الأحد، 11 أكتوبر 2009

نهارك لذيذ

تحديث: شلت الصور عشان حنين القلب طلبت كدة...حقها طبعا وانا كان لازم استأذن قبل ما انزل الصور اصلا بس حصل خير..

سلام عليكواااااااااا...اولا انا مريضة جدا الحمد لله..زورى جواه شخص ثقيل واقف بالعرض مش مخلينى اعرف اتنفس ولا ابلع ولا اتكلم..مفتقدة شرب الميااااااااااه بشدة..

ثانيا انا مبسوطة..وهذا هو موضوع التدوينة..ليه بقى مبسوطة؟؟؟

اولا لانى قررت انى انبسط..يعنى طظ فى اى حاجة واى حد يعكروا مزاج السيادة..واللى اتكسر يتفشفش..وعيش احلى ما ف اللحظة..وعلى رأى العسولة سمية مش كل شىء بيفوت فى عمرنا بيجرح ..هو اى نعم منير هو اللى قال..بس سمية ترفعه شعارا للحياة الايام دى..وانا معاها..وريم وجيه كمان لازم اشدها معايا..اى نعم هى ابتدت تيجى لوحدها بالذوق وعلى فكرة يارورو بتبقى قمر وانتى مبسوطة..اى نعم انتى قمر طول الوقت بس وانتى مبسوطة حاجة تانية..

امبارح كان فى لقاء مدونين..هما كانوا بادئين اللقاء من بدرى جدا وانا مكنتش عاملة حسابى انى هروح اصلا لان كان عندى كلية ومشوار مهم جدا...راحوا ملجأ اسمه دار الحنان عندنا عالطريق السريع كدة بعد المطار بشوية عند الامن المركزى كدة..وانا باوصف ليه اصلا؟؟؟ يللا ما علينا...المهم انى وصلت وهما قاعدين بياكلوا فى محل فى بحرى..روحت بقى واتعرفت عليهم..اولا وصلت انا وريم وجيه صاحبتى الانتيخ..روحنا لقينا احمد عبد الله وفى رواية اخرى اسلام اللى هو مواطن مصرى نايم...جارى الواد دة على فكرة..وشفت سووو..وعادل البلد دى فيها حكومة..دول اللى كنت اعرفهم ..قعدوا يعرفونى بقى عالباقيين..وبعدين عادل بيقول ودى فاتيما ام يوسف..لقيتنى سبتهم كلهم وروحت سلمت عليها بقلب وقعدت احضنها وهى متعرفنيش اصلا ولا عمرها شافت مدونتى وانا عمالة اسلم عليها جامد اوى..واقولها ماما بتدعيلك وهى صايمة والله كانى اعرفها من خمسين سنة وهى يا عينى متلغبطة ..المهم انها عسولة اوى وعنيها طيبين خالص وشكلها مألوف جدا وكل شوية ابص عليها واقول انا حاسة انى شفتها قبل كدة يا جدعان والله..المهم بقى بدراوى وصاحب مدونة عنبر العقلاء كانوا واقفين بيدونى برستيجى بقى وبنتكلم وكدة وبدراوى بيقولى حضرتك..لقيت عادل جات له الفوقة وجاى يقوله ميييييييييييييييييييييييييييين حضرتك دى؟؟؟ انت بتقولها حضرتك؟؟ وابتدينا مشوار الرخامة والغلاسة اللى استمر سجالا بينى وبين عادل لحد ما مشينا نيااااااااهاهاهااااااااا...

بعد ما خلصوا اكل مشينا وقعدنا نمشى...نمشى...نمشى..نمشى...يا جدعان احنا رايحين فين؟؟؟ يرد احمد احنا ماشيين وراهم..ونمشى ...نمشى...نمشى...يا جدعان انا تعبت انا النهاردة يومى كان مرهق اصلا ومكلتش من امبارح وزورى واجعنى...قعدنا بقى نلوك لوك واتعرفت عالبت العسولة رياح الحنين..وطلعنا جيران..وهى عمالة تعيط على جيبتها اللى اتبهدلت ايس كريم بالشوكولاتة..وعادل عمال يدافع عن القاهرة وانا واحمد ندحض اقواله..هع هع هع مش قلتلك هدحض اقوالك ادينى ضحدتها اهو..الا هو يعنى ايه يدحض اصلا..

المهم..فين وفييييييييييييييييييين وصلنا عند الشيخ وفيق..ماشى اشطة دخلنا وقعدنا واللى طلب حاجة ياكلها طلب وانا عمالة اقولهم جعااااااااانة يقولولى اطلبى حاجة اقولهم لا انا مش عايزة حاجة حلوة انا عايزة اكل...واساسا القعدة هناك كانت خنيقة عشان تقريبا الشيخ وفيق كان معكنن على الويترز وبالتالى كان بيعاملنا وحش وزهقان مننا..

المهم بما انى مباكلش وريم مبتاكلش ورياح الحنين مبتاكلش واحمد وعادل مبياكلوش فانا قلتلهم والله عييييييييييييييب...قالولى هو ايه اللى عيب قلتلهم البحر اهو واحنا قاعدين هنا عند عمو وفيق..المهم طلعتها فى دماغهم نروح نلعب على الرملة..عادل تحمس للفكرة وطاوعنى وقال يللا بينا وكان صاحب اول طلعة ..قمت انا وهو وريم و حنان وروحنا على الشاطىء ...وخلعنا الاحذية انا وريم وحنان وروحنا وقفنا عند البحر واتبلينا هع هع هع..

بعد شوية قلت لحنان تيجى نلعب قالتلى اه يللا..روحنا مسكنا فى ايدين بعض وقعدنا نلف نلف نلف فيما يسمى بلعبة المروحة..وااااااااااااااااااو كنت حاسة انى بطير يا جدعااااااااااان ..اى نعم فى لحظة ما لقيتنى بتهبد عالارض بس عااااااااادى والله كنت مبسوطة..بعد شوية لعبناها تانى والمرة دى موقعتش خالص ...و روحنا بعدها انا وحنان وريم وقفنا عند البحر وقعدت اقولهم زعقوا يا عيال طلعوا الكبت..بس محدش رضى يزعق غيرى وانا اصلا معرفتش ازعق ..المهم بعد شوية حاولنا انا وحنان نلعب لاعبينى والاعبك بس مكملناش عشان الظرافة بتاعة احمد عبد الله قعد يقول بتلعبوا ببطء وبتاع فمكملناش بقى..واحمد شال الواد عادل وكان هيرميه فى البحر بس انا اتوسطت له بقى..هع هع هع..

بعد شوية باقى الناس جم بقى وقعدوا يتكلموا وبعد شوية روحنا بقى وانا شغلتلهم اغنية ذهب الليل وطلع الفجر والعصفور صوصو..صوصااااااااااااااااو..

بس بقى وروحنا بقى فى النهاية وصحيت الصبح عيانة الحمد لله..ومروحتش الكورس طبعا لانى والله فعلا مريضة..وعلى فكرة كان فى صور كتير احمد صورها بس موبايله هااااااااااااايل..جزمة قديمة كل الصور مضلمة ومفيش بشر فى اشباح كدة طالعين فى الكادر..يللا مش مهم..

المهم انى انبسطت جدا اوى خالص..اه نسيت اقول ان احمد دفعلنا انا وريم فى المشروع نياااااااااهاهاهااااااااااااااا....

ملحوظة: الصور اللى فوق دى كانت فى الشيخ وفيق..احمد هو اللى صورها بمموبايله المشلول..

هناك 23 تعليقًا:

عاشقه الرومانسيه يقول...

اول تعليق اسكندرانى
من دودو عاشقه الرومانسيه
وسمعنى سلام اسكندرانى شحط محط

عاشقه الرومانسيه يقول...

اليوم فعلا كان رائع بوجودكم ياتوتا
عقبال كل مره كده متجمعين يارب فى الخير
وتكونى معانا من اول اليوم بقى

وايه الصور والفضايح دى يابنتى
الحمد لله ان الموبايل كان مشلول
والف سلامه عليكى ياقمر

عاشقه الرومانسيه يقول...

وعادل يجنن فى الصور
حتى وهو طالع بقفاه عسسسسل
ماشاء الله مصوره البنات بوشهم
والرجاله بقفاهم
ايه الحلاوه دى؟
هههههههههههههههههه

adel يقول...

بجد يا انوج انا مبسوط قوي قوي و ربنا كنت هازعل لو مشفتكيش :):)

اليوم كان ملوش حل والله
وكنا ناقر و نقير بس مش اي حد انا ببقي معاه كده :)

انا مش عارف اكتب عن انبساطي ده
ولا هاقولك اني كملت اليوم انا وسووو و احمد
هههههههههه

ورحنا شربنا قهوة من ستيفانو بولو (تقريبا اسمه كده) ...ومشينا علي البحر و .... (ههههههههه)
كان يوم رهيب

سلامتك ياقمر ...
و ..

يوم رائع اخر يضاف لايامي ...شكرا :)

بالنوسبة للصور ...احمد منك لسكان القاهرة يتصرفوا معاك :)
------
عاشقة الرومانسية :
بصي مش اي حد يتصور بقفاه يطلع حلو
وانا مش اي حد برضه
هههههههههه

أحمد عاطف يقول...

ربنا يجمعكم دايما يارب

واتمنى اكون معاكم اللقاء الجاي

تحياتي ليكم كلكم

الشعب لابد له من حكومه تشكمه يقول...

ههههههههههههههههههه اكتر حاجه ضحكتنى تعليق دودو وهى بتقولك مصورين البنات بوشهم والرجاله بقفاهم ههههههههههههههههه...
وعلى فكره حاولت اعرف مين دول معرفتش...
ملحوظه: معرفتكش بقفاك يادولا ههههههههههه انتى اى واحد الطويل ده ولا المستخبى ولا اللى مش باين؟؟مين اللى مصو الصور دىىىىىىىىىىىى؟:))
ربنا يسعدكو يارب

نعكشة يقول...

الف سلامة عليكي
لأ دانتى الامراض ماسكاكِ تباعاً
ايه يا بنتى دة انتى فاتحة ملجأ

ربنا يشفيكي يا رب

و يفرك كمان و كمان
آمين

سام عليكِ

حنين القلب يقول...

ازيك ياانجى
كنتى منوره اللقاء والله
واتمنى تتكرر تانى
بس ليا عندك طلب
لو سمحتى شيلى الصور من فضلك
لان محدش فينا بينزل صور بنات على مدونات

فاتيما يقول...

انجى انجى
سلامتك ..كلنا شرحو
متدحضضين يا ماما و دايسنا قطر
انا مكنتش متلخبطة و لا حاجة أنا شكلى كدا
ببقى محتاسة علطول و بغرق فى شبر مية
انا ببقى فرحانة قوى بكل حد جديد اشوفه ( و قديم و الله ) و بعدين الناس ما شاء الله بتعاملنى بألفة رهيبة انا لا استحقها غالبا فببقى محرجة عاتشيفياً بس
يعنى خدى سيادتك اكبر مثال
لما قالولك دى فاتيما و جيتى سلمتى عليا بحرارة و رفعتى من معنوياتى باللى قولتيه عن مامتك
يعنى الواحد لما يتخيل
إنه كان قاعد فى حاله على ترابيزة السفرة بيفطر فى يوم من ايام رمضان و زعلان لأن يوسف مش معاه على نفس السفرة
و بعدين اكتشف إن فيه إنسانة طيبة
و حنونة متعرفنيش أساسا و لا عمرها شافتنى تطلع بتدعيلى بظهر الغيب
و من غير ما اطلب منها الطلب دا ...يبقى بعد دا كله مبقش ملخبطة ؟!!!
إنتى عسولة قوى و طفلة بريئة كدا و شقاوة و سعدت بلقاءك بجد
و المرة الجاية نقعد و نحكى و نرغى
حنين متبنية وجهة نظر اغلبنا يا حبيبتى عشان كدا خلى بالك لما تصورى حد تسأليه دى للنشر و لا لأ الاول
لأن فيه ناس متحبش صورها تطلع على النت و غالبا البنات كلها حتقولك متنشريش
بس دا لا يمنع إن سيادتك تتكرمى و تتعطفى و تتمى جميلك و تبعتيلى الصور على إيميلى و اهى تبقى فرصة يبقى عندى ايميلك عشان اغلس عليكى فى المناسبات و الف شكر ليكى مقدما يا حبيبتى
بوسة و حضضونة قد كداااااااا
modynoty@gmail.com

مسدس صغير يقول...

عملوها الوحوش
ياريتنى كنت معاهم
ههههههه
يلا تتعوض
سلامتك

أحمد الشمسي يقول...

شوفي لقاء الناس شخصيا بعد معرفة افتراضية طويلة بيبقى لذيذ جدا... اسأليني عن الشعور ده، حسيته بجد لما قابلت قاص وكاتب جميل اسمه حامد محمد حامد بعد معرفة إلكترونية طويلة.

ربنا يبسطك ويبعد عنك احتقان الزور

محمد ناصر الدين الهلالى يقول...

ماشاء الله مدونة جميلة جدا متابعها من فترة ، بس عجبتنى روح التدوين اللى فى اسكندرية دى وحبيت احييكم عليها . تحياتى

على باب الله يقول...

بوست مُبهج .. سعادتك كَرَفت علينا و ده نوع رائع من الكَرف .

الفرح شيء جميل ، ربنا يسعدك و يسعدنا

Unknown يقول...

بجد نيالكم عم تلتقوا مع بعض

وواضح انه رحلتكم كانت حلوة كتير ومبسوطين
بتمنى بيوم التقي فيكم
ربي يسعدكم ويوفقكم

مع الحب

حنين القلب يقول...

ميرسى يا انجى
وفاتيما وضحت اللى كنت عايزة اقوله

اتمنى نتقابل تانى
سلام

نعكشة يقول...

معرفش ليه حسيت انى عاوزة اقولك
عامة مش اشكال

انهاردة كان امتحان عسول
والدكتورة كانت عسولة

وانا جاوبت بثقة
يلهوي

والله
خطى كان حلو فى الورقة

اول مرة احس إنى بجاوب من ساعة ما بدأوا يمتحنونا

انا مبثوتة
مليش دعوة بقة انا قولت اقولك و خلاص

سلام عليك

نهر الحب يقول...

عاملة ايه ياقمر
سعيدة جدا بلقاءك
ونتجمع دائما ان شاء الله
أوقات أكثر وأكثر

خالص تحياتى

نهر الحب

Hanan Elshafey يقول...

سلامتك يا قمري اللف سلامه
ان شالله اي حد غيرك انتي يا غاليه

بس كده كده فضحتينا ولعبنا زي العيال الصغيره الناس كانت بتقول علينا كبار هههههههه
بس والله كان نفسي في الهبل العيالي ده من زمان وانتي ساعدتيني اطلع الكبت ههه
وبعدين تعالي هنا متطنشيش ياماما لازم نزوله قريب انا واانتي وريم العسوله ده احنا جيران يا جدعاااااااان
اقولك
عازماكي عالغدا بكره

تعالي بقي ها
انتي مش عارفه البيت طبعا بس لازم تيجي
هههههههههه
كان يوم تحفه يا قمر
وبالنوسبه للصور قولي لاحمد يولع فيها احسن
ههههههههههه
مش ناقصين عفاريت

غير معرف يقول...

آنوجا؛ ألف ألف مليون سلامة علي زورك ودراعك ؛ لسه قريت دلوقتي بس البوستات اللي فاتت ، لإنك بقالك شوية مش بتكتبي ‘ فإذا عرف السبب !!!.
عموما البوستات إللي فاتتني كلها رائعة وده العادي المنتظر منك :
* " عن زاهية وسامح ": حقيقي الواحد بيعلق معاه بس الناس إللي سابوا أثر عميق في الذاكرة وذكريات الطفولة الجميلة ؛ فأنا حتي الآن أحفظ أسماء المدرسين ثلاثي وكذا أسماء زملاء الفصل وبالكامل وثلاثي أيضا وعن ظهر قلب ؛ فلقد كنا (20) طالب وطالبة من الحضانة وحتي الإعدادية لا نتغير بل يمكن أن يزيد عددنا واحد أو إتنين علي الأكثر .والله كانت أيام جميلة بيضاء نقية كالثلج .
* أما " نهارك لذيذ ": فحكاية إنك تشوفي ناس رسمالهم صورة في خيالك علي أرض الواقع أحيانا يكون ممتع ، متي تنطبق الحقيقة بالخيال؛ وأحيانا يكون مرير ومصدم ....!!!
* إنجي إبراهيم : نهارك وليلك وأيامك ودكاترتك وأصحابك وأنتيخاتك وكل حاجة تكونلك لذييييييييييذة بأمر الله؛
ديدي

حروف يقول...

انجي انا فرحت اوي اول ماشفتك اوي بجد

انا مش عارفة عرفاني ولالا بس انا بزور مدونتك

يوم كان حلو وللاسف ملحقتش اقعد معاكي

إيناس حليم يقول...

الف سلامة عليكي يا انوووج
فرحانة انك اتبسطي
ربنا يسعد كل ايامك يا رب :)

ريم وجيه يقول...

يا بنتى بطلى نصب ...قمر مييييييين !!!
اذا كان المرة اللى قبل اللقاء حسستينى انى شبه اللى مضروبين فى وشهم بطاسة - زى توم وجيرى كده-
احم ..عموما ربنا يخليكى يارب ...ومايحرمنيش منك ابدا يا نوجا ...لولا وقفتك جنبى كان زمانى اتكسرت ..
كفاية المفاجأة الجامدة اللى ادتهالى يومها ...عملت شغل جامد مع اخواتى
بجد يوم جميل ...والناس اللى فيه خلوه اجمل
ويارب يتكرر تانى ان شاء الله

Sumaya Rabie يقول...

هيه هيه هيه .. أنا اسمي مكتوب أنا اسمي مكتوووووووب
لعلمك منير أصلا غنى الأغنية ديه بإيحاء مني :D
الأغنية ديه معمولالي تحديدااا ..

ما علينا يعني ... المهم سيبك من كل الجنان اللي تحت وسيبك برده من قضية انك عيانة (خفي وانجزي) .. بس أنا عايزة أشجعك على حاجة يا مجنونة ... على الانبسااااط طبعاااااا

وعهد الله يا بنتي .. أسهل حاجة في الدنيا اني أمثل دور ضحية الزمن المسكين - أنا اللي مسكين يعني مش الزمن - واني أقنع نفسي ان الحياة مجرد عبث وعوء على رأي اخوانا البعدا .. ولما بنعمل كده بنشوف كل الحاجات الوحشة .. مش بنبقى بنمثل .. انما بس ساعتها عينينيا السودا بتشوف الوحاشة .. وبتغمي عينيها عن الحلو
كل حاجة ليها تفسيرين .. وليها وجهين .. أنا طبعا بتكلم بعيدا عن الأحداث الجسام .. يعني ما تقوليليش واحد عنده أزمة نفسية في حاجة محددة علاقة منتهية أو فشل في حاجة أو فقدان حد عزيز .. ديه حاجات تستدعي الحزن .. انما مش الاكتئاب .. الحزن من حقنا .. نحزن آه .. بس ما نموتشي .. نموت الموت اللي هو بيصحوا منه تاني ..

انما غير كده .. قلب الحياة مليان حاجات وبتفرح ..

(F)