ومن يستدير لها يفعل فقط كى يقول لها الم تقتنعى بعد انك غير مرئية و غير مهمة على الاطلاق؟ افيقى واعرفى قيمة نفسك جيدا انت لاشىء لاشىء..................................................
يذوب الكادر ليتكون غيره هى تقف وهو لايكف عن الكلام يقول لها كلام كثير يحاول اقناعها فيه بانه غير مؤهل للارتباط مع ظهور علامات سام على وجهه كلام كثير من نوعية لا استطيع لا اريد .انتهى كل شىء......................................
تسمع صوت بكاء..... نحيب شديد......... تفطن انه صوتها هى.. بكائها هى بالذات.

تفيق وتنظر حولها لترى الرجل ذو المعطف الابيض والعوينات يكلم امها

-اكتئاب حاد مع اعراض ذهانية.

-اجنت ابنتى؟ لماذا؟لماذا؟

تلاعبت ابتسامة شاحبة على ثغرها ورددت فى عقلها : احقا لا تعرفين لماذا؟

الثلاثاء، 24 يونيو، 2008

اسطورة الثانوية الزفت

الثانوية العامة السنة دى اسطورة فعلا..........
امتحانات تشبه الالغاز او اصعب...........
عينات عشوائية ومدرسين يصرحوا انهم غير مؤهلين لحل الامتحان فى الوقت المخصص.........
اخبار تتصدر صفحات الجرائد وطلبة منهارون واولياء امور بيدعوا على واضعى الامتحان.........
حوارات على الفضائيات فى اهم البرامج اليومية.............ومطالبات باقالة الوزير.........
ما يشبه الحداد فى كل البيوت التى تعانى من وباء الثانوية العامة..........
كنت عازمة الا اتكلم فى الموضوع حتى صباح اليوم مانشيت جريدة الدستور يقول
(طالبة تصاب بجلطة وطالب يمزق ورقة الاجابة ........ طالب يشنق نفسه واخرى تلقى بنفسها من الشرفة)
ذهلت من الخبر .. هل الثانوية العامة تتطلب هذا الذعر الشعبى الذى نعيش فيه؟؟؟
لماذا؟؟؟؟؟؟ فى مصلحة من؟؟؟؟؟؟؟ لاى غرض؟؟؟؟؟؟؟
نظرية المؤامرة التى تؤمن ان امتحانات الثانوية العامة جزء من خطة سياسية تفسر الموقف لكنى لا ابتلعها ولا اعرف لماذا.
هل الموضوع يمكن ان ياخذ هذا المنحى فعلا؟ هل هى خطة سياسية فعلا؟
ما ذنب الطلبة فى هذا طالب ذاكر طول السنة ذابت اقدامه فى الذهاب الى الدروس الخصوصية واولياء امور انفقوا الكثير اب زادت ساعات عمله وام سهرت الليل كى تحاول توزيع الميزانية........
وفى النهاية امتحان سخيف يهد كل شىء راسا على عقب.هذا ليس عدلا باى حال من الاحوال .
هل كل مشاكلنا انتهت كى نضيف اليها مشكلة جديدة كبيرة بهذا الحجم؟
واضعى الامتحانات اليسوا بشرا الا يعرفوا فعلا ان الامتحان فوق مستوى اى طالب؟
تساؤلات لا تنتهى وفى النهاية سوف يظهر التنسيق مجاميع فلكية لدخول الكليات و تظهر مذبحة جديدة .
شباب يضيع املهم فى الهواء كل منهم كان يظن ان هذه هى فرصته كى يصبح شىء والفرصة ضاعت فماذا يرغمه على اكمال احلامه او استبداها باخرى؟؟؟؟ لهم الله..................
الى كل طلبة الثانوية العامة : لا تستسلم ادع الله وفق احلامك وفقا لمقتضيات الواقع لا تنكسر فالحياة تحتمل اكثر من ذلك ولن تكون الثانوية العامة اقسى الصعاب التى سوف تواجهها............
باقى من الزمن خمسة ايام وتنتهى اسطورة الثانوية العامة ...............الله لا تعيدها تانى يا رب

الأربعاء، 18 يونيو، 2008

اذهب الى الجحيم

ايها الجهل..اذهب الى الجحيم
كان بودى ان تكون الجملة الثانية جملة انجليزية اخلرى تعبر عن الغل والكره ولكن للاسف لايمكن كتابتها ولا حتى التلميح لها-المهم- عن الجهل اتكلم.....ولكننى لا اقصد الجهل الذى يجعل صاحبه على غير علم ان رازرفورد هو من قسم الذرة.
اتكلم عن الجهل المنتشر فى بلدنا جهل من نوع خاص جدا.....
يكفى ان تحاول ان تصرح بافكارك او احلامك او مشروعاتك لتجد الف شخص يتهكم ويسخر ويخبرك فى حكمة انك تحلم وانك ما زلت طفلا لم تخبر العالم جيدا بعد..... اليس هذا جهلا؟؟؟؟؟
فى بلدنا لانؤمن ان حق الكلام مكفول للجميع وانه ليس من حق احد ان يصادر على اراء الاخرين.
اختلف معى........ ناقشنى..........حاول ان تقنعنى............ ولكن ابدا لاتحاول ان تسفه ارائى.
الناس فى بلدنا يعتقدون ان احباط الاخرين والاستهزاء بالثقافة والعلم واجب مقدس ..
ارى انه ليس من الضرورى ان تكون عالما او حكيما لكى تحظى بالاحترام من الاخرين. لكن كم واحد اخر يؤمن بهذا؟
يكفى ان تبدى رايا فى اى شىء وسوف تجد الكثير من السيوف تشهر فى وجهك حتى اذا اذا لم يكن رايك يخص موضوعا شخصيا لاى من اصحاب هذه السيوف.فالفن حرام بكل انواعه. والقراءة تفاهات تبعدك عن الواقع. والسياسة اكاذيب. والاستمتاع باى شىء ترف محرم حرمانية الدم.
سيوف تشهر فى وجهك تخبرك ان المجتمع ينحدر بسرعة وياخذك معه للاسف.
اصبح الجهل يسيطر على تفكيرنا تماما.
ولكن المشكلة الحقيقية ان هناك من يستسلم لهذا الجهل ويكف عن التصريح باراءه وافكاره.
الاسوا يحدث على طريقتين اما ان تنعزل عن المجتمع وتشعر بالاغتراب واما ان تنخرط وتتخلى عن قناعاتك.
انا ارى ان هناك حلا افضل: اشهر انت ايضا سيفك......... احلم.....تكلم...عش كما يحلو لك......
وعندما يعترض الجهل فليكن ردك: ايها الجهل اذهب الى الجحيم.

هامش اخير:هناك مجموعة من الناس اللى زى الفل قرروا يشهروا سيوفهم فى وجه الجهل وعملوا مدونة جامدة جدا اسمها على حريتنا اتمنى تزوروها وتشوفوا الناس اللى عايشين على حريتهم عنوان المدونة3ala7orytna.blogspot.com

الجمعة، 13 يونيو، 2008

حاجات شبه الخواطر

انا ما بعرفش اكتب خواطر بس فى شوية حاجات كدة كنت عايزة اقول عليها وتاج و مواضيع ما لحقتش اكتبها ايام الامتحانات هاقول عن كل حاجة فيهم نبذة مختصرة ماشى؟؟
اهم حاجة ان عيد ميلاد دكتور احمد خالد توفيق كان يوم 10\6 دة طبعا بالنسبة لى عيد قومى مهم جدا كل سنة وحضرتك طيب يا دكتور عمر ملىء بالنجاحات التى ندعو الله ان تستمر لقد ربيت جيل كامل يفخر بكونك معلمه.. يارب يطول لنا فى عمرك يا دكتور.
تانى حاجة اتفرجت على جلسة استئناف قضية ابراهيم عيسى و شاهدت مرافعة محامى الخصم الذى كان يتكلم بانفعال شديد مناشدا رئيس المحكمة ان ينظر للقضية فى بعدها الانسانى ويطالب ان ياتى بابنائه ليكونوا شهود فى القضية اذ انهم فزعوا عندما قراوا مقال الاستاذ ابراهيم و انتابهم القلق على صحة الرئيس لانهم يحبونه حبا شديدا!!!!! و لذلك يجب ان يعاقب ابراهيم عيسى على الفزع الذى انتاب ابنائه ... الحقيقة لا اعرف كيف تمالك ابراهيم عيسى نفسه من الضحك وركل الارض بقدميه من شدة السخرية و اترك لكم التعليق.
تالت حاجة ان الناس اللى بيدخلوا مدونتى زادوا وانا فرحانة جدا وكمان فى ناس بقوا زوار دايمين ودى حاجة تطير من الفرحة مش مصدقة نفسى والله شكرا لكل من ساهم فى جعلى اشعر بهذا الشعور.
رابع حاجة التاج سهل جدا زى شكة الدبوس ... اذكر 10 اشياء عن شخصيتك .... وبما انى بالاضافى لكل مزايايا شديدة التواضع اذن هاجاوب على التاج عادى يعنى ما انا قلت زى شكة الدبوس....
  1. اول حاجة انى طموحة لدرجة ان فى ناس بتقول علية هبلة وان كل الحاجات دى مش هاقدر اعملها اصل انا طموحاتى كبيرة انى اكون دكتورة فى العلاج النفسى و يبقى عندى مركز علاج كبيييييييير و اكون مهمة جدا و ماما تفخر بية كدا وتقول بنتى الدكتورة اوجى يا سلاااام امتى بقى الحلم دة يقرب ادعوا لى.اه نسيت اقول انى نفسى فى عربية ولاب توب بس من فلوسى انا وتعبى انا.
  2. تانى حاجة انى بارتبط بالاشياء والاماكن جدا اشيائى عزيزة عندى اوى والمكان اللى بارتبط بيه عاطفيا صعب يفقد اهميته عندى .
  3. مع انى قربت على عشرين سنة الا انى مش واخدة بالى انى كبرت نهائى ماما مرة بتقول لصاحبتها انجى السنة الجاية اخر سنة لها فى الكلية لقيتنى اذبهليت اتارينى ما كنتش واخدة بالى انى كبرت اوى حاجة وحشة انى اكبر على فكرة.
  4. باكره صوت العصافير جدا باحس انه بيعمل ازعاج و بيعصبنى اوى حتى كان فيه برنامج المذيعة بتسال الضيف ايه اكتر صوت بيكرهه اختى قالت لى انت طبعا اكتر صوت بتكرهيه العصافير صوتها مزعج.
  5. ما اقدرش اربى طفل وخلقى اضيق من خرم الابرة .
  6. باتعصب بسرعة ولما باتعصب بابقى حاسة انى هاطلع نار من ودانى واكتر حاجة بتعصبنى لما حد يتغابى علية و يصر انه يفهم كلامى غلط او انه يحوره و يفهمه على مزاجه.
  7. لما بابقى زعلانة باحس ان فاضل نص ساعة والعالم ينتهى و الكون يباد طبعا دى حاجة متخلفة جدا لان الكون مش بيقف عشان حد بس لما بابقى زعلانة بحس انى لوحدى خالص و الغبى فى الموضوع انى لما باكون متضايقة مش باعرف اخرج نفسى من الحالة دى باسيبها تروح لوحدها.
  8. دايما باحلم حلم مزعج جدا الحلم تفاصيله بتتغير لكن فكرته واحدة انى عايزة اوصل لمكان ومش قادرة اوصل له مع اختلاف التفاصيل لكن الحلم دة وحش جدا جدا.

كفاية كدة عشان مش لاقية حاجة تانية اقولها.....................

كدة الحاجات اللى شبه الخواطر خلصت الحمد لله اشوفكم فى التعليقات باة و البوست اللى جاى اعتقد انه هيعجبكم ان شاء الله بااااااى.......

الأحد، 8 يونيو، 2008

الخيط الرفيع

تقريبا هناك فيلم عربى يحمل هذا الاسم.. او مسلسل..او رواية..الاكيد اننى سمعته من قبل و لكن لا اتذكر اين تحديدا-المهم-
انا اعرف عن نفسى حقيقة هامة جدا وهى اننى اصل لافكار مقدماتها لا تمت لها بصلة باى حال من الاحوال ولذلك: اغنية عمرو دياب (احبك اكرهك) تتضمن جملة اوصلتنى الى حقيقة غريبة بعض الشىء الجملة هى (بين حبى ليكى وكرهى ليكى خيط رفيع) اغنية عاطفية هى ولكن لا اعرف لماذا وجدتنى اترجم هذه الجملة على حال المصريين الان .
معظمنا اصبح بين حبنا لبلدنا وكرهنا لها خيط رفيع.
اذا كنا نحب هذا البلد فلماذا نحن تاركينه بهذا الشكل لا نحاول الدفاع عنه؟ لاننا ببساطة نكرهه او بمعنى ادق هناك خيط رفيع بين الامرين يجعلنا غير مدركين تماما لحقيقة شعورنا.
نحن نحب البلد اثق فى هذا ولكن هناك داخل كل منا جزء يكرهه ويرى ان كل ما يحدث من مصائب هو العقاب الالهى العادل للاخرين متناسيا انه جزء من الاخرين.
عندنا انتماء ولكن انتمائنا للارض ..للتاريخ .. للجو العام..ولكننا لا ننتمى لبعضنا البعض فكل منا يشعر انه لو حلت كارثة بالشعب المصرى كله وابيد ولم يبق سواه لما شعر بذرة حسرة واحدة على من ضاعوا.
فى نفس الوقت كل منا يعشق جو القهوة البلدى بروادها و ثرثرتهم.
كل منا لا يستطيع مقاومة اغراء الكلام مع شريكه فى مقعد الحافلة.
ازدواجية غريبة تقوى فى نظرى نظرية الخيط الرفيع لذلك اريد ان اضيف باسمى الى مؤلفات علم النفس الاجتماعى مرض ازدواجية الانتماء ولكن للاسف لن استطيع ان ابرهن على كلامى بالطريقة العلمية لاننى لا استطيع ان احصل على مجموعة ضابطة لانه-للاسف- الشعب المصرى كله اصبح مصاب بمرض ازدواجية الانتماء..........

الخميس، 29 مايو، 2008

تهانى واغانى

اهلا اعزائى اللى مش مستمعين فى البرنامج الحصرى الذى يذاع على المدونة بتاعتى فقط وحصريا.......
برنامج تهانى واغانى اللى هو وظيفته انه يبعت اهداءات للناس واغانى عشان يستمتعوا بيها...........
اولا وقبل كل حاجة انجى صاحبة المدونة وصديقة البرنامج بتبعت لكل القراء والمدونين اللى بيعبروها اغنية للفنانة وردة وهى
((وحشتونى وحشتونى وحشتوووووووووووووووووووووووووونى))
اول اهداء معانا النهاردة بعتاه العلاوة الاجتماعية تحية منها لكل شعب مصر واغنية
((مش من حقك تحلم بية او بعنية او تنادينى مجرد صوت))
وصلنا دلوقتى ايميل من الشعب المصرى كله اهداء للفلوس والشعب بيبعت للفلوس اغنية الفنان عمرو دياب
((قاللى الوداع وانا اقوله ايه هو الوداع يتقال فيه ايه))
وبرده الشعب المصرى بعت ايميل كمان للسلع الغذائية كلها بيحييها فيه مع اغنية عمرو دياب
((لو كان يرضيك تفضل هنا ادامى خلاص خليك))
وبمناسبة استئناف قضية الصحفى المعارض ابراهيم عيسى افتكر ان الاستاذ ابراهيم عايز يبعت اغنية للناس اللى بيحاكموه
((طب ورينى يا نن عينى))
وطبعا بعد ما الحكومة غلبت مع الاستاذ ابراهيم ومش عارفة تسكته ازاى و بعد فشل محاولات اسكاته قرروا يبعتوا له اغنية
((انت ايييييييييه مش كفاية عليك تفضحنى حرام عليك))
وبمناسبة الصحفيين والاعلاميين الاستاذ العظيم محمود سعد بيبعت لكل الناس اغنية سعد الصغير
((انا قلبى فى ايدية و مافيش غالى علية ولسة ما اتخلقش اللى هيلعب بقلمى))
اما الاستاذ تامر امين فبيحب يبعت للناس المهمين و المسؤلين اغنية الفنان عمرو دياب
((الليلة دى سيبنى اقول واحب فيك))
اما الشعب المصرى فالظاهر ان فلوسه كتير وعمال يبعت لنا فى ايميلات و بيحب بمناسبة الغلاء والكوى اللى احنا عايشين فيه يبعت للمسؤلين اغنية بردو لعمرو دياب يا سبحان الله
((معاك بجد كان قلبى طيب ماقلتش انا غير حاضر وطيب وانت غاوى وعود فى الهوا كل سنة باة وانت طيب))
وبردو الشعب المصرى ابو فلوس بالهبل بيبعت اهداء للحمة و اغنية
((وحشتنى وبتوحشنى وهتوحشنى ليالى هواك))
وبمناسبة مد قانون الطوارىء المعتقلات باعتة اغنية لكل المعارضين واغنية
((لو ما رجعتش لية برجلك تانى هنااااا ما ابقاش انااااااااااااااااا))
وكل الشباب المصرى باعت لمصر ام الدنيا اغنية عمرو دياب
((احبك اكرهك اسيبك اندهك اعلق نفسى بيكى وللا اعمل فيكى ايييييييييه))
وبمناسبة مناقشة قانون الثانوية العامية الجديد كل الطلبة باعتين اغنية ماجدة الرومى
((ونقول باى باى باى باى على طوووول يا مدرستنا يا حبيبتنا باى باى باى باى))
و الظاهر ان الطلبة كلهم فاضيين لانهم باعتين اهداء للناس اللى بيحطوا امتحانات الثانوية العامة اغنية فايزة
((خاف الله خاااااااااااااااااف الله))
واخر اغنية معانا النهاردة اهداء من البرنامج لكل اللى مش مستمعين اغنية محمد منير
ساح يا بداح ساح بداح يا سؤال جراح
ما الذى كان وما عادش وراح قمر انطفى
وانتفى واختفى نهر ما بلش حتى الريق
وااااااااااااااااااااه يا براح اه يا براح
عمال بيضيق
صبح وزيه الصبح التانى ليل ملضوم
فى الليل التانى وانا مش راييييح انا
مش جااى انا مش واقف حتى مكانى
وساااااااااااح يا بدااااااااااااااااااااح
ساح يا بداح يا سؤال جراح
مين اللى اتكسر فص اللولى وللا المرمر
طول العمر العسكر عسكر بس الناس
الناس كانت ناس وكان الحلم الغالى
برااااااااااااااااااااااااااااااااااااااااااااااااااح
ساح يا بداح ساح يا بداح
يا سؤال جرااااااااااااااااااااااااااااااااااح

الجمعة، 16 مايو، 2008

يكرم المرء ان شاء الله

عندى امتحانات..هذه حقيقة..
لازم اذاكر..هذه حقيقة اخرى..
-المهم- طبعا بما انى لازم اذاكر يبقى انتم هتتحرموا من طلتى البهية وكلماتى العبقرية و ارائى الجهنمية لفترة من الوقت.
ادعوا لى بقى اخلص امتحانات على خير ويهدى الدكاترة علينا ويعدى الاسبوعين اللى جايين دول على خير..
ادعوا لى.........وطبعا فى الامتحان يكرم المرء ان شاء الله..
مش هاقدر اتابع التعليقات ولا هاقدر اتابع مواضيع الناس العبقرية اللى بحب اقرا مدوناتهم و هاتحرم من مدونتى حبيبتى..طب هاعيش ازااااااااااااااااااااااى؟؟؟؟ هاعيش طبعا على امل انى ارجع منتصرة من معركة الامتحانات بدون اى خسائر فى الارواح ولا الممتلكات..مش عايزة اخلص كلام بس لازم اذاكر بااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااى.

الثلاثاء، 13 مايو، 2008

فاصل اعلانى

مش هطول عليكم المرة دى انا بس كنت عايزة اعمل مداخلة بسيطة ماشى؟
فى خطاب الرئيس يوم عيد العمال قال ان العلاوة مش بس 15 فى المية ولا20فى المية لا دى 30فى المية.
كلامه فكرنى باعلان سمن روابى الاعلان كان بيقول روابى مش بس زادت ربع كيلو ولا نص كيلو روابى زادت كيلو بحاله.
وانا عايزة اعمل اعلان انا كمان اشمعنى يعنى انا.وهاقول فى الاعلان
الاسعار زادت مش بس 30فى المية ولا50فى المية الاسعار زادت اكتر من 100فى المية ..
بس طبعا مافيش حد هيهلل للاعلان دة زى ما هللوا لاعلان الريس لييييييييه؟
عشان دة الريس واحنا فى بلد ديموقراطى ..حد ليه شوق فى حاجة؟؟؟

الاثنين، 12 مايو، 2008

حلمى حلمك

نفسك تطلع ايه لما تكبر؟ سؤال هرونا بيه ايام المدرسة الابتدائى وطبعا كلنا كنا بنقول يا اما دكتور يا اما مهندس وكان فيه قلة منحرفة من الولاد بيقولوا نفسى اطلع باشا قصدى ضابط...-المهم- كلنا نسينا اننا كان نفسنا نطلع حاجة واحنا صغيرين ولما كبرنا بلطنا فى الخط وما بقيناش عايزين نعمل حاجة غير اننا نعدى امتحانات الترم لييييييييييييييييييييييييييييييييييه؟
اوعى تقول عشان الظروف والجوابات والكلام الفارغ دة .لا حضرتك احنا اللى بقينا شايفين ان الاحلام بتاعة العيال الصغيرين ..مش عارفين اننا لو بطلنا نحلم نموت ..اوعى تموت..اه والله لو بطلت تحلم روحك هتموت مش هتبقى عارف لحياتك هدف ولا معنى كل الايام هتبقى شبه بعضها ..لكن لو جربت تحلم هتلاقى سبب تقوم عشانه من النوم الصبح ويبقى عندك امل فى اللى جاى..انا مش فيلسوفة ولا مصلحة اجتماعية انا بحاول افكر نفسى كمان انى لو بطلت احلم هاموت..اه والله

الجمعة، 9 مايو، 2008

م..ص..ر

دى حتة قصيدة صغنونة كتباها الشاعرة الكبيرة اسراء اختى بمناسبة العلاوة وازدهار التعليم ورفع الاجور واختفاء طوابير العيش والشغل المرمى فى كل حتة والزهزهة اللى احنا عايشين فيها



مصر هى امى
مصر ماصة دمى
شردت غيالى
عجزت ملامحى
حتى القمح يا اما
مش لاقيه يا مصر
"م"
ماتردى يا اما
والا مش لاقية كلمة
تواسى بيها ابنك
كتلر خيرك يا مصر
"ص"
صعبان عليا
ودينى وربى
ما قادر اربى
ولا ااكل واعلم
صرفت اللى حيلتى
وبرضه مش مقضى
ما تحسى بيا يا اما
تفتكرى سهل عليا
اقول شكوايا ديا
والله صعبان عليا
"ر"
روحى الله يجازيكى
ماكنش عشمى فيكى
امنتك حياتى
وكمان حياة ولادى
بجد عيب عليكى
روحى الله يسامحك
دانتى استخسرتى خيرك
فى ولادك حبايبك
ولا انتى خلاص نسيتى
روحى الله يجازيكى

الخميس، 8 مايو، 2008

يوم المفروض انه عادى جدا

اول مرة اعرف ان مشاعرى مرهفة اه والله طلعت مشاعرى مرهفة-المهم-
امبارح كان اول يوم انزل فيه بعد غلاء المواصلات . طبعا كل الناس مش طايقة بعضها وكلهم بيطلعوا خنقتهم على السواقين وبيشتموا بعض و مش مانعهم من عض ودانهم الا انهم مش طايلينها وطبعا مافيش اى حد طايق مناخيره على وشه اساسا.
نزلت عشان اروح التدريب والكلية ركبت المواصلات الصبح طبعا السواق اتخانق خناقتين بسبب الاجرة والناس فضلت باقى السكة يتكلموا فى الغلاء والاسعار والزيادة اللى صرفوها قبل ما يقبضوها. حسيت انى مخنوقة ومش قادرة اسمع .المهم وصلت التدريب وكان المفروض نقابل واحد من العمال اللى فى مكان التدريب عشان يشرح احواله فوجئت ان بدل العامل حضر واحد نقابى وقعد يقول كلام محفوظ من عينة (الصين حلوة )وطبعا فضل بعد كل كلمة يحمد ربنا ويقنعنا ان الحياة لايمكن ان تكون اروع من هذا. بصراحة ماقدرتش اسكت ناقشته طلع مش فاهم اى حاجة اساسا هو حافظ كلمتين جاى يكبهم وخلاص المهم انتهى التدريب وركبت المواصلات عشان اروح السواق دة كمان اتخانق مع راكب بسبب الاجرة والناس بعد الخناقة فضلوا يناقشوا نفس الموضوع بصراحة حسيت انى متحاصرة والناس صعبانين علية قوى وحسيت ان مافيش امل فى اى حاجة قلت اغمض عينى لحد ما اوصل هنا بقى حسيت ان الكلام بيدخل على مخى عدل .بعد ما نزلت قابلت اختى فى السكة حكت لى على خناقة فى العربية اللى كانت ركباها سبب الخناقة ان فى واحدة ست ما كانش معاها فلوس تدفع الزيادة اللى على الاجرة. لحد هنا بقى وحسيت ان مخى سخن قوى و حسيت ان الدنيا بتتهد من حوالية احساس غريب بس بجد حسيت انى خايفة من الدنيا قوى حسيت ان كدة ماينفعش فى حاجة غلط احباط رهيب خلانى مش قادرة اتكلم ولا اعمل اى حاجة تانية . ياترى الناس هيعيشوا ازاى فى الظروف دى حالة هيستريا رهيبة موجودة فى الشارع الايام دى الناس اصبح منتهى احلامهم الاكل والشرب وياريت يلاقوهم انا قريت رواية لدكتور احمد خالد توفيق اسمها يوتوبيا -هتكلم عنها بالتفصيل بعدين- مخوفانى قوى من الايام اللى جاية ...ربنا يستر ...طب ايه الهدف من كل الرغى دة طبعا مش عشان احكى مذكراتى انا بس كنت عايزة اقول اننا لو حسينا ببعض شوية ممكن الاوضاع تتحسن لو عرفنا ان كلنا فى مركب واحد يمكن نقدر نمنع المركب من انها تغرق..بلاش فى الايام دى بالذات نقول ما ينفعش ندى حد من فلوسنا عشان اللى يعوزه البيت يحرم على الجامع ويادوب مصروفى مكفى بالعافية و ربنا مع اللى مش لاقى وماحدش بينام من غير عشا لان للاسف فى ناس كتير بتنام من غير عشا ....المهم دلوقتى ان لازم كل اللى يقدر يعمل حاجة يعملها ماشى؟ وامانة عليكم ارحموا السواقين عشان دول غلابة ومظلومين زينا بالضبط ما احنا قلنا بقى اننا فى مركب واحد.............

الثلاثاء، 6 مايو، 2008

غيبوبة

اذا الشعب يوما اراد الحياة فلابد ان يستجيب القدر ... تصدق انى مش عارفة مين اللى قال الجملة؟ دى تقريبا مصطفى كامل او واحد اخر من ذلك العصر الممتلىء بالشوارب التى يقف عليها النعام وليس فقط الصقور -المهم- يخيل لى احيانا اننا شعب فقد القدرة على ان يريد الحياة فلو كنا حقا راغبين فى الحياة فكان لابد ان يستجيب القدر ولكننا لسنا راغبين اذن فالعيب فينا وليس فى القدر الذى نتهمه بكل شىء بدءا من تاخر اى فرد منا عن اللحاق بموعده وصولا الى حالة الغيبوبة التى نعيشها . فالغيبوبة معناها فقدان الوعى لفترة من الزمن بصفة متصلة يكون معها الفرد غير قادر على القيام باى افعال ارادية بل ان كل انعكاساته تكون انعكاسات لا ارادية ولكننى ارى ان الافعال اللا ارادية اتسعت دائرتها فى حياتنا فاصبحت تتضم كل نشاطات الحياة التى نمارسها بلا حياة الا ترى معى هذه النظرة الساهمة فى وجوه الناس فى الشوارع؟ انها نظرة من لا يعى العلة من وجوده. نظرة من يرى انه يكفيه ما عاشه حتى الان. بالاحرى نظرة من فقد القدرة على ان يعيش اصبحت الغيبوبة هى السمة المميزة لنا نحن المصريين ونرى ان القدر هو الذى صنع بنا هذا ولكنى لا ارى هذا . لا ارى ان القدر هو المتهم الوحيد فى حالة الغيبوبة التى نحياها الان فكل منا مسؤول عن نفسه يجب ان نستعيد الرغبة فى الحياة وال نتحول الى الات تولد فتعيش حياتها منتظرة الموت. نحن بشر يجب على كل منا ان يتواجد لا ان يوجد فقط. يجب ان يحاول كل منا ان ينتشل ذاته من الغيبوبة جرب فى محيط حياتك الشخصية وعلاقتك بالمجتمع كفرد. حاول ان تركز على فعل ما يجعلك سعيدا افعل ما يجعلك مفيدا و مرئيا وحاول ان تحقق احلامك حاول ان تستعيد الرغبة فى عيش حياة سعيدة. اذا حاول كل منا ان ينجز فى حياته الشخصية بالتاكيد سينعكس ذلك على شخصيته سوف يجعله اكثر ايجابية و حماسا لكى يستعيد وطنه الرغبة فى الحياة . ربما تكون انت اول من سينهى حالة الغيبوبة ... ابدا بنفسك وكن ايجابيا تستطيع ان تستشعر بها ان الحياة تستحق ان تكافح من اجلها ,ذاتك تستحق,وبالتاكيد احلامك تستحق.

السبت، 3 مايو، 2008

الناس الحلوة

سلام عليكم انا كنت وعدت انى اتكلم عن نفسى المرة دى وبما انى اساسا عيلة والندالة طبع قررت انى اخلف وعدى وزى ما اتفقنا قبل كدة انا حرة...المهم المرة دى هتكلم عن الناس الحلوة ..مين الناس الحلوة طبعا الناس اللى عرفونى ان فى حاجة اسمها مدونات الناس دول على راسهم اشرف حمدى الشهير باشروف اول مدونة اقراها كانت مدونته وبصراحةاعجبت بكلامه واعجبت اكتر انه بيعمل الحاجة اللى هو عاوزها بيشتغل حاجات كتير و كلها مهمة مدونته هى كاريكاطظ .............. تانى واحدة هى وينكى وعرفت مدونتها من عند اشروف وينكى بقى مشكلة بتعمل الف حاجة بردو واللى يغيظ ان كل الحاجات اللى بتعملها مهمة ..يا سبحان الله ..بصراحة تحمست لها اوى لانى مش متعودة على كدة من البنات اللى فى بلدنا بصراحة بنت بجد ..... تالت واحد (ايوة تالت مش ثالث) هو اشرف توفيق صاحب مدونة اخف دم بيقول كل اللى عاوز يقوله من خلال اسلوب ظريف صعب تلاقى زيه وهو فعلا اخف دم........رابع واحدة هى غادة عبد العال صاحبة مدونة عايزة اتجوز معجبة بجراتها فى تناول موضوع الجواز ومعجبة اكتر انها مش عايزة تتجوز اى واحد وخلاص .... خامس واحد خالد الصاوى مدونته حلوة قوى والشعر محترف فعلا ناهيك عن انه ممثل اتولد وهو بيمثل اساسا .....طبعا فى ناس مدونين كتير غيردول ومدوناتهم رائعة خلونى استغرب انا ازاى كنت عايشة من غير المدونات قبل كدة ......من الاخر كدة كلهم ناس زى الفل ...واحلى سلام للناس الحلوة.

الخميس، 1 مايو، 2008

مش هتقدر تطفى الجهاز

اول مرة اشوف كلامى مكتوب قدامى وفى احتمال يكون هناك كائن بشرى غيرى بيشوفه . فرحانة قوى بس ما اديش اى امارة فى كيفية انشاء المدونة لانها جت بظروفها على راى الاديب ايهاب توفيق مع ان اليوم ابتدى بداية مش ولابد يعنى على راى الزعيم الراحل السادات الا انه الظاهر كدة هينتهى نهاية 100فل و14 ربنا يستر . المهم بقى المدونة دى انا ناوية والنية لله اتحفكم فيها بارائى وكلامى ونظرتى للحياة هتكلم فى كل حاجة براحتى واللى مش عاجبه يخبط دماغه فى الكى بورد .. من هنا ورايح مافيش دلع لازم تعلقوا على كل المقالات عشان زمن اللل انتهى ماحدش فاهم حاجة.. احب اقولكم ان النهاردة يوم سوف يشهده العالم على مولد مدونة فظيعة اللى هى انا وطبعا كل المدونات التانية هتنسف نسف بعد ما القراء يكتشفوا مدونتى بس طبعا هيتنسفوا بعد ما يكونوا عرفوا قراءهم على المدونة بتاعتى وهكذا انفرد وحدى بعالم التدوين . انا لسة ما كتبتش اى حاجة عن نفسى لنى زى ما انتوا كلكم لاحظتم انى متواضعة جدا وعشان كدة المرة اللى جاية هكون جمعت مزايايا وصفاتى الحميدة وخصالى الرفيعة وهكتبها كلها ان شاء الله ..كونوا معنا لاننا عائدين بعد الفاصل والفاصل مدته زى مانا عايزة.مدونتى وانا حرة فيهابقى