الخميس، 10 يونيو، 2010

هذا الرجل أحبه


عزيزى دكتور أحمد خالد توفيق

تحية طيبة وبعد ..
كل عام وأنت بخير فاليوم 10/6 -يعنى عيد ميلادك يا فندم كل سنة وإنت زى الفل-

مممم..لا أعرف..بالطبع هو ليس خطاب ولكنه بوست على مدونتى المغمورة..وبالطبع لن يقرأه..وبالطبع لن أرسله..وبالطبع لا أريد أن يقرأه..فقط أود أن أقول أن اليوم هو يوم ميلاد دكتور أحمد الذى لا أستطيع أن أسبق إسمه بأستاذى ولا بمعلمى ولا أى لقب لأسباب كثيرة أهمها أننى لا أستطيع أن أبخسه حقه.

عزيزى دكتور أحمد
كل عام وأنت بخير..اليوم ميلادك وقد أتممت ثمانية وأربعون عاماً..لازمتنى خلالهم أحد عشر عاماً..أنا أعرفك حق المعرفة..لم أقابلك كثيراً ولم نتحدث أكثر من دقائق..لكننى أعرفك.

دكتور أحمد..هل تذكر أول مرة تعرفت عليك خلالها؟؟
كان ذلك يوم تقديمى فى المدرسة الإعدادية ..إشترت لى أمى عددين من سلسلة ما وراء الطبيعة من تلك المكتبة التى تقع عند الباب الخلفى للمدرسة..كان العددين هما النافاراى والتؤمين..كان العددان جزء ثانى لجزء أول لم أقرأه..تعرفت عليك يومها..وأذكر أن إنبهارى بدأ عندما كنت أقرأ التوءمين وأقرأ وصف نجلاء لصلاح خاطفها..اليوم قلت كيف يعرف أن هناك شعوراً هذا هو وصفه وإذا عرف كيف تمكن من وصفه بتلك السلاسة؟؟

ثانى تعارف كان أسطورة البيت..هل تعرف أننى كنت أريد أن أسمى ابنتى شيراز قبل أن أعرف أنه إسم مدينة؟؟ هل تعرف أننى كنت أرى شيراز فى تترات برنامج نادى السينما وكنت مقتنعة تماماً أن تلك الفتاة فى التتر هى شيرازك؟؟

نعود لموضوعنا..عم كنت أتكلم؟؟ نعم عن قصتى معك..بعدها توالت القراءات..لا أذكر ماذا قرأت بعد البيت ولكنك أصبحت هوسى الخاص لفترة من الزمن..كنت أرى فى كل شىء حولى ما يذكرنى بك..أحببتك جداً..كنت أعرف كيف أفرق بين رفعت العجوز ودكتور أحمد الشخص الحقيقى الذى أحبه..

دكتور أحمد..لا أعرف كيف أصف فخرى بك..أعرف أن من يفخر يجب أن يكون فى موقع أعلى ممن يفخر به ولكننى حقاً أفخر بك..يبهرنى كلامك فى كل مرة..أنت الوحيد الذى لم يخذلنى كلامه ولم تصدمنى آراءه حتى اليوم ولن يحدث بإذن الله.

دكتور أحمد..هل تعرف أن أول مقابلة حقيقية معك ظلت أهم حدث فى حياتى لشهور بعدها؟؟
هل تعرف أننى كنت أتساءل كيف إستطعت الخروج من صورة الغلاف والجلوس وسطنا؟؟
هل تعرف أننى إخترت الكرسى بجانبك عنوة؟؟
هل تعرف أننى شممت يدى بعد أن سلمت علي وأنا راحلة؟؟
هل تعرف أننى كنت أراقب كل حركاتك كى أتأكد أنك لست صورة وأنك ثلاثى الأبعاد؟؟
هل تعرف أننى أحفظ كل كلمة قلتها لي أو لآخرين من يومها حتى الآن برغم مقابلتى لك بعدها؟؟
هل تعرف أننى أحتفظ بمقالاتك فى الدستور وقصصك فى مجلة الشباب التى أشتريها فقط من أجل خاطرك؟؟

كل عام وأنت سعيد..وشيك..وطيب..وذوق..وشهم..ومتواضع..ومبدع..وضحوك..وذكى..وبتشرب شاى كتير.. وبتلبس بدل رمادى..ومبتردش عالتليفون..وبتأخر المقالات ..ودمك خفيف..وحريقة سجاير..وسريع البديهة..وبتحط رجل على رجل.........

دكتور أحمد..كل عام وإنت أنت.

...........إنجى إبراهيم..........

هناك 18 تعليقًا:

richardCatheart يقول...

كلامك جميل يابت يا انجى عجبنى اوى

اجمل احساس فى الدنيا احساس البت البنوته اللى بتكبر على صوره لشخصيه حلوه
فى كللللللللللللللللللللللللللللللل
حاجه بالنسبلها شايفها اجمل حد واكمل حد حلو بعيوبه قبل ميزاته

والاجمل فى دا وماتستغربيش انها مهما كانت حيه وبتقبليها بس بردو شخصيه اسطوريه وهاتفضل اسطوريه

كل سنه وانت طيب يا راجل ياطيب ياللى بتحبه انجى اوى
هههههههههههه

تحياتى ليكى ورقه قلبك وحبك النبيل

MR.PRESIDENT يقول...

ههههه
ماشي
شكلك بتعزيه
انا قريت قصة واحدة له رغم انها فيها مسحة من الأباحة إلا انها عجبتي
ارائه صادمه علي فكرة
بس بيقول الحقيقة
والحقيقة مؤلمة
--------
مش عارف انا لم سمعت كتاب صوتي له بحس أنه بيتكلم بفكر كل واحد فينا
عموما
كل سنة وهوا طيب
وعبال ما تبقي كاتبه
زيه
وواحد او واحدة يقص مقالاتك
ويجمعها
ويحتفظ بيها
وتفتكري انتي بدورك ما مر بك

تحياتي

شفـقــة و إحســــان يقول...

ايه الحب والمعزة دى كلها
عموما كل سنة وهو طيب

samy يقول...

دى أول مرة ليا بس بأذن اللة مش الأخيرة

طبعا هو كاتب لايعلو علية

انا اتربيت على روايات مصرية للجيب
تقريبا كل المجموعات كانت اة والله كانت كاملة

بس لحقت اخر ايامى مع الروايات
سلسلة ماوراء الطبيعة

طبعا كانت ابهار لي لأنها كانت خارج السرب بطريقة جديدة بأسلوب جديد
حاجة تاخد خيالك لبعيد وتعيش وسط الحكاية كأنك منها

بس انت تقريبا كان فى بدايتك مع الروايات دى
فأثر فيكى جامد جدا

هو يستحق بصراحة

بوست هايل جدا
وكل سنة وهو طيب
وانت بخير وسلام و بالتوفيق الدائم

AHMED SAMIR يقول...

دكتور احمد خالد توفيق رجل عظيم حقا
كل سنة و هو بخير

قبلاوى يقول...

الراجل ده ملوش حل

كاتب عبقرى

شخصية روعه

اتقابلت معاه فى ندوات

عملت معاه حوار قبل كده

وحضرتله محاضرات فى الكلية


كل سنه وانت طيب يا دكتور أحمد ،،

adel يقول...

يمكن برضه

Haytham Alsayes يقول...

ياااااااااااااااه

يعني اول مرة ادخل عندك تكتبي عن استاذى

فعلا انا كمان باعتبره استاذى
انتي عارفة يانجي انا بقرأ عموما من سنتين بالظبط وتعرفت طبعا علي كتابات احمد خالد توفيق وقريت السلاسل وتخيلي كلها ورا بعضيها
كلها سافاري وما وراء الطبيعة وفانتازيا وكمان الكتب اللي الفها بعد كدة حتي زغازيغ وعندى فقاقيع بس لسة مقرتهوش

من كتر ماقريت للراجل دة تشربت افكاره وحسيت بيه وبحاول اكتب زيه
مبقراش من الاعدادية زيك وكنت زعلان ان مقرتش من زمان بس الحمد لله حاسس اني عوضت السنين دي في قراءة كتب الدكتور وللاسف خلصتها وبقرأ في حاجات تانية اكتر
بس اقولك يعتبر هو اللي فتحلي عالم الثقافة الشيق

معلش طولت عليكي بس سيرة الرجل تستحق

تحياتي ياعاشقة العبقري

Manar يقول...

هـذا الرجل أحبه وأحترمه
يكفى أن بدايه قراءاتى للروايات
كانت على يديه

تحياتى لكِ

عالم ماريونت يقول...

الراجل ده فعلا يستحق الحب و الاعجاب يا انوج
و جميل جدا انك تحبية لدرجة انك تفكري انه ثلاثي الابعاد
عارفة
انا بعد موضوع خالد سعيد

لقيت نفسي مش قادرة اكتب اي جاجة جديدة غير اني اعيد مقال هو كان كتبه عن العنف الي جوانا و لقيت انها مجاوبة على كل حاجة و ملخصة كل الاسئلة

ربنا يخلي الدكتور و كل سنة و الدكتور احمد هو الدكتور احمد

رنا

sun of free dom يقول...

احترمه كثيييييرا
مشكوورةع البوست

Foxology يقول...

كل سنة والكونت بخير :)

تحياتى

Dalia w Ahmed يقول...

من يوم ما قريت مدونتك أول مرة وانا بقول عليكي بتفهمي :)

had-befham يقول...

الراجل دا برنس بجد

بسمة يقول...

قليلين قوي الناس اللي ممكن يسيبوا اثر قوي بالدرجة دي في حياة اي حد..دكتور احمد مش اي حد

وبرغم انه ملوش وجود ملموس في حياتي الا ان وجوده المعنوي اقوى بكتير..واحب جدا اشاركك انه الوحيد اللي افكاره بتاخد حيز من المخ ومن التفكير

كل سنة وهو موجود معانا ان شاء الله D:

islam yusuf يقول...

طبعا الدكتور أحمد خالد توفيق له أثر كبير علينا...و مع ذلك مهما تقدم بينا العمر هنظل نجد متعة فى قرايته

كفاية كمان انه ترجم رائعة تشاك بولانويك "نادى القتال"
للأسف لحد دى الوقت ما قريتش يوتوبيا

كل سنة و هو طيب و انتى طيبة

أم الخــلـود يقول...

اصحى يا نايم ووحد الدايم ..

(حملة الجسد الواحد)

أرجوا من المدونين الموقرين أن يضعوا شعار الحملة واسمها في الشريط الجانبي لمدوناتهم كدلالة على وحدة صف أمة محمد

لمزيد من المعلومات

http://dndanh111.blogspot.com

جعله الله في ميزان حسناتكم .. آمين

Haitham يقول...

لو ربنا رزقنى ببنت ان شاء الله هسميها شيراز وصفه ليها أسرنى بحب الطفلة واسمها. الله المستعان