اللهم اجعله خير

و اليكم آخر الأنباء
بعد اسبوع من انضمامى لفريق العمل فى مركز التواصل ..مستمتعة بالتجربة جدا..حاسة انى متواجدة بقوة..بحب شغلى أوى وبحب حلمى أوى..الفترة دى أنا متأكدة من تفاهة أى حد بيقول مستحيل نعمل حاجة..متأكدة من هيافة أى حد شايف ان الظروف ممكن تمنعنا نحقق أحلامنا..الفترة دى أنا مبسوووووووووطة.

على فكرة أنا نجحت كمان..أيوووووون أنا نجحت واتخرجت وجبت تقدير كمان..مش انجاز ولا حاجة الطبيعى ان الناس تنجح بس أنا مبسوطة..كان هيجيلى سكتة قلبية وأنا بشوف النتيجة من الخوف..السنة دى الامتحانات كانت من أسوأ فترات حياتى أو هى أسوأها على الاطلاق..السنة دى كان عندى ظروف شديدة السوء تمنعنى انى انجح او حتى ادخل الامتحان بس توفيق ربنا وحبه الغير مبرر لشخصى العبيط خلانى دخلت الامتحانات ونجحت كمان..شكرا يارب.

مجلة بص وطل الالكترونية بعتوا لى ايميل فرحنى أوى..الايميل كان بيقول انى لازم اروح استلم مستحقاتى المالية عن الموضوعات المنشورة عندهم..انا اسكندرانية كما هو معروف ومستحيل أسافر عشان استلم خمسين جنيه لأنى هصرف أكتر منهم بس الميل دة كيفنى بجد..حسسنى انى فخورة بنفسى أوى.

اسراء صاحبتى اتجوزت..وانا حضرت الفرح أوى..مفيش غلطة فى الجملة أنا فعلا حضرت أوى..كنت متواجدة فى الفرح بشدة..بغض النظر عن انى كنت طبعا أحلى واحدة فى الفرح..و أشيك واحدة فى الفرح..و ألطف واحدة فى الفرح..وووووكل الصفات التحفة بس اهم حاجة انى كنت مبسوطة أوى جدا خالص ..اسراء أخيرا اتجوزت أحمد وهتقرفه بقية حياته..اسراء ربنا هيكرمها أوى عشان اتحملت كتير ورضيت بالقليل..ربنا يسعدها.

أنا اشتركت فى مسابقة عيش وحلاوة الادبية الجديدة..المسابقة دى أسامة أمين هو اللى عرفنى عليها والمسابقة اللى فاتت كانت لطيفة أوى..المسابقة دى كمان لطيفة ويارب أكسب ولو ان المشاركات قوية جدا مما يدل على انى بلعب فى وسطهم أصلا ومفيش أمل..مش مهم بس انا مبسوطة يعنى انى معاهم وانى مشتركة فى المسابقة دى..ربنا يستر بقى والله نفسى أكسب.

علاقتى ببعض الناس باظت وبناس تانيين بقت ضعيفة او فاترة وبناس تالتين بقت حلوة أوى..اللى بيخسرونى هم أحرار..أنا شخص اعتقد انه كويس وخسارته هتأثر سلبا على اللى يخسروه لمدة اربع ثوانى وربع بعد كدة هينسوا..اللى علاقتهم بيا بقت فاترة هم أحرار أنا مش هكون تقيلة على حد وبرضو هما الخسرانين..اللى علاقتى بيهم قويت أنا فخورة ومبسوطة و بحبهم من أعمق حتة جوة قلبى.

ولكل ما سبق ذكره انا لايام دى بقول اللهم اجعله خير كتير لانى مصرية متعصبة ولأننا شعب لطيف ظريف كئيب لما بيضحك عنيه بتدمع ولما بيفرح بيخاف ولذلك..اللهم اجعله خير.