الاثنين، 11 مايو 2009

غاضبة للغاية

هناك أنواع من البشر..وهناك لكل نوع منهم طريقة الغضب التى تناسبه.
** ** **
غاضبة منه حقا..لماذا يتركنى اتحمل كل تلك السخافات وحدى؟؟
هو بالتأكيد يعرف أنى وحيدة..بالتأكيد يعرف أنى هشة..بالاحرى هو الوحيد من يعرف كم أنا هشة..كل هؤلاء الحمقى المحيطين لا يعرفون شيئا..يظنوننى قوية ومتحكمة..هو الوحيد من يعرف أن قشرة الصلابة الخارجية تخفى مزيدا من الهشاشة الداخلية.
هو يعرف كل هذا وأكثر اذن لماذا يتركنى لهم وحدى ويبقى هو بعيدا؟؟
** ** **
هناك من نغضب منهم لانهم اقتربوا أكثر من اللازم و رأينا وجههم القبيح..ولم يكن هو من هذا النوع.
** ** **
لازلت غاضبة منه..لا أجده بجانبى يخبرنى أن تلك هى الحياة.هو يعرف انه الوحيد القادر على أن يهون على اكتشافاتى الانسانية القبيحة لمن حولى..
لماذا يتركنى اعتقد أننى غبية لاننى صدقت هذا ووثقت به؟؟ لماذا يتركنى أعتقد اننى غبية لاننى احببت هذه واستأمنتها على اسرارى..
لماذا يتركنى أواجه فقد ثقتى فى الناس وحدى؟؟لماذا يستكثر على وقوفه بجانبى فى تلك اللحظات؟؟
** ** **
هناك من نغضب منهم لانهم تركونا ورحلوا..ولم يكن هو من هذا النوع.
** ** **
الم يكن من الاجدى أن اجده بجانبى عندما أفقد الاعزاء؟؟ غاضبة ممن تركونى ورحلوا..ناقمة عليهم..هم تركونى وحدى دون اى تحذير مسبق..غاضبة لانهم اتخذوا قرارهم بالموت دون موافقتى..ذهبوا دون أن اسمح لهم بذلك..ولكنى غاضبة منه أكثر لانه ليس بجانبى ليخبرنى أن تلك هى سنة الحياة..غاضبة لانه يتركنى أواجه فقدهم وحدى..غاضبة لاننى لا ارى وجهه يخبرنى أن اكف عن التفوه بتلك الحماقات.
** ** **
هناك من نغضب منهم لانهم موجودون فى حياتنا..ولم يكن هو من هذا النوع.
** ** **
اغضب كثيرا ممن يجبروننى أن اكرههم لانهم موجودون فى حياتى..اغضب منهم لانهم لا يتركونى سالمة ويرحلون.. أغضب لاننى لا احب أن اجبر على فعل أى شىء حتى الكره.. لا أرى فى افعالهم ما يعوض خسارتى الانسانية نحو ذاتى عندما أكرههم..
اذا فقط ابتعدوا قليلا؟
اذا فقط كفوا عن التواجد فى حياتى؟ لن أكون غاضبة منهم هكذا..
أما هو فأنا غاضبة منه جدا لاننى لا اسمع صوته يخبرنى ان هناك امور غير متوفر فيها خيارات..غاضبة لانه لا يحمل نفسه عبء افهامى ان تلك مقدرات و أن هناك من الاشخاص من هم ليس لنا اختيار فى أن ننتقيهم .
هو غير موجود كى يخبرنى أن هؤلاء لا يمكن تغييرهم ويساعدنى أن أرضى بالامر الواقع..
اهذا عدل؟؟
** ** **
هناك من نغضب منهم لانهم غير موجودين فى حياتنا..وهناك من نغضب منهم لانهم لم يأتوا بعد..وكان هو الوحيد من هذا النوع..وكنت أنا غاضبه منه لذلك الى حد فلكى حقا.


..........انجى ابراهيم...........

هناك 36 تعليقًا:

KIMOOOZ يقول...

ياااااااااه يا دكتوره

البوست ده لمس جوايا حاجه كان نفسى اعبر عنها من زمان بس مش عارف خالص

طول عمرى مقتنع انى المفروض يكون فى حد يكون...

تصدقى مش عارف المفروض يكون ايه
بس المفروض يكون موجود
و لازم يكون مش زى كل اللى موجودين معايا دلوقتى

شكلى بدأت اخرف

بوست حلو و موفق

Unknown يقول...

كيموز:اسم الله علييييييييييييك اهو انت جبتها صح..المفروض يكون فى حد يكون..منتاش عارف يكون ايه..وهو مش موجود وصعب يبقى موجود ومفتكرش هيبقى موجود بس انت حاسس انه موجود لدرجة انك زعلان انه مش موجود....لو بتسمى اللى انت قلته تهييس يبقى ردى عليك ايه؟؟؟
مبسوطة اوى انك بتيجى هنا وبتعلق ومنتاش زعلان وواخد موقف منى
بجد مبسوطة بيك
تعليقك مكمل جدا للموضوع والحمد لله انه عجبك ولمس حاجة جواك دة منتهى أملى

غير معرف يقول...

أة
+ تنهيدة كبيرة اوووووووى
عووووو

SHAPE YOUR LIFE (ABOALI) يقول...

مميز ورائع

اشكرك

Gannah يقول...

ازيك يا انوج؟
وحشانى جدااا جدااا
كالعادة احساس عالى وتعبير غير عادى
انا منقطعة عن العالم تقريبا ودى اول مرة افتح النت من اسابيع
تحياتى

KIMOOOZ يقول...

مبسوط جدا عشان تعليقى عجبك و شفتيه مكمل للموضوع
و بعدين هاخد موقف منك ليه
طبيعى جدا ان نكون مختلفين فى نقط فى الحياه و متفقين فى نقط تانيه

اهم حاجه بس اننا نختلف بزوق و وجهه نظر تستحق الاحترام زيك كده

تحياتى ليكى و الى الامام

صوت من مصر يقول...

بسيط جدا
والاحلى انه وصل بسهوله مش بركز فى الموضوع وبركز فى الاسلوب
متميزه دائما

الست فرويد يقول...

انجى
كان هو الوحيد من هذا النوع
لان هذ النوع لا ينتج منه الا فرد وحيد ..
واحد فقط نحلم به ..ونحتاج له وقت الالم .. ونفتقد طبطبة ايده وحضنه وقت الوجع .. ونرغب جدا فى ان نسمع له وهو يوضح لنا الحقائق ويهون على النفس المرهقة سخافات الاخرين واكتشافات الندالة والقسوة والضرب تحت الحزام

وبقدر افتقادنا له يكون غضبنا منه زى ما قولتى لانه مش موجود

عبرتى بروعة عن الفكرة .. وزفرة الغضب والوجع والافتقاد منك لمست كل حتة من قلبى

عارفه فى اغنية لانغام هى مش مشهورة قوى اسمها اتقابلنا

بتتكلم فيها عن الغائب اللى انت بتوصفيه ده لحظة ما التقت بيه
وفى اخر الاغنية وبكل حرقة قلبها وشجن صوتها العذب بتقوله:

كنت في الله يسامحك

والله فكرتنى بالوجع والشوق الحلو قوى والعتاب اللى احلى من الصفااللى فى صوتها وهى بتقولها

يالا انا طولت عليكى بقى :)
بس اعمل ليك ايه وانت اللى بتجى على اوتار القلب وتعزفى :)

تحياتى ليكى يا قمر

adel يقول...

غاضبة لحد فلكي
مش الفلكي دي في وسط البلد ؟؟

هههههههههههه

انتوا كلامكم كلكم جاي علي الجرح و بيخلي الواحد يقشعر و يحس انه عاوز ي .....

ههههههههههههههه

بس بجد ... الحد ده يمكن كده
نكون منتظرين منه حاجات و بنرسم عليه امال و ابيعملش اي حاجة و مش بيمشي الا في الوقت اللي انت فعلا محتاجة فيه كاي كانت التسمية اخ-حبيب- صديق
يكفي انه يكون موجود بس هو بياخدها من قصيرها و بيمشي

ليكوريكا يقول...

متدوريش عليه ...

لو هيجي هتحسي بيه علي طول من غير حتى ميقول

ولو مجاش ...

فهوا موجود جواكي وشايفاه وحاساه اكتر مما لو كان موجود

بس نصيحتي متدوريش ...

غير معرف يقول...

ra23a

رحلتنا في الحياة يقول...

تعرفى اكتر حاجة عجبتنى الغضب من الناس اللى بتتواجد فى حياتك بشكل مستفز ومش بتقدرى تتخلصى منهم لكنى بعانى من الموضوع ده
بس البوست كله هايل بجد دايما ياانجى ماشاء الله عليكى بوستاتك مش محتاجة حتى يتعلق عليها من روعتها

حاسوباتيه يقول...

حلوه قوي قوي بجد فعلا في ناس من كتر مابنحبهم بنغضب منهم على تركنا تسلم ايدك بجد

غير معرف يقول...

صباح الخير
اولا اسمك حلو .. انجي

ثانيا الكلام معبر وبسيط

ارتحت في مدونتك
صافي الود

Foxology يقول...

يا خبر ابيض

صعب اوى الموضوع ده

الحاجة للترك وعدم الوجود بنفس مقدار الحاجة للوجود واثبات الوجود !!

تحياتى بجد على التحليل الرائع ده :)

مذكرات مشاغب يقول...

استغربت جدا لانك قولتي على الشخص ده انه ولا هو قريب ولا هو تركك لكن كتشفت في الاخر انه لم ياتي بعد.
بنهيالي كلنا بنحس بكده
بس انا متاكد ان مفيش حد بالمواصفات ديه
مفيش حد كامل خالص
كلنا مليانيين عيوب
مبتظهرش غير لما حد بقرب مننا اوي

أغضب لاننى لا احب أن اجبر على فعل أى شىء حتى الكره

عجبتني جدا جدا الكلمه دي

رائعه كالمعتاد(افضل من اقرا له)

تحياتي

حاجات جوايا يقول...

اسلوبك رائع بجد
ربنا يوفقك
ميرسى على الزيارة يا جميل
سالى

princess يقول...

مش عارفة اقولك ايه
بجد البوست عجبنى اوى بدون مجاملة
وحسيت فعلا بالغضب فى كل كلمة
وفعلا لما تعوزى انسان ومش تلاقيه يبقى فيه غضب داخلى واحباط ملوش حل

نعكشة يقول...

انا مش عارفة اقولك إيه


بس اتخذِ لأخيكِ سبعين عذراً

يمكن كان عايزك تعرفي انك قوية

يمكن كان عايزك تعرفي انك تقدري تواجهيهم
يمكن عايزك تعرفي انك بتعرفي تتصرفي لوحدك

يمكن هوه شايف فيكي حاجة كويسة و عايز يوريهالك بالاسلوب العملي

يمكن ميقصدش

أي شيء يحتمل

قبل ما تغضبي من أي حد عشان خاطري قوليله يمكن يوضحلك حاجة مفكرتيش فيها

يوضحلك حاجة تشفعله

متتخذيش وضع الغضب قبل ما تشوفي الموقف من كل جوانبه

ربنا يهون عليكِ جامد
و يعينك
ويديكي القوة
و الصبر
و العزيمة

معلش بس يمكن فعلاً فيه عذر

اتمنى يكون كافي للشفاعة من أجله و من أجلك أيضاً

نفسي اللي فيه الخير ليكِ يحصللك
و تيجي و تقولي إنك في حال أفضل

سلام عليكِ

Unknown يقول...

نعكشة: هو انتى ليه حلوة اوى كدة؟؟؟

نعكشة يقول...

أنا مش حلوة أصلاً
يمكن عشان أنا بغضب و بكتشف في الاخر اني على غلط مش عايزة حد يبقى كدة

يمكن عشان أنا بزعل ناس كتيير مني لإني مبفكرش في الاحتمالات فمش عايزة حد يزعل من حد

أنا مش حلوة ولا حاجة

لو انتِ تعرفيني حقاً هتكتشفي إني لا أمت للحلاوة بشيء

ويمكن مجرد أقنعة

تصدقي

أنا مش عارفة أنا إيه

سيبك مني

مستنياكِ ان شاء الله تيجي و تقولي إن الوضع تحسن

في أي اتجاة يمضي فيه بس يكون تحسن

يا رب

سلام عليكِ

Nostor Azzuro يقول...

الغضب احساس انسانى منقدرش نعيش من غيره

سقراط يقول...

العزيزة جدا اوي خالص مالص
انجي
من الصعب ان اوصف مدي اعجابي بكلماتك
بيعجبني جدا العمق اللى فى اسلوبك
وبيعجبني تماسك الموضوع
بجد بحييكي
بس كنت عاوز اعرف ايه السر فى انك تمضي بعد كل تدوينة
"انجي ابراهيم"

Unknown يقول...

سقراط:العزيز اوى جدا خالص سقراط..فخورة برأيك فى اللى بتقراه عندى...والله بنشكح جدا لما بقرا تعليقاتك اصلا انت من الناس اللى بستنى تعليقاتهم...
بالنسبة لاسمى فى اخر كل بوست فدة لسبب احم احم وجيه جدا...اصلى مش عايزة انسى اسمى..اييييييييييون قربت انساه..فى الكلية مفيش فى السيكشن غير اتنين انجى والتانية اسمها مميز اكتر فبيندهوا عليها بالثنائى وانا انجى بس..و لما كنت بشتغل مكانش فيه انجى غيرى فبيندهونى انجى وبس...لقيت انجى ابراهيم دة مش مستخدم خالص قلت اوقع بيه احسن انساه........
فى سبب تانى بقى وهو انى لازم اوقع باسمى ثنائى عشان لما اتشهر وكدة اتعود انى انجى ابراهيم مش انجى كدة وخلاص..هع هع هع

Ramy Wasel يقول...

اسلوب رائع
وموهبه متميزه
ننتظر منك المزيد من الابداع

Zika يقول...

انا كنت داخل ادور علي بوست اقراه
وقلت اجي عندك
والحمد لله مش هاقرا حاجه تانيه النهرده
البوست ده كفايه
بس احب اقولك ملحوظه اخيره بجد يعني يا انجي انتي عندك احتلال اسمه احمد خالد توفيق
بوست حلو

سقراط يقول...

العزيزة قوي جدا خالص مالص .. انجي ابراهيم

انا سعيد جدا اني اعرف انك بتنتظري تعليقي
مع انه فى الغالب بيجي متأخر
المهم بقي لما ان شاء الله تتشهري
ماتبقيش تنسينا
يا انجي ابراهيم

micheal يقول...

البوست عجبني أوي يا إنجي بس الحملة الأخيرة اللي قفلتي بيها أثرت فيا بجد
لأني ساعات كتير بسأل نفسي هل ممكن أكون مستني حد لسه مجاش وأغضب منه كمما لو كان موجود في حياتي من قبل
:)
قدرتك في التعبير عن المشاعر عالية يا إنجي
تحياتي

غير معرف يقول...

- أدبيا :
كعادتك تأخدي القارئ رغما عنه إلى أعماق قلبك حتى يصير يتنفس أحاسيسك طيلة قراءته لكلماتك .
- فكريا :
تخيليه تمام كما تريدي .. تخيليه بكل فكرك بكل قوه عقلك ، لكن انزعي عنك رداء الحاجة ، و اشعري أنه معك الآن فعلا و ابتسمي له و تعايشي معه .. حتى لو كان السبيل لذلك أن تستمري في أن تتخيليه معك يخاطبك و تخاطبيه على صفحاتك على الكمبيوتر أو في أوراقك ثم ابتسمي ستجديه .
و حسب قوة تخيلك و تفكيرك و تفاؤلك سيأتي " هذا قانون كوني " .. لكن أكرر (( لا تنتظريه أو تشعري أنك في حاجة إليه .. فقط عيشي في إحساس أنك تمتلكيه الآن بكل جوارحك )) .


- متأسف على التأخير في التعليق .
محمــــود حجــاب

سمراء يقول...

وأنا ايضا غاضبة منه
ولكني التمس له العذر
لانه لا يستطيع أن يكون موجود


سمراء

سابرينا يقول...

عندما يجئ سيخبرك بكل ذلك!
فلا تغضبي منه مقدما
_________
البوست أكتتتتتتتتتتر من حلووووووووو

عابر سبيل (عبدالرحمن محمود) يقول...

استاذة انجى
ليه كل الغضب ده
انصحك بالبعد عن الغضب
السكر والضغط و .......وغيره ماشى فى البلد
وعلى فكرة انا غاضب جداً جداً جداً
لغضبك

سلام

عابر سبيل (عبدالرحمن محمود) يقول...

بعيداً عن الغضب
ننحنى احتراماً للاسلوب الرائع
جمال التناول
دقة التعبير

قلم رصاص يقول...

السلام عليكم

اسلوب رائع في التعبير عن الافكار

مزيد من التوفيق

في حفظ الله

قلم رصاص

أحمد حامد يقول...

أنا راى من راى نعكشه
أسف انى ادخلت بس الموضوع ده شدنى أوى
ممكن اكون صديق جديد معاكم ولااااااااااا
طب على الاقل أقول رأى وأمشى
دنيا من غير مشاكل يبقى فى حاجه غلط
لما بزعل ببقى متأكد انى شويه كده وهيبقى فى حاجه تفرحنى ولما بفرح ببقى متاكد ان فى حاجه هتزعلنى
هيى دى الدنيا الشمس لازم تغيب عشان تشرق ولازم تشرق عشان تغيب0
لما بعرف حد وأقرب منه قوى ببقى متاكد ان هيجى اليوم وهنفترق ولما بنفترق ببقى متاكد ان احنا هنتلاقى تانى
بس هى دى الدنيا
مش عارف احيكى ازاى يا انجى على الموضوع الجامد ده كان نفسى أتعرف على حد زيك من زمان

أحمد الدريني يقول...

راجعي الارشيف يادكتورة
:)