السبت، 24 أكتوبر 2009

فائز واحد


(اسمعى نصيحتى...طنشيه فى الاول..طنشيه خاااااااالص)

لا اعرف..اعتقد انها تحبنى..بل انا موقن انها تحبنى..فى بداية علاقتنا/صداقتنا كانت لا تبالى كثيرا..كنت احرص على الرقة وعلى انتقاء الالفاظ وكانت هى لا تصدقنى..فقط تقول بعض الكلام المموه وترحل..كانت تجيب الهاتف بالصدفة..لم يكن رقمى يمثل لها شغفا من نوع ما..كثيرا ما أتانى صوتها عبر الهاتف محايد تماما..يجيب عن الاسئلة فى ملل من تريد ان تنتهى سريعا لتتفرغ الى اشياء اكثر اهمية..وكنت انا احاول تحسين وضعى معها باقصى طاقة..


(بصى يا بنتى ..البنات كتير..لو لقيتيه مركز معاكى بعد التطنيش يبقى هو ميهموش من الكتير دول غير واحدة بس..انتى.. ساعتها ابتدى اسألى عليه..)

بغض النظر عن شخصها فانا اعشق التطورات المنطقية..اى علاقة تتطور بمنطقية اعتقد انها علاقة مشبعة..ماذا يدعوها كى تتخلى عن برودها والكلمات التى لا تحمل معنى محدد وتبدأ فى القاء الاسئلة التى كانت تجيب عنها قبلا بالكثير من اللامبالاة..اذن هذه نقطة لصالحى وصالح علاقتنا..الفتيات لسن كالرجال..اعتقد انهن يملكن الدهاء ولكن فقط يستخدمنه فى الايقاع بمن يحببن ليس فى اللعب باعصابه..الرجل فقط هو من يلعب باعصاب الفتاة لانه يستطيع ان يفكر فيها بطريقة مخجلة اما الفتاة فلن تجنى شيئا من هذا..من فضلك لا تخبرنى انها تريد ان تغرر بى..اذن هى بدأت ان تفكر فى شخصى المتواضع كحبيب..


(حتى لو ليكى اصحاب ولاد بلاش تجيبى سيرتهم معاه..حسسيه ان هو الشىء الوحيد المذكر فى حياتك..فهميه انك مانحاه ثقتك الكاملة..مبتعرفيش تحكى الا معاه..حسسيه ان رأيه هو نص تصرفاتك..والنص التانى هو اللى انتى متأكدة..انه رأيه)

علاقتنا اخذت المنحى الذى كنت اتمناه من الداخل ولم اصرح به قط..اصبحت لا تستطيع ايذائى..هى تحبنى حتما والا لماذا تهرع لتسكب فى اذنى تفاصيل حياتها اليومية..اصبحت الان اكثر تحررا من الكلمات الرقيقة..اهتمامها منحنى الحرية الكاملة..لم اعد افكر فيها كما كنت قبلا..لا احرص على الاطمئنان عليها لان التقرير سيصلنى مفصلا قبل ان اطلبه..اصبحت جزء حقيقى من حياتها..عرفت فى هذه المرحلة انها موجودة الى الأبد ..


(يا بنتى طبيعى جدا انه يبقى الطرف الغير رقيق..هما الرجالة كدة..بس انتى بقيتى ادمان خلاص..سيبيه يتمادى..اقفشى عليه..لما تحسى انه هيتخنق ..صالحيه واتنازلى ..لما تتقابلوا بعد الخناقة البسى اكتر حاجة بيحب يشوفك لابساها..خليكى جميلة اوى..اول ما ينطق..حلو او وحش..بهدوء او بزعل..حتى لو اتكلم بلا مبالاة..انفجرى فى العياط وانتى باصة فى الارض..وخليكى متاكدة انك لما ترفعى عنيكى..هتلاقيه مذبهل)

علاقتنا اصبحت اكثر توترا ولكن للغرابة اكثر قوة..اصبحت جزء حقيقى من حياتى..بدونها سوف افقد جزء حيوى من انفعالاتى اليومية..مع شعورى الاكيد انها مرحلة فى حياتى واننى بالتاكيد لن اكمل معها الا اننى اصبحت احب وجودها واشعر انها تفرغ طاقة انفعالية ما من داخلى..اصبحت اكثر قسوة معها ولكن الغريب ان هذا يمنحنى حرية من نوع ما..اصبحت اكثر قدرة على التعامل معها بصلابة..تعجبنى اللعبة..اعرف انها لن تتخلى عنى بسهولة..ربما لن تتخلى عنى ابدا حتى أسأم أنا الامر..اذن لاستمتع بالفترة التى اشعر فيها اننى الاول والاخير..انا لا اخدعها..فقط هى تطورات منطقية استمتع انا فيها بموقع الفائز على طول الخط.لاول مرة ارى لعبة يهرع فيها الخاسر نحو الفائز كى يهنئه على بطولته..هذا هو ما تفعله معى هى حرفيا..من فضلك مهما كنت قديسا لا تخبرنى انك لن تستمتع اذا كنت فى موقعى..


(لما تتأكدى انه أدمنك...)
اعتقد اننى لن اتخلى عن علاقتى بها قبل ان اشغل الفراغ الذى ستركه فى حياتى بأخرى..لن استطيع ان احيا بدونها..لا لم احبها..اعتقد اننى لم احبها..انا فقط ادمنت اللعبة..لا تحاول ان تقنعنى ان السحر انقلب على الساحر واننى احببتها بالفعل..لا..تضحياتها واسلوبها الناعم لم يجعلاننى اقع فى هذا الفخ..انا الفائز وساظل الفائز..فقط سوف العب اللعبة الى مرحلة اعلى..لا ..لا تحاول اقناعى..انا لم احبها..

(قوليله باى باى..فرصة سعيدة اوى..game over)

حسنا..ليس كل من يربح الجولات يربح الحرب..تركتنى اربح جولاتها وفازت هى بالحرب بسهولة..شغلت انا بلملمة انتصارات زائفة حتى تصنع هى بطولة اسطورية..لم أكن اعرف ان الفتيات ايضا قادرات على التفكير فى الرجل بنفس الطريقة..لن اشغل نفسى بما جنته هى مقابل هذا..لن اشغل بالى بالتساؤل عن مغزى خوضها الحرب منذ البداية..انا لست فتاة..الفتيات فقط هم من ينفقن الوقت بعد المعركة للتساؤل عمن وضع الخطط الحربية..فقط انا اريد ان اعرف..كيف خاننى قائدى الاستراتيجى..كيف انقلب السحر على الساحر..وبأى منطق؟؟





..........انجى ابراهيم...............

هناك 31 تعليقًا:

غير معرف يقول...

شرفني اني اكتب اول تعليق
بس حرام عليكي
دي مش نصيحة

Mano يقول...

انا اللي فوق
اللي هو اول واحد

على باب الله يقول...

عجبتني طريقة السرد للزاويتين المتضفرين في بعض

micheal يقول...

يعني هو الموضوع مكلكع ومتشابك من الأول بس صعب نعمم ده على الذكور كلهم برضه يا إنجي
والله فيهم اللي بيبقوا حساسين أوي ويمكن أكتر من بعض البنات بدون تعصب ولا إنحياز
:)
تحياتي

أميرة علي كوكب مهجور يقول...

احسن انا فرحانه فيه :) اكيد هو عمل كده في غيرها فجت اللي خلصت ذنبهم كلهم


بس سؤال هي البنت اللي بتعمل كده بتعمل كده ليه يعني ايه احساسها؟؟


بصي برضه يا بخت مين بات مظلوم و مابتش ظالم

محمود محمد حسن يقول...

صبح صبح يا عم الحاج ،

بتتعبني منطقة الكتابة المسيطرة على الواحد ، بحس إنها لعنة ابدية مش راضية تفارق الواحد ،

متهيألي يا انجي انتي محتاجة تغادري هذه المنطقة قليلاً وتأخذي راحة منها ،

تحياتي

adel يقول...

ممممممم

حلاوة رغم اختلافي علي الفكرة

بس اكي في بنات زي الولاد تفكيرهم كله لعب :):)
شكلك كده يا انوج :P:P
ههههههههه

Unknown يقول...

اللي بيصدر من البنات بيصدر من الشباب والعكس
لكن موضوع الفائز واحد هادا , بصراحه كتير انتقده حينما اجده
لا احب الاستغلال ابداً
شكراً سيدتي :)

نعكشة يقول...

بجد

اة والله

متوقعتهاش كدة

وكل ما اتوقع حاجة تكعبليني

بحب انا الكاتب اللى ميهنينيش على حاجة افتكسها بنفسي

طيب ليا تساؤل

1- اية هدفها هيا لما واحد يقع فى غرامها و بعدين تسيبه

2- ايه هدفه هوه انه يعمل نفس الشئ

اية النيلة دية

ليه الاتنين من الاصل بيلعبوا على بعض


استني هنا
البنت زي الولد؟؟؟
ا(لفتيات لسن كالرجال)


هرجع و اقولك التشابه اللى فى ابطالك بيميز اسلوبك

بس التنوع مش وحش
سيبك
..................


طيب نعود لسياق الحديث

مين طنط اللى بتنصح البنت دية

يخربيت الخبث
لأ بتفهم
ههههههههههههههه
اة وحياة ربنا بتفهم

............

هما الاتنين خسرانين على فكرة
خسروا حب كان ممكن يبقى فعلاً حلو

احتمال يعني

فين الفائز

فاز باية؟؟
انه كسر واحد قدامه؟؟
انه عذبه؟؟؟
لو متضايقتش يبقى معندهاش قلب
هوه دة انتصارها
انها تثبت لنفسها ان معندهاش احاسيس

وهوه
هيبقى مبسوط لما يكسرها
و يدور على واحدة تانية يجري وراها و لما تجري وراه يسيبها

بلا هوسة

خلينا فى الحتت اللى عجبتني

............
اى علاقة تتطور بمنطقية اعتقد انها علاقة مشبعة



(حتى لو ليكى اصحاب ولاد بلاش تجيبى سيرتهم معاه..حسسيه ان هو الشىء الوحيد المذكر فى حياتك..فهميه انك مانحاه ثقتك الكاملة..مبتعرفيش تحكى الا معاه..حسسيه ان رأيه هو نص تصرفاتك..والنص التانى هو اللى انتى متأكدة..انه رأيه)

هذا ما يرضي غرور الرجل
اتفق تماماً

..........

يا بنتى طبيعى جدا انه يبقى الطرف الغير رقيق

يا سلاااااااااااام
!!!!!!!!!
..........

انجي
لازلتي انجي
ولكن فى تطور حلو

بس

تسلمي على هذا الصباح اللظيظ
كدة اقدر اقوم بقة

سلام عليكِ

سقراط يقول...

السلام عليكم ورحمة الله
انجي
العزيزة جدا قوي خالص مالص
بجد تسلم ايديك
جميلة جدا جدا
غاية فى البساطة وغاية فى التعيبر
والفكرة جميلة جدا واترسمت بحرفية
تحياتي

Tamer Nabil Moussa يقول...

ازيك ياانجى اخبار ك اية


ديما ظالمة كدة الرجالة فى اللى بتكتبية

يعنى البنات ملايكة؟

مع خالص تحياتى

Zika يقول...

البوست ده عبقري
وليا تعليق تاني لما اصحصح

Foxology يقول...

لالالا القصة جميلة والسرد رائع بس احنا مش كلنا كدة انا اطالب بمحاكمة شعبية للبوست :)))

تحياتى على البوست الجميلة :)

TAFATEFO يقول...

انتي رهيييييبة جداً

هو رغم ان الكلام ده في العهد البائد .. وان أول مرحلة دي مبتحصلش والبنات هما اللي مستنيين حد يكلمهم :P وان الولد لا بيدمن ولا حاجه لأن مفيش بنت يدمنها أصلاً -ليلى علوي اتجوزت وميرفت أمين عجزت لدرجة ان حسين فهمي اتجوز لقاء سويدان- وكله بيخلع بدري بدري

بس برضه البوست رائع وطريقتك في الحكي جميلة جداً

*الحكي اللي بيقولوا عليه سرد

'' حطام (ك) بقايا '' يقول...

انا في نقطة مش فهماها
او فهماها و مش مستوعباها
هي مش فيكي
بس عموما
فائز واحد !!!
انا عاوزة اعرف وافهم الفوز من اي ناحية
فوز بتحطيم شخص ما
فوز باغيير مبادئ الواحد الفطرية
فوز بايه بالضبط
ومين الفائز اصلا
انا مش شايفة فائز هنا غير شخص واحد
الجانب الشرير لكل منهما
الشيطان هو اللي فاز في المعركة دي
وهم الخسرانين اثنينهم لانهم اثنينهم وقعوا في المكين


ع فكرة اسلوبك اسلوب جميل
والفكرة نفسها هايلة
تسلمي

عابرة السبيل يقول...

من حفر حفرة لاخيه وقع فيها

ponpona يقول...

ازيك يا بسبوسه عامله ايه؟

عجبني الحوارين اللي داخلين ف يعض دول بالذات البراجراف لأخير

استمري يا انجي استمري

أنا قولتلك قبل كده ان انا بحب طريقه السرد بتاعتك .. صح؟
طيب آديني باقول تاني ..
انجي .. أنا بحب طريقة السرد بتاعتك

بس أنا شايفه أنه كده ماحدش فيهم كسبان ولا حاجه .. لأ .. الأتنين كانو مقضينها فيلم علي بعضهم
بس حاجه صعبه قوي علي فكره .. هو في حد ممكن يستهلك (روحه) كده ؟ يعيش في سلام ازاي طيب بعد كده

يا بسبوسه ... مسائك فل
:)

كراكيب يقول...

يا بنت الإيييييييه يا لذينا
البنت جوجا دي فزززززززيعة

انا نفسي اشوفك بقى مليش دعوة
وحشتيييييني جداااااا

miro el niro kwaniroooo

أحمد الشمسي يقول...

جميلة الفكرة

والقصة فعلا أخاذة، وإن كان مضمونها غريب شوية لأنه بينظر للعلاقة على اعتبار أنها حالة حرب، والحالة دي غير مبررة شوية، يعني انتي مثلا ما قلتيش البنت بتعمل كده ليه؟ ايه هدف التخطيط الخبيث ده؟

فيه حاجة لذيذة في القصة دي كمان مش عارف انتي ملاحظاها ولا لا، القصة فيها 3 بطال، واحدةفيهم مابتظهرش خالص، والحرب بتدور بين الصديقة الناصحة، والولد، البنتبرغم انها صاحبة الفعل، هي اللي بتحب وهي اللي بتسيب، لكن وجودها مهمش جدا، تقريبا وجودها مالوش لازمة، السرد بيتجاهلها خالص... فكرة برضه.

حاجة كمان ارجعي كده للقصة هتلاقي الحدث انتهى عند game over والقصة كان ممكن تنتهي هناك.

مسائك سكر

mariam يقول...

how r u jojo?miss u and miss ur posts really..how is ur health now darling

مش هضحك عليكى انا حاسة انى مش مجمعة اوى بظبط اللى بيحصل ..هى البنت عارفة انه ميستهالش و بتحبه برضه و فى الأخر صبرها نفد ولا انا فاهمة غلط

بس انا اكتر حاجة عجبتنى جدا جدا الجملة دى:

(لاول مرة ارى لعبة يهرع فيها الخاسر نحو الفائز كى يهنئه على بطولته..)

الجملة دى واقعية جدا ,ديما حد حاسس انه فايز و عايش فى دور اللى مش مهتم و التانى بيكون مهتم اكتر منه ..

طب هو مين الغلطان ..المهتم عشان بيبين اهتمامه ولا ال مش مهتم و مش مقدر حاجة؟

اممممممم ما علينا ..بس هى جدعة انها قالتله باىباى ادام هو كدة ..

يلا سلام و نلقاكى قريبا فى بوست اخر :)

Unknown يقول...

بوست رائع
و انتى كاتبة موهوبة بجد

micheal يقول...

ايه يا إنجي الإختفاء ده
:)

نعكشة يقول...

اتفق مع آخر تعليق

كل ما باجي ابص .. الاقي مفيش موضوع جديد
ابص على اخر موضوع مفيش تعليق على التعالييق

أين جديدك؟
وأين انتِ؟

سلام عليكِ

ponpona يقول...

انتي كويسه يابنتي؟
وبعدين بقااا هو انا هاقعد ادور عليكو كده

:(

غير معرف يقول...

ايه دة
هو انتى مختفيه؟؟
ولا بتققلى نظرة عمتا والعادى بتاعك
ايه التعليقات قلقتنى
قولى بسرعه فيكى حاجة ولا عادى مش متابعه قبل ما اغرم مكالمة
عووووووووووووو

نعكشة يقول...

وش بيبص يمين و شمال

كيكى عوووووو يقول...

ايه التقل دة

أسما يقول...

يعني اعلي صوتي و ازعق و الم الناس؟! بقالك كتيييييير ما كتبتيش جديد، يا رب تكوني بخير... و حشتيني علي فكرة :)

بس خلاص،

حلم بيعافر يقول...

دايه النصايح دى؟

م/ الحسيني لزومي يقول...

هذا البوست رسم بالكلمات
تحياتي
---------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

الفراغ يقول...

خساره انهم الاتنين عايشين صوره مزيفه
بس دا نسميه ايه ؟؟؟؟؟؟؟
احباط وعدم احساس بالامان..
مش كدا برضهّ!!!!!!!!!

بس الحب الحقيقى بيكون من القلب للقلب