السبت، 6 فبراير 2010

هناك القاهرة




هاى شوباب...كيف حالكم؟؟؟
مش انا روحت معرض القاهرة الدولى للكتاب..اى والله لاول مرة حصريا و اكسكلوسيف.
خلاص خلاص متتحايلوش هحكى تفاصيل اليوم..

اولا قابلت سمية..اى نعم البنية كان وراها شغل بس هى طنشت وراحت استنتنى فى المحطة..قابلتها وانطلقنا صوب محطة كدة مش عارفة اسمها..التحرير باين..و ركبنا اتوبيس و السواق كان بيحتقرها اوى كل ما تسأله عن حاجة معرفش ليه..كانها بقالها يومين قارفاه بالاسئلة يعنى حاجة خنيقة جدا..المهم بقى البت سمية دى اييييييييه صاحبتى صاحبتى يعنى وطبعا اتكلمنا عن حاجات كتشير هع هع هع و غنينا اغانى دنيا مسعود..كانت بداية قوية لليوم الحقيقة..المهم روحنا المعرض بقى و لقيتها جايبالى هدية..طبعا انا بمنتهى البلاهة تنحت جدا لما لقيتها بتقولى انا جبت لك نوت بوك عشان انتى الكراسات بتسعدك..ازبهليت واتخرست..معرفش يعنى مجاش فى بالى انها هتعمل كدة..البت دى حلوة يخربيت كدة..سمية معلش والنبى واقف فى زورى كلمتين....انا بشوف سمية من زمان يعنى شفتها كذا مرة بس مكناش اصحاب واول مرة ادقق فيها كدة واكلمها من عالقرب دة..يا جدعان سمية عنيها اربع الوان تقريبا..برتقالى و اخضر وازرق و رصاصى..حاجة كدة سبحان الخلاق يعنى..شكرا يا ثوثو والله لقد اسعدت يومى يا بت انتى..

ميرو..هع هع هع البت دى كانت خلاص هتشيط..طبعا هى مستنيانى فى اول المعرض وانا دخلت من اخره عااااااااادى جدا..اه والله دة غير انها قعدت استنتنى ساعة فى الشمس دة غير ان رصيدى خلص وهى كانت بتكلمنى كل اربع ثوانى وتلت تقولى انتى فين دة غير انها اشترت تذكرتين ليا وليها وفى الاخر انا دخلت من بوابة تانية خالص..عاااااادى جدا
المهم مرام هانم دخلتنا دار الشروق اول حاجة ولقيتها فجأتن رايحة على رف كدة وبتقول حبيبى حبيبى حبيبى طبعا انا فهمت انها بتكلم كتاب خالد كساب عااااااادى جدا وبعدين لقيتها قررت انى هشتريه..لا وايه بكل بساطة جابته من عالرف وادتهولى وقالتلى يللا روحى حاسبى..صراحة انا لست من معجبى خالد كساب بس بحترم طريقته ونجاحه..طبعا اشتريت الكتاب عشان مرام قررت ونفذت..وبصراحة الكتاب مش غالى يعنى وانا كنت عايزة اشتريه..
بعد كدة لفينا كتير واشتريت رواية يوسف زيدان الجديدة وبعدين بقى فرحت جدااااااااا لما روحت دار الهلال ولقيتها باربعة جنيه..فرحت اوى يعنى اصلا مرام مسكتها وانشكحت اوى وقعدت تضضضضضضحك وانا متغاظة جدا يعنى ومقهورة..المهم طبعا اشترينا حاجات كتير من دار الهلال بعدها روحنا جناح المؤسسة واشتريت اصدارات دكتور احمد خالد توفيق الجديدة وعلى فكرة الطفيل معجبتنيش خالص..
وبعدين لقيت مرام متنحة جدا وبتقولى شايفة اللى انا شايفاه قعدت ابص كدة ملقيتش حاجة انبهر بيها وبعدين بقى شفت دكتور نبيل فاروق..بصت له وروحت عند الكاونتر حاسبت ولا كان فى حاجة حصلت..هى بقى بصراحة فضلت باصة له كدة ومبتسمة فلما قلتلها وجهة نظرى قالتلى دة اللى علمنى اقرا..طبعا حسيت انى وحشة اوى لانى برضو اتربيت على كلامه بس معرفش يعنى مبحسش ناحيته باى ارتباط من اى نوع..دة غير انى كنت متغاظة ان هو موجود ودكتور احمد لا..يعنى لما انا اروح اشوفه هو؟؟ دة ايه دة..
بعد كدة لفينا شوية وروحنا سور الازبكية واشتريت كوتبات كتير-ايون كوتبات- ومرام ضحكتنى موت موت موت..

حصل فاصل رخم يتخلله مكالمتين تليفون حرقوا دمى جدا بس دة المعتاد يعنى..ما علينا

بعد كدة روحت مكتبة عمر بوك ستور..هييييييييه..حلو اوى المكان ومرام هى اللى ودتنى بقى وكلها ثقة انى هلاقى رواية طارق امام هناك بس ملقيتهاش طبعا هع هع هع..على فكرة لاحظت ان تصميم العمارات فى وسط البلد تقريبا واحد حتى من جوة واحد بس هايل اوى..

بعد كدة قابلنا كيكى هانم..البت خست وبقت تحفة يعنى..يا خسارة يا كيكى مكانش ينفع اوصلك اتجاه الجيزة اصله مش تخصصى نياااااااااااهاههاااااااا
كيكى بقى ايه قابلتنا وجبنا اكل وادتنى بقى فلوس بالهبل انا ومرام اه والنعمة وفضحتنا يعنى وهى بتدينا الفلوس دى كان ناقص تنقطنا بيها زى نقوط الفرح كدة..ومع انها روحت تعبانة جدا لكن كلمتنى كذا مرة تطمن عليا..ومرضتش تدينى من الايس كريم بتاعها على فكرة..مع انها اخدت منى يعنى..بس ضحكنا كتير اوى ساعة الايس كريم..

بعد كدة قابلنا مريم..مريم بقى صاروخ ارض ارض..مش ممكن يعنى اول ما فكرنا نجيب ايس كريم كانت هى بالفعل جابته..وجابت لب وسودانى وبتاع كدة معرفناش نكتشف ماهيته..وانا مروحة جابت لى كيس مليان شيبسى وبيبسى وبسكويت ومياه..ظبططتنى يعنى كانى مهاجرة..

واخر حد قابلته اليوم دة كان ميييييييين؟؟؟ محمد هشام عبية..عاااااااااا شخص فوق الوصف..رائع..هايل..محصلش..وطويل اوى الصراحة..البنى آدم دة بجد حاجة كدة مسكرة..والله مسكر جدا تحسه شبه السكر..
طبعا كيكى تعبت جدا اليوم دة وهى اصلا تعبانة ومبتقدرش تمشى الايام دى كتير بس عشان خاطرى نزلت..ربنا يخليكى يا كيكى

طبعا مرام هى اللى كانت شايلة اليوم وبجد انا بحب هذا الكائن العسل اوى بتعليقاتها بردودها بشقاوتها بذكائها المخيف جدا ..وعلى فكرة برضو مرام كانت بردانة ونزلت عشان خاطرى..
مريم ..على فكرة انتى حلوة اوى وشكرا عالبوريو..هو انتى عرفتى منين انى مش باكل بسكويت غيره؟؟

ريم بقى كانت معايا عالموبايل خطوة بخطوة يعنى كانها معايا بالظبط..ميرسى يا رورو موبينيل المفروض تعملك تمثال والله..
انا انبسطت الحمد لله..وجبت كوتبات كتير هقعد اقرا فيهم بقى واستمتع..الحمد لله
الصورة دى فيها كتب من اللى انا اشتريتها..اى نعم مش كلها بس يعنى مش مهم اصل فى كتب ماما اخدتها عشان تقراها قبل منى ومعرفش حطتها فين الصراحة مع ان فيهم كوتبات شكلها امور يعنى..اشطة
اول مرة اشترى الكمية دى من الكتب حاسة بنشوة غريبة..

كانت معكم من اسكندرية الغراء اللى بتوحشنى اول ما اخرج من البوابة وبرجع اتنفس اول ما اعدى البوابة تانى..انا انجى ابراهيم..مساءكوا نعناع

هناك 25 تعليقًا:

Unknown يقول...

حمد الله على السلامة

كويس إن الطفيل طلعت رخمة عشان كانت في إيدي النهاردة ورجعتها تاني :(

شاب فقرى يقول...

واضح إنك مبسوطة

ربنا يسعدك كمان وكمان :)

وان شاء الله المرة الجاية تبقى تجيبى هدية لصاحبتك :)

تحياتى

(( نصيحة لما تخرجى مع صحابك ابقى اقفلى الموبايل عشان تريحى دماغك من المكالمات اللى بتعصب او ابقى شغلى خط واتصلى بصحابك اللى عايزة تكلميهم بس :) ))

فقرى

dr.lecter يقول...

اوعي تقولي انك روحت الاجمعه وماقالبلتيش دكتور احمد خالد

كان موجود في حفله توقيع لدار ليلي للكتابين الجداد بتوعه فقاقيع وروايه
esp

وكان تامر ابراهينم موجود ومحمد فتحي واحمد مراد ومحمد سامي ومحمد الغزالي

ponpona يقول...

مساكي فل يا سمسمة
عاجباني حالة الانبساط اللي انتي فيها دي كان بقالك كام يوم كده مش عاجباني وادخل الاقيكي حاطة هارد تايمز ماعرفش اتكلم اخرج تاني

عجبني العنوان علي فكرة
هنااااااك القاهرة ..... تاتاتاااا
أصل انا ممكن اقول كلمة هناك دي علي أي حتة في الدنيا إلا القاهرة وكله كوم بقي والحته اللي انت مش عارفه اسمها اللي باين كده انها التحرير !! يخرب بيت عقلك يا انجي ، هلكتيني م الضحك .. أي والله :):):):)

adel يقول...

طب تصثدقي بقي مفيش كومنت !!!!

عاش يارج-الة
انت و كيكي

طب علي فكرة انا كنت الاربع و النهاردة و قابلت ريم علي فكرة
بس هي اجدع تصدقي بقي !!!!!

صوت من مصر يقول...

وانا النهارده كنت هناك
اى خدمه

كيكى عوووووو يقول...

أختشى المنشكحه
بصى انا عايزكى تفتكرينى كويس اوى اليوم دة لانه احتمال يكون اخر ذكرى ليه وانا واقفه على رجلى!!!!!
المهم
انا كمان ببقى منشكحه من جوايا لمة انتى تنشحكى لانك نادر لمة بتنشكحى داخليا اى نعم اليوم ممرش بسلام اوى... بس يكفى مهم حصل انك شوفتينى وخلاص يعنى!!
اه ومراااااااام هانم
ياترى بنطق اسمها صح؟
ها
ونعكشة مفأجاه الحفله الى خدتنى بالبوس والاحضان اول مانطقتى اسمى ..
اى نعم كل مابفتكر استقبال كراكيب ليه بتغاظ اوى منها وببقى عايزة اديها بوقله فى نفوخها بس اعمل بحبها يا اختشى زيك
كان بجد احلى قاعدة بتاعت الايس كريم وكمان انتى عايزة تاخدى منى مش كفاااااااايه انه 2 بولة بس!!!
اديتى تنط واسراء حقهم من الباكو ؟؟!!
وانا كان نفسى تكون معاكى تيراا تيرااااااااا
يلا ربنا يقرب البعيد ان شاء الله
وربنا ينشكحك كمان وكمان
قولى امين
***ابو جودة كنت متوقعه تعليقك

عمرو يقول...

حمدالله على سلامتك يا إنجي
ربنا يقدرك بقى وتقري كل الكتب دي
:)

فاتيما يقول...

انجى يا شقاوة
كنتى ف المعرض السبت و لا الجمعة ؟؟
لو السبت هنقهر انا
عشان كنا موجودين طوال اليوم

المهم انك انبسطتى يا يتى
و عقبال كل سنة
يبقى هناك بوست
فى هناك القاهرة

سلامى لملما الغالية و بوسة و حضونة ليكى با حبيبتى

سقراط يقول...

العزيزة جدا قوي خالص مالص
انجي
اولا احب اهنيكي علي زيارتك الاولي لأرض المعارض
ثانيا انا من مزنقي هذا احب اشكر كل الناس اللي كانو معاكي لانهم فرحوكي بالشكل الجميل ده
"""
""
انا ما قدرتش اميز من الكتب اللي جبتيها غير رواية باولا
واحب اهنيكي علي اختيارك الرائع
رواية غاية في الجمال
ايزابيل الليندي روائية ممتازة
وصالح علماني مترجم عبقري
حاولت اعتر لها علي حاجة تانية في المعرض
لكن ولا الهوي
علي كل حال
مبروووك مرة تانية علي زيارتك الموفقة لمعرض الكتاب
والسنة الجاية نشوفك هناك

Foxology يقول...

حمد الله ع السلامة ونورتى القاهرة :)

تحياتى

غير معرف يقول...

انا كمان بحس بنشوه غريبه لما بشتري كتب كتير :)

أبو العريف يقول...

انا رحت المعرض مرتين

مره مش فاكرها خالص

والتانيه برضه مش فاكره خالص

كل اللي فاكره اني جبت شوية حاجات لنجيب محفوظ

ومالقتش الروايه اللي كنت بدور عليها

لاحلام مستغانمي

وبعد كده واحد صاحبي جابهالي من نفس المعرض

معرفش جابها منين

بس كل اللي فاكره

انه كان يوم ممتع

ربنا يسعدك دايما

ويخليلك اصحابك

غير معرف يقول...

ممممممممممممم
ازاي ما تجيبيش سيرتي
مش انا اللي قلتلكو سور الازبكية فين؟؟ انا ولا مش انا؟؟

غضبت عليكي

لألألألأ روحي كده .... سم

ايه؟؟ بتقولي ايه؟؟ هتعزميني على كوباية شاي وبقسماط بسمسم؟؟؟ حبيبتي يا جوجا نياهاهاهاهاها


^_^ مها ميهوووو

z!zOoOo يقول...

يا بختك

كان نفسي اكون موجود

وكان نفسي اشتري كتب كتير

:(( :(( :((

وكمان :(( :(( :((

بس الحمد لله إنك إتبسطي مع الناس الجميله ديه

يارب تبقي عاده كل سنه

وربنا يبسطك علطول

ديه اول زياره ليا

ونقول
:(( :(( :((

ومع السلامو عليكم

:(

yasmina يقول...

هاااااااى
د/انجى ازى حضرتك
على فكرة من يوم ما دخلت المدونة الجميلة اوى دى وانا بحب اسلوبها جدا
بجد اسلوب حضرتك جميل اوى وبيعجبنى جدا

اما بقى اليوم الجميل دة بجد روووووعة اكيد استمتعتى بيه اوى
انا برضو بحب الكتب جدا اى نعم مش من زمان بس حبيتها جدا بصراحة من اول ما دخلت مكتبة اسكندرية

تحياتى دايما لحضرتك
وبوست رااااااائع احيى حضرتك عليه بجد وحقيقى
ويارب ايام حضرتك دايما تكون فرح واستمتاع كدة على طووووول
بس طبعا من غير المكالمتين دول
هههههههه

سلااااااااام

كراكيب يقول...

جوجااااااااا
اما كان حتة يوووووووم
عسل عااااسااااال
ابقى تعالي تاني بقى بسرعة علشان نقضي يوم حلو زي ده
ويبقى البروجرام القلعة والازهر بارك والحسين على آخر النهار نضربلنا فيه واحد حمص الشام وطبق رز بلبن

صحيح يا جووووجا نسينا نجيب موز يوميها

استني لما اغنيلك اغنيتك المفضلة
مرامو هابيبو كولو هاليبو شربووو
:))))

miro el niro kwanirooooo

Zika يقول...

يارب الكتب تعجبك
وحمد الله ع السلامه
نورتي القاهره وضواحيها

غير معرف يقول...
أزال أحد مشرفي المدونة هذا التعليق.
Unknown يقول...
أزال المؤلف هذا التعليق.
غير معرف يقول...
أزال أحد مشرفي المدونة هذا التعليق.
Unknown يقول...
أزال المؤلف هذا التعليق.
محمودالشبح يقول...
أزال أحد مشرفي المدونة هذا التعليق.
Unknown يقول...
أزال المؤلف هذا التعليق.
عايش... ولكن !!!! يقول...

ازيك يا انووج
وحشانى كتاباتك والله
تروحى المعرض كده من غير ما تعرفينى :)
عموما مبروك عليكى الكتب
وشكلك قضيتى يوم حلو
عقبالى :) اصلى مروحتوش خالص