الاثنين، 12 مايو 2008

حلمى حلمك

نفسك تطلع ايه لما تكبر؟ سؤال هرونا بيه ايام المدرسة الابتدائى وطبعا كلنا كنا بنقول يا اما دكتور يا اما مهندس وكان فيه قلة منحرفة من الولاد بيقولوا نفسى اطلع باشا قصدى ضابط...-المهم- كلنا نسينا اننا كان نفسنا نطلع حاجة واحنا صغيرين ولما كبرنا بلطنا فى الخط وما بقيناش عايزين نعمل حاجة غير اننا نعدى امتحانات الترم لييييييييييييييييييييييييييييييييييه؟
اوعى تقول عشان الظروف والجوابات والكلام الفارغ دة .لا حضرتك احنا اللى بقينا شايفين ان الاحلام بتاعة العيال الصغيرين ..مش عارفين اننا لو بطلنا نحلم نموت ..اوعى تموت..اه والله لو بطلت تحلم روحك هتموت مش هتبقى عارف لحياتك هدف ولا معنى كل الايام هتبقى شبه بعضها ..لكن لو جربت تحلم هتلاقى سبب تقوم عشانه من النوم الصبح ويبقى عندك امل فى اللى جاى..انا مش فيلسوفة ولا مصلحة اجتماعية انا بحاول افكر نفسى كمان انى لو بطلت احلم هاموت..اه والله

هناك 10 تعليقات:

ياسر يقول...

السلام عليكم ورحمة الله وبركاته
سعيد جدا بتعليقي لانة الاول علي

البوست دة بس فعلاا دة كلة كلام انشاء

لما تكبر تحلم تكون اية وادحنا حلمنا وحلمنا

واتعلمنا هههههه وبعدين اية الاحصل كان حلمي

حياتي اكون دكتور بيطري او مهندس زراعي وارض في الصحراء

ومشروع استصلاح بس كلة كدب في كدب اخرتها سواق شاحنة

في بلد اوروبي وغربة واغتراب وساعات سواق تاكسي بف معلشي

كلة يهون بس كل ولااد حتتنا الحرفيين لاتغربوا ولاا حاجة حبيت اثبتلك

ان كلة كلام انشاء لما تكبر تحلم تكون اية ياستي القدر هو الا بيحلملنا

كترخير الحكومة والقدر

اسف علي الاطالة دومتي اخت وصديقة

فائق احترامي وتحياتي


ياسر

a7md Helal ( المهم ) يقول...

جامده الحته بتاعة
ولما كبرنا بلطنا فى الخط وما بقيناش عايزين نعمل حاجة غير اننا نعدى امتحانات الترم

لا حلوة بجد
بس والله العيب مش فينا
العيب ممكن يكون في نظام التعليم اللي كله حفظ وبس
او في المدرسين اللي مش بيشرحوا
لان مافيش حاجة اتغيرت فينا من الابتدائي ،للاعدادي ، للثانوي
للجامعة

ولا ايه رأيك

Unknown يقول...

ياسر:دة مش كلام انشاء وما كانش قصدى اننا نحقق حلم الطفولة لاننا ببساطة ما كناش فاهمين الدنيا انا قصدى اننا نحلم بحاجات نقدر نحققها يعنى انت مثلا بدل ما تقضى حياتك غربة واغتراب وتسمى المدونة بتاعتك حطام انسان ممكن تحلم انك يبقى معاك فلوس كويسة تقدر ترجع بيها بلدك وتعيش فى وسط اهلك اهو دة حلم بس مش كلام انشاء لانك لو بطلت تحلم يا معلم هتفضل علاقتك بوطنك مدونة بتكلم عن طريقها ناس عمرك ما شفتهم ...احلم بقى انك ترجع لنا بسرعة يا ياسر ماشى؟اوعى تبطل تزور مدونتى يا ريس

Unknown يقول...

احمد المهم:شكرا على متابعتك وفخورة بيها بس اييييييييييه؟انا بتكلم عن الناس اللى مش عايزين حتى يعيشوا مش عايزين يحاربوا الناس اللى عمرهم ما هيعرفوا يعنى ايه نجاح لو العيب فى التعليم احنا بنخلص تعليم فى مرحلة من مراحل حياتنا بس بردو بنفضل مبلطين فى الخط ..انا مقتنعة ان اللى عايز يعمل حاجة بيعملها وللاايييييييه؟حلمك ممكن تعدله تبع ظروفك عشان لازم تبقى مهم ماشى؟ اوعى بقى تبطل تزورنى بااااى..

علم الهسس يقول...

بصى يا انجى البوست حلو
وفعلا احنا محتاجين نحلم
احلم واطلق لعقلك العنان للاحلام
وانا رأى
احنا بطلنا نحلم للسبب الأتى
انى احنا قاعدين نقلد أحلام ناس تانية
فماتت عندنا حاسة الحلم وزادت عندنا حاسة التقليد والحفظ
وتلاحظى دا فى التعليم والامتحانات
وتلاحظيه فى المشاريع التجارية والبيزنس
وتلاحظيه فى حل مشاكلنا

بمعنى التقليد قتل الحلم
هذا أولا
وانا برأى ان هناك نوعين من الأحلام
الأول
احلام النوم ودى بيحلمها كل الناس بلا استثناء والجدع هو اللى بيفتكرها
التانى
احلام الأهداف ودى بيحلمها قليل لأنه يتميز اى الحلم بالواقعية وانه يكون فى حيز التنفيذ
بس انا خلصت كلام
شكرا

Unknown يقول...

الهساس الاعظم:شكرا على التعليق ..المهم اننا بعد ما نحلم نحاول نحقق احلامنا ونبقى مرنين فى كيفية التحقيق المهم اننا ما نبطلش نحلم ونشتغل ونحاول وربنا معانا ..وعلى فكرة اللى عنده هدف بجد بيلاقى الدعم اللى محتاجه من مصادر كتير اهمها دعم ربنا ومساعدته

ياسر خاطر يقول...

انا الحمد لله
كنت بقول عاوز ابقى عالم
وطلعت مهندس
وبندم اني ماطلعتش عالمة

ياسر يقول...

يا انجي انا قصدي

علي المدرسين الا كانوا واحنا صغيرين

يقولك اية تحب تطلع اية لما تكبر ما اقصدش كلامك

بالعكس وانا كل سنة في مصر شهر وساعات قبل

ما الازجازة تخلص ارجع تاني اجري

ومتخافيش انا رغاي قوي لان صديقي الو حيد

الماوس اصلي بكتب بيها بفتح صفحة الكيبورد دي

http://www.dorar.net/keyboard.htm

وافضل انقر زي الكتكوت لغاية معمل جملة مفيدة ومش عاوز

انزل وندوز عربي بيتقل الجهاز

تحياتي

ياسر

qindeel يقول...

حلو اسم المدونة

Unknown يقول...

قنديل:طيب يا عم عبرنى براى فى الكلام فى الاسلوب اى كلمة انت ليه بتتكلم بالمختصر المزيد كده؟