الجمعة، 13 يونيو 2008

حاجات شبه الخواطر

انا ما بعرفش اكتب خواطر بس فى شوية حاجات كدة كنت عايزة اقول عليها وتاج و مواضيع ما لحقتش اكتبها ايام الامتحانات هاقول عن كل حاجة فيهم نبذة مختصرة ماشى؟؟
اهم حاجة ان عيد ميلاد دكتور احمد خالد توفيق كان يوم 10\6 دة طبعا بالنسبة لى عيد قومى مهم جدا كل سنة وحضرتك طيب يا دكتور عمر ملىء بالنجاحات التى ندعو الله ان تستمر لقد ربيت جيل كامل يفخر بكونك معلمه.. يارب يطول لنا فى عمرك يا دكتور.
تانى حاجة اتفرجت على جلسة استئناف قضية ابراهيم عيسى و شاهدت مرافعة محامى الخصم الذى كان يتكلم بانفعال شديد مناشدا رئيس المحكمة ان ينظر للقضية فى بعدها الانسانى ويطالب ان ياتى بابنائه ليكونوا شهود فى القضية اذ انهم فزعوا عندما قراوا مقال الاستاذ ابراهيم و انتابهم القلق على صحة الرئيس لانهم يحبونه حبا شديدا!!!!! و لذلك يجب ان يعاقب ابراهيم عيسى على الفزع الذى انتاب ابنائه ... الحقيقة لا اعرف كيف تمالك ابراهيم عيسى نفسه من الضحك وركل الارض بقدميه من شدة السخرية و اترك لكم التعليق.
تالت حاجة ان الناس اللى بيدخلوا مدونتى زادوا وانا فرحانة جدا وكمان فى ناس بقوا زوار دايمين ودى حاجة تطير من الفرحة مش مصدقة نفسى والله شكرا لكل من ساهم فى جعلى اشعر بهذا الشعور.
رابع حاجة التاج سهل جدا زى شكة الدبوس ... اذكر 10 اشياء عن شخصيتك .... وبما انى بالاضافى لكل مزايايا شديدة التواضع اذن هاجاوب على التاج عادى يعنى ما انا قلت زى شكة الدبوس....
  1. اول حاجة انى طموحة لدرجة ان فى ناس بتقول علية هبلة وان كل الحاجات دى مش هاقدر اعملها اصل انا طموحاتى كبيرة انى اكون دكتورة فى العلاج النفسى و يبقى عندى مركز علاج كبيييييييير و اكون مهمة جدا و ماما تفخر بية كدا وتقول بنتى الدكتورة اوجى يا سلاااام امتى بقى الحلم دة يقرب ادعوا لى.اه نسيت اقول انى نفسى فى عربية ولاب توب بس من فلوسى انا وتعبى انا.
  2. تانى حاجة انى بارتبط بالاشياء والاماكن جدا اشيائى عزيزة عندى اوى والمكان اللى بارتبط بيه عاطفيا صعب يفقد اهميته عندى .
  3. مع انى قربت على عشرين سنة الا انى مش واخدة بالى انى كبرت نهائى ماما مرة بتقول لصاحبتها انجى السنة الجاية اخر سنة لها فى الكلية لقيتنى اذبهليت اتارينى ما كنتش واخدة بالى انى كبرت اوى حاجة وحشة انى اكبر على فكرة.
  4. باكره صوت العصافير جدا باحس انه بيعمل ازعاج و بيعصبنى اوى حتى كان فيه برنامج المذيعة بتسال الضيف ايه اكتر صوت بيكرهه اختى قالت لى انت طبعا اكتر صوت بتكرهيه العصافير صوتها مزعج.
  5. ما اقدرش اربى طفل وخلقى اضيق من خرم الابرة .
  6. باتعصب بسرعة ولما باتعصب بابقى حاسة انى هاطلع نار من ودانى واكتر حاجة بتعصبنى لما حد يتغابى علية و يصر انه يفهم كلامى غلط او انه يحوره و يفهمه على مزاجه.
  7. لما بابقى زعلانة باحس ان فاضل نص ساعة والعالم ينتهى و الكون يباد طبعا دى حاجة متخلفة جدا لان الكون مش بيقف عشان حد بس لما بابقى زعلانة بحس انى لوحدى خالص و الغبى فى الموضوع انى لما باكون متضايقة مش باعرف اخرج نفسى من الحالة دى باسيبها تروح لوحدها.
  8. دايما باحلم حلم مزعج جدا الحلم تفاصيله بتتغير لكن فكرته واحدة انى عايزة اوصل لمكان ومش قادرة اوصل له مع اختلاف التفاصيل لكن الحلم دة وحش جدا جدا.

كفاية كدة عشان مش لاقية حاجة تانية اقولها.....................

كدة الحاجات اللى شبه الخواطر خلصت الحمد لله اشوفكم فى التعليقات باة و البوست اللى جاى اعتقد انه هيعجبكم ان شاء الله بااااااى.......

هناك 51 تعليقًا:

مطرح ما ترسى....دقلها يقول...

عقبال ميت سنة لمعالى الدكتور احمد خالد العظيم


ابراهيم عيسى حبسوه عشان قال الريس تعبان شوية
شوفى بقى اللى بيشتم هيعملوا فيه ايه؟؟


انا اول واحد عاوز استشارة نفسية منك
حاسس انى قربت اتجنن يا دكتورة


لسة لينا حاجتين عندك
افتكرى وقولى واحنا مسامحين




تحياتى

Unknown يقول...

"لقد ربيت جيل كامل يفخر بكونك معلمه.. يارب يطول لنا فى عمرك يا دكتور."
أنا دايما بقول المقولة دي، فعلا د/ أحمد خالد ربي جيل كامل، المهم إني أيام ما كننت بقرا ما وراء الطبيعة ، كنت فاكر إني أنا الوحيد اللي بقراها علي ظهر الأرض، كل اللي كنت أعرفهم كانوا بيفضلو كتابات د/نبيل فاروق اللي ماكنتش بستلطفها خالص

"نفسى فى عربية ولاب توب بس من فلوسى انا وتعبى انا."
معني كلامك إن انت عندك عربية ولاب توب بس مش من تعبك... اللي اداكي يدينا يا ستي :-)

شـمو نشـادر يقول...

كل تاج و انت طيب يا جميل ..

و بقول ألف مليون كل سنه وانت طيب لدكتور احمد خالد توفيق اللى بموت فيه ..

بلدياتى و مش عارف اقابله .. اموت و اقابله يا بشر ..

و على فكره انتى زى العسل يا جاجو ..

سلام

HERO يقول...

هههههههه
فعلا الله يكون في عون ولاد المحامي ربنا يتولاهم وده ان دل اما بيدل على الغباء المتناهي يالا ربنا معاهم
وانتي مدونتك حلوة وجديرة بالزيارة وبالدوام على زيارتها اصلا
وبالنيبة لل 8 حاجات اللي عندك كويسين وان شاء الله هحاول انرفزك على قد ما اقدر واسمعك صوت عصافير كتير واحتمال احطه في المدونة عندي علشان تسمعيه علطول ههههههههه انا بهزر طبعا

تحياتي

Tamer Nabil Moussa يقول...

كلامك جميل

اهم حاجة الانسان يحاول كل فترة يغير ويعدل من نفسة


ربنا يوفقك

تحياتى

Unknown يقول...

مطرح ما ترسى دقلها:يا اهلا الحاجتين هاقولهم بعدين ماشى؟....
احمد على :ايام ماكنت بتقرا ما وراء الطبيعة؟ ايه هو انت بطلت؟ بالنسبة للعربية واللاب توب والنعمة الشريفة انا ما احتكمش غير على مصروفى بس كان قصدى انى مش هاعتمد على حد يحقق لى احلامى........
شمو نشادر: بقى بالذمة تبقى من الغربية وزيك زيى وما شفتهوش؟ ما ينفعش على العموم يارب تقابله..انت اللى زى العسل والله يا اسامة.....
هيرو:والله ولاد المحامى قطعوا قلبى يا هيرو يا اخويا... شكرا على المدح دة اهو دة العشم... ابقى جرب تسمعنى صوت عصافير وانا هاعمل لك رد فعلى مفاجاة...
تامر نبيل: كلام جميل كلام معقول ما اقدرش اقول حاجة عنه... شكرا على التعليق والدعوة..........

drpharma يقول...

الله ينور يا دوك وبجد حنحتاجك قريب

دعاء مواجهات يقول...

ازيك ياقمرى

احلامك كلها حلوة ومشروعة وتشبهينى فى حاجات كتييرر

منها الطمووح وانى حاسة انى لسة صغيرة ومش عاوزة اكبر اصلا

بس خلى بالك من حتة العصبية دى بقى

بيس ياقمر

دعاء مواجهات يقول...

ازيك ياقمر

المدونة الاولى اتلغت وعملنا غيرها اسمها على حريتنا

والميل وصلنى بداية قوية ليكى ياجميل

بيس
http://3la7orytna.blogspot.com/

حطية ف عنيكى

Foxology يقول...

خواطر جميلة والله

التاج جميل

اكتر حتة ضحكتنى جزء محاكمة ابراهيم عيسى

تحياتى :)

safa7_karmooz يقول...

هههههههههههههههههههههههههه

والله طريقتك عسل جدا وتلقائية وانتى بتجاوبى عالتاج

بس اكتر حاجه شدتنى فى اجاباتك :

"ما اقدرش اربى طفل وخلقى اضيق من خرم الابرة ."

ههههههههههههههههههههههههههههههههههه
ههههههههههههههههههههههههههههههههههه

كنت فى كارفور النهاردة مع اصحابى ...وحصل موقف او كلها مواقف اطفال اللى بيجر العربية واللى كان هيكسر تلفزيون ...خلانى بكل بساطة بخبط على كتف صاحبى واقوله فكرنى لما اتجوز انى مخلفش عيال :D

.:.-=- ELGaZaLy-=-.:. يقول...

كل سنة ودكتور احمد طيب

محاكمة ابراهيم عيسى مسخرة اصلا...

بس اجاباتك على التاج تحفة
ههههههههههههههههه

ربنا يكرمك ويكتر فى زوار مدونتك مدام دة بيفرحك

كيكى عوووووو يقول...

ايوة يا ستى المهمة عاملة ايييييييييىة اييييييييية اخبارك....ياااااااااة اخيرررررررا رجعنا زى الاول الامتحانات دى مقرفة بجد....بجد بجد اجاباتك صريحة جداااااااااااااا...سلميلى على اسراء اوك

بنت الاسلام يقول...

اولا كل سنة وانت طيب يادكتوووووور

ثانيا لو من ابراهيم عيسي كان جالي سكتة قلبية

من الضحك طبعا وهطالب هيئة المحكمة الموقرة باحالة الاطفال الحزاني للطب النفسي

ثالثا احنا كمان سعداء بزيارتك وواضح انك حبوبة وخفيفة ويسعدنا نكرر زيارتك

رابعا جميلة احلامك يادكتورة ان شاء الله تحققيها كلها بنفسك

بس مش معاكي في كرهك لصوت العصافير وخصوصا الصبح بدري بتحس انها بتغنيلنا في حين ان الدنيا كلها بقت بتغني علينا

مش معاكي برده في انك مش بتعرفي تربي طفل صغير لازم تتعودي اومال بس عاوزة تبقي دكتورة نفسية ازاي وعصبية؟؟؟

وانتي برده لسة صغنووووووونة وطولة العمر ليكي ان شاء الله

وهكرر الزيارة

تحياتي

Unknown يقول...

الصراحة دي أول مرة أزور مدونتك بس شكلي هكون زبون مستمر
أتمنى تشرفني بزيارة وتعليق لمدونتي المتواضعة جدا هناhttp://kanyatklam.blogspot.com/
ويارب تكون مدونتي صديقة زي ما مدونتك خلاص بقت لي صديقة جدا
تحيتي

كوارث يقول...

شكرا لاحساسك الجميل بخصوص دكتور احمد وكل سنة وهوا طيب
هحاول جاهدا اني اخليه يدخل البلوجات ده مرّة بس قولي يا رب
اجاباتك هايلة :D
انا بكره صوت العصافير عالصبح بس ! .. بيبقوا عاملين ازعاج جامد ! ولما يكون عمال على بطال برضه !
والحمد لله
كلنا بنكبر
مسمعتش عن حد صغر الا في روايات الخيال العلمي !
بحييكي على البوست ومستني البوست الجاي :D

Unknown يقول...

drpharma:منور اول زيارة اتمنى ما تكونش الاخيرة انا فى الخدمة بس ادامى شوية وقت........


دعاء مواجهات:منورة منورة منورة والنعمة العصبية فعلا حاجة وحشة بس اعمل ايه باحاول اغيرها اتحسنت شوية بس مش اوى يعنى......


foxology:محاكمة ابراهيم عيسى لو كنت اتفرجت على الجلسة كنت مت من الضحك مسخرة والله...........


سفاح كرموز:انا هافكرك ان شاء الله العيال الصغيرين دول حلوين بس من بعيد ياعم ممنوع اللمس..........


الغزالى : يا اهلا وحشتنا والله اه والله مسخرة عندك حق.........


كيكى: لو كان الامتحان رجلا لشنقته وبعدين حرقته وبعدين طيرته فى الفضاء ياااااه هو دة الانتقام اللى نفسى فيه.........


بنت الاسلام:يسعدنى تكررى الزيارة والحمد لله انك مش مكان ابراهيم عيسى اما عن العصافير انا مش باحس انها بتغنى لى انا باحس انها بتشتم والاطفال حلوين بس من بعيد ممكن ابقى دكتورة بس عصبية عادى بالزبادى يعنى وبعدين الدكترة لسة بدرى عليها اكون ظبطت نفسى.............


كاتب مصرى: اتشرفت بزيارتك وزرت مدونتك وعجبتنى ويشرفنى نبقى اصحاب نورت والله...........


كوارث: اهلا بالاستاذ الكبير ياريت تقنعه بس اكيد انا ما اجيش جنبك حاجة..اخيرا لقيت حد بيكره العصافير احمدك يارب انا مش عايزة اصغر بس كل الموضوع انى كبرت وانا مش واخدة بالى تقريبا كنت بايتة برة وللا حاجة........

tamer.sala7 يقول...

المحامي اللي في قضية ابراهيم عيسي ده كان عايز محمد سعد يرد عليه ويقوله يا نهار اسود علي الكلام بس بطريقة اللمبي

كيكى عوووووو يقول...

بت يا انجى فى مدونة كدة عايزة اخد رايك فيها اسمها المتحرش بها مبعرفش اكتبها لينكها خشى فى بوست الغربة عندى ودورى فى التعليقات هتلقيها ومتهيلى تخصصك هيساعده..بصى خشيها وقوليلى رايك ايييية فى الموضوع كلوا ماشى

a7md Helal ( المهم ) يقول...

لا بجد بوست رائع

وخصوصا موضوع المحاكمة بتاعة الاستاذ ابراهيم عيسي
لان اصلا المحاكمة والاتهام كافيان ان يكونوا انجح واقوي فيلم كوميدي في العالم

Ghada , Rofayda يقول...

كل سنه وسعادة حضرة الدكتور احمد خالد
طيب..وعقبال ميت سنه....

اماعن محاكمة ابراهيم عيسى...
فلا تعليق....
احيانا يكون الصمت ابلغ من الكلام...


اما عن سعادتك بان في ناس كتيره بتدخلك وبقت صديقه دايمه لمدونتك فانت
تستاهلي...وده حقك علينا...
واحنا اللي ممتنين لتدويناتك...

اما التاج....ربنا يحققلك كل احلاااامك
واكتر...

ويجعلك من السعداء في الدنيا والاخره..


تحيااااااتي....

دمتي محبوبه.....

Alkomi يقول...

طبعا دكتور احمد من الادباء المبدعين وهو و الدكتور نبيل فاروق ساهموا بشكل او باخر في تنشئة اجيال متعددة و متتالية ادبيا في هذا الوطن و كانوا لهم زي درع واقي من الروايات الصفراء

بالنسبة لعشرة حاجات في شخصيتك

انتي بتقولي انك طموحة لدرجة الناس بتقول عنك هبلة

عشان كدة بيقولوا عالمصريين مجانين

و المعنى انك مش لوحدك كل المصريين كمان كدة ويمكن اكتر منك طموحا عشان كدة مجانين

بالنسبة لابراهيم عيسى
مين اللي انزعج عشان خبر صحة الرئيس

اقولك

طبعا ابناء الرئيس و زوجة الرئيس
و احفاده

و السعداء ببقاءه

بالنسبة للمدونة اللي كيكي قالتلك عليها

افتكر في ردك عندها يمكن تكون المدونة اللي كان فيها اعتراض على تعليقي

كدة ولا انا غلطان

تحياتي

blue-wave يقول...

بما انا انا كمان دكتور نفسانى ولاسع حاسس اننا هانفهم بعض كويس:)
تحياتى لمدونتك الجميله

Mero.. يقول...

ههههههههههههههه
والله في حاجات غريبة قوي..قوي........قوي كمان
يعني بنت مصرية بتقول انها مبتعرفش تربي طفل
ثقي تماما بقى ان ربنا هيديكي الصبر :)
وبعدين حد يكره صوت العصافير ..سبحان الله غريبة دي برضه
اجابات "شيقة" وظريفة
تحياتي..

دعاء مواجهات يقول...

ازيك ياجميل

مدخلتيش مدونتنا ولا اية

عاوزاكى تعلنى فى كل حتة

http://3la7orytna.blogspot.com/

بيس

أمل فتحى عزت يقول...

اسعدنى المرور بمدونتك وأتمنى لك التقدم والمزيد من الاهداف النبيلة
كما أدعوك لزيارة مدونتى والتى محتواها
تعالوا نسافر المسافات الى زمن من المحبة لاينتهى
كما أدعوك لقرأة قصتى
(بكل لغات العالم أحبك)

أمل فتحى عزت يقول...

اسعدنى المرور بمدونتك وأتمنى لك التقدم والمزيد من الاهداف النبيلة
كما أدعوك لزيارة مدونتى والتى محتواها
تعالوا نسافر المسافات الى زمن من المحبة لاينتهى
كما أدعوك لقرأة قصتى
(بكل لغات العالم أحبك)

Unknown يقول...

أرجو ان زيارتك للمدونة متكونش مرة وتتقطع على فكرة أنا من النوع الي بحط تدوينات جديدة علطول كل يومين وحدة مثلا فيارب متتقطعش زياراتك ولا تعليقاتك يا فندم
تحياتي

ادم المصرى يقول...

بوست رائع مش عارف اقول الف مبروك يا دكتور احمد ولا مش عارف اوصف جمال احلامك جميله جدا اتمنالك السعاده وربنا يوفئك وربنا يكون فى عون اخينا ....



ادعوكم لنتعاون سوين فى جعل يوم من اجل ديننا فى انتظار مروركم الى مدونتى

Unknown يقول...

تامر صلاح:لا وانت الصادق كان نفسى اقوله يخرب بيتك يا روميو بردو بطريقة اللمبى.........


كيكى:علم يا فندم........


المهم:بس مش عهارفة مين ممكن ياخد دور المحامى فى الفيلم اصل مافيش حد يقدر يجارى اداء المحامى بصراحة.........


غادة ورفيدة:شكرا والله على الكلام الحلو دة وشكرا على الدعوة......


محمد الكومى:انا افرح لما يكون فى ناس طموحة دة معناه ان بكرة احلى بالنسبة للمدونة هى طبعا دة رايى وواضح ان رايك ما يختلفش طبعا اسكندرانيين باة زى بعض...........



blue wave:اهلا يا دكتور انا كمان لاسعة بس واضح ان فى منك امل على عكسى بس يا ريت نتوافق فعلا..........



mero:تصدق فى حاجات اغرب من كدة بس سؤال رفيع يعنى هى البنت المصرية دى اتخلقت عشان تربى وتقول حاضر وبس يعنى ما ينفعش تبقى ما تقدرش على بعض الحاجات؟وبعدين صوت العصافير مزعج باحس انهم بيعملوا دوشة زى العيال الصغيرين بالظبط..........



دعاء مواجهات:انا دخلت وعلقت و بعت ايميل بس مش عارفة اعمل ايه تانى يعنى الموضوع اللى بعته لك مثلا انشره ازاى؟معلش اعذرى عدم خبرتى فى حوارات النت ماشى؟



امل فتحى عزت:طبعا هاجى على طول وشكل عنوان القصة حلو اوى........



كاتب مصرى:لا طبعا مش هتتقطع دة انا لسة معلقة هناك على نهاية القصة........



ادم المصرى:دعواتك وصلت شكرا جزيلا.......

مواطن مصري يقول...

كل سنة و استاذنا احمد خالد توفيق
(رفعت اسماعيل) بخير

مواطن مصري يقول...

بك أسعد، ولك قلبي يطرب

غير معرف يقول...
أزال المؤلف هذا التعليق.
غير معرف يقول...

نا لغاية السنة اللي فاتت مقربتش اي حاجة من كتب احمد خالد توفيق
لكن في صديق عزيز قالي يابني فايتك كتير

بصراحه انا من ثانوي كرهت كل روايات الجيب و اشباه روايات الجيب بعد ماحصل لي شبه تشبع من ادهم صبري و عبطه و هبله
و بدأت اقرأ حاجات اعمق من كتابات نبيل فاروق
خصوصا الادب المترجم


مش عارف بس حاسس انها مرحلة و كل الناس اللي بتجب تقرا بتمر بيها
مرحلة التشبع من نبيل فاروق



لكن احمد خالد توفيق حات تانيه خالص خالص خالص خااااااالص

بصراحة حسيت بندم كبير جدا بعد ما قرأت اول حاجة له
اني لم أقرا احمد خالد توفيق من ايام ثانوي و قبل ثانوي و اعدادي كمان

كاتب رائع و متجدد و لا تكفيه ابدا اي كلمات لتصف مدى روعته في الكتابة


دلوقتي انا عاملاً بكلمة صديقي العزيز البوب عن احمد خالد توفيق



يقول :

أعطني أي شيء يكتبه احمد خالد توفيق و سوف التهمه فوراً


ياسر يقول...

1 المهم اننا نحلم وعمر الحلم والطموح ما كان عيب اوبي فلوس
لازم نحلم علشان نقدر نعيش لهدفنا
2 ودي تدل علي نقاء وشفافية شخصيتك
3 ربنا يكبرنا علي طاعة الله بس احلي ايام العمر من 8الي 20سنة بس
4 مش كل العصافير صوتها مزعج ومش في اي وقت نحب نسمع صوتها
5 هههههههههه بكرة لما انشاء الله تكبري وتعملي بيت هتموتي علي دوشة الا طفال صدقيني
6 علي فكرة موضوع الودان دة يدل علي انك عصبية جدا جدا
7 دة احساس عادي الانسان بيحس ان نهاية العالم خلاص كمان 5دقائق
8 ربنا يديكي احلام سعيدة يارب واكيد دة العقل الباطن

تحياتي

Tamer Nabil Moussa يقول...

ازيك عزيزتى الدكتورة

اخبارك اية

الحلقة الثانية من ارض النور نزلت

تحياتى

زفته وقطران يقول...

انا بقي
معاكي جدا
جدا
جدا
جدا
فق موضوع المحامي
انا نفسي لما سمعته قعت اضحك
هو انا اي نعم ضد ابراهيم عيسي ف موضوع الاشاعه
بس برده
مش لدرجه ان العيال عيطو
اذا كنت انا معيطش

فارس بلا جواد يقول...

إجاباتك علي التاج أعجبتني .. لأنها كانت عفوية وصريحة .. وقد ذكرتي بها بعض عيوبك بمصداقية تحسدي عليها
بالمناسبة أنا أيضا من عشاق دكتور أحمد خالد توفيق لذلك أوجه له التهنئة في عيد ميلاده

كاميليا بهاء الدين يقول...

دايما باحلم حلم مزعج جدا الحلم تفاصيله بتتغير لكن فكرته واحدة انى عايزة اوصل لمكان ومش قادرة اوصل له مع اختلاف التفاصيل لكن الحلم دة وحش جدا جدا.
.......

الله عليكى وعلى عفويتك الجميلة

ايه رأيك تفكرى ليه الحلم المزعج ده بيتكرر

اكيد هتلاقى سبب

ربنا يسعد قلبك
ويجمل كل احلامك يارب


تحياتى

سوسا ومودى يقول...

أول زيارة ليكى
وحسيت من خلال كلماتك أنك طموحه ومش تافهه وعارفه أنتى عايزة أيه
ومحدده أهدافك
وهيه ديه أول خطوات سلم النجاح أن شاء الله
ربنا يوفقك ويسعدك ياااااارب

Unknown يقول...

حرمتينا من زيارتك للمدونة عندي ليه..أتمنى تكرريها
تحيتي

كيكى عوووووو يقول...

اييييييييييييييييييييييية يا بنتى انتى فين
واحشنى اوووووووووووى

Desert cat يقول...

كل سنة ودكتور احمد خالد بصحة وبكل خير
وربنا يخرج ابراهيم عيسى من القضية على خير انا كمان لما قريت الكلام العبيط ده فى الجرنان حسيت بحالة هستريا من الضحك
اجابتك للتاج جميلة يا قمر وربنا يبعد عنك الكوابيس وتحققى احلامك وتوصلى للمكان اللى تحبيه
تحياتى

حمادة زيدان يقول...

كل سنة ودكتور احمد بكل خير يارب

حقيقي الدكتور احمد من أكتر الناس اللي بعشق كتاباتهم خاصة أسطورة مملة بحبها اوى ومش عارف ليه شايفها مسرحية

ثانيا ربنا يطلع الاستاذ من القضية دي على خير وينصره يارب

ثالثاً ردودك عجبتني ما عدا في موضوع العيال انا بحب العيال الصغيرة اوى وممكن تقولي عليا انى مربي اخر اخين عندي في البيت

رابعا انا كتبت حاجة كدة جديدة يارب تعجبك

Unknown يقول...

مواطن مصرى:انا كمان بك اسعد ولك قلبى يطرب مساءك حليب.........


ketchub:فعلا كان فايتك كتير اهلا بك فى عالم الدكتور احمد خالد توفيق........


ياسر:كنت ناوية اغلس واقولك تعبت نفسك ليه وعلقت بس بعد ما قريت التعليق اتثبت شكرا على ارائك بس انا مش شفافة خالص على فكرة.....


زفتة:انت ماعيطتيش ليه؟؟ دة ماحدش شاف الخبر الا وعيط ودبدب فى الارض المحامى كان عنده حق دة انا كنت هاموت لما سمعت ومالكيش دعوة هاموت من ايه انت فاهمة طبعا...........


فارس بلا جواد:شكرا يا دكتور على الزيارة شرفتنى والله.......


كاميليا:المشكلة انى عارفة ان سبب الحلم انى عندى فوبيا من المستقبل للاسف اسعدتنى زيارتك واللى اسعدنى اكتر انى زرت مدونتك وعجبتنى جدا........


سوسا ومودى:يارب ماتكونش اخر زيارة وشكرا على الدعوات الحلوة.......


كاتب مصرى:اتمنى تشوف ردى هنا لانى باجى عندك وباعلق على كل المواضيع بس مش فاهمة ايه اللى بيحصل دايما تعليقى بيختفى قبل ما ترد عليه ما اعرفش ليه ابقى شوف وقوللى فى ايه غلط......


كيكى: موجودة يا كيكى والله انت كمان واحشانى........


desert cat:شكرا على الدعوات يا جميلة ربنا يخليكى.......


حمادة زيدان: شكرا على التعليقات بس والله العيال الصغيرين دول مش اهتماماتى معلش بقى يمكن انانية منى...

ٍSOU يقول...

# ما اقدرش اربى طفل وخلقى اضيق من خرم الابرة .
# باتعصب بسرعة ولما باتعصب بابقى حاسة انى هاطلع نار من ودانى واكتر حاجة بتعصبنى لما حد يتغابى علية و يصر انه يفهم كلامى غلط او انه يحوره و يفهمه على مزاجه.

دة انتى على كدة هتاكلى دراع المريض :))
وياسلام لو كان طفل صغير هتركية فى البلاعه :))

تصدقى انا كان حلمى و مازال انى ادرس علم نفس و اكون دكتورة نفسية بس كنت كل ما اوقول كدة لماما تقولى ربنا يشفيكى ..يلا الحمدلله ..تفتكرى بعد ماخلصت كلية و بقيت عاطلة اد الدنيا فى وسيلة انى ادرس بيها علم نفس و اشتغل معالج نفسى؟؟؟

Unknown يقول...

sou:لا والله مش هاكل دراع المريض الشغل شغل....... اما عن دراسة علم النفس ممكن بس لو اتحملتى ان الناس تقول عليكى معتوهة وهتضيعى عمرك و الجواز افيد وكل الكلام العسل دة

ٍSOU يقول...

معتوهة وهتضيعى عمرك و الجواز افيد وكل الكلام العسل دة..عااااااااااااااااااااااااااااااااااااااا
حتى انتى يا جيجى !! حتى انتى !!!
وا جرعات احباطية اهئ اهئ اهئ
هاستحمل يا سيتى بس فين و ازاى ؟؟ (وش متعصب) (وش فيلشوف)

Unknown يقول...

بصى يا سو يا اختى انت مؤهلك اييييه؟؟؟ طب بلاش الجامعة الامريكية شغلها زى امريكا ممكن تدرسى اللى انت عايزاه بعد تاهيلك طبعا دة لو انت معاكى فلوس بالهبل...... طب بلاش شوفى ايه السكة اللى ممكن تدخلى منها لدبلومة فى اداب علم نفس يكون ليها علاقة بدراستك الاساسية.....
وعلى فكرة انا كنت باهزر والله اصل دة الكلام اللى انا باسمعه على طوووووووووول

ٍSOU يقول...

ولا يهمك انا من كتر مابسمعه خلاص ودانى اخدت علية .. انا مؤهلى لية علاقة بسيطة جددددا بعلم نفس ..اصل انا بعيد عنك خريجة تربية و المفروض انى درست علم نفس عشان اعرف اتعامل مع نفسويات العيال ..بس على مين ..طبعا كل دة اترمى جنب الحيط و اتفننت انا لوحدى ..ماهو كل شيخ و لة طريقة :))
عندى ليككى مفاجا حلوة يارب تعجبك ..هتلقيها ف البوست الجديد ..هاروح انزله دلوقتى ان شاء الله

me يقول...

i loved ur words & i respect ur feelings
mdy2a enk 20 ..........wait till ur 25
u r full of hope dont lose it
again dont lose hope






again dont u ever lose ur hope

kisses dear