we are back وتاج

هم مين بالظبط اللى we are back:؟؟
أقولك أنا....فاكرين زمااااااااااان كدة فى يوم من ذات الايام كنت قلت على مجلة أبراج؟؟؟
فاكرين؟؟ عموما اللى مش فاكر ميتعبش نفسه انا هشرح الموضوع من اول وجديد..
ابراج مجلة الكترونية ظريفة لطيفة خفيفة اختكوا – ايون اللى هى انا – بتكتب فيها..بس ايييييييه بقى؟؟ المجلة كانت عيانة بقالها فترة عشان رئيس التحرير كان بيستهبل – اصله مش بييجى هنا فانا هاخد راحتى – بس احنا كنا رجالة ووقفنا وقفة رجالة وانا شخصيا قلتله مينفعش الكلام دة..انا معترضة..دة كلام فارغ..دة تهجيص..لازم المجلة ترجع تانى..وترجع احلى واجمد من الاول بكتير..راح ابتسم ابتسامة تنم عن مقلب حلو اوى وقالى اوك انجى انتى المسؤولة ادامى عن المجلة..أن أن أنننننننن..جبته لنفسى..
بس بما انى معروفة انى جدعة جدا وب125487 راجل انا قبلت هاذوها التحدى واليكم بقى قراراتى – هى مش قراراتى لوحدى يعنى – بصوا يا جدعان..اللى اوله شرط آخره نور..وانا بشرط عليكوا اهو والفضاء السيبرى شاهد وملايين الالكترونات التى تسبح فى البعد النتى شاهدة كمان..انا عايزة كل شاب وكل فتاء – اللى هى فتاة – يشرفنى ويطول راسى ويبسطنى ويبعتلى اسهاماته للمجلة ...يعنى كلنا شركاء فى الجريمة قصدى فى المجلة..اى حد عايز يقول اى حاجة يتفضل يقولها..اى حد عايز ينشر عندنا حاجة مش هحرمه من الفرصة دى..اى حد عنده كلام ممكن يتقال يقوله..كل انواع الموضوعات محدش يتكسف .. يعنى نقد لكتاب شغال..مقال اشطة..قصة قصيرة حلو..شعر مش بطال..تجميع لادب قديم واعادة نشره لوز..تجميع لمانشيتات اخبار ومقتطفات كدة لذيذ..صور من الشارع اهلا..اخبار فنية بقى وهجص من بتاع الاعلام دة ماشى..اى افكار جديدة او اقتراحات او اضافات او نقد يااااااااحبذا......يعنى الموضوع بتاعنا كلنا....مستنية بقى كل الكلام الجامد دة على الايميل دة abraj_mag@hotmail.com
.......................................................................................
تانى حاجة بقى تاج....على فكرة تاج دى لعبة فى بلاد الافرنج زى كهربا عندنا كدة واللى بيتمسك فى اللعبة بيقولوا له u are tagged ويدخل اللعبة وهكذا...زى التاج دة كدة بنمرره لبعض وكل واحد يدخل اللعبة مرة.
التاج دة بقى جالى من كيمو ومن عادل ... بس هو اصلا كان عاجبنى الصراحة لعبة حلوة يعنى ولذيذ كدة
المهم ندخل فى الموضوع
- اسمك؟
انجى ابراهيم.
- المشهور بيه وسط اصحابك؟
كل واحد بيقولى حاجة بس الاشهر يعنى اوجى.
- مجال دراستك؟
علم النفس يا بنى ادمين دة انا قارفاكوا بالموضوع دة.
- اسم مدونتك؟
المهم ..هات من الاخر.
- صورتك الرمزية بتعبر عن ايه؟
ورق وكراسة واقلام..انا بحب المنظر دة اوى.
- هل فكرت فى اغلاق مدونتك؟ والسبب؟
اه فكرت مرة عشان كنت حاسة بالاجدوى وانى مش مفيدة..اسامة امين هو اللى اقنعنى بعد ما وقعت بلسانى وبصراحة قالى كلام مش هنساه واصلا الموقف دة كفاية اوى منه.
- ايه رد فعلك لو حد قل ادبه فى تعليق؟
انا بتعصب بسرعة ومتسرعة جدا..ومرة اتنرفزت على حد واسامة امين بردو هو اللى نبهنى للموضوع دة فبطلت اركز مع الرخامة.
- اسوأ مدونة؟
اى مدونة موجهة عشان حاجة معينة بكرهها. والناس اللى بتستهبل وهم فاضيين من جوة.
- هيحصل ايه للميل بعد ما تموت؟
وانا مالى؟؟ انا هبقى بتحاسب فى البلاوى اللى عملتها بالذمة هفكر فى دى وانا بتحاسب على كل افعالى المنيلة؟ حاجة غريبة والله.
- اديت الباس وورد لحد قبل كدة؟
اصلا باكينام صاحبتى الانتيخ هى اللى عاملالى الايميل دة ..واديته لانتيخة تانية مرة عشان تظبط لى المدونة اصلى جاهلة الكترونيا يا اخوانا بعيد عنكوا.
- السفر بالنسبة لك ايه؟
حلو اوى ونفسى اروح فى اماكن كتير وبانبسط لما بسافر المعسكر مع الجامعة بس مبحبش الغربة خالص.
- المود بتاعك ايه؟
متقلبة جداااااااا بس فى الغالب راسية يعنى وكئيبة.
- بتعمل ايه فى وقت فراغك؟
لما بيكون الفراغ دايم من غير شغل او حاجة بجانب الكلية بقضيه فى الاكتئاب..لكن لو وقت فراغ فى وسط مشغوليات بجد يبقى بستمتع بوقتى صح..قراية وقراية وقراية ونت وكتابة وافلام اجنبى.
- الصفات اللى اخدتها من والدك؟
العصبية..قلة المرونة..الابتكارية.
- الصفات اللى اخدتها من والدتك؟
حب القراية..الايثار..البعزقة – اللى هو اصرف ما فى الجيب - ..اى حاجة راقية ماما هى اللى عرفتهالى فى الاول وبعدين انا طورتها.
وطبعا عيوبى مش هقول اخدتها من مين بلاش رخامة.
- اكتر حاجات بتكرههم؟
دول كتيييييييييييير اوى بس هقول منهم حبة حاجات..بكره الغباء..بكره التسلط..بكره الهبل والعته..بكره الغرور والافتخار بحاجات مش موجودة فيك اصلا..بكره المصارعة واللى بيلعبوها واللى بيتفرجوا عليها..بكره المسلسلات المصرى..بكره جملة بس انتى بنت..بكره ان حد يكلمنى بصيغة الجمع ويحطنى مع اى فئة تانية..بكره الاستخفاف بافكارى..بكره جملة بلاش فلسفة او بلاش شعارات..بكره بكره شركة فودافون..بكره التعامل مع الالكترونيات..بكره الاغانى الهابطة..بكره القصص اللى مفيهاش فلسفة..بكره اللى بيقول على علم النفس كلام فى كتب..بكره كلمة عقبالك..بكره جملة انتى معقدة..بكره جملة اشتريه وشيليه فى الشوار..بكره جملة ابن الحلال..بكره الاغانى اللى فيها ماساويات فارغة من عينة مصطفى كامل..بكره كوى الهدوم..بكره غسيل المواعين..بكره الحسوكة والمحسوكين..بكره التطنيش..وحاجات تانية كتير بس كفاية كدة كره بقى.
- اكتر حاجات بتحبهم؟
يااااااااااااااااااااااااااااااااااااااه دول كمان حاجات بالهبل عشان زى ما بينرفزنى حاجات صغيرة كمان بتفرحنى حاجات صغيرة اوى..بحب يوم التلات عشان مقال دكتور احمد فى الدستور..بحب اى حاجة يكتبها دكتور احمد خالد توفيق..بحب الاقلام والورق والكراسات..بحب الكتب..بحب الاقلام ال (ستدلر)..بحب الفوضى اوى اوى..بحب الكركبة..بحب معجون كلوس اب بالنعناع..بحب النعناع اوى..بحب البونبونى..بحب الميااااااااه..بحب موبايلى..بحب الافلام الاجنبى..بحب الادب المتفلسف فلسفة بسيطة..بحب اشيائى..بحب النضارة..بحب الخواتم الاكسسوار..بحب الفضة اوى..بحب امشى فى المنشية..بحب اتكلم فى الموبايل..بحب صحوبيتى لاصحابى..بحب حد يفاجئنى بحاجة..بحب اللى بيحبونى..بحب البس الجزمة من غير شراب..بحب المشط اللى اسنانه واسعة..بحب الكحل..بحب اقص ضوافرى للاخر..بحب سريرى..بحب التصوير..بحب الكتابة اوى..بحب احلم..بحب اعمل حاجة تفرح اللى حواليا اوى..بحب المناديل الورق..بحب الشيكولاتة بغبااااااااء..بحب محفظتى اوى والمحافظ عموما..بحب الساعات الرجالى..وبحب حاجات تانية كتير اوى بس كفاية كدة.
- شخصيتك نوعها ايه؟
شريرة بطبعى..نياهاهاها.
- لماذا دخلت عالم التدوين؟
عشان ادون طبعا.
- اجمل جملة قيلت فى وصف مدونتك؟
جمل كتير كلها بتحرجنى اوى اوى .
- احلى بوست كتبته؟
معرفش والله كلهم ابنائى على راى ارثر ميلر.
- افضل مدونة قريتها؟
كتير اوى بالهبل يعنى..اى حد بيشوفنى عنده يعرف انه بتعجبنى دماغه.
- افضل بوست قريته؟
كتير اوى دى كمان وبعدين انا عندى زهايمر اصلا.
- الشغل بالنسبة لك ايه؟
يعنى انى عايشة..حتى لو مبحبوش ببقى عارفة انه فترة وهشتغل اللى انا عايزاه باذن الله.
- الانترنت بالنسبة لك ايه؟
يعنى جزء مهم من حياتى..مكونتش هبقى كدة على فكرة لو معرفتش اقول كلامى فى حتة ما والنت هو اللى عرفنى السكة دة غير انى عرفت احسن ناس من هنا وحصل لى حاجات كتير حلوة اوى اوى من هنا.
- تمرر التاج لمين؟
اللى عايز التاج يستفضل بس اللى انا عايزاهم يجاوبوه انا عارفة انهم مش هيوافقوا فبلاش احراج يعنى مش طالبة.
...............................................................
شباب محدش ينسى موضوع المجلة مستنياكوا كلكوا..
سلام

..........انجى ابراهيم............