السبت، 14 فبراير 2009

أى كلام

--النهاردة الفالنتين...يعنى الدباديب....يعنى الورد الاحمر ابو من غير ريحة...يعنى أحلى سلام للحبيبة...
على فكرة بيان هام انا قررت اشترى لنفسى السنة دى هدية عيد الحب...بكرة اللى هو غدا هنزل اشترى كتب من معرض الكتاب اللى جه عندنا متأخر والكتب دى هتبقى هديتى لنفسى فى عيد الحب...عادى جدا ايه المشكلة يعنى بتحصل فى احسن العائلات.
--هو ليه كل اما اعدى من عند نسيم بتاع الجرايد الاقى الدستور متلقح عنده وعند كل الخلق مع ان يوم التلات بيبقى الدستور دة فى ندرة اليورانيوم ومش بلاقيه ابدا لو اتاخرت عليه...حاجة غريبة بجد.
--اغنية تحت الياسمينا بتاعة منير اول مرة احسها كدة مش عارفة السبب وكمان الحالة دى اللى هى فى الاغنية ممرتش انا بيها قبل كدة بس عاجبانى اوى الاغنية خصوصا اليومين دول.
--ليه عندى حالة توقف دماغى كدة؟؟؟ دماغى مش شغالة خالص مع انى حاسة ان فى حاجات عايزة اقولها بس مش عارفة اقولها وحاسة ان كل الاقلام مش بتكتب..احساس غريب بس ولا فكرة عايزة تتجمع صح فى دماغى كل شىء بيحصل دلوقتى واخد هيئة هلامية مضببة كدة..احساس شنيع بالزهق.
--المطربة العبقرية مروة طلعت غلطانة لما قالت الصراحة راحة يا روحى..اه والله وخدها منى نصيحة حتى لو انت بتحب تقول رايك بصراحة قوله متزوق عشان متزعلش حد منك خصوصا لو كانت الصراحة دى تخص رأيك فى شخصه الكريم قوله بس بالراحة من غير ما تحسسه انه وحش أوى..الاسلوب دة بيكسر حاجة كسرها شبه كسر الازاز مش بيتصلح.
--حققت حلمى وقريت حاجات بالهبل فى الاجازة دى اللى هى خلصت فجاة ومن غير ما تقول..قريت واحة الغروب
وشيكاجو و آلة الزمن وعالم رائع جديد و أسطورة شبه مخيفة و أربع اعداد قدام من سافارى.
--واحة الغروب معجبتنيش على عكس رأى كل الخلق وتقريبا انا الوحيدة اللى شايفة انها مش بالمستوى اللى سمعته عنها و عملت ضجة متستاهلهاش..شيكاجو عجبتنى بشدة واستمتعت بيها عندى بعض التحفظات بس دة ميمنعش انها رواية جامدة..آلة الزمن مش انا اللى هقول رايي فيها بعد العمر دة كله..عالم رائع جديد شرحه..اسطورة شبه مخيفة جامدة جدا مع بعض التحفظات اللى متقللش من اعجابى واعداد سافارى ممتعة للغاية.
--بتكلم فى الموبايل كتير الايام دى.
--شفت فيلم ميكانو وعجبنى آداء تيم حسن بشدة وطبعا خالد الصاوى الجامد ونور عادية جدا..القصة انسانية اوى مع ان الفكرة الاساسية ملطوشة من فيلم امريكى اللى هو first 50 dates بس دة ميمنعش انى حبيت الفيلم.
--شفت سلسل بعد الفراق مؤخرا وتعليقى عليه هو:ما كل هذا الهجص الصريح يا جدعان؟

البوست دة مالوش أى لازمة بس قلت أزيت دماغى يمكن اعرف ارجع اكتب تانى لانى حاسة باحساس رهيب فعلا..

هناك 34 تعليقًا:

رئيس جمهوريه نفسى يقول...

واحة الغروب على عكس الجميع عندى فى البيت محدش استمتع بيها رغم انى قريتها 3 مرات فى شهر من اعجابى بيها
عارف التحفظات اللى فى شيكاغو لانى ناس كتير اتحفظت نفس التحفظات بتعتك وكانت محل نقاش استغرق يومين كاملين

blue-wave يقول...

هههههههههههههههههههههه
والله تحفه
كلام متلخبط بس ضحكنى بجد وكفايه انه من جواكى

خيرالدين يقول...

والله البوست حلو جدا يا انجى
شوفى هو الدستور بعد ما سابها اكتر من كاتب زى عمر طاهر وجلال عامر وبعد ما معظم الرسامين سابوها وبعد ما كل التحقيقات بقت من قديمه
وظهور الشروق واليوم السابع اثر كتير على الاقبال على الدستور
...
شيكاغو جميله جدا
وواحة الغروب محتاجه قراءه تانيه
وربنا يعينك وتمتنعى عن المسلسلات العربى وتتجهى للسورى
انا شفت كام حلقه فى اول المسلسل ده لقيت خالد صالح طالب جامعى
وكانت دى نهاية العلاقه بالمسلسل

adel يقول...

ههههههه

ليه كده بس يابنتي .... انتي شكلك سخنتي
ههه هدية لنفسك .... ماعلينا

دشتور و صوت امة و مصري يوم و اهرام و ابراج .... كلها كحصله بعضها

منير دايما كده مايتسمعش يتحس...و تحت الياسمينة احسن اغنية في الشريط

توقف دماغي .... مفيد احيانا ... هترجعي بنشاط عقلي اكتر من التوقف ده

مروة .... استغفر الله العظيم
الاقي هيفا

مقريتش واحة الغروب و مش عاوز ااقراها ...شيكاجو تحفة جدا و مليش اي تحفظ عليها مع احترامي لرائ الناس كلها....بس انا قريت حظك اليوم و دي تحفة

اتكلم اكتر فرصتك في الفوز تكبر و الشمعدان زي مابتحبه هيحبك كمان و كمان

لسه مشفتش ميكانو بس ناوي اشوفه ان شاء الله

بعد الفراق اللي حبيته فيه تمثيل خالد و هند غير كده قصة ملهاش اي لازمة

فعلا ملوش لازمة و اديني بقيت تافهة و رديت علي كل كلمة فيه

هههههههههههههههههههههههههه

Che يقول...

والله انتى الكسبانه انك جبتى كتب بدل الدباديب و القلوب و كده
بالمسبه للروايات اللى انتى ذكرتيها انا لسه ماقرتش واحه الغروب ، بس طبعا احمد خالد توفيق من اكتر الكتاب المظلومين و اللى مش واخدين حقهم فى البلد دى
الفيلم و المسلسل ماشفتهومش عشان كده مليش تعليق عليهم
شيكاغو عملت جدل كتير بين الناس لان فى ناس شافوا انها اباحيه زياده عن اللزوم و ناس شافوا انها واقعيه زياده عن اللزوم و انا شايف ان الجدل ده من اهم اسباب نجاحها بالاضافه للروايه نفسها
و على فكرة كلنا بنتكلم كتييييير جدا فى الموبايل و ده حاجه واجعه جيبى انا شخصيا خصوصا بعد حاله الافلاس نتيجه لشراء الكتب

Foxology يقول...

اولا : التوقف الدماغى حالة تقريبا عامة بتحصل كتير

ثانيا : بالنسبة لموضوع واحة الغروب .. لازم نتفق ان الأعجاب بشئ يعتبر حاجة نسبية ولا ايه ؟؟؟

ثالثا : علاء الأسوانى كاتب متميز فى اسلوبه وكتابته وعيبه الخطير ان دايما اعماله عليها تحفظات اخلاقية .. شيكاجو واحد من اعماله المتميزة زائد التحفظات اللى عليها

رابعا : ان شاء الله الأفكار هتيجى وتكتبى كتير

تحياتى :)

سمكه واحده يقول...

مين قالك ان البوست ده ملوش لزمه
طب ده انا استفدت منه وطلعت بكتابين اهو يا ست الكل
كفايه انه نابع من جواكي
انا بحب الكلام اللي مش مترتب واللي علي الفطره ده
بالنوسبه للنوبايل
انا مش بحبه خالص يمكن بسيه كتير في اي مكان قليل جدا لما استخدم التلفون او الموبايل وسعات بيجي عليا ايام الوك لوك كتير
بس اليومين دول ظهري هيتقطم من القاعده السوده علي النت ده
احلي حاجه القرأه والسنه دي مميزه عندي اكتر من اي سنه في الكتب وكده
تحياتي

Hossam يقول...

hey enjy
soo nice topic
وعلى فكرة انا هديتى فى عيدالحب لنفسى برده كانت كتب من معرض الكتاب
تحياتى صديقتى
سلام

mohamed ghalia يقول...

حلو قوى موضوع تجيبى هدية لنفسك
إنشلا محد حوش
دمتى بكل الود

مذكرات مشاغب يقول...

-ايوه صح اشتري الهديه لنفسك
بس اوعى نفسك تعرف امال هتبقى هديه ازاي؟؟
اشتريها ولفيها وافتحيها وافرحي بيها
البت دي اتجننت ولا ايه؟؟؟؟
-مش عارف يا شيخه نسيم بتاع الجرايد ده غريب اوي واللهي
اصل شكله بيحب الدستور
-انا مبسمعش اغاني اوي ومسمعتهاش بس معاكي حق فعلا الاغنيه فيها حاله مش عارفها لاني مسمعتهاش اصلا
-ايه ده انت موتي ولا ايه؟؟؟
بس بصراحه التوقف الدماغي عامل فكرة موضوع جامده جداااااااااااا
-خلاص اما اطبقه عليكي
الموضوع بتاعك ده مش وحش
الوضوع ده كويس
الموضوع ده حلو
الموضوع ده جااااااااااااااااااامد جداااااااا
حلو التدريج ده؟؟
-انا شايفك معجبه جدا بالدكتور احمد خالد توفيق
حتى في اسلوب كتاباتك
بس بصراحه عندك حق
على فكره الدكتور احمد دكتور عندي في الكليه وشرحلي كمان بالغيظه فيكي
-ارغي براحتك ربنا يكون في عون والدك والفاتوره
-انا كن متوقع على فكره انه هيكون قريب من فيلم 50 first dates
مش عارف ليه كان عندي الاحساس ده فعلا
وبالتالي هيكون فيلم كويس
-بجد واللهي البوست جامد وفكره رائعه

تحياتي

صوت من مصر يقول...

مش عارف اتنا برضه اتفرجت عل ميكانو وعجبنى الفيلم جدا برضه
بس حلوه اللخبطه
هايل

فشكووول يقول...

انجى الجميله ..تحياتى
انت عملتى حاجات كتير فى الاجازه واتفرجت على افلام كتير على فكره آلة الزمن قريتها من ييجى 35 سنه وشفتها كمان افلام وحاجات كتيره من هذا القبيل .. عندى مكتبه مليانه قصص من قصص الخيال العلمى .. بس قديمه قوى
علاء الاسوانى دا هو نجيب محفوظ العصر الجديد
على فكره قلمك اشتغل كويس امال زهقانه ليه
تحياتى يا انجى الجميله

شمعى أسعد يقول...

اولا كل سنة وانتى طيبة
ثانيا سيبك من الدستور هبط
ثالثا توقف الدماغ بقى حالة عامة تقريبا فيه حاجة فى الجو
رابعا انا مع مروة بشدة الصراحة راحة
ختميا بحييكى على الكتب اللى قريتيها واختياراتك

سادسا كفاية كده طالما البوست مالوش لازمة :)

احمد سعيد يقول...

يااااااااااااااااة
هو لسه فى حد بيشوف مسلسلات من دى؟؟؟؟
انا اخر مسلسل مصرى شفته كان.....

كلام رجاله تقريبا او ارابيسك ,
حاجه فى الوقت دةتقريبا

انصحك بعدم متابعه مسلسلات من انتاج ماسبيرو,
ثبت انها مسرطنه....

............

معلش سؤال

هى اسطورة شبه مخيفه دى من سلسله ما وراء الطبيعه

اصل اخر حاجه وصلتلى الظلال والطوطم

ثانك يو

NOGA ALEX يقول...

مبدئيا كدة بجد ازيك يا انجى
البوست دة حسسنى انك حد قريب منى جدا مش زي صحابي لا ولا اخواتى لا زى مش سرقة افكار منك لكن احساس حاجات مش عارفة اكتبها يعنى حبة اوى انى اسيبلك تعليق هنا على حبة حاجات اتمنى من زمان اقولها
اولا:الفلانتين انا مش جبت لنفسي هدية احنا (انا واصحابي الفشلة)عملنا حتة دين بارتى في الفلانتين (اية مش احنا بنحب بعض بردة )وتورتة وهدايا وكلام
ثانيا:الدستور بقى حاجة عادية مش زى زمان زمان كان مينفعش يوم يعدى من غير ما اجيبة ودى حاجة كانت بتضايق بابا اوى لانى ساعات كنت بجيب الدستور باليل لكن دلوقتى معرفش اية اللي حصل يجى ميجيش عادي مش يووم التلات بس
ثالثا: تحت الياسمينا بتعمل معايا حالة فظيعة من اول مرة سمعتها مع انى مش عايشة الموقف دة(غريبة)
رابعا:حالة التوقف الدماغى دى عندى من زمااااااااااااان يالا مش مهم
مش متفقة معاكى عشان مروى انا بحب اقول للاعمى انت اعمى فى عينة
المهم تعليق طويل بس معلش كنت عايزة اكتبة
تحياتى ....

Zika يقول...

ايوه ايوه
بس ده مش اي كلام
ده اسمه تفريغ عقلي
زي مانتي قلتي بتصفي مخك عشان تعرفي تكتبي
هتلاق يعندي دايما الموضوعات كلها تفريغ عقلي يعني
ميكس
تلاته في واحد
خمسه في واحد
وهكذا
زي بالظبط
لما تفرمطي ال بارتيشن اللي عليه الويندوز قبل ما تنزلي واحد جديد
عشان الويندوز ينزل علي نضيف
تحياتي

علي جاد يقول...

سلام ..
كل سنة وانت طيبة ..
مش لازم يكون فيه عيد علشان الناس تحب بعضها، ومش لازم يكون المقصود هو حبيبة كورنيش النيل أو أزقة الحدائق العامة ..

الحب مالوش ميعاد، ولا له أسباب أو باب نخبط عليه علشان حد يأذن لنا بالدخول.

الحب نعمة وهِبَّة ربانية .. تعيس من لم تصبه هذه النعمة ..

للأسف لم أقرأ واحة الغروب بس هاشوفها، وبعدين أى عمل روائى، مهما يكن كاتبه، جدير بالاحترام والتقدير.

شيكاغو قرأتها، ففيها السرد والتسلسل الدرامى مكرر.. نفس التيمة المعروفة.

كل سنة وانت طيبة .. سلام

princess يقول...

انا برده دماغى واقفة خالص ده فيروس باين ولا ايه ههههههه
مش مهم كلام ملخبط المهم انك اتكلمتى وعبرتى:))))
تحياتى

Gannah يقول...

انجى
احب اقولك انى حاقدة عليكى لان كان عندك اجازة وكمان بتقرى
تعرفى اللى بتقولى عليه ده اى كلام ساعات بيبقى هو الكلام المطلوب
جبتى الهدية لنفسك ولا لسه
اوعى تنسى الاهداء:)
تحياتى

elsha3er يقول...

كل سنة وانتى طيبة ومبروك الكتب اللى انتى هديتى بيهم نفسك

احمد الشاعر

أبو العريف يقول...

كل دا بتزيتي دماغك عشان تعرفي تكتبي امال لو هتكتبي بجد وبحق وحقيقي هتعملي ايه انا كنت عايز اعلق علي كل جمله انت كاتباها بس هعلق علي كام حاجه كده

منير واغنيه اه يا اسمراني اللون مسيطره علي بقالها فتره طويله جداا وممكن اقعد اسمع فيها 24 ساعه ف اليوم

شيكاغو بصراحه نفسي اقراها جدااا


فوضي الحواس لاحلام مستغانمي
دي بقي قريتها اكتر من مره ومعلقه معايا جدااا وخاصة لو بسمع معاها منير اسمراني اللون بيعملو دماغ جامد قوي

حروف يقول...

ممممممممممم كل سنة وانتي طيبة وشيكاغو سامعه عنها من فترة بس لسة مقرتهاش
دمتي بالف خير

كيكى عوووووو يقول...

رغم انى علقت على البوست دة معاكى على الهواء
بس لحد دلوقتى متغاااااااااااااظة
انك دخلتى **ميكانو وانا لاااااااا
بس الاهم بقى
وحشتينننننننننننننننننننننى
عوووووووووووووووووووووووووو

عايش علي الهامش يقول...

ياه ده الحاله الي عندي مطلعتش عندي لوحدي في حد تاني برضه متوقف عن التفكير حاليا
كويس والله
الكتب احسن من الدباديب مبتشوفيش افلام اجنبي ممكن الدبدوب يقوم بالليل ويمشي للمطبخ ويتكعبل في السجاده ورجليه تنكسر عادي يعني مش هقولك كان ناوي يجيب سكينه بس فوتيها دي

انا من المؤيدين لرايك في واحة الغروب انا مش هقول وحشه طبعا بس قصه لاول مره تحس انها مجزاه ممكن يعجبك فيها جزء وجزء لا تخلف بقي

يابختك خدتي اجازه وروحتي معرض الكتاب مش هنق

شكرا لكي

كراكيب يقول...

واحة الغروب اصلا انا لغاية دلوقتي معرفش ليه هي اخدت جايزة البوكر والرواية التانية اللي كانت مترشحة معاها لنفس الجايزة اللي هي "تغريدة البجعة" اجمد بكتيييييييير وانا بعشق الرواية دي فعلا وكانت هي اكيد تستحق الجايزة

فيلم ميكانو بقى هموت وادخله

جوجا بقى نفسي اضربها ضربة كبيرة علشان هي اشر الشريرين ومش بتسأل
وحشتييييييني يا بنت اللذينا

SHAPE YOUR LIFE (ABOALI) يقول...

اى كلام
ومالو نسمعه بردوا
ساعات اى كلام بيكون افضل من قلة الكلام
لذا احييكى على اى كلام
مع انه ممزوج برونق الجدية ولم تنقصه التلميحات والتنبيهات
بس سؤال بجد
اذا كنا نقرء ونقرء ثم نقرء وننقد
الا نستحق ان نقول شكرا" لاءنفسنا فنحن هكذا على طريق النضوج


يلا ما هو كلام


تحياتى

EMMY BABY يقول...

مش شرط يكون كلام منمق علشان يكون ليه لزمة ساعات الكلام المتنعكش بيكون سبيل فى حاجات حلوة كتير جاية

ربنا يهديلك عقلك ياااااارب ومتلحسيش مننا قريب :p

تحياتى

ايمى

Amgad يقول...

هههههههههههههههه
البوست ده ملوش لازمة بس قولت ازيت دماغي تصدقي انا عملت زيك برده
حالات تزييت الدماغ
وزي مقولتلك محدش بيجيب كتب في عيد الحب
وتحت الياسمينا اسمعيها م الهادي الجويني
وبعدين اسمعيها من منير
هتحسي بيها مرتين من جديد
وقولي لنفسك بقي متزعليش من غيابي
وشوية الاونطة دول

فشكووول يقول...

انجى الجميله ..
من الاخر هاتى بقى بوست جديد عشان نعرف نتكلم مع بعض يعنى
تحياتى

Unknown يقول...

المبدعون يهاجرون من الدستور، وقريبا سوف تصبح خاوية على عروشها، واحة الغروب رائعة لكنها تحتاج لحالة معينة أثناء القراءة، وربما إلى قراءة ثانية، شيكاجو رائعة بالفعل وأعتقد أن تحفظاتك نفس تحفظاتي، أما المسلسلات العربية فأنا لا أحب أن أضيع قوتي فيها على الإطلاق، بوست حلو على فكرة ولامم حاجات كتيرة.

المحارب الأخير يقول...

السلام عليكم

ولى رأى ولكننى سأوجله لحين التفرغ

عامة

أحببت القاء السلام

ضيف جديد عليكم

تحيتى

عالم ماريونت يقول...

انجي
ازيك وحشتيني
انا اكتر حاجة حبيتها في البوست ده انه عامل زي الحكومة الانتقالية
لازم منها عشان نحل البرلمان ونعمل انتخابات
انا كمان وقفت شوية بسبب وفاة محمد والحمد لله ربنا وفقني ورجعت تاني
دمتي بألف خير
رنا

bobanza يقول...

اي كلام برضه

- بالنسبة للدباديب انا زيك واللهي بعمل كده من كذا سنه ..يمكن لما نحسن علاقتنا بنفسنا حنبقي تحفه مع اللي حولينا...سامعك وانتي بتقولي بنصبر نفسنا ليه لا..تفكير مشروع!

- التلات الاسود بس بجد مش زي زمان الا من رحم ربي بس ده ميمنعش ان لسه في ناس جامدة ولازم اقري لهم"خالد كساب وبلال فضل ودسوقي " وغيرهم ...الناس كانت بستني الدستور الاسبوعي بيبقي وحشنا كنت بحجزه بس بعد الدستور اليومي الوضع اختلف ...محتاج وقفه

-تحت الياسمينة بجد حكاية انا بحس انا المفروض اكون هناك في المكان اللي بيحكي عليه مع اي بحبه في الدنيا ...الاغنيه فيها حميميه محصلتش وكمان تشمي ريحة الياسمين والجو وانت بتسمعيها...اتوقع اها كانت عنوان للالبوم بدل طعم البيوت هو شاف ان الطعم حسي جدا مع الحالة برضه جميل

-توقف الدماغ اللي عندك مش عارف اذا كان زي تنميل الدماغ ولا لا "اقري تنميل الدماغ" محمد مستجاب يمكن ترتاحي ويرد عليكي....والقلم يرجع يكتب....!

-انامعاكي بس صراحة بكريم شانتية حتتعب اللي بيعملها ويفضل مضظرب في علاقته مع الناس...واللي حيكلها حيفضل برضه تاية مفيش حل وسط واللهي الصراحة السادة احلي...!

-لي فترة مقريتش حاجة جديدة..اه زعلان من نفسي بس من حد فاضي اوي لحد مشغول اكتر..حزين كمان لان بعاني علشان الاقي الكتب الجديدة ساعات بصدق اني عايش في الصومال مش في مصر..اخر حاجة قريتها كانت الاعمال الكاملة ليحي الطاهر عبدالله...واحة الغروب اتمني اقرها قريب وشيكاجو قريتها لما كانت حلقات في الدستور وطبعا الكل متحفظ علي الاباحية بس هي واقعية لدرجة كبيرة وصاحيها لما اتسال قال انا لو بنتي عنده عشرين سنه حتكون اول حد تقرها...وجهات نظر

- بتعوضي الكتابة بالكلام الكتير في الموبايل ...في كل الحالات بعد الكلام الكتير حتلاقي اكيد حاجة تحكيها وتكتبيها...!

-علي فكرة كان لازم تتكلمي والبوست بسيط وحتي علشان منير وجاهين ومنيب قالوا اتكلموا
اتكلموا
اتكلموا .. اتكلموا .. اتكلموا ...
محلا الكلام ، ما ألزمه و ما أًعظمه ...
فى البدء كانت كلمة الرب الاله ، خلقت حياه ، و الخلق منها اتعلموا ...
فاتكلموا
فى البدء كانت كلمة الرب الاله روح بجناحين شطار ....
، و صار للكون مداه ...
آخر مطافها ...
جت و حطت ع الشفاه ...
لما البشر ملكوا الوجود ....
و استحكموا ...
فاتكلموا
الكلمة ايد ...
الكلمة رجل ...
الكلمة باب ...
الكلمة نجمه كهربيه فى الضباب الكلمة كوبرى صلب فوق بحر العباب ....
الجن يا أًحباب من ما يقدر يهدمه ...
فاتكلموا
الرمل مرمى تحت قبة السما ....
مشتاق لقطره من المطر فيها النما ...
ملايين سنين عمره ما داقها ....
انما فيه كلمة تقدر فى المراوى تِعَوَّمه ....
فاتكلموا
فيه كلمة تقدر تزرع البور حور ضليل ....
و كلمة تقدر تجعل الكوخ بيت جميل ....
و ابو العيال و الجلابية الهلاهيل ....
فيه كلمه تعطيه مال ....
و كلمة تِهندمه ....
فاتكلموا
لكم السلام ....
يا ملفوفين حول اللهب ....
يا غواصين فى القلب ع الكلنه العجب ....
فى البدء كانت كلمة الرحمن سبب و ما عادش غير الحق كلمة تِتَمَّه....
فاتكلموا.....
اتكلموا
اتكلموا .. اتكلموا .. اتكلموا ...
محلا الكلام ، ما ألزمه و ما أًعظمه ...
فى البدء كانت كلمة الرب الاله ، خلقت حياه ، و الخلق منها اتعلموا ...
فاتكلموا
فى البدء كانت كلمة الرب الاله روح بجناحين شطار ....
، و صار للكون مداه ...
آخر مطافها ...
جت و حطت ع الشفاه ...
لما البشر ملكوا الوجود ....
و استحكموا ...
فاتكلموا
الكلمة ايد ...
الكلمة رجل ...
الكلمة باب ...
الكلمة نجمه كهربيه فى الضباب الكلمة كوبرى صلب فوق بحر العباب ....
الجن يا أًحباب من ما يقدر يهدمه ...
فاتكلموا
الرمل مرمى تحت قبة السما ....
مشتاق لقطره من المطر فيها النما ...
ملايين سنين عمره ما داقها ....
انما فيه كلمة تقدر فى المراوى تِعَوَّمه ....
فاتكلموا
فيه كلمة تقدر تزرع البور حور ضليل ....
و كلمة تقدر تجعل الكوخ بيت جميل ....
و ابو العيال و الجلابية الهلاهيل ....
فيه كلمه تعطيه مال ....
و كلمة تِهندمه ....
فاتكلموا
لكم السلام ....
يا ملفوفين حول اللهب ....
يا غواصين فى القلب ع الكلنه العجب ....
فى البدء كانت كلمة الرحمن سبب و ما عادش غير الحق كلمة تِتَمَّه....
فاتكلموا.....

سمحيني لو كنت رطت "اتكلمت كتييييييييير" بس يمكن كنت محتاج اتكلم أي كلام....!

غير معرف يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online