الأربعاء، 30 يوليو 2008

يندب فى عينها رصاصة

طبعا انا مش متعودة انزل بوستين فى اسبوع واحد ولا كمان متعودة انى اكتب بالعامية فى موضوع جاد بس انا حاولت استنى شوية عشان اقدر استجمع افكارى واكتب كلام مترتب ويعدى الاسبوع مانفعش-المهم-
زماااااان لما كنا صغيرين فى المدرسة قالوا لنا ان رمز العدالة واحدة ست شكلها برىء ولابسة لبس اشبه بمسوح الرهبان ومغمية عنيها وماسكة فى ايدها ميزان ودة لييييييييييه؟؟؟؟؟
عشان الست دايما حساسة ومرهفة ولابسة محتشم عشان العدالة محترمة ومغمية عنيها عشان ماتفاضلش بين الناس وماسكة ميزان عشان دة يكون الفيصل فى حكمها على الناس ..... دة اللى قالوه لنا زمان...
يوم الاحد اللى فات قلعت الست عدالة مسوح الرهبان و خلعت العصابة اللى على عنيها و رمت الميزان فى الارض وحكمت بالبراءة على ممدوح اسماعيل...
يوم الاحد اللى فات اكتشفت ان المدرسين علمونى غلط وان العدالة عنيها واسعة يندب فيها رصاصة و بتحكم على الناس بمزاجها حسب هم مين وولاد مين...
يوم الحد اللى فات اكتشفت ان العدالة ماسكة فى ايدها بدل الميزان سلسلة مفاتيح عشان تفتح بيها الابواب المقفلة قدام السفاحين...
يوم الحد اللى فات العدالة قتلت اكتر من الف روح مضروبين فى اتنين دول بالتقريب عدد اهالى الضحايا اللى قتلهم السفاح اللى برئته العدالة هو وابنه...
يوم الاحد اللى فات اكتشفت ان انا واللى زيى مالناش سعر و عادى جدا انى اموت وابقى اكل للسمك و احلامى واحلام اهلى تموت ومن بعدها دمى يروح هدر وكرامة اهلى تتداس بالجزم...
يوم الاحد اللى فات اكتشفت ان -على راى صديق لية- ان جزمة ممدوح اسماعيل اغلى منى ومنه...
يوم الاحد اللى فات اكتشفت انى محبطة جدا وان تقريبا مفيش امل...
يوم الاحد اللى فات دخل القاضى الانيق القاعة وقتل من غير دم الاف الناس اللى حسوا ان اولادهم ماتوا تانى قدام عنيهم وكان عزاء من غير اموات...
العدالة يا جماعة طلعت عنيها تندب فيها رصاصة مش مغمية عنيها ولا حاجة ايقوا حاسبوا المدرسين اللى ضحكوا عليكم وانتوا صغيرين... حسبى الله ونعم الوكيل

هناك 48 تعليقًا:

Unknown يقول...

كان عندك أمل ان القاضي يحكم بغير كده..طب ازاي وهما الي أساسا نصبوا المحكمة دي..يا ستي هما كلهم عصابة واحدة واحد بيجيب المواد الخام والتاي يطبخها وياكلوها ف الآخر سوا..
رحمة الله عليك يا مصر..
كل ودي لك

دعاء مواجهات يقول...

بعد تنهيدة قوية حارة محترقة ...



حسبنا الله ونعم الوكيل

كلمة جامعة مانعة

الموضوع قريتة عند اكتر من حد

بس بجد انتى متناولة الحكاية جميل اوى

وبشكل يبكى ويضحك ف نفس الوقت

خلاااص مبقااش فية حاجة اسمها عدالة
العدلة ف السما عند ربنا

تحياتى لكلامك الجميل ياإنجى..

شـمو نشـادر يقول...

هقول ايه بقى .. والله ما انا عارف بس المفروض ايه اللى يتقال ..

ولا اقول ليه اصلا ؟!! .. هو انا لو قلت يعنى حاجه هتتغير .. هياخد اعدام يعنى لو اتكلمت .. برده برائه ..

ممدوح اسماعيل برائة .. هانى سرور برائة .. احمد عز برائة .. برائة .. برائة .. انطلقو و خدو راحتكو .. جوعو الناس براحتكم .. ذلو الناس براحتكم .. موتو الناس براحتكم .. عادى .. اصلهم مالهومش قيمة ولا سعر .. كويس اصلا انهم عايشين و سايبنلهم كام لتر هوا يتنفسوه ..

حسنى مبارك .. انا بكرهك .. و بعلن كفرى بيك وبحكومتك و بابنك و بحكمك و بركوبك فوق نفس اهالينا تلاتين سنه .. و بتهمك اتهام مباشر بقتل الف و مية مصرى و تشريد الف و مية اسرة .. و دمهم كلهم فى رقبتك .. و اسمى بالكامل أسامة أمين عبد المنعم ناصف .. واحد شارع جبر مركز السنطة محافظة الغربية ..
اعمل اللى تعمله ..
هى عيشة ولا موتة ولا فوته ف حاره سد ..

ياسر خاطر يقول...

صراحة
اللي ماكانش شايف ان ده هايحصل يبقى مش واخد بالو
يا انجي
لو فعلا العدالة قلعت العصابة وقلعت هدومها كلها ومسكت مفاتيح ورشاشات بدل الميزان كان برضو قلبها رق شوية نحية كل اللي ماتو وكل اللي حصل مع الناس دول
بس الحقيقة اللي ماحدش فعلا واخد بالو منها ان العدالة ماتت من زمان قوي
واللي موجود دلوقتي مجرد تمثال بيضحكو بيه على الناس
تمثال
حتة حجر...لا يمكن مش حجر الحجر ممكن يرق دي حاجة وهمية كدة موجودة
حاجة وهمية مريضة
في ناس تانية بتحاول تربي عدالة تانية من اول وجديد دلوقتي بس هاتبقى عدالة ماتعرفش معنى العدالة اصلا لانها هاتبقى عمرها ماشافته
الواقع اللي ماحدش بقى عاوز يصدقه
هو اننا بقينا عايشين في واقع من غير اي نوع من انواع القواعد وكل واحد بيحاول يعمل لنفسه قواعده ويمشي عليه وكل واحد بقوته/بفلوسه بيحدد مدى انتشار قواعده

غير معرف يقول...

انا مش فاهم ليه الناس كانت متفائلة ان في حاجة هتحصل غير كدا
ماهو دا الطبيعي
بالعكس خالص

انا كنت هستغرب لو المحكمة قالت حكم غير دا

و هنا في سؤال بيطرح نفسه

هل القضاء المصري اللي كل الناس بتعتبره الملاذ و الملجأ الاخير و الاول من بطش الحكومة او رجال الاعمال او اصحاب المصالح الكبرى .. يتحكم به اشخاص او هيئات او احزاب معينة

يعني ليه مثلا ايمن نور في السجن و ليه الوزراء اللي سرقوا و اللي نهبوا و اللي سرطنوا الناس في مصر مش في السجن ؟؟

ليه و ليه و ليه و ليه


ماهو دا الوقت الأمثل ان الناس نستخدم ثقافة أشمعنى

فارس بلا جواد يقول...

انجى
ازيك
يجب ان تتعلم احترم القانون حتى لا تستطيع ان تخالف
فقانون الاقوياء لا يرحم احد ولا يحمى الضعفاء
تحياتى

Unknown يقول...

للأسف احنا معندناش قانون أصلا علشان نتكلم عليه كل شئ باطل من أوله لآخره

Mahmoud البطراوى يقول...

بكره احسن صدقينى

سنووايت يقول...

ايييييييييييييييه دنيا
الخبر نزل علينا جميعا كالصاعقة يا انجي
حسيت انه كان يوم حداد علي ارواح الناس اللي ماتت بلا ثمن
ولكن عدل الله فوق كل عدل وما تقلقيش لو العدالة اللي هناعلي الارض ما عرفتش تاخد للناس دي حقها ربنا هيعرف وهياخد حقهم وهأذكرك قريبا ان شاء الله

ميرو انتكة يقول...

ازيك يا انجى الاول يا جميل

احنا يا جماعة ما لناش غير نقول حسبنا الله ونعم الوكيل وربنا اقوى من الكل

ادعوا يا جماعة لمصر لانها بجد صعبانة عليه قوى

ميرسى ليكى يا انجى انك فتحتى الموضوع ده بجد

حمادة زيدان يقول...

أنوج

حزنتيني وجتتي عليا المواجع

العدالة خلاص أشتغلت مومس ومش بتشتغل إلا للي بيدفع أكتر ... غير كدة مفيش عدالة ... والله يومها كنت هتجنن واتنرفزت جدا ... ببساطة كدة يطلع برائة سفاح "حسبي الله ونعم الوكيل فيهم" أحنا خلاص مبقيش لينا سعر والعدالة مفيش عدالة بقينا مجرد حشرات قتلها أحسن من وجودها

Mahmoud البطراوى يقول...

حبيت ارد عليكى هنا عشان تشوفى ردى بسرعه





الثقه دى جايبها من ان







مفيش اوحش من الى احنا فيه


















فبكره اما زى النهارده واما احسن
لو كان زى النهارده يبقى خدنا عليه ولو كان احسن يبقى برضه حلو
ولا ايه؟؟

هههههههههههههههههههه

مواطن مصرى نايم يقول...

شوفتى (محمود) بطوط بيقولك ايه
بكره احسن

اكيد قصده عالبقره الحلوب
بيقولوا ان سمنه فيرن احسن من بكره الحلوب

يا بنتى ممدوح اسماعيل - هانى سرور و غيرهم كمان يطلعوا براءة
انا (امى) دى بتعمل حاجات غريبة تغرق العبارة و تبيع كياس دم فاسده

انا شاككك فيها طول عمرى

تحياتى
اسلام

نعكشة يقول...

وش بلاستك
فم ملوي

عين مفتوح نصها بس

غصة في الحلق

في مخي تفكير بيقول قريت الخبر للمرة ال مش فاكرة بكذا اسلوب
وفي كل مرة بتحسر

اغمض عيني باسي

فتحها تاني

طيب نعمل اية؟؟؟

حسبنا اللهو نعم الوكيل

والله عزيز ذو انتقام

maiosha يقول...

إزيك يا إنجى
الموضوع ده كرهنى فى نفسى بجد
أنا الإنسانة المتفائلة دايما
أول مرة أحس بالإكتئاب ده
كل ألم أهل الضحايا
رجع تانى وزاد أضعاف الأضعاف
بس للأسف هنعمل إيه؟؟

لا حاجة

حسبى الله ونعم الوكيل

""""" يقول...

لا حول ولا قوة الا بالله
انا الخبر دا نزل عليا ذى الصاعقه

هو كان خبر متوقع بس للاسف كان جوايا ذى غيرى كتير فسفوسة امل ان العداله تاخد مجراها

بس عدالة ايه بقى
عداله اهل الارض ملهاش معنى

العداله دى موجودهع فى السماء

ربك بيخلص
يمهل ولا يهمل

Mero.. يقول...

طب وليه اصلا متنزليش موضوعين في اسبوع واحد
كلامك جميل في كل البوستات وقريب من القلب..
اما عن الموضوع..
فلا تعليق..لان كلامي لا فائدة منه
دمتي بخير اختي..

عايش... ولكن !!!! يقول...

العداله خلاص بقت كماله
وكلمة الحق فى الزباله
حححححححححح دى تنهيده جامده جدا لانى بجد فاض بيا

Ahmed Fahmy يقول...

بجد منتهي الاحباط منتهي الظلم منتهي الحزن
منتهي الاستغراب ذهووووول
براءة ايه دي اللي خدوها
اد كدة هما رخاص
دول الف روح
ربنا يصبرنا و يصبر اهلهم اللي بيتعذبوا كل يوم و كان نفسهم يرتاحوا
تحياتي

كوارث يقول...

اهلا يا دكتورة انجي
لنا الله ..
ربنا عالظالم والمفتري وابن الحرام اللي بيقول على نفسه ابن حلال
طبعًا
لقد أسمعت اذ ناديت حيا ولكن لا حياة لمن تنادي !
العدالة شالت العصابة الىل على عينيها من زمان مش من دلوقتي
ارجعي ورا هتلاقي احكام بيع مصر
ارجعي اكتر هتلاقي حبس ايمن نور
شوية كمان
اعتقالات سياسية واحكام قضائية بالهبل
ده غير ان فيه قاضي اسمه قاضي الحكومة ممكن يكون هوا بتاع البلوى ده
بس عامة القضاة كويسين ..
او هكذا كنت اظن
وهكذا علمني المدر سين

هانى المصرى يقول...

هاى يا دكتوره انا هانى دخلت مدونتك من عند ميرو (كراكيب ) واضفتك عندى فى المدونه دا بعد إذنك طبعا ً
بس مدونتك حلوه
هانى

كراكيب يقول...

ففففففففففففففففففف

بصي انا مش عارفة اقول ايه علشان انا من ساعتها مفيش على لساني غير
حسبي الله ونعم الوكيل
وحسبي الله ونعم الوكيل بالأوي يعني مش اي كلام
:s
miro

رئيس جمهوريه نفسى يقول...

العدالة العاميه دى كانت زمااااااااااااااااااااااااان وجبر اسالينى انا محامى وعارف العدالة فى مصر ليها 1000 عين وعين

blue-wave يقول...

معاكى حق يا انجى
بس الحكم دا كان متوقع
انتى شايفه ايه فى البلد عدل اصلا؟؟

Amgad يقول...

اما انتي غريبة اوي يا انجي
كنتي عايزاه يعني يعدم الراجل
ايه يعني ممدوح اسماعيل قتل حوالي الف وتلتمية واحد وايه يعني اتسبب في ثاني اكبر كارثة بشرية في مصر وايه يعني تكد علي البلد كلها وهرب منها وسابها تولع
وايه يعني مسنود وكان متعين في مجلس الشوري وايه يعني صاحب زكريا عزمي ومكوس الموضوع
تفتكري بعد الاسباب التافهة دي ايه اللي مزعلك انو خد براءة

Amgad يقول...

سوري تاني اكبر كارثة بشرية في التاريخ مش بس في مصر
وختاما عشان مدخلش علي البوست ده تاني وعشان كنت ناوي اعملله بوست بس مش ناقصة غم
متستنيش من العدالة غير كده ومن ينتظر اكثر لا يفهم مصر فكل من اقترب من الحكومة يحق له قانونًا ذبح الشعب أمام أعين الكل وفي هاني سرور وممدوح عباس وعز .....الخ الخ الدليل علي ذلك
سلام

Foxology يقول...

حسبنا الله ونعم الوكيل

خسارة يا مصر

The Führer يقول...

لا حول ولا قوة الا بالله ، مفيش حاجة أقدر أقولها غير كلمتين لابن عروس:
ولابد من يوم محتوم
تترد فيه المظالم
أبيض على كل مظلوم
أسوَد على كل ظالم

علم الهسس يقول...

برأى
احنا محتاجين

تى شيرتات

مرسوم عليها أمثال
ممدوح اسماعيل
احمد عز
..
..
وكل من استغل أفراد هذا الشعب

ونجمعهم مع بعض
فى فم غسيل وسخ

ونعمل عليهم دورة غسيل
ونستخدم معاهم مسحوق ومزيل وزهرة وكلور
وكل انواع ازالة الأوساخ والعفن

عشان ترجع هدومنا نضيفة
وتبرق زى الأول

دا المفروض اللى يتعمل
مع امثالهم

مين بقى اللى يعمل دا؟؟
وفين الغسالة اللى هاتخدهم دورة ازالة؟؟
وفين المسحوق؟؟

كل دى اسئلة تحتاج الى إجابة
لو كنا مش عاوزين
الموضوع دا يكرر تانى

تحياتى

Desert cat يقول...

يوم الحد اللى فات
جالى حالة من الذهول والازبهلال والاحباط والاكتئاب
يوم الحد اللى فات قولت ياريتنا كنا محتلين علشان الحكم ده لو كان من محتل كنا قولنا مش حاسس بينا
لكن من حد مننا فينا دى المصيبة

محاولة لكسر الصمت يقول...

خلاص اسمحيلي انا اتكلم فصحى....

سيدتي في زمن تباع فيه الضمائر لن يكون صعبا أن نرى العدالة تتغير موازينها...تقولين ان عيناها (تندب فيها رصاصة)
ومن قال لكي أن عدالتنا كعدالة غيرنا...هنا لنا عدالتنا الخاصة..عدالة صنعناها بايدينا....أيدي غشت وسرقت وربما قتلت....فكيف تتوقعين عدالة صنعتها هذه الأيدي....
وأخيرا هو سؤال واحد فقط (ما اكتشفتيش انك كنتي بتتعلمي غلط غير يوم الاحد اللي فات ده؟!!! ده انتي اتاخرتي اوي)

زيارتي الاولى.......تقبلي مروري

غير معرف يقول...

دكتوره

يبدو انك كنتى فى مدرسه من زمااااااااااااان

اصل الان المدرسيي يحسون بما يحصل ويدركون العواقب ويدركون حال البلد الجميله امى

لا املك الا ان اقول

حسبى الله ونعم الوكيل

•√أريـ السمر ـج√• يقول...

مع ان الحكم كان متوقع .. لكن صدمته كانت قوية من البجاحة و الاستهانة بدماء اسر كل ذنبها انها حلمت بان في امل ببلاد بعيدة علشان ترجع تغرق بايد طايلة

حسبى الله و نعم الوكيل

العراف يقول...

انت بجد رائعه فى موضوعك انا اول مره ازور مدونتك عجبنى جدا اسلوب كتابتك واسلوب تعبيرك وتصويرك وانا اتفق معاكى فى كل كلمه قولتيها وفخور ان لسه فى حد فى مصر فاكر الشعب وبيصحى فيهم ويقلهم انت بجد مثال مشرف للبنت فى مصر وانا اتمنى لكى التوفيق

عروسة ننوسة يقول...

معاكى حق يا دكتور كلنا اتغاظنا وحسينا ان مابقاش فى الدنيا غير الظلم ...لكن هنقول ايه دم الابرياء دول فى ذمتهم وربنا يرحمهم ويغفر لهم

oRiGiNaL HeArT يقول...

انا من طول عمرى وانا عمرى ماقتنعت بالقاض ءالمصرى اصلا
بس الفترة الاخيرة مش عارفة مين اللى لعب فى دماغى وخلانى ابصله بنظرة احترام شوية وانه مش زى ماانا متصورة -كوسة يعنى زى غيره من الانظمة اللى فى بلدنا-
بس ملحقتش اقتنع بالراى الجديد ولاقيت الضاء المقدس زى مابيقولو بيحكم على نفسه بالاعدام
انا حاسة انه انتهى خلاص اى امل فى ان يكون عندنا حاجة عادلة ومنصفة
و الدنيا هتمشى على كيفها فى بلدنا واحنا هنسكت وخلاص
وكل مالناس البسيطة ترخص الناس اللى مش بسيطة سعرها يزيد

غير معرف يقول...

غي عالم يحكمه الانسان

اختفت العدالة

عزيزتي لقد اكتشفت اخيرا حقك في الحياة

لا تحبطي او تيأسي او تلومي المدرسين

ما بأيديهم

اكتشافك عظيم لا يختلف عن قانون الجاذبية

لا تتركي نفسك بلا سعر لا تتركي حقك يضيع

لكي حق في الحياة

لكي حلم احيانا لابد ان تميه عدالة مغلفة بالقوة
لابد ان يكون لك علي الاقل سلطة وسيطرة وحلم قوي

لن تتعري العدالة لظلم انسان

عدالة السماء لا تغيب

لو سمحت

ابتسمي

اجعلي من دموعك نهر يصل بك الي الصحراء يحولها الي حدائق

عارفة انك حتقولي

ياعم تعبنا شعارات

ولكن صدقيني الاحساس بالامل

احسن كثيرا من اليأس والقوقعة في مستنقع الذات

ارجوكي

لا تعطي فرصة للسفاحين ان يدوسوا علينا بالاحذية نحن ابناء آدم مكرمين من الله

للعدالة وجوه كثيرة

مهما تغيبت

لكنها ستأتي يوما مع شعاع ضوء بالنهار

مهما ازداد الوضع سوء نحن نؤمن حقا انا الامل آتي واليسر قريب

تحياتي لاحساسك

وكلماتك المؤثرة

د/اجدع بنوته يقول...

هههههههههههههههههه

يخربيت فئرك ف التعبير ياانجى

زى السكر بالعاميه اصلا

العداله واسعه ويندب فيها رصاصه اه

ههههههههههههههههه

موقف يدمى طبعا مش يضحك

بس هكذا الحياه

Nostor Azzuro يقول...

معلش اصل احنا شعب دمه رخيص على حكامه

كيكى عوووووو يقول...

عوووووووووووووووووووووووووو انا جيت اتخديتى
.........................
المرة دى انا واثقة انك اتخدتى
ههههههههههههههههههههههههه
العدالة راحت فين يا انجى
راحت فى الوب...
ويك ويك
من فيلم
نباح العدالة المصرية
ولا عزاء للسيدات
........................
المهم
هتوحشينى موووووووووووووووووووت
ياواد يا دكتور انت يا جدع...
ظروف عائلية كدة وانا لازم ابقى جانبهم
اةةةةةةةةةةةةةةةة
الواجب ينادينى
هتوحشينى كتيرررررررررررررر
خدى بالك على مدونتى اوك
اموااااااااااااااااااااااااااااة
هغيب ممكن فترة طويلة شوية
بااااااااااااااااااااااااى
اعاااااااااااااااااااااا
هعيط
هتوحشينى كتير
باى يا حبيبتى
عووووووووووووووووووووووووووو

Ehab يقول...

زي ما دعاء مواجهات قالت
حسبنا الله ونعم الوكيل

طول عمرنا بنتفرج على نفسنا بنتباع ببلاش وبنموت ببلاش بكل الطرق الفرق المره دي ان الناس كان عندها امل في الخيبه التقيله اللي اسمها القضاء الفقري بتاعنا وطبعا لأنه صناعه محليه بقى هو كمان تقفيل معفن

الريحه بقت معفنه قوي في بلدنا
ريحة فساد
ريحة ياس
ريحة كدب
ريحة مخدرات وخلافه
ريحة فساد على كل لون

سلااااااااااااااااااااااااااام

almasry يقول...

طيب ما النائب العام خلاص طالب بالإستئناف انا عارف انه ممكن يكون مشهدفى المسلسل لكن خلينا نصبر لحد مانشوف النهايه



تحيـــــــــــاتى
المصـــــــــرى

Alkomi يقول...

حسبهم الله و نعم الوكيل

Amgad يقول...

امجيييييييييييييييييييييييييييي
لاءااااااااااااااااااااااااااااا
خليتيني اقلبها تراجيديا
ايه يا بنتي انتي فين قلقانين عليكي والله
لو كان تغيبك بسبب الاحباط او ملكيش نفس تكتبي فاتمني متخليش الاحباط يكون ليه مكان في حياتك مهما كانت الدنيا منيلة بستين نيلة وتذكري حق قرائك عليكي
اما لو كان لسبب اخر فاحنا بجد حاسين بغيابك ووحشتينا

funckydoctor يقول...

قصدك العدالة كلها الوبا
لولا ان بابا أكد عليا ماكتبش فى الموضوع ده كنت انطلقت :(

momken يقول...

ميزان العدل بعيد عنك مااال
الله يميل بختهم

ووضح ان العداله من مغميه عنيها
دى عاميه قلب وعنين وبصيره بعيد عنك

زمان زمان يعنى كانوا بيقوا ان القضاء هو الحائط الاخير
وسمعنا الكام سنه السود دول
عن قضاه مرتشين وقضاه يزنون وانا والله شوفت بعينى قاضى يسرق فى شهر رمضان
اه والله بعينى واتقفش وطلع الكرانيه بتاعه مكتوب مستشار ورئيس محكمه

وفى الاخر اصبحت الاحكام ابعد ما يكون عن نصوص القانون
حسبى الله ونعم الوكيل

تحياتى

هانى المصرى يقول...
أزال المؤلف هذا التعليق.
هانى المصرى يقول...

شكرا قوى على الكلام يا انجى
وشكرا دخولك عندى بجد ببقى سعيد لما الناس تعجب بكلامى
تحياتى