الجمعة، 1 مايو، 2009

بعض التعقل لن يضير أحدا

هل وقفت امام مدفع من قبل؟؟
اذا كانت اجابتك لا فأنت حتما لم تدخل فى نقاش مع احد افراد جماعة الاخوان المسلمين من قبل.
انا دخلت..وقفت امام المدفع..حاولت ان اتحمل القذائف الحية..وضحكت كثيرا ..
البداية كانت فى مدونة أحد أصدقائى ..منشق عن الاخوان..طريد الفردوس..ملعون من الجماعة..
يذكرنى الامر بجماعات الجاسوسية او نوادى السحر الاسود اذا ما رأيت الهجوم الذى يواجهه..
بالطبع لا اقصد ان اتهمهم باى من هذا ولكن اذا رايت الطلقات النارية لجاء فى ذهنك حتما انه سوف يصفى قريبا لانه يعرف اكثر مما يجب او لانه عرف الشفرة السرية التى تتم بها مراسلاتهم او الخطط العسكرية التى ينوونها..هنا لا ادافع عنه ولا اريد ان ازج به فى الموضوع اصلا ولكنى اناقش المبدا من الاساس..
تجد فى التعليقات حربا ليس بدايتها عد يا اخى الى حظيرة الايمان وليس اخرها هل اذكرك بمعاصيك وذنوبك وبالطبع تحتوى الردود على بعض الاتهامات النكراء التى تذهب بصاحبها الى جهنم قذفا بالمنجنيق.
لا اعرف لماذا يهاجم الاخوان من ينشق عنهم بهذه الصورة البشعة..فى وسط كل التعليقات لم اجد الا صوت متعقل واحد فقط حاول ان يحسن صورة الجماعة وعلق تعليق يحترم جدا وحاول ان يفض الاشتباك..للحظ هناك موضوع اخر على مدونة اخرى يهاجم فيها واحد من الاخوان بعض الافراد وقد بدا التراشق بالالفاظ واضحكنى اننى لم اجد صوت متعقل الا نفس الشخص الذى علق على الموضوع الاول..واحد فقط يعرف ما عليه ان يقول وغير متعصب..كارثة فعلا.
اعترض على جماعة الاخوان المسلمين بشدة وعنف..اعرف اننى لا استطيع ان افرق بينهم لان النماذج المتعصبة التى تغلق ذهنها امامك كثيرة جدا..
شاهدت بعض نقاشاتهم مع من يختلفون معهم فى الرأى وفوجئت انهم يعتقدون انهم يقفون على باب الجنة ..يصنفون من سوف يرضى عنه الله ومن هو المطرود من رحمته طردا ابديا..
هم المنزهين و الافضل على طول الخط..لا اعرف ما الدليل بصراحة شديدة..
ارى ان جماعة الاخوان المسلمين لا تختلف كثيرا عن حيتان الحزب الوطنى..الهدف واحد.. لعبة السياسة مفضوحة تماما..هناك من ينفون هذا بشدة وهناك من يقروا ويعترفوا به مما يدلك على مدى التخبط ..
انتقد عدة مظاهر تظهر بكثرة فى الجماعة..مثلا تأليه المرشد وتنزيهه..هو بشر لا يختلف عنى وعنك هو ليس اله كى تحيطوه بتلك الهالة المقدسة..لا احب الاسلوب الذى يتعامل به الاخوان مع الاعضاء..غسيل مخ من العيار الثقيل جدا..كلهم يقول نفس الكلام بنفس الترتيب..ليس هناك اى تنوع فى الاراء..بالاحرى ليس هناك اراء اصلا ولكن هناك مسلمات كونية هى اراء الكبار والتى لا تناقش ولا ترد..ادعوك لحضور اى صلاة عيد مع الاخوان المسلمين..هى نفس الخطبة فى كل سنة لا تتغير اعتقد انها ورقة واحدة يتداولونها واذا فقدت سوف يلغون صلاة العيد – بالطبع خاطر مضحك ولكنه حقيقى جدا – هناك ايضا عادة غريبة لتلك الجماعة وهى لعن كل من ينشق عنهم خاصة اذا كان عضو فعال ونشط..فجأة يصبح زنديق يرتكب كل الموبقات والمعاصى التى يندى لها الجبين..يهاجمون كل انواع التحرر بدءا من قراءة الادب – لان هناك بعض الكتاب يخرقون التابوهات المقدسة مثل الدين والجنس – مرورا بالغناء انتهاءا بالسينما والمسرح..هنا لى وقفة صغيرة..هل يريدون للبنى ادم مننا الا يخطىء ابدا؟؟ كيف سوف اتعلم اذا لم اجرب؟؟ تخيل معى..اتينا باذكى ولد فى مصر ووضعناه فى غرفة معزولة عن العالم الخارجى عدة سنوات ولسبب ما اضطر للخروج الى هذا العالم ماذا هو مصيره؟؟ بالمنطق والعقل اقول لك سوف يضيع فالحياة ارحب كثيرا من ذلك المفهوم الضيق للخط المستقيم فنحن ببساطة شديدة بشر..اذا لم نخطىء لن نفعل الصواب واذا كان الله يريد لنا ان نكون جميعا انبياء لن يخلق لنا نفوس ضعيفة من الاصل...الالتزام رائع ولكن هناك شىء اسمه الضعف البشرى وحدود الانسان ارجو ان تراعوها قليلا..
هناك ايضا معضلة منتشرة بين افراد تلك الجماعة وهى عدم القدرة على تقبل الاخر..جارنا الاخوانى لا يرد السلام على بالمناسبة ولا اعرف لماذا مع اننى لا اذكر اننى امتلك ميكرو جيب او اعمل فى ملهى ليلى.. صديقتى التى التزمت فجأة وانتقبت واندمجت مع الاخوات عالمات الفقه واصول الدين – بالاجتهاد الذاتى ومعظم المعلومات قشور – ترى ان الله سوف يهدينى قريبا واتزوج واقتنع ان اسمى رسالة هى الامومة وان الزوجة حورية وكلام من هذا القبيل مع ملاحظة انها كانت تريد ان تكمل تعليمها بعد الجامعة ولكن خطيبها جزاه الله عنا خيرا غير كل الترتيبات.. هناك ذلك المدرس الوقور الاخوانى الذى مسح برنامج عالم سمسم من على الجهاز كى لا يردد ابنه ان هناك من يدعى عم جرجس..سؤال يطرح نفسه بقوة..هل سوف يتقبل هذا الولد اى رأى أو هوية اخرى عندما يكبر؟؟ فرويد يقول لا وانا اتفق معه بعنف..
لا اعرف لماذا ايضا الاحظ بعض من طاقة الغضب داخل عقل الكثير من الاخوان؟؟ فعلا اريد ان اعرف..لماذا تلك الفرحة الطفولية عندما تجد من هو ادنى منك مرتبة – كما تعتقد طبعا – وتبدا فى انتقاده ولومه وعيناك تلمع ببريق الانتصار؟؟ لماذا تنفون بشدة ما يقره بعضكم المتعقل؟؟
لماذا لم تستمعوا الى كريم – التعليق الوحيد المحترم الذى تكلمت عنه سابقا – عندما قال نريد مستوى ارقى من الحوار؟؟ بالطبع لا اتكلم عن هذا الكريم فى ذلك الحوار تحديدا ولكنى اضرب مثالا فقط فبالتاكيد هناك امثال كريم بينكم.. لماذا تفتشون بعناية شديدة عن مواطن الضعف فى البشر وتضربونها معتقدين انكم افضل؟؟ لماذا تصنفون نفسكم اصلا على انكم الافضل دائما؟؟
اعتقد ان اسلوب التربية داخل الجماعة والقائم بشكل اساسى على العزل ثم التلقين هو السبب..فهناك الكثير من الاخوات – لا اطيق تلك الكلمة بالمناسبة – الذين يرددون بعض الفتاوى والكلام الركيك للغاية والذى لا يقنع طفل صغير ومعتنقينه بشدة ولا يتفاوضون..لماذا خلق الله لنا العقل؟؟؟ هو ليس مجرد جزء من تشريح الدماغ بالمناسبة ولكن له استخدامات اخرى..
اعرف ان هناك من سوف يقول ان هدف الاخوان هو اصلاح المجتمع و انا ارى ان اسوأ انواع الاصلاح هو الاصلاح الموجه نحو اغراض اخرى..لا اعترف بضرورة انتمائى لحزب او جماعة كى اكون عضو فاعل ونشط فى المجتمع..هناك من الطرق الكثير جدا..
بقى ان انوه انى اعترض على الاخوان المسلمين ككتلة و جماعة سياسية ولا اهاجم اشخاص معينين ولا تعنينى اتجاهاتك الدينية ومعتقداتك السياسية ولكنى فقط اناشدك ان تكف عن حرق دم مخاليق ربنا..
ايضا اريد ان اقول ربنا اللى بيحاسب يا اخوانا وكل واحد يخليه فى نفسه الدنيا هتبقى فل..بس اسمع كلامى.

...........انجى ابراهيم...............


هناك 33 تعليقًا:

ليكوريكا يقول...

يا انجي ...

اسمحيلي ارفع ليكي القبعه

انا مختلف كثيرا مع الاخوان

وكثيرا ما تحملت الطلقات الناريه التي يطلقونها

ليس الاخوان كأفراد ...

فلي اصدقاء كثير منهم واعتز بصداقتهم

ولكن الاخوان كفكر كما وصفتيه انتي بمتهى البراعه ...

اسمحيلي احييكي مره تانيه ...

ويارب اهدينا كلنا لما يحبه ويرضاه :)

صوت من مصر يقول...

نعم انهم المدفع مع انى ارى عكس ذالك بالنسبه لهم فهم فى الكلام دكاتره فى الفعل اندال

نعكشة يقول...

في الحكيكة وفي الواكع

نظراً لإني معرفش حاجة عن الأخوان تقريبا

بس زي ما قولتي فيه ناس منهم كريم
و اعتقد إن صحبتي ( من الاخوان) عادي تناقشت معاها
و أينعم محاولتش تفهم وجهة نظري بس نو بروبلم يعني مكفرتيش ولا انا شيلت منها


بالنسبة للأخوان كمبدأ يعني و منهج
فأعتقد والله أعلى و أعلم أنه خاطيء ليه لإن سيد قطب ( اللي هوه حد مهم عندهم اعتقد) اخويا وراني في كتاب ليه إنه سب أحد الصحابة

اانا لا اتبع الاخوان و لا يضايقوني في شيء صراحة
زي بالظبط أي حد تاني في المجتمع
صوفي شعائري أي حاجة يعني

انا معترضة بس معاكي في حتة معينة .. اللي هوه البنت قالتهولك ( الامومة أسمى رسالة للبنت)
اعتقد والله أعلم برضو إنه فعلاً كدة
لإن مين القادة اللي هيمسكوا البلد .. هيبقوا رجال... لو مكانش فيه وراهم أم ربتهم صح و علمتهم صح .. مش هيبقوا رجالة أصلا
لو قدرت بجانب دة إنها تفيد المجتمع بشكل آخر ( أي مجال في الحياة ) يبقى قشطة و آخر تمام
و لو متجوزتش بقة يبقى تفيدة بوظيفيتها

وليكن

المهم
عندي اعتراض آخر

بالنسبة للعقل
مليش دعوة هنا بالاخوان ولا بتاع بس هتكلم عن العقل بالنسبة للدين يعني

فيه بعض الاشياء في الدين لا يفسرها العقل و الواجب فيها الامتثال التام لأوامر الله

يعني مثلا ليه بنمسح على الجورب من فوق مش من تحت لما بنتوضى عليه ( مع إن اللي تحت هوه اللي بيتوسخ)
دة مش مشكلتنا
هوه جالنا كدة و خلاص..
ليه بنصلي 3 ركعات في المغرب مش 4 مثلا

دية حاجات مينفعش فيها اعمال العقل

فيه اشياء كثير في الدين لا يجب فيها اعمال العقل

طيب هتقوليلي إيه فايدة العقل يا طنط

هقولك ربنا قال إيه ؟؟؟ أفلا تتفكرون

التفكر و التفكير في الكون من حولنا ( فيزيا كيميا جيولوجيا انسان حيوان نبات زراعة ....هلم جرجر) و العلوم و الحاجات دية

دة اللي اعرفه يعني

...........

انا مش مع الاخوان
ومليش دعوة بيهم أصلا بس أعرف صحابي منهم و بيقولوا سلام عليكم عادي
وب يسلموا و كل حاجة

مش كل الناس متشددين يعني

بس

طبعاً مفيدتكيش في الموضوع نفسه لإني معرفش حاجة عنهم

سلام عليكِ

ABOALI يقول...

جميل جميل
ايه الكلام الجميل ده
ولكنى ارى
اننا ننقاش وننقاش وننقاش
ولا نعرف ما هو موضوع النقاش
لم اعرف
ما هو الفكر بتاع الاخوان
ممكن يكون الاشخاص ينفذون الفكر خطء
مثلما ننفذ نحن الكثير من التعاليم خطء
فهذا ليس عيب الفكر وانما عيب المنفذ

لذا الاحكام على المطلق هى احكام غير سليمة
ولا تخضع لاءى اساس علمى او منهجى

وعذرا"
عندما ينقاش فكر دينى
يكون اهل الاختصاص
هم من ينقاش
يعنى من درس العلوم الدينية
سواء كليات الازهر او الكليات ذات الصلة

فنحن مهما نهلنا من الدين فنحن لم نلم بكل شيىء

حالات البلبلة الفكرية وفرقعة البمب
هى التى جعلت الغيوم تحيط دائما بنا
لاءننا ليس عندنا منهج للنقاش


تحياتى على طرح رايك
ولكنه راى من الاراء التى لها ما لها وما عليها

ايوشة يقول...

بصى ياانجى انا مش بحب مبدا الاحزاب عموما يعنى اللى عايز مصلحة البلد مش هينضم لحزب معين المبدا هنا مختلف مش كل انسان ملتزم هو من الاخوان والعكس
بمعنى ان الالتزام مش متربط بحزب ومش شريط نطلق عليهم مسمى انا ارفض التشدد والتعصب باى صورة لكن لا انتقده اللى عايز يلتزم ويتشدد ده حريته الشخصية لكن دون راغام غيره على ده
الاسلام دين تسامح وتحاور وجه لتنظيم شتى العلاقات الانسانية والالتزام بالدين بكل جوانبه لا يفرض علينا نبذ المختلفين عنا
لكن انا لست ضد او مع الاخوان او اى حزب تانى
كالعادة اسلوبك رائع دائما فى عرض افكارك ماشاء الله عليكى

msafa يقول...

المرايتهم بتاعتهم بس

adel يقول...

عودي الي صوابك يا انجي ارجوكي

استغفر الله العظيم ايه الكلام ده

عيب عيب عيب

هههههههههههههههههههههههه

مش خافية حد يطخك بعد الكلمتين دول ولا ايه

علي العموم لو مدونتك متراقبة اديني بقوي

انا معرفش انجي دي ابدا

ههههههههههههههه

اه كله الا كده
--------------------
كلامك كله صح

مش هامضي عشان متبقاش دليل

غير معرف يقول...

انا دخلت..وقفت امام المدفع..حاولت ان اتحمل القذائف الحية..وضحكت كثيرا ؟؟؟؟؟؟؟

ليه الضحك هو المدفع كان بيضرب اكسيد النيتروجين الثنائي
ولا الضحك علي اساس ان ده مدفع رمضان

عموما كل سنة وانتوا طيبين

dr.lecter يقول...

انا نص اللي اعرفهم من الاخوان لان شغلي احتكيت بهم وفيه منهم زملاء

بصي انا ليا نظره حياديه تماما بعيد عنهم

انا بحترم الاستاذ حسن البنا ومن المعجبين به وجدي رحمه الله كان من تلامذته في بدايه تكوين الجماعه

بعد كده اقفلي عليهم بالاضبه والمفتاح

معهرفش ايه اللي حصل لهم

لكنهم اتغيروا تماما مابقوش زي زمان

انا جري محاوله لضمي لصفوفهم من 3 سنين علشان افتكروا اني زيهم واني باعلملهم بالحسني واني عندي الاستعتداد الفطري

طبعا انا مخبيش عليكي كنت قلقان شويه ود
خلت وسطهم لكن مامنتش بمنهجههم لانه ماينفعنيش اصلا وبعدين هم نفسهم متناقضين جدا

بيمزجوا الدنيا بالدين بشكل غريب

وله اساليب ملتويه

مش كلهم بصراحه

فيهم ناس محترمه جدا وناس بجد اتبسطت اني عرفتهم

ناس المفروض ان دول يبقوا الواجه المشرقه للاخوان

غير كده انا لا يمكن اقبل انهم يحكموني في يوم من الايام

رغم اني رشحتهم ايام الانتخابات من 4 سنين مش اكتر بس من النكايه في الحزب الوطني

على باب الله يقول...

متفق معاكي في كل كلمة

KIMOOOZ يقول...

استاذه انجى
السلام عليكم

انا هذا الكريم اللى علق فى المدونه اللى بتقولى عليها

عندى كام نقطه كده عايز اعلق عليهم
لازم تعرفى يا استاذه انجى ان الاخوان دول مش تلاتين اربعين واحد نقدر نعمم عليهم قاعده معينه و لكن بما انك بتدرسى علم نفس فأنتى اكيد تعرفى كويس ان التعميم اللا منطقى شىء قاتل لأى حوار فى الدنيا ده لأن لو عندك قناعه ان الاخوان اللى عددهم قرب على المليون فى مصر كلهم بيتصرفوا بنفس تصرف العشره اللى شوفتيهم و جبتى منهم امثله فى البوست يبقى مش هتقبلى اى كلمه هقولها
عايز اقولك ان مش بس فى ناس بتتصرف غلط فى الاخوان لكن فى ناس كمان حراميه و ناس نصابين كمان لكن مش همه دول الاخوان
الاخوان يا استاذه انجى فكره اكتر ما هى جماعه يعنى محدش بيقيم الفكره بالاشخاص اللى بتحملها لأن الفكره هتفضل طول عمرها فكره و الاشخاص اللى شايلنها هيفضلو بشر يصيبو و يخطأو و لكن الفكره برضه محتاجه افراد لنشرها و عشان كده فى جماعه اسمها الاخوان المسلمين

ادعوكى لقراءة رسائل الامام البنا و اوراق من تاريخ الاخوان و مذكرات الدعوه و الداعيه و غيرهم من كتب الاخوان لتعرفى من هؤولاء اللذين تتحدثى عنهم

اقول لكى مره اخرى انا استاء جدا من تشبيهى بأحد افراد الحزب الوطنى فالفرق كبير جدا واضح لكل ذى نظر فالفساد لدهم منهج يا اختى و لا احسبنا كذلك و لا نزكى انفسنا على الله

مناهجنا مكتوبه و شارحه نفسها و لكن للأسف لا احد يقرأ و يحكم علينا فقط من اخطاء بعضنا و كتابات منتقدينا و لكن لا احد ينظر اطلاقا لمميزاتنا و تضحياتنا لهذا الوطن حتى لمجرد العلم بالشىء لا للإنضمام للجماعه

و شكرا

Foxology يقول...

شوفى يا انجى انا عاصرت وعايشت الأخوان فى اكبر تجمع ليهم وهو جامعة الأزهر لمدة خمس سنين هى فترة دراستى واقدر اقولك حاجة واحدة

الأخوان عبارة عن دماغ واحدة ليها كذا دراع الدماغ هى اللى بتقرر وبتقول والأذرع هى الأعضاء بتوع الجماعة اللى بيردوو وبيعملو نفس اللى بتقوله وتعمله الدماغ بدون اى تفكير او تدبر وحصل مواقف كتيرة جدا فى المناقشات بينى وبينهم وبين زمايلى العاديين وبينهم وبتحصل اننا بنزنقهم فى الكلام لأننا بنفكر بعقلنا قبل ما نتكلم ودايما كان بيبقى شكلهم وحش لكن مفيش فايدة

زى ما قولتى للأسف هما لاغيين العقل تماما زى ما يكون بيتعملهم غسيل مخ بصفة منتظمة

احنا بشر ومينفعش نكون غير بشر .. عمرى ما احترمت حد بيصر انه منزه ومقدس وانهو هو الوحيد اللى بيفهم وصح وبقيت الناس ملهاش لزمة

تحياتى وربنا يهدى :)

مواطن مصري يقول...

تحية كبيرة و اسمع ضرب نار للبوست اكثر من الرائععععععععع دةةةةةةة

لا اعرف لماذا يهاجم الاخوان من ينشق عنهم بهذه الصورة البشعة..فى وسط كل التعليقات لم اجد الا صوت متعقل واحد فقط حاول ان يحسن صورة


هكذا هو حال جميع الظلامين سواء الاخوان و اخوتها و المسيحين المتطرفين و الصهاينة


لائن مبدائهم لا تناقش ولا تجادل يا اخ علي لائنك لو عارضت رائيهم هتكون كافر و زنديق و خاين و عميل ل امريكا

الظلامين عدوهم الاول العلم و العقل

جميع الظلاميون مغيبون ليس لديهم عقل
و يكفرونهم مثلما فعلو في فرج فودة و نجيب محفوظ

لائنهم يعرفون ان من لديهم عقل و علم

اقوى منهم

مذكرات مشاغب يقول...

بعض التعقل ان يضير احدا
بجد جبتي من الاخر يا انجي

اصله مش معقوله ان كذا مليون شخص متفقين على كل القضايا بالنص
ده حتى طريقة كلامهم والفاظهم بتكون من النص
يعني لو فيه اتنين شخصيتهم قريبه اوي من بعض
لازم هيكونو برضه مختلفين في بعض وجهات النظر
لكن تخيل ان ملايين متفقين على كل حاجه وبالنص
يباه ده مستحيل

المهم انهم بيشتكو من الحزب الوطني لنفس السبب
لان الحزب الوطني برده كل اعضائه بيكونو متفقين على كل حاجه

على الرغم اني ليه كتير من اصحابي المقربين من الاخوان
لكن هم عارفين تحفظاتي على ارائهم

اهم حاجه في موضعك ده انه كان بعقل وبمنطق
مش كلام والسلام

كفايه كده اصلي بحب اتكلم في السياسه
ولو مبطتشا مش هبطل خالص
وهخلصلك المدونه دي

تحياتي

غير معرف يقول...

بعد كلامك مش نافع اتكلم

اجدع سلام وتحية ليكي

hamada يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

سقراط يقول...

انا كمان مش بحب الاخوان على الاطلاق
علشان الاسباب الكتير اللى قلتيها
والاهم علشان فكرة انغلاقهم على نفسهم
والغريب ان الناس فعلا بيتعاملو معاهم على الاساس ده
لانهم عارفين ان الاخوان مش بيساعدوا حد بره الجماعة
وده بعيد تمام البعد عن فكرة الانفاق
ومن غير الدخول فى مناقشات ده مش مكانها ولا وقتها
بجد بحييكي ع التدوينة الهايلة دى
وانا شخصيا متفق معاكي قلبا وقالبا
سلام عليكم

بيكر(baker) يقول...

ازيك يا انوج ربنا يكملك بعقلك و يارب كل الناس تبقى عاقله و هاديه و متحضرة ايا كان فكرهم كفيانا بجد
دمتى بخير

محمود محمد حسن يقول...

طبعا انا المقصود فوق ، وانا الصديق الإخواني المنشق المتبهدل ،

حقيقة الفترة اللي الواحد قضاها في الإخوان استفاد منها بحاجة مهمة جدا ، إن ربنا يستر على مصر من الإخوان والحزب الوطني ،

الإخوان تقدري تسميهم القالب الواحد ، الواحد منهم بيدخل قالب يطلع حتة واحدة ، نفس الشكل ، نفس الكلام ، نفس الفكرة ، عارفة اي صناعة فيها حاجة بتتصنع على قالب ، اللي ما بيطلعش مطابق للقالب ده بيرموه ،


اوسخ ما في الإخوان بقى انهم يمارسون السياسة باوسخ ما فيها ، بكل مكيافيللية ، الإخوان يسوقون داخلهم ان الجميع يريد استغلالهم ، ويريد الجميع التلاعب بهم سياسياً لذا فإن مناوراتهم ومحاوراتهم كلها يبررونها بانهم يتهربون من التلاعب بهم ،

في الإخوان مقولة مشهورة تبرر التلاعب السياسي تقول " إن الجميع على الإستعداد للتضحية حتى آخر قطرة من دماء الإخوان"

علشان كده يفوت الإخوان على المعارضة مثلا فرصة التضحية بهم بعقد صفقات مع الحزب الوطني في دوائر مجلس الشعب ، وبعرض صفقات بالإنسحاب من فعاليات إحتجاجية مثلا مقابل مكاسب سياسية وتفويت من الحكومة ،

يلا ما علينا ، بس البوست موفق ، وتحياتي ليكي

KIMOOOZ يقول...

حاج محمود

ضحكتنى و الله من قلبىممكن يا محمود تجيبلى دليل واقعى على ان الاخوان أوساخ اوى كده فى السياسه المصرية

بس يكون بدليل مش تحليل سياسى اظن فاهم الفرق

عارف يا محمود قصه جحا و ابنه و الحمار

هى هى مع المصريين
لو الاخوان اشتغلوا سياسه يبقوا متلاعبين و اوساخ

لو بعدوا عن السياسه يبقو خايبين و دراويش و ملهومش فى السياسه

لو بقو مشايخ و فى نفس الوقت بيلعبو سياسه يبقو بيستغلو الدين فى السياسه

لو سابو الدين و لعبو سياسه بس يبقوا تخلوا عن مبدأهم وسابو طريقهم

محدش بيعجبه حاجه
بلد عجيبه فعلا

و عن القوالب بقى يا محمود فأنا معاك ان الجماعه اصلا طريقتها تصنع القوالب شائوا ام ابو و لكن برضه لا تمنع وجود مبدعين داخلها و مجددين و هذه سنه الحياه يا حودا و مفيش جماعه فى التاريخ مثاليه الى اقصى حد حتى الصحابه كان فيهم من يخطىء لدرجة خسارة المسلمين فى احد و قائدهم هو رسول الله و كان فى الصحابية اللى زنت و اعترفت و فى المنافقين اللى كانو بين المسلمين و لكنهم منافقين

اظن مش هنكون احسن منهم و انا ضربت مثل بالصحابه مش لأنى وجهتى اسلاميه بس و لكن لأن دول مفيش اختلاف عليهم

كيكى يقول...

ممممممممممممممممممم
عارفة عاملة امسح كل شوية الكلام عشان فى حد هقتلوا ماعلينا ىخلينا فى البوست
******************
اعلق بس بجد مش عارفة اعلق!!!!
طب انا جيت ليه!!!
مش لاقيه كلام بجد اعلق
عوووووووووو

micheal يقول...

متفق معكي جدا يا إنجي
ولكن مصر عموما مبقاش فيها اليومين دول ثقافة تقبل الإختلاف..كله عاوز بفرض رأيه علي التاني ومش مستعد أصلا يسمع مناقشة
الألبون نزل وأنا عارف أنك من الناس السميعة الكويسين
مستنيكي في البلوج
:)
تحياتي

محمود محمد حسن يقول...

كريم آه الإخوان عندهم براجماتية لأقصى حد ممكن ، الإخوان بيلعبوا السياسة بمكيافيلية فظيعة،

في 6 ابريل2008 الإخوان فضلوا يقولوا على الإضرابات فوضى وتخريب ورفضوا المشاركة في الإضراب، انا ما انساش حتى واحد مدون اخواني اهو فاكر اوي البوست بتاعه عن الإضراب

http://elsafina.blogspot.com/2008/04/blog-post.html

لكن الإضراب نجح ، وكان فيه مشاركة، على طول الإخوان ساعتها تحولت الإضرابات إلى حاجة حلوة وجميلة وعمل وطني مهم اوي اوي اوي اوي ، وبرده ساعتها مش حنسى اللينك ده بعديها

http://www.gam3aonline.com/art_read_n.asp?id=5023

هنا بقى الإخوان بيصفوا إضراب مايو بقى اللي كانوا هما الداعين ليه واللي هوا فشل بقى بصفات بقى فظيعة ، وبيعددوا مزاياه عن إضراب ابريل وانه احسن من اضراب ابريل بقى ميت مرة، رغم انه فشل ،

ساعتها انا فاكر اني قريت اكبر كمية مقالات شماته من كتاب إن الإضراب فشل، الإخوان شافوا إن موضوع الإضرابات مشى ، قالوا خلاص اركب الموجة ، مشيها اضرابات ، بعد ما كانت الإضرابات كخة ووحشة، دلوقتي بقت الإضرابات زي الفل ، لكنهم فشلوا

ابقى اقرا المقال ده عن الإخوان والرقص على الحبال

http://www.elbadeel.net/index.php?option=com_content&task=view&id=51363&Itemid=126


الإخوان بيستغلوا المنابر للدعاية السياسية لنفسهم ، بيستغلوا المساجد للدعاية السياسية ليهم ، وده مش صح ، المسجد يجب ان يكون بعيداً عن التسييس ، الإخوان في داخلهم بيستغلوا احاديث النبي صلى الله عليه وسلم اللي في الجهاد وفي الإمارة العامة ليستغلوها عندهم في الجماعة ، كل الأحاديث اللي كانت بتتقال لنا عن الطاعة والسمع كانت احاديث بتاعة الجهاد والجيش ،

KIMOOOZ يقول...

بص يا محمود

اولا بالنسبه للميكافيليه فده على حد علمى معناه الغايه تبرر الوسيله و ده طبعا مش منهج الاخوان لأن لو الوسيله حرام مش هنستعملها حتى لو كانت توصل للهدف أسرع

ثانيا بالنسبه لموضوع الاضرابات و المشاركه فى الفعاليات الجماهيريه فقد اعلن المرشد اكثر من مره ان احنا مش مقاولين افراد اى حد يطلع مش عارف منين يقول يلا يا اخوان اعملو كذا يبقى الاخوان لازم يعملوا الكذا ده عشان يبقوا حلوين يا اما يبقو ولاد كذا

كلنا نعرف ان الاضراب الاول مكنش حد عارف الداعى ليه مين بالظبط و ايه هدفه

و بعدين اللى حصل فى المحله ده و انا راضى زمتك لو كان الاخوان قالو ساعتها انهم يدعو الناس للإضراب كان مين هيلبسها يا محمود و لا نسيت المحاكمات العسكريه عشان شويه عيال مش عارفين يعملو الكاتا بتاعه الكارتيه صح اصلا

و بعدين انت نفسك قلت يا محمود ان كل الكتاب شمتوا فى الاضراب التانى عشان منجحش و قالو ادى الاخوان اللى مش بيعرفو يشتغلوا و مش بيحركو الشعب مع ان الكل عارف ان الفرق بين الاضرابين كان ان عمال المحله اتحركو فى الاولانى و خافو ينزلو فى التانى لكن باقى البلد زى ما هى مفيش تأثير

يبقى مين اللى بيلبس فى الاخر لو كان الاخوان دعو للأول كانو لبسو اللى حصل فى المحله
و لما دعو للتانى بقو همه بس سبب الفشل
اظن ده دليل على خطأ كلامك عن مناورتنا بسبب التهرب من التلاعب بينا لأن ده صحيح فعلا

اما بالنسبه للمسجد فأنا هقولك ان المسجد يا محمود كان هو اللى بيتعمل فى كل حاجه ايام النبى و التابعين كان نقطه تحرك الجيوش و كان مكان العلم الفقهى و الدنيوى

و بعدين لو الحكومه مش عايزه الاخوان يتعاملو بالسياسه فى المسجد عشان بيخافوا اوى على حرمه المسجد طب ما يسيبونا نتحرك بدون تكتيف و تضييق فى اى مكان و انا اوعدك انهم مش هيقولو فى المسجد غير مواعظ و بس

و احاديث الجهاد اللى بتستخدم للطاعه و السمع انا معاك فعلا انها بتستخدم فى غير محلها فى كثير من الاحيان

2ragooZ يقول...

السلام عليكم
بعض التعقل لن يضير احدا
خلونا نبتدى من النقطه دى .. و بلاش لهجة ردود الافعال .. اذا كنا عاوزين نوصل لتحليل دقيق نوعا ما

فى البداية .. احب اقول انى معترض مع الاخوان .. بس من وجهة نظرى انا ..

لكن خلينا نعترف .. ان جماعة الاخوان المسلمين .. اعرق جماعه اسلاميه .. جماعه ليها تاريخ .. مليان بالانجازات .. ومليان بالاخطاء برضو

الاخوان عمرهم ما كانوا من النوع اللى ما بيردش السلام او بيكفر حد .. مش هم دول اللى بيعملوا كده
ولازم ناخد بالنا ان فى جماعات تانيه .. ولان الاخوان على القمه فى حاجات كتير بتيجى فيها

انا شايف ان تاريخ الاخوان .. تاريخ ليه وزن .. الوزن ده يخلينا نفكر ميت مره قبل ما ننقد هذا الكيان ..
بمعنى .. ان مش اى حد ينقدها .. ومش اى موقف او تصرف من شخص او مجموعة اشخاص يدينا الحق اننا نسب ونلعن فيهم

كمان عاوز اقول ان لو تخيلنا مصر من غير جماعة الاخوان .. اعتقد ان هايبقى فى عدم اتزان .. فى الصوره .. هانحس ان اللوحه مقطوع منها حته وحته مش صغيره

طبعا انا باحاول اتكلم باختصار ..
الكلام ده كان لازم اقوله لانى شايف .. ان الجماعه دى بتتحرك .. وبتغير جزء فى المجتمع .. وما ينفعش يبقى فى حد بيتحرك واحنا نشده لتحت .. اكيد هايبقى عندهم اخطاء .. بس ده طبيعى .. لكن اكيد برضو هايبقى فى حاجات صح ..

ده بالنسبه للاخوان وما لهم .. وحقهم

بالنسبه بقه للى عليهم ..

وانا بصراحه ما باحبش اتكلم فى الحاجات دى .. مش لحاجه .. لكن لان ما فيش حد بيعمل حاجه .. فمش معقوله اللى بيعمل هانقعد نجيبه لورا .. لكن خلينا نتكلم بصوره حياديه ..

وكل واحد لازم يتحرك من دماغه

اولا احب اقول ان ما فيش حاجه اسمها منهج .. وافراد .. او سياسه صح .. لكن التطبيق غلط
والا .. فانا عاوز فلوس .. وهاتبع سياسة الشغل .. وده صح .. بس هاشتغل نصاب .. فيبقى التطبيق غلط .. بس انا مش غلطان
النقطه دى مهمه جدا .. لانى كل ما كنت اكتشف خطأ في الاخوان .. يقولولى خطأ فردى .. اقول صح .. وبعدين خطأ فردى .. اقول معقول برضو .. لكن ان معدل الاخطاء الفرديه يتعدى نسبه فى الميه .. يبقى مش خطأ فردى .. يبقى خطأ جماعى ..
ان الخطأ الفردى يطلع من قيادى فى الجماعه .. يبقى مش خطأ جماعى .. يبقى خطأ سياسى ..

ده بالنسبه لقضية الاخطاء الفردية .. والفكره النظريه .. واظن ان المجتمع بقى انضج من انه ينضحك عليه بان الفكره صح بس التطبيق غلط .. انا باعتبرها نوع من انواع التنظير .. او الفلسفه الفارغه .. بيرتكبه الاخوان كجماعه .. وانا اقصد التعميم هنا

وللمناقشة بقية

anas nabil يقول...

//////////////////////
السلام عليكم

**على فكرة البوست دة من أروع من حيث الصياغه..والتعليقات المتداخله
لكن فقط أحب أعلق على بعض الاشياء
التى تخصنى

-دعينى أعلق على بعض النقاط
لأن أنا ممن علق على ذلك البوست
أول: قد يكون كلامى دفعا عن الإخوان
بشكل شرس ...
ليس لأنى منهم فحسب....لكن أنا أسرتى جميعها تنتمى لهذة الجماعه وأنا أفتخر بذلك طبعا ....لذلك قررت أن أتوقف عند بعض الأمور فقط للتوضيح من وجه نظرى ....وبحسب أحتكاكى بالإخوان جميعا وجميع الأعمار وأغلب مؤسساتها


-فقط ليس صديقك فقط هو من ترك الاخوان وكتب التعليقات فى البوست هذا
فقط كان يوجد عدد أخر
ليس هو فقط...إذا الكلام لم يكن موجه له فقط....

-وليس لنا شفرة سريه ليعلمها من بيينا عن الأخر وليس لنا خطط عسكريه ننوى عملها...

*فجميع معلوماتنا موجودة فى منهجنا الذى دعاك الزميل كريم لقراءة هذة الرسائل فهذا منهجنا منذ أن قامت تلك الجماعه سنه 1928 .....

-وليس لدينا شئ لنخفيه عن ومن الناس

*نعم أنا متفق معكى ان أغلب التعليقات أو كلها بالفعل
بمثابه حربا بين أشخاص ...ولم تكن خلاف على أفكار الجماعه ...

-ولم تكن نقاش حيادى حول أفكار البعض

***ولكن ليس هؤلاء جماعه الاخوان
هم فقط بعض الشباب وأيضا
ليس جميع الشباب

...ولكن الذى أوصل النقاش الى هذا الحد
قد يكون:

-هناك أصلا خلفات شخصيه بين هؤلاء الشباب.
-هناك من تلفظ ببعض الألفاظ مما أضطر صاحب المدونه الى حظفها
-هناك من ترك البوست وبدأ يتكلم عن شخصيات بعينها
-والطبيعى ان الأخر كان له الحق فى الرد

***طبيعى هذا خطأ فى كل لغه الحوار فى العالم....

***ولكن جميل أن نجد فى لغه الحوار التى هيه موجودنا فى ذلك المجتمع الإخوانى الكبير ...واحد مثل كريم التى تكلمتى عنه
هناك قمر مضئ وسط ما يقرب13 شخص يعلق فقط ...هذا من وجهه نظرك
وليس وسط الجماعه
واحد فقط

ثانيا:**الإخوان لا يهاجمون من ينشق عنهم كما قلتى
هنا أتكلم عن الإخوان كجماعه
قد يكون الهجوم يكون من أحد أصدقائه
بدافع المحبه والاخوة بتاعت زمان
أو الذى كان صديقه او من الأشخاص الذى هو احتك بهم وكان يريهم مدى انتمائه بتلك الجماعه هؤهلاء من يهاجمون من تركهم
بل الإخوان يرون لماذا تركهم وإن كان لشئ جوهريا أكيد بيعالج داخل هذة الجماعه ...

وليس هذا هو العموم داخل الأخوان
أنا اعرف أصدقاء لى واساتذة لى تركوا الإخوان وع علاقه طيبه الى الان معهم يقولون لى أن :"الإخوان أحسن الوحشين عشان مفيش جميل أصلا"

-أما عن بقيه البوست بخصوص
انكى لا تستطيعى أن تفرقى بينهم وبين حيتان الحزب الوطنى ...لا أعتقد لماذا قلتى هذا..؟

-نحن بالتأكيد ليس ممن قلتى عنهم أنهم يعتقدون اننا نقف على باب الجنه فقالها عمر بن الخطاب "لا أؤمن مكر الله لو كانت قدمى فى الجنه والأخرى خارجها"

-ولا نصنف من الذى يرضى الله عنه ومن لايرضى الله عنه
قالها رسول الله"لا فضل على عربى ولا على أعجمى الا بالتقوى"
والتقوى ليس فى أن تكون أو ملتحق بالاخوان ....فهذا شئ يستغرب تماما
ولسنا المنزهين والأفضل هناك من هو أفضل مننا بمراحل ...لا أعرف الدليل على هذا الكلام أيضا لانه لا يوجود بداخلنا هذة الأفكار الأخيرة ...

-نحن ليس لعبه سياسيه كما تقولى
-لا أعتقد ان هناك بداخل الاخوان يقر ويعترف أننا لعبه سياسيه
-معكى تماما أن المرشد مثله مثلنا جميعا ولا نفعل ما كتبتيه عنه
فقط نحن نحبه ونحترمه
وإن أخطأ هناك من يقول له أنت أخطأت

بخلاف الاحزاب والجماعات الأخرى
إن أخطأ رئيسها لا أحد يستطيع أن
يقول له أخطات

***هناك الكثير مما انحفظ عليه فى مقالك





ولكن لكى الحق فى ما كتبتيه
فقط لأنك لم ترى سوى ما قلتى عنه
لم ترى سوى التعليقات أو حرب الحوار هذة
لم تحتكى سوى ببعض من الاخوان

أحترم وجهه نظرك كتبت ذلك فقط للتوضيح
لم تحضرى صالون ثقافى لنا
نعم هناك منا من لديه القدرة ع إقناع الاخر
وهناك من لابد ان يحترم قواعد الحوار اولا
نحن لسنا أكمل الناس
هناك أخطا كثيرة لابد أن تتصحح


اسف كثيرا تكلمت كثيرا


وإن كان بالجماعه اخطاء ليس فى منهج الجماعه ولكن فى بعض الأشخاص بها
وبعض الرموز
نحن بشر ....ونبوء بذلك

لابد أن نفرق جميعا لست أنتى فقط بين فكر الجماعه
وبين فكر أشخاص بالجماعه

تقبلى تحياتى لكى

2ragooZ يقول...

السلام عليكم
اسف انى باعلق تانى بس كنت مضطر اقوم وما خلصتش كلامى ..

انا مش عاوز ادخل فى مهاترات .. ومناقشات انا عارف ان مالهاش لازمه ..

فقط .. انا هاسرد نقط معينه .. ولو فى رد عليها يبقى كتر خيرهم

النقطه الاولى اللى انا قولتها فى اخر التعليق اللى فات .. واللى الاخ اللى جه بعدى .. قال برضو اخطاء فرديه..

انا مش هاسرد وقائع تانيه ..لكن هاخد من كلامهم اللى هنا

هل يعقل .. ( حسب كلامه .. انا ما شوفتش .. ومش فاضى اشوف ) .. ان 13 فرد فيهم واحد بس اتكلم باسلوب كويس .. ده يعتبر خطأ فردى .. !!!

النقطه التانيه
هل الاخوان جماعه دينيه ؟؟!!

زمان لما كان الاخوان عليهم حصار امنى .. كانت الدعايه بتاعتهم .. الله اكبر ولله الحمد .. واذكار من هذا القبيل .. فكان منطقى ان الناس دى ما بتذكرش نفسها ..وبتقول اذكار .. يبقى الناس دى فعلا عندها صدق نيه ..
لما الحصار الامنى ده اتفك .. او وضعه اتغير .. الشعارات دى اتمحت .. وبقى بيتكتب جماعة الاخوان المسلمين .. وما فيش الله اكبر ولله الحمد .. او نسبتها قلت عشان ما نغالطش نفسنا .. لكن النسبيه دليل برضو

الدليل الثانى .. والاهم .. مافيش ولا واحد من اللى اتكلموا جاب سيرة الدعوه .. كله داخل يدافع عن جماعة الاخوان المسلمين .. وهنا يتساوى اللى بيدافع باسلوب كويس مع اللى بيدافع باسلوب متخلف .. لانه ما بيدافعش عن وجهة نظره اللى بيدعيها .. بيدافع عن نفسه .. وعن الكيان

النقطه التالته .. العنصريه .. والقبليه ..
الاخوان وفقط دائما لهم الفضل فى نشر الدين
الاخوان وفقط .. دائما لهم الفضل فى نشر القضيه الفلسطينيه
الاخوان وفقط هم من تستمع لعلمائهم

لكن خلينا ناخد من كلامهم برضو ..
( قد يكون كلامى دفعا عن الإخوان
بشكل شرس ...
ليس لأنى منهم فحسب....لكن أنا أسرتى جميعها تنتمى لهذة الجماعه وأنا أفتخر بذلك طبعا ....لذلك قررت أن أتوقف عند بعض الأمور فقط للتوضيح من وجه نظرى ....وبحسب أحتكاكى بالإخوان جميعا وجميع الأعمار وأغلب مؤسساتها )

لو انت مقتنع فعلا بان الرسول صلى الله عليه وسلم قال لا فضل لعربى على اعجمى الا بالتقوى ..
لو انتمائك للاسلام وللرسول صلى الله عليه وسلم اعلى .. من انتمائك للاخوان وللمرشد .. كنت تستحى تكتب الجمله دى ..

انا ابدا ما باشككش فى ايمانك .. او ايمانيات اى حد من الاخوان .. وليس لي الحق فى ذلك ..

فقط عمرى ما سمعت كلمه زى دى من اى حد فى مجال الدعوه غير فى الاخوان قد تكون غفوه .. قد اكون انا مش فاهمها صح .. لكن انا عاوز اوصل انى مش باهاجم اشخاص .. ومش باقلل من ايميانيات اى حد .. انا باتكلم فى فكر اترسخ فى العقول .. وخلاها تنسى ان انتمائنا الاول للاسلام وليس لاى جهه او فرد اخر

وماحدش يقولى جحا والحمار .. انا باتكلم فى فكر وافكار ومبادىء الجماعه .. مش فى اللى الناس بتقوله

يمكن يكون فى حاجات تانيه كتير غير دول .. لكن ليس لها مجال ..

بس انا عاوز اقول ان كلامى ده لا يتعارض ابدا مع كلامى اللى فوق .. الاتنين ماشيين فى خط واحد ..
كمان احب اقول انى شايف .. ان لما واحد ينضم للاخوان احسن ما يقضى وقته فى البلاى استيشن او فى النادى ..لانه اكيد هايستفاد منهم .. زى ما انا استفدت .. وما اقدرش انكر ان الاخوان ساهموا فى تكوين جزء من افكارى سواء عن طريق الايجابيات او السلبيات .. لكن انا محصلتى انى مختلف معاهم .. ممكن حد تانى يكون محصلته انه متفق معاهم .. وله مطلق الحريه فى ذلك

فى النهايه انا متفق معاكى فى الاختلاف مع الاخوان ..لكن من وجهة نظر اخرى

مختلف معاكى فى فكرة النقد العلنى .. لكيان بينفع الاسلام فعلا
قد اكون انا مارست نوع من انواع النقد العلنى ده بكلامى .. لكن بصراحه ردودهم استفذتنى .. كمان انا ما اتكلمتش فى الحاجات المهمه .. انا ذكرت الامور الواضحه وفقط

حكاية لا تنتهي يقول...

لو ان هذا هو الوقوف في وجه المدفع من وجهة نظرك فالبتاكيد نحن نقف في وجهه كل يوم
امام شاشات التلفاز وعلي جرائد الصحف وفي اروقة الجامعات
بالتاكيد للاخوان اخطاء كما لنا
لم تكن تلك الاخطاء لتكون شخصيه ففي البدايه كانت اخطاء سياستهم العامه ولكنها تحولت مع الوقت لاخطاء شخصيه لتعصبهم الاعمي ورفضهم للنقاش المتزن

anas nabil يقول...

السلام عليكم

أخى 2ragooz

أنا لن أدخل معك فى نقاش لن ينتهى بطبيعه الحال
فقط أعتذر لك عن نرفزتك
ولكن الكلام فقط كان عبارة عن بعض التوضيحات لصاحبه البوست
فأعتذر لك بشدة عن نرفزتك

وأ}كد لك كما قلت "أنا بالفعل إنتمائى للإسلام أكثر من الإخوان
ولا أعرف لماذ قلت هذا وما علاقه هذا بالذى كتبته

اخيرا هذة وجهه نظرك بالنسبه لتعليقى
تُحترم عليها
وتعليقى الأخير كان وجهه نظرى اتجاة البوست


واوضخ لك أن ال13 فرد لم يكن جميعهم من الاخوان سوى عدد يتعد ع اليد الواحدة
إذا شخصى أم لا ؟؟؟؟؟


سعيد جدا ان تعرفتك عليك

وهذة وجهه نظرى ووجهه نظرك

لا جديد

وعلى فكرة الاخوان الى الان ومنذ 1928 لم يفك عنهم الحصار الأمنى
نحن لم نفوق من المحاكمات العسكريه الأخيرة
وما زال سجن طرة به العديد من الإخوان معتقلين ظلما من بطش هذة السياسه الذى نعيشها

تحياتى ليك وبكرر أسفى فى النهايه

حقودي يقول...

انجي
اخشي ان يتحول هذا الموضوع
الي مستقر لكل من اراد ان يفرج عن نفسه بذم الاخوان
سواء كان هذا من باب مجاملتك علي اسلوبك في كتابة الموضوع
او من باب تخليص حق وفش غل
واري ان ما تقدم من رأي الزملاء
دليل علي كلامي

بالمناسبه
انا لست من الاخوان المسلمين
لكنني احترم كل فكر
مع احتفاظي بحق انتقاد ما لا يعجبني

تقبلي تحياتي

غير معرف يقول...
أزال أحد مشرفي المدونة هذا التعليق.
shicooo يقول...

عارفة المشكلة فإيه ؟
انهم فعلا مش فاهمين هما بيعملوا كده ليه ولا لصالح مين

والمشكلة الأكبر ان فيهم ناس عارفة وبتطنش مادام فى المصلحة

فكرتهم من برة حلوة وتخليكى متعاطفة معاها بس ساعة ما تسألى عن رأى أى واحد فيهم عن رأيه فى السياسة اللى بيتبعها القادة مش هيعرف يرد إلا بالكلام المحفوظ ......

ربنا يستر ....

غير معرف يقول...

بـالـعـقـل
*بعض الناس يشوه ما يدافع عنه من حيث لا يدري؛ لأنه نفسه مشوه من الداخل، فالعيب هنا ليس فيما يدافع عنه، بل فيه شخصيا؛ لذلك كان من أبجديات المنطق عدم التعميم، وعدم الحكم على الأفكار بتصرفات الأشخاص، ولكن العكس.
*مؤسس الإخوان الإمام حسن البنا –رحمه الله- له مقولة عبقرية ربما توضح كثيرًا مما أريد قوله: (رب من فينا وليس منا، ورب من منا وليس فينا)، طبعا المعنى واضح، ولكن لأني مولع بالاستطراد الممل أقول: المؤسس رحمه الله يوضح أن (مش كل واحد بيقول إنه من الإخوان يبقى فعلا يحمل أفكار الإخوان، وعلى الجانب الآخر فيه ناس كتير لا ينتمون للإخوان تنظيمًا لكنهم يستحقون عن جدارة أن يكونوا أعضاء في مكتب إرشاد الجماعة. بالظبط زي ماإحنا مسلمين كلنا لكن فينا من يشوه صورة الإسلام بأفعاله وقناعاته المشوهة، في المقابل هناك أشخاص غير مسلمين يتمنى المرء بالفعل لو أسلموا لأنهم حقا يجسدون الكثير من قيم هذا الدين، وما جورج جالاوي الكاثوليكي منكم ببعيد.
*حينما نحكم على أمور ليست لدينا حولها معلومات كافية، تخرج أحكامنا جزئية أو ناقصة
* الإخوان لا يقدسون مرشدهم، (ولا أي حد في الدنيا)، وليسو قوالب تردد كالببغاوات ما يسقونه قسرا، ولا أدل على ذلك من التطورات الأخيرة التي حدثت في مكتب الإرشاد، فأي تقديس والمرشد لم يستطع مجرد فرض رأيه على أعضاء المكتب؟ وأي غسيل مخ في ظل هذا التباين في الآراء والاختلاف في وجهات النظر، لكن يبقى في النهاية الاحترام المتبادل، والهدف المشترك.
* لو قابلت إخوان زي اللي بتقول عليهم إنجي في أي مكان، قولهم إنتو مش إخوان، وعلى ضمانتي.
* لو عرفتِ أن من الإخوان من يقرأ للدكتور أحمد خالد توفيق (الكونت كما يحلو لكِ تسميته)، وأنهم أنتجوا مؤخرًا فيلما سينمائيا، ولهم مسرحيات وأغاني وقصص بوليسية، بل هم من أكثر المدافعين عن الفن المحترم البعيد عن الابتذال، ربما ستغيرين رأيك فيهم.
* الدكتور فريد عبد الخالق من أعلام الإخوان حصل مؤخرًا على دكتوراه عن عمر يناهز الـ 95 عامًا، ليدخل بها موسوعة جينيس للأرقام القياسية. وابنتَيْ الدكتور القرضاوي متخصصتين في اثنين من أدق فروع العلم.
* قيل لي مرة: تخطئ جدا إذا كنت تدعو إلى الإخوان، فلسنا دينا جديدا، لكنك تدعو إلى ما هو أسمى من ذلك، وهذا المعنى كفيل بنزع أي بذور للتعصب من القلب.
* اسمعوا منا ، لا عنا..
*والله بنحبكم جدًا...

* أما الإخوان فأقول لهم: بالله عليكم لا تنفروا الناس منكم
تقبلوا الآخر بصدر رحب
لستم الأفضل، ولا أظن أحدكم يمتلك صك غفران، ومن كان منكم يعتقد عكس ذلك، فأقول له: راجع ما علمك الإخوان إياه
جزيت خيرا يا كريم، فقد دفعت عنا، وأرجو من الله أن يدافع عنك.
ماحدش يقول يـ (أخت إنجي)؛ لأنها بتتضايق، ولا حد يقول (الأخوات) أمامها