الخميس، 21 مايو 2009

عن الفوضى والابداع


هناك أنواع من الفوضى....هناك الفوضى المعيقة والتى تمنعك من آداء مهامك كما يجب..و هناك الفوضى الخلاقة التى تساعد صاحبها على الاتيان بافعال او حلول غير واردة عند معظم الناس وهذا النوع الاخير من الفوضى هو ما اعنيه بكلامى..ولكن للاسف ليس على مستوى فردى فما اقصده هو الفوضى العامة التى تجعلنا كشعب وحكومة ناتى بتصرفات غاية فى الغرابة فيما يسمى بالابداع..
نتعرض فى الفترة الاخيرة الى عدد من المشكلات الفوضوية والتى كانت فى صالحنا بشكل او بآخر حيث اظهرت قدرتنا الابداعية..هل تريد تفاصيل؟؟ حسنا....ابق معى قليلا.
أزمة أنفلونزا الخنازير مثلا منظمة الصحة العالمية غيرت اسم الفيروس واقرت انه ينتقل من الانسان للانسان ولكننا باصرار مبالغ فيه وعزيمة كما عزيمة الاسود اصررنا ان نعدم كل الخنازير المصرية – الحيوانية الاصل فقط للاسف - وقد كان بامكاننا ان نجرى الكشف الطبى عليها وذبح الصالح منها وتصديره للاسواق حيث ان هناك فئة ليست بالقليلة تستهلك لحوم الخنازير فى مصرنا العزيزة...ولكننا مبدعين يا عزيزى تلك الحلول المنطقية السهلة لمن ليسوا مبدعين.. وامعانا فى الابداع ولكى تعرف اننا شعب مبدع فعلا وخلاق انظر الى طريقة الاعدام لتلك المخلوقات العجماء..اعدامهم بدفنهم احياء تحت الجير الحى...الم تتاثر بتلك العبقرية الفذة والتى تنتج حلولا غاية فى الابداع من موقف بسيط تعاملت كل الدول معه بمنطقية الا احفاد الفاراعنة العظماء؟؟
هناك ايضا موقف غاية فى الفوضوية والغرابة عايشناه مؤخرا..توفى حفيد الرئيس..الله يرحمه عادى كلنا هنموت..ما اعرفه ان هناك مئات من الاطفال يموتوا كل يوم بل كل ساعة والطبيعى الا نعلق على موتهم ولكن لانه حفيد رئيس الجمهورية من الطبيعى ان ياخد الخبر شكل اخر اوسع قليلا...طبيعى ولا اعترض ولكن ما اعترض عليه حقا والذى اراه ابداع غير مسبوق هو اغلاق التليفزيون الرسمى واعلان الحداد لثلاثة ايام ..كل القنوات الارضية والفضائية..اغلقت البرامج واذاعت القران على مدار الساعة....الاكثر ابداعا تلك المجاملات البلهاء من القنوات الفضائية المصرية المستقلة...نفس الطقوس قران على مدار الساعة..لا اطالبهم الا يتعاطفوا ولكنى ارى ان تلك فضيحة كبرى....انقطاع تام عن العالم لان حفيد الرئيس مات..ابداع ابداع يعنى...ما يضحكك اكثر هو تلك الشعارات الجوفاء التى تتخلل القران اليومى فى البرامج الرئيسية ....مشاهد من الجنازة وعبارة تتوسط الشاشة (الحزن داخل كل بيت مصرى ) ليه؟؟ طفل مات..الله يرحمه..ليه بقى الحزن داخل كل بيت مصرى؟؟؟؟؟؟؟؟؟؟؟؟
المذيع الانيق عقد حاجبيه واخد يقول وهو يواجه الشاشة بتأثر ( الاسرة دى ادت مصر كتير..كتير اوى ..عشان كدة احنا كلنا متعاطفين معاهم..مش متخيلين كم الحزن...طبعا الحزن على حفيد الريس منبعه حبنا للريس وخوفنا عليه....وانا بقولك يا ريس بسم الشعب كله..ولادنا كلهم احفادك) بماذا ترد بالله عليك على مثل هذا الاستفزاز الفج؟؟؟؟ استفزاز فعلا......كان يكفى تقديم التعزية دون اهانة ذكاء ومشاعر المشاهدين بتلك الصورة المقززة.. اذا كان هذا هو الحال فأى شخص سوف يموت له ابن او حفيد وكان له بعض الشعبية سوف يسكن الحزن بيوت المصريين.......كلام غير منطقى بالمرة..منتهى الابداع الحقيقة.
آخر مشاهد الابداع واحدثها..الحكم على هشام طلعت مصطفى باحاله اوراقه الى المفتى.. فى نفس الساعة..تنويه عن برنامج الاعلامى الكبير الذى يجيد اشعال الحرائق و تزكية النيران بوجه الحمل الوديع..البطل والصحفى والاعلامى المستقل والذى يقف – يا سبحان الله بالصدفة – وراء معظم ما حدث من كوارث فى الفترة الاخيرة من جراء برنامجه الفذ....تنويه عن برنامجه وتناقش الحلقة الحكم على هشام طلعت بالاعدام.. لسة الحكم مطلعش اصلا...الامانة المهنية تستدعى الالتزام بنص الحكم....لا نريد ابداع من اى نوع...هناك قوانين يجب ان يحترموها...........
وهكذا يتبين لك عزيزى اننا شعب مبدع جدا وعبقرى و فذ....بجد احنا مبدعين دة احنا حتى لسة بنهرج لحد دلوقتى.



.........انجى ابراهيم...........

هناك 38 تعليقًا:

شمعى أسعد يقول...

يا بنت الايه
من شوية كنت لسه بقول ازاى ممكن نحلل سلوك الشعب المصرى من خلال تحليل ردود افعالنا ناحية التلات احداث دول بالتحديد
انفلونزا الخنازير
حفيد الريس
قضية هشام طلعت

ايه التوراد ده

Muhammad Mammdouh يقول...

يسلام على مواضيعك الجامده جدا جدا
اسمعى بقى اول حاجة طبعا موضوع انفلونزا الخنازير ده فى حاجة كويسة ان الناس الفى بتاكل اللحمة دى هيخافو وميكلوهاش وانا معاكى طبعا ان طريقة حل المشكلة مكنتش منطقية
............................
ثانيا موضوع حفيد الريس اولا طبعا الموضوع بعيدا عن انو حفيد الريس وكده هو موت والحفيد الكبير وكده وحاجة تزعل فعلا لانو اكيد يعينى كان الترفيه الوحيد فى حياتو والغريب ان ده النسل الوحيد للعيلة دى وطبعا الجنازة والتليفزيون والحزن والكلام ده كله لا ينطبق علية الا المثل المصرى الشهير بتاع العمده طبعا بس اقولك على حاجة انا اول ماسمعت عن الموضوع سمعت مجرد سمع مكنتش شوفت تلفزيون ولا قريت جرايد ولا كده وعشان انا دماغى وحشة قولت مستحيل يكون مات ممكن يكون حد هدد ولا حاجة فعملو الفيلم ده عشان يعيشو حياة جديده بعيد عن القلق بس لقيت الفيلم كبير فاستبعدت الفكرة الشيطانية دى بس الله يرحمه ويرحم موتانا جميعا اما عن عمو هشام فا مش عارف بس لا اعتقد ان ممكن يحصل حاجة زى كده

KIMOOOZ يقول...

هههههههههههههه

بالنسبه للخنازير فهو فعلا لأننا بنحب الاستسهال فندبح الخنازير كلها و نرميها فى الزباله اسهل برضه ما ننقلها فى مكان بعيد و امن

اما بقى موضوع حفيد الريس فحدثى و لا حرج
حاجه تشل يا شيخه
طفل و مات ربنا يرحمه و يصبر والده
فى ايه بقى
اللى طالعين يعيطو بالدموع فى البرامج التوك شو كأن همه اللى كانو مربيين الواد من ساعه ما نزل من بطن امه
و التحليلات العبقريه فى علاقه مبارك بحفيده و الاستخبارات الجهنميه فى كيفية نقل الخبر للجد
ما خلاص يا جماعه مكانش عيل و مات
ما غيره بيموت كل يوم بس مش بيروحو يتعالجو فى فرنسا على الطياره الرئاسيه اللى جبهاله ابوه من فلوس الضرايب
و عجبى
معلش اصل غايظنى اوى انه سافر على الطائره الرئاسيه
اول مره اعرف ان ليها استخدام اخر غير نقل الرئيس

نعكشة يقول...

بما إني واحدة من هذا الشِعب الفوضوي
و بما إني من أكثر الناس فوضوية سواء في التصرف أو التفكير

إذاً فأنا أدافع عن فوضويتي و فوضويتنا جميعاً

ولا هدافع ولا بطيخ

بالنوسبة بقة للموضوع
اية هما

اة
الخنازير

أولاً معرفتش انهم اتقتلوا بالجير الحي ولا اتدبحوا غير منك دلوقتي
انا كنت فاكراهم اتدبحوا

الفكرة لا تكمن في الخنازير
ولكن في الوسط اللي كانت عايشة فيه الخنازير
او بمعنى أصح الوسط اللي الناس كانت عايشة فيه جمب الخنازير

كان لابد من هذا التدخل السريع في فصل الاتنين من بعض
و محاولة التفرقة لغن الاتنين بقة لونهم اسود و مش باين الفرق

يا ستي ما يدبحوا الخنازير ولا يشنقوها حتى
المهم الناس اللي كانت عايشة هناك
اهتموا بيهم؟؟؟
عملولهم حاجة؟؟؟
بعدوهم عن المناطق اللي هما فيها؟؟؟
نضفوهالهم حتى
دخلوا مرافق
عملوا اي بتاع
فالحين بس يبنوا قصور و بورتو مارينا و بورتوا السخنة و مدن عالمية
و الناس مش لاقية تاكل

آل خنازير آل

.............
حفيد الرئيس بقة
اكيد
بما إنه رئيسنا احنا مش ناس تانين
و كل الناس عارفاه
لما حد يموتله
هنحزن لحزنة
و على هذا الفقد
سواء بقة كنا بنحبه او لأ

وبعدين يا ستي نجوم اف ام بقت تجيب اغاني دينية
و ميلودي قفلت و شغلت قرآن

خييييييير

بركة

وبعدين القناة الاولى لاقيتها شغالة عادي

انا اصلا مبفتحش التلفوز إلا كل حين و مين
فمعرفش هل حدث تغير رهيب ولا لأ

بس يعني ربنا يهون عليه

...............

الموضوع الاخير لسة سامعة عنه من اختي دلوقتي
ولازلت معرفش إيه ملابسات لاامور أصلاً
ولا مين عمل إية ولا فين و ازاي

.............

ارجع و اقول كل واحد ليه وجهة نظرة في الحياة التي لا تمنع التعايش فيما بين الناس

حبيت اوضح وجهة نظر أحد الفوضويين
اللي انا واحدة منهم

سلام عليكِ

د/عرفه يقول...

أولا
احيكى على هذا الموضوع الرائع

بالنسبة للخنازير
اظن ان ذبحهم من باب النظافة العامة
لا اماكنهم قذرة جدا ومصدر لامراض واوبئة كتير

لكن انفلونزا خنازير وكده الكل اثبت
انها لا تنتقل للانسان من الخنازير بشكل مباشر


بالنسبة للاعلامى ابو وش بيضحك ده
اظن انه بقاله فترة كده ىوهو مدى على نفاق على الاخر
والمشكلة ان الناس متعودة تسمعه ومتعودة تصدقه

ربنا يهدى الجميع

adel يقول...

بجد حلو قوي يا انجي
تحليل رائع و فعلا احنا معندناش ثقافة التعامل مع الازمات
و طلعت مصطفي لسه متعدمش و احتمال كبير مايتعدمش و الايام جاية
اما البرنامج ف قصدك علي وائل الابراشي بتاع الحقيقة
الراجل ده بكره قوي قوي :(:(:(

----------
انا هابعتلك تحليلن لفيلمين للمجلة

محمود محمد حسن يقول...

انجي ازيك ،

مقال جميل على فكرة ،

فعلا تحسي بجد اننا عندنا ابداع في الخراب ، ابداع بجد مش ممكن ، اعدام الخنازير بالطريقة الهمجية دي كان حاجة غريبة فعلا ، واعدامها اساسا حاجة اغرب ، حتى لو الخنازير حرام اكلها في الإسلام ده ما يديش الناس الحق في دبحها كلها ، حتى لو هي بتقرفنا فعلا ، برضه من حق اللي يربيها يربيها ومن حق اللي مش مسلم وياكلها هوا حر ، دي حرية ، لكن تحسي ان الناس كانت حاسة بتشفي في الخنازير وفي دبحها ، طيب ايه علاقة ده بالأنفلونزا ؟؟ دي بتنتقل من الناس لبعضيها مالهاش علاقة بالخنازير اساساً ، مفيش فايدة ادبح يا زكي قدرة ، يدبح زكي قدرة،

لما مات حفيد حسني مبارك كنت على النت وقتها الساعة واحدة بالليل ، وواحد صاحبي قالي انه مات ، كنت متوقع يعني ان الموضوع حيعدي ، وخلاص زي ما اخوه مات من مدة ومحدش سمع لا حس ولا خبر ، فوجئت بهذه الكمية من النفاق الذي لا حدود له ، صاحبي في الشغل قالي تصور قطعوا الإرسال في التليفزيون المصري ، استغربت اوي ، وبعدين بقى فوجئت بقى ، إعلان الحداد ، مش عارف برامج الناس فيها تتصل وتقول اننا اتأثرنا اوي وفضلنا نعيط ، ؟؟ طب تعيطوا ليه ؟؟ يعني هوا كل طفل بيموت الناس بتفضل تعيط عليه وهيا ما تعرفهوش ؟؟ ما تفهمش ،

امبارح قريت انهم حيعملوا حديقة بأسمه في حلوان ، اسمها حديقة الطفل محمد علاء مبارك ، الحديقة حتكون فيها عشر تلاف شجرة والعمل بيجري فيها على قدم وساق علشان تخلص في خمس ايام بس ، ..احم بلاش اعلق احسن ،

مصر بلد متعب نفسيا فعلا ، بلد يخليك متضايق متضايق اوي اوي ،

تحياتي

مذكرات مشاغب يقول...

تقريبا ديه اول مره هختلف معاكي يا انجي

1-بالنسبه لانفلونزا الخنازير فانا شايف ان اللي عملته الحكومه ده عين العقل لان اعدام الخنازير اللي احنا شغالين فيه من زمان ده واللي بيتعمل بشكل غير آدمي بقاله فتره طويله ولسه مخلصناش على ربع الخنازير في مصر فما بالك باه لو لسه هنكشف عليه وتحاليل ومعامل(اللي هي مش موجود منها اصلا اللي يكفي للعدد الضخم ده من الخنازير) ده معناه اننا هنقعد سنين قبل ما نذبح كل الخنازير وهيكون كل مواطن مصري عنده انفلونزا الخنازير اصلا وخف منها كمان(بعد ظهور المصل). ده غير ان الحكومه بعد ما فشلت في القضاء على انفلونزا الطيور فمعندهاش استعداد
انها تفشل كمان في انفلونزا الخنازير خصوصا انها اخطر. ده غير اننا شعب فهلوي اوي وبياكلها وهي ولعه وهيلاقي الناس خنزير تعبان فيقولو لا ده عند شوية برد مش مصاب ولا حاجه وهيخبوه .وانا متاكد ان الحكومه لو كانت عملت الاقتراح ده كان زمان انفلونزا الخنازير انتشرت عندنا اكتر من دور البرد.

2-انا معاكي في موضوع المبالغه في وفاة حفيد الرئيس.فيه ناس طلعت تعيط في منظر رياء ونفاق واستفزاز رهيب.هو كان ممكن قراية قران ساعه ولا اتنين.لكن ايام.امال لو الرئيس نفسه توفى ايه اللي هيحصل .هيقفلو النايل سات ويكسروه.

3-انا مش عارف الاعلامي اللي انتي تقصديه . بس بما اني داخل اختلف معاكي. يبقى اكيد انا شايفه عسول واعلامه هادف وبيفهم جدااااااااا كمان :))

تحياتي

Unknown يقول...

مذكرات مشاغب:دكتور احمد باشا صقر اختلف يا فندم بس اوعى تقول اعدام الخنازير بدفنهم تحت الجير الحى حاجة كويسة....دة اصلا حرام دول بيحرقوهم انت متخيل الالم اللى بيتعرضواله قبل ما يموتوا؟؟؟
دى ارواح ومش اى ارواح دى مخلوقات ضعيفة و عجماء ومتقدرش تدافع عن نفسها....ماشى يا سيدى يعدموها انا عمرى ما هضحى بحياتى عشان الخنازير تعيش يعنى بس فى حاجة اسمها ادمية..احنا بنى ادمين عندنا عقل لازم نستخدمه..ادنى قوانين الانسانية بتقول منعذبش الحيوانات ابدا دة حراااااام...على فكرة طريقة اعدام الخنازير دى ربنا مش هيعديهالنا بالساهل دة احنا هنروح فى داهية كلنا....كان ممكن اوى يدبحوهم او يعدموهم من غير تعذيب عشان دة فى شرع ربنا حرام وفى شرع الانسانية حرام محدش يرضى بتعذيب حيوانات خرساء مش قادرة تدافع عن نفسها...من لا يرحم..لا يرحم

عابر سبيل (عبدالرحمن محمود) يقول...

الاستاذة انجى
تحياتى
موضوع غاية فى الروعة
اتفق معك تماماً فى موضوع الرحمة بالخنازير
لان هذا هو الاسلام
فرسول الله يقول
(اذا قتلتم فأحسنوا القتله)
يعنى لازم يكون فيه رحمة
حتى فى الذبح
فرسول الله يقول
(وليحد احدكم شفرته وليرح ذبيحته)

اما عن موضوع حفيد الريس
بعيداً عن اختلافنا مع اى احد
وبعيداً عن الحب و البغض
وبعيداً عن دعوات قد تخرج منا ونحن نرى ما حولنا من احداث
فندعوا على البعض وقد تطول دعواتنا الابناء
فقد سمعت البعض يدعو على حكام العرب جميعاً ان يصابوا فى ابنائهم حتى يشعروا بما يحدث للاطفال فى غزة والعراق وغيرها
ولكن الموت هو الحدث الوحيد الذى يتوقف الانسان امامه طويلاً ليفكر

رحم الله الجميع وصبر الجميع

اما تعامل الاعلام المصرى الرائد مع الحدث
فده شئ عاااااااااااااااادى
رياده بقى
واختلف مع الاستاذ محمد محمود
فى موضوع مثل العمده
اعتقد ان التعبير قد خانه وهو يحتاج لمراجعته

اما موضوع هشام طلعت مصطفى
فانا وحتى الان فى حيرة
هل تم الايقاع بالرجل فى مصيدة محكمة لانه اصبح من غير المرغوب فيهم؟
ام انه بالفعل اشترك فى الجريمة؟

اخيراً تقبلى تحياتى

غير معرف يقول...

موضوعك جميل اوي يا انجي
تسلم ايديكي بجد

بالنسبه لموضوع انفلونزا الخنازير
انا اكتر حاجه مضايقاني طريقة التخلص منهم
بجد حاجه تحزن اوي
اولا حراااام اوي ثانيا كل خنزير بيشوف ألم جسدي ونفسي رهيب قبل ما يموت يعني ايه يحرقوه هو ده مش بيحس برضو :(
انا كان عندي يتخلصوا منهم ماشي بس بأي طريقه غير دي..


بالنسبه الحفيد
طبعا مفيش شماته في الموت
وبعيدا عن اي سياسات وعلي المستوي الشخصي انا زعلانه جدا جدا
مجرد انني اتخيل ان دا يكون ابني ويروح مني وهو لسه طفل عنده 13 سنه دي حاجه تشل أصلا.. فـ دي هي اللي مخلتنيش افكر في أي سلبيات
وموضوع التليفزيون اللي اتقفل مش فارق معايا لانني علاقتي بالتليفزيون مش كبيره
بس اتفق معاكي انها تعتبر مهزله ان التليفزيون يتقفل او ممكن نسميها نفاق رياء للحاكم اي مسمي مش هتفرق.. بس نزلوا في جرنال الاهرام باءسم الرئيس انه مش عايز تعزيه من حد ومش عايز كل المواويل اللي حصلت عالتليفزيونات دي.. فـ ده في حد ذاته شئ جميل يعني انتي اكيد وصلك دلوقتي العيب في مين..
وبعد كل ده
ارجع واقول كل واحد لو اعتبره ابنه مش هيزعل ثانيه م اللي حصل..

بالنسبه لموضوع هشام طلعت مصطفي
علي فكره
انا حاسه ان الراجل ده مظلوم
والموضوع ده متلفقله
وفعلا هزعل جدا جدا لو شنقوه :(

بصي
انا ممكن يبقي رأيي غريب حبتين
بس
لازم منفكرش في كل حاجه باندفاع ونمشي وراء الهوجه وخلاص :)

عموما
مستنيه رأيك ومناقشتك يا جميل

تسلم ايديكي بجد

تحياتي

Foxology يقول...

اولا احنا مش مبدعين ... احنا مبتدعين :)

ثانيا موضوع وفاة حفيد الرئيس دى طبعا واضح جدا ان فيها كمية نفاق تكفى الفراعنة كلهم فرعون فرعون من ايام الدولة القديمة لحد كليوباترا والبطالمة كمان :))

ثالثا موضوع انفلونزا الخنازير .. من امتى كنا بنتصرف صح ؟؟ فكرنى كلامك بالنكتة بتاعة بلدياتنا اللى كان عندهم حفرة كل يوم يقع فيها واحد يقومو يطلعوه ويودوه المستشفى البعيدة عن الحفرة ولما تعبو قامو ردمو الحفرة وحفرو واحدة مكانها قدام المستشفى تخفيضا للوقت اللازم لنقص المصاب الى المستشفى :))))))

رابعا موضوع الحكم بالأعدام .. احب اقول حاجة واحدة .. الكبار لو مكنوش عاوزين يعدموه كانو هيسيبوه ولا ايه ؟؟؟

وبس :)

msafa يقول...

وماذال للابداع بقية

حسام غانم يقول...

أنا متفق معاكي تماما

بوست جميل

عمرو جويلى يقول...

الحجاج كان جزمةزى واحد صاحبنا كما قلت
وأنا أريد أن أسألك ماهو صاحبك الجزمة ؟ ومن عرفك أن الحجاج كان جزمة ؟
واضح أن ثقافتك سطحية لأن أكبر فتوحات إسلامية كانت على يد الحجاج على الرغم من شدته وقسوتك
وأخيراً أشكر لكِ أخلاقك العالية وذوقك الرفيع

Unknown يقول...

هاجر زعبل:طبعا متفقة مع رايك بشدة فى موضوع اعدام الخنازير بطريقة وحشية...لكن حفيد الريس لما يموت نقول الله يرحمه وندعى لامه وابوه بالصبر..انا عمرى ما حسيت ان الاسرة دى بشر غير فى الجنازة ابو الطفل فعلا مكانش مصدق لكن الاستفزاز المبالغ فيه دة شىء وحش ليه بقى؟؟؟ لان احنا معندناش استقرار سياسى والمعارضة تقريبا نص الشعب والنص تانى اما مليونيرات او مالهومش فيها والوفاق بيننا وبين الريس والحكومة مش كبير عشان المبالغات اللى حصلت دى...اغلاق التليفزيون الرسمى فضيحة اعلامية فعلا..يعنى ايه دولة تنعزل عن العالم تلات ايام بحاهم؟؟؟ دى فضيحة والله وحاجة مكانش ينفع تحصل..اما عن مجاملات القنوات المتخصصة فهى حاجات ملهاش لازمة لانه محدش من اسرة الطفل استفاد من انقطاع الارسال ومينفعش نوحد جهودنا فى حاجة شكلية اوى كدة...
عن هشام طلعت مصطفى معتقدش حد فينا عارف الحقيقة فين انا بس كنت بعترض على الامانة الاعلامية والواجب المهنى الذى يحتم الالتزام بنص الحكم..

منورة جدا يا هاجر كالعادة وانا سعيدة بمناقشتك اوى

عمرو جويلى يقول...

أشكرلكِ ردك وإهتمامك ولكن من هو صاحبك الجزمة ؟ مع الوضع فى الإعتبار أننى أوضح مساوىء الحجاج وإيجابياته فى ردى السابق
وهل هناك سيابق معرفة لكى تكتبى جزمة زى واحد صاحبنا
أما عن ما أو من فلك حق فيهايا آنسى
واضح من اللفظ نفسه ذوقك العام

عمرو جويلى يقول...

كويس يا آنسة ! إدينى عنوانك عشان أضحكك كثير وكمان تعطى لى درسا فى الإملاء
حتى أحصل على الدرجات النهائية .
ومن هم مثلك وأكبر منك سناً كانوا تلاميذى
وما زلنا نخرج أجيال وفى الآخر يتلفظوا بألفاظ مثل جزمة وكما قرأت فى ملف تعريفك دكتورة مستقبلاً وهذا يدل على فشل التعليم فى بلدنا
فشل كتربية وفشل كتعليم

NOGA ALEX يقول...

والله البنت دي بتقول كلام زى الفل اوي
لا بجد كلام زي الفل تصدقو وتامنو بالله اليوم اللي فتحت التليفزيون وسمعت الخبر المروع طبعا وفاة حفيد الرئيس كان عندنا في العجمى خبر تافهه معرفهوش غير شوية جيران وتناقل اللي سمعي طفل عنده 3 سنين كان بيلعب في الشارع وقع في البلاعه بتاعة المجاري اللي هي مفتوحه ونط بعدة راجل الله يكرمه يحاول يطلعه والناس بقت تطلع الراجل والولد امه كمان جالها صدمه يا شيخه اية التفاهه دي خلينا في المهم حفيد الرئيس مات

عمرو جويلى يقول...

يا دكتورة إنجى أشكرلك توضيحك . ولكنى أرفض لفظ جزمة لأننا من المفروض أن نرتقى بالذوق العام كأناس متعلمين أو أى من هذه الألفاظ وهذا ما جعلنى أثور أما عن فشل التعليم بسببى فليس من حقك أيضاً لأنه من الظلم أن تصدرى حكم على شخص كان ممكن يكون أستاذك
أم كما يقول المثل
الدنيا إتشقلب حالها
وهذا آخر حوار معكِ لأنه بالفعل مضيعة للوفت والجهد

KIMOOOZ يقول...

ايه حكايه الجزمه اللى الاخت لؤلؤه مصره عليها ديه
انا مش شايف اى جزم فى البلوج خالص

hasona يقول...

السلام عليكم

الموضوع في جملته جميل
ولأن الفوضي تشتت الابداع
وتشتت الفكر
وفوضي الحكومة والنظام تجعلنا ننشغل بما هو تافهم ونترك ما هو مهم ليطمس وتبهت معالمه

1- موضوع انفلونزا الخنازير
يعني تقريبا أصبح أسهل شئ عند الحكومة هو الذبح والقتل
عندما كانت انفلونزا الطيور استصدار أمر بذبحها وقتلها وتجريم كل من يتستر عليها

وهكذا مع الخنازير - لكن كان بدون مرعاة للضير حيث كانت ترمي وتدفن حية - وهذا ما لا نرضاه
اذا كان لابد من الذبح فلابد من الرحمة



2- موضوع موت حفيد الرئيس
تكلمنا فيه الكثير والكثير
ما هو الا نفاق

هو فيه عزاء واجب
رحم الله الفقيد
وأدخله فسيح جناته
والبقاء لله
في وفاة محمد علاء مبارك
الواحد بيزعل من موت أي حد
مهما كان

،،،
ولكن لي أضافة
لعل السيد الرئيس يتعظ
لعله يدرك مدي مافيه شعب مصر من فساد وظلم
عبارة(سفينة) تغرق فيموت 1300 فرد ما بين أطفال وشيوخ وبشر
والمالك يهرب
وقطار يحترق وأخر يخرج عن طريقه
ويموت أطفال وشباب ورجال
وهناك من يذهب بطفله الي مستشفي فيرجع وقد فقده الي الابد

قمة النفاق
أن يتوفي حفيد الرئيس فيعلن الحداد في البلاد
والاذاعة التليفزيون
والرئيس يحتسبه عند الله
وهناك مئات تموت يوميا
ولا تهتز شعره في جسد الرئيس
ان كان لا يستطيع تحمل المسئولية
فليتركها ولا يـجري ورائها

وان كان يدري بتلك المصائب ولا يتحرك فهذه مشكلة ومصيبة
أما ان كان لا يدري فهذه مشكلة أكبر ومصيبة أعم

وليعلم أن ولده ليس أفضل من أولادنا
وأنه ليس أفضل من بقيتنا

فيعلم أن الله موجود
والبقاء لله وحده

3- موضوع هشام وسوزان
طبعا مش يستاهل منا كل ده
تصور ان القاتل شخص عادي والمقتول كذلك
كستجد الامور بسيطة

ولكن القاتل والمقتول ليسوا عاديين

وانما هما دليل علي الزواج الفاسد والباطل بين السُلطة والمال

وعندما يقع الفرد تكثر السكاكين الموجهة له

وهي قرصة ودن قوية

وأكيد هناك أكثر من خمس سيناريوهات للحدث بل أكثر من هذا

أي حاجة تحصل للقاضي أو أعضاء المحكمة
أي حاجة تحصل لهشام ومحسن او هروبهما
ولأن الحكم لم يكن نهائيا
وهناك طعن سيقدم

تصور واحتمل كل شئ

،،،،
لكن لا تشغل بالك بأي شئ
عليك بنفسك وبأسرتك

وحاول أن تبعد عنهما أثر هذا الابداع

سلمت يداك
وكل سنة وانت طيبة

وأسف علي الاطالة

تحياتي

Hossam يقول...

صديقتى العزيزة انجى
موضوع بجد تاحفة وهقولك رايى بصراحة
بالنسبة لعرضك لمعنى الفوضى فهمو صحيح مية فى المية
اما بالنسبة للخنازير-فانا مع الحكومة فى اعامها لان الفيرس لو كان وصل بعيد عن تقرير الصحة العالمية فكانت هتبقى مصيبة لو جه مصر لكننى مش مع طريقة اعدمها لانها غير ادامية خصوصا موضوع الجير.
بالنسبة لموت ابن الريس-فاكيد كلنا زعلنا مش عشان هو حفيد الريس لكن عشان انه الولد لسة صغير ومتمتعش بالدنيا وكان زعلنا الاكبر على حالة والدتة.ونفس الشعور كان هيبقى متبادل مع اى طفل اخر.وبالنسبة للقنوات فانا لا احب النفاق
تحياتى عل البوست الرائع
سلام

Adam يقول...

موضوعك بجد جامد

فعلا تنفعي دكتوره ونفسيه كمان

احييكي
اتمني التواصل

ادم

كيكى عوووووو يقول...

هع يابنت اللذينة
***************
بالنسبة للخنازير مش تقلقى خالص دكتور نظيف اشار اليهم بعدم الوحشية معاهم وكمان يعنى انتى عايزة نموتهم ازاى ندبحهم كدة عادى!!!
احمدى ربنا اننا بندفهم دة اذا بنعمل دة اصلا
**********
حفيد الريس انتى عارفة اجابتى
******************
هشام طلعت بجد انا مبسوووووووطة جداا
بالحكم الصادر لانى بجد متخيلتش على نفوذه ومركزه دة ان ممكن اصلا يتحبس لانى قلت فى بالى اكيد هيطلعوا ابوها الى قتلها!!!
امواااااة
عووووووووووووو

Unknown يقول...

كيموز: متقلقش يا كيمو دة شخص على حد قول محمود حب يقف قدام الشيطان..نيهاهاها....اقولك يا سيدى..دة بنى ادم يملك مدونة وكان منزل بوست عبارة عن احد طرف الحجاج بن يوسف الثقفى..انا بكل بساطة قلت انى شايفة ان بعد المذابح والترويع اللى كان بيمارسه الحجاج رايي فيه انه جزمة.....هاج وماج صاحب المدونة ومعرفش ليه حسس على البطحة وتخيل انى بشتمه هو..عقول بقى..روحت فهمته تطاول عليا اكتر من مرة واتهمنى بكذا اتهام..اختك مسكتتش وظبطته بكل احترام ومغلطتش فيه ولا غلطة..فى النهاية الاستاذ المحترم القدوة المثقف الذوق مسح تعليقاتى عنده واللى كانت بتدل انه شخص زفر وغلاط وكان شيئا لم يكن..مسابش غير التعليقات اللى كانت فيها مناقشة لكن لما بينته قدام نفسه اد ايه هو ضحل ولسانة فالت راح مسح التعليق....عادى اتعودت على الاشكال دى فى الشارع والشغل وكل حتة بس اللى مستغربة له ان مفيش حد من العالم دى ادعى انه مثقف زى الراجل دة ما ادعى على نفسه..يعنى دة يعتبر فتح جديد فى فتوحات الغلط فى خلق الله..والله يحسب له اهو اضاف شىء جديد لقاموس البشرية المعنى بالحفاظ على فولكلور قلة الادب..يللا هو اللى جابه لنفسه والله..متقلقش يا كيمو انا محدش يغلبنى اختك بالف راجل من العينة دى

KIMOOOZ يقول...

ههههههههههههههه

يا خرابى هو لسه فى ناس كده
اصلا حجاج ده راجل مجنون محدش كان عارفله هو عايز اصلا كان متناقض بشكل غير طبيعى
اوقات زى الفل و فتوحات اسلاميه و بتاع و اذ فجأه يقتل و يدبح فى خلق الله المسلمين اللى زيه و حتى العلماء كمان

بصى الناس اللى زي ديه الاحسن انك تتجاهليه خالص
احسن الضغط داير فى البلد اليومين دول و انتى دكتوره و عارفه

hehehehehehe

عابر سبيل (عبدالرحمن محمود) يقول...

استاذة انجى
اللؤلؤة لم يحذف تعليقاتك
ومش معنى كلامى انى مع حد فيكم
لكن انا مستغرب ايه اللى حصل
ليه الموضوع تطور كده؟

وليه بعد عن النقاش الموضوعى
انا شخصياً (ان كان لى الحق ان اشارك فى الموضوع)
ارفض ماتم تبادله من كلمات شديدة اللهجة من الطرفين

اما عن موضوع الحجاج فأنا اتحفظ على وصفه بلفظ (جزمة)
كما اتحفظ على لفظ مجنون الذى قاله اخى الحبيب وزميلى كريم
الحجاج بن يوسف كان له وكان عليه
يقول عنه الذهبى فى التاريخ الكبير (كان ظلوماً غشوماً له حسنات مغمورة فى بحار سيئاته وكان معظماً لكتاب الله )
وقال عنه عمر بن عبد العزيز
(لو جاءت كل امة بخبيثها وجأنا نحن بالحجاج لغلبناهم جميعاً)
ولكن الحجاج كما ضرب الكعبة وقتل بن الزبير ومثل بجثته وهو يظن انه يطيع الخليفة عبد الملك بن مروان (ولا طاعة لمخلوق فى معصية الخالق)
هو الذى امر بوضع النقط على الحروف
فحفظ كتاب الله من التحريف واسدى للغة العربية جميلاً لن تنساه الاجيال ابداً
وكما قتل الكثير من المسلمين وقتل الكثير من العلماء(المناهضين والمعادين للخليفة عبدالملك)
كان له من الفتوح وحفظ حدود المسلمين ما يذكره التاريخ
وانا لا ادافع عنه ولكن رجل مثل الحجاج افضى الى ربه يحاسبه بما فعل ونحن نصون السنتنا عن الخوض فيه
عسى ان يكون عند الله خيراً من اى واحد فينا
والحجاج اختلف فيه المؤرخون كثيراً

واخيراً فالقصة التى ادت الى هذا النقاش الكبير قصة ضعيفة لم تثبت فى كتب التاريخ انما نقلت عن طريق القصاصين والاخباريين والكذب عن هؤلاء اكثر من الصدق كما يقول علماء التاريخ وعلماء المسلمين
دمتم جميعاً بخير والسلام عليكم ورحمة الله

Unknown يقول...

عابر سبيل:اومال التعليقات اختفت لوحدها؟؟؟؟
طب خليه يبخر مدونته عشان العفاريت الصغنتوتة الشقية متلعبش فيها

عابر سبيل (عبدالرحمن محمود) يقول...

استاذة انجى تعليقاتك كلها موجودة
من اول تعليق الجزمة لغاية تعليق يللا امسح بسرعة
انا مستغرب
بس انا شايفهم كلهم والله

عابر سبيل (عبدالرحمن محمود) يقول...

غريبة انك مش شايفة التعليقات
انا نسختهم مخصوص عشان اتأكد من سلامة نظرى
الا لو فى تعليقات تانية تم مسحها
وحتى كتابة هذه السطور التعليقات موجودة
ومش فاهم حضرتك ازاى مش شايفاهم


الاول
اه الحجاج دة كان جزمة فعلا...بيفكرنى بواحد صاحبنا

الثانى
على فكرة السؤال عن العاقل بيبقى باداة استفهام من مش ما...واضح ان حضرتك ثقافتك عميقة جدا

ثانيا الحجاج بن يوسف قتل مسلمين بالهبل متعدش وكان طاغية مفترى جدا وكان الناس فى عهده مبيحسوش بالامان حتى وهم بيصلوا لانه كان بيقتلهم من غير وقت ولا موعد ولا سبب...

الحجاج بن يوسف جزمة هو واى حاكم تانى بيروع خلق الله ومخلى عيشتهم ضنك ومرار وفقر ومرض

اشكرك على تفهمك و على اخلاقك العالية واتهاماتك بالسطحية..فعلا اخلاقك عالية جدا واكيد تتناسب مع ثقافتك

ضحكتنى

سلام

الثالث
على فكرة آنسة بتتكتب كدة يعنى اخرها مش ياء على فكرة

تانى حاجة سابق معرفة مع مين؟؟؟ هو ليه حضرتك مكبر المواضيع كدة اظن انا وضحت ان الحجاج جزمة زى اى واحد بيظلم شعبه..مش فاهمة انت ليه مشخصن الموضوع اوى كدة

انت وضحت مساوىء الحجاج ومزاياه فى رد من سطرين؟؟؟ ممكن

اما عن الذوق العام فانا مش هتكلم فيه ولا هعمل زى حضرتك واحكم عليك عشان ذوقى العام يمنعنى من كدة

ضحكتنى تانى

سلام

الرابع

اظن التهكم ليس له داعى عشان انا مقلتش حاجة غير اللى حصلت..انا بس صححت اخطاء املائية بحسن نية

بعد توضيحى لما اقصده بكلمة جزمة واضح ان حضرتك زعلت ان مكانش قصدى انى اغلط فى اى حد غلط شخصى ودة خلاك تخسر نقاط فى المناقشة دى..وعشان كدة حضرتك خرجت برة الموضوع واتكلمت فى حاجة مالكش فيها زى ذوقى العام او تعليمى والى اخره..

مفيش داعى تقول هاتى عنوانك عشان اضحكك لان النوع دة من الكلام انا محبش اكون طرف فيه ولو انى اعذر خجلك من طريقة الهجوم عليا واللى جعلتك تقول الكلام دة..

حضرتك علمت اجيال وفشلت دى مش مسؤوليتى اعتقد..ومش من حقك تحكم عليا باى شكل والتنويه دة انا وجهته لحضرتك اكتر من مرة ولكن معرفش باى حق انت بتقول كدة..

لو وجودى دليل على فشل التربية والتعليم فاسلوب وطريقة كلام حضرتك يوضح جدا ليه التعليم دة فشل..

معتقدش هكون طرف فى الحوار دة مرة تانية لانه مضيعة للوقت والجهد

سلام

الخامس

برافو يا مستر شوف ال سكور فى الاخر هيبقى كام تعليق ممسوح من عندك وبعدين بص كدة لنفسك فى المراية وشوف هتحس بايه بعد ما زورت فى المناقشة دى

بس تعرف؟؟؟
مستمتعة جدا وبضحك من قلبى

السادس
ايه دة؟؟؟ انت لسة ممسحتش التعليق؟؟
يللا اجرى امسحه
بسررررررررررررررررررعة

Unknown يقول...

عابر سبيل:حضرتك انا لسة محتفظة بعقلى الحمد لله.....تعليقاتى اللى معرفش يرد عليها مسحها يا فندم..ولانى مش من بتوع الحركات الخايبة بتاعة الاخ المحترم منسختش التعليقات وحطيتها عندى...سيبك منه دى عالم فاضية ومخها تعبان

shicooo يقول...

كان نفسى اكتب فرانكو اراب بس عشان اغيظك .....
بس بلاش ... حرام ....

*************88

عجبتنى اوى الحتة بتاعة الأسرة دى اديتنا كتييييييييييييير
لا جامدة وربنا
لا واحنا حاسين باللى ادهولنا ....

تصدقى انهم وقفوا 5 دقايق حداد فى كل ماتشات الدورى يومها
حاجة تنرفز ....
هوة الله يرحموا صحيح بس مش ملك ياعنى عشان الدولة تعيش حداد عليه ....
هما باين مش حاسين ان كل واحد فيه اللى مكفيه ...
يالله ربنا عالظالم .... والموفترى ... والعالم السيييييس


******************

ربنا يوفقك فى الأمتحانات

Unknown يقول...

شيكووو: عجبتك الحتة بتاعة الاسرة دى ادتنا كتير؟؟؟ عارف البت صاحبتى الانتيخ لما قلتلها كنا راكبين الترام بتاع محطة مصر وانت عارف طبعا ان دة بالذات ترام الناس القدام المحافظين راحت قالتلى هما فعلا ادونا كتير دة مفيش حد فينا مخدش من العيلة دى خوازيق يا معلمة...لقيت الراجل بص لنا كدة وكان هيغمن عليه...ام هند يعنى هما ادونا فعلا يللا بقى مش مهم..على فكرة تعليقك على البوست اللى فات هو اللى خلانى مش عارفة ارد عليك..فوتك بعافية

المعتصم يقول...

بسم الله الرحمن الرحيم
السلام عليكم ورحمة الله وبركاته
انجى
تحياتى
كنت كاتب تعليق طويل واول ماحبيت انشر الكهربا اتقطعت
شويه كده ورجعت كتبت تعليق تانى النت فصل
لا بقى
المدونة دى شكلها كده متراقب
عموما انا مش هقول حاجه غير
ياااااااااااااااااااااه
هو انتِ لسه عارفه اننا شعب مبدع؟؟
ههههههههههههههه
تحياتى ودمتِ بكل خير وود
والسلام عليكم ورحمة الله وبركاته

كيكى عوووووو يقول...

هو فى اية يابت عندك!!!
عوووووو

كراكيب يقول...

جوجااااااااا
حبي روحي قلبي شقي
اللي والله مقصرة ف حقها غصب عني جدا
ظروف وجوابات وضغوط من ناس يسووا وما يسووش
المهم يعني
وحشتييييييييييني جدا
واسفة اوي اوي بجد اوعي تزعلي مني

وبوستك محتاج مني رغي كتير بس والله انا داخله كدة في السريع اقول كلمة شكر على كراكيب واسلم عليكوا وامشي علطول
امممممممموااااااااااه وحضن كبيرة اوي

miro el niro kwaniro

عمرو يقول...

أهلا إنجي
أنا هنا
:)
والله التخبط الإبداعي والفوضى الخلاقة بتاعة بلدنا دي هي حديثي المعاد المتصل مع أصدقائي. احنا شعب فهلوي جدا.. والوصوليين على قفا من يشيل.. انتي واعية قوي على فكرة يا إنجي
:)