الأربعاء، 15 يوليو 2009

أول يوم حلم


مريضة أنا..مريضة جدا ان شئت الدقة ولكن لا أستطيع منع نفسى من تسجيل تلك اللحظة الفارقة..لن يمنعنى هراء البرد والسعال و احتقان اللوزتين من أن أحتفل..لن تمنعنى رأسى التى تزن أطنانا ولا جسدى المهدود من أثر معركة الأمس مع ارتفاع درجة الحرارة الذى تركنى كأنما تلقيت ألف علقة ساخنة..سأحكى أننى أمس تحاملت على كل ما سبق وعشت أول يوم حلم.

أمس بدأت التدريب فى احد مراكز تأهيل ومساعدة ذوى الاحتياجات الخاصة..يا الله لم اكن اتصور أن ذلك اليوم سيأتى..كنت أعتقد ان انهزامى أبدى واننى لن التحق بالمجال ولن أحقق الحلم..أمس كان احتفال بأول يوم حلم..أول يوم فى حياتى الجديدة.

عن ملابسات انضمامى أقول..أمى تؤمن بى بشدة..أمى تحاول أن تدعمنى بكل ما تستطع..أمى تنادينى من الان بالدكتورة..أمى هى من وجدت لى تلك الطاقة و دفعتنى كى اعبر منها نحو حلمى..أمى قابلت فتاة ما لا تعرفها تعمل بالمركز وسألتها هل يمكننى الانضمام..جلبت لى العنوان ودخلت تزف الخبر.

ذهبت أمس كى اقابل مديرة المركز..الاستاذة ابتهاج نايتنجيل..بالطبع ليس لقبها هو نايتنجيل ولكنها تستحقه بجدارة..فمن تساعدهم بالمركز يلثمون ظلها كما كانت فلورانس نايتنجيل الممرضة الأشهر فى الحرب العالمية.. تستطيع ان تستشف كم هى نقية من نظرة الاولاد لها..لن تستطيع امساك دموعك عندما ترى تلك الفتاة المتأخرة عقليا تنظر لها وتقول لها بلا مناسبة أنا بحبك..تستطيع أن تعرف كم هى شفافة عندما ترى تسامحها مع من يعملون معها وتلك المسحة الملائكية فى وجهها..دعك من أنها فاتنة فعلا.

قلت لها اريد أن أتدرب هنا..لم تسأل أكثر وقالت..طب اقفى اتفرجى علينا..وقفت اشاهد ثم بدأت اساعدهم قرب منتصف اليوم وانتهى اليوم بى زميلة لهبة وياسمين و سهام ودعاء..فى نهاية اليوم سألتنى ضاحكة هاه ايه رأيك فى اليوم مرهق صح؟؟ رددت أنا حلو بجد..سألتنى هتكملى معانا..طبعا بعد اذنك..طيب هنبتدى بفترة تدريب..متشكرة اوى بس انا فعلا عيانة ومش هقدر آجى بكرة..ممكن من بعد بكرة.؟؟ براحتك..
هذا هو نص المحادثة كما دارت تماما..لازلت لا اصدق نفسى حتى تلك اللحظة.

عن اليوم؟؟ ممتع بلا شك..عملت من قبل كثيرا..ولكن خارج المجال..الان انا اتنفس بالمعنى الحرفى المجرد الكامل للكلمة..اشعر انى اتوازن..وجدت أرضا..أنا سعيدة بالفعل.

أيضا انضممت كمتطوعة لاتحاد الاطباء العرب..سوف أحصل كمية لا بأس بها من العلم..دورات تدريبية ومشاركات فى الجلسات النفسية كتدريب لى..لازلت لم اتلقى المكالمة منهم ولكنى أثق فى الله.

عن المستقبل..أراه الان بدأ يتضح..لقد وضعت قدمى على أول الطريق ولابد أن أكمل..باذن الله سوف أصل..سعيدة جدا و أتعجل شفائى كى اعود الى عملى..ياللكلمة..دوما كنت اقول تلك الكلمة بلا احساس..دائما كنت اعرف ان هذا المكان ليس مكانى ولن يكون..لم اكن أتوانى أن أعلن كرهى ومقتى للعمل والفراغ مما يجعلنى اقتل الفراغ بالعمل السخيف ومزاملة اشخاص اسخف وأكثر غرورا و رخامة.

فى المركز نساعد الاطفال المتأخرين فى التوافق وجعلهم أكثر الماما بالحاجات الاولية للبشر..هناك اقسام كثيرة فى هذا العمل..سوف اتنقل بين الاقسام كمتدربة ثم اختار التخصص.. هناك بالمركز رحبوا بى كاننا زملاء منذ دهر..كلهم اشخاص فى منتهى اللطف..كلهن ان شئت الدقة فانا لم أر اى رجل يعمل بالمركز..لو لم أر بعد..كل الاولاد بالرغم من تأخر معظمهم الشديد ودعاء ولطفاء بالرغم من عدوانية بعضهم ولكنى لم اشعر بهذا العدوان حتى عندما جذبتنى شروق من الطرحة مرتين..أحببت شادى واعتقد أننى سوف أسرقه من الاخصائية الخاصة به كى ينضم الى مجموعتى..أحببت زميلتى ايمان التى ما ان رأتنى حتى قالت أعرفك صح؟؟
أحببت المديرة ابتهاج نايتنجيل التى لم تخطىء فى اسمى ولا مرة منذ سألتنى عنه..أحببت هبة التى قالت لى الشاى فى الدولاب عيشى حياتك..أحببت سهام التى ما ان رأتنى حتى أمسكت يدى وقدمتنى الى المديرة قائلة انجى زميلتنا جديدة وعايزة تنضم مع العلم انها لا تعرفنى اصلا..

عشت أول يوم حلم وكان لابد من تسجيل تلك اللحظة..انا الان بدأت فى تحقيق الحلم..بقى أن تظهر النتيجة والتحق بتمهيدى الماجيستير كما اتمنى.

ولمن لم يلحظ اقولها بكل صدق ووضوح..أنا انجى ابراهيم..أخصائية علاج نفسى.



..........انجى ابراهيم...........

هناك 44 تعليقًا:

ليكوريكا يقول...

ربنا يوفقك في حلمك الجديد

بجد اتمسكي بيه اوي ...

اعتقد محدش يرفض يعيش مع الملايكه في مكان واحد

ربنا يوفقك في النتيجه

وفي حياتك الجايه :)

أحمد الشمسي يقول...

البوست صادق جدا، الفرحة بتنط من كل حرف فيه، فرحان لأنك فرحانة ربنا يسعدك علاطول.

مسألة العمل التطوعي دي شاغلاني جدا، أولا أنا من النوع اللي بيحب يحس انه بيعمل حاجة، بس فيه مشكلة: محتاج شجاعة مش متوفرة عندي دلوقت... شجاعة انك تحس انك تقدر تضحي... أنا مشغول أكتر دلوقت بأني أجهز نفسي لقدام.

محمود محمد حسن يقول...

مبروك يا انجي ...عقبال كل احلامك ...مش عايز اخوفك ..بس مش كل ايامنا بتبقى حلوة كده زي ما كانت في بداياتها ... زي ما قالت ليكوريكا ..اتمسكي بحلمك مهما حصل ...

تحياتي

adel يقول...

تعبانة ّّّ!!!؟؟؟
سلامتك بجد زعلت جدا و اسف عشان مفيش طريقة للتواصل :(:(

مبروك لتحقيق اول جزء من احلامك و نفسي ازور مكان زي ده

و عقبال ما تنول كل اللي بتتمنيه بجد

حتي و انتي مريضة مبدعة في تعبيراتك

طمنيني عليكي و علي صحتك

اوكككككككك

نعكشة يقول...

ألف سلامة عليكي

مش عارفة أقولك حسيت بإية صراحة

كل الل عايزة أقولة و انا عارفة ان مش وقتة بس انا بطاطس و بقول كل اللي على بالي

نفسي عزيمتك دية مع الاطفال دول متفترش

و نفسي متفضليش بس متدربة
بل انك تبقي مديرة بعد فترة و تسعي و تعملي و يبقى منبع العطاء منك انتِ

خايفة عليكي و مبسوطة قوي

مبسوطة لدرجة اني كان نفسي اروح العب هناك معاكوا مليش دعوة و اتعلم

ربنا يتتمملك على خير يا رب و يشفيكى بسرعة

و ان شاء الله الاطباء العرب هيتصلوا بيكي قريباً

ربنا يباركلك يا رب

شدي حيلك

سلام عليكِ

السنونو يقول...

مبروك يا دكتورة إنجى
على إنك لقيتى حلمك وبدأت فيه
المهم بقى متحرميناش أحنا كمان من متابعة حلمك ده
لأنه أكيد معظمنا معندوش أى فكرة عن المجموعة الجميلة دى
أتمنى إنك تكونى شباك صغير لينا على عالم متصورين إنه مختلف وبعيد عننا

أبو العريف يقول...

جميل ان نحلم
والاجمل ان يكون الحلم بجمال حلمك
تمنياتي بالتوفيق والسعاده

Nostor Azzuro يقول...

بارك الله فيكى وعليكى

والف سلامة عليكى

THE illusionist يقول...

الف مبروك على افتتاح الحلم الجديد
حلم جميل قوى وصادق
وهدفه مش عارف اقول ايه
نبيل والحاجات الحلوه دى
ربنا يعينك
ربنا هيعينك ان شاء الله
عشان المجهود اللى هتعمليه
و الناس اللى هتقومى برعايتهم
بجد حلم رائع
وبدايه حلوه قوى

الفقيرة إلى الله أم البنات يقول...

لو كل من يعمل فى هذا المجال مثلك..ما خشينا على فلذات اكبادنا ابدا
ولكن واحسبك على خير ...حد مختلف
لانى رأيت وعانيت الكثير إلى ان من الله على بمن يتقى الله فى ابنتى..وبفضل الله ثم بفضل اخلاقه ابنتى بدأت تتحسن
مشوراك طويل..وبتتعملى مع ناس قلوبها ممزقه لان فلذات اكبادهم هم من يحتاجوا رعاية وغالبا رعاية الغير لعجزنا او عدم قدرتنا ان ننجح معهم مثلكم
بارك الله فيك يا ابنتى وجعلك من المخلصين ورزقك محبة عباده المخلصين

لورنس العرب يقول...

ربنا يباركلك ولله

عابر سبيل (عبدالرحمن محمود) يقول...

بداية سلامتك
وربنا يقومك بالسلامة وتكملى حلمك
ثانياً
الف الف مبروك على اولى خطواتك نحو حلمك

ملحوظة شكراً على الزيارة
دمت بخير
والسلام عليكم ورحمة الله

عمرو يقول...

أنا دلوقتي فرحان بجد
شكراً يا إنجي.. بس شكراً قليلة. أنا فرحان فعلا والله
:)و D:

إيناس حليم يقول...

:)
اولا الف سلامة عليكي وان شاء الله تخفي بسرعة عشان تجري ورا فرحتك وتلحقيها وتفرحي اكتر واكتر :))

لما الواحد بيشتغل في الحاجة اللي بيحبها بيحس بسعادة تفوق اي تعب..

بجد الف مبروك
ربنا يسعدك ويوفقك

كيكى عوووووو يقول...

u me lovely dok

كيكى عوووووو يقول...

**y

shicooo يقول...

كل مرة احترامىليكى ولعقليتك الجميلة يزيد اكتر من اللى قبلها
الف سلامة عليكى ومش عارف اقولك ايه تانى.....
ابقى بصى على اللينك ده يمكن تحبى تشاركى
http://www.facebook.com/topic.php?topic=13716&post=153482&uid=7205423997#/group.php?gid=2232028031

دى اسرة الحياة ومعلومات عنها
ودى فيديوهات عن انشطة الأسرة
هتعجبك
لو حابة تشاركى
ونتكلم اكتر لما اشوفك ان شاء الله


http://www.facebook.com/ext/share.php?sid=85101367753&h=J6Vt2&u=1wA7S




http://www.facebook.com/topic.php?topic=13716&post=153482&uid=7205423997#/video/?oid=2232028031




http://www.facebook.com/group.php?gid=2232028031#/event.php?eid=65418095210

سقراط يقول...

السلام عليكم ورحمة الله وبركاته
العزيزة قوي جدا خالص
انجي
اولا مبرووووك على اول يوم حلم
وان شاء الله ربنا يوفقك ويقدم لك الخير دايما
جميل قوي ان تسجلي يوم زي ده
والاجمل انك تشوفي حلمك وهو بيتحقق
وتراقبيه وهو بيكبر
احنا مانقدرش نعيش من غير احلام
زي ما بقول منير
لو بطلنا نحلم نموت
الف مبرووك مرة تانية
ودمتي بكل ود وأحلام

micheal يقول...

أولا..تقومي بالسلام ةيا إنجي والف سلامة عليكي يا قمر
ثانيا..ربنا يوفقك ويجازيكي خير
حستناكي لما تخفي تقومي تفرفشي بقي عندي ببوست الألبون
:)
تحياتي

نعكشة يقول...
أزال المؤلف هذا التعليق.
safa7_karmooz يقول...

الف مبروووك...:)

safa7_karmooz يقول...

معلش

الف سلامة عليكى ^_^

نعكشة يقول...

خطأ مطبعي

Mo7ammed يقول...

دكتورة انجى
ربنا معاكى
وفرحااان جدا والله انك لقيتى نفسك اخيرا

ربنا يسهلك امورك وييسرلك احوالك ان شاء الله


واسف انى مش باجى عندك
بس انا الفترة اللى فاتت كنت شغال فى القاهرة
وقاعد هناك طول الاسبوع ومش بنزل الا خميس نص يوم والجمعة
ومبلحقش اعمل حاجة فيهم
انما انا بتابعك من على نت الموبايل وبتابع باقى المدونة

الخلاصة

انا فرحان اوى جدا خالص علشانك

انا ودماغي يقول...

مبروووووووووووك يا حبيبة قلبى

عجبتنى جدا الحالة اللى انتى فيها دى

و يارب يوفقك و تفضلى بالروح الحلوة دى..وتأكدى مدام انتى كدة يبقى إن شاء الله حتتغلبى على الصعوبات اللى ممكن تواجهك

enjy يقول...

ليكوريا : ربنا يسمع منك..متمسكة والله بس ربنا يجملها بالستر..على فكرة هما فعلا ملايكة.........


أحمد الشمسى:انا فعلا فرحانة ومبسوطة وفى احسن حالاتى..وفعلا بغض النظر عن البوست انا متعمدة انى اوصل فرحتى للى حواليا لان بقالى فترة غبية جدا وعابسة جدا فيللا ميخسرش انى افكها شوية..
عن العمل التطوعى..انا كنت متطوعة زمان فى رسالة بس ابتديت ابعد لما حسيت انى مش بنجز فى حياتى الشخصية وعلى فكرة انا دلوقتى مش متطوعة لكرم اخلاقى انا متطوعة عشان احصل على خبرات...متاكدة انى لما ارضى عن نفسى هتطوع كتير........


محمود محمد حسن : باشا انت كل كلامك حكم..بس حكم بترجعنى لارض الواقع..محمود طير شوية ومتتمسكش بالارض اوى كدة..مش حلوة الارض.........


عادل:دوووووووووووولة لا يا فندم انا اى نعم عيانة بس زى القرد وعايشة اقرف فيكوا متقلقش...حلوة تواصل دى عارفة انك هتموت وتستخدمها..شكرا عالدعوة وهطمنك حاضر لما اخف........

enjy يقول...

نعكشة : انت تقول اللى انت عايزه فى اى وقت يا جميل...انا كمان نفسى فى كل دة..ربنا اللى بيعين بقى..
على فكرة جملة انا فرحانة بيكى وخايفة عليكى فضلت ترن كتير فى دماغى..حساها اوى معرفش ليه..يارب يتصلوا انا مستنية اهو..على فكرة انتى ممكن تتطوعى فى مكان زى دة بما انك هتكونى دكتورة يعنى..معرفش بس اكيد ينفع وهتلعبى وهتنبسطى يعنى..
ادعيلى بقى كتير..........



السنونو:الله يبارك فيكى..اكيد هرغى كتير عن الشغل لانه فعلا مليان مغامرات..واشرف انى اكون شباك عليه..بس على فكرة هو فعلا عالم مختلف.........


ابو العريف:كل الاحلام جميلة ومشروعة..شكرا على دعواتك.........


نوستور:ربنا يخليك.........



صانع الوهم:حلو الاسم...شفت الفيلم اصلا وعجبنى اوى...تعليقك خارج من قلبك وانا مش عارفة ارد..شكرا جزيلا..........

enjy يقول...

الفقيرة الى الله ام البنات: حضرتك مش متخيلة تعليقك عمل فيا ايه..حضرتك ولية امر وفعلا قولتى المفيد..التجار فى المجال عندنا كتير اوى اوى زيادة عن اللازم..الحمد لله ان هداكى لواحد عارف ربنا وبيتقيه..وعلى فكرة فعلا والله الحلات مبتتحسنش الا بالشغل الصح مش بالتجارة فى المرض..ناس فعلا مقززة..ربنا يباركلك فى بنتك ويبارك فى اللى ساعدوكى تتغلبى على قهرك عليها...نفسى ابقى زيهم كدة..ادعى لى..........



لورنس العرب:ربنا يخليك والله.........


عابر سبيل:شكرا عالدعوة الحلوة..على فكرة انا بروح عندك كتير .....



عمرو:وانا والله فرحانة برضو..فرحانة قليلة..بس انا فرحانة انك فرحان عشانى..بقالى كتير مشفتش حد بيفرح لما حد غيره بتحصل له حاجة حلوة..انت بتفكرنى بحد بحبه اوى على فكرة..ومن كتر الغباء ساعات بحس انك هو..عمرو السيد على فكرة انت تحفة جدا يعنى.........



ايناس حليم:يارب..صح كلامك مبتحسيش بتعب اصلا بالعكس الوقت بيفوت بسرعة جدا......ربنا يخليكى
على فكرة اسمك حلو اوى ومميز........



كيكى:انتى اللى حبيبتى وانتى عارفة..متجيبى بوسة.........

enjy يقول...

شيكو:ربنا يخليك يا دكتور..كتير عليا والله..بص انا عبيطة فى الفيس بوك فهنتكلم لما اشوفك يوم السبت ان شاء الله...........



سقراط:العزيز اوى جدا خالص سقراط شكرا يا فندم عالدعم الرهيب دة..متبقاش تغيب تانى كدة..على فكرة كان نفسى تقولى رايك فى اللى فات.....



مايكل:ربنا يخليك عالدعوة الحلوة دى يا باشا..هاجى اكيد بس اما افوق كدة شوية لان انت عارف انى من مستمعيك........


سفاح كرموز:الله يبارك فيك..والله يسلمك.......


نعكشة: يا سلام؟؟ طب متقولى اى حاجة يعنى حتى تحللى تمن التاكسى اللى جيتى فيه...بتوحشينى على فكرة...........


محمد:ياراااااااااااجل ليك وحشة والله..المهم انت ازيك وعامل ايه؟؟ ربنا يوفقك يا جميل وشكرا جدا جدا.......


انا ودماغى:الله يبارك فيكى يا حبيبتى.. وحلوة اوى دعوة انى افضل بالروح دى..فعلا هو دة المهم......

reem يقول...

بجد الف الف مبروك يا انجى
والف سلامة عليكى يابنتى
وربنا يوفقك وحلمك يفضل متألق وتقدرى تحققى كل اللى انتى عايزاه
بجد خبر فرحنى...ويارب تقومى بسرعة عشان تكملى حلمك للاخر
الف مبروك يا دكتورة (F)

KIMOOOZ يقول...

سلامتك اف سلامه يا دكتوره ( ليست على سبيل النصب هذه المره ) ^_^

البوست ده ادانى دفعه للأمام لمجرد احساسك الصادق بالنجاح و تحقيق الحلم جعلنى اتمنى ان اكون مثلك فى اقرب وقت

ان شاء الله تكونى من اشهر الاخصائيين النفسيين فى مصر و نبقى نبعتلك استشارات على مجانين و اسلام اون لاين او تعملى حاجه احسن منهم كمان

اللهم امين

Hossam يقول...

wooooooooooooooooooow my lovely frind
انا بجد فرحان جدا جدا جدا انا بعشق العلم ده جداPhsycology
بجد الف الف الف مبروك دياما تشرفو المدونيين بانجازتكم
وحشتنيى اوى والف مبروك يا صديقتى
وانا بكل فخر اقول انا حسام شاهين صديق اخصائية العلاج النفسى انجى حافظ
تحياتى

عمرو يقول...

:)

blue-wave يقول...

ربنا يوفقك يارب
والف سلامه عليكى

صوت من مصر يقول...

لو بطلنا نحلم يا نوجا
بس بجد حلمك اكثر من هايل
ياريتنى مكانك بحسدك

mariam يقول...

سلامتك يا رب تكونى احسن دلوقتى :)

والف مبروووووك :) فرحتلك جدا والله و من ساعة ما قريت دراما الأنتقال و انا مستنية بوست زى ده

ربنا يوفقك :)

أحمد الشمسي يقول...

لسه مافيش حاجة جديدة؟

غير معرف يقول...

مش دي بردك مدونة أ.د.إنجي إبراهيم؟:
يا تري ممكن أدخل وأزور مدونتك ومعايا صحبتين ورد،واحدة علشان شغلك الجديد إللي في صميم دراستك ،وواحدة علشان أقولك بيها سلامتك من دور البرد الفظيع ألف سلامة عليكي يا جميلة.
إنتي مين ؟ أنا حد مدمن المرور علي المدونات من فترة ليست ببعيدة (حوالي 7شهور).عرفتك من مدونة مين ؟
شوفي يا ستي ،فاضية ماوركيش حاجة؟يعني أقول .هاجيب من الآخر زيك ؛ من تعليقاتك عند أ.د.عمرو السيد *مرارة روح*إللي كل مكتبله تعليق يتمسح سهوا ومعرفش اكتبه تاني !!بس أكيد ولازمن هعلق عنده في يوم من ذات الأيام إن شاءالله ؛؛؛
فدخلت مدونتك ونظرا لضيق الوقت ملحقتش أقرا غير كام بوست وإللي حبيت أسجل إعجابي بيهم من بعد إذن الضكتورة*علي فكرة تعليقك علي بوست "حروف شديدة الأهمية "خيش في ماغي أوي!!!
* بوست "حائط مجاور للفراش ":أكثر من رائع -رسمك بالرصاص بسيط وجميل ؛ فكرني برسومات بابا بس معلش هو أحوف منك حبتين - أصله كان مهندس ميكانيكا -وعندي له روسومات لوشوش برع في رسم أنفها أو ودنها أو فمها!!
كمان فكرتيني بسريري إللي فضل مجاور للحائط لمدة 30سنة؛حتي صارت بيني وبينه ألفة؛ ثم شاء القدر أن أنام مكان والدي بجوار أمي في منتصف الغرفة لتكون "دراما الإنتقال" - الموجعة لشخصية عشرية مثلي ترتبط حتي بقلم رصاص وتحزن لفراقه!!!
من الآخر أنا سعيدة وتشرفت بمعرفتك أنتي وغيرك ممن أسعدوني بكتاباتهم.
ديدي

enjy يقول...

ريم:ربنا يخليكى ياريم...وحشانى على فكرة........



كيموز:يا بيه انت مصمم انى اخد لقب رسمى..نصب او مش نصب انت تقول انجى وخلاص يا فندم احنا نطول؟؟؟
شكرا على امنياتك ربنا يجملها بالستر.......



حسام:انت شخص رائع يا حسام انا اللى فخورة بيك جدا جدا..بس انا انجى ابراهيم مش انجى حافظ يا حسام..منورنى يا صديقى الصغير الجميل........



عمرو:فيش الهوامش......




بلو ويف:الله يسلمك يا دكتور عمرو ربنا يخليك.........



صوت من مصر:ربنا يخليك يا كيمو..منور على طول..........

enjy يقول...

مريم:سيدة العالم انا ليا الشرف انك فرحانة عشانى دة سموك تنورى اى حتة والله....ربنا يخليكى يا مريم خلتينى مونشكحة ايما انشكاح والله.........




احمد الشمسى:ياااااااه وكمان جاى تسأل بنفسك يا دكتور؟؟؟ دة انا وحشة والله انى خليتك تيجى بنفسك وتسأل قريبا جدا بس الزكام يروح وكميات المناديل المهولة تخلص والكحة تختفى وارجع جرى..........



ديدى:بجد؟؟؟؟ عشانى الكلام دة؟؟؟ لا ومفصصة البوستات واحد واحد...يالهوى مش مصدقة والله وبجد فى ابتسامة كبيييييييييييييييييييرة على وشى دلوقتى انتى السبب الوحيد فيها...بجد انتى اسعدتينى فعلا فعلا بكلامك ومتابعتك الدقيقة ونقدك الحلو اوى دة..ربنا يخليكى للغلابة..والنبى ابقى تعالى كتير ربنا يخليكى .........

عمرو يقول...

هو الحلم ده كان يوم واحد بس كفالله الشر
اقلبي ورقة النتيجة لو سمحتي يا إنجي.. عشان نقرا بوستات جديدة
:)

غير معرف يقول...

أنا النهارده سعيدة جدا جدا أوي خالص ومودي جميل بكلامك الجميل إنتي وكمان عمورةإللي رحب بيا ودخلني من صالة كبار الزوار وعرفني علي كوبارات البلد؛ أنا قولت أمي دعيالي علشان عرفت الشباب إللي يفرح ده؛ والله أنا متفائلة بيكم جدا؛؛؛
وهاجي وأزورك ده أنا الشعب ومع الشعب وكل سنة وإنتوا طيبين بمناسبة عيد الثورة علي الطغيان!!!
ديدي

نعكشة يقول...

وش بيبص يمين و شمال

sab7al5air يقول...

سلام اولا مدونه جميله ومن الاخر ربنا يوفقك في شغلك الجديد فين بقا المكاتيب عنه
وتالتا
كل سنه وانت طيبه