الثلاثاء، 19 أغسطس 2008

ادعوا لى

سلامو عليكو... ازيكوا يا بشر..... مش عارفة المفروض اقول ايه او احكى ايه او اهزر وللا اتكلم بجد بس اللى متاكدة منه ان اى حاجة هاقولها هتبقى سخيفة جدا ......... حالتى النفسية زى الطين فى حاجات بالهبل ماكنتش عاملة حسابى عليها حصلت ..العملية اتاجلت عشان حالة قلبى لا تسمح... منسحبة من الحياة بشدة... مش باعمل اى حاجة بالمعنى الحرفى المجرد للكلمة....بانام معظم الوقت بعد ما كان الارق صديقى الصدوق.... مش عايزة ادخل على مدونتى ولا قادرة اتابع مدونات حد .... مش باتفرج على التليفزيون ولا اعرف اخبار اى حاجة فى الدنيا.....تصرفات الناس باخدها على اعصابى وعندى احساس شنيع بالتطنيش..... قربت ابطل كلام حتى.
ايه بقى لازمة الكلام دة؟؟؟؟؟
ادعوا لى ممكن؟؟ بس ادعوا بذمة بالله عليكم... ادعوا ان حالتى تستقر واعمل العملية واخلص ..
انا مش بازور حد انا عارفة بس اعذرونى اول ما افوق وارجع كدة لحالتى الطبيعية هاقرفكم تانى ما تقلقوش..

هناك 27 تعليقًا:

حمادة زيدان يقول...

أنجي

ربنا معاكي يارب وتخرجي من الحالة دي

زعلتني أوى عليكي ... ربنا معاكي ويستقر قلبك وتعملى العملية وترجعى تنوري الدنيا تانى

أنووووووووووووووووووووووووووووووج

أن شاء الله خير وخلى أملك في ربنا كبير

ياللا سلام
لا اله إلا الله

نونو يقول...

ربنا معاكى
يارب تنورينا قريب
ربنا معاكى هدعيلك كل يوم
ربنا معاكى يا احلى انجى فى الدنيا

Alkomi يقول...

ربنا معاكي

مواطن مصرى نايم يقول...

ايه يا بنتى الجو ده
ان شاء الله حتبقى زى الفل
بس انتى كده روقى
مينفعش الجو الكئيب ده يا اوجه
عيب حتى دا انتى اسكندرانية جدعة
ربنا ان شاء الله حيقومك بالسلامة
و حتبقى احسن من الاول
و انا و الله حدعى لك فى كل صلاه ان شاء الله
ربنا يا رب يقومك بالسلامة
بس لازم تبقى جامده

بلاش الضعف ده
كده المرض يغلبنا

احنا اجمد من اى مرض الحمد لله
ادعى ربنا و ثقى ان ربنا رايد لك الخير

ربنا معانا
اه ما هو انا مش حقول ربنا معاكى
ما هو انتى لما تكونى تعبانة يبقى كلنا تعبانين

كفايه لك بقى
اضحكى عادى و اوعى حاجة تضايقك يا باشا

لو احتجتى اى حاجة انا موجود
اى حاجة تتخيليها

اخوكى اسلام
اخوكى و ابن بلدك اسلام

دعاء مواجهات يقول...

انووج

حبيبب قلبى مالك بس

استهدى بالله كدة

وكلو خير بإذنة سبحانة وتعالى

قل لن يصيبنا الا ما كتب الله

لنا

ولا تقلقى خاالص

وكلو هيبقى تمااام

سلاام ياقمرى

بدعيلك

أحمد بكر يقول...

خير يا انوج بس الف سلامه عليكى
على فكره
كدكتوره نفسانيه ان شاء الله لازم تبقى عارفه ان دى حاله مشهوره و بيمر بيها ناس كتير و غالبا الناس الناجحين قبل ما يحققوا نجحاتهم و بتوصل معاهم لعدم رغبه فى الحياه و حصلت معايا بس متقلقيش مفيش حزن مبيعديش
مستنيكى

عايش... ولكن !!!! يقول...

بجد زعلتينى اوىىىىىىىىى
يلا ان شاء الله خير
وتخرجى من الحاله دى
وهدعيلك ربنا يشفيكى ويشفينى ويشفى كل مرضانا يارب

شـمو نشـادر يقول...

ربنا يكرمك يا اوجى يا رب ..

الف سلامه عليك يا قمر ..

مش عارف اقول ايه بصراحه بس انا زعلان ..

Unknown يقول...

ربنا معاكى وبانتظارك لما ترجعى لما نشوف مين هيقرف مين

mina يقول...

سلامتك الف سلامة .... متزعليش من حد المهم تكونى كويسة

a7md Helal ( المهم ) يقول...

يارب ترجعي لينا بالسلامة

وربنا معاكي ويوفقك في العملية دي

وترجعلنا بالسلامة

وحاولي تكتبي لنا اي حاجة
لان الحياة صعبة من غير شقاوتك

والف سلامة عليكي

Mero.. يقول...

أكيد بتحبي..
خليها على الله ومتنسيش دعاء الكرب والضيق..
ربنا يكتبلك اللي فيه الخير..ويسهلك الامور..
وترجعي بألف سلامة ان شاء الله..
100000000000 سلامة

نعكشة يقول...

شفاكي الله و عافاكي
أسئل الله العظيم رب العرش العظيم ان يهون عليكي

ربنا يعزك يا رب و يكرمك
و يهديكي لنفسك

اللهم فرج كربك و يسر دربك

ان شاء الله كل حاجة هتبقي احلي

شدي انتي حيلك بس

سلام عليكم

Amgad يقول...

انجي
انا مش هعد اقولك انا زعلان
انك مطنشة ومش مبتسمة لحياة
والكلام الهندي ده
ولكن بجد منتظرين رجوعك
اوعي تتاخري واحنا مستنينك

funckydoctor يقول...

ألف سلامة ان شاء الله
فرفشى كده مافيش حاجة تستاهل
بسبجد أنا مش فاهم يعتى ايه حالة القلب ما تسمحش :s
المهم هاكونا ماتاتا وركزى فى أى حاجة والدنيا هتبقى وردى ان شاء الله
ربنا معاكى هدعيلك جامد مووت قوى خالص :)

ميرو انتكة يقول...

انجى حبيبتى ازيك

ايوة كده لما تبقى تعبانة ومخنوقة اكتبى هتلاقينا كلنا جانبك

ربنا معاكى يا رب وتعدى الازمة دى على خير وانا دعيت لك فعلا الفجر امبارح وكلنا هندعى لك ومستنينك لما تعملى العملية وتكتبى لنا بوست جامد قوى وانتى فرحانة ومبسوطة وكويسة باذن الله

سلام يا حبى

منه مرتجى - عازفة الأوتار يقول...

ربنا معاكى يا نجنوج و تخرجى من الحالة دى يا رب
و ان شاء الله تعملى العملية و تبقى احسن من الاول
انا كان بقالى فترة بمر بنفس الحالة دى علشان عملية فى القلب بردو بس مش بالمعنى الطبى ههههه
بس الحمد لله ربنا نتعنى بالسلامة بخسائر قليله جدا و حسيت انى احسن من الاول


ربنا معاكى يا رب و نسمع عنك كل خير

الكاتب احمد كاجوال يقول...

السلام عليكم
بعد التحية و السلام نفيدكم علما بأن مدونة
شباب الصحبة
بدأت المرحلة الاولي من العمل و نحن نقدم الان أجرأ و أكثر المقالات التي تتنوع ,, نرجو منكم المشاركة من جديد ابداء الرأي علي المواضيع وبدأ التعليق

دة أمل ليا و شرف ,, انا حكون سعيد لو تمنحهولي

مجهود أكثر من 5 شهور ينتظر أجابة فرد

و جزاكم الله خيرا علي كافة الاحوال
http://so7bah.blogspot.com/

ويريت تكلميني علي ميلي علشان محتاج مساعدتك في موضوع
mrshawaah@yahoo.com

Ehab يقول...

يا انجي
يعني انتي دكتوره وفي العلاج النفسي ومش عارفه اعراض الأكتئاب
كل الحكايه انك محتاجه حاجه تخرجك من الفكره اللي شاغلاكي العمليه ونتيجتها يعني
لكن صدقيني لو استسلمتي للأحساس ده هتتعبي اكتر عارفه انتي محتاجه دلوقتي لصديق قريب منك قوي
حد فعلا تتكلمي معاه
ولما تضايقي قوي اسهري بالليل ادعي ربنا شويه
صدقيني هتحسي براحه كبيره قوي


الف سلامه عليكي

سلااااااااااااااااااام
اخوكي ايهاب

شفـقــة و إحســــان يقول...

ربنا معاكى يا جىجى ويشفيكى ويشفى كل مريض
وان شاء الله تقومى بالسلامة وترجعلنا احسن من الاول
شفقة

فارس بلا جواد يقول...

أزيك يا أنجي
ليه جو الأكتئاب ده .. ان شاء الله تعملي العملية وكل شيئ يبقي تمام .. بقي اغيب شوية أرجع الاقي كل ده .. يالا بقي اخرجي من الحالة دي بسرعة وارجعي اكتبي بوستاتك الجميلة
بالتوفيق

علم الهسس يقول...

ربنا ييسرلك الأمور
ويعجل بشفائك

وننتظر عودتك

Ahmed Fahmy يقول...

ايه ده ايه ده
اول مرة ادخل عندك الاقي تعب و زعل و طهق كمان
ان شاء الله كله هيبقي تمام و تخفي و وتقومي لنا بالسلامة ان شاء الله
ربنا معاكي يا رب

Unknown يقول...

ربنا يكون في عونك وييسرلك ويشفيكي والله هأدعيلك بس انت شدي حيلك وبإذن الله خير يا انجي خير والله
كل ودي ودعواتي لك بالسلامة والضفاء وربنا معاكي

هانى المصرى يقول...

ازيك يا انجى حالتك طين ليه الحياه حلوه بس لو انتى شوفتيها كده اسمعى منير ..
وشكرا على مرورك وتعليقك الى كان واضح فيه حالتك .

Unknown يقول...

انا بصراحة مش عارفة اقول ايه ولا اساسا متخيلة ان فى بنى ادمين زيكم كدة فى الدنيا والله ..... انا متشكرة على الدعم و متشكرة على الدعوات و ووصلت كلها ماتقلقوش....مش عارفة ارد على واحد واحد لانى مش هاعرف بس كفاية قوى كلامكوا انتوا دة كفاية جدا.....انا الحمد لله باحاول ابقى كويسة لانى انا نفسى زهقانة من الحالة دى وشكرا تانى والله لو فضلت اقول شكرا شهر مش كفاية بردو

كراكيب يقول...

جوجاااا.. ايوة كدة
عايزاكي في كل حتة
عايزة قلمك كدة يبهدلنا مواضيع ورغي في كل ويب سايت وفي كل مجله وكل ملحق كمان
هي اي نعم مجله تحت الكوبري
بس مين عارف يمكن تطلع من تحته بقلمك
او يمكن تفضل هي تحت وتسيبيها انتي بعد ما الفلوس تجري في ايدك وتغيرك وتروحي للي فوقيها

ده كدة بالنسبة للمجله
بالنسبة للتاجات لسة مش قريتها كويس علشان انا لسة صاحية وماما لو لمحتني على الكمبيوتر هتلف سلك الماوس على رقابتي وتكسر عليا زراير الكيبورد وتحبسني جوا الكيسة وترمينا احنا الاتنين من الشباك

همشي انا دلوقتي بكرامتي .. اخلص اللي ورايا كدة واللي قدامي
واجي اقرالك براحتي

miro el niro kwaniro

وحشتيـني على فكرة
وبس بقى علشان انا بقولها وانا مكسوفة اصلا:)