الجمعة، 10 أبريل، 2009

we are back وتاج


هم مين بالظبط اللى we are back:؟؟
أقولك أنا....فاكرين زمااااااااااان كدة فى يوم من ذات الايام كنت قلت على مجلة أبراج؟؟؟
فاكرين؟؟ عموما اللى مش فاكر ميتعبش نفسه انا هشرح الموضوع من اول وجديد..
ابراج مجلة الكترونية ظريفة لطيفة خفيفة اختكوا – ايون اللى هى انا – بتكتب فيها..بس ايييييييه بقى؟؟ المجلة كانت عيانة بقالها فترة عشان رئيس التحرير كان بيستهبل – اصله مش بييجى هنا فانا هاخد راحتى – بس احنا كنا رجالة ووقفنا وقفة رجالة وانا شخصيا قلتله مينفعش الكلام دة..انا معترضة..دة كلام فارغ..دة تهجيص..لازم المجلة ترجع تانى..وترجع احلى واجمد من الاول بكتير..راح ابتسم ابتسامة تنم عن مقلب حلو اوى وقالى اوك انجى انتى المسؤولة ادامى عن المجلة..أن أن أنننننننن..جبته لنفسى..
بس بما انى معروفة انى جدعة جدا وب125487 راجل انا قبلت هاذوها التحدى واليكم بقى قراراتى – هى مش قراراتى لوحدى يعنى – بصوا يا جدعان..اللى اوله شرط آخره نور..وانا بشرط عليكوا اهو والفضاء السيبرى شاهد وملايين الالكترونات التى تسبح فى البعد النتى شاهدة كمان..انا عايزة كل شاب وكل فتاء – اللى هى فتاة – يشرفنى ويطول راسى ويبسطنى ويبعتلى اسهاماته للمجلة ...يعنى كلنا شركاء فى الجريمة قصدى فى المجلة..اى حد عايز يقول اى حاجة يتفضل يقولها..اى حد عايز ينشر عندنا حاجة مش هحرمه من الفرصة دى..اى حد عنده كلام ممكن يتقال يقوله..كل انواع الموضوعات محدش يتكسف .. يعنى نقد لكتاب شغال..مقال اشطة..قصة قصيرة حلو..شعر مش بطال..تجميع لادب قديم واعادة نشره لوز..تجميع لمانشيتات اخبار ومقتطفات كدة لذيذ..صور من الشارع اهلا..اخبار فنية بقى وهجص من بتاع الاعلام دة ماشى..اى افكار جديدة او اقتراحات او اضافات او نقد يااااااااحبذا......يعنى الموضوع بتاعنا كلنا....مستنية بقى كل الكلام الجامد دة على الايميل دة abraj_mag@hotmail.com
.......................................................................................
تانى حاجة بقى تاج....على فكرة تاج دى لعبة فى بلاد الافرنج زى كهربا عندنا كدة واللى بيتمسك فى اللعبة بيقولوا له u are tagged ويدخل اللعبة وهكذا...زى التاج دة كدة بنمرره لبعض وكل واحد يدخل اللعبة مرة.
التاج دة بقى جالى من كيمو ومن عادل ... بس هو اصلا كان عاجبنى الصراحة لعبة حلوة يعنى ولذيذ كدة
المهم ندخل فى الموضوع
- اسمك؟
انجى ابراهيم.
- المشهور بيه وسط اصحابك؟
كل واحد بيقولى حاجة بس الاشهر يعنى اوجى.
- مجال دراستك؟
علم النفس يا بنى ادمين دة انا قارفاكوا بالموضوع دة.
- اسم مدونتك؟
المهم ..هات من الاخر.
- صورتك الرمزية بتعبر عن ايه؟
ورق وكراسة واقلام..انا بحب المنظر دة اوى.
- هل فكرت فى اغلاق مدونتك؟ والسبب؟
اه فكرت مرة عشان كنت حاسة بالاجدوى وانى مش مفيدة..اسامة امين هو اللى اقنعنى بعد ما وقعت بلسانى وبصراحة قالى كلام مش هنساه واصلا الموقف دة كفاية اوى منه.
- ايه رد فعلك لو حد قل ادبه فى تعليق؟
انا بتعصب بسرعة ومتسرعة جدا..ومرة اتنرفزت على حد واسامة امين بردو هو اللى نبهنى للموضوع دة فبطلت اركز مع الرخامة.
- اسوأ مدونة؟
اى مدونة موجهة عشان حاجة معينة بكرهها. والناس اللى بتستهبل وهم فاضيين من جوة.
- هيحصل ايه للميل بعد ما تموت؟
وانا مالى؟؟ انا هبقى بتحاسب فى البلاوى اللى عملتها بالذمة هفكر فى دى وانا بتحاسب على كل افعالى المنيلة؟ حاجة غريبة والله.
- اديت الباس وورد لحد قبل كدة؟
اصلا باكينام صاحبتى الانتيخ هى اللى عاملالى الايميل دة ..واديته لانتيخة تانية مرة عشان تظبط لى المدونة اصلى جاهلة الكترونيا يا اخوانا بعيد عنكوا.
- السفر بالنسبة لك ايه؟
حلو اوى ونفسى اروح فى اماكن كتير وبانبسط لما بسافر المعسكر مع الجامعة بس مبحبش الغربة خالص.
- المود بتاعك ايه؟
متقلبة جداااااااا بس فى الغالب راسية يعنى وكئيبة.
- بتعمل ايه فى وقت فراغك؟
لما بيكون الفراغ دايم من غير شغل او حاجة بجانب الكلية بقضيه فى الاكتئاب..لكن لو وقت فراغ فى وسط مشغوليات بجد يبقى بستمتع بوقتى صح..قراية وقراية وقراية ونت وكتابة وافلام اجنبى.
- الصفات اللى اخدتها من والدك؟
العصبية..قلة المرونة..الابتكارية.
- الصفات اللى اخدتها من والدتك؟
حب القراية..الايثار..البعزقة – اللى هو اصرف ما فى الجيب - ..اى حاجة راقية ماما هى اللى عرفتهالى فى الاول وبعدين انا طورتها.
وطبعا عيوبى مش هقول اخدتها من مين بلاش رخامة.
- اكتر حاجات بتكرههم؟
دول كتيييييييييييير اوى بس هقول منهم حبة حاجات..بكره الغباء..بكره التسلط..بكره الهبل والعته..بكره الغرور والافتخار بحاجات مش موجودة فيك اصلا..بكره المصارعة واللى بيلعبوها واللى بيتفرجوا عليها..بكره المسلسلات المصرى..بكره جملة بس انتى بنت..بكره ان حد يكلمنى بصيغة الجمع ويحطنى مع اى فئة تانية..بكره الاستخفاف بافكارى..بكره جملة بلاش فلسفة او بلاش شعارات..بكره بكره شركة فودافون..بكره التعامل مع الالكترونيات..بكره الاغانى الهابطة..بكره القصص اللى مفيهاش فلسفة..بكره اللى بيقول على علم النفس كلام فى كتب..بكره كلمة عقبالك..بكره جملة انتى معقدة..بكره جملة اشتريه وشيليه فى الشوار..بكره جملة ابن الحلال..بكره الاغانى اللى فيها ماساويات فارغة من عينة مصطفى كامل..بكره كوى الهدوم..بكره غسيل المواعين..بكره الحسوكة والمحسوكين..بكره التطنيش..وحاجات تانية كتير بس كفاية كدة كره بقى.
- اكتر حاجات بتحبهم؟
يااااااااااااااااااااااااااااااااااااااه دول كمان حاجات بالهبل عشان زى ما بينرفزنى حاجات صغيرة كمان بتفرحنى حاجات صغيرة اوى..بحب يوم التلات عشان مقال دكتور احمد فى الدستور..بحب اى حاجة يكتبها دكتور احمد خالد توفيق..بحب الاقلام والورق والكراسات..بحب الكتب..بحب الاقلام ال (ستدلر)..بحب الفوضى اوى اوى..بحب الكركبة..بحب معجون كلوس اب بالنعناع..بحب النعناع اوى..بحب البونبونى..بحب الميااااااااه..بحب موبايلى..بحب الافلام الاجنبى..بحب الادب المتفلسف فلسفة بسيطة..بحب اشيائى..بحب النضارة..بحب الخواتم الاكسسوار..بحب الفضة اوى..بحب امشى فى المنشية..بحب اتكلم فى الموبايل..بحب صحوبيتى لاصحابى..بحب حد يفاجئنى بحاجة..بحب اللى بيحبونى..بحب البس الجزمة من غير شراب..بحب المشط اللى اسنانه واسعة..بحب الكحل..بحب اقص ضوافرى للاخر..بحب سريرى..بحب التصوير..بحب الكتابة اوى..بحب احلم..بحب اعمل حاجة تفرح اللى حواليا اوى..بحب المناديل الورق..بحب الشيكولاتة بغبااااااااء..بحب محفظتى اوى والمحافظ عموما..بحب الساعات الرجالى..وبحب حاجات تانية كتير اوى بس كفاية كدة.
- شخصيتك نوعها ايه؟
شريرة بطبعى..نياهاهاها.
- لماذا دخلت عالم التدوين؟
عشان ادون طبعا.
- اجمل جملة قيلت فى وصف مدونتك؟
جمل كتير كلها بتحرجنى اوى اوى .
- احلى بوست كتبته؟
معرفش والله كلهم ابنائى على راى ارثر ميلر.
- افضل مدونة قريتها؟
كتير اوى بالهبل يعنى..اى حد بيشوفنى عنده يعرف انه بتعجبنى دماغه.
- افضل بوست قريته؟
كتير اوى دى كمان وبعدين انا عندى زهايمر اصلا.
- الشغل بالنسبة لك ايه؟
يعنى انى عايشة..حتى لو مبحبوش ببقى عارفة انه فترة وهشتغل اللى انا عايزاه باذن الله.
- الانترنت بالنسبة لك ايه؟
يعنى جزء مهم من حياتى..مكونتش هبقى كدة على فكرة لو معرفتش اقول كلامى فى حتة ما والنت هو اللى عرفنى السكة دة غير انى عرفت احسن ناس من هنا وحصل لى حاجات كتير حلوة اوى اوى من هنا.
- تمرر التاج لمين؟
اللى عايز التاج يستفضل بس اللى انا عايزاهم يجاوبوه انا عارفة انهم مش هيوافقوا فبلاش احراج يعنى مش طالبة.
...............................................................
شباب محدش ينسى موضوع المجلة مستنياكوا كلكوا..
سلام

..........انجى ابراهيم............

هناك 28 تعليقًا:

karim يقول...

اريد ان اسجل اعجابى بمدونتك , تحياتى

أمبارح كان عمرى عشرين يقول...

مبروك عوده المجلة تانى
انا مشفتهاش خالص ومش عارف كمان فين اللينك بتاعها او اى شى عنها
وان شاء الله هدعبس وهعرف وانا صغير :d
_____________

أجاباتك فى التاج جميله
وخصوصا الحاجات الابتكرهيها هما كتير صحيح بس تقريبا كلهم صح
وخصوصا المصارعه والدراما المصريه :D


تقبلى تحياتى
سلام

مذكرات مشاغب يقول...

لالالالالا ايه الكلام الكبيرده
كل ديه حاجات بتكرهيها
وكل دي حاجات بتحبيها

لما بيكون الفراغ دايم من غير شغل او حاجة بجانب الكلية بقضيه فى الاكتئاب
ونعم وقت الفراغ فعلا

بكره شركة فودافون
احتج واشجب
مالها شركة فودافون
شركه محترمه
متغاظه منها ليه

بحب الفوضى اوى اوى
ونعم الحب فعلا معاكي حق

بحب الميااااااه
هو فيه حد مبيحبهاش يا شيخه

انا حبيت اطلع بعض الحاجات الغريبه شويتين

اما بالنسبه لموضوع المجله
فممكن مثلا تختاري احسن موضوع اسبوعيا وتنشريه فيها
بس لازم مساحة البحث عن الموضوع تكون كبيره ومتقتصرش بس على اعضاء مدونتك
وممكن تحطي شوية استفتاءات
وحطي انتي باه شوية حبشتكنات
هو انا هقولك برده تعملي ايه
انتي قدها وقدود

تحياتي

نعكشة يقول...

:D

والله قشطة
قدها و قدود يا معلم
ربنا يعينك و ان شاء الله تطوريها و تبقى أحلى و أحلى
دة بالنوسبة لأبراج
............

بالنسبة للتاج
انا حاجزة مكان أول ما تفتحي عيادتك
ان شاء الله
اجاباتك مممممم كويسة
صراحاة الحاجة اللي كنت مستمتعة وانا بقراها هي الحاجات اللي بتكرهيها و بتحبيها

يلا خهير

سلام عليكِ

صوت من مصر يقول...

نوجااااااااااااا
والله انتى شخصيه بتحب تتفلسف ههههههههههههههه
ولا ايه عموما تاج هايل بالنسبه للمجله اعتقد انى فاشل

غير معرف يقول...

5و5
الله اكبرررررررررررر يعنى امسك الخشب
فى النشااااط التدوينى دة!!!1
ودة من امتى ان شاء الله!!!!
امممممممممممممممممممممم
مش بقولك شكه فيكى!!!
يلااااااااااا سلام
يالهوى لا استنى اعلق على التاج
مالها المصااااااااااارعة يا اختشى عايزة اعرف هااا
بس عموما الحاجات الى بتحبيها ولاى بتكريها نفس النظام وبالذات الى بتكريها
وبخصوص ابراج مش عارفة اقول اية بس حبيت اقول اسمها وخلااااااااااااص
عوووووووووووووووووووو

mohamed ghalia يقول...

جميلة إجاباتك وبالتوفيق فى المجلة

احساس لسه حى يقول...

عزيزتى

يا بنتى هو انتى محتاجه موضوعات من ناس يبعتهالك

ما انتى تتعبى شويه وتلفى المدونات وهتلاقى كل اللى عوزاه

وهتلاقى الاشطة والشغال والحلو واللى مش بطال واللوز واللذيذ واللى ماشى ومن كل بون يا بطسطه

وحد يرمى اميله كده

على العموم ربنا يعينك ويقويكى

التاج تعبت من تعليقى على التاج فى تدوينات كتير

كفاية انى اقراه

تحياتى

سلام

adel يقول...

بالنسبة للمجلة
قدها و قدود يامعلم
و انا تحت امرك لو عايزة حاجة (كوميدي او سينما)
يعني خدمة مني مش اكتر.

----------
التاج مبروك و اساسا انا بعته عشان اعرف الاجابات دي
بحيكي علي سؤال بتحبي ايه و تكرهي ايه
مع اني في حاجات مش مقتنع بيها بس يلا خليها عليا المرة دي

ههههههههههه

عشان بس الشوكولاتة

ههههههه

سقراط يقول...

السلام عليكم
مش عارف ليه المرة دى بالذات قريت كل التعليقات اللى سبقت تعليقي قبل ما اكتبه
واكتشفت بعد ما قريتها انى مش عارف اقول ايه
لانى فى الغالب لازم ابان واد مخلص
وتعليقي مختلف
وبعيدًا عن هذا الرغي الفارغ
طبعا التدوينة عجبتني جدا
لكن اكتر تلات حجات عجبونى فيها .. حاجتين
هاذوها
وحاجة تانية
لما كنت بتقولى الحجات اللى بتحبيها
كنت دايما بتكرري كلمة بحب
وبحب وبحب وبحب وبحب وبحب
كانت عاملة جو جميل قوي
اما بقي بالنسبة للمجلة
فانا بتمني لك التوفيق من كل قلبي
ومتأكد انك هاتعملى حاجة ممتازة ان شاء الله
وبعتذر عن الاطالة
....
...
..
.
اه نسيت اقولك انى من باب التغيير
اتكلمت عن التاج الاول وبعدين عن المجلة
اه .. وده كمان من ضمن الرغي الفارغ
سلام

msafa يقول...

ممكن اساهم فى المجله مع انى مش عارف ايه التفاصيل ... لكن ممكن ...
........................
انتى انسانه مالكيش حل
مقدرش اعلق غير كده ...
هاجاوب على التاج ممكن ؟

حسام غانم يقول...

همممممممم

طيب هو موقع المجلة ايه ؟

أنا ناوي أشارك بإذن الله

بس أشوف النظام

======

اجاباتك قمة في الروعة خصوصا الحاجات اللي بتحبيها واللي بتكرهيها

أنا بحب الاستطراد ده

تحياتي ليكي

حاسوباتيه يقول...

ربنا يوفقك في المجله وتاج جميل واجاباتك جميله

Foxology يقول...

اولا حمد الله على سلامة المجلة انا قبل كدة تابعتها من فترة :)

ثانيا احتمال كبير اشارك معاكو فى الجريمة بتاعة المجلة :)

ثالثا التاج جميل جدا وخصوصا كره المصارعة :))

تحياتى :)

كراكيب يقول...

مجلة ومسئولة وحركااااااات
ماشي يا معلم
هحاول ابعت مقترحاتي المفيدة طبعا وحاجة كاتباها من كتاباتي الثرية اكيد وتصوري للمجلة بدماغي التقيلة من غير كلام

هع هع هع هع
:)

جوجاااااا
ألا انتي كئيبة فعلا؟
بصي هو انا شايفاكي عاقلة شويتين
بس كئيبة؟؟؟؟

miro el niro kwaniro

حقدتي على كورس الرسم ومرواحي انا وكيكي كل السبت آديني قعدت منه
اعووووووذ باللـــــه
:) :)

will يقول...

情趣用品,情趣,A片,AIO,AV,AV女優,A漫,免費A片,AIO交友愛情館,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,情色論壇,色情影片,微風成人,嘟嘟成人網,成人,18成人,成人影城,成人圖片區,成人圖片,成人貼圖,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,視訊聊天室,視訊聊天

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,情趣商品,A片,AIO交友愛情館,AIOAV女優,AV,A漫,免費A片,本土自拍,自拍,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,色情影片,情色網,色情網站,微風成人區,微風成人,嘟嘟成人網,成人,18成人,成人影城,成人圖片區,成人圖片,成人貼圖,成人文章,成人小說,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,中部人聊天室,080苗栗人聊天室,苗栗人聊天室,免費視訊聊天,免費視訊,視訊聊天室,視訊聊天

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,AIO交友愛情館,一葉情貼圖片區,情色論壇,色情影片,色情網站,微風成人區,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,A片,AV女優,AV,A漫,免費A片,自拍,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,080苗栗人聊天室

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,做愛,寄情築園小遊戲,色情遊戲,AIO交友愛情館,AIO,色情影片,情色網,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,成人電影,麗的色遊戲,自拍,A片,AV女優,AV,A漫,視訊交友網,視訊,視訊交友,免費視訊聊天室,免費視訊,視訊聊天,視訊聊天室,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園

ايوشة يقول...

انجى هانم اجابات تحفة جدا وعجبنى اوى اكتر حاجات بتكرهيها واكتر حاجات بتحبيها وانك مهتمة اوى بالتفاصيل اللى ممكن تبسطك وتفرحك ربنا يسعد ايامك دايما

سارة نجاتى يقول...

ايه يا جنجن ده كله ؟؟

عايزه أقولك أنتى كأنك سالتينى ايه الحاجات اللى بكرها بالضبط , ايه يا بنتى ده ؟؟
بس نختلف فى الحاجات اللى بنحبها شوية

ما علينا , جود لاك مع المجلة و ابقى حطى لها لينك يعنى اعملى لها شوية دعاية كده .

سلام يا جميل

علي جاد يقول...

د.أوجو .. شفت التاج وعرفت عنك حاجات كتيرة من خلال كلامك وبعيدا عن التحليل النفسى اللى هو تخصصك اسمحيلى اقولك باختصار شديد "انت جميلة" ودى مش معاكسة ولكن إحساس .. فالإنسان عايز من الدنيا إيه غير إنه يعيش اليومين اللى له على الأرض فى حب وسلام لا يؤذى أو يكره أحدا .. وبعدين كله محصل بعضه وما فيش حد أحسن من حد .. تمنياتى لك بكل شئ حلو تكونى بتحبيه ولونك ما بتكرهيش حاجة أصلا ..
سلام أنا فى انتظارك على مدونتى
أهلا وسهلا أهلاأهلا أهلا أهلا مرحبتين

NOGA ALEX يقول...

ازيك يا انجى
تصدقي بجد وحياة ربنا وحشتينى مع انى معرفكيش غير نت بس حاسة انى عايزة اشوفك اوي.....
ثانيا:حبة اوى اجاوب التاج دة لو سمحتى هبقى اجاوبة واخيرا اتمنى ربنا يوفقك فى المجلة انتى قد المسئولية واحنا عارفين كدة لذلك الى الامام

اة على فكرة مالكيش حق تكرهى فودافون انا بحبها اوووووى وبكرة موبينيل(وش بيطلع لسانة)

حازم سويلم يقول...

لن اعلق على التاج يا أوجى, لأنى واخد منها موقف, على جنب كده يعنى

لكن فكرة مجلة أمواج رائعة للغاية, وهى الى حد ما تشبه الكثير من محاولات مشابهة لتجميع أنتاج أدبى مختلف, يشارك فيه كل من يستطيع الكتابة
أعتقد أننى سأساهم معكم.. تحياتى

عالم ماريونت يقول...

مبروك عوده المجلة
وربنا يكرم ان شاء الله واقراها
بس بجد اجابات التاج هايلة جدا

بجبك يا انجي ونفسي في يوم نتقابل
اية رأيك؟

انا ان شاء الله نازلة مصر قريب؟؟؟؟؟؟

اختك رنا

blue-wave يقول...

بقالى كتير ما جتش هنا:))
وحشتينى والله
وطبعا مش محتاجه تعليق على اجاباتك
هى دى انجى فعلا:))

Zika يقول...

يا جدعان وربنا فيه حاجه غلط
انا بسيب تعليقات وبارجع مالاقيهاش
انا بتثبت في التعليقات يا اخواننا
انا هاعمل اعتصار عشان تعليقاتي ترجع تاني
:P:D

نعكشة يقول...

جيتي في بالي

حبيت ارخم

يا رب تكوني بخير

سلام

أحمد سعيد بسيوني يقول...

بسم الله

وانا باقلب في المواضيع القديمة في مدونتي -قبل ما اخش على مدونتك- لقيت موضوع كنت كاتبه قبل اشهر بعنوان "قم للخرزانة وفها التبجيلا" وراجعت التعليقات عليه والتي كانت احسن من الموضوع نفسه

واول ما دخلت هنا ولقيت اعلان عن مجلة قلت فرصة لو ينفع يتنشر في المجلة

http://ana-elbahr.blogspot.com/2008/11/blog-post_10.html


اجاباتك على التاج جميلة

دمتم بخير

shicooo يقول...

معلش انا برد متأخر بس انا كان نفسي ارد من زمان عشان اقولك كلمتين ....

رغم انى اتكلمت مرة واحدة معاكى إلا إن الأنطباع اللى اخدته عنك اكدته البلوج دى (( شخصية لذيذة طحن ))

والحاجة التانية :
انى بحب كلوز اب بالنعناع جدات جدا جدا


مش هطول واسمحيلي انى اعمل كومينت على باقى البوستس
شكرا....

عالم ماريونت يقول...

انجي انا هاخد التاج بعد اذنك لأنه عجبني اوي وانا بقالي كتير مش عارفة انزل حاجة

انتي قلتي اي حد عايزة يتفضل
وانا مش هكسفك:P