الثلاثاء، 12 يناير 2010

انتهت رحلتنا فى كوكب أكشن..انطلق

خلصت الكورس..ايووووووون خلصت الكورس..
اى نعم لسة فاضل اسبوعين كورس مكثف فى ال H.R.M بس دة هيبقى مختلف لانه مش فى نفس المكان ولا مع نفس الناس..فى ناس راحوا كورسات تانية واتفرقنا..

نحكى بقى عن ال3 شهور اللى فاتوا؟؟؟
طيب كباية شاى وشيكارتين لب عشان الموضوع كبييييييير وطويييييييل وهياخد مننا وقت كتير..

اولا..كانت ايام حلوة برغم كل شىء..برغم انى عمرى ما حسيت انى مضغوطة نفسيا زى ما حسيت ايام الكورس دة..مش عشان الدراسة لا بس كان فى عوامل نفسية كتير مخليانى مش متظبطة..بغض النظر عن انى اختبرت الكثير من الامراض الجديدة تماما عليا ايام الكورس دة..برغم انى اول مرة يغمى عليا فى وسط الناس..واول مرة استقل سيارة اسعاف كانت ايام الكورس دة..برغم انى اول مرة احارب الحرب دى عشان اكون شخص لطيف وانا مش طايقة من اتظاهر أمامه باللطف..بالرغم من انى اول مرة احس ان الناس مقامات فعلا.. برغم كل دة الا انها فعلا كانت ايام حلوة بس مش هفتقدها اوى..

ثانيا ..قابلت كمية ناس الفترة اللى فاتت..لو مطلعتش من الكورس دة غير بحاجة واحدة هى اللى اتعلمته من الناس اللى قابلتهم اذا انا استفدت استفادة كبيرة جدا..اولا قابلت زاهية انستراكتور الانجليزى..شخصية امريكية جدا..حتى لو محبتهاش مش هتقدر تنكر انك بتحترمها فعلا..انطباعى الاول عنها كان انها شخصية استثنائية وهى فعلا طلعت شخصية استثنائية لكن متقدرش تقول انك بتعشقها يعنى..او دة احساسى ناحيتها لان كان بيننا صراعات طول الوقت حول تعصبنا العرقى..انا مع انى عارفة ان مصر مش هى احسن بلد فى الدنيا لكن بلدى وبحبها اوى بغباء ومتعصبة لها كانها بنتى..زاهية اتربت واتعلمت وعاشت فى امريكا فطبيعى تعصبها يكون ناحية البلد اللى منحها كل شىء..ما علينا..عموما انا استفدت منها جدا..

كمان قابلت مستر أحمد حمدى انستراكتور الكمبيوتر..هنا بقى لينا وقفة..اولا ابتسامة واسعة مرسومة على وشى دلوقتى..الشخص دة انا قعدت اعذبه اربع ايام متواصل واليوم الخامس حبيته ..ايوووووون هو دة اللى حصل ..الراجل دة حلو بما لا يقاس..عارفين البنى آدم المسكر؟؟ اللى تاثيره زى تاثير السكر؟؟ اللى تحطه على اى حاجة يحليها؟؟ اهو دة مستر احمد..اول موقف بينى وبينه كان لا يشجع خالص لان اول جملة قلتهاله لما كان بيسأل يقول صباح وللا مساء الخير رديت انا وقلتله ضهر الخير..لم يستوعب الدعابة فاستحلفت له ان ايامه هتكون غامقة معايا الى حد ما..وفضلت من يوم الاحد الى يوم الاربعاء اعذب فيه..كل جملة يقولها اعلق عليها..كنت بقعد ورا خالص واعيش حياتى بقى..وكنت حاسة بملل رهيب منه ومن السيشن بتاعته..عذرا مستر احمد لكنى اعترفت لك بذلك الاعتراف مؤخرا..انا كنت قاصدة اعذبه عقابا له على انه منشى..انا كنت فاكراه منشى بس بعد كدة طلع عادى..انسان آلى ولو النور راح هيرستر لوحده..احم كان هذا هو تعليقى عليه..لكن يوم الخميس لما شفته قاعد بيساعد رنا فى تصليح اللاب توب بتاعها ولما القيت دعابة عليهم وهو التقطها وردها..قلت امممممم هو بنى آدم زينا وللا ايه؟؟ طب نجرب كدة..وطلع بقى احلى مننا كلنا..اليوم دة انا قعدت فى اول بنش..ومن ساعتها مقمتش غير لما الكورس خلص..مستر احمد راح يتبرع لجدو الله يرحمه بالدم وهو ميعرفنيش قبل كدة بس شافنى زعلانة ومحتاسة..قالى بكرة هيكون عندك شيك دم..يوم اجازته الوحيد نزل يلف عالمستشفيات عشان يتبرع ومعرفش..تانى يوم لما جبت له المعلومات الاكيدة راح بنك الدم وادانى الشيك وقالى لو احتجتى حاجة تانى كلمينى..مستر احمد هو اللى قعد يصدع دماغه معايا عشان يفكر كورس الغرفة التجارية الامريكية افضل وللا فرجيتك..مستر احمد هو اللى اتحرج جدا لما اعتذرت له عن غيابى لما كنت عيانة ورحب بيا كأنى راجعة من الموت..آخر لقاء بيننا مكانش زى اول لقاء اطلاقا..اخر لقاء كنا كلنا واقفين معاه وبنقدم له هدية مننا كلنا وهو مش عارف يقول ايه..محرج ومكسوف وفرحان .. ولما اعترف له انى كنت بعذبه ضحك وقالى متنكريش انى كنت عارف يا انجى..بس انتى براحتك يا فندم احنا نطول..كنت متخيلة انى هقول كلام اكتر من كدة عنه بس فعلا مش عارفة والله اتكلم..عموما اللى فى القلب فى القلب بقى..

قابلت كمان ناس مختلفين فى كورسات مكثفة لمدة يومين منهم شخص عارف هو ايه وبيعمل ايه وهيعمل ايه مع انه ابتدى عامل فى كافيتريا بس هو دلوقتى مدير تسويق فى شركة تريننج كبيرة وطبعا واضح انه كان مسؤول عن كورس التسويق..وفى طريقه لافتتاح سلسلة محلاته..اكرمه الله..دة اسمه محمد حسين على فكرة..كمان دكتور وائل البلقاسى..شخص فى منتهى اللطف والله واول مرة احس ان الارقام لا تعادينى عداء شخصى..دة بقى كان مسؤول عن كورس المحاسبة..على فكرة الراجل دة انا اخدت منه اتنين جنيه ارباع وانصاف جنيع هشان انا شطورة وزكية وبعرف اجاوب..نيااااااهاهاهااااااا..

كمان كان فى جابرييل دة كان sup بدل زاهية فى اوقات كتيرة..مصرى بريطانى ملحد مثقف..يجبرك على احترامه لانه بيحترمك..بس انا معرفش ليه كنت مقتنعة انه ارنب خارج من فيلم كارتون..والله كان بيفكرنى ب باستر بانى..وهو كان شايف انى very annoying , strong and funny girl .. بس عسول جاب والله..يعنى تحس طول الوقت انه تايه كدة ومحتاج حد يفوقه..ربنا يهديه..

زمايلى بقى..اكتر ناس حبيتهم هما ساندى وامانى وغادة ..ساندى دى الطف بنوتة ممكن تقابلها..يالهوى عالعسل..البت دى مستحيل حد يشوف ضحكتها وميحبهاش..اصلا مش متخيلاها مبتضحكش بصوتها الرقيق دة ..عسولة عسولة يعنى بشهادة كل البشر اللى حضروا المنحة..على فكرة ساندى كانت البنت المسيحية الوحيدة فى الكلاس بتاعنا..واكتر بنت محبوبة فى الكلاس بتاعنا..والله ما اعرف ايه لازمة الجملة دى بس انا حاسة بكهربة غريبة فى الجو الايام دى..ما علينا.. أمانى بقى..عسسسسسسسل ..خريجة هندسة..طموحة..بتفكرنى بنفسى وهى متوترة..تديك انطباع اول انها متسلطة ومش سهلة بعد كدة تعرف انها رقيقة زى البسكوتة وحبوبة جدا جدا بس هى مبتعرفش تبقى باردة وقت الضغط..بتتكلم بسرعة اوى اوى..امانى هى اكتر شخصية شبهى هناك واعتقد انه ارواحنا تلاقت بشكل او بآخر..غادة بقى هادية وواثقة فى نفسها ..من دمنهور ومبتحبش تسيح لنفسها فمحدش بيحس بيها..بس اللى يعرفها يعرف ان فاته شخصية حلوة اوى..عموما كانت ايام حلوة والله يا عيال انتوا..

المنحة خلصت خلاص..بس انا استفدت الحمد لله..قابلت ناس حلوين وناس وحشين..اتعلمت اشترى دماغى عشان اعرف اعيش..حتى لو شرا دماغى دة يعتبر بمثابة تنازل عن حقى..فكك الحياة اقصر من انى اتخانق فيها على حاجات انا عارفة انها مش هتفيدنى..

اعتقد ان مستوايا ارتفع عمليا بعد المنحة دى..الحمد لله..مرتاحة الى حد كبير وواثقة فى ربنا بقى وعارفة انه ان شاء الله هيحصل حاجات حلوة الفترة اللى جاية..

ربنا يستر..


..........انجى ابراهيم.............

هناك 12 تعليقًا:

جارة القمر يقول...

اقولك وحشتينى جداااااا الاول

اروح بقى اقرا و ارجعلك :)

جارة القمر يقول...

ممممممممممم ربنا يسعد ايامك يا جميلة يارب

عجبتنى اوى شخصية استاذ احمد معقووول فى حد يروح يتبرع لحد مش يعرفه شخصية نادرة الوجود ربنا يبارك له يارب

ربنا يسعدك بأصحابك و تستمر العلاقة بينكم طيبة

انجى انتى تستاهلى كل خير ابقى طمنينى عليكى

dr.lecter يقول...

الف مبروك يااتنمجي هي صحيح تبع جمعيه جمال بيه مبارك بس اهو انتفعت منهم واستفدتي علشان نفسك وعلشان تقدري تفيدي الناس والمجتمع بالكورسات دي

عاوزين بقي الحلاوه هو انا هاقول البقين دول ببلاش ولا ايه؟ههههههه

adel يقول...

مبروك انتهاء المنحة
وكالعادة حتي في البوستات الفضفضة عاجبني قوي الاسلوب
وايه مسيحية دي يابت
قال يعني انتي اللي هتحل القضية (وش بيستعبط كيك)
طب ما انا .....
هههههههههههههههههههههههههههه
ولا بلاش :)

أم .. بوبه يقول...

تحياتى ليكى وللبوست الجميل

VOltaa يقول...

انتهت رحلتنا فى كوكب زمردة
تيت تيت تيت
انطلق

msafa يقول...

كويس انى جيت بدرى شويه سابع تعليق يعنى بدرى مش كده ؟
ربا يفوقك الواحد بيتمنالك كل خير يا انجى انتى انسانه تستاهلى احسن ناس تقابليهم .

Mr.Hazem يقول...

يا عيييني
يلا ربنا يوووووووفقك يارب
وان شاء الله تكون حياتك على طول سهلة
للامام انجي

غير معرف يقول...

http://wwwab0-3ali.blogspot.com/

غير معرف يقول...

ياريتني كنت معاكي ....!!!!
فعلاً القرب من الناس في أماكن زي كده تجربة إجتماعية ثرية وممتعة .كل منحة وإنتي بخير .
* عجبتني أوي حكاية شيكارتين اللب دي ....!!! من الآخر... إنتي ملكيش حل!!
ديدي

غير معرف يقول...

Solar eneragy is the future for the planet.
[url=http://www.solarcourses.org/]solar energy facts[/url]

غير معرف يقول...

انا طالبة عند جبريل بجد بجد شخص ممتاز جدا جدا ومحبوب اوي اوي وكمان قابلت دكتور البلقاسي وخدت منه خمسة جنيه مقفولة النهاردة ومضالي عليها ووخدت منه نص جنيه وربعين امبارح واستفدت منه جدا بالرغم من اين خدمة اجتماعية بس فهمت يعني محاسبة بجد قابلت ناس ممتازة اوي اوي تحبي اوصل سلامك لجبريل؟

اختك رانيا