الأحد، 5 أكتوبر 2008

تاجات ....هو يعنى ايه تاج؟؟؟

عندى برد شنيع... فعلا يعنى متبهدلة من البرد دة عشان كدة قلت اهيس بقى واجاوب على شوية تاجات...
صحيح نسيت اقولكم كل سنة وانتوا طيبين عملتوا ايه فى العيد؟؟؟ اشتريتوا هدوم جديدة؟؟؟ خرجتوا تتفسحوا؟؟؟؟ اكلتوا فسيخ؟؟؟ اخدتوا العيدية؟؟؟ المهم عملتوا كل دة او ماعملتوش كل سنة وانتوا طيبين..........
زمان زمان يا سادة يا كرام وما يحلى الكلام الا بذكر النبى عليه الصلاة والسلام جالى تاج من علاء صاحب مدونة عايش ولكن..
وجالى كمان تاج من مدونة يوميات نائمة فى الارياف اللى هى رنا ... رنا دى اول موضوع قريته عندها اثر فى قوى يا جماعة والله كان موضوع حلو قوى قوى بجد كان اسمه انا ورنا الموضوع دة مش عايز يطلع من دماغى لحد النهاردة المهم رنا بعتت لى تاج و قلت بقى نزولا على رغبة الجماهير هجاوب التاجات عشان ماتقولوش حرمتكوا من حاجة........
واحد.. اتنين.. تلاتة..تاج علاء
سبع حاجات نفسى اعملهم...(اشمعنى سبعة تحديدا؟)
نفسى يبقى عندى دم شوية زيادة عن كدة فى علاقتى مع ربنا.....
نفسى اكمل دراستى ......
نفسى اشتغل فى مجالى و فى نفس الوقت العائد المادى يكون معقول.....
نفسى اشترى عربية حتى لو نص عمر ......
نفسى ارتقى بمستوايا على كل الاصعدة.......
نفسى اغير الكمبيوتر الزفت بتاعى و اشترى كمبيوتر عنده دم مش بيبوظ كل تسع ساعات.......
نفسى اعمل عملية ليزك (تصحيح ابصار)
سبع حاجات معرفش اعملهم.....
سبعة بس؟؟؟ انا الحاجات اللى معرفش اعملها ممكن تتكتب فى مجلدات بس هحاول احصرهم ..
معرفش انجح فى الاحصاء بسهولة......
معرفش اتعامل مع الفيس بوك نهائى.....
معرفش احسب الفلوس بسرعة......
معرفش امسك اعصابى ولا لسانى....
معرفش اتعامل مع حد باسترخمه......
معرفش اعيش من غير كتابات دكتور احمد خالد توفيق...
معرفش اتخلى عن الحاجات اللى بحبها.....
سبع حاجات دايما بقولهم....
يا راجل؟
يخرب بيت القرف..
بتهرجى/بتهرج..
على فكرة..
المهم..
تقديم الخبر على المبتدأ او الصفة على الموصوف يعنى مثلا جاية انت؟/ بتهرج انت/ جزم هم..
زفت / زفتة الطين ودة مش على الحاجات اللى مش عاجبانى لا مثلا لو باتكلم عن حد مش فاكرة اسمه يبقى عارفاه زفت الطين دة..او مثلا هاتى زفتة الطين اللى جنبك..
سبع مشكلات ممكن تحلهم بالفلوس...
اعتقد معظم المشكلات لها جانب مادى يعنى الفلوس مهمة فى معظم المشكلات...
سبع اماكن بحبهم...
بحرى عند القلعة على الصخور اللى قريبة من البحر..
المنشية..
بيتنا..
اى حتة لى فيها ذكريات حلوة......
سبع اشخاص بحبهم غير عائلتى...
اصحابى كلهم ودول فعلا سبع اشخاص انا اصلى ماليش اصحاب بالهبل يعنى.....
سبع حاجات بحبهم قوى...
القراية..
الافلام الاجنبى..
الكتابة..
النت..
موبايلى..(له ذكرى حلوة معايا)
كل حاجتى لانى بارتبط بالاشياء جدا...
مدونتى حبيبتى..
سبع مدونات بحب اقراهم.......
لا دول كتير مش هينفع اقولهم واحد واحد..
كدة يبقى تاج علاء خلص بالسلامة.. نيجى بقى لتاج رنا..
من انت؟
انا انجى.
بطاقتك الشخصية؟
اسمى انجى...سنى عشرين سنة... ساكنة فى اسكندرية...طالبة فى كلية الاداب قسم علم نفس...
ما هى احلامك؟
لا دول كتير قوى بصراحة ممكن تراجع التاج الاول...
مين اقرب شخص ليك؟
رضوى صاحبتى...
ايه معنى السعادة من وجهة نظرك وحاسس انك سعيد؟
معنى السعادة انك تكون مطمئن ومش خايف ...حاسس انك سعيد؟ انا طول الوقت قلقانة وخايفة وصلت الاجابة؟
امتى حسيت انك ظلمت انسان ومحتاج لحظة غفران؟
كتير ظلمت ماما معايا طول الوقت الحقيقة اصلى شخصية مقرفة جدا..
بتعمل ايه لما بتكون متضايق؟
ولا اى حاجة ساعات لما اكون متضايقة قوى باعيط...
امتى حسيت انك اتظلمت وليه؟
مش فاكرة انى اتظلمت بصراحة...
ايه اكتر احساس بيراودك تجاه نفسك والاخرين؟
اكتر احساس تجاه نفسى انى وحيدة جدا وتجاه الناس حسب مين هو الشخص..
امتى ممكن تتنازل عن حق من حقوقك و ليه؟
ممكن اتنازل لو عشان حد بحبه ...
كدة خلصت التاجات الحمد لله اى خدمة.........

هناك 50 تعليقًا:

ليكوريكا يقول...

انا كمان عندي برد

بس عامل حصار ادويه

ومن كتر الادويه مش قادر اقوم من مكاني

بس جت مصلحه عشان ادخل اشأر علي الناس


جميله صراحتك اوي

التاجات دي ساعات بحس انها اختراع جميل

وساعات كتير بحس انها تدبيسه والسلام

ربنا يشفيكي ويشفيني

كل سنه وانتي بخير

ميرو انتكة يقول...

انجى حبيبتى ازيك يا قمر
الف سلامة عليكى ان شاء الله الى يكرهك

بس ايه الاجابات الصريحة جدا دى يا مفترية ههههههههههههه

كل سنة وانتى طيبة يا قمر

سلامة سلامة يا توتى

mohamed ghalia يقول...

إجباتك لذيذة قوى وكمان واضح إنك بتحبى دراستك
ربنا يوفقكك وتحققى أحلامك
تحياتى

mina يقول...

ربنا يوفقك و تحققى كل اللى فى نفسك.... سلامتك من البرد

MISS\GH يقول...

تصدقى بالله والله البرد مخلص عليا عموما الف سلامه عليكى ويارب دايما تبقى بخير وكل سنه وانتى طيبه.

romansy يقول...

دى كلها تاجات
الله يكون فى العون
بس كده كويس انك حلتيهم كلهم
اجاباتك صريحه وجميله
والف سلامه عليكى

كـــيــــــــارا يقول...

الله اجاباتك جميله

انا بحب قسم علم النفس جدا وكنت بحلم اخده في ثانوي

كل سنه وانتي بخير ياقمر
تحياتي

كيارا

الازهرى يقول...

صديقتى العزيزة

اولا ادعوا لك بالشفاء

ثانيا اجابات take away جميلة للغاية

حقق الله لك كل امانيك
وعلى فكرة انا دارس نهم لعلم النفس وارى انه المفتاح الحقيقى لدراسة القرارات التى اتخذت عبر التاريخ


تحياتى

princess يقول...

ايه حكاية البرد سلامتك يا قمر
بس البرد بيخلى الاجابات تطلع حلوة كده هههههه
تحياتى وسلامتك الف سلامة

عالم ماريونت يقول...

ههههههههههههه
من انت؟
انا انجي؟
ههههههههههههههههههههههههههههه
والله اجابة مقنعة جدا جدا ازاي مجتش في بالي
قال وانا اللي قعدت اكتب ساعة في السؤال ده؟؟؟؟
بجد انتي دمك زي الشربات
اقولك حاجة؟
بجد حسيت انك قريبة جدا مني خصوصا في السؤال بتاع السعادة ده
ربنا يكرمك انا بجد كتير كنت بحس اني نادرة الحدوث وان النوع ده مش بينزل منه كتير
بس الحمد لله لقيت زيي اهو
ربنا يقدرك وتحققي كل احلامك وتعرفي تطلعي من مود الوحدة ده
وميرسي ليكي بجد فرحت اوي بالكلام اللي كتبتيه عن البوست بتاعي
بس انتي لية مكملتيش باقي التيجان؟
ها لية؟
كل سنة وانتي طيبة
اختك رنا

نعكشة يقول...

انا عايزة السبع حاجات اللي عايزة تعمليهم اعمليهملي معاكي
:D

بس السبع حاجات التانين مليش دعوة
انا كمان تاعبة مامتشي معايا
مش عارفة لية
مع ان مفروض البنات دول تبقي شخصيات مريحة
يلا

ربنا يستر


ربنا يا رب يهدي سرك
و يكرمك
و يرضى عنك و يرضيكي
و يدخل في قلبك السكينة و الطمأنينة
آمين

سلام عليكي

هانى المصرى يقول...

بوست حلو وتاج يحمل كميه كبيره من الصدق .
كل سنه وانتى طيبه يا انجى

غروب يقول...

عسل والله يخرب بيت عقلك

انا اول مره اخد تاكسي واجى هنا ...

اجاباتك عسوله اوى فكرتينى بنفسي ف شويه حجات ..
اولا عندى برد انا كمان

ثانيا مره دكتور بيقولى اسمك ايه قلت ساره وسكت وهو كان بيملى استماره تقريبا ههههههههه قالي هو سيادتك احمد زويل؟ ههههههههههههههه

ثالثاانا كمان اداب بس انجليش وكنت بموت ف علم النفس

اما بقه الكلمات اللى بتكرريها كتير فضلت اضحك عليها اووووووى خصوصا حكايه زفته الطين هههههههههههههه

بقولها احيانا بس انا بقول اكتر الهبابه ههههههههههههه

ضحكتينى اوى

اتمنى اشوفك عندى خورى تاكسي

باى

mregypt7 يقول...

السلام عليكم
الف سلامه على البرد اللى عندك ده
بصى امسكى ليمونه واعصريها فى انفك
ومعاها شويه سكر وتسيبهم يختلطوا مع بعض حتى يتم التفاعل وبعد كده ما تبقيش تدع عليا ههههههههههه
اجاباتك حيلوه اوى
بس عندى سؤال كده
انتوا ليه اى بنات حواء بتعيطوا لما بتزعلوا اوى حاجه غريبه فعلا
ربنا يوفقك وتحققى احلامك اللى ماعرفتيش تعمليها ايون اللى تتكتب فى مجلدات
تحياتى
بيبــــــــو

صوت من مصر يقول...

يا انجى احلى ما فى التاجين دمك الخفيف بجد والبرد قرب يدخل موسوعه عالميه مع انى بعيد عنه لانى واخد وقايه مرعبه دوره شمس فى شهر سبعه فى الصحراء مكان شغلى يعنى ؟
تاج لذيذ

SHAPE YOUR LIFE (ABOALI) يقول...

تاجات وتاج
يلاه كله محتاج
تغير ساعات نحبه كتير
اهو نففض ونطير
شويه يقولوا عصافير
وشوية يقولوا صراصير
ماشى اهو نعمل ايه فى البنى ادمين
بس صبح صبح
احنا احلى الحلوين

تحياتى
اجابات على الطاير حاجة ساقعة لب حاجة ساقعة

oRiGiNaL HeArT يقول...

اولا الف سلامة عليكى
ثانيا كل سنة وانتى طيبة
وبعدين بقى اجابات التاجات بتاعتك حلوة اوى
في حاجات كتير من اللى قولتياه فى التاج الاول فيا
بس شكلك عصبية شوية
:)

حمادة زيدان يقول...

ألف سلامة عليكي يا بنوتة

اجابتك يا بنوتة جميلة ... وكمان ربنا يحققلك امنياتك كلها وتصلحي الكمبيوتر لأني كرهته جداً بردوا


ياللا سلام ومن غير خناق بقي

blue-wave يقول...

الف سلامه عليكى من دور البرد
مش كنتى تقولى طيب؟:))
واجاباتك بجد حلوة
على فكرة انا زيك فى حاجتين
معرفش اتعامل مع الفيس بوك
وعندى لازمة ياراجل:))
كل سنه وانتى منورانا

حدوته مصرية يقول...

ربنا معاكي و يوفقك تعملى كل اللى نفسك فيه و متبقيش حاسة انك وحيدة ابدا

تحياتي

كوارث يقول...

تحيا مصر
اجابات زي الفل وواضح منها انك صريحة يا انجي
ايه الجمودية ده !
انتي شكلك من أتباع مذهبي
طارق
الوغد

Mona Shereif يقول...

تعرفى انى بحب التاجات بتاعتك اوى
مش عارفه ليه؟

الف سلامة عليكى يا جميل من البرد
وكل سنة وانتى بألف خير
ربنا يحقق احلامك كلها امييييييين يارب
عجز لسانى عن شكرك لسؤالك عن شغلى
ربنا ما يحرمنى منك ويبارك فيكى

Foxology يقول...

كلام جميل كلام معقول مقدرش اقول حاجة عنه :))

كل سنة وانتى طيبة :)

elsha3er يقول...

يرجى انا تشاركونا فى مدونتكم

مدونى الاسكندرية

www.firstway1.blogspot.com

احمد الشاعر

engy يقول...

بجد اجابات تدل على شخصيه رائعه فعلا
باهنيكى عليها
ربنا يوفقك ان شاء الله
سلام

كراكيب يقول...

ايه ده هو البوست خلص بسرعه كدة ليه
ايه ده ايه ده ايه الكروتة دي

جوجاااااا
عسل يا خواتي عااسااااااال

على فكرة انا كمان عندي برد
وصوتي اعوذ بالله حاجة تقرف

:) مستنية بوستك الجاي جدا اوي خالص
والف سلامة عليكي يا جوجا

miro el niro kwaniro

أحمد بكر يقول...

ازيك يا انوج
عملتى ايه فى العيد
عسل يا انوج فى شخصيتك و يا رب تصلحى الكمبيوتر

كيكى عوووووو يقول...

انا مضايقة
بس حبيت اقولك قبل ما انام
انك واحشنى اوووووووووووووى
اوووووووووووووووووووووووى
سلام ياغالية
عوووووووووووووووووووووووووو

ojg يقول...

ممممم
ايه الكلام الكبير ده
:))
انا كمان بحب دكتور خالد توفيق قوي
وبحب موبايلي واي حاجه اعيش معاها
عشرية بشكل يغيظ
ومعظم امانيكي عندي
ما تيجي نحققهم شركة
:))

غير معرف يقول...

يا ريت يا انجي ما تزعليش وما تحذفيش الكومنت
انتي اسلوبك مش حلو ، ده رأيي

غير معرف يقول...

الأخت صاحبة المدونه
تحيه طيبه
ندعوك للأشتراك انت وزوار مدونتك فى برنامجنا الأذاعى وهو اول برنامج عن النت والمدونات فى الشرق الأوسط ويذاع من الأذاعه الرئيسيه لمصر ...ندعوك للأشتراك بان تزور مدونتنا وموقعنا لتعرف كافة التفاصيل
المدونه
http://netonradio.blogspot.com
الموقع
http://dear.to/cairo

sanboool يقول...

انا مش فاهم حاجه
انتي بجد كان شكلك عندك برد وانتي بتكتبيها
هههههههههههه
ولا ممكن دا برنامج احلي 7 الساعه 7
بهزر طبعا
المهم انه كان عيد حلو وانا اتفسحت وجبت هدوم كتييييييير وسافرت و 100 %

Unknown يقول...

رد خاص مخصوص محفوف بالغلاوة و ملفوف ببوكيه ورد كله ورد احمر و مرشوش عليه برفان غالى و جواه كارت لتعليق الاخ غير معرف: انت حر فى رايك مستحيل امسح الكومنت بالعكس بالعكس بالعكس انت تنور فى اى وقت حضرتك واسلوبى هحاول اعدله واغير فيه بس كنت هبقى شاكرة قوى لو قلت لى العيوب بالظبط بالظبط عشان اتلافاها بعد كدة..........
اخيرا شكرا على الوقت اللى منحته لى فى محاولة النقد مستنياك على طول

Unknown يقول...

نسيت اسالك انت مش حاطط اسمك ليه يا غير معرف؟؟؟ انت شخصية شجاعة المفروض تتحمل رايك بشجاعة وللا ايييييييه

شفـقــة و إحســــان يقول...

انتى فين يا جىجى وحشتينا اوى
وبرافو عليكى اجاباتك جميلة

EMMY BABY يقول...

ايام سورى بجد يانجى انا عارفة انى اتاخرت فى الرد جامد انا فعلا قريته قبل كدة وملحقتش ارد عليه لما الاقيه من معاناة من الكمبيوتر هههههههههه

بداية الف سلامة عليكى وانا كمان عندى برد عدتينى

بجد اجابتك حلوة اوى

ضحكتنى اوى بتاعة جزم هم دى ههههههههههه

ربنا يحققلك كل احلامك يارب

ردك على غير معرف جميل اوى بس لعلمك الاسلوب يدى بنت ماعلينا

تسلم ايدك وعقبال ماتتوجى بتاج حقيقى يوم شبكتك يارب

تحياتى

ايمى

Unknown يقول...

ليكوريا:سلامتك من البرد دة اختراع بايخ قوى والله شكرا على رايك فى الاجابات............


ميرو انتكة: الله يسلمك واذا كان على الصراحة حلوة وبموووووووووووت فى سلامة سلامة..........


mohamed ghalia:شكرا على رايك وشكرا على الدعوة الحلوة.........


mina:يارب والله يسلمك شكرا........


miss/gh:سلامتك الف سلامة وانت طيبة....


romansy:يللا بالمرة بقى وشكرا على رايك..............


كيارا:ربنا يخليكى ويارب وانت طيبة واهو انت اللى قمر.............


الازهرى:ربنا يخليك شكرا.........


princess:شنيع البرد بس والله انت عسل ربنا يخليكى............

Unknown يقول...

يوميات نا ئمة فى الارياف: رنا ازيك بس ايه رايك فى الاجابة المقنعة لا وايه مفيهاش اى كذب بخصوص السعادة ربنا يفرجها يارب بس انت فعلا نادرة الحدوث حاجة كدة لذيذة وتتحب المهم كلامى عن البوست بتاعك دة انا اقصده فعلا ولسة الموضوع بردو مش طالع من دماغى.. شكرا على رايك والدعوة.........



نعكشة:اوك خلاص نعملهم سوا والسبع حاجات التانيين مش مهم ابقى اشيلهم لوحدى البنات مريحين؟؟؟ ماشى المهم شكرا على الدعوة...........


هانى علوان:شكرا وانت طيب يارب.......


saso:طب الحمد لله انك ضحكتى يا سارة وبعدين ازاى الراجل بتاع الاستمارة مش عارفك يعنى؟المهم مين اللى هيحاسب على التاكسى...........


mregypt:حاضر سيادتك هبقى اعمل كدة بالظبط بالظبط وادعى عليك........


صوت من مصر:والله انت اللى دمك خفيف والبرد دخل الموسوعة خلاص وربنا يقويك فى شغلك..............


aboali:هات لى معاك واحد بيبسى......

شفـقــة و إحســــان يقول...

مبروك يا قمر
بس بجد انتى وحشتينا اوى اوى

Unknown يقول...

original heart:اولا الله يسلمك ثانيا وانت طيب ثالثا شكرا جدا........


حمادة زيدان:ربنا يخليك انت زهقت بردو اومال انا اعمل اييييييييه........


blue wave:الله يسلمك اقول ايه يا عم انت دكتور يعنى دوا بقى واكل مسلوق لا خلينا اصحاب من بعيد لبعيد.. مش بتعرف تتعامل مع الفيس بوك؟يا راجل؟..............


محمد ياسر:ايه الدعوات الحلوة دى يا باشمهندس بس شكرا والله.........


كوارث:تحيا مصر طارق بيه بس متجيبش سيرة المذاهب هنا ولا الاوغاد كمان احنا ماشيين جنب الحيط حاسب بقى........


sometimes:ربنا يخليكى يارب يارب يارب وانا بقى اللى مش عارفة ارد دلوقتى.........

Nabil يقول...

الف سلامه من البرد

واجابات تلقائيه وجميله

ويارب تحققى احلامك انت.

تحياتى

الازهرى يقول...

العزيزة انجى

يبدوا ان كل حاجة عندك take away

ما علينا
المهم عند وضع تعليق عندى يكون بالراحة لانى مفيش نفس

تحياتى

كيكى عوووووو يقول...

عاملة اية النهاردة؟
يااارب تكونى بخير وبصحة
كان نفسى اكلمك على الميل واطمن عليكى بس معلش الوندز راح
وراح معاة الياهو
اهى اهى
المهم...فكك يابت مش انا معاكى
بجد وحشانى كتيرررررررررررررررررررر
اموااااااااااااااااااااة
عوووووووووووووووووووووو

Unknown يقول...

لا بجد اجاباتك جميلة ومميزة

وانا موافقك ف احلى حته اللى هيا المنشية بجد تحسى انك ف اسكندرية


معلش التأخير



تحياتى

غير معرف يقول...

دكتورة

تصدقى التاجات دى دمها خفيف


اجاباتك نموذجية

بس والنبى بلاش تقديم المبتدأ على الخبر من غير سبب دى وحشةفى اللغة

ربنا يحققلك كل احلامك يارب

تحياتى

ليكى فترة مزرتنيش

aboud يقول...

الف سلامة عليك متوقعتش ابدا ان انت كمان عندك برد زيى بس ده واضح ان مصر كلهاكده
فى رايى ان التاج شىء كويس لانه بيخلى الاخرين يعرفوك و يفهموا شخصيتك وبالتالى كتاباتك كمان
واحلى حاجة فى اجاباتك الصراحة
بالنسبة لانك تمسكى اعصابك فده بيجى مع القرب من ربنا لانك بتكونى مستقرة داخليا اوى و بالتالى هينعكس على انفعالاتك
كمان لازم تشيلى (زفتة الطين )ددى من حياتك
بجد صعبة اوى خاصة لما تبقى من غير لازمة وكمان بتخسري حسناتك بيها
اروح الحق اقرا البوست اللى فاتنى واعلق عليه

mohamed ghalia يقول...

لازلنا فى انتظار جديدك
تقبلى تحياتى

Unknown يقول...

foxology:تعليق جميل تعليق معقول مقدرش اقول حاجة عنه..............


engy:والله انت اللى رائعة وانا متشكرة جدا............


كركيب:ميرو النيرو كوانيرو مقدرش ارد على الكلام الحلو دة غير بكلمة شكرا وقال يعنى مكسوفة............


بيكر:انا نمت فى العيد وشكرا على تعليقك..............


كيكى:موبايلات بقى..........


ojg:اوك موافقة على الشركة بس العقد يبقى باسمى..........


sanboooooooool:هو احلى سبعة الساعة سبعة فعلا بس هم مين السبعة المهم كل سنة وانت طيب............


شفقة هانم واحسان بك:انا موجودة وشكرا على السؤال...........


nabil:الله يسلمك وشكرا على تعليقك....

Unknown يقول...

الازهرى:والله ما فاهمة حاجة.......


كيكى:حبيبتى اكيد اطمنتى دلوقتى.....


المبرمج المحترف:المنشية دى عشقى وبعدين كدة تبقى اسكندرانى طحن.......


المحارب المتيم:علم وينفذ.........



aboud:يا اهلا يا اهلا انت اكيد عندك حق فى كل كلمة بس بالنسبة لزفت الطين انا مش بيبقى قصدى اشتم على فكرة.............

momken يقول...

ردودك حلوة
تنفعى رئيسه وزاره او سفيره

كلامك حلو ودبلوماسى اوى

ودمك خفيف

تحياتى