الخميس، 8 مايو، 2008

يوم المفروض انه عادى جدا

اول مرة اعرف ان مشاعرى مرهفة اه والله طلعت مشاعرى مرهفة-المهم-
امبارح كان اول يوم انزل فيه بعد غلاء المواصلات . طبعا كل الناس مش طايقة بعضها وكلهم بيطلعوا خنقتهم على السواقين وبيشتموا بعض و مش مانعهم من عض ودانهم الا انهم مش طايلينها وطبعا مافيش اى حد طايق مناخيره على وشه اساسا.
نزلت عشان اروح التدريب والكلية ركبت المواصلات الصبح طبعا السواق اتخانق خناقتين بسبب الاجرة والناس فضلت باقى السكة يتكلموا فى الغلاء والاسعار والزيادة اللى صرفوها قبل ما يقبضوها. حسيت انى مخنوقة ومش قادرة اسمع .المهم وصلت التدريب وكان المفروض نقابل واحد من العمال اللى فى مكان التدريب عشان يشرح احواله فوجئت ان بدل العامل حضر واحد نقابى وقعد يقول كلام محفوظ من عينة (الصين حلوة )وطبعا فضل بعد كل كلمة يحمد ربنا ويقنعنا ان الحياة لايمكن ان تكون اروع من هذا. بصراحة ماقدرتش اسكت ناقشته طلع مش فاهم اى حاجة اساسا هو حافظ كلمتين جاى يكبهم وخلاص المهم انتهى التدريب وركبت المواصلات عشان اروح السواق دة كمان اتخانق مع راكب بسبب الاجرة والناس بعد الخناقة فضلوا يناقشوا نفس الموضوع بصراحة حسيت انى متحاصرة والناس صعبانين علية قوى وحسيت ان مافيش امل فى اى حاجة قلت اغمض عينى لحد ما اوصل هنا بقى حسيت ان الكلام بيدخل على مخى عدل .بعد ما نزلت قابلت اختى فى السكة حكت لى على خناقة فى العربية اللى كانت ركباها سبب الخناقة ان فى واحدة ست ما كانش معاها فلوس تدفع الزيادة اللى على الاجرة. لحد هنا بقى وحسيت ان مخى سخن قوى و حسيت ان الدنيا بتتهد من حوالية احساس غريب بس بجد حسيت انى خايفة من الدنيا قوى حسيت ان كدة ماينفعش فى حاجة غلط احباط رهيب خلانى مش قادرة اتكلم ولا اعمل اى حاجة تانية . ياترى الناس هيعيشوا ازاى فى الظروف دى حالة هيستريا رهيبة موجودة فى الشارع الايام دى الناس اصبح منتهى احلامهم الاكل والشرب وياريت يلاقوهم انا قريت رواية لدكتور احمد خالد توفيق اسمها يوتوبيا -هتكلم عنها بالتفصيل بعدين- مخوفانى قوى من الايام اللى جاية ...ربنا يستر ...طب ايه الهدف من كل الرغى دة طبعا مش عشان احكى مذكراتى انا بس كنت عايزة اقول اننا لو حسينا ببعض شوية ممكن الاوضاع تتحسن لو عرفنا ان كلنا فى مركب واحد يمكن نقدر نمنع المركب من انها تغرق..بلاش فى الايام دى بالذات نقول ما ينفعش ندى حد من فلوسنا عشان اللى يعوزه البيت يحرم على الجامع ويادوب مصروفى مكفى بالعافية و ربنا مع اللى مش لاقى وماحدش بينام من غير عشا لان للاسف فى ناس كتير بتنام من غير عشا ....المهم دلوقتى ان لازم كل اللى يقدر يعمل حاجة يعملها ماشى؟ وامانة عليكم ارحموا السواقين عشان دول غلابة ومظلومين زينا بالضبط ما احنا قلنا بقى اننا فى مركب واحد.............

هناك 6 تعليقات:

علم الهسس يقول...

السواقيين
تخيلى كدا لو الدنيا من غير سواقيين
هاتبقى عاملة ازاى
اكيد الناس الفقرا اللى زى مش هايعرفوا يروح فى حتة
ولا هايروحوا اى حتة
عشان كدا فى عالم الهسس
المواصلات كلها بالمجان والهساس هو اللى بيدفعها من جيبوا
ادى يا ستى فايدة الهسس

كيكى يقول...

عندك حق وانا من هذا المنبر اقول...عتبة عتبة جيزة جيزة

ياسر يقول...

كلمتين جاى يكبهم وخلاص
مين الا بيحس بمين دلوقتي
كل واحد بيقول يلاا نفسي وبس
الاخ بيقتل اخوة علشان المال
والورث طيب حد طلع ودفع فرق
الاجرة للست الا مكنش معاها
فرق الاجرة معتقدش ومتاكد
من كدا مين الا بيعمل
حب لاخيك ما تحبة لنفسك
تحياتي
ياسر

enjy يقول...

ياسر: طبعا فى واحد محترم دفع لها.. ايه يا ابنى احنا لسة ما اكلناش بعض للدرجة دى لسة بردو فى خير صحيح مش كتير بس موجود يا ياسر لو كل واحد اثر فى الكلام زيك هنقدر ننقذ المركب المهم اننا ما نبطلش نحس...اوعى تبطل تزورنى بااااااااااااى

enjy يقول...
أزال المؤلف هذا التعليق.
غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘