الجمعة، 30 أبريل 2010

زمانها كبرت وبقت أم


زمانها كبرت وبقت أم..مقطع من أغنية جيرة وعشرة لمنير تردد فى ذهنى منذ تسعة أشهر عندما ذهبت معها إلى معمل التحاليل كى نعرف ما إذا كانت حامل أم أنها فقط تستهبل..

"عايزة بنت وللا ولد" كان هذا رد فنى التحاليل علينا عند إستلام النتيجة..أتذكر أننى وقتها بمنتهى البلاهة سألته"يعنى هى حامل؟؟" ..فرحت يومها جداً..جررتها من يديها كى نخبر أحمد وأمها وأمى..كانت هى فى منتهى العقل والحكمة..ربما الصدمة..ربما كانت تريد ألا تظهر فرحتها لأنها كانت أكبر من أن تحتمل..ربما.

يومها تذكرنا أيام الكلية..انا وهى وصديقتنا الثالثة..المعسكر..جولاتنا فى المنشية ومحطة الرمل..شطائر اللاشىء التى كنا نأكلها فى الجامعة..كتب كتابها ومعجزاته..فرش شقتها الذى كانت تعتقد على سبيل الاستهبال أننى أنا المسؤولة عنه ليس هى..

أخبرتنى انها ستسميها مريم..وأنها واثقة أنها مريم وليست محمد..أخبرتها فى المقابل اننى احب إسم مريم جداً..وأخبرتها أن مريم معناه سيدة العالم.. ونصحتها أن "تلم لسانها شوية عشان هتبقى أم" فأجابتنى بمنتهى البساطة "اتنيلى" فتنيلت.

طوال التسعة أشهر كانت تقول أنها متشوقة لترى ذلك الكائن الذى سوف تكون هى أمه و أنا وثالثتنا خالاته..كنت أقول لها ببساطة : إبنتك سوف تكون شيخة منصر يا إسراء فلا تقلقى..عندما إجتمعنا فى المرات القليلة بعد الحمل..كنا نناقش إمكانية نفيها إلى جزيرة مهجورة وإبقاء الطفلة مع أحمد كى تتعلم أصول اللياقة والأدب ولكى تكون هادئة الطباع طيبة القلب مثله..كانت هى ترد بمنتهى البراءة"لا هو ولا بنته يقدروا يعيشوا من غيرى"..ثم تتبعها بجملة فى منتهى الحنان "إخرسوا وإطلعوا منها يا خايبة منك ليها اللى مافى واحدة فيكوا فاتحة نفسى بعريس..جتكوا القرف" .

اليوم عادت الأغنية تتردد مرة أخرى..اليوم إسراء أنجبت مريم..إسراء صديقتى التى هى فى مثل سنى أنجبت كائن آخر مستقل خرج من أحشائها ويدعى مريم.

اليوم صحوت على تليفون تخبرنى فيه أن"معلش متجيش النهاردة ..أصلى داخلة على ولادة" أخبرتها أنه لا بأس ثم أكملت نومى فى وداعة..صحوت بعدها أسأل نفسى السؤال السرمدى الذى أسأله لنفسى مؤخراً مرات كثيرة "هو دة كان حلم وللا بجد؟" وعندما أفقت طلبتها فرد علي أحمد و أخبرنى ان "إسراء ولدت فى البيت و أنا بشترى حاجات..تعالي بقى"

عندما وصلت بعد كفاح مرير حيث إسراء تعيش على الحدود والمشوار للعجمى ليس سهلاً على الاطلاق..وجدتها وبجانبها كائن آخر صغير..هش..جميل..ولكن المشكلة أنه لا يمت لها بصلة..

أحمد فى غاية الافتتان وهى فى غاية التعب..سألتها عن تفاصيل الولادة و أنا أضع يدى على فمى كى لا أبكى..بعد أن أنهت كلامها أخبرتها أن "بت يا إسراء..إنتى بطلة..برافو عليكى"..

ولادة إسراء لم تكن سهلة على الإطلاق..الطبيب الذى كان يتابعها غالباً حاصل على شهاداته بالمراسلة..ولذلك عذبها ساعات طويلة ولم يوافق أن تنتقل إلى المستشفى..إسراء تحاول أن تلد مريم منذ أمس قبل منتصف الليل بساعة كاملة..ولم تصل مريم إلا اليوم ظهراً..إسراء فى النهاية وضعت مريم بالمنزل وحدها..أحمد كان يستدعى سيارة أجرة و أخبرنى أنه "رجعت لقيتها ولدتها ووقافة بيها فى الصالة مش عارفة تعمل فيها إيه ومتبهدلة دم"

فى تلك اللحظة لم اتمالك نفسى إطلاقاً..إسراء رائعة..ببساطة إسراء أصبحت أم..أخبرتها أننى لو كنت مكانها "كنت هضمت البت دى ومولدتهاش أصلا..بلا وجع قلب"..اليوم آمنت أنه يجب أن أكبر..آمنت أننى كبرت فعلاً..إسراء أصبحت أم..أرى عمرى فيها..أنا كبرت وقد أصبحت تلك حقيقة دامغة يؤكدها هذا المخلوق الهش الذى يدعى مجازاً..مريم.

مريم جميلة..تشبه أمها جداً - لازلت أستغرب لفظة امها - خدودها تشبه الخوخ..نفس اللون والملمس..فعلاً خدودها تشبه الخوخ تماماً..مريم رأسها لين جداً..يمكنك أن تتحسس مخها من فوق الشعر..مريم فتحت عينيها عندما كنا جميعا منكبين على الفراش نشاهدها فى أول محاولة رضاعة من الببرونة التى أفتينا كلنا فى كيفية تحضيرها..أخبرتهم أنها تريد أن تقول لنا "بتتفرجوا على إيه يا غجر..كل واحد فى مكانه"

عندما أخرج لنا أحمد شهادة الميلاد ضحكت كثيراً جداً و أخبرته أن "بقيت مهم وفى حد إسمه قبل إسمك" وعندما كانت إسراء تحاول أن تحمل مريم وهى متعبة جداً ولا تقوى على الكلام حتى..وعندما كان أحمد يحاول أن يساعدها وعندما نجحوا أخيراً فى حملها عادت الأغنية تتردد فى عقلى مرة أخرى..زمانها كبرت وبقت أم.

ملحوظة:تلك هى صورة مريم بعد ان جاءت عالمنا ببضعة ساعات..أنا التى صورتها.

.........إنجى إبراهيم.........

هناك 11 تعليقًا:

Unknown يقول...

لولولوليييييييييييييييييي

يارب ياااااااربنا تكبر وتبقى قدنا وتيجى تلعب وسطنا وتبقى اشطر مننا..

Mohammed Salaheldeen يقول...

اللي جابلك يخليلك

ريم وجيه يقول...

مبروووووووووووووووك
عقبال ما افرح بيكى كده يا نوجا واشوف ولادك
البيبى زى القمر ما شاء الله
وانا شخصيا احب انزل باغنية
ام كلالة ولدت ياللا نروح لها
\-

كيكى عوووووو يقول...

ونفهمها ان المتحف المصرى هو الجامعه الامريكية!!!
وش بيغمز على حاجاااااااات كتيررررر فى البوست دة!!
اوعى تنسى الى قولتلك عليه بخصوص اسراء

مريم يقول...

الف مبروووك و عقبالك..

انا لقيتك بتكلمى عن مريومة صغنونة مقدرتش اقاوم انى اعمل كومنت قولى لأسراء ايوة كدة عاشت الاسامى :)

بقالى كتير مبعلقش بس مفوتش ولا بوست..دمتى بخير ياانوجة يا رب تبقى كويسة.. هتابع (عشان ربنا يحبك) فكرة روعة

Unknown يقول...

صاحب الاسم الغريب: تتربى فى عز باباها ومامتها.......


ريم:ناخد لوز وبندق ونروح نبارك لهاااااااااا..عقبالى اه وماله..اصلى اتجننت خلاص..........


كيكى:متجيبى بوسة يا انتيختى......


مريم:تصدقى بالله؟؟ انا كنت مستنية تعليقك انتى بالذات عالبوست دة..كنت بقول هى مش بتيجى ليه؟؟وكنتى وحشانى..
ربنا يجبر بخاطرك والله انتى تالت حد يشجعنى عالفكرة..كنت قربت افقد الامل..منورة يا سيدة العالم......

مريم يقول...

يااااه كنتى مستنيانى اعلق ,طب كويس انى علقت انا كنت خايفة متفتكرنيش , انا بزورك على طول و كنت بضايق لما كنت افتح و الاقى ان مفيش بوست جديد..والله انتى اللى وحشانى اوى

تلاتة بس اللى شجعوكى عالفكرة ,ده الفكرة ده عجبتنى اوى اصل لما بسمع الاخبار فى التليفزيون لا اراديا بقلب القناه و فى نفس الوقت نفسى اعرف اخبارهم ايه.. لو تقدرى تكملى فيها يا انجى استمرى كمان ليها ميزة ان كدة انتى بتعرفينا ايه احتياجتهم و بيكون فى جمعيات ممكن نساعدهم عن طريقها يعنى هتخدى ثواب كمان انشاء الله

عالم ماريونت يقول...

انوووووووج روح قلبي
انا مش عارفة اقولك ايه؟
بوست جمييييييييييييييييييييل فوق الوصف انا عشت كل حرف فيه و كل المشاعر الجميلة الي موجودة فيه يخرب عقلك
!!!!!!!!!!!!!!!!!!!!!
الف الف الف الف الف الف الف مبروووووووووووووك ويارب عقبالك و عقبال ما اشيل عيالك يارب (بس انا الاول انا الكبيرة) :)
انا بس مفهمتش: يعني ايه مامتها فضلت تولد 12 ساعة و الدكتور رافض انه يوديها المستشفى؟ و يعني ايه ولدتها لوحدها طب مرحتيش ليها ليه؟؟؟؟
ههههههههههههههه
سؤال وجيه بردو
تحياتي ليكي بحبك اوووي ويارب عقبال ما نشيل ولادك

اختك رنا

رحلتنا في الحياة يقول...

البنت تفضل عايشة زى الطفلة لغاية ما تلاقى حواليها اطفال هنا هتتحمل المسؤلية بجد
الف مبروك ربنا يبارك فيها يارب ويحفظها
عقبالك ياااااارب

funky girl يقول...

ماشاء الله
الف مبروووووووووووووووووووووووك

بجد بسم الله ما شاء الله جميلة جدا
ان شاء الله ربنا يهنيها بيها و عقبالك :)

الأرمـوطــي يقول...

يا خلاصو اندغة اندغة اندغة ههههههههه
انا برضة لما اصحابى اتجوزوا وخلفوا حسيت انى كبرت وان العمر اتسرسب من بين ايديا واتشوقت كتير انى اتجوز واكون اب زيهم فى الحقيقة متشوق انى اتجوز اكتر ههههه
الف مبروك وعقبال متشيلى ولادك وتجيبى بنت وتسميها مريم لان اسم مريم دة عزيز عندى اوى دة اول حب فى حياتى
تحياتى ليكى