سحر طبيعى جدا

هذه القصة مهداة الى المدون الشنيع عمرو محمود السيد ..وكما ينص القانون فان هذه الحدوتة للبنانيت الحلوين والولاد المؤدبين اللى بيشربوا اللبن لكن الوحشين الكلبين مش يقروا.. واللى يزعل من هاذوها الكلام يحاسب عمرو السيد انا ماليش دعوة..

كان ياما كان يا سادة يا كرام وما يحلا الكلام الا بذكر النبى عليه الصلاة والسلام..
كان فى زمان بنت حلوة و امورة و صغنتوتة ..البنت دى كانت بتلبس فستان لونه ازرق وعليه دانتيل ابيض ..وبتلبس فى رجليها جزمة بيضا وشراب دانتيل..وكانت بتنقى الجزمة اللى بتعمل صوت وكعبها بيدق وهى ماشية عشان تبقى زى الكبار..
مامتها كانت بتعملها شعرها زعرورتين و تنزل قصة على قورتها..شعرها كان بنى وناعم..البنت دى كانت بتصحى كل يوم من النوم تبص برة الاوضة وتطل براسها كدة وتضحك..كانت شاطرة فى المدرسة والمدرسات بيحبوها..وكانت نضيفة اوى ولبسها كله مهندم .. مامتها كانت بتشترى لها مجلات ماجد وسمير و ميكى جيب..
البنت دى كانت عندها اعتقادات غريبة اوى..مثلا مكانتش مقتنعة ان الناس بيتولدوا بيبيهات..كانت مقتنعة انهم بيتولدوا عندهم اربع سنين..ولما اتنازلت اوى قالت خلاص يبقى بيتولدوا عندهم سنتين لكن اقل من كدة مينفعش..
كمان كانت معتقدة ان الصحاب بيفضلوا اصحاب للابد ومش بيسيبوا بعض ابدا..
كمان كان عندها اعتقاد ساذج جدا ان لما الناس بيكبروا بيكون سهل يحققوا كل احلامهم وطموحاتهم ومفيش عوائق من اى نوع..كمان كانت معتقدة ان كل الابهات بيحبوا ولادهم بس الاعتقاد دة مدامش كتير..
البنت دى مرة وهى ماشية كدة خبطت فى مراية..بصت جواها لقت واحدة تانية كبيرة .. اتخضت ومكانتش عارفة مين دى.. فضلت تمسح فى المراية وتعيط عشان فاكرة ان البنت اللى فى المراية سرقت صورتها..البنت الكبيرة حطت صورتها مكان البنوتة الصغيرة الحلوة..فضلت تعيط تعيط..وبعدين جت الجنية الطيبة ماسكة فى ايدها قلم بدل العصاية السحرية..ومش اى قلم دى كانت ماسكة قلم ستدلر ازرق..
المهم..الجنية اخدتها وفضلت تفهمها انها كبرت اوى ودى صورتها الحقيقية ومش المفروض تزعل من البنت الكبيرة اللى فى المراية عشان دى هى بس بعد ما كبرت..وفهمتها ان دة مش سحر ولا حاجة وانه طبيعى جدا ..
بعد كدة البنت دى اقتنعت بكلام الجنية اللى ماسكة القلم الستدلر و فهمت انها فضلت تكبر تكبر لحد ما شعرها بقى اسود مش بنى..وبطلت تعمل الزعرورتين..ومامتها مبقتش بتشترى ماجد وسمير ولا حتى ميكى ولا رجل المستحيل..بقت هى كبيرة وبتشترى لنفسها..كمان اقتنعت ان الناس بيتولدوا بيبيهات..وبقت بتلبس كوتشيات ومبتعرفش تلبس كعب..وبقت بتصحى من النوم مش شايفة اى حاجة وكتير بتبقى زعلانة انها صحيت.. فهمت ان مش كل الابهات بيحبوا ولادهم وان فى ناس بيرموا عيالهم فى الشارع او بينقوا طرق اخرى اكثر فاعلية للتحطيم.. عرفت ان مش الحاجة الوحيدة اللى ناقصة لتحقيق الاحلام هو انك تكبر لكن فى الف حاجة ترجعك لورا وتخليك مكانك متكتف..
بس المشكلة ان ساعات بتنسى انها كبيرة وتفضل فاكرة ان الصحاب بيفضلوا اصحاب للابد...............


............انجى ابراهيم...........