السبت، 19 ديسمبر، 2009

أحلى الأوقات



اشعر ان ذلك حدث فى حياة اخرى..ربما بعد آخر اذا كانت نظرية النسبية صحيحة..الخلاصة ان تلك الذكريات حتما لم تكن قريبة كما تزعم التواريخ والشواهد المنطقية..

حتما لم تكن جلستنا فى ممر القسم بالكلية على الارض مباشرة..ساندين ظهورنا الى الحائط منهمكين فى الضحك بصوت عالى جدا نتبادل حديثا غاية فى الخبث يتناول كل من يحيطون بنا من المنظور المنخفض من موقعنا على الارض..الضحكات المجلجلة فى انتظار حكم السماء وانقضاء الامتحان الشفوى..حتما تلك الجلسة كانت فى زمن آخر..اذكر تلك الايام جيدا واذكر ان اليوم كان يبدأ بداية غير مبشرة عندما نذهب الى اللائحة لنجد أن دكاترة القسم الساديين قد وزعوا على ثلاثتنا بالتساوى..فلن تفلت اى منا من دكتور يمارس عقده ونقائصه الشخصية بشكل او بآخر..ثم يتطور الموقف الى ضحكات لا تتوقف و مواقف غاية فى الخبث بيننا او كما كنا نقول وقتها (مسخرة و تهييس )..

حتما لم تكن جلستنا فى ذلك المطعم الحقير قرب الجامعة ومناقشاتنا التى تنتهى دوما الى نفس النتيجة (اتنين برجر ليا ..اربعة برجر ليكى..واحد برجر ليها..المهم انك تخلصى بسرعة متناميش عالاوردر والنبى وحياة اولادك) حتما كانت تلك الجلسة فى زمن آخر.. مناقشاتنا اثناء التهام الطعام عن تامر حسنى ومدى تفاهته او فيلم فرانكنشتاين الذى شاهدته كلتاكما ولم اشاهده انا حتى الان او اخر مغامراتها مع خطيبها الذى اصبح الان زوجها الموقر..او الكلام عن الكونت او ايا من تلك الذكريات الحميمة..حتما حدثت فى زمن آخر..

حتما لم يكن تمددنا على الرمال فى ذلك المعسكر فى صحراء مطروح ومشاهدة السماء و التفكير فى مكانية هبوطها حتى نموت مختنقين ثم عدولنا عن تلك الفكرة الحمقاء واستبدالها بعد النجوم ومحاولة تفسير اشكال الغيوم (دة فانوس سحرى..قال يعنى عمرك شفتى فانوس سحرى يا موكوسة ..ودة ديناصور بس شبه الدولفين..والنعمة هبلة زى ما بقول عنك دايما..دى بقى شبه القلب..آآآآآآه والله شبه القلب بالظبط)..حتما تلك الذكريات حدثت فى بعد آخر للزمن والمكان..

حتما لم يكن جلوسنا فى محاضرات تلك المجنونة او ذلك السادى كالمعلقين الرياضيين واقتناص كل الفرص للتعليق بسخرية على كلام الدكتور بصوت خفيض ثم رسم نظرة البراءة الطفولية على الوجوه عندما يستفسر عن سبب ضحك مجموعة من الحضور..حتما ذلك حدث فى زمن آخر..من غير المعقول ان تكون جولات البلوتوث بين ثلاثتنا اثناء انهماكهم فى الشرح حادث قريب..اكاد اجزم ان ذلك حدث فى زمن آخر..

حتما لم تكن تلك اللحظات التى نضبطها فيها متلبسة بمكالمته تحت الغطاء اثناء المعسكر ونحن من نظنها نائمة..او نوبات الضحك الغير مبررة عندما يأتى احد المسهوكين للاستفسار عن شىء خزعبلى..او جولاتنا داخل معارض السلع وتعليقنا على كل المنتجات سلبا نظرا لضيق ذات اليد..او انتظارنا لصدور المعجزة الالهية المسماة بالكتاب الجامعى..او دخولنا مكتبة الاسكندرية لنتناقش فى اشياء غاية فى الاهمية مثل القائمة التى عليها ان تشتريها لانها عروس او مثلا أخر اخبار اختها المعقدة نفسيا..يا الله..لن اؤكد ان ذلك حدث من زمن بعيد لانه بالفعل حدث منذ زمن بعيد..

فى تلك الايام كان تاكيدنا على حب ثلاثتنا لفيلم احلى الاوقات حقيقيا جدا..كان تفهمنا للحالة الموجودة داخل هذا الفيلم حقيقى جدا وكان يتجلى هذا التفهم عندما تقول احدانا للمرة المئة بعد الالف المعلومة التى نعرفها ثلاثتنا
(عارفين ..اكتر مشهد بحبه فى الفيلم دة هو مشهد الزنزانة..عارفين ليه؟؟ اصلى عارفة الحالة دى كويس )..
...........انجى ابراهيم..............


هناك 27 تعليقًا:

adel يقول...

ممممممم

خايف اوعدك موفقيش ااقولك فيه تلاقي مفيش

لو فاكرة الفيلم هتفهمي قصدي

الفيلم ده بحبه جدا علي فكرة خصوصا منة و هي بتعيط و تضحك

فراشة يقول...

ذكريات جمييييييييلة وطالعة من القلب

ول م الواحد فيها حاسس انها مبتنتهيش وأول ما تنتهي يحس انها كانت في زمن آخر

بجد أحلى ايام والله الصحبة الحلوة ف الكلية ايام ياريتها ترجع تاني


تحياتي ليكي واصحابك وربنا يخليكم لبعض

dr.lecter يقول...

الحاله اللي عن الفيلم ماثره فيا بقالي 5 شهور ولسه شايفه من كام ساعه

احلي الاوقات خايف انها تتمسح وتتبخر علشان كده مافيش احلي من انك تكتبي عنها

أحمد علي يقول...

جامدة جداااااا :)

بجد الله ينور

الشعب لابد له من شيما تشكمه يقول...

انتى بالظبطططططططططط بتتكلمى عنى انا واصحابى:))

blue-wave يقول...

بحب اوى الفيلم دا
بس برضه انتى دايما دماغك مختلفه

enjy يقول...

عادل:ماهو دة مشهد الزنزانة يا دووووووووووووولة وحنان ترك واقفة بتبص من الشباك وفى ايدها السيجارة..بحب المشهد دة مووووت...
بس انا اكتر واحدة بحبها فيهم هى هند صبرى البت دى توووووووووحفة..صباحك نعناع.......



فراشة:كانت ايام حلوة بس معرفتش حلاوتها غير بعد ما خلصت..الحمد لله......



د.لكتر:الماضى حلو لمجرد انه ماضى..تفتكر بعد شوية هنفتكر الفترة دى كمان ونحن لها كدة؟؟؟؟
طب تفتكر هما فاكرين الفترة دى؟؟؟ فى تفاصيل كتير غير مذكورة ولن اذكرها منعا لتشويه اللقطة..منور كالعادة.........



احمد على:فييييييييييينك...والله بفتقد تعليقك خاصة ان مدونتك بقت لا تسمح بالتعليق......



شيما:ودلوقتى ايه الاخبار؟؟؟؟


بلو ويف:والله يا دكتور عمرو تعليقك يسعد يومى ويبهجه........

جارة القمر يقول...

انتى جميلة اوووى :):):)

مالقتش كلمة تانية غير الكلمة دى اعلق بيها و بتتردد جوايا طول ما انا بقرا البوست

ربنا يخليكى سعيدة و مبسوطة

محمد بدر يقول...

مدونة رائعة وفيها شغل

ادعوكي لزيارة مدونتي

yasmina يقول...

هاااااااى ازى حضرتك

بجد والله وحشتنى المدونة الجميلة دى اوى
وبجد
كلام حضرتك انا شخصيا بحبه اوى
بحس انه بسيط وعفوى بيشبهنى وبيشبه كلامى يعنى

بجد جمييييييييل اوى
واحلى حاجة ان الواحد يكتب اللى على لسانه كدة من غير تزويء

تحياتى
سلام
اه بس ايه حكاية ان حضرتك مجربة احساس الزنزانة دة ؟
ههههههههه
يارب يكون خير

سلام

أحمد علي يقول...

مين قال كده.. المدونة بتسمح بالتعليقات.

بس يمكن اللينك بتاعها مش باين، عموما لو فتحتي البوست نفسه -مش المدونة كلها- لوحدها هتلاقي التعليقات واضحة.

Mr.Hazem يقول...

اجمل ما في الحياة ذكرياتها
لذلك انا عندي قسم بمدونتي اسمه ذكريات لا تنسى
بجد راح تيجي الايام وتروح وبالنهاية تفتكري احلى الاوقات

تمنياتي لكِ بحياة سعيدة

أحمد الشمسي يقول...
أزال المؤلف هذا التعليق.
أحمد الشمسي يقول...

بوست جميل يا إنجي ومليء بالحميمية والشجن

أنا كمان بحب أحلى الأوقات... ومشهد الزنزانة بالذات.

Zika يقول...

مش عارف اعلق ع الفيلم ولا ع البوست
بس بالنسبه للفيلم
يعتبر من الافلام اللي ممكن اشوفه اكتر من مره في كام يوم ورا بعض من غير ما ازهق
خالد حماد كان عبقري عبقريه لوحده
من احسن المشاهد اللي بحبها في الفيلم ده
مشهد سامي العدل مع حنان ترك لما بتعرف ان هو بيبعتلها الرسايل
المشهد ده عبقري
عموما
البوست حلو
انا قعدت اقرا لحد اخر بوست قريته اللي هو فائز واحد
تحياتي للصبح

Foxology يقول...

الفيلم جميل والبوست اجمل :)

تحياتى

كيكى عوووووو يقول...

ازيك يالوزة يابتاعت الذكريات
الحمد الله الاشاعه والدكتور قال 50% ولد او 50% بنت!!!
دة ع اساس فى احتمال تالت!!!
من الاخر
الدكتور اتشل ومجاش برضة النهاردة!! وانا كدة روحت فى الاكزوزة

micheal يقول...

تصدقي أني بعشق مشهد الزنزانة ده جدا..بحس فيها بواقعية وبساطة وتلقائية غير طبيعية
بتعجبني أوي طريقتك في عرض الأفكار يا إنجي
يجعل أيامك كلها حلوة
تحياتي

سومه...مجنونه فى بلد عاقل يقول...

انا كمان بحبه قوى بيفكرنى بالاوقات بتاعتى بقى مع صحباتى بس الدنيا ديما بتفشكل الناس
ربنا يجعل حاضرك افضل من ماضيكى وتفتكرى دلوقتى وتقولى يااااااااه كانت احلى الاوقات:)

Tears يقول...

فعلا فيلم احلى الاوقات متميز جدا و لا اعتبر انه اخذ حقة من الانتشار

ponpona يقول...

انجي

انا بحب آجي هنا
مكان افتراضي آي نعم .. بس انا بحبه

ربنا يخليكي يا بسبوسه

:))

ponpona يقول...

ممممممممم

مش عارفه .. الكومنت بتاعي شكله عبيط ومالوش علاقه بالبوست ولا بالفيلم .. صح؟
صح ... بس الكلمتين اللي فوق دول هما أكتر حاجه جت علي بالي بعد ماخلصت قرايه :)

Mohamed Hamdy يقول...

مفيش احلى من صحاب العمر .. الصحاب اللى بنطلع بيهم من الدنيا .. الصحاب اللى بنفتكرهم اما بنشوف فيلم زى احلى الاوقات .. هما دول الصحاب اللى مش صحاب

هما دول اللى بنسميهم رفقه العمر او اصدقاء الدرب

P A S H A يقول...

كل سنة وأنت طيبة.

micheal يقول...

happy new year ya enjy

mano يقول...

حميل البوست ده على فكره يا انجى انا بحب الفيلم ده جدا وكتير اتفرجت عليه واجمل ما يميزه حاجتين حنان ترك ومنير بحب كنير جدا صوته رائع جدا

ثانيا وحشتينى اوى ونفسى اشوفك تانى فى اسكندريه

ثالثا الصداقه معنى جميل ما بنفتكرهاش الا بذكرياتنا مع صحاب الذكرى لو تفتكرى حوارنا سوا ادام يم يم عن صحابى هتعرفى اد ايه انتى لمستى بالبوست ده معانى حلوه جوايا
دايما موفقه يا انجى واتمنى تكونى بخير دايما وربنا يكرمك بكل خير ان شاء الله

mano يقول...

حميل البوست ده على فكره يا انجى انا بحب الفيلم ده جدا وكتير اتفرجت عليه واجمل ما يميزه حاجتين حنان ترك ومنير بحب كنير جدا صوته رائع جدا

ثانيا وحشتينى اوى ونفسى اشوفك تانى فى اسكندريه

ثالثا الصداقه معنى جميل ما بنفتكرهاش الا بذكرياتنا مع صحاب الذكرى لو تفتكرى حوارنا سوا ادام يم يم عن صحابى هتعرفى اد ايه انتى لمستى بالبوست ده معانى حلوه جوايا
دايما موفقه يا انجى واتمنى تكونى بخير دايما وربنا يكرمك بكل خير ان شاء الله