الاثنين، 22 يونيو 2009

سحر طبيعى جدا


هذه القصة مهداة الى المدون الشنيع عمرو محمود السيد ..وكما ينص القانون فان هذه الحدوتة للبنانيت الحلوين والولاد المؤدبين اللى بيشربوا اللبن لكن الوحشين الكلبين مش يقروا.. واللى يزعل من هاذوها الكلام يحاسب عمرو السيد انا ماليش دعوة..

كان ياما كان يا سادة يا كرام وما يحلا الكلام الا بذكر النبى عليه الصلاة والسلام..
كان فى زمان بنت حلوة و امورة و صغنتوتة ..البنت دى كانت بتلبس فستان لونه ازرق وعليه دانتيل ابيض ..وبتلبس فى رجليها جزمة بيضا وشراب دانتيل..وكانت بتنقى الجزمة اللى بتعمل صوت وكعبها بيدق وهى ماشية عشان تبقى زى الكبار..
مامتها كانت بتعملها شعرها زعرورتين و تنزل قصة على قورتها..شعرها كان بنى وناعم..البنت دى كانت بتصحى كل يوم من النوم تبص برة الاوضة وتطل براسها كدة وتضحك..كانت شاطرة فى المدرسة والمدرسات بيحبوها..وكانت نضيفة اوى ولبسها كله مهندم .. مامتها كانت بتشترى لها مجلات ماجد وسمير و ميكى جيب..
البنت دى كانت عندها اعتقادات غريبة اوى..مثلا مكانتش مقتنعة ان الناس بيتولدوا بيبيهات..كانت مقتنعة انهم بيتولدوا عندهم اربع سنين..ولما اتنازلت اوى قالت خلاص يبقى بيتولدوا عندهم سنتين لكن اقل من كدة مينفعش..
كمان كانت معتقدة ان الصحاب بيفضلوا اصحاب للابد ومش بيسيبوا بعض ابدا..
كمان كان عندها اعتقاد ساذج جدا ان لما الناس بيكبروا بيكون سهل يحققوا كل احلامهم وطموحاتهم ومفيش عوائق من اى نوع..كمان كانت معتقدة ان كل الابهات بيحبوا ولادهم بس الاعتقاد دة مدامش كتير..
البنت دى مرة وهى ماشية كدة خبطت فى مراية..بصت جواها لقت واحدة تانية كبيرة .. اتخضت ومكانتش عارفة مين دى.. فضلت تمسح فى المراية وتعيط عشان فاكرة ان البنت اللى فى المراية سرقت صورتها..البنت الكبيرة حطت صورتها مكان البنوتة الصغيرة الحلوة..فضلت تعيط تعيط..وبعدين جت الجنية الطيبة ماسكة فى ايدها قلم بدل العصاية السحرية..ومش اى قلم دى كانت ماسكة قلم ستدلر ازرق..
المهم..الجنية اخدتها وفضلت تفهمها انها كبرت اوى ودى صورتها الحقيقية ومش المفروض تزعل من البنت الكبيرة اللى فى المراية عشان دى هى بس بعد ما كبرت..وفهمتها ان دة مش سحر ولا حاجة وانه طبيعى جدا ..
بعد كدة البنت دى اقتنعت بكلام الجنية اللى ماسكة القلم الستدلر و فهمت انها فضلت تكبر تكبر لحد ما شعرها بقى اسود مش بنى..وبطلت تعمل الزعرورتين..ومامتها مبقتش بتشترى ماجد وسمير ولا حتى ميكى ولا رجل المستحيل..بقت هى كبيرة وبتشترى لنفسها..كمان اقتنعت ان الناس بيتولدوا بيبيهات..وبقت بتلبس كوتشيات ومبتعرفش تلبس كعب..وبقت بتصحى من النوم مش شايفة اى حاجة وكتير بتبقى زعلانة انها صحيت.. فهمت ان مش كل الابهات بيحبوا ولادهم وان فى ناس بيرموا عيالهم فى الشارع او بينقوا طرق اخرى اكثر فاعلية للتحطيم.. عرفت ان مش الحاجة الوحيدة اللى ناقصة لتحقيق الاحلام هو انك تكبر لكن فى الف حاجة ترجعك لورا وتخليك مكانك متكتف..
بس المشكلة ان ساعات بتنسى انها كبيرة وتفضل فاكرة ان الصحاب بيفضلوا اصحاب للابد...............


............انجى ابراهيم...........

هناك 36 تعليقًا:

عمرو يقول...

أنا جيت بس عشان أقول شكراً
مش قادر أصبر لغاية ما أقرا
أنا يا جماعة المدون الشنيع
:)
يا ريت تيجوا عندي مرارة روح

(لا مؤاخذة يا إنجي باعمل ترويج للمدونة عندك.. والمدون مالهوش غير إخواته من المدونين والمدونات)

أنا فرحان قوي قوي بالإهداء العظيم ده
وهاعلق تاني
سلام مؤقت
:)

msafa يقول...

اشطبنى من حساباتك
علشان اقدر اعيش
....................
رائع انجى

ديالا يقول...

جميل اوي

بجد حلوه اوي الحدوته وصياغتها تجنن بجد

تقبلي مروري

نعكشة يقول...

اية دة

لأ مش عاجباني

انتي قولتي قصة للأطفال الصغننين الحلوين

فين دة

وبعدين مينفعش تكوني بتحكي قصة عن بنت عسولة
و تسذجي من اعتقادها او تتفهي منها
معرفش بتتقال ازاي

بس مش عاجبني

ا اعتقاد ساذج جدا ان لما

و كمان زودتي قوي من كلمة
وكان عندها اعتقاد
و عندها اعتقاد كمان

القصة في بدايتها لحد النص حسيتها عسولة و ماشية كدة و بيس
و رسمتيها بطريقة عسولة
وب عدين

قلبتي على حبة اكتئاب
و نهيتيها نهاية مش للبنات المؤدبين ولا الولاد الحلوين

انا كنت عايزة قصة حلوة زي قصص الاطفال

:(

على فكرة والله انتي بتعرفي تكتبي بطريقة متفائلة

سيبي نفسك انتي بس :D

سلام عليكِ

Amgad يقول...

مممممممممممممممم
عجباني الفكرة اوي واللي عايزة تقوليه من وراها
بس مش مقتنع ان حد زيك يكتب قصة زي دي
التركيبة البرائاتية للكاتب وليكي
مش ماشية خالص مع بعديها
وسمعني احلي ليه يا زمان مسبتناش ابريا

محمود محمد حسن يقول...

مش عارف،

انا عايز اتكلم كلام ما بقولهوش لنفسي في الواقع ، بس بما اني شايف هنا انجي بتتكلم عننا كلنا عن طفولتنا اللي راحت مننا واتخطفت خليني اتكلم وكأني بكلم نفسي اللي ساعات بتحس بنفس مشاعر انجي هنا ،

احنا كنا في طفولتنا تنقسم لأيه ، تنقسم الحياة لمعرفة بسيطة اوي بيها ، وحياة ضيقة اوي ، ومشاعر بسيطة اوي ،

كان لازم علينا ندفع تمن المعرفة ، عرفنا الحلو ، بس الحياة مش كلها حلو ، كان لازم نعرف الوحش ، نجحنا كتير ، بس برضه كان لازم نقع ،

الحياة مراحل ، إن كانت الطفولة مرحلة السعادة الوحيدة في حياتنا فقد ادت مهمتها وانتهت ، وحان الوقت لمرحلة بعديها ، وإن خلصت اللي بعديها يبقى اللي بعديها ، لأن الحياة اساسا مرحلة وكلها بتعدي والإنسان بينتهي ويفنى،

خلينا نقول حاجة تانية مرة سمعتها في فيلم عربي ، هوا ليه ربنا خلق الشر .؟؟؟ علشان لولاه الناس ما كانتش عرفت طعم الخير ، بنفس المنطق ليه ربنا خلق المرض ، علشان لولاه الناس ما كانتش عرفت معنى نعمة عظيييييمة زي الصحة ،

وليه ربنا خلق الحزن ؟؟ علشان لولاه ما كناش عرفنا طعم السعادة ،

انا من اسعد فترات حياتي يوم ما حبيت وانتكست وفقت من النكسة ، ساعتها كنت حاسس اني قوي اوي ، اني قادر اتحدى ، اني قوي جدا واقدر اواجه ، الضربات اللي ما بتكسرش ضهورنا بتقويها ،

حاجة كمان ربنا خلق فينا عاطفة إن ابنك هوا الشخص الوحيد في العالم اللي تتمنى انك تشوفه احسن منك ، تفتكري ليه ؟؟ هل ده من فراغ ؟؟ ، لعل وعسى اللي مالقيناهوش في اهالينا نقدر نعوضه لعيالنا ، ولما ننجح بننبسط اوي ...لأننا قدرنا ننجح عيالنا في اللي فشلنا فيه ، وده نجاح لينا وانتصار على اهالينا ،

الحزن موجة حلوة وجميلة جدا وممتعة الحقيقة ، لكن اللي بيركبها في الآخر بيغرق وما بيعرفش يطلع ،

نصيحة قاومي الحزن واطلعي ، واعملي زي ما بيقولوا في الأفلام الأجنبي للناس وهي في سكرات الموت ، اياك تستسلم للنوم ، ما تنامش فتح عينك ...لأن حتى الموت فيه استسلام ،

بقي نقطة اخيرة النص ده فيه احساس عالي اوي ، ومكتوب بتلقائية شديدة أوي لبنت عندها ضفيرة وشعرها كان بني وبقى اسود ، وكانت بتلبس كعب ودلوقتي بتلبس كوتشي اميجو ، :D

تحياتي

well يقول...

الطفلة اللى كبرت المفروض تشكر الجنية اللى كانت ماسكة فى ايديها قلم ستدلر ازرق ..لانها حررتها من معتقداتها
والمفروض تفرح لانها وصلت للحقيقة
..الحقيقة المرة
تحياتى

Unknown يقول...

عمرو:العفو يا فندم انت شنيع وفظيع ومريع كمان...يا جدعان هيا بنا نعمل رحلة لحد مدونة الاخ عمرو...عندك غدا؟؟؟؟؟؟؟؟؟


مسافة:رائع يا فندم......


ديالا:ربنا يخليكى يارب..مرورك شرفنى طبعا.........

Unknown يقول...

نعكشة:ليه مش عجبتك؟؟؟
وحشة بجد؟؟؟
انتى شايفاها كئيبة صح؟؟؟ انا كمان شايفة كدة...طب وبعدين؟؟؟ مش جاى معايا غير كدة...اممممممممم طب اوعدك هكتب حدوتة للبنات السوغنتوتين الحلوين....متزعليش بقى..حساكى اتخنقتى من جرعة الكآبة..سورى بجد.........



امجد:مالكش فيها يا باشا....ومحمد الحلو هيعتزل خلاص...وامشى ياض من هنا عشان انا مفترسة.......

Unknown يقول...

محمود محمد حسن:تمام يا فندم..كلام جميل كلام معقول مقدرش اقول حاجة عنووووووووووووووووووووو....على فكرة انا بلبس كوتشى اكتيف مش اميجو............



ويل:ايون طبعا هى بتشكرها شكرا جزيلا....فعلا هى حقيقة مرة بس مفيش مفر..........

نعكشة يقول...

أنا مش اتخنقت
بس انتي وعدتينا فوق إنها قصة للأولاد المؤدبين
و كان ياما كان
و حركات

عارفة فكرتيني بإيه دلوقتي حالاً لسة جاية في بالي

قصة لباولوا كوهيلوا
إحدى عشر دقيقة
كان ياما كان كان فيه واحدة عاهرة

والله ما اقصد التشبية دة
بس اقصد
انك قولتي كان ياما كان
يعني انا مهدت مخي لقصة خيالية ديناميكية لظيظة

فقمتي كتبتي قصة واقعية

دة وجهة اعتراضي

........

باقي التعليق
اعتراض على كثرة كلمة اعتقاد
و انك سفهتي من اعتقاداتها دية
مع انها لسة صغيرة
و من حق الاطفال الصغنتتين انهم يعتقدوا اي حاجة بلا تسفيه لأفكارهم

.............

أنا مبتخنقش من جرعات الكآبة
و خصوصاُ في القصص
أنا بس
شوفتك وانتي بتكتبي قصة متفائلة قوي
اللي فاتت على طول
و سستمت نفسي على حاجة

.......

بصي سيبك من ردي :D

سوري على اية يا بنتي
اولاً مبحبش كلمة سوري حد يقولهالي
سانياً ( بالسين) . مفيش اصلاً موقف عشان تقولي سوري فيه

..............

مستنية قصة للأطفال الصغنتتين :D

وشط طفولي بريء مبتسم و كان نفسة يبقى ماسك مصاصة و عامل زعرورتين :D

و قصة

سلام عليكِ

Unknown يقول...

نعكشة:نفسى استلف منك روايات باولو كويلهو اوى اوى....عايزة اشترى بس مكسلة باين..

انا مسخرتش منها بس دى سخرية مريرة..يعنى اعتقاداتها بريئة وباقى اعتقاداتها كان لازم تبقى واقع لكن لان الدنيا وحشة اوى خلت اعتقاداتها حاجة خيالية...

يمكن انا نوهت وموفتش بس كنت اقصد الاسلوب والحكى هيكون شبه الحواديت..

امممممممممم اوعدك بمصاصاية كبيرة قريب..انتى بتسعدى ايامى بتعليقاتك مع انك قفلتى مدونتك ..ما علينا انا قلت مش هتكلم فى الموضوع دة انتى حرة فى قرارك بس الغريب انك قبلها فتحتى التعليقات..خير خير

ربنا يوفقك وتاخدى اجازة فى الشتا عشان اشوفك..

سلام عليك

نعكشة يقول...

انا بنزلهم من على الانترنت

4shared.com

و اكتبي اسم اجدعها قصة و اجددها كتاب و هتلاقية موجود بإذن الله

بس انا مبقراهمش عالكمبيوتر

انا بقراهم عالموبايل آل يعني شبة الكتاب
عشان بتخنق لما الحاجة بتكون طويلة عالكمبيوتر

.............
بنسبة للجزء بتاع مسخرتش
مممممممممم
طيب اوكش

.........

هيا شبة الحوادييت على فكرة

بالمناسبة في آخر قصص سمعتها لأبلة فضيلة كانت عن الكمبيوتر و الحاجات دية

حاجات واقعية ملموسة يعني

أنا بس توقعت حاجة و ملاقيتهاش مش أكثر والله

...............

ربنا يسعد أيامك دايماً بتعليقاتي او من غيرها

آآآآآآآآآآآآآآآآمين

..........
حلاوة روح
هههههههههههههههههههه

...........

يااااااااااااااااااااااا رب

دعواتك انتي بس

.......

عليكِ السلام

رحلتنا في الحياة يقول...

ازيك ياانجى بصراحة اول مرة اقرا ليكى حاجة كتباها بالاسلوب ده اسلوب جديد عليكى بس لسه زى ماانتى بتعرفى توصلى افكارك بطريقة ممتازة وباسلوب جميل مهما غيرتى فى الاسلوب
تسلم ايديكى ياجميل بس على فكرة احنا مش بنكبر اعتقد بنفضل زى مااحنا بس بنحاول نخبى نفسنا باقنعة مزيفة علشان نقدر نعيش فى الدنيا

محمد حويحي يقول...

الله يسامحك
بس برضه
قريتها
ههههههههههههه

أزاي مش كل البهبهات بتحب ابنائها

عمرو يقول...

عدنا
أهلا إنجي
طبعا عندي غدا وعشا وكل حاجة تحبيها
:)
يا مرحب بالسادة الزوار
زورونا تجدوا ما يسركم ونحن نختلف عن الآخرين والحاجات اللي من النوع ده

على فكرة انتي عندك شوية أفكار تحفة.. زي المراية اللي خدت البنت الصغيرة وجابت البنت الكبيرة
ممكن نطور الفكرة
فرحان بيكي يا إنجي
إلى الأمام يا بنتي
:)

adel يقول...

هو انا ينفع تعليقي يكون قصير و موجز ؟؟

انجي رائع و لكنه مؤلم بالنسبة لي

ربنا يسامحك بجد :(:(:(:(

انا بحاول انسي

Unknown يقول...

نعكشة:يا سلام يعنى مش كتب؟؟؟
امممممممم انا مبحبش اقرا مش من كتاب بس شكلى هضطر...حلوة فكرة الموبايل بس انا موبايلى لا يتيح هذه الخاصية اللذيذة...يللا مش مشكلة..
اما عن باقى تعليقك..وصل كلامك يا فندم كدة تمام..ابقى تعالى شقرى من غير مواضيع جديدة..........



ايوشة:ربنا يخليكى يارب والله انتى رافعة روحى دايما ربنا يكرمك..بجد بتفرحينى يا ايوشة.......


عقل مهوى:ليه؟؟؟ هو انت مش بتشرب اللبن وتسمع الكلام؟؟؟
مقلتش عجبتك وللا ايه؟؟؟
اه فى بهبهات مبيحبوش ولادهم ..انظر حولك............

Unknown يقول...

عمرو:والله شكلى مش نافعة خالص نوهائى...طب ايه؟؟؟ مش عارفة بقى بس مش مبسوطة...اوعى تبطل تقولى رايك بصراحة..منور يا مستر عمرو........


عادل:اه ينفع يا عادل..ربنا يخليك..تعليقك انعشنى حسيت انها وصلت بالسلامة..منور جامد.........

محمد حويحي يقول...

لا يا ضكطره حولي ابويا قاعد
لما يقوم ابقي انظر حولي
D;

Unknown يقول...

عقل مهوى:برضو مقولتش عجبتك وللا ايه؟؟؟
بلاش تنظر حولك انزل الشارع واسال اى عيل بيشحت منك فين بابا يا حبيبى؟؟؟ او قوله يا ترى بابا بيحبك قد ايييييه؟؟؟
بلاش........روح ملجأ...بلاش ....روح دار احداث...انت منين؟؟؟

عابر سبيل (عبدالرحمن محمود) يقول...

السلام عليكم
تم اهداؤكم تاج من مدونتىارجو ان تتفضلوا بقبوله
ولكم الشكر والتحيه .

محمد حويحي يقول...

منين ايه
انت خليتي حته ما قلتيش عليها
مش ناقص غير حولي
لا حول ولا قوه الا بالله

البوست رأيي فيه مشابه لرأي نعكشه لما قالت :
القصة في بدايتها لحد النص حسيتها عسولة و ماشية كدة و بيس
و رسمتيها بطريقة عسولة
وب عدين

قلبتي على حبة اكتئاب
و نهيتيها نهاية مش للبنات المؤدبين ولا الولاد الحلوين


بس أضيف أن الهدف وصل .. بس أتسرعتي شويه وانت بتنقلي بين المرحلتين
ودا رأيي
فتقبليه مشكوره :)

شمس النهار يقول...

القصه لطيفه ياانجي
هو الزمن كده
لو الانسان ماخدش باله منه بيسرقه والا اجدع نشال محترف

Mariam يقول...

فكرتنى قصتك الجميلة دى بأغنيةهشام عباس (زمان و انا صغير)بتبين قد ايه الصغير بيبقى نفسه يكبر و فاكر ان الحل كله عند الكبار و بعد كدة يكتشف الخدعة.

انا كل ما اكبر و اعرف الدنيا بحقيقتها اكتر كل معرف اد ايه كانت الدنيا فعنينا اجمل و احنا اطفال,و بحمد ربنا ان مرحلة الطفولةانتهت من حياتنا بالتدريج مش مرة واحدة عشان هى غالية اوى.

فى ناس بتكبر و بتحتفظ بالطفولة جواهم و ناس بينسوها فى بحر الدنيا بتاعت الكبار ولكن فى رأى ان دى مرحلة بعتز بيها فحياتى جدا.. ايوة انتهت و لازم اركز فى مرحلتى اللى انا عايشاها دلوقت بس هفضل اعتز بطفولتى و بالطفلة اللى جوايا و هركب مراجيح تربتيتيييت و هنط حبال D :D:

منسبة للصحاب طول عمرى مقتنعة ان الصحاب هيفضلوا على طول بس فى استثناءات والله يمسيهم بالخير ناس كنت بعتبرهم من اقرب ما يكون بس هما للأسف بيلعبو فعداد صحوبيتنا دلوقت ..ما علينا.. كنت عايزة اقولك ان حاجات كتير بقرهالك بحس بجد انك بتقرى اللى جوايا و بتعبرى عنه بكتابتك.. يا أما انتى دكتورة نفسية شاطرة يا أما كبنوتة تفكيرك قريب من تفكيرى و بجد مبسوطة انى عرفت مدونتك وفى أنتظار ما هو جديد D:

Unknown يقول...

عابر سبيل:شكرا عبد الرحمن.......


عقل مهوى:طب يا عم قول من الاول هو لازم اقعد استجوبك كدة؟؟؟ طبعا تقبلته وابقى تعالى كتير.........



شمس النهار:هو كدة فعلا...يللا الحمد لله نورتى بجد........



مريم:سيدة العالم..اهلا يا فندم..ايييييييييييون هى دى بيلعبوا فى عداد صحوبيتنا الله ينور عليكى..
اعتقد انى دكتورة نفسية شاطرة دة باعتبار ما سيكون..ودة لانى متاكدة ان دماغك لطيفة ورقيقة وبنوتة ومش زى دماغى الوحشة الرجالى اليععععععع...بس طبعا اتمنى يكون حدسك صح وتكون دماغى زى دماغك خصوصا انك دمك خفيف وعسولة وتتحبى بسهولة..سمعتى اغنية هيفاء بتاعة يا حلو يا عسولة؟؟ لا عادى افتكرتها بس..انتى اسكندرانية يا مريم؟؟؟

shicooo يقول...

صباح شريف يا فندم
مية مسا غليك

ايه الأخبارات وبتاع ...؟!!!!
عاملة اية ؟


فى الحقيقة انا مش هع مل كومنت على البوست ده عشان لسة مش قريته
:)))))))))
D:
بس انا قولت اعدكى ولصبح

واسألك عن حاجة مهمة موووووووت
ليه مش بتيجى بقى .....
مفتقدين وجود حضرتك جدا يا فندم
ياعينة مفيش غيرى انا ومحمود دلوقتى فى اطلالة
واسماء عندها امتحانات وبتاع .....
ابقى عدى انشالله حتى سلام على الطاير...

وكل عام وانتم بخير
هقرا بقى البوست وارد عليه
بااااااااااااااى

ط يقول...

حواديتك حلوة قوي يا انجي وممتعة بجد
ط

3omda يقول...

والله يا انجي وانا بقرأ لحد تقريبا السطر الـ 23 كنت فاكر ان ده برنامج "ابله فضيله" (: بس بعد السطر ده الموضوع أخد منعطف تاني خالص -صحيت علي صوت-please come back to Earth- ياريت الواحد كان فضل صغير.....

فشكووول يقول...

العزيزه انجى
ما فيش حد بيبقى على حاله
نتولد صغيرين وبعدين نكبر ونشيل الهموم
ونتمنى اننا نرجع صغيرين
ما فيش صداقه بتدوم عشان صداقة الصغار بتبقى بريئه بس لما بنكبر كل واحد له مصالح وكل واحد له وجهة نظر وكل واحد له ارائه اللى بتصطدم مع اراء الاخرين
وطبيعى ان الدنيا بتاخد كل واحد فى ناحيه وعشان كدا اول ما تنقطع المقابلات تنقطع مع الصداقات
ودنيا يا انجى
تحياتى

Mariam يقول...

ايه ده يا انووج انتى افتكرتينيىD:D: انا مبسوطة جداااااااااا انك افتكرتينى..ايوة انا مريم صاحبة اللقب اللى استحقه بمنتهى الجدارة (سيدة العالم)...أىىىىىىىىىىىىى اىىىىى اظاهر انى اكعبلت فى المقلب اللى اخدته فنفسى..لحظة اعدل هدومى و اكملك......خلاص معاكى.. كنا بنقول ايه ..اه ,كنت بقولك انا سعيدة جدا انك افتكرتينى ,عارفة؟..انا كل ما اكتب تعليق اقول عديها يا بت غير معرف و خلاص الاقى حاجة من جوة كدة تزعقلى و انتى معندكيش اسم ولا ايه فا بكتب اسمى..

انتى فعلا انشاء الله هتبقى دكتورة نفسية شاطرة لأن كتاباتك مبشرة بقدرتك عن التعبير عن النفس..بس هى مهنة صعبة على فكرة يعنى كل ما بتفرج على د.فيل لأ مش فيل ابو زلومة,اقصد د.فيل بتاع MBC4 بسأل نفسى ازاى بعد مبيسمع المشاكل دى كلها بيقدر يضحك و يمسك ايد مراته اللى بتضحك بردو فى نهاية كل حلقة و يمشى سعيد تحسى انها محتاجة مجهود نفسى و قوة فنفس الوقت..بس ده ميمنعش انها مهنة مميزة بجد انا كان نفسى اخد علم نفس ف ثانوية عامة بس اخدت فلسفة بس نفسى اعرف عن العلم ده اكتر و نفسى اوى اشترى كتاب عنه انشاء الله.

بس انتى ازاى يعنى بتقولى ان دماغك رجالى.. استحالة اصلا هو فيه راجل يعرف يكتب عن بنت صغيرة و بزعرورتين و لابسة شراب دانتيل دول ميعرفوش ايه الدنتيل ده اساسا..ده اخرهم فيلم دنتيلا بتاع يسرا :) يفهموا ايه هما فى اول جزمة بكعب بنلبسها فحياتنا و نفضل نطرقع بيها و نصدع اللى حولينا اياك تقولى تفكيرك رجالى ..ده انثوى بحت ..

و ربنا يخليكى على الكلام الحلو اللى قلتيه عنى ده كتير و الله ده انت اللى تتحبى موووت اصلا و بما انك سألتينى السؤال الأسكندرانى ده يبقى انت اسكندرانية صح؟؟ شفتى انا نبيهة ازاى..بصى يا سيدتى انا من القاهرة بس بحب اسكندرية و الكبدة الأسكندرانى جدا على فكرة :)و بروح اسكندرية كتير اصل جدى و جدتى (الله يرحمهم)كان ليهم بيت هناك فاحنا بنروح على حسهم..

Foxology يقول...

جميلة اووووووى وفيها معانى كبيرة

ياما الواحد بيبص لنفسه فى المراية ميتخيلش ان دى صورته

تحياتى :)

shicooo يقول...

انا لسة كنت عندك امبارح
ايه الأخبارات ..........

؟؟؟
لأ عادى .... الدنيا قلابة زى ما انتى عارفة
:)

الحفلة كانت جامدة طحن والفرقة اللى جت بعد وسط البلد كانت اجمد كنمان .... حطيت على وسط البلد
العالم كلها هيبرت وكله كان بيرقص
كانات جامدة فحت ..........

ميرسى ليكى
والله ليكى شوقة

Unknown يقول...

فين يا انجى الرمز و الاسقاط و الحاجات دى
ايه القصة المباشرة دى
متنفعش خالص للولاد الصغننين و للا للبنات الامامير
قصة حزينة قوى و حتى نهايتها ممكن اعلق عليها و اقول و يا ريت الصحاب بيفضلوا صحاب على طول او حتى الواحد لما بيحتاجهم بيلاقيهم اول ما يقول يا جزر او حتى يا فجل
تحياتى ليكى و مستنى زيارة منك و لو خاطفة لمدونة انسان اوفلاين

المعتصم يقول...

ايه حكاية المدونين الحلوين اللى بيشربوا اللبن
واللى وحشين وكلبين ومش عارف ايه
هو ايه النظام
وبعدين ايه لفظ زعرورتين ده ؟؟؟
ده لفظ تقوليه لاطفال حلوين ومؤدبين برضو ؟؟؟؟؟؟؟؟؟؟؟
لألألألألألأ كده انا هزعل منك ياانجى
وكمان بعد ماكبرت فضلت عبيطه ومصدقه ان الصحاب بيفضلوا اصحاب للابد
لااااااااااااااا
دى حالتها كده خطيرة
اقولك اتدربى انتِ فيها
واهو يمكن تتعملى حاجه
ههههههههههههههههههه
ســــــــــــــلام

واحدة مجنونة يقول...

حلوة جدا
عجبني اخر سطرين جدا و اثروا فيا
بس القصة كلها جميلة
البنت اللي بتكتشف فجأة انها كبرت و هي مش عايزة تكبر نفسها تفضل صغيرة و بنفس قناعتها القديمة و ما تكتشفش ان الدنيا مش زي ما كانت فكراها

تحياتي