الثلاثاء، 26 مايو، 2009

شوية حاجات فوق بعض


هو البنى آدم مننا ايه غير شوية حاجات فوق بعض؟؟؟
ايمانا منى بهذا المبدأ قررت أنا انجى ابراهيم انى اقول شوية حاجات فوق بعض بما ان دى مدونتى وبما انى نفسيتى ماشاء الله منيلة بزفت مهبب الحمد لله...اصل فى حاجات بتحصل كدة بتخلى الواحد مش عارف يضحك من كتر الاستغراب ان كل دة بيحصل له هو بالذات وللا يبكى عشان هو مقهور ان كل دة بيحصل له..بيبقى متلغبط ومش عارف هو سييء يعنى للدرجة دى وللا دة ابتلاء؟؟ واللى يغيظ اكتر لما تكون انت مش متعود تسيب ايديك للدنيا كدة ومع ذلك تلاقى كل اللى بيحصل انت مالكش فيه ومتقدرش تحله والموضوع خارج عن سيطرتك بالرغم منك....ايه لازمة الغم دة؟؟؟ اصلى اساسا كنت محضرة شوية احداث حلوة ولطيفة حصلت..
ما علينا يللا نبتدى فى الحاجات الحلوة بقى كفاية كدة غم..

محمود محمد حسن اللى هو صاحب مدونة شخابيط مدونته كبرت ماشاء الله ودخلت كلية الالسن عقبال اولادكوا..هتتنحوا بقى وتذبهلوا وتسالونى ازاى..اقولك انا..اصل محمود دة بيكتب حلو اوى فالدكتور احمد رومية قرر ان كتابه اللى بيتدرس فى كلية الالسن يحتوى فى جزء منه على مدونة محمود كمثال للمقال السردى المحتوى على عناصر فنية...طبعا دى حاجة تشرف بصراحة دة استاذ نقد ولما يقول كدة يبقى دى حاجة تفرح..وانا من هذا المكان المتواضع احب اقولك يا محمود لو سمحت يا شيخ سايقة عليك النبى لتنزل كتاب بقى فاكر انت الرواية العتيقة بتاعتك دى؟؟ كملها بقى وانشرها الله يرضى عليك..مبروك يا محمود عقبال ما اشوفك فى التليفزيون واقول يااااااااااه كنت اعرف الراجل دة زمان..

محمد ممدوح ..مبروك يا عم..انا كنت ناوية اجرسك فى المدونة من زمان الصراحة بس كنت مستنية لما الموضوع يدخل فى اطار الطحن..لالا محمد دة بيفهم متجوزش ولا حاجة بعد الشر دة ابتدى يحقق حلمه ..مبروك يا محمد عقبال اما متلاقيش وقت تكلم حد ولا تبص وراك ولا تفكر ايه اللى حصل وايه اللى محصلش..عقبال ما اسمع عنك من بعيد كدة انك بقيت فظيع واقول كنت متاكدة ان دة هيحصل اصلى كنت اعرفه زمان..

انجى ابراهيم..ايوة انا ايه بلاش اكلم نفسى؟؟ معلش استحملوا..اصل اسمى نزل فى جريدة الجيل صفحة مدونين ومدونات العدد اللى فات..المهندس شمعى اسعد هو المسؤول عن الصفحة دى وهو اللى بيختار المواضيع وينزلها..اختار من عندى بوست قديم اسمه مدمن ونزله..طبعا دى دعوة مفتوحة لكل المدونين اللى يحب ينشر هناك هيبعت التدوينة واسمه ولينك المدونة على الايميل دة
shamei.eng@gmail.com للمهندس شمعى وخلاص بقى كدة..


عبد الله غنيم...انا متعودة ان الناس بيخذلونى دايما وعلى طول عندهم هواية غريبة بعض الشىء هى انهم يحطموا توقعاتى ناحيتهم وميعملوش اللى كنت منتظراه منهم..الا انت..انت من غير ما اتوقع منك حاجة اصلا دايما بتكون الافضل...مع انك اصغر منى وبعتبرك ابنى طبعا زى ما انت عارف بس انا فخورة بيك اوى اننا اصحاب..مخك جبار ومع ذلك مهيس على الاخر ..ذكاءك مش طبيعى ومع ذلك طيب وعسول..خليك فاكر انك انت الوحيد اللى تعرف سر كدة معين انت اكيد فاكره بس انا مبسوطة انك تعرفه..متجيب المعلوم بقى..

بقيت بدون كتير انا..مش عارفة ليه بس يمكن عشان زهقت من الكلام مع الناس..مبقتش اعرف اوصل اللى انا حاسة بيه او اللى انا عايشاه..او يمكن عشان كنت ببقى مستنية دعم من اللى بتكلم معاهم ومش باخده منهم..يمكن عشان احس انى موجودة اصلا..معرفش بس انا بحب هذا الكائن الالكترونى الرقيق اللى اسمه مدونتى..

مش انا اكتشفت انا ليه بحط نقطتين بين كل جملة وجملة ومش بحط فاصلة؟؟ بس مش هقول اكتشفت ازاى..

نفسى ابطل احط توقعات مسبقة وابطل القولية الفكرية بتاعتى دى..دايما الناس بيخذلونى ومش بيعملوا اللى انا متوقعاه..دة عيب فيا انا هما مالهومش ذنب انا الغلطانة..المفروض متوقعش حاجة منهم عشان مزعلش لما متحصلش..كدة هرتاح انا..بس واضح انى فاشلة جدا فى الموضوع دة لانى لما بقنع نفسى انى مش متوقعة حاجة معينة من فلان..انام احلم بالتوقعات دى واخر موقف كان النهاردة..

انا بحب الكتابة..هذه حقيقة..................انا مش جامدة اوى فى الكتابة..هذه حقيقة اخرى..

اكتشفت مؤخرا انى بحب انغام..بشكل خاص انا معجبة باغنية مبتعلمش......عارفين دنيا مسعود؟؟؟ دى ممثلة بس مش مشهورة كانت سكرتيرة احمد حلمى فى جعلتنى مجرما هى هياها البنت اللى انتحرت فى شقة مصر الجديدة وكانت كمان طالعة شغالة فى مسلسل قلب حبيبة..البنت دى صوتها رهيب..بتغنى اغانى الفولكلور ونزلت البوم اسمه محطة مصر...حلو جدا جدا جدا..

انا بحب اسمع تيت راديو من وقت للتانى..بس نفسى يرجعوا زى الاول وبلاش موضوعات المستمعين دى عشان الشلل..اصلها مش ناقصة الصراحة..

على فكرة الكعب العالى هو العقاب الالهى العادل للبنات والستات..بالمناسبة انا مبلبسش كعب عالى ابدا..
لا تنتظر احدا لانه لن يأتى احد...الجملة دى من رواية ان تكون عباس العبد..جملة عبقرية بس اللى يعرف ينفذها بقى..

فى حاجات كتير كتبتها ومسحتها عشان حسيت انها متهمش حد..هى دى مشكلتى الازلية انى حاسة ان كلامى ميهمش حد عشان كدة بسكت بسكت بسكت لحد ما هنفجر ان شاء الله فى يوم من الايام..

.......انجى ابراهيم........

هناك 32 تعليقًا:

محمود محمد حسن يقول...

انجي انا متشكر ليكي اوي انك يعني سيحتيلي كده، متشكر لكلامك ده، وحقيقي الموضوع اداني دفعة كبيرة يا رب تستمر،

المقال ده عجبني على فكرة، وفيه روح حلوة،

مبروك على جورنال الجيل، وإن شاء الله نشوفك في الأهرام ولا اخبار الأدب،

انا متشكر ليكي جدا وسعيد اوي يا انجي بمعرفتي بيكي علشان انتي بنت جدعة اوي،

عابر سبيل (عبدالرحمن محمود) يقول...

استاذه انجى
بجد نفسى اتقطع وانا بقرأ البوست ده
سريع قوى
ونقلاته كتير
بس بجد رائع

مبروك على موضوع الجيل
دمت بخير
السلام عليكم ورحمة الله

طوبة ذهب وطوبة فضة يقول...

بعد الشر عليكى ياقمر والله انتى ذى العسل ربنا يكرمك ومبروك لكل الناس اللى بتحبيهم وان شاء الله الناس دى ما تخذلكيش تانى بس انتى بلاش تسبقى الاحداث وما تلوميش نفسك باستمرار وتقللى من شئنها اكيد كلامك يهم الناس اكتبى بس وما لكيش دعوه

أحمد الشمسي يقول...

شوفي مش هلاقي تعبير عن اللي حصل لي هنا أحسن من تعبير (عابر سبيل) أنا نفسي اتقطع وأنا بقرا البوست ده...

KIMOOOZ يقول...
أزال المؤلف هذا التعليق.
KIMOOOZ يقول...

لا تنتظر أحدا لأنه لن يأتى أحد

الجمله ديه أكثر من عبقرية

Mo7ammed يقول...

ايه الجمال ده
مبروك على حوار جريدة الجيل

ومدونة زى الفل

وبما انى بعشق الطب النفسى واللى بيكلمو عنه

يبقى اكيد هتلاقينى هنا على طوول

بالسلامة يادوك انجى

مذكرات مشاغب يقول...

اولا مبروك على موضوعك اللي اتنشر على جرنال الجيل
مش كنتي تقوليلنا بدري عشان نشتري الجرنال؟

اما بالنسبه لضيقك من بعض الناس لانهم بيكونو اقل من توقعاتك
فبنهيالي اننا كلنا بنتصدم من ناس حوالينا
حتى الشخص اللي بيصدمك هو كمان بيتصدم ويمكن كمان منك
فاذا عرفتي ان كل الناس بيجيلها الشعور ده بتهيالي ده ممكن يخفف ضيقك شويه
انا عن نفسي الاسلوب ده بينفع معايا

اما طريقة النقلات السريعه اللي في البوست بتاعك فانا بموووووووت في الطريقه دي في السرد
لانها من وجهة نظري بتتميز بالتلقائيه والمصداقيه بدون ترتيب او تذويق

تحياتي

مذكرات مشاغب يقول...
أزال المؤلف هذا التعليق.
حكاية لا تنتهي يقول...

اللوم ليس سئ لهذه الدرجه ان تلوم نفسك الف مره خير من ان يلومك احدهم ولو بنظره

مبروك لحضرتك ..... فكرتني تلك التدويه ببرنامج اسمه اخبار خفيفه
لا علينا

كيكى يقول...

انا داخلة النت وعندى يقين تاااام انك نزلتى بوست جديد!!!
بالنسبة لاصحابك سورى مش متذكرة اسمايهم بس مبروك للاولنى ومفهمتش تقصدى اية على ممدوح!!
وسعيدة جداانى اكتشفت ان ليك صديق اصغر منك بيفهك على طول****
وبالنسبة انك النهاردة اتخذلتى من شخص معين مش عارفة لية علطول بحس انك كدة علطول الى حواليك بيخذلوكى
***يمكن عشان انتى حاطهم فى مكانه معينة كبيرة عندك!!!
****انا احلى حاجة اتعلمتها منك
جملة عمرى ما هنسهاااا** مش شرط نكون مهمين عند غيرنا زى ماهمه مهمين عندنا**
الجملة دى ببساطة بتبين بشريتنا على حق
اية تانى كان فى البوست اها
مبروك طبعا طبعا طبعا على نشر موضوعك
الجملة دى تحفة بتاعت الكتابه
و جملة تانيه لاتنتظر احد لن احد لن ياتى قد اية حسيت بالعجز لا حرام دة الموت بعينه لا لا لا
****انا اول مرة افصص بوست كدة واعلق عليه حته حته مش عارفة لية انا بكتب التعليق با عصاب مشدودة
انا برضة زيك فى كلام بمسحة كل شوية دلوقتى حالا اظن ان ولااقولك سلام احسن
عشان حاسة احساس غريب ناحيتك دلوقتى مش عارفة لية
عوووو

adel يقول...

ههههههههههه

ليكي وحشة والله :):):)

ايه بس كل ده

بس عموما انتي بتكتبي حلو قوي و ده رأي انا
واكيد عارف دنيا مسعود و فعلا صوتها حلو جدا .... محسوبك بيسمع الناس دي برضه
يعني بلاك تيما علي وسط البلد علي فيروز كراوية ...من الاخر الساقية و الجنينة و اللي منها :):):)

متحطيش امل الا علي ربنا و نفسك غير كده لا

micheal يقول...

مبروووووك بالنسبة لموضوع جريدة الجيل
أنغام فعلا حد صوته حلو بس مش هي المفضلة بالنسبة لي
مندهش جدا من موضوع الكعب العالي
أخيرا لقيت بنوتة مش بتحب الكعب العالي
أحمدك يا رب
:))
تحياتي

dr.lecter يقول...

اشتات

بتطلع امتي الجريده دي علشان اتابع صفحه المدونات؟.

Foxology يقول...

مبروووك لمحمود
مبروووك على موضوع جريدة الجيل


معلش الدنيا يوم كدة وسنة كدة وكدة :))

ربنا يصلح الحال

تحياتى :)

سقراط يقول...

العزيزة جدا انجي
خليني ابدأ من اخر كلامك
انت نفسك قلتي ان دى مدونتك
يعني تقدري تقولى كل اللى انت عايزاه
لان فى حد مهم جدا تهمه الحجات اللى انت مسحتيها دي
الحد ده هو انجي
..
"لا تنتظر أحد .. لانه لن يأتي أحد"
انا مش متفق معاكي خالص فى ان الجملة دى عبقرية
لان لو الدنيا كلها ماجاتش واحنا منتظرينها
لسه فى ربنا .. موجود
وعلي فكرة انا قريت الرواية دي
وماحستش بأى شكل من اشكال العبقرية
وخصوصا بعد ما شفت فيلم (fight culb)
..
بالنسبة لدنيا مسعود
انا كمان سمعتها
وعجبني صوتها جدا
وعجبني أكتر انها بتغني فولكلور
فى الوقت اللى نص مطربين مصر مايعرفوش ايه الفولكلور ده
اما بقي بالنسبة لانغام
فانان بحترم اى حد بيسمع لها
فبالاضافة لانى كنت بحترمك قبل كده
انا حاليا بحترمك جدا
...
..
.
تقبلي تحياتي

بيكر(baker) يقول...

أزيك يا أنجى يارب تكونى لسه فكرانى
أولا :مبروك ليكى ولمحمود ولمحمد
ثانيا:ليه بتقولى أنك مش بتعرفى تكتبى بالعكس خالص أنتى بتكتبى حلو موت
ثالثا: وكلامك أكيد بيهم حد والدليل أهتمام الناس بزيارة مدونتك والتعليق
مستنى زيارتك منتانى لمدونتى المتواضعه والسلام عليكم
آه نسيت أدعيلى أمتحانات الماجيستير ع الأبواب

hager za3bal يقول...

علي فكره
غلط في حق نفسك انك تكتبي حاجه وتمسحيها.. حتي لو متهمش حد.. تهمك انتي فـ ده بيديلك الحق انك تحتفظي بيها !

عارفه
انا بحب البوستات اللي من النوع ده اوي
بحس فيها تصالح مع الذات حلو

اه نسيت أقولك
مبروك علي المقال
ويارب تحققي كل اللي بتتمنيه :)

NOGA ALEX يقول...
أزال المؤلف هذا التعليق.
NOGA ALEX يقول...

بصي يا انجي انا بحب النوع دة من الكتابه اوى اينعم بحب القصص والمقالات بس بحب اقراها لكن بحب اوي اكتب انا حاسه في ايه وبحب كمان اقرا انتى حاسه بايه او اي شخص بحس ان في كلام لاشخاص مينفعش تقوليه لكن لو مقولتهوش هتنفجري فلازم اعمل حاجه سواء كان الحاجه اللي هقولها حلوه او وحشه بحب اوي اوي اغنية مبتعلمش عارفه ليه لانى مبتعلمش خالص
محمود انا قلتله قبل كده مبرووك بس بقوله تانى عندنا في البيت حاسه بفخر جامدبمحمود مع انى معرفوش بقول لماما فاكره المقال التحفه بتاع انت اكيد في مصر فاكراه يا ماما محمود اللي كان كاتبه بيدرسو المدونة بتاعته في الالسن مش ممكن الولد ده عبقري
مبروك ليكي على الجريده
عارفه انا كتير بتوقع حاجات للناس بس بصراحه عمري ما اتوقعت حاجه وخزلونى وبتوقعلك لا انا متاكده انتى في يوم من الايام هتبقي صحفيه جامدة جدا وهقول يااااااااااااة انتى عارفه الباقي
سلام

roaua يقول...

وحشتني المدونة دي قوي
دايما كنت بدخلها بس مش عارف ملقتش اهتمام أو ايه الي حصل بالظبط
أنا بحب أقرأ هنا بس مش بعلق حاسس اني مش مرغوب فيا
بس انا لما قرأت في أول البوست ان نفسيتك مش رايقة حبيت أقولك كلمة بس
ربنا يروق بالك ويعدل مزاجك ويهديلك الحال يا انجي
ربنا معاكي
وسلام عليكم

roaua يقول...

نسيت صحيح أقولك أنا مين أنا كاتب مصري يعني مدونة كإني أتكلم
إبراهيم العدوي يعني
بس ده حساب جوجل بتاع المجلة
مودتي

Isolde يقول...

دي اول مرة آجي هنا، و مش هتكون الاخيرة... علي فكرة انا كمان نفسي اتقطع... بس انا بحب الجري :)

reem يقول...

بما انى كمان باعانى من ذات نفس الحالة تقريبا فاقدر اقولك التالى
بالنسبة لكونك نفسك تبطلى توقع ..فهيحصل ماتقلقيش ..بس مش هيبقى بسبب انك عاوزة ..لا ده بيبقى بسبب انك بعد ما 95% من الللى بتتوقعى منهم الدعم ..مش بيدعموكى ..ده ان ماهاجموكيش وخنقوكى اكتر ما انتى مخنوقة
بالنسبة للسكوت .. فدى حالة طبيعية جدا ..ماتقلقيش منها ...بس نتايجها لطيفة جدا ..انك بعد فترة بتفقدى قدرتك على التعبير عن نفسك ومشاعرك وبعدها تلقائيا بتفقدى التواصل الانسانى مع الاخرين ..وفى الاخر بتعانى من وحدة قاتلة ..وبعدها بفترة من الجايز جدا انك تبدأى تكلمى نفسك فى المراية ..لانها الشخص الوحيد اللى بيفهمك هو نفسك!
احصرى توقعاتك فى نفسك .. هتعيشى فى اكبر قدر ممكن من الراحة ..
معلش على جرعة الاحباط دى ..بس اهم حاجة تفتكريها ..ان ربنا سبحانه وتعالى اداكى القدرة على الكتابة يا انجى .. وان فى ناس حواليكى ومهتمة باللى انتى بتكتبيه .. وده انجاز مش اى حد يحققه ..ولما الدنيا تخنقك اوى ..افتكرى اللى انتى حققتيه فى حياتك .. مهما كان صغير .. فهو انتصار على تحديات الحياة ..وانك حققتيه بقدراتك بعد توفيق ربنا .. افتكرى انك دايما ليكى دور فى الدنيا دى ..ودور مهم وحيوى فى حياة اللى حواليكى
واخيرا .. وحشتنى مدونتك يا بنتى
ريم

عمرو يقول...

هو انت مش هاتكتبي حاجة جديدة بقى ولا إيه.. أنا مستني وكل يوم باجي هنا
على فكرة علقتلك على البوست اللي قبله

مستني

2ensan wnsan يقول...

سلام عليكم .. ست الضاكتوره اوجي ازيك أخبار الامتحان ايه يا رب يكون فل مش عارف من ساعة ما قريت الكلمتين اللي كتبتيهم عني دول وكل ما اتضايق من حاجه آجي اقراهم اول ما قريتهم مكنتش عارف اقول ايه او اعلق بايه وانتي أكيد مش مستنيه تعليق بس ربنا يكرمك يا انجي احساس رائع ان تحس ان حياتك مهمه بالنسبه لحد ... و انا عندي سر عندي سر خطير انا عندي سر لازم يتشال ف بير :) :) وبعدين الفرق مش كبير اوي يعني دول اقل من سنتين :)

نعكشة يقول...

مش هبقى جبانة

أنا جيت هنا كذا مرة و سبت تعليق و بعدين مسحتة

و في مرة كنت عارفة اني معنديش نت و بعد ما كتبته بعته برضو و راح طبعا


مش عارفة اشمعنى الموضوع دة اللي عامل معايا كدة

يمكن عشان خلاني افكر في حاجات تانية بالهبل غير الموضوع

عارفة اني برغم اني قولت فوق مش هبقى جبانة
بس انا جبانة و مش هتكلم عليها

يلا خير

بقولك

فى حاجات كتير كتبتها ومسحتها عشان حسيت انها متهمش حد..هى دى مشكلتى الازلية انى حاسة ان كلامى ميهمش حد عشان كدة بسكت بسكت بسكت لحد ما هنفجر ان شاء الله فى يوم من الايام..

مش عارفة اجاوبلك عليها ازاي
بس حتى لو جيتي و كتبتي وانا صغيرة كنت بحب مصاصة لولي بوب مش لبان سيما هبقى مبسوطة وانا بقرالك
معرفش ليه

فرحت قوي للناس اللي كتبتي عنهم
ويااااااااا رب دايماً تلاقي اخبار بالهبل تسعدك وسط زحمة الحياة

و يارب يكرمهم كلهم و يكرمك انتي كمان

على فكرة الكعب العالى هو العقاب الالهى العادل للبن

تصدقي .. احتمال اكون بلبسة عشان عقاب
نوع من انواع تعذيب النفس

.......

لا تنتظر أحداً فلن يأتي أحداً

لفترة كبيرة من حياتي كنت بطبقها
و يوم ما فكرت ما طبقهاش الدنيا أثبتتلي إن مفيش حد هيجي أصلاً لما تكوني عايزاة
فشكلي هعود ليها مرة أخرى في القريب العاجل

................

انتي جامدة على فكرة في الكتابة

ليكي اسلوبك
ليكي حاجات كدة مبلاقيهاش إلا هنا
ليكي حاجات بتجيبيها من جوة قوي

انا مقريتش كتير و مش قارئة رهيبة
بس أنا بحس اسلوبك جامد يعني

مش جامد دة يعني حاجة حلوة صح؟؟؟

...........

بيبقى متلغبط ومش عارف هو سييء يعنى للدرجة دى وللا دة ابتلاء؟؟

ابتلاء
اصبري و احتسبي

و بعدين مش هما بيقولولك
اسود ساعات الليل هي اللي قبل الفجر

..........

مكتبتش حاجة من اللي كتبتها قبل كدة عشان اتجدعن و ابعت التعليق

اكتشفت في لحظة ما إني بحب أقرالك و أعرف أخبارك و بتضايق لما بتتأخري في الكتابة

يلا خير

سلام بقة عشان شكلي بلبخ

سلام عليكِ

adel يقول...

انجوج :):)
شكرا علي السؤال و التواصل (كان نفسي ااقول تواصل دي)
ههههههههههههه

الامتحانات يا انجي :(:(:(
طالع عيني بس هحاول انزل حاجة عشان خاطرك :)

------
انا كتبت الرد عندي و هنا قلت عشان متخديش مشوار و اتعبك :):)

زى الهوا يقول...

ايه كل دا ؟؟


عجبنى البوست المليان اوى دا


ومالها نفسيتك ماهى زى الفل اهيه


مبروك على تدوينتك اللى اتنشرت


ومبروك لمحمود مقاله , بس يارب يكون مقال صغير علشان كنا بنضطر نحفظه قبل الامتحان علشان ماتفوتناش اى حاجة منه ,, يارب يكون رحيم بالطلبة الغلابه بتوع الألسن

enjy يقول...

نعكشة:يارب تقرى الرد دة يا نعكوش يارب....
اولا:انا ساعات بكتشف انك زيي من جوة بس انتى بتعرفى تتوافقى بطريقة احسن من طريقتى...
مفيش مشكلة انك متقوليش الحاجات اللى كنتى هتقليها لانك اكيد مش عايزة تقولى حاجات بتعتبريها اسرار ودة حقك طبعا..
متتخيليش كونك بتقرى اللى انا بكتبه وكل مرة تتعبى قلبك وتعلقى وتتناقشى بيفرحنى ازاى..فعلا بنشكح وبستنى تعليقك جدا عشان الاقى حد فاهمنى صح..
تمياتك للناس بان ربنا يكرمهم وصلت يا نعكوشة متقلقيش..
اخر حاجة بقى انتى قافلة التعليقات عندك ومبعرفش اوصلك رايي عشان فى حاجات كتير ببقى عايزة اقولهالك ومبعرفش اقولهالك منين لانى بنسى بسرعة..بس عموما يعنى بالنسبة لاخر بوست عندك اسمه قماش تنجيد يا فالحة مش تجنيد التنجيد اللى هو بتاع الجواز اللى بيعملوا بيه المراتب واللحاف والحاجات دى اسمه تنجيد ركزى تنجييييييييد.....
كمان البوست بتاع تحت المطر متتخيليش عجبنى ازاى..فعلا القصة حلوة اوى وجامدة والقطع اللى فيها والاغنية اللى فى النص كله كله حلو اوى..
كان فى كمان القصة بتاعة البنت اللى كانت فتاة ليل دى وراحت اتصورت وبتاع عجبتنى قفلة القصة اوى مع ان التيمة مكررة بس قفلتها مميزة..
على فكرة انتى جريئة اوى بتروحى اماكن لوحدك وبتعرفى تتصرفى وبتعرفى تستمتعى بوقتك مع نفسك انا مبعرفش اعمل كدة خالص...نفسى اجرب اتفسح مع نفسى وامشى مع نفسى واعيش كدة اكيد هجرب فى يوم من الايام....اكيد وهيبقى بسببك على فكرة

سلام

عالم ماريونت يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

بجد مش قادرة امسك نفسي من الضحك
عارفة
البوست الاخير ده كان مفروض انه التعليق االي انا هكتبه عندك ردا على البوست بتاعك
اموت وعرف لغاية دلوقتي
ياترى اية الي خلاه يبقى بوست؟؟؟؟؟؟؟؟

يعني انا دخلت فين وانا بكتب لك التعليق؟؟؟؟

لا والانكت بقى
اني مأخدتش بالي من كدة غير النهاردة بس مع اني كتبت التعليق او البوست مش عارفة بقى من كام يوم كدة
عموما بجد انتي زي العسل يا انوج ربنا يكرمك يارب

وانتي تستحقي اصلا اكتر من كدة
بحبك اوي
:)

نعكشة يقول...

ممممممممممم يمكن
احتومال
بس إني بعرف أتوافق ديه أعتقد إنها غلط لإن طريقتي في التكيف مع اللي حواليا بتبقي بالانعزال و إني و اسيب جزء صغير مني بس اللي موجود مع الناس
فمتلاقيش كلاش معاهم ( الناس اللي برة)

انما اهل بيتي مش هينفع انعزل طول الوقت معاهم

فبنتعرض لكلاشات رهيبة

ودة اكبر دليل اني مبعرفش اتوافق
.................

سعيدة بحتة حقي في اني مقولش :)

............
أنا مبتعبش قلبي على فكرة واا بكتب .. أنا بلاقي التعليق طلع :D
بس انا مش دايماً فاهماكي صح

بس بما انك حاسة كدة
فأوك

............
الله يكرمك
........
يا حلااااااااااوة
هههههههههههههههههههه
العلم نور والله
طيب سؤال
هوه معترض ليه برضو إني مش عارفة قماش التنجيد؟؟؟
يلا مش مشكلة
..

الله يخليكي .. رفعتي معنوياتي :$
...

اختي برضو علقت على قافلة القصة دية إن فيها أمل

الغريب في الموضوع إني ملاحظتش إلا لما قالتلي .. والله انا مش عارفة أنا بكتب ازاي هههههههههههه
........

ولا جريئة ولا بطيخ... و أنا افشل واحدة في التصرف بس الفكرة إني مبتكسفش إني أسئل
وعندي متعة شديدة في اني اسئل لحد ما أعرف
فيه ناس كتير أعرفهم مبيحبوش السؤال
انا مش منهم
............
من جهة الاستمتاع مع النفس

هسألك سؤال

مجتش عليكِ أي لحظة و أعتقد انهم كتير .. حبيتي تقعدي لوحدك؟؟؟

و بتحسي لما حد يقرب منك انك مش متقبلاه لإنك نفسك تقعدي مع نفسك

بدل ما تقعدي مع نفسك و تبكتي فيها و تقرفيها و تقعدي تعيطي ولا تعملي اي بتاع

جربي انك تدلعيها

أقولك حاجة بما انك عايشة في اسكندرية

بعد ما تخلصي امتحانات

الصبح بدري خدي معاكي كتاب و اقعدي على البحر و اقري و اخرجي و اركبي الترام اللي بيمشي يلق دة و خدية من أول محطة و افضلي راكباه لحد آخر الخط
أو انزلي في أي محطة لما يقف من غير ما تعرفي إنتي في أنهي واحدة
و اتمشي .. اتفرجي على الناس
عالبيوت
علي المحلات
اركبية تاني عشان توصلي بيتكوا
انزلي منه و جيبي الفطار لأهلك و ارجعي

دة كبداية

اقولك حاجة

بيبقى ساعات نفسي ألاقي واحدة مخها طاقق و تخرج معايا
بس للأسف
او يمكن دة كويس ليهم هما

كل صحابي
عيب
هوس
بس
لأ مينفعش

وانا بتفقع من كدة صراحة

فمفيش حد ليا يدلع أنا غير أنا

يلا خير

لو خرجتي مع نفسك أبقي احكي :D

يلا خير

مش عايزة اقولك هذا التعليق اشرقني قد إيه

سلام عليكِ