الجمعة، 20 نوفمبر 2009

شوية حاجات فوق بعض

سلام عليكم
اممممممممممممممم انا جاية ارغى بما ان دى مدونتى وانا حرة فيها..وبما ان زوارى بقوا يتعدوا عالصوابع يعنى مش هضايق بشر كتير..وبما ان انا وحشتنى الكتابة بشكل عام..وبما انى مش لاقية حاجة اكتبها..لكل ما سبق ذكره..انا هكتب شوية كلام فارغ ميهمش حد بس هحاول ميبقاش كلام أبيح ومغلطش فى حد من اللى مضايقينى..تمام؟؟ اه صحيح وهجاوب على تاج كمان..التاج جالى من شلة عمرو السيد..كلهم جاوبوه وبعتوهولى..يللا بقى انت رغاى كدة ليه يا مان..

من انت؟؟
انجى ابراهيم..

ما الذى تفعله هنا؟؟
برخم على نفسى..

اسرائيل تقصف كل جنوب بحثا عنك ..اى شمال تقصد؟؟
هزارة بايخة..

- أنت مكلف بحذف حرف من حروف اللغة العربية .. أيها ستختار ولماذا؟
اطلع ايه انا يعنى..والنبى بلاش هزار تقيل..

لو قدر لك أن تدخل السجن فما هي القضية التي تتمنى أن تدخل بها إليه؟
خلاص يعنى..خلصوا المجرمين مفاضلش غيرى؟؟

نحن لا نعيش حياتنا بل نتعلم فيها كيف نعيش. ما تعليقك؟
هع هع هع..بدل يعنى مقول كلمة بايخة عشان ماما واختى بيدخلوا هنا وهما اصلا قرفانين من مصطلحاتى على شاكلة الله يباركلك والله يكرمك والله لا يسيئك فلو جاوبت عالسؤال دة بكلمة حمرا هيزعلوا..هع هع هع..

- على مفترق طريق لافتتان ، اليمنى تقول ( إلى حلمك) واليسرى تقول : (إلى ما لم يحلم به البشر) ، أي الطرق ستسلك؟
هصحى من النوم..

الى هنا اعزائى ينتهى فاصل الرخامة..الاسئلة اللى جاية هجاوب عليها بجد..

بجملة واحدة فقط أكتب تعريفاً لكل كلمة من الكلمات التالية:

الوطن: من غيره هبقى مش بنى آدم..
الأم: أمى أنا..اللى هى ايمان عمارة..
الليل: صاحبى وحبيبى وكفاءة..
الحب: حاجة اخترعتها المدنية عشان يتقال عليها مدنية..معرفش ليه ساعات بحسه معنى ملفق لحقيقة صادمة..
أمريكا:عدوى الطبيعى..لينا مقال طويل عن الموضوع دة..
المرأة: أنا..بس الحدق بس هو اللى يفهم..بالمناسبة..الغباء هو الحقيقة الوحيدة..
الرجل:مستر أحمد حمدى حنفى ومن يشبهه..على فكرة اعرف كتير شبهه بس هو اللى جه فى دماغى..
الصمت:حاجة بتزعل الناس وبتزعلنى وبتعزلنى..بس بعملها باصرار غبى..
الانترنت:حلو وكدااااااااب..

- أختر منصباً واتخذ قرارا؟
لو جاوبت السؤال دة هعك جامد..بس عموما يعنى انا نفسى فى حاجات كتير لكن احب احصل عليها بالتعب مش بمنصبى وقرارى اللى هيمشى لانى فى مركز قوة..حد فاهم حاجة؟؟

-قيس، عنترة، جميل…. الذين يقولون شعرا….. وليلى وعبلة وعزة ”صموت”لماذا هذا التغييب للمرأة؟
يمكن مش لاقية مواصلات..عموما الغايب حجته معاه..

- إلى أين تمضي كلمات الحب بعد أن نقولها?
بتمضى الى نفس ذات المكان اللى بتمضى له وعود الحزب الوطنى..وربنا يخليك لينا يا بااااااااشا..

- هل تجد علاقة بشكل أو بآخر بين المرأة وقطاع الطرق؟
اه طبعا..اومال ايه..

-هذا فراق بيني وبينك .. متى ولمن تقولها ؟
ييييييييييييييييييه..بقولها كتير لناس كتير بس بقولها فى خيالى وفى الاخر بتصالح بكلمة..بس بجد يعنى الايام دى بقيت بخلى بالى على نفسى ومبحبش اتجرح..عموما يعنى اى حد هقوله كدة هو الخسران مش عشان انا اروع حاجة فى الدنيا لكن عشان معرفة الناس كنوز..معرفة الناس مش الناس ذات نفسهم..فهو كدة كدة خسر كنز سواء فقدنى انا او فقد غيرى..حد فاهم حاجة؟؟

-كيف هو غداً ؟
التاريخ يعيد نفسه فى كل مرة لاننا نتصور انه من المستحيل ان يعيد نفسه..قمة السخافة اللى فى الدنيا..

ممممممممممم..مش عايزة اخلص البوست..يعنى مش عايزة ابطل كلام..

على فكرة الواد رامى عياش دة جامد..عنده اغنية كدة اسمها حبيتك انا حلوة اوى..بيقولك فيها ايه؟؟
(حبيتك انا.. مش حلوة منك بالذات انجرح انا) وبعدين شوية كلام كتير كدة وبعدين بيقول (انا عتبى عليك..ع قسوة عينيك..ع قلبى اللى سلم حياته لايديك)

على فكرة يا مستر احمد..انا مقابلتش حد زيك من اتنين وعشرين سنة الا كام شهر..انا عارفة انك مش هتقرا الكلام دة..بس انا عايزة اقوله..اقولك حاجة؟؟ انا هكتب عنك مقال كامل ..بعدين بقى ..عموما انت سكر على راى واحدة صاحبتى..

بقالى كتير حاسة انى نايمة..يعنى بعيش حياتى عادى بس لما بقف كدة وافكر احس انى نايمة وهصحى كمان شوية..بالمناسبة..حلو اوى يكون ليك سند كدة وضهر فى الدنيا عارف كل حاجة او على الاقل عارف حاجة عن كل حاجة والحاجات اللى هو مش عارفها ممكن بسهولة يعرفها..حلو ان يكون لك سند اصلا لانه كونه سندك دة هيحسسك انه عارف كل حاجة..حلو انك تمسك ايد حد وتسيبه يعدى بيك السكة وانت عارف ان مفيش عربية هتيجى تشيلك..ما علينا..

قابلت كمية ناس وسخة الفترة اللى فاتت..كتير على اعصابى بجد..على فكرة فى منهم كنت اعرفهم من زمان بس مكنتش اعرف انهم كدة..

هو الشتا مش هييجى بقى وللا ايه..عايزة البس الجاكيت الجديد..

أوقات بخاف فيها وانا لوحدى ..وحاجات تجيب فى خيالى وتودى..

نفسى احس انى فى أمان..

نفسى اقوم من النوم ابتسم كدة وابقى شبه بتوع الافلام لما بيصحوا من النوم..

انا كل قلقى بس م الايام..تاخدك وتنسى أوام..لانى صعب انساك..هو مين يا اوختشى؟؟؟ والله محدش بس الجملة عاجبانى..هع هع هع..

نفسى اغير رنة المنبه بتاع الموبايل بتاعى بس هى دى اعلى نغمة وبصحى عليها بس بجد بقيت بكرهها..بقيت لما اسمعها صدفة احس انى متعصبة اوى اوى..

الفلوس بقت بتخلص بسرعة اوى معايا..بجد انا فى الشهور الاخيرة دى صرفت مبلغ ضخم..المشكلة انى مش حاسة بأزمة من اى نوع..

عايزة اصحى من النوم..

عندى هاجس غريب انى عايزة اقوم انام دلوقتى حالا ولو قمت هروح فى النوم فعلا بس انا نايمة كويس جدا جدا..انا بجد زهقت نفسيتى تعبانة فعلا ومعرفش ايه السبب..او عارفة وبستعبط..

نفسى انهى كل العلاقات المشوهة اللى فى حياتى..

سلامو عليكو بقى كفاية كدة..



...........انجى ابراهيم..............

هناك 40 تعليقًا:

ريم وجيه يقول...

اقولك
غيرى رنة المنبه!!!
حطى نغمة عالية تانية لاغنية بتحبيها اوىىىىىىىىىىىىىىىىىىىىىىىى

جارة القمر يقول...

انجى ازيك وحشتينى اوى اوى

ليه يا انجى كل دا ما تقولى لكل اللى انت مش بتحبيهم مش عايزة اعرفكم تاااااااااانى هيجرى ايه يعنى ؟؟ اعصابك هترتاح و تبقى احسن من الكآبة دى

adel يقول...

مممممممم

مممممممممممم

مممممممممممممممممم

فهمتي ردي ؟؟

Unknown يقول...

ريم:حاضر..........


جارة القمر:وحشانى اوى اوى اوى......


عادل:لا مفهمتش.........

أميرة علي كوكب مهجور يقول...

اي حد مدايقك قوليله مع الف سلامه ولا اقولك ميستهلش تقوليله حاجة اصلا تجنبيهم بس ومتفكريش فيهم اصلا


تصحي من النوم ازاي بقا اقولك انا شور دافي كوبايه هوت شوكلت واغنيه لفيروز ونفس عميق واحنا بنقول لنفسنا احنا موجودين لسه وممكن نغير حاجات كتير


بالنسبه لشعور الكأبه او انك تعبانه نفسيا ركعتين كده واتكلمي مع ربنا وهتبقي زي الفل


ربنا يوفقك في حياتك جيجي ياقمر:)

blue-wave يقول...

انتى عامله التاج دا علشان ترخمى على نفسك ولا علينا؟:))

صبرني يارب يقول...

طيب ما تنهي ؟؟

اي علاقه مش عاجباكي ارميها على علو ايدك

وابدأي على نضافه

المهم تعرفي النقط السوده فى الى فات عشان تجيبى لها تونر مناسب

واكتبي الايه دي وعلقيها في اوضتك

ان المبذرين كانوا اخوان الشياطين

اممممممممم وايه كمان

وغيري نغمة المنبه عشان انا باكرهها زيك وباغيرها كل شويه

اي حد كويس اوي حاولي تبقى زيه فى عقله وقربه من ربنا وحبه للناس وعلمه


بث خلاث مش فاكره حاجه تانيه

shicooo يقول...

بصى يا حجيجة .....

سلامو عليكو الأول...

كاننفسى اقولك حاجة كدة زى مثلاً :


ايه الجمودية دى يا بت
هع هع هع هع ....
بس بما ان جنتل وشيك ورقيق وذوق واى كلام على اى حوار
.......

هكتفى بأنى اقولك ...
خدى بالك من نفسك يا انجى ....

اوك؟

وعلى فكرة رامى عياش ده ......
..............................
............. مش حلو ............

سلام
عايزين نشوفك

shicooo يقول...

اقولك حاجة احلى ......

فوكك .... من اى ابن لذينة فىاى حوار
كبرى
وعيشى حياتك
واقلبى كل حاجة مضيقاكى
مش مفاية عايشينن
هية ناقصة قرف
فكك

shicooo يقول...

فاهمة حاجة؟!

shicooo يقول...

فاهمة حاجة؟!

The Confused يقول...

انجي بيك

هع هع ... مش قلتلك انتي كنتي متدايقه وكان باين عليكي :D

بصي يا انجي .... حاولي تكوني انانيه مع اللي قدامك لمصلحتك انتي بس ف حدود مش تزعل اي حد ...

واي شرح انا جاهز يا فندم :p

adel يقول...

نقول كمان

مممممممممممممممممم

مممممممممم

مممممم مممممممممم مممممممممممم

شوفتي الكلام سهل خالث

Foxology يقول...

كويسة الاجابات خصوصا موضوع المرأة وقطاع الطرق لأنه كان سبب ازمة كبيرة عندى فى البلوج :))

تحياتى :)

شفـقــة و إحســــان يقول...

ايه الاجوبة الفظيعة المريعة دى يا انوج؟؟
بس بجد دمها خفيف
كل سنة وانتى طيبة يا قمر

أحمد الشمسي يقول...

يا نهار ابيض
كل ده كلام
طيب انا ارد على ايه ولا ايه؟

عموما ما تبقيش تغيبي كتير

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

ponpona يقول...

انجي انتي كويسه؟؟
مش عارفه انا ليه باقول كده بس انا بعد ما قرأت البوست قلقت !!

ponpona يقول...

حاجه تانيه
معلش فعلا علي عدم انتظامي في الردود.. بس تعرفي .. انتي وحشتيني

:)

Unknown يقول...

هو الشتا مش هييجى بقى وللا ايه..عايزة البس الجاكيت الجديد..
ههههههههههه
والله ضحكت لما قرأت الجملة هادي
بجد باين انه عندك هموم كتيرة
ربي يسعدك ويهونها يا انجي
ما في شي مستاهل
صغريها بتصغر وكبريها بتكبر
الله يحميكي يا مديرة

Lady E يقول...

عادي الدنيا فيها وفيها يا جوجو

روقي وبعدين اللي يضايقك اشطبي عليه الدنيا قصيرة مش ناقصه نكد

حلو البوست والأحلى صراحتك

dr.lecter يقول...

الاحلام ثم الاحللام ثم الاحلام

شاب فقرى يقول...

لا إله إلا الله

فعلا لخبطة تودى فى داهبة

مش متخيل وجود أى شىء فى الحياة مقلتيش عليه تعليق

خليكى صريحة لدرجة السخافة عشان ترتاحى من الناس اللى مدايقينك دى أول نقطة وبنصح بيها كل الناس الطيبين اللى فى حد معكنن عليهم وبوجه النصح لاختى برده ولنفسى

وكمان اللى يدايقك وتحسى إنه أى كلام لازم يطلع منك كلمة واحدة

متلزمنيش يا أمور

كلمتين دول :$

بس بيتقالوا كدا وبنفس الشكل

يلا هاجى اعلق تانى لو ربنا كرمنى وكان ليه عمر

أترككم فى أمان الله

شاب فقرى

اقصوصه يقول...

مبرووك التاج :)

غير معرف يقول...

شوفي يا ستي أنا دلوقتي بكتبلك وفي نفس ذات اللحظة حاطة " حبيتك أنا - رامي عياش " ؛ أنا مش غاوية أسمع أغاني زي الأول ، بس الأغنية دي أنا شوفتها فيديو كليب وعجبتني ، رامي صوته ماشاالله قوي وسمعتله وأنا في الباص بتاع الشغل علي إف إم أغنية دويتو مع عدوية عجبتني أوي إسمها :" أنا أحب الناس الرايقة " ، تحسي كده إنه إبن بلد جدع والله أعلم .
*حكاية السند والضهر والإيد في الإيد :
عارفة لما بتقفلي التليفون وتفتحيه ، مش بتلاقي إيدين بيمسكوا بعض ، ده لو تليفونك نوكيا مش عارفة ده في كل التليفونات !أو طفل صغير بيمسك إيد مامته أو باباه ؛ فعلاً إحساس بالأمان ربنا ما يحرم أي حد من سنده في الدنيا الغابة دي !!.
وبالنسبة للأصحاب والغدر أو أي فعل غير متوقع حدوثه وحصل ... فمش هقولك غير : " يعيش المعلم ويتعلم ".إيه فايدة الحياة من غير مواقف مالهاش معني !!.
* وأنا صغيرة كنت بقول زيك : الشتا إمتي يجي بأه عشان ألبس البالطو والجوانتي ...من الآخر إنتي جميلة وصافية؛؛
وبالنوسبة للصداقة ده يكون ليا الشرف إننا نكون أصحاب . بس أنا مش فهمت تقصدي إيه بكلمة :" بغض النظر عن أي حاجة..." هوه انا حصل مني حاجة قبل سابق ضايقتك !؟ ولو حصل مش تزعلي مني . صافية لبن ....حليب يا إشطة!!!.
ديدي

غير معرف يقول...

مهزلة مصرية جزائرية بقلم عبد البارى عطوان

تحتل اربع دول عربية المراتب الاولى على قائمة الدول الأكثر فسادا في العالم، اضافة الى افغانستان، حسب منظمة الشفافية الدولية، ولكن لم يخطر في بالنا مطلقا، ان تستخدم انظمتنا الرياضة من اجل تحويل الانظار عن فسادها ودكتاتوريتها القمعية، وبذر بذور الكراهية بين ابناء الأمة الواحدة، مثلما شاهدنا في الايام العشرة السوداء الاخيرة، التي بدأت وانتهت بمباراتي فريقي مصر والجزائر، في تصفيات نهائي كأس العالم الصيف المقبل في جنوب افريقيا.

نحن امام حرب حقيقية، وعمليات تجييش اعلامي ودبلوماسي لم يسبق لها مثيل، وكل هذا من اجل الفوز في مباراة كرة قدم بين فريقي دولتين وشعبين شقيقين، من المفترض ان الفائز من بينهما سيمثل العرب جميعا في هذه المسابقة الكروية الدولية.

عندما قرأت انباء عقد الرئيس حسني مبارك اجتماعا طارئا لاركان دولته، ابتداء من مجلس الوزراء ومرورا بقائد جهاز المخابرات، وانتهاء برئيس هيئة اركان الجيش المصري، تبادر الى ذهني ان مصر على ابواب مواجهة مصيرية مع اعداء الأمة والعقيدة......

باقى المقال فى صفحة الحوادث بالرابط التالى

www.ouregypt.us

نعكشة يقول...

http://mohem-blog.blogspot.com/2008/05/blog-post_06.html



سلامٌ عليكِ

نعكشة يقول...

آه صحيح ...

1- نفسي أعرف منهيش العلاقات لحد مكا تبقى مشوهة فتتكور و تترمي في الباسكت
مرميهاش وهيا لسة طازة

2- انا بقيت انام كتير قوي .. مش عارفة ليه!!!!

3- انهاردة صارفة مبلغ و قدرة كتيير قوي في حاجات هبلة (ثاعدة بقنع نفسي انها تستحق ) !!! ـ

4- موبايلي جابلي الضغط

5- اسكتي مش بقيت احلم يا انجي .. قصدي بقيت افتكر الاحلام .. نا مستغبة جداً
(دة تعليق على ناس اوام)

6- ساعات بعملها .. و امسح على وشي و اقول اصبحنا و اصح الملك لله .. ببقى سعيدة قوي لما بعمل كدة

7- وانا كمان :(

8- بالعند لبست الجاكت انهاردة و اتحريت
ههههه

9- فيه احتمالين .. ماهو يا اما انا فعلاً مبميزش .. ياما انا كل اللي قابلتهم في الحياة حلوين
مش عارفة ليه مش حاسة اني فاكرة اي شخص وحش في حياتي
هههههه.. ساذجة انا

10- انا كمان ... نفسي كمان حد يعملي زي ما بيعملوا للحمام الزاجل .. بيطيروه كدة لفوق و هوه بيكمل لوحدة .. حد يشعل فتيلة قدراتي وانا هنطلق.. حاسة اني اعرف اعمل حاجات كتير بس مكبوسة

11- انا علقتلك على التاج بقة

على فكرة انا علقت على كلامك من الفقرات من تحت لفوق
مش من فوق لتحت
بث

آه صحيح
اكتشفت اني كنت بزورك هنا من زمان
بس زاكرتي كانت معوقة

سلامٌ عليكِ

تايه في وسط البلد يقول...

مش عارف بس ردودك بتقول انك علي ااااااااااخرك

ليه سبتي نفسك ده كله؟!!!!

كيكى عوووووو يقول...

انوج صاحبى
************
ياللي بتسأل عن الحياة
خدها كده زي ما هيا
فيها أبتسامة و فيها أة
فيها قساوة و حنية
ياما الحياة فيها
اللي بيشقيها
و اللي بيرضيها
و اللي يقاسيها
ياللي بتسأل عن الحياة
خدها كده زي ما هيا
فيها أبتسامة و فيها أة
فيها قساوةو حنية
ياما الحياة فيها
اللي بيشقيها
و اللي بيرضيها
و اللي يقاسيها
الدنيا ريشة في هوا
طيارة بغير جناحين
إحنا النهاردو سوا
و بكرة هنكون فين
في الدنيا
في الدنيا
الدنيا تدور مهما تدور
ما هي بتدور سوا بينا
في عطشنا
في ألمنا
مبتنساش تداوينا
الدنيا تدور مهما تدور
ما هي بتدور سوا بينا
في عطشنا
في ألمنا
مبتنساش تداوينا
لينا الحب لينا
قبل الجراح ما تدق بابنا
جينا و مادين أيدينا
اللي يصيبنا أهوة من نصيبنا
الدنيا بتلعب بينا ليه
أية راح ناخد من ده أأيية
أية راح ناخد من ده ية

*************************
كل سنه وربنا يبعد عنك كل الناس الدرتى
(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)
*************************

micheal يقول...

كل سنة وأنتي طيبة يا إنجي
عيد سعيد
نحن لا نعيش حياتنا بل نتعلم فيها كيف نعيش
الجملة دي شايفها مهمة جدا جدا
:)
لى أين تمضي كلمات الحب بعد أن نقولها?
بتمضى الى نفس ذات المكان اللى بتمضى له وعود الحزب الوطنى..وربنا يخليك لينا يا بااااااااشا..
الجزء ده جامد جدا جدا
:)
تصبحي على خير
تحياتي

محمود محمد حسن يقول...

يا ساتر يا رب ..

نفسك تنهي العلاقات المشوهة اللي في حياتك ..

ههههههه ضحكتني اوي دي ..

انا ما بحبش التاجات خالص على فكرة

أحمد الشمسي يقول...

ايه المدونة المهجورة دي؟
اللي صاحبتها لا بتكتب فيها حاجة ولا بتيجي تطل حتى على الناس؟
:))

سارة نجاتى يقول...

أهو ده احلى بوست قريتوا ليكى
ههههههههه
بجد هيستى خالص

بس حلو كله تلقائى كده

و فعلا فعلا النت حلو و كداب دى حقيقة


سلامات

الفراغ يقول...
أزال المؤلف هذا التعليق.
الفراغ يقول...

كل سنه وانتى طيبه
انتى فين؟؟؟؟
وغيرى اى حد مزهقك
وانا كمان بعمل كدا
او ااقولك ارمى الموبايل خالص وهاتى واحد تانى
وادينى القديم ههههههههههههه

وعلاج الكأبه انتى عرفاه
تستغفرى ربنا كتير وتصلى على حبيبك المصطفى كتير وتطلعى صدقه حلوه لله
وهاتودعى الكأبه ....وابقى شوفى

ponpona يقول...

مش ناويه تحطي حاجه جديده بقي ؟

Heba Gamal Emara يقول...

اهلا يا انوجه
ازيك
بصى يا ستى دى اول مرة اجى هنا مدونتك
بس والله بجد لقيتيك بجد شخصيه لذيذه جدا جدا جدا
على فكرة
انا كنت بعانى زيك كده
وعارفه انتى قد ايه حاسسه بالالم لمجرد وجود اشخاص يحتلون فى حياتك مساحه كبيرة وفى المقابل انتى فى حياتهم مش موجوده اصلا
بس انتى عارفه : والله ما فى حاجه تستاهل الزعل
ابدا
ومتزعليش الا على اللى يقدرك ويحترمك ويخاف على صداقتك بجد
ادخلى مدونتى واقرى مقال جرحى انا واعرفى انا كنت بعانى قد ايه بس خلاص الحمد لله سمعت الكلام اللى اتقاللى ونسيت / انسى انتى كمان بقى علشان متتعبيش
البسى الجاكت الجديد حتى لو الشتا مجاش ،،،
وانسى كل اللى يضايقك ،،،
وقومى هاتيلك شوكولاتايه وكليها لو عايزة وحاسسه ان ده هيبسطك ،،
كمان متعمليش اى حاجه تضايقك او تزعلك ايا كان الشخص اللى هتعمليله الحاجه دى
لانه لو بجد عارفك كويس وبيحبك مكانش طلبها منك

فى النهايه عايزة اقوللك
"اللى ينساك انساه واللى يهواك اهواه"
ابقى تعالى زورينى فى مدونتى وهتلاقى ان شاء الله ما يسركم ويسعدكم

انا حقيقى مبسوطة انى تعرفت بيكى

تقبلى مرورى واحترامى ،،،،

أسما يقول...

انجي... سافري... روحي مكان جديد و غيري جو، بس اوعي تقربي من حد و انت في اللخبطة دي، لاحسن دنيتك تتلخبط اكتر... ربنا يهدينا بقي يا اوختشي كلنا كدة شروة واحدة... قطشيعة... سيبك بقي من الزعل و فكك كدة و ارجعي تاني و اكتبي و علقي و انكشي فينا زي عادتك، انت بجد وحشتيني
:)

انت مالك يقول...

على العموم
وعلى الخصوص
وعلى الكمبيوتر
وعلى التكست
وعلى الكيبورد لازم اكتب لك
الكلام دا
ركزى معايا
مركزه
ركزى قوى
ايوه هنا
انتى معايا
هقول اهو


انتى مشكــــــــــــــــــله