الاثنين، 7 سبتمبر، 2009

لقاء غير فيروزى الطابع


تذكر آخر مرة شفتك سنتها..
تذكر وقتها آخر كلمة قلتها..
وما عدت شفتكك..وهلا شفتك..
كيفك انت..
.......................................................................................
اتذكر وجهها جيدا وعيناها المذعورتان وهى تخبرنى ان هذه الاغنية بالذات تخيفها بقدر ما تسحرها..اتذكر وجلها وهى تحكى لى انها تشعر ان موقف فيروز الغير معتاد سوف يكون موقفها يوما ما..اتذكرها وهى ترجونى بغير كلمات الا اضعها مكان فيروز فى يوم..

الآن تتردد كلمات الاغنية فى قلبى..اشعر بانقباض وانا اراها تتحرك امامى بعد ست سنوات من افتراقنا الاثم..ينقبض قلبى عندما اتذكر انها لابد سوف تلمحنى وتسمع الاغنية تتردد داخلها..اتمنى ان تبتلعنى الارض الان قبل ان اثبت لها ان هواجسها فى تحقق كلمات الاغنية وشيك جدا..اكره نفسى الان جدا فبعد لحظات سوف يتحقق لها الهاجس القديم المرعب..

...........................................................................
كيفك قال عم بيقولوا صار عندك ولاد..
انا والله كنت مفكرتك براة البلاد..
شو بدى بالبلاد..
الله يخلى الولاد..
.................................................................
سوف تلتقى العينان..لن اهرب منها ..سوف اخبرها الا اولاد هنالك..سوف اؤكد لها اننى لم احب غيرها حتى بعد ان افترقنا..سوف اخبرها اننى لازلت فى البلاد ولا امتلك اى اولاد ومع ذلك لا أجرؤ ان اسألها الرجوع..سوف اعتذر عن تردد صوت فيروز الاسطورى داخلها اليوم..سوف اخبرها انى اتذكر تعبيراتها وانى انا الاخر اشعر ان فيروز فى تلك الاغنية تغنى خارج المجرة..كانت ترى ان فيروز تقف فى الفضاء اللانهائى..ظلام دامس يغلف الكون..بل هو اكبر من الكون وفقط فيروز تضىء بقعة صغيرة حولها وهى تغنى ولا اوركسترا هنالك..فقط وجهها الشامخ وتاجها اللامع وصوتها العبقرى..سوف اخبرها انى لازلت اذكر تعبيراتها بعد ست سنوات..سوف اخبرها انى آسف جدا لاننى قابلتها اليوم مصادفة..سوف اخبرها انى اعاتب القدر الذى جعلها تتألم الان عند رؤيتى..
............................................................
يطلع ع راسى رغم العيال والناس..
انت الاساسى وبحبك بالاساس..
بحبك انت..
...............................................
لن اتركها كى ترانى مصادفة..سوف اذهب عنوة..ارمى شقاء ست سنوات تحت قدميها واتوسل كى تصفح..لن اكابر..سوف اعتذر لها عن خيانة غير مقصودة وفراق حدث قدرا وتواطئت مع الظروف على تلك الرقيقة كى تكون صديقة فيروز فى الفضاء الواسع..لعلها تصفح..لعلها كى تدمينى كما ادميتها تكره فيروز وتطرد الاغنية من ذاكرتها التى اعرف انها فولاذية..لعلها كى تدمينى اكثر تترنم بها امامى هنا والآن..استحق هذا بكل تأكيد..
................................................

-................................................................... .

- sorry أنا عارفة انى شفتك قبل كدة..بس مش فاكرة فين بالظبط..ممكن تفكرنى؟؟؟




.....................انجى ابراهيم......................

هناك 40 تعليقًا:

adel يقول...

باحجز اول تعليق
هاقرا و اجي

adel يقول...

ههههههههههه
دي سرقة علني بجد

مش طبيعي اللي بيحصل ده

ههههههههه
تعرفي اني بعشق الاغنية دي و كنت هاكتب عنها قصة ... بس للامانة كانت ليها شكل تاني
بس توارد خواطر بقي و كتبتيها انتي
و الحقيقة حلوة قوي :)

الاغنية دي مش طبيعية في حلاوتها مع انها مؤلمة زيادة عن اللزوم

عمرو يقول...

هو أنا مش عارف متهيألي دي مدونة حد أعرفه.. ممكن تفكريني عشان مش واخد بالي يا بنتي
:)

حلوة القصة وجذابة.. الاعتماد على أغنية فيروز بقى كان في الجول.. الأغنية دي فعلا مؤثرة.

الحبيبة طبعا في الآخر بتستعبط والنهاية المفتوحة حلوة

إلى الأمام يا إنجي
إلا قوليلي.. صحيح انتي بتنشري في الدستور؟ إزاي بقى؟ قولي لأخوكي عشان يبعت هو كمان
ربنا يجعله في صحتك وعفيتك يا أبلة
:)

عمرو يقول...

إيه يا عم عادل السرعة دي
لا أنا كده زعلان. طيب ده أنا كنت فاكر نفسي أول تعليق
:(

إسلام الدسوقى يقول...

الدكتورة أنجى
ولقاء جديد مع الأقدار
وايدلوجيا الحب والبشر المتناقضة والمتنافرة والمشتبكةوالمتشابكة مع بعضها بشكل لا يمكن التمييز بين أي طرف من أطرافها بأي حال من الأحوال.
تكتبين من الواقع
وهو شئ مفرح
لكن أعتقد أن المعالجة لقضايا الواقع
وخاصة الشائك منها مثل قصتك
لابد أن يأخذ وقته فى النضج أكثر من ذلك.
ولى عودة أخرى حميدة أو غير حميدة لا أعلم
لكنى سأعود
تحياتى

نعكشة يقول...

هموت على نفسى من الضحك
ههههههههههههههههههه
والله العظم
والله العظيم

ههههههههههههههههه

مش قادرة والله

ههههههههههههههه

انا قولت هيلاقيها هيا اللى عندها ولاد ولا فاكراه
هههههههههههههههه

هههههههه

مش عارفة انا بضحك ليه
حاسة بالبلاهة
مش حاساها فيا؟؟

يخربيت توقعاتى
اسلوبك المرة دى احلى
بس مش عارفة ليه مش متخيلاه قوى انه على لسان راجل

او انا مش متوقعة الرجالة كدة مع انى عارفة انهم بيحسوا يعنى
و يمكن ساعات يكونوا يحبوا بعمق
بس مش عارفة
او انا مبعرفش اتوقع

مش عارفة

عامة لظيظة

تسلم ايدك

سلامٌ عليكِ

نعكشة يقول...

آه صحيح آه صحيح

بحب الاغنية دى لفريوز

وبحب اغنية اشتقتلك
اشتقتلى
بعرف مش راح بتقلى
طيب انا عم قلك
اشتقتلاااااااااااك

........

اول حد كان يكتب حاجات متداخلة كدة
كانت واحدة صاحبتى بتكتب تحت اسم جيرالدين
كانت كاتبة حاجة عن الفراشة
وعن مقاطع من الراديو

من ساعتها حبيت لااسلوب دة

التداخل بين حاجتين بيفكروا ببعض

بيخليكى كدة تحسى بالبتاع اكتر

اتفق مع من قال أن هناك توافق بين مقاطع البتاعة مع مقاطع القصة

يلا خلاص كفاية هيك

سلام يا كوكو

نعكشة يقول...

هوه ست سنين كتير قوى كدة

هيا يا اما زاكرتها مكسحة قوى
اكتر منى كمان

تصدقى انا ممكن اكون مش فاكرة ناس من ست سنين

لا مش ست سنين
سته قليله

طب ممكن الحركة دى تحصل لواحدة
مثلا حطت مكياج
خست
نضفت

انما هوه حصله اية؟؟؟

دقنة طولت مثلاً
وتخن جامد
او خس جامد


عامة

خير خير

سلام

جارة القمر يقول...

حلوة اوى يا انجى بجد .. على رأى عمرو اعتمادك على اغنية فيروز فى الجووووووووووول اغنية مؤثرة اوى اوى

يلا سلام يا جميلة

enjy يقول...

عادل:دووووووووووولة سرقة ايه يا عمونا انت هتفشر بقى فريوز دى ملك للجميع...طب متكتب القصة وريهالنا كدة اكيد هتطلع حلوة يا باشا..الحمد لله انها عجبتك..منورررررر...........



عمرو:احم احم دى كانت مدونة واحدة اسمها انجى بس انا استوليت عليها..انا مين؟؟ انا البرنسيس فرانشيسكا..نياااااااااهاهاهااااا
عجبتك القصة بجد يا عمور؟؟؟
مش عارفة حساك ماخدتش راحتك فى التعليق..انت كل مرة بتفصص القصة حرف حرف وتنقدها المرة دى معقول عجبتك لدرجة انك مش لاقى عيوب؟؟ مستحيل..فكر كدة وراجع نفسك وادينى رأى فى الجون..منور بطريقة وحشة............





اسلام الدسوقى:احم هو اللى انت قلته بتاع ايدلوجيا ومتشابكة دة حاجات حلوة وللا شتيمة؟؟ نيااااااااهاهاهاااااا
طيب عموما كويس انك شايف العمق دة فى كتاباتى المتواضعة وممكن فعلا تكون الفكرة او المعالجة يعنى مخدتش حقها بس انا عندى مشكلة شنيعة هى ان الاسكتش الاولى بيحجر مخى ويخلينى مقتنعة ان دة اخرى ومبعرفش افكر له فى صرفة تانية غير بعد مدة طويلة...وممكن بعد فترة ابص لها واقول ايه الهبل اللى انا كنت بكتبه دة..بتحصلى كتير على فكرة..
مستنظرة عودتك الحميدة بكل تاكيد............





نعكشة :انتى بتقولى فريوز زيي وللا دى غلطة مطبعية؟؟؟؟
على فكرة انا كمان مش متخيلة راجل يقول الكلام دة خصوصا بعد ست سنين بيبقى خلاص عرف اللى فيها بقى وكبر..بس طالما دة مش موجود فى الواقع نعيشه شوية فى القصص الخيالية ونستمتع قليلا بالرومانسيكية البلهاء..

على فكرة النهاية مش ضرورى تبقى مباشرة..ممكن تكون القصة كلها مبنية على ولا حاجة ويكون هو بيتهىء له انها حبيبته وتطلع واحدة شبهها..ممكن يكون جالها فقدان ذاكرة..ممكن تكون بتغيظه..ممكن تكون بتنتقم لنفسها منه..ممكن تكون كانت ممثلة قديرة ومكانش فارق معاها اوى زى ما هو متخيل وانها اصلا شخصية مش كويسة وفراقهم مفرقش معاها..ممكن حاجات كتير اوى..

انتى عاملة ايه فى المذاكرة؟؟؟ لعلك تكونى كويسة وربنا موفقك..ربنا يكرمك يا مريم وتبقى فظيعة ودكتورة محصلتش..

سلام عليك






جارة القمر:الحمد لله انها عجبتك يارب دايما..انا مدمنة كيفك انت اصلا مش معقول حبى ليها.........

أحمد الشمسي يقول...

طيب بسم الله الرحمن الرحيم..
القصة معقولة، بس اتعملت قبل كده يا إنجي، شكلا ومضمونا.

بس لازم اقول اني قريت البوست بتاع جاد شويري ولميس الحديدي وعجبني جدا... موضوع الضرب في الحياد والمهنية الإعلامية ده حسسني اني قدام ناقد تلفزيوني مخضرم. ونجح انه يغيظني فعلا من الحلقة مع اني ماشفتهاش.

جارة القمر يقول...

هيييييييييه رديتى عليا

انا كدا مش زعلانة ههههههههههه
اصلى الصراحة كان عندى حالة معنوية عشان لما بعلق هنا مش بتردى عليا اهئ اهئ اهئ

فى سر بقى الصراحة انا مش بحب فيروز اوى بس الاغنية دى بجد بحبها

norahaty يقول...

جميــــــلة اوى !
طلعت هى اللى نسيته
بجد بجد بجد :فرحت فيه:)

enjy يقول...

أحمد الشمسى: انت اكيد مش متخيل انا بستفيد ازاى من تعليقاتك صح؟؟؟
مش هشكرك على رايك اللى بتقوله بذمة وضمير ومش هشكرك انك مش بتكبر دماغك وتقول حلو وخلاص ومش هشكرك انك مش بتكروتنى وبتقول رايك بصراحة ومش هشكرك انى بتعلم منك..ليه مش هشكرك؟؟ عادى رخامة..نياااااااهاهاهااااا
حلو مقال لميس؟؟طب الحمد لله كويس شكرا انك قلت رايك حتى لما لقيته متاخر..ميرسى كتير يا ضاكتور.........





جارة القمر: وجون وجون وجوووووووون وتانى رد على تانى تعليق للانسة جارة القمر تارااااتا تاراااتاااااااا
والله انا اصلا كتير مبلحقش ارد على التعليقات يعنى والله مش مستقصداكى واوعى تجيلك الحالة المعنوية دى تانى احسن وحشة يا اوختشى..
على فكرة انا مش بسمع فيروز كتير يعنى مش مدمنة بس انا مدمنة كيفك انت دى بحبها اوى يعنى..بحس نفس الاحساس اللى وصفه البطل فى القصة دى..منورة والنعمة.........

Mo7ammed يقول...

هوه فى ايه ؟
انا اللى فهمته حاجة واحدة
انى مش فاهم
معلش بس اخوكى مشوش اووى وربنا ماعارف اركز
بس مقدرش ادخل مدونتى اختى الكبيرة يعنى ومعلقش لاحسن هتعلقنى ^_^


عالعموم هحاول اقراها تانى اما اروق

سلاموءا ياجميلة

واحده من الناس*n* يقول...

انتى فظيعه
القصه رائعه فعلا
اعجبت جدا بالنهايه
وكأنها اعادت لى بعض من كبرياء اهدرت مع سطور القصه حيث شعرت وكأنى البطله

رغم ان القصه مكرره انما نمط الكتابه مختلف تماما ولا يشبه اى كاتب اخر
انت متفرده يا صديقتى العزيزه
اسلوب السرد لديك رائع

ولانى عاشقه متيمه لفيروز
فانا احييكى على اختيارك الرائع لتلك الاغنيه رغم ان مودى هذه الايام يسير على نغمة انا لحبيبى وحبيبى الى
ياعصفوره بيضا لا بقا تسالى

لكن لا يمنع هذا ان استمتع بقصتك وكاننى البطله فيها

موقف البطل فى الفقره الاخيره اكثر من رائع

بصراحه يا انجى كنت فرحانه فيه
اوقات بتعاطف مع ابطال فى قصص
بس القصه دى كنت فرحانه فيه اوى اعوذ بالله
شمتااااااااااااااانه

على فكره انا فعلا بحب ان نهاية القصص اللى بالفكره دى تنتهى بالموقف المذل ده
مش مهم بقا البطله فاهمه وعامله عبيطه
عامله بتستهبل
عامله شاى بلبن
مش مهم
المهم البطل يرجع وقفاه مقمر عيش
حلاوته وهو كده مكسوووووووووووف

بس معنديش مانع تعملى للبطله بتاعة القصه دى قصه جديده
وتعمليلها اغنية علمونى هن علمونى
على حبك فتحولى عيونى والتقينا واتحكى علينا
علمونى حبك ولامونى

ولا بكتب اسمك يا حبيبى

بس خدى بالك
عايزه بطل كده م الاخر
يعوضها بجد


وحشتينى خالص

اكتبى كتير
ان بعرفك من كتاباتك

وخلى البطله المره الجايه تاخد حبيبها
انا تعبتلك من الفراق ده
:)
وكمان احنا حالتنا مش ف مود الفراق اليومين دول
هههههههه

إيناس حليم يقول...

أنا بحب الاغنية دي جدا يا انجي :)
قصتك جميلة وبتحصل كتيييير اوي
بس انا مفهمتش النهاية؟؟ هو مين اللي شاف مين؟ :)
معلش اصلي متنحة اويي :$

تقبلي مروري

أميرة علي كوكب مهجور يقول...

حلوة القصة اوي يا انجي والنهاية بجد حلوة عاجبني العنوان اوي وخلتيني اسمع الاغنية واتخيل القصة بجد انتي رائعة

عمرو يقول...

سبحان الله
يا حكمتك يا رب
يعني انتي لازم أقولك وحشة عشان أبقى أنا كويس؟ نا مش بتيجي غير (لا مؤاخذة يعني ومع احترامي الشديد) بالسك..
عموماً أنا ما قريتهاش قبل كده عند حد. أحمد بيقرا أكتر مني ورأيه يعتمد عليه. حتى هو ما لقيش حاجة جوة القصة تمثل عيب خطير يعني
:)

hager za3bal يقول...

ايه الابداع ده

اغنيه بعشقها مع قلم بعشقوا ومكس غريب الطابع جميل المعاني عالي الاحساس :)

بقالي كتير مجتش ومقصره اوي ومكسوفه .. اعذريني :$

رمضان كريم ..
وكل سنه وانتي بخير يارب :)

تحياتي

نعكشة يقول...

لأ مش غلطة مطبعية
>>>>>>>>>>>>>>>
منكن برضو
نتخيل منتخيلش لى
مبقاش غر التخيل اصلا
...............

مش عارفة
ربنا يستر
عشان اهلى بس مش عشانى
............
تسلمى يا قمر
الامتحان بكرة الساعة عشرة
شوية دعوات بقة
..............
سلام عليكِ

الست فرويد يقول...

حلوة قوى يا انجى
تداخل فيروز مع حواره الصامت مع نفسه مدهش


قعد يعذب نفسه وهى مش فاكرة اساسا

قعدت افكر ياترى ليه هو كان متخيل انها معذبة كده وهى حتى مش فاكره

يا ترى هو اللى عبيط
ولا هى اللى كانت ممثلة كويسة واقنعتوا وقتها انها هتتعذب بعده

مش عارفه
رغم انه مش معقول حد ينسى حد كان بيحبه من ست سنين بس

لكنها مبالغة فى محلها علشان تشغل الدماغ شوية بعض القصة :)))


يارب دائما جميلة ومبدعة كده يا انجى

دمتى بكل خير وسعادة

الفراغ يقول...

قصة جميله ...مؤثره
ولا اعرف هل اتعاطف مع بطلها ..ام اضحك عليه..كما اضحك على نفسى

بجد يا انجى انتى بتعيشى جوانا
وخيالك واقع اعيشه دائما مع نفسى
بس بجد ضحكت على المفارقه العجيبه
دائما ما اتوقع خيرا ممن هم قريبين منى
ولكن عجبا يحدث واجد غير ماتوقعت تماما

انت يجب ان تكونى طبيبه نفسيه
لكى كل تحياتى ودعواتى بالتوفيق

blue-wave يقول...

ياااااااااااااااااااااة
كم اوحشتنى تلك الكلمات اللتى تأخذك الى عالم اخر
لا تشعر به الا فى اخر سطر وانت تعيدها من الأول مرة اخرى
تحياتى يا اسكندرانيه

Wish I were a Butterfly ... يقول...

جميلة أوي أوي القصة

الأغنية هي تالت أغنية بحبها لفيروز، وفعلا بحسها لقصص العشاق بتبقى صعبة أوييييي لما حد من الطرفين يسمعها ويفتكر

بجد اختارتي الأغنية الصح،ونهاية القصة حلوة..زعلتني شوية بصراحة بس أكيد حلوة
هو أكيد يستاهل :)

أحمد الشمسي يقول...

كل سنة وانتي طيبة يا إنجي...
اي نعم لسه فاضل يومين بس انا قلت اسبق لأني هبقى نوبتجي يوم السبت

كل سنة وانتي بخير وسعادة

msafa يقول...

مش ممكن مشهد فيروز بدون اوركسترا يا ناس حد يرجعلى قلبلى اللى اتخطف من اللحظه اللى انتى صورتيها دى . واقسملك انى مش قادر اعبر اكتر من كده انتى روعه اوى اوى اوى

حرروف يقول...

السلام عليكم
في لقاء في اسكندرية ان شاء الله
حيكون ميعادة اول جمعه بعد العيد
اتمني اشوفك
اللقاء مكتوب هنا
http://a7walnaaa.blogspot.com/
ياريت تساعدينا في القاء وتقدميلنا اقترحات للمكان
ونشوفك عن قريب ان شاء الله
دمتي بالف خير

micheal يقول...

ياااااااااااه ع الجو الفيروزي ده
تسلم إيدك يا إنجي
:)
تحياتي

جارة القمر يقول...

كل سنة وانتى طيبة يا جمييييييل و عقبال مليون سنة

كيكى عوووووو يقول...

نحم البوست دة نزل امتى؟؟
التطور الفيروزى دة حصل امتى؟؟؟
النهاية الى مش متوقعة دى بقت من امتى؟؟
مين الى حدفنى فى جو غريب ورجعنى تانى؟؟
انوج بطعم فيروز الذ الذ الذ الذ الذ الذ الذ الذ الذ الذ!!!!
وروحى لقاء اسكندرية ها امواااااااااة

كيكى عوووووو يقول...

يالهوى حد غيرى سبقنى بكل سنة وانتى طيبة!!!!!

Isolde يقول...

ما كنتش اعرف ان انت كمان ليكي ف فيروز... يا ذوقك العالي... بس يا انجي انت مستقصداني، صح؟ ده تاني موضوع تكتبيه يفكرني بحكاية صاحبتب اللي قلتلك عليها... هي كمان قابلته و لاقيته اتجوز و خلف و صار فعلا براة البلاد... و كيفك انت ما الا انت ... اما بقي عن القصة و خلافة، ف احمد و عمرو فيهم البركة، انا باعلق عالموضوع بي، لكن ماليش ف الفن إهئ إهئ إهئ... :(

هبة خميس يقول...

تعرفي يا انجي
احسن حاجة في القصة
و الحاجة اللي خليتها مش عادية
الجملة الاخيرة
بجد في الجون
تحياتي

Isolde يقول...

عيد ميلادك يوم السبت؟! انا لسة قارية الكومنت بتاعك عند عمرو... كل سنة و انت طيبة يا اخف دم عرفته، بجد باهللك من الضحك من افشاتك... الف شكر لانك فعلا بتعرفي تبسطيني

هافكرلك ف هدية و ارجعلك

:)

واحده من الناس*n* يقول...

هابى بيثداى تو يو
يالا حالا بالا بالا حيوا ابو الفصاد
هيكون عيد ميلاده السبت اجمل الاعياد فليحيا ابو الفصاد
هييييييييييييييه
عصفور الجنينه الحنينه
يا انجى يابنت ابراهيم كل سنه وانتى طيبه ياحبية قلبى
يا اخف دم
يا احلى قلب عرفته بالصدفه
يا اجمل بنوته ف بر اسكندريه
يا قطقوطه
يا كتكوته
يااحلى بنوته
يالا يابت كل سنه وانتى طيب
ويارب زى ايام دى تكونى مع اللى يريح قلبك يارب انتى وانا وكل البنات والولاد كمان
انا بحبك اوى يابت
واحجزيلى حتة تورته
عينى فيها
هه
بس
:)

اقصوصه يقول...

رمضان كريم :)

ponpona يقول...

بنت يا انجي
كل سنه وانتي مبسوطه كده علطول علطول يارب

تعرفي ... أنتي أحلي حاجه فيكي ايه من غير ماشوفك كده
انك بتعرفي تضحكي وتعملي فرح كبييير من حاجه صغنطوطه
حتي لو كان الموضوع اللي بتتكلمي فيه عادي

طب تصدقيني لو قولتلك ان واحده صاحبتي كل ما أقولها
عارفه انجي اللي عند عمرو كتبت ايه النهارده؟
تقوللي انجي اللي بترغي كتير وبتضحك ؟
أقولها أيون هي

آه والله ... هي كمان بقت عارفه انك عسوله وبتسلم عليكي علي فكره

انتي عارفه الكلمه اللي انتي سيبتيهالي عند عمرو ع البوست اللي فات
عارفه ... بسطتني أوي والله
ربنا يخليكي كده يا انجي يارب ويبسطك زي ما بسطيني

بنت يا انجي .... انتي بتكتبي ف الدستور ؟
وكتاب الله المجيد؟
انتي عارفه ان أنا بحب الدستور خلقه دلوقتي بقيت بحبه أكتر
عقبالك كده يا عمرو انت كمان اشوف اسمك منور هناك
وعقبال يارب ما يبقالكو عمود ثابت كده علطول
أنا آي نعم بقالي فتره ماجبتوش بس من بكره هانزل أجيبه

انجي ابراهيم
ربنا يخليكي وتفضلي مبسوطه كده علطول

وكل سنه وانتي طيبه يابسبوسه
:)

عمرو يقول...

كل سنة وانتي طيبة يا إنجي
فين التورتة
:)

بسبوسة يقول...

كل سنة وانتى طيبة ياقمرررررررررررر
يارتنى كنت جانبك بكرة
معلش تتعوض ان شاء الله