الثلاثاء، 26 يناير، 2010

أيهم وطنى؟



لؤى يغنى "بلدنا فى القلوب متشالة" وتذاع الاغنية على كل القنوات متبوعة بكليب لمنتخب الساجدين..والنجوم الذين يرتدون قبعات مرسوم عليها علم مصر..ونجوم يبتهلون الى الله من مدرجات الدرجة الاولى طلبا للنصر.. وهناك ايضا تلك الفتيات الجميلات ذوات الشعر الاصفر والعلم المرسوم على الخدين..وبالطبع المخرج العبقرى للكليب لا يتركك الا بعد ان ينهى الكليب بجملة "يارب النصر لمصر"

كرومبو يخبر المشاهدين ان "اللى يعرف الاجابة يتصل على ........" وينهى جملته بتنويه وطنى جدا ويخبر المشاهدين ان "تم الغاء رقم الجزائر"

عندما تخبر ايا من اصدقائك انك تريد ان تقابله يوم الخميس يسألك بلهفة "الخميس بتاع مصر والجزاير؟"

كل الجرائد تتحدث عن الحدث الاعظم واليوم المرتقب للقاء الاسطورى بين منتخبى مصر والجزائر..وما بين دعوات لضبط النفس وجعلها لقاء اشقاء وبين عناوين اخبار جزائرية تؤكد انه "نثق فى هزيمة المنتخب المصرى للمرة الثانية" تتوه معظم الاحداث الهامة التى يجب ان تحوذ اهتمامنا كشعب..

على ذكر الاحداث الهامة..هل تعرف عزيزى القارىء ان اللورد احمد عز اقترح ان نبيع اثارنا كمصدر من مصادر الدخل؟؟ وهل تعرف ان مرشح اليونسكو المهزوم فاروق حسنى يناقش القرار بجدية؟؟
وهل تعرف ان هذا السيناريو حدث حرفيا فى رواية يوتوبيا التى تنتهى ببلدين احداهما تأكل الكلاب (اللى هو احنا اللى هناكل الكلاب) والاخرى تعيش فى مستعمرات مرفهة(اللى هما احمد عز وفاروق حسنى حضرتك)

هل تعرف ان اتحاد الاطباء العرب يقبل تبرعات نقدية وعينية لضحايا السيول المصريين؟؟؟
هل تعرف اصلا ان السيول هدمت منازل وشردت فئة غير قليلة من سكان سيناء والصعيد؟؟
هل فكرت ان تساعد هؤلاء المنكوبين المصريين اخوانك فى الفقر والقهر؟؟
هل تعرف جورجيت قلينى؟؟هل تعرف انها تقف وحيدة فى مواجهة ازمة نجع حمادى؟؟ هل تعرف ما حدث فى نجع حمادى اصلا؟؟

طب سيبك من الغم..هل تعرف عزيزى القارىء موعد افتتاح معرض الكتاب؟؟ هل تعرف متى سوف يغلق ابوابه ويطوى خيامه ويرحل؟؟
هل تعرف موعد الانتخابات الرئاسية القادمة؟؟ هل تعرف كيف تستخرج بطاقة انتخابية؟؟

اعرف انك تهتم بالمباراة لانك تحب بلدك..اعرف انك تبحث عن اى شىء يجمعنا معا ويوحدنا..اعرف انك تبحث عن اى نصر حتى لو كان جيش هذا النصر مكون من احدى عشر لاعبا و القائد العسكرى هو حسن شحاتة.. اعرف ان حياتك مضغوطة وانك تبحث عن ابتسامة..اعرف انك تبحث عن اى حدث يحرك قلبك الذى كف عن اى انفعال بشرى حتى لو كان خوف..لكل ذلك ارجوك ان تسمع وجهة نظرى..

انا احب بلدى..احبها واتعصب لها..احبها واتعصب لها واغار عليها..احبها واتعصب لها واغار عليها واحاول ان احترمها..
لن احترم بلدى عندما اغيب عن كل الاحداث واجلس منتظرة نتيجة مباراة مصر والجزائر..واستمع الى لؤى وهو يشير الى هزيمتنا امام منتخب الجزائر عندما يقول "الصدمة بتقوينا" صدمة ايه اللى بتقوينا اتق الله..

تعليقى الوحيد امام الترقب الذى اراه من كل من حولى تجاه المباراة القادمة هو "ربنا يستر" ..لا اريد ازمة اخرى بيننا والجزائر..لا اريد ان اتوجه بكل مشاعرى تجاه عداء الجزائر لاصحو على تصديق الحكومة لاقتراح فاروق حسنى..لا اريد ان اغيب عن واقع اكثر مرارة من ان اتجاهله واترقب مباراة مصر والجزائر..

قبل ان اختم اريد ان ابعث برسالة الى اخى الوطنى لؤى.."لؤى..انا عارفة انك وطنى من ايام اغنية جيل المستقبل..بس امانة عليك يا شيخ كفاية كدة وطنية عشان اتخنقنا..وطنى يختلف عن وطنك ..فعذرا لا تقحمنى فى مشاعرك الوطنية..هذا طلب شخصى من اخت مصرية مثلك..ارجوك امنع سيل وطنيتك الذى يغرقنا..عشان المرارة بس"

وانت عزيزى القارىء..يا من تبتهل الى الله فى صلاتك ان ينصرنا امام الاعداء "ايون اللى هما الجزائريين" ..وان تعود مصر ظافرة بكأس الامم الافريقية..اريدك فقط ان تتذكر ان لاعبى المنتخب سوف يتقاضون ملايين وانت سوف تعود بعد المباراة الى بيتك منهك لتجد ان "مفيش عشا..انزل جيب فلافل وجبنة بيضا للعيال"..



.........انجى ابراهيم........

هناك 19 تعليقًا:

The Confused يقول...

دماااااااااااااغ
انتي دمااااااااغ
فعلا ... لحد امتى هنفضل مشغولين بحجات اقل اهميه من الحجات اللي تهمنا فعلا
لحد امتى الحكومه هتفضل تعمينا عن قذارتها واحنا ماشيين وراها
لحد امتى هنفضل نهلل ونعظم ونقول مصر دي ابهه ومفيش زيها ونقول ونعيد ف حسناتها ونتغاضى عن سيئاتها
انا افتخر اني مصري اي نعم بس مش مصر بتاع زمانا ده ... جمله بقولها من صغري وهفضل اقولها لحد اما اموت ... الا ازا حصلت معجزه ومصر اتصلح حالها وانا لسه على قيد الحياه (( شك في هذا )) !!

كيكى عوووووو يقول...

ليه المدمن لمة بيجئ يشرب بيكون جوه سعادة وحزن
سعادة انه هينسى حالوا فى لحظة معينة!!
حزن انه هيرجع لحالته الاولنيه اسوء واسوء!!!
فهمتى يا اختشى يا بتاعت معرض الكتاب
منه له الى كان السبب!!!

على باب الله يقول...

" على ذكر الاحداث الهامة..هل تعرف عزيزى القارىء ان اللورد احمد عز اقترح ان نبيع اثارنا كمصدر من مصادر الدخل؟؟ وهل تعرف ان مرشح اليونسكو المهزوم فاروق حسنى يناقش القرار بجدية؟؟ "
من الواضح ان حضرتك عرفتي الخبر من مصادر مخطئة لأن فاوق حسني كان من اول الثائرين و المعارضين لمشروع قانون احمد عز ( مش عارف يناقشه بجدية دي جت منين ) ده لدرجة ان فاروق حسني و زاهي حواس هددا بالاستقالة لو تم إقار هذا القانون

enjy يقول...

على باب الله:شوف تعليق فاروق حسنى على تعريف الاثار اللى فى المادة تمانية...مصلحة الاثار هتبتدى الحفر تحت البيوت..فاروق حسنى كان تعليقه ايه على ملكية الاثار اللى هيتم العثور عليها؟؟؟ شوف وتعالى قولى وانا هغير الكلام لو كنت اسأت فهم الوزير

adel يقول...

lين قالك كل ده ؟
انا متابع الماتش و متحمس
وبحب الاغنية دي قوي

ومع ذلك طلعت بطاقة انتخابية و متابع نجع حمادي(اكيد يعني) و حوار الاثار خمن اوله متابعه خصوصا ان اسم فاروق حسني لما بسمعه كاني سمعت صوت خُط الصعيد
لانه اساسا راجل حرامي و مهرب اثارنا برة يعني مصلحته ان القانون ده يطبق
هو و السيس عز

ومتابع السيول و مبدرات بنك الطعام
وحتي معرض الكتاب متابعه كالعاد و بفكر مرحش السنة دي الا لو في حفل توقيع لد/احمد خالد توفيق مثلا

adel يقول...

صحيح
وابقي اسالي يابنتي

غير معرف يقول...

ممتاز التنبيه ده يا إنجي .. ينقصة إنه ينشر على نفس قنوات إذاعة المباريات و الاستديوهات التحليلية كي يكون أكثر جدوى نسبيا لأن 90 % من اللي هيقرؤه هنا هما يا إما مش هيكونوا محتاجينه بقدر الناس اللي مابتشوفش غير الماتشات و ده لإنهم فعلا بيحاولوا جديا يكونوا على قدر المسئولية دائما أو هيكابروا للإفلات بأنفسهم من سوط كلماتك على اعتبار أنهم أفيد الناس للوطن و الأكثر ثقافة .

بجد شكرا يا إنجي ، و أنا بصراحه كان غايب عني حاجات من اللي قولتيها فعلا .. و حتى لو فيه حاجات أنا عارفها .. فكتير بنكون محتاجين نسمع كلام إحنا عارفينه تاني و تالت علشان نفوق بجد و نتحرك .

أصنف البوست ده على إنه من أكثر الموضوعات إيجابية .. شكرا و منتظر منك مواصلة الإبداع .

محمـود حجـاب

كيكى عوووووو يقول...

ياااااااااااااااااااااااحبيبتى يا انجى!!
أأأأأأأأأأأأأأأأأأأأأأأأااه
***الشقة اخبارها ايه الى فى القاهرة؟؟
ها

على باب الله يقول...

فاروق حسنى وحواس يستنجدان بالمعارضة والمستقلين لمنع قانون «الاتجار فى الآثار»
( ده المانشيت الرئيسي للمصري اليوم بتاعة النهاردة )
لينك من هنا : http://www.alamelarab.com/NEWSPA/almasry-alyoum.htm
أتفهم وجهة نظرك ( موقع مصراوي قال العكس تقريباً ) ، المشكلة ان محرر الخبر في موقع مصراوي يظهر كان عامل دماغ ، خلط أمور كثيرة ببعضها ، يعني دخل دراسة أحمد عز - اللي اعترض عليها أغلب النواب - في محاولات مجلسنا الموقر الغبية لوضع تعريف مُحدد للآثار - اللي أعترض فيها عزمي و حواس على فاروق لأنه قال الأثر هو اللي على أرض مصر متناسياً أن في آثار مسروقة خارج الأراضي المصرية ، و لكن محاولة وضع تعريف مُحدد للأثر ( زي ما كان عايز دويدار ) شيء نظرياً مستحيل .. كأننا عايزين نحط تعريف مُحدد للفن مثلاً .. مش ممكن )
تعريفنا للآثار سيقف عند وضع خطوط عريضة فقط و بديهيات مع وجوب تحديد كل حالة على حِدة من قبل ( المجلس الأعلى للآثار ) ، على العموم انا شخصياً فقدت الثقة في موقع مصراوي من فترة طويلة
--
لكن الشهادة لله انا أول مرة أسمع حكاية أن الحكومة ها تبتدي الحفر تحت البيوت دي ، ده الكلام كان خوفاً من أن الناس هي اللي تنقب تحت بيوتها و تستفيد بمهلة العامين في الإتجار بالآثار و تهريبها فياريت لو عندك معلومات عن الموضوع ده تنورينا .. شكراً لسعة صدرك و آسف جداً أني كتبت تعليق طويل

عمرو يقول...

جامد فحت بصراحة :)

شاب فقرى يقول...

الحمد لله انى مش سمعت الأغنية الحلوة دى
إقتراح بيع آثار مصر إقتراح كان متوقع
كفاية إنهم باعوا المصريين فى كل مكان
باعونا وقبضوا التمن الف مرة وكل ما يقدروا يبيعونا هيبيعونا
ربنا يصبرنا
ويفوق الناس التايهة اللى مش عارفة حاجة فى البلد دى
خالص التحية
شاب فقرى

نعكشة يقول...

هوه انا تقريبا منعزلة عن العالم
لا مهتمة اعرف اخبار عن الماتش
ولا حتى بتفرج علاماتشات
ولا عارفة الاحداث الليب تقولي عليها
عرفت عن نحجع حمادي
من واحد لسة اول امبارح
من هناك
وعن السيول منك امبارح

والبطاقة الانتخابية
عملتاه مخصوص

عشان ابطل صوتي
مش ادلي بيه لحد

انا مش عايشة في وطن بتاع اي حد

انا مش وطنية

بس بحب - اهل - البلد دية
وبحاول اقدر اكون حاجة كويسة
عشان اقدر افيدهم دة لو قدرت

رئيسة حزب الي ملهمش فيها

من امام الجهاز

سلامٌ عليكِ

Sharm يقول...

بالمناسبة انا قعدت ادور على الاغنية دي كتير

reem يقول...

يا نوجا يا جامد
بعد اذنك هانشرها ع الوول فى الفيس بوك عندى!
المقال قوى جدا ...وفى مكانه جدا
ولو حبيت اكتب ..مش هلاقى احسن من كلامك يا قمر
تسلم ايديكى
وفى انتظار الجديد
بس بجد ...مقال متميز جدا

Sam Sh يقول...

برافو .. بجد فعلا إنتى قلتى كلام فى الصميم بس مش كتير بفهموا الكلام ده .. إحنا شعب بنحب ندفن راسنا فى الرمل لدرجة الإدمااااااااااان

enjy يقول...

على باب الله:الخبر من على مصراوى..http://www.masrawy.com/News/Egypt/Politics/2010/january/26/faroq_hosny.aspx
بس انا اسأت فهم نقطة..اللى هى ان مصلحة الاثار هتبتدى الحفر..هو لما الخلاف كان على نص القانون بتاع ملكية الافراد للاثار االمنقولة بالارث زاهى حواس قال ان الافراد هينبشوا تحت بيوتهم..مش المصلحة..اسفة على سوء الفهم

لكن لازال نص القانون اللى بيطالب بيه فاروق حسنى بيسمح انتقال ملكية الاثار بين الافراد عن طريق الميراث..ودة برضو مشكلة كبيرة لانه ببساطة لما تكون حاجة بتاعتى هبقى حرة ابيعها لاى حد بقى..وهكذا

شكرا ليك على مناقشتك

msafa يقول...

فى بلد لايحكم فيه القانون
لا يوجد مستقبل
فى بلد يمشى فيه الناس
الى السجن بمحض الصدفه
لا يوجد مستقبل
فى بلد
يتمدد فيه الفقر
كما يتمدد ثعبان فى الرمل
لا يوجد مستقبل
فى بلد تتعرى فيه المرأه
كى تأكل
لا يوجد مستقبل
لا يوجد مستقبل

أحمد الشمسي يقول...

جميل يا إنجي المقال
حار وصادق
طلعت منه بإحساس مشابه للي طلعت بيه من فيلم واحد صفر...

للأسف ما كانش إحساس لطيف أبدا

أحمد شريف يقول...

السلام عليكم
أود أن أصحح لك معلومة ورجاء حاولي تتأكدي من مصدر معلوماتك حينما تطرحيها لأن هذه أمانة ستحاسبي عليها أمام رب العباد

بالنسبة لطرح أحمد عز ببيع الآثار فهو غير سليم .. ما طرحه أحمد عز هو دراسات عن القوانين السائدة في أوروبا والتي تسمح باقتناء الآثار والمتاجرة بها .. لكن لم يطرح قانونا للمناقشة وأساساً ليس منوط به طرح قانون في مجلس الشعب

الأمر الآخر .. فاروق حسني لو تابعتي جلسة مناقشة قانون حماية الآثار الجديد في الفترة الماضية .. كان هو أشد المعارضين لفكرة بيع الأثار من أساسه وكان يطالب بعقوبات مغلظة جداً لمن يساهم في بيع أو سرقة الآثار المصرية

أنا شاهدت بنفسي هذه الجلسات في مجلس الشعب ، وبصراحة صدمت من ترويجك لهذا الكلام
هذا حرام استغفري الله وصححي المعلومة
وعلى كل حال القانون تم اعتماده خلاص حاولي تراجعي بنوده من أي مصدر محترم لكي ترى حجم الإنجاز الذي تم

لا تحزني من قصوتي في الحديث لكن أنا ناصح أمين وبنية خالصة والله

دمتِ بكل ود