الثلاثاء، 30 ديسمبر، 2008

فرض عين

تحديث:اجتياح غزة البرى بدأ واسرائيل طالبة تعزيز للقوات وغزة مفيهاش نور ولا ادوية ولا بطاطين ولا اى حاجة ادمية .... معتز الدمرداش فى برنامج تسعين دقيقة استضاف زوجة الضابط ياسر اللى استشهد على الحدود برصاص فلسطينى الناس فى بلدنا عاطفيين وهتصعب عليهم الست دى ومش هيتبرعوا ياريت يا ريت اللى فاهم اللى فيها واللى فاهمين ان دة تشتيت لمشاعر الشعب يفهم اللى مش فاهمين والنبى يا جدعان لموا فلوس وروحوا اتبرعوا حرام كدة والله....صعبان علية العيال اللى بيموتوا حراااااااااام بقى روحوا اتبرعوا بقى عايزين ايه اكتر من كدة.
غزة تم قصفها............. غزة تم سحقها................. غزة تم ضربها........
عادى على فكرة ولا كان فارق معايا خالص كل يوم غزة بيحصل فيها بلاوى..وبعدين انا مقتنعة ان احنا عندنا كوارث كتير وحياتنا صعبة ومحتلين مننا فينا كدة عندنا اكتفاء ذاتى من الاحتلال...
احنا عايشين مأساة وعندنا ناس كتيييييييييييييييييييييييير مش لاقية تاكل وعيال بالهبل نايمين فى الشوارع..مش مع الناس اللى مخليين غزة هى القضية العربية الوحيدة..ولحد يوم الجمعة كنت شايفة انها واخدة اكبر من حجمها..قضية اكل عيش يعنى..اهى مادة للحوار كل واحد يستعرض فيها وطنيته واحساسه الجارف بقوميته العربية وثقافته ومدى المامه بالاحداث الجارية ....فرصة حلوة اوى ان كل واحد يبرهن انه بيتفرج على منى الشاذلى فى العاشرة مساء وكمان معتز الدمرداش فى تسعين دقيقة وانه متابع مجريات الاحداث وتطورات الموقف الراهن...
بس المرة دى غزة بتباد..مش تعاطفا مع اهل غزة تحديدا لكن تعاطفا مع الانسانية نفسها لازم تتكلم..لازم تعمل اى حاجة..على الاقل لازم تتأثر يعنى اضعف الايمان..
طب واحدة زيي انا تعمل ايه؟؟؟؟
انا كنت مستغربة جدا ان الناس بتموت وانا بهرج وعايشة حياتى..بس عادى يعنى الفلسطينيين بيموتوا بسرعة واحنا بنموت ببطء..عادى يعنى احنا زيهم بالظبط عندنا مأساة مسماة مجازا حياة..
بس بعد شوية عرفت بقى حجم المأساة عرفت ان فى ناس بتموت فى الشوارع دة عادى فى غزة بس اللى مش عادى انهم ميموتوش ويتعذبوا..اللى مش عادى ان يبقى فى بنت مرمية تحت جدار بيتها بتصرخ عشان يخرجوها..جدار البيت واقع عليها بتتوجع وهى حية لسة مماتتش الافضل لها انها تموت على الاقل الموت معتاد ومعروف وواضح لكن التعذيب دة هو اللى مش آدمى بالمرة...
اللى مش آدمى اكتر انى اتفرج واقوم اسمع تامر حسنى عشان نفسيتى ترتاح...
أنا بقى قررت قرار بطولى جدا..قررت انى اجمع تبرعات للناس اللى مش لاقية اكل ولا شرب ولا علاج ولا أكفان حتى..قلت هأجمع تبرعات من زمايلى فى الكلية ومن أصحابى و من أهلى..كمان قلت انى هأقول لاصحابى المدونين اللى اعرفهم من العالم الافتراضى بس هم بقوا أشخاص حقيقيين فى حياتى..اصحابى دول بجد مش معارف كدة وجودهم زى قلته..كنت متخيلة انى هلاقى تشجيع وناس تقوللى آه صح موافقين بدل المظاهرات والتنديد بموقف الحكومة اللى احنا مالناش يد فيه..انا مش عايزة من الحكومة تعلن الحرب ومش عايزة اروح احارب ومش عايزة اعمل مظاهرات ...انا عايزة اعمل الصح فى ناس بتتعذب ممكن اخفف عذابهم بفلوس قليلة ...
انا عارفة ان الفلسطينيين مش اطيب شعب ولا هم هيعترفوا بالجميل ولا كمان عايزاهم يبوسوا ايدينا...
عارفة ان الضابط ياسر اللى اتقتل على الحدود قتلته المقاومة الفلسطينية...
عارفة ان فلسطين فيها بدل صراع فلسطينى اسرائيلى صراع فلسطينى فلسطينى على السلطة..
عارفة ان عندهم بلاوى اخلاقية كتير..
بس دة ميمنعنيش انى ارضى انسانيتى واعمل حاجة للناس اللى بيتعذبوا قبل ما يموتوا..
اتفاجأت بردود فعل غريبة من عينة (اه اصلك بنت بقى وعاطفية وكدة)......أو مثلا (الاقربون اولى بالمعروف)
انا اتفاجأت بجد ...اتفاجأت جدا والله...واتصدمت..اه حرية شخصية..اه الحياة اولويات...اه كل واحد له وجهة نظره...اه كل واحد حر........
بس مش قادرة ابطل استغراب للاسف...مش مهم على فكرة.
هلم فلوس أنا...مش كتير بس فلوس وخلاص..وهروح اتبرع بيها..
التبرع لضحايا غزة بيبقى اما فى جمعية الهلال الاحمر او فى حساب جمعية الهلال الاحمر فى اى فرع من فروع بنك مصر...
على فكرة المفتى قال ان فى الظروف دى غزة أولى من أى حاجة تانية بالفلوس بتاعتناو ان دة فرض عين....
خمسة جنيه مش هتأثر معاك ممكن بدل كيس الشيبسى والكانز تتبرع بيهم...كل واحد حر جدا اتبرعوا او متتبرعوش هم كدة كدة هيموتوا.

هناك 39 تعليقًا:

كيكى يقول...

فعلااااااااا..جبتى من الاخر!!!!!
وانا بعد قرارك دة قرارت انى هشيل مؤقتا الطرحة من على النسر
مادام فى ناس زيك كدة..بتفكر بالشكل دة**ومش عقليات عقيمة متخلفة بتقول: اصلاهم طبعهم زفت اصلاهم بيدبحوا فى بعض ويشوف بلاويهم الاول..الخ الخ**
******************************
ملحوظة فى السريع الظابط الى اتقتل على الحدود كان فى ضرب نارى متبادل بين الطرفين بين المصريين وبين الفلسطنين..همة كانوا عايزين يهربوا من النار والصواريخ مش اقتحام ولا حاجة وعلى فكرة احنا كمان ضربنا عليهم مش همة بس وفى منهم ناس وقعت برضة..**وكمان المعبر فتحوا بعد فترة وكان فى مساعدات كتير جت من برة واحنا قفلين المعبر**احنا كمان مشتركين فى الى حصل
*********************************
برافو عليكة وعلى تفكيرك وعلى ايجابيتك
خلص الكلااااااااااااااااااام
عووووووووووووووووووووووووووو

نعكشة يقول...

انا من وجهة اعتقادي المتخلفة الداخلية

لو فتحوا باب التطوع هروح هناك
ماشي أأجل سنة
ولا حتى اموت هناك

بس هبقى عملت حاجة في حياتي
..........

الناس دية مش ناقدين العهد بس
دول مش ناس
دول مش عارفة اية وصفهم

انا برغم اني هبقى زي دكتورة يعني
لما بشوف حد بيتألم بتضايق
حاول اعمل اي حاجة عشان ميتألمش
اية دة
لما يشوفوا ناس بيحصلهم كدة خلاص بقة عادي
........

انا لما اتصلت بصحبتي هناك حد من اهلها كان اتصاب
مبقتش عارفة اقولها اية
ربنا يصبرهم بجد

..........


ماشي احنا في بيتنا دلوقتي
برغم كترة السرقات و الامن و البطيخ
بس الواحد ات ليست امن في بيته
هما لأ

تبقي قاعدة في امان الله تلاقي البيت اتهد

..........

اعتقد ان فيه حملة عندنا في الكلية للتبرع بالدم

ان شاء الله هروح

........

اللي بيحصل دة لا يمت للآدمية بصلة

بس صحيح بالمناسبة انا معرفتش الموضوع من العاشرة مساءً ( مبتفرجش عليها اصلا) ولا تسعين دكيكة

و برضو كنت زيك عادي يعني

لما بيجي فرصة كل حين و مين بدعي للمسلمين في كل مكان

مش حياتي غزة يعني

بس انا كان ممكن ابقى بدلهم دلوقتي

بس ربنا حطني في مكاني دة لحكمة

اية هيا
الله اعلم

انا رغيت كتير

عامتاً

ربنا ينصرهم و يوحد شملنا

آمين

سلام عليكِ

كراكيب يقول...

حححححححححححححححححححححححححح
"تنهيدة طويلة عريضة"
اقرا بوست زي ده وجنبي تليفزيون بيذيع اخر الاخبار واخر عدد للشهداء والجرحى
احساس بإن اللي ميت ده اخويا او ابويا او حتى معرفة من بعيد
مواطن غزاوي طالب في الثانوية العامة الصاروخ جيه عليه طير رجليه بيسأل ايه ذنبه في الحياة علشان يتعذب كدة

لسه جاية من عند نقابة الاطباء او كنت بحاول اوصلها
مكان للتبرع بالدم بالفلوس بأي حاجة ممكن تقدمها للشعب ده وافاجأ بجيش من قوات الأمن رافضة انها تدخل حد الشارع حتى مش النقابة كمان
والرد عايزين تتبرعوا يبقى الصبح بدري

احساس بالعجز والتقييد قدام التليفزيون واخباره وقدام ضحايا مسلمين مش عارفة تعملي علشانهم حاجة وقدام حكومات عربية ساكتة حاطة في بقها وف قلبها كوتشي باتا وبتتنفس غاز مسموم بيصدروه لاسرائيل علشان يضربوا بيه ابرياء مش عارفين حتى نتبرعلهم

البقاء لله على المسلمين العايشين قبل الميتين

آلام وآمال يقول...

احترامي وتقديري لعقليتك المتوازنة

سعيد بالمرور على مدونتك القيمة

محمود محمد حسن يقول...

بصي يا انجي بصفتي واحد من الناس المتخلفين اللي قالت عليهم كيكي ، احب اوضح حاجة مهمة ،

فيه مسلمين بيموتوا كل يوم في الصومال وفي أقليم اوجادين من الجوع، حد من الناس اللي متنحررين هنا او في اي حتة تانية فكر يعمل ليهم حاجة ؟؟؟!!!!اساسا اساسا حد سمع عن اقليم اوجادين ؟؟؟!! ما اعتقدش ان حد يعرف حاجة اسمها مأساة المسلمين في اوجادين او في اقاليم افريقية تانية بيعاني فيها المسلمين والإنسان عموماً

ليه علشان غزة هي قضية سخنة وملهلبة وفيها مظاهرات وكله بيسترزق من السبوبة دي،

لما كنت في الجامعة وكنت طالب في الإخوان ايامها وكنت عضو في اللجنة الإعلامية بتاعة إخوان الجامعة، وعضو فاعل ونشيط كمان ، كنا نعمل مظاهرة ونروح نصورها ونوديها قناة الجزيرة كانوا يسألونا يقولوا لنا فيه ضرب ؟؟!! طيب فيه مصادمات مع الشرطة ؟؟ ، نقوله لأ ، يقوم واخد مننا الشريط كده وخلاص ، وما يجيش اي خبر عن الموضوع في القناة

الإعلام لا يبحث عن القضية الإنسانية بقدر ما يبحث عن سخونة الحدث وتجدده وقدرته كل يوم على جلب المزيد من مصمصة الشفاة، واسترعاء نظر المشاهد باحداث ساخنة طاحنة ، مما يزيد عدد المشاهدين ويزيد بالتالي تسعيرة الإعلانات وعددها

والمعارضة بكافة انواعها إسلامية قومية ملوخية تريد ان تخفي عجزها عن الدفاع عن القضايا الوطنية بالتحرك على وتيرة فلسطين ، والحكومة علشان مش عايزاهم يتكلموا على القضايا الداخلية بتسيب لهم نص مسافة، منهم يتحركوا في حدود ، ومنهم ما يتعودوش على كده، يقفوا قدام الجوامع ، قدام نقابة الصحفيين ، جوه الجامعة، لكن لما التحرك بيزيد عن حده بتوقفه،

والإخوان بيحركوا الموضوع اكتر علشان حماس فرع من الإخوان وفي التعاطف مع حماس تعاطف مع الإخوان، ولما صبيي يبقى معلم ، ابقى انا معلم المعلمين ، تمام؟؟!!

وسوريا بتحرك المتظاهرين قدام السفارة المصرية في دمشق علشان الأسد متعارك مع مبارك وشاتمين بعض من ايام ازمة لبنان،

انا عايز اقول للناس الهمامة النشيطة هنا اللي بتقول اتبرعوا واتحركوا ، انا موافق معاكم تماما تماما اننا مع الإنسان في معاناته في اي مكان، ومع اخوانك في العروبة وفي الأسلام بصفة اخص ، لأن دول اقرب ليك ودول اخواتك، لكن انا عايز اسأل سؤال، في انهيار الدويقة حد فكر يلم تبرعات لناس اتشردت ومرميين في الشوارع ، ؟؟ أنا ما سمعتش صراحة، طيب حد قال يا جدعان نلملهم نجيب لهم خيام وبطاطين بدل ما هما مرميين في الشارع كده ؟؟! طيب ما حدش ليه فكر اساسا اساسا يلملهم تبرعات وهما طول عمرهم عايشين في بيوت من صفيح وفي وسط زبالة وحاجة تقرف ؟؟؟علشان يبعدوا من تحت الجبل ويعيشوا في حتة تانية ؟؟؟

طيب بلاش ، ليه محدش عمل مظاهرات لما الف بني آدم ماتوا في لحظة واحدة في العبارة ؟؟؟ ، يا جدعان تحرك الشعب المصري في موضوع العبارة ده مخزي لدرجة مخيفة ، الف واحد ماتوا والناس كانت خارجة تهلل فرحانة اننا كسبنا كوت دي فوار وخدنا كاس افريقيا، آآآه يا شعب لا مؤاخذة واطي الف واحد ماتوا منه وهوا خارج بالشوارع بالملايين علشان يهلل علشان كسب كاس افريقيا

بلاش المبيدات المسرطنة قضية لو حصلت في اكثر بلاد العالم تخلفاً لقامت الدنيا ولم تقعد ، انا مرة قريت ان المبيدات المسرطنة دي فيه افتراضات إن عدد ضحايها قد يصل إلى مليون فرد، يا نهار اسود ، يعني قد غزة كلها اللي الكل بيتكلم عليها النهاردة ، مليون واحد حيموتوا بالسرطان بسبب فساد الحكومة ، ومفيش واحد قال بم من الشعب ده ، حد يقولي ايه موقف السادة المدونين والمعارضين والمتظاهرين والإخوانيين والقومجيين من المبيدات المسرطنة، ما بتتكلموش عليها ليه يا سيدات يا سادة ؟؟

خلينا ناخد كيكي اللي قالت علينا متخلفين ، يا كيكي عملتي ايه لضحايا المبيدات المسرطنة ؟؟ مليون واحد يا كيكي ؟؟ فكرتي فيهم حتى ؟؟؟!!! تعرفي اساسا ان فيه حاجة اسمها مبيدات مسرطنة ؟؟

يا جدعااااااان انتم بتداروا ضعفكم في غزة ، غزة انا مسميها مولد ، مولد سيدي غزة ، الكل بيسترزق على قفاه ، الحكومة ، المعارضة ، الإخوان ، حماس ، فتح ، الإعلام ،

لتاني مرة بقولها ، قدامكم حدود مفتووووحة في الصومال في اريتريا في اقاليم كتير في افريقيا زي اوجادين وغيرها ، بتقول يا مين يساعدنا يا خلق هوووه ، يا بشر يا ناس ، محدش اتحرك ليه ؟؟ عندكم ناس مصريين بالهبل عايشين في المزابل ، في بيوت صفيح ، تحت صخرة في جبل ممكن ينهار عليهم في اي وقت ، ومفيش حدود ولا معبر ، روحوا اتحركوا ، اتنحرروا ، مفيش قدامكم حجج ،

بأكد انا مش ضد التبرع لغزة ، مش ضد التبرع لأي إنسان بيعاني في اي مكان، لكن انا شايف إن الإنشغال بقضية غزة وفلسطين إنشغال مبالغ فيه من ناس اساسا اساسا ما بتنشغلش بقضاياها، إنشغال مسيس بسياسة قذرة، لعبة توازنات سياسية مقرفة، واجندات وسبوبات واسترزاقات،

انا مش ضد الإهتمام بقضايا غزة ، لكن انا فعلا بتعجب من الناس اللي عندها خراج في ايديها ، وورم خبيث في مخها ، ورايحة تعالج الخراج ومنشغلة بيه تماما عن الورم الخبيث اللي في مخها

معلهش انا عارف الكلام مش مرتب ، ومش منظم بس انا منفوخ شوية والوقت اتأخر وعايز انام

OPTIMESTIC يقول...

انوج ... جدعة ايتها الفتاه
على فكرةو عندنا في بنوتة بتعمل زيك كدة وكلنا بنساعده ... محدش قاللها حاجة او ضايقها
برافو انك اخترتي اللطريق الاوقع ..
:)
go on

enjy يقول...

محمود محمد حسن:أولا انت متعصب ليه؟؟؟
ثانيا:لو الاعلام عارفين ان فى حاجة اسمها اقليم اوجادين الناس كانوا اتبرعوالها من زمان....فى الصومال فى كارثة واحنا عارفينها واللى بيقدر يساعد بيساعد بس المشاكل اللى بتبقى مدى الحياة الطبيعى انها بتاخد وقت وتنطفى....عشان كدة انا معاك ان قضية فلسطين ميفعش نهتف لها طول الوقت بس لما حاجة غريبة وجديدة ومؤلمة تحصل يبقى لا فى حاجة بقى...فى ناس بتتقتل زى بتوع الصومال بالظبط بالظبط بس تفتكر بقى ان لو احنا مش بنعبر الصومال و اقليم اوجادين يبقى بقى بالتبعية منعبرش الفلسطينيين صح؟؟؟
وللا نعبرهم ونسمم بدن اللى مش فاهمين كويس؟ وللا مثلا تفتكر نتبرع وبعدين نقول لا احنا المفروض نتبرع لاقليم اوجادين؟؟
بالنسبة بقى لتسييس القضية انا مش فاهماك يعنى المقصود انك تقوللى فوقى القضية متسيسة؟؟ قديمة......عارفين وعارفين ان الاخوان مولعينها وانا لما اتبرع مش هروح ادى الفلوس للاخوان يوصلوها مش قلة ثقة فيهم بس عشان ميستاهلوش الصورة الاعلامية البراقة اللى هم بارعين اوى فى رسمها ماشاء الله...الشعب غير الحكومة يا محمود و الا بقى يبقى احنا ناس زبالة واطيين زى حكومتنا....حادثة الدويقة على فكرة فى ناس كتير اتبرعوالهم انت مسمعتش قضيتك بقى انا مالى....الناس اللى ساكنين فى مزابل حضرتك مينفعش نقول هيا بنا نعمل رحلة ونصلحلهم حياتهم كل اللى بنقدر عليه صدقة او زكاة ليييييييييييييييه؟؟؟ عشان محتاجين نظام كامل يقنن العملية سيادتك وتبرعنا لغزة مقنن وفى جهة محترمة هتقوم بيه يبقى ليه لا؟؟؟
مستغربة من تاكيدك انك مش ممانع تتبرع طب لما انت مش ممانع زعلان ليه؟؟؟
طب انت ازاى مش ممانع هو انت حليت مشكلة اقليم اوجادين؟؟ طب ما هم كمان محتاجين معونات..هتتبرع ازاى لغزة وتسيبهم؟؟ طب ازاى طيب؟؟ كيكى يا محمود قالت رايها هى رايها بقى ان اللى يقول التبرع تهييص واسترزاق يبقى بنى ادم مش صح دة رايها زى بالظبط رايك اللى بيقول اننا واطيين....انا مش فاهمة تعصبك ضدى مع انك عارف كويس جدا موقفى السياسى من الاخوان وعارف بردو رايي فى قضية غزة ولو مش عارف انا قلت فى البوست عيانا بيانا بس واضح انك كنت قافش....عموما متشكرة على الدعم النفسى الرهيب دة فعلا كنت محتاجاه ومش عارفة من غيرك كنت هعمل ايه الحقيقة...التعليق دة طبعا هتقراه بعد ما تصحى من النوم بس بردو يا سيدى احلام سعيدة انا مش بزعل من اختلاف الاراء حتى لو كان دعم زى بتاعك دة..........شكرا..اه محمود نسيت اقوللك انى كنت بهرج لما قلت انى قررت قرار بطولى على فكرة دة مكانش سترزاق على قفا القتلى دى كانت سخرية من المبلغ اللى جمعته....شكرا تانى عشان انا المرة دى اللى عايزة انام سلام

بيكر(baker) يقول...

انجى
حالنا و ظروفنا فى كل حاجه هى هى سواء جوه او بره و ديما بفتكر اغنية مروان خورى لعبد الرحمن الابنودى الى بتقول
بنلف فى دواير و الدنيا تلف بينا و ديما ننتهى لمطرح ما ابتدينا

romansy يقول...

التفكير اننا نلم تبرعات دا كويس جدا ودا اكيد اللى بيحصل دلوقتى وكل ما اى دوله عربيه تقع بس عمر ما فى يوم حسينا اللى فى شعب عربى خايف علينا
مش عارف ليه
مع اننا احنا اللى دايما بنقف معاهم بكتير
غزه احنا اتاثرنا كتير بيها لانها فعلا تستحق ودا لان الناس اللى بتموت هناك دول دول افقر ناس هناك دول الناس اللى مش معاها فلوس انها تهرب وتسيب بلدها زى ما ناس غيرها عملت مشاريع بره فلسطين فى مصر والاردن وغيره
وبقوا عندهم ثروه طائله
احنا اتاثرنا علشان كده
مع العلم اننا نستحق اكتر منهم للفقراء اللى فى الشارع واطفال الشوارع والمستشفيات وغيره
الا ان اللى يميزنا عن فلسطين هى اللى عندنا امان مفبش حد بيهدد اطفالنا بالرصاص الحمد لله اننا عايشين

حاسوباتيه يقول...

فكره جميله ويارب تتحقق عارفه نفسي كمان نعمل كده للناس الي مش لاقيه تاكل في مصر كمان

Foxology يقول...

اللى بيتعمل لوجه الله بيفضل بجد ومش مهم بأة يبان اننا عملنا ولا سوينا المهم اننا بنعمل لربنا

شكرا على الأقتراح الجميل ده وبلاها شيبسى وكانز يومين تلاتة مش هنموت يعنى لو مكلناش شيبسى وشربنا كانز

تحياتى :)

~*§¦§ Appy §¦§*~ يقول...

احنا هنبعت خطابات يا انوش هبقى اقولك علشان تشتركى يا قمرايه ومتزعليش اعملى اللى انتى عاوزاه واللى يقولك حاجه خدى قله من عندى واضربيه بيها

تسنيم حسين يقول...

السلام عليكم ورحمة الله وبركاته

أولا حسبى الله ونعم الوكيل فى اللى وصل حلنا لكده....وبرضه احنا بسلبيتنا اللى رضينا بكده...لأن احنا مابنصلحش من أنفسنا فيبقى ازاى عايزين الإصلاح
وقد قال الله تعالى(ان الله لايغير مابقوم حتى يغيروا مابأنفسهم).....
وانا معاكى فى ان احنا لازم ندعى ونتبرع ولكن مع اصلاح انفسنا واصلاح غيرنا والعوده والرجوع الى الله.......

واما بالنسبه لمشكلاتنا اللى قاله الاستاذ محمود فهى مشكلة الحكومه نفسها لأنها استطاعت ان تزرع فينا السلبيه بشكل متقن....وكم من قائل وكم من منادى ولكن لاحياة لمن تنادى......
أسأل الله ان يعيننا على الحق وان نقول الحق ولانخاف فى الله لومة لائم....

والسلام عليكم ورحمة الله وبركاته

princess يقول...

على فكرة وجهة نظر تحترم جدا كمتن
وكملى طالما مؤمنة باللى بتعمليه
تحياتى

صوت من مصر يقول...

ايه فينك واخبارك ايه
بوست هايل والاهم انك اتعلمتى انك تنجزى وتجيبى من الاخر ؟
واهلا بعدم الخوف من جديد

NOGA ALEX يقول...

اولا:محمود محمد حسن احييييييييييك تعليقك رائع
انجي:مع ان الموضوع صغير الا انى فى فدماغى دلوقتى مية حاجة يعنى فلسطين دى لو مش بلد متناقضة كان زمانها استقلت من زمان لو ماكنش فيها واحد بيدافع على البلد وقصادة 100 بيبعو الارض مكنش الاسرائلين قدرو يستقرو فى البلد دة انا ولا مثقفة ولا زفت بس مع انى كارهة لسياسة بلدنا جد الا انى شايفة ان النقطة دى صح يعنى يبقى كويس لو فتحومعبر رفح ودخلو هنا والله كل اللى انا اعرفة ان الفلسطنين ولا عايزين يحاربو ولا زفت وان الفلسطينى اللى هيدخل مصر مش هيرجع فلسطين تانى
وده اللى اسرائيل عايزاة والله انا مش عارفة يعنى ندخلهم مصر ونطلع نحاربلهم احنا والله بلد غرييييييبة المهم ان امي يعنى لو تشوفوها وانا بقولها وجهة نظري دي وهى بتزعقلي تقولو اخوها فى فلسطين الاعلام بيعرف نقط الضعف ويدوس عليها معلش كلامى عبيط اوى مش عارفة اوصل الفكرة

كاتب مصري يقول...
أزال المؤلف هذا التعليق.
كاتب مصري يقول...
أزال المؤلف هذا التعليق.
اسماء عوني يقول...

انا مش عارفه اعمل ايه
انا نفسي اعمل حاجه
بس هي ايه
الله اعلم

حمادة زيدان يقول...

أنوج

والله عندك حق في كل كلمة

الناس شايفة بلاوي بتحصل في غزة وأطفال كل دقيقة بيموتوا وواقفين ينادوا احنا ابرياء والحمساوية وحشيين علشان بيقتلوا في الفتحاوية متناسين أن عباس نفسه مجرد خاين زيه زي مبارك ومتناسين أنه الهدنة اصلا محصلتش اللى كل الابواق المصرية بتقول عليها

فوقوا يا عالم ربنا والله هيحاسبنا على تقصيرنا

حسبي الله ونعم الوكيل

احساس لسه حى يقول...

عزيزتى

كل سنه وانت طيبه

شوفى فى ناس كتيره بتقول ليه نتبرع اغزه ومصر فيها غلابه كتير

بس اعرفى حاجه هو لما تتبرعى لغزه مش معناه انك متديش الغلابه فى مصر

وكمان الفرق بين التبرع لغزه والتبرع لاى مكان فى مصر

ان اهل غزه وحماس بيدفعوا وبيجاهدوا علشان ارضهم وارضهم دى ارض غاليه علينا جدااا

واكيد مع التبرع فيه موقف ايجابى تانى

مش معقول تبكى على اهل غزه وشهداء حماس

وتخشى مدونه كاتبتها بتهاجم غزه وحماس فى الظروف دى

وتقول تسقط حماس

انا قررت اى مدوهنه اخشها والاقى المدون معندهوش دم وبيهاجم الشهداء دول اقاطعه

واقاطع اللى يخش عنده ويشوف كلامه ويسكت عليه

مش معقول نطلب من الحكام ايجابيه واتخاذ موقف واحنا كشعب ومدونيين بنسكت على مدونيين زباله وبنرحب بيهم

تحياتى
سلام

2ragooZ يقول...

السلام عليكم
قضية انسانيه بحته .. هو ده ملخص الموضوع .. وقفل على فم كل من يتثرثر بالكلمات .. الناس اللى بتدعى ان فلسطين قضيه والناس بتسترزق منها ..باقولهم ادخل انت القضيه دى وما تسترزقش منها ... اللى بيقولوا فى حاجات تانيه اولى .. باقولهم قولوا كده لربنا .. مش لينا احنا

هو احنا ليه ماسكين فى رجلين بعض ..كل ما حد يحاول يتحرك نكتفه ونشده .. انت مش مقتنع بالقضيه الفلسطينيه ..انت حر ..سيب اللى مقتنع يتحرك ..
فى ناس بتاكل منها عيش وبتاجر بيها .. موافقين ومقرين ..والناس دى معروفه ومعروف اساليبها .. بس اخونا اللى بيموتوا زنبهم ايه ..

بيقولوا مصر متواطئه .. وبيقللوا من دور مصر .. الناس بتموووووووت ..بتدبح .. دمها بيتصفى .. واحنا لسه بنقول هاينكروا الجميل ولا هايفتكروه ..

يا جماعه لما حد بيشوف كلب خبطته عربيه فى طريق سريع ..بيصعب عليه .. واحنا هنا لسه بنفكر فى دور مصر واسم مصر ..والاخوان ..وحماس .. ما يتحرق الكل

حراااااااااام عليكوا

كملى يا انجى وربنا يعينك .. مش انتى بس اى حد يقدر يتحرك فى اى اتجاه ربنا
يعينه ..ويجازيه خير

أم التوأم والصبيه يقول...

السلام عليكم

ابنتي...

لقد أحسست في كلماتك اليأس مع اللا مبالاه...أو الفكر الغريب الذي يستحوز على الشباب هذه الأيام ...
وأنا أعلم أن الشباب في هذا له العذر مما يجد من سلبيات وصعوبات في حياته وأيضا لأنه لا يجد القدوه الصالحه قيمن حوله ....
ومعكي أن ما يحدث في بلدنا من أمور فاضت على الحد ولا تخفى غلى أحد منا ...
ولكن نحن أوجدناها بذنوبنا وضعفنا ...وأوجدها أيضا ولاتنا الذين نسوا أنهم مسئولون عنا أمام الله ....

وحل هذه الأمور في أيدينا نحن فهي بلاء علينا من ذنوبنا وعدم قربنا لله تعالى ...
قال تعالى ((ولنبلونهم بشيء من الخوف والجوع ونقص من الأموال والأنفس والثمرات وبشر الصابرين ))

فإذا أصلحنا أنفسنا كما يحب ربنا ويرضى لأصلخ الله لنا حكومتنا وكل ولاة أمورنا ...فسوء أخلاق الولاة منا وحسن أخلاقهم منا أيضا....
وهذا بأيدينا نحن لا غيرنا فلا نلومن إلا أنفسنا ..ولينظر كل منا ما النقص الذي فيه ..وما الذنب الذي يحارب به الله حتى وإن كان صغيرا ..وأكيد كل منا يعرف ذنبه ....

أما كلامك عن غزه بهذا الأسلوب الذي يحط و يسبط كل عزيمه في الشباب أو حتى الكبار فلا يصح وخصوصا على ملأ النت كما يقولون ....
لأن قضية غزه هي قضية (دين وأرض وعرض)وسنسأل عنها جميعا ..فأرض المسلمين أرض لنا جميعا ولكن ليس كما تقولين كي أرضي ضميري وإنسانيتي..وحسب ..بل هو فرض علينا جميعا ياإبنتي ..فافعليه بحب ولله حتى يتقبل الله هذا منك ...
وقد لاحظت أن من طلبتي منهم التبرع ولو بالقليل رفضوا ذلك وهذا يرجع إلى نيتك بدليل أن كثير من الناس يتبرعون بالقليل والكثير دون مطلب من أحد ....

وقد قال تعالى "وَإِنْ أَحَدٌ مِنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لا يَعْلَمُونَ"

وهذا أمر من الله تعالى بإجاره المشركين إذا استجاروا بنا فما بالنا بإجارة المسلمين ؟؟؟؟؟؟؟؟

فلنجير المسلمين في كل مكان حتى يجيرنا الله مما نحن فيه ...
أما قولك عن الإخوان المسلمين فأنا معك فأنا لم أرى عملا فعلوه يوازي شهرتهم ...


وختاما أعذريني يا ابنتي إن كان في كلامي بعض القسوه ولكن أنت مثل ابنتي ومثل كل شباب المسلمين ..
ونحن نحزن عندما نرى عندكم هذا اليأس وقلة الحيله ..وسبب هذا كله هو عدم القرب لله والأخذ بكتابه وسنة نبيه صلى الله عليه وسلم ...

صلح الله حالك أيتها الإبنه أنت وأولادي وشباب المسلمين لتكونوا عونا لها على عدوها الاخلي والخارجي ..

والسلام عليكم

enjy يقول...

أم التوأم والصبية:سلام عليكم ازيك يا طنت؟ اولا سعيدة اكيد بتشريفك هنا....ثانيا لو حضرتك شفتى فى كلامى ياس يبقى والله ياس من اللى سمعته وشفته من ردود فعل عن الموضوع مكنتش متوقعاها بالمرة فعلا مالقتش ولا راجل واحد يقف جنبى فى الموضوع دة غير واحد بس تخيلى؟ كل ما تقولى لواحد يقوللك اه انتوا بنات عشان كدة متاثرين ومش فاهمين حاجة ومبتفكروش بعقل...واحد بس اللى مقتنع تخيلى؟؟؟؟ راجعى رد محمود محمد حسن ورد نجوى وقيسى على كدة بقى....لو شفتى فى كلامى لا مبالاة يبقى لامبالاة فعلا من اى راى هيقول كدة وانا اسفة لو كان كلامى فى اى معنى محبط بالعكس والله وعلى فكرة ناس كتير بثق فيهم قالوا ان افكار الموضوع مش مترتبة وملخبط فعلا انا مقصدش انى احبط اى حد عايز يعمل حاجة مفيدة واسفة والله اذا كان دة حصل منى بدون قصد....مشاعر سلبية بقى دى عندى منها كتيييييييييير عشان انا مش شايفة اى حاجة فى حياتى ولا مستقبلى منورة او حتى ممكن انها تنور فى يوم من الايام....باقى كلامك كله موافقة عليه حرف حرف ومش زعلانة من رايك خالص على العكس انا سعيدة بجد...وخدى راحتك خالص ومنورة فعلا يعنى...سلام

شفقة هانم واحسان بك يقول...

انا متفقة معاكى فى وجهة نظرك
وعموما لو عايزة تعملى حاجة للناس دول ان شاء الله هنروح نزورهم يوم 7-1 وفى ناس كتير هتتبرع مش شرط بالمال
لو عايزة تعرفى تفاصيل اكتر روحى مدونة نهر الحب
واللينك بتاعها موجود عندنا"اوتار"

Zika يقول...

تعالي شاركي معانا في حملة ضد الاعلام الاسرائيلي الموجه
هتلاقي البوست عندي وعند آبي وعند مايكل
اليهود بيصوروا للعالم انهم مظلومين
كل سنه وانتي طيبه يا انجي
تحياتي

Nostor Azzuro يقول...

ما كل الناس عارفة انه فرض على كل مسلم الدفاع عن اخيه المسلم
بس احنا مذاكرين الدين كله ما عدا الجزء ده بس

أحمد سعيد بسيوني يقول...

عارفة ان الضابط ياسر اللى اتقتل على الحدود قتلته المقاومة الفلسطينية...

عارفة ان فلسطين فيها بدل صراع فلسطينى اسرائيلى صراع فلسطينى فلسطينى على السلطة..

عارفة ان عندهم بلاوى اخلاقية كتير

***
غريبة أنا اول مرة اعرف الحاجات دي

اولا
موضوع الضابط ياسر ، توضيحه عندي على المدونة وانه توفى نتيجة اشتباك مع اطلاق نار متبادل

ثانيا
لا ارى اي تقاتل على السلطة في فلسطين
كل ما في الامر انه تم انتخاب حكومة شرعية من قبل الشعب ومن ثم انقلبت على هذه الحكومة مجموعة انقلابية من خونة وعملاء امثال دحلان وعصابته
فقامت الحكومة بما تميله عليها المسئولية في مثل هذه المواقف من اعتقالهم وطردهم

ثالثا
بلاوي اخلاقية
لا تعليق

enjy يقول...

احمد سعيد بسيونى: ليه فى اصرار غريب ان مادام الفلسطينيين فى محنة اذن هم اطيب شعب واغلب شعب وان هم ملايكة بس معندهمش جناحات هاه ليه؟؟؟؟؟
اه الضابط اتقتل فى تبادل اطلاق نيران ليه حصل اطلاق نيران اصلا؟؟؟
عشان المعبر كان مقفول وهو معندوش سلطة يدخل حد وهم لازم يدخلوا فحصل تبادل نيران.....يبقى ليه ياسر اتقتل؟؟؟ بسبب المقاومة....
الصراع الفلسطينى الفلسطينى كلنا شاهدين عليه فى الفضائيات دول كانوا بيقتلوا بعض و عندهم صراع على السلطة...عادى ليه لازم نلمع صورتهم اوى يعنى؟؟؟ احنا نقول الحقيقة...بالنسبة للبلاوى الاخلاقية فانا مقصدش بيها اكتر من الاحتقان السياسى بين القيادات واللى مودى الشعب فى داهية وعلى فكرة عندنا منه الموديل دة فى مصر هنا...مش معضلة يعنى وبعدين هو فى ايه؟؟؟ هو اى سب من الاسباب دى منعنى انى اقول اننا لازم نتبرع؟؟؟؟ انا قلت كدة؟؟؟ دة مالوش اى علاقة بالقضية الانسانية اللى انا بدافع عنها وتانى بقوللك مش لازم ابدا نأله صورة الشعب الفلسطينى عشان يبقى فى مبرر لمساعدتهم لان فى كل الاحوال دة الواجب الانسانى اللى انا بتكلم عنه...مش لازم بقى كدة ابدا اوك؟؟ سلام

مذكرات مشاغب يقول...

فعلا يا ريت كلنا نتبرع باللي نقدر عليه
بس المشكله ازاي هنوصل تبرعنا ده ليهم
اذا كان تبرعات الدول بتدخل بالعافيه
امال هيعملو ايه معانا احنا الشعب
اتفق مع وجهة نظرك بالكامل بدون اي نوع من المجامله

تحياتي

Dr Ibrahim samaha يقول...

ليس لغزة سوى الله....وحسبنا الهل ونعم الوكيل

Dr.m يقول...

السلام عليكم

رأيي إن السبب الرئيسي اللي خلى الناس ممتبرعش هو إن معظم الناس بيبصوا لموضوع غزه من منظور إنساني فقط ...وعلى هذا فكما قلت عندنا من المشاكل الإنسانيه ما يكفينا ويفيض للتوزيع ...وصرنا في حزننا من هذا الجانب (الإنساني )لا نجاوز حزن الغرب الذين يعترضون أيضا على الوضع .. وهو كل ما عليهم فعله ..لأن الإنسان مهما كن للإنسانيه من حب وتقدير فلن يفضلها على نفسه أو يخاطر بحياته من أجلها ...

إنما احنا المفروض نبص لغزه من منظور الدين والعقيده .. فالقضيه مش مسلمين بتموت وبس إنما دي أرض مقدسه لينا بتضيع ..دي حرب على ديننا ..دي خطوه من حرب على الجميع ...هو ده المنظور اللي هيخللى كل واحد مننا يفكر في ألف طريقه يساعد بيها الإسلام بمساعدته لغزه ... وأول الطرق دي العوده لله والتوبه ..كما ذكرت في البوست بتاعي عن غزه ...

تحياتي ومعذره للإطاله
سلام

المبرمج المحترف يقول...

مفيش حاجه اقدر اقولها غير

حسبى الله ونعم الوكيل

ميرو انتكة يقول...

بيرافو يا انجى بجد انتى جبتى الى جوايا

على فكرة حكاية التبرعات دى كويسة قوى احنا كمان عملناها بس للاسف اكيد مش مبلغ ضخم بس فكرة واكيد ده الى نقدر بيه نساعدهم

سلامة سلامة يا قمر

msafa يقول...

احنا هنا مش داريانين بحاجه اصلا
بس جمعية الهلا لاحمر دى مش قريبه منى
طب ممكن اعمل ايه بس هاسائل ولو قريبه هاتبرع
بشكرك على الزياره

لكل الناس وطن يعيشون فيه الانحن فلنا وطن يعيش فينا يقول...

تخيلى انتى عندك حق فى كل كلمة الناس بدل متشوف المصيبة وكل واحد يعمل الى يقدر علية ومش بس بالفلوس
بقى فى جمبين جمب بيشتم حماس عالشان تهورها
وجمب بيشجعها وبيشتم الجمب التانى ومحدش شايف ان فى الاخر الناس برضة هتموت
فعلا انتى صح
الله يرحمها بهية لما ماتت فينا كلنا متنا

محمود محمد حسن يقول...

احب بس اقول اني وانا براجع نفسي النهاردة شايف إن ردي كان مخطئ وفي غير محله ،

لكني برده مازلت عند اعتقادي إن قضية فلسطين هي اكثر قضية انسانية لوثتها السياسة ، يمكن ده يديني العذر على ردي الناشف

تحياتي

will يقول...

情趣用品,情趣,A片,AIO,AV,AV女優,A漫,免費A片,AIO交友愛情館,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,情色論壇,色情影片,微風成人,嘟嘟成人網,成人,18成人,成人影城,成人圖片區,成人圖片,成人貼圖,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,視訊聊天室,視訊聊天

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,情趣商品,A片,AIO交友愛情館,AIOAV女優,AV,A漫,免費A片,本土自拍,自拍,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,色情影片,情色網,色情網站,微風成人區,微風成人,嘟嘟成人網,成人,18成人,成人影城,成人圖片區,成人圖片,成人貼圖,成人文章,成人小說,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,中部人聊天室,080苗栗人聊天室,苗栗人聊天室,免費視訊聊天,免費視訊,視訊聊天室,視訊聊天

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,AIO交友愛情館,一葉情貼圖片區,情色論壇,色情影片,色情網站,微風成人區,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,A片,AV女優,AV,A漫,免費A片,自拍,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,080苗栗人聊天室

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,做愛,寄情築園小遊戲,色情遊戲,AIO交友愛情館,AIO,色情影片,情色網,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,成人電影,麗的色遊戲,自拍,A片,AV女優,AV,A漫,視訊交友網,視訊,視訊交友,免費視訊聊天室,免費視訊,視訊聊天,視訊聊天室,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘