الخميس، 29 مايو 2008

تهانى واغانى

اهلا اعزائى اللى مش مستمعين فى البرنامج الحصرى الذى يذاع على المدونة بتاعتى فقط وحصريا.......
برنامج تهانى واغانى اللى هو وظيفته انه يبعت اهداءات للناس واغانى عشان يستمتعوا بيها...........
اولا وقبل كل حاجة انجى صاحبة المدونة وصديقة البرنامج بتبعت لكل القراء والمدونين اللى بيعبروها اغنية للفنانة وردة وهى
((وحشتونى وحشتونى وحشتوووووووووووووووووووووووووونى))
اول اهداء معانا النهاردة بعتاه العلاوة الاجتماعية تحية منها لكل شعب مصر واغنية
((مش من حقك تحلم بية او بعنية او تنادينى مجرد صوت))
وصلنا دلوقتى ايميل من الشعب المصرى كله اهداء للفلوس والشعب بيبعت للفلوس اغنية الفنان عمرو دياب
((قاللى الوداع وانا اقوله ايه هو الوداع يتقال فيه ايه))
وبرده الشعب المصرى بعت ايميل كمان للسلع الغذائية كلها بيحييها فيه مع اغنية عمرو دياب
((لو كان يرضيك تفضل هنا ادامى خلاص خليك))
وبمناسبة استئناف قضية الصحفى المعارض ابراهيم عيسى افتكر ان الاستاذ ابراهيم عايز يبعت اغنية للناس اللى بيحاكموه
((طب ورينى يا نن عينى))
وطبعا بعد ما الحكومة غلبت مع الاستاذ ابراهيم ومش عارفة تسكته ازاى و بعد فشل محاولات اسكاته قرروا يبعتوا له اغنية
((انت ايييييييييه مش كفاية عليك تفضحنى حرام عليك))
وبمناسبة الصحفيين والاعلاميين الاستاذ العظيم محمود سعد بيبعت لكل الناس اغنية سعد الصغير
((انا قلبى فى ايدية و مافيش غالى علية ولسة ما اتخلقش اللى هيلعب بقلمى))
اما الاستاذ تامر امين فبيحب يبعت للناس المهمين و المسؤلين اغنية الفنان عمرو دياب
((الليلة دى سيبنى اقول واحب فيك))
اما الشعب المصرى فالظاهر ان فلوسه كتير وعمال يبعت لنا فى ايميلات و بيحب بمناسبة الغلاء والكوى اللى احنا عايشين فيه يبعت للمسؤلين اغنية بردو لعمرو دياب يا سبحان الله
((معاك بجد كان قلبى طيب ماقلتش انا غير حاضر وطيب وانت غاوى وعود فى الهوا كل سنة باة وانت طيب))
وبردو الشعب المصرى ابو فلوس بالهبل بيبعت اهداء للحمة و اغنية
((وحشتنى وبتوحشنى وهتوحشنى ليالى هواك))
وبمناسبة مد قانون الطوارىء المعتقلات باعتة اغنية لكل المعارضين واغنية
((لو ما رجعتش لية برجلك تانى هنااااا ما ابقاش انااااااااااااااااا))
وكل الشباب المصرى باعت لمصر ام الدنيا اغنية عمرو دياب
((احبك اكرهك اسيبك اندهك اعلق نفسى بيكى وللا اعمل فيكى ايييييييييه))
وبمناسبة مناقشة قانون الثانوية العامية الجديد كل الطلبة باعتين اغنية ماجدة الرومى
((ونقول باى باى باى باى على طوووول يا مدرستنا يا حبيبتنا باى باى باى باى))
و الظاهر ان الطلبة كلهم فاضيين لانهم باعتين اهداء للناس اللى بيحطوا امتحانات الثانوية العامة اغنية فايزة
((خاف الله خاااااااااااااااااف الله))
واخر اغنية معانا النهاردة اهداء من البرنامج لكل اللى مش مستمعين اغنية محمد منير
ساح يا بداح ساح بداح يا سؤال جراح
ما الذى كان وما عادش وراح قمر انطفى
وانتفى واختفى نهر ما بلش حتى الريق
وااااااااااااااااااااه يا براح اه يا براح
عمال بيضيق
صبح وزيه الصبح التانى ليل ملضوم
فى الليل التانى وانا مش راييييح انا
مش جااى انا مش واقف حتى مكانى
وساااااااااااح يا بدااااااااااااااااااااح
ساح يا بداح يا سؤال جراح
مين اللى اتكسر فص اللولى وللا المرمر
طول العمر العسكر عسكر بس الناس
الناس كانت ناس وكان الحلم الغالى
برااااااااااااااااااااااااااااااااااااااااااااااااااح
ساح يا بداح ساح يا بداح
يا سؤال جرااااااااااااااااااااااااااااااااااح

هناك 37 تعليقًا:

غير معرف يقول...

الللللللللللللللللللللله
ايه الحلاوة دييييييييييييييي
الللللللللللللللللللللللله

غير معرف يقول...

انا اسراء صديقة البرنامج واخت المعدة والمقدمة انجى
احب ابعت اهداء من خلال برنامجها اغنية للمصروف وتامر حسنى
"الله يباركلى فيك يا اغلى من عينيا"

كيكى عوووووو يقول...

خاااااااااااااااااف الله خاااااااااف...انجى انا خلصت النهاردة.....هتخلصى امتى.....الشوق الشوق البوس البوس الحضن الحضن..ولا يا ولا من طرف اختك...كيكلمبو......وحشتنى يابت..بولبيف بولبيف

Tamer Nabil Moussa يقول...

ههههههههه

دة ناثر الامتحانات

قولت ليكى قبل الامتحان نامى كويس عشان الاحلام الؤثرة هههههه

وارسل ليكى اغنية ماحدش غنها

خاف على نفسك خاف قبلك ياما شاف

اللى يسهر عينة ويطول ليل سنينة دور كدة على اللى قبلك ماشفشى عيش وحاف

هههههه

اخبار الامتحانات معاكى اية خلصتى ولا لسة

ربنا يوفقك ويكرمك

تحياتى

علم الهسس يقول...

وأنا من موقع مسؤليتى
كهساس لشعب الهسس
ببعت بإسم شعب الهسس الى الشعوب المقهورة يا عينى
أغنية

حرام
..
..
..
حرام
..
..
..
حرام عليكو
..
..
..
تسيبوا الرؤسا
..
..
..
يفشفشوكو

وعودة مهسوسة الى عالم التدوين

ياسر يقول...

يا ستي المذيعة
والمشرفة علي الاغاني
للسادة المستمعين يعني
يا ريت بس اغنية بمناسبة وصول
البوكس والدبدبات
نسمع بهاء سلطان سوا
قوم اقف وانت بتكلميني ولاا تتكلم وانا بتكلم طاخ احلي تحية
وياريت نختم بحسن الاسمر الله يسمحك يازمن بعد الا عملتة فيا
ههههههههههههه
تحياتي

S H A H يقول...

بوست اخر اجراك يا انجي والله
بجد شوية اهداءات كلها في الجون

ودماغ عالية جدااا جدااا

a7md Helal ( المهم ) يقول...

هههههههههههههههههه
بجد جامد اوي البوست ده

وانا كا مستمع بقي احب اهدي مجلس الشعب المصري
اغنية طول الوقت لمصطفي كامل
وخصوصا الكوبليه ده :


كل ما نبعد ترجع تاني
وتأكد لي ان انت عشاني
وانا من خبتي وخيبة اهلي صدقتك

************
طول الوقت
وانافي بحور اوهامك عايم
قلبي يا عيني مغمض نايم
فكرك شط وبر ومرسي
كل ما تكدب اسامح وانسي
ماشي بكل عواطفي معاك
فاكر قلبك قلب ملاك
وانت بتزرع جرحي ويأسي
وانا بضحك علي روحي ونفسي
وكان لازم افوق من وهمي وانا
فوقـــــــــــــــت

غير معرف يقول...

عـــلى فكــــرة يـا إنجـــى ..
صــــوتك حـــــلـو جــــداً ..

مع حالص تحياتى وتمنياتى بالتوفيق ،،،

وائـل ثابت ،،،

حمادة زيدان يقول...

أنا صديق البرنامج وبحب أهدي غنوة

"كرهتك"

للست لطيفة لكل من

الرئيس مبارك والعائلة وصديقه وحبيبه عز والوزراء ورجال الأعمال وكل واحد واكل في فروة الشعب المسكين ده

صديق البرنامج
حمادة زيدان

.:.-=- ELGaZaLy-=-.:. يقول...

هايل

بجد التشبية لزيز واسلوبك جميل..ودمة خفيف

Nostor Azzuro يقول...

شكراً على الأغانى
جامدة كيك
ـــــــــــــــ
NEO

Tamer Nabil Moussa يقول...

ازيك يادكتورة

اخبارك اية

خلينا نشوفك


تحياتى

عروسة ننوسة يقول...

اتمنى اكون صديقة للبرنامج الجميل ده....تحياتى

ابن رشد يقول...

طب و الله دمك خفيف موووووووووت فعلا مدونة لذيذة و دمك خفيف فعلا

كيكى عوووووو يقول...

هتخلصى امتى الامتحانات دى...انا زهقت..شدى حيلك اول ماتخلصى تعالى قوليلى....ربنا معاكى يا قمر

كيكى عوووووو يقول...

1000000000000000 كل شوية اجى وملقيش..شكللك مشغوللللللللللللل موووووووت فى الامتحانات...ربنا معاكى يا حبيبتى...نتيجتى قربت تتطلع انا خايفة يا انجى..ولاد الذين بيطلعوها بعد اسبوع ولا كانى فى حضانة...ربنا معاكى وشدى حيللك..والله الامتحانات ان شاء الله تيجى كويسة...باى سلميلى على اسراء

ياسر خاطر يقول...

ياسلاااااااااااام يامحسن

الواحد يتصل بكام عشان يشترك في الحلقة اللي جاية؟

Desert cat يقول...

ممكن اكون صديقة للبرنامج يا انجى موافقة ؟؟
ميرسى يا حبيبتى على ذوقك انا بهدى لريسنا وحبيبنا اغنية هوينا وورينا عرض كتافك ده كل يوم الاسعار فى زيادة زالناس مش لاقيه العش الحاف وسلمى لى على العيلاوة
متزعليش منى يا انجى والله ما كان قصدى حاجه ويارب دايما منورانى محبتى يا جميلة اختك قطة الصحراء

الميكروباص يقول...

ممكن وهو البرنامج بيتصور اطلع وراء الكاميرا وأعمل بإيدي " باي باي" عشان الناس يشوفوني؟؟"

شـمو نشـادر يقول...

و النبى عسل ..
مش اول مره اجى هنا انا ؟ بس شكلى كده هاجى على طوووووووووول ..
هبقى زبون يعنى ..
دمك خفيف موت .. اسلوبك سلس و جذاب ..
دماغك عاليه و افكارك جميله ..
و احب اهديلك اغنية ..
العنب العنب العنب ..
اه هو كده بقى متسألينيش ليه ..
سلااااااام ..
أسامة أمين

HERO يقول...

جامدة على فكرة الاهداءات شكلك حافظة كمية اغاني بالعبيط وانا اول مرة ازورك ومش هتكون الاخيرة ان شاء الله
ومن موقعي هذا احب اهديلك اغنية حسن الاسمر
" عدي يا ليلة " هههههههه علشان خلاص الشعب المصري زهق

تحياتي

Mohamed Anwar يقول...

أنا أحب أسمع عدويه زحمه يادنيا زحمه زحمه ولاعدش رحمه مولد وصاجبه غايب واهديها لكل السكك والشوارع
هو ده الشغل علي قديمو
واهداء خاص ليكي اغنيه فيروز زوروني كل سنه مره حرام تنسوني بالمره

Ghada , Rofayda يقول...

تحيااااتي ..للمعد وللمخرج وللمقدم...
البرنامج راااائع..
وعجبني جداااا...
بس ياريت تعلنو الاعاده امتى؟...
اصلو ميتزهقش منه

ممكن اهدي الاغاني؟....
طبعا لاسرة البرنامج..ولكل محب للافتكاسات الهادفة والمبتكره


دمت مبدعه.......

safa7_karmooz يقول...

انا عاوز اهداء ...

:(

ماينفعش المعاملة دى :D

مدونة حلوة استمرى...

عايش... ولكن !!!! يقول...

انا هجيب من الاخر زى ما انتى طالبه
وعاوز ابعت اغنيه للتعليم اللى ماسك فيا ومتبت
اغنية اصاله ... " ابعد بقا "
تحياتى
علاء

moory-mero يقول...

السلام عليكم ورحمة الله وبركاته

أنا مريم صديقة البروجرام العثل ده واحب أسمع أغنية اهديها للمال العام اللي عمال يتهدر ويتصرف قال ايه اصلاحات وتجهيزات وبتروح على بنوك سويسرا بقى ههههههههههه
اغنية خليك هنا خليك بلاش تفارق بتقول يومين وتغير موش سنة لاء كتيييييييييير بلاش تفارق هههههههههههههه

بجد ياانجي الفكرة هايلة وحلوة مووووووووووووت

ربنا يوفقك يا قمر

في رعاية الله

Unknown يقول...

اول مرة اتشرف بزيارة مدونتك.. بجد مالهاش حل.. دمك خفيف حقيقي.. للأمام دائماً

Unknown يقول...

النهاردة فرحى يا جدعان.... خلصت امتحانات هييييييييييييييه هيه هيه شكرا لكل الناس اللى علقت وشكرا اكتر للناس اللى اول مرة يزورونى وشجعونى ورفعوا من معنوياتى انا راجعة لكم عشان ارد بالتفصيل بس بعد فاصل نوم عشان انا لسة جاية دلوقتى حالا.. والنهاردة فرحى يا جدعان

عًٍمًرٌٍوٍ آلنْوٍبٌَِى يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه بجد جميل جداااا البوست ده
اسلوبك فى طرح كتير من المشاكل جديد جدا محدش اجربو قبل كده
واحلى ما فى البوست الخاتمة
اغنية للكينج ياسلام
اصلى من عشاق منير احم احم

وانا بهدى اغنية لكل الناس الى بختها مايل زيى
(( الفرصة بنت جميلة ركبة عجلة بدال شعرها بيطير قودمها بيدارى علينا جمالها والعاقل لو يلحقها يتبدل بيه الحال الفرصــــة )))

تحياتى ليكى

واتمنى زيارتك وتشريفك لمدونتى المتواضعة

ادم المصرى يقول...

بجد بوست جميل وفكرا رائعه واهدائات جميله جدا بجد مدونتك لزيزه اوى ربنا يوفئك واهدى اغنيه سيدى الحبايب ياضنايا انتا اتمنا الزياره

Tamer Nabil Moussa يقول...

الحمد الله انك خلصتى امتحانات


ربنا معاكى

قولتى زورنى على طول وانا بزورك فى البوست الواحد كم مرة

لكن مش بنشوفك بالمرة

تحياتى

حمادة زيدان يقول...

أنجي

فينك يا بنتي من زمان كل ما ادخل الاقي البرنامج زمان المذيعة ولعت في نفسها وماتت من الركنة

ههههههههههههههههههههههههههههههههههه

ارحمي المذيعة ونزلي بوست جديد

بنت مصريه يقول...

جميله جدا يا انجى
على فكره انا اسمى انجى برضه
وبيدلعونى باوجى
اتمنى تنورينى يا قمر

عروسة ننوسة يقول...

ايه البرنامج مش بيتذاع اليومين دول ليه....مستنينك

Unknown يقول...

حسام مصطفى ابراهيم:
هو فى ايه مش عارفة ادخل على المدونة بتاعتك والوضع غير متاح وانا مش فاهمة ليه؟

احمد سعيد بيبو يقول...

انا احمد سعيد بيبو وياريت اكون صديق البرنامج وياريت اسمع اغنيه قلبك ياحول الله لبهاء سلطان
استاذ الطرب بهاء وياريت اسمع البوم جديد ليه الف شكر