دى حتة قصيدة صغنونة كتباها الشاعرة الكبيرة اسراء اختى بمناسبة العلاوة وازدهار التعليم ورفع الاجور واختفاء طوابير العيش والشغل المرمى فى كل حتة والزهزهة اللى احنا عايشين فيها
مصر هى امى
مصر ماصة دمى
شردت غيالى
عجزت ملامحى
حتى القمح يا اما
مش لاقيه يا مصر
"م"
ماتردى يا اما
والا مش لاقية كلمة
تواسى بيها ابنك
كتلر خيرك يا مصر
"ص"
صعبان عليا
ودينى وربى
ما قادر اربى
ولا ااكل واعلم
صرفت اللى حيلتى
وبرضه مش مقضى
ما تحسى بيا يا اما
تفتكرى سهل عليا
اقول شكوايا ديا
والله صعبان عليا
"ر"
روحى الله يجازيكى
ماكنش عشمى فيكى
امنتك حياتى
وكمان حياة ولادى
بجد عيب عليكى
روحى الله يسامحك
دانتى استخسرتى خيرك
فى ولادك حبايبك
ولا انتى خلاص نسيتى
روحى الله يجازيكى
هناك 13 تعليقًا:
هههههه
الكلمات جميلة ومعبرة
بس مصر معملتش كل ده .. للى سايبنهم يعملوا فينا للى هما عازينوا هما للى عملوا كده ... مصر احلا مكان فى الدنيا بس للى ماسكينها ازبل ناس فى الدنيا , عجبت لشتان فى بلد
هاى انجى..عاملة اييييييييية شكرا لزيارتى وتعليقك.....بس اية دة دكتورة مرة واحدة....على فكرة ذكرى كويس علشان تعالجى كل المصرين...وياريت خذينى انا الاول...وقولى لاختك.كلماتك حلوة اوىىىىىىىىىى
ههههههههههههههههههههههه
أديني بضحك يا أنجي
ومدخلتش المعتقل
هههههههههههههههههههههههههه
القصيدة جميلة أحلي من الأصلية
ربنا يكرمك ويحبسك في المعتقل
نهههههههههههههههههههههههههه
ياللا سلام ياريسه
دي حاجة قالها عمنا الكبير اوي احممد فؤاد نجم وبصراحة نفس الكلام ده انا عايز اقوله
أنا مبخافشى وحفضل أقول
كلمة حــق عليها مسئـول
إن الريس راجــل طيــب
وبشعبه دايما مشغـــــول
مشغول انه يلم فلوسنا
بره سويسرا يحوشهالنا
وف حسابات سريه يشيلها
نفسه يأمن مستقبلنا
شفتوا ازاى بقى قلبه رحيم
عنده إيمان وضميره سليم
بيجوعكوا لجل تخسوا
آه ياشعب يا محتاج لرجيم
من جهلكوا بتقولوا بطاله
وان الاحوال مش شغّاله
دا الراجل نفسه يريحكم
هى الراحه تبقى عواله؟
أما حكاية المنتجعات
ليه تسموها المعتقلات؟
ليه الظن وسوء النيّه
نفسه يفسحكوا يا بهوات
أما الكرسى واللى اتقال
دا كلام مش محتاج لسؤال
الغلطه دى غلطتنا يا عالم
إن مجبناش كرسى تيفال
والله انتم ظالمين الراجل
ضيّع عمره ومين يستاهل
حتى الأكل بياكله بدالنا
طالع واكل نازل واكل
بعد ده كلّه .. .. .. ماله الريس ؟؟؟ ؟؟؟
أنا مبخافشى وحفضل أقول
كلمة حــق عليها مسئـول
إن الريس راجــل طيــب
وبشعبه دايما مشغـــــول
هههههههههههههه
بجد جامدة
وأحلي من الشعر بتاعي كمان
انا جيت أهوه اوعي تبلغي عني
علي فكرة انا ضيفت اللينك بتاع المدونة بتاعتك عندي
اوعي تبلغي عني بقي
بس بجد مدونة حلوة
وبالتوفيق ان شاء الله
فيمتو:عندك حق بس هى ايه البلد غير شعب و حكومة اما الارض دى ما يختلفش عليها اتنين كلنا بنحبها بس على الطريقة الصح عايزينها تبقى احلى
كيكى:شكرا ليكى كمان على زيارتى ومن غير ما تقولى كل القراء هاعالجهم عشان فى الغالب هابقى انا السبب فى جنانهم ولا يهمك
زيدان: طب ليه كدة بتدعى على عشان اخش المعتقل؟ على العموم السجن للجدعان.ورينا جدعنتك يا معلم
تامر: مافيش كلام بعد كلام عم نجم..شكرا لتعليقك الذكى جدا
احمد المهم:عارف لو بطلت تدخل على المدونة وتعلق؟هاوديك مارينا!!!شكرا على اضافة اللينك عندك انا كمان هاضيفك يللا ان شا الله ما حد حوش
لسسسسسسسسسسسسسة ماكتبتيش حاجة جديدة يلا بقى....انا سبقتك...اكتبى بسرعة....على فكرة انا بكرة الا الكلمة الى بلنجليزى الى بكتبها بالعافيية
والله بوست قراتة ودموعي جريت علي خدي لية معرفش
اعتقد هنا في البوست دة حضرتك تقصدي الشعب والحكومة
مش الارض لان حفنة التراب من ارضها بكنوز العالم كلة
ماعلينا معنديش تعليق غير ان البلد دي لو عملت حب لاخيك ما تحب لنفسك
مكنش دة بقي حالنا
تحياتي
ياسر
ياسر:واضح من كلامك انك متعذب فى غربتك معلش بكرة ترجع لنا وزى ما قلت فى تعليق سابق الارض بنحب كل شبر فيها العيب فى الحكومة اللى ماسكاها وفى الشعب اللى ساكت لهم ...ربنا يوفقك وترجع بسرعة اوعى تبطل تزور المدونة ماشى؟
يا ماما دانا هعزل هنا لقيت الجو طراوة
وكلام جميل اي واللة
تحياتي
ياسر
اتشرف باول تعليق علي مدونتك ..بصراحة كنت محتار أختار انهي موضوع للتعليق .. لكن أخترت الشعر ده رغم أنه بوست قديم شوية بس فعلا عجبني جدا .. أحيانا المعاناة اللي بنشوفها في بلدنا هي اللي بتطلع مننا احلي الكلام .. بجد كلماتك عجبتني .. وربنا يوفق .. واتمني يدوم التواصل بينا
فارس بلا جواد: شكرا على الزيارة يا دكتور بس للاسف انا مش باعرف اكتب شعر دى اختى يللا معلش طلعت اوت يعنى اكتر حاجة عجبتك ما كانش كلامى ولا يهمك.شرفت
إرسال تعليق