الأربعاء، 22 يوليو 2009

اللهم اجعله خير


و اليكم آخر الأنباء
بعد اسبوع من انضمامى لفريق العمل فى مركز التواصل ..مستمتعة بالتجربة جدا..حاسة انى متواجدة بقوة..بحب شغلى أوى وبحب حلمى أوى..الفترة دى أنا متأكدة من تفاهة أى حد بيقول مستحيل نعمل حاجة..متأكدة من هيافة أى حد شايف ان الظروف ممكن تمنعنا نحقق أحلامنا..الفترة دى أنا مبسوووووووووطة.

على فكرة أنا نجحت كمان..أيوووووون أنا نجحت واتخرجت وجبت تقدير كمان..مش انجاز ولا حاجة الطبيعى ان الناس تنجح بس أنا مبسوطة..كان هيجيلى سكتة قلبية وأنا بشوف النتيجة من الخوف..السنة دى الامتحانات كانت من أسوأ فترات حياتى أو هى أسوأها على الاطلاق..السنة دى كان عندى ظروف شديدة السوء تمنعنى انى انجح او حتى ادخل الامتحان بس توفيق ربنا وحبه الغير مبرر لشخصى العبيط خلانى دخلت الامتحانات ونجحت كمان..شكرا يارب.

مجلة بص وطل الالكترونية بعتوا لى ايميل فرحنى أوى..الايميل كان بيقول انى لازم اروح استلم مستحقاتى المالية عن الموضوعات المنشورة عندهم..انا اسكندرانية كما هو معروف ومستحيل أسافر عشان استلم خمسين جنيه لأنى هصرف أكتر منهم بس الميل دة كيفنى بجد..حسسنى انى فخورة بنفسى أوى.

اسراء صاحبتى اتجوزت..وانا حضرت الفرح أوى..مفيش غلطة فى الجملة أنا فعلا حضرت أوى..كنت متواجدة فى الفرح بشدة..بغض النظر عن انى كنت طبعا أحلى واحدة فى الفرح..و أشيك واحدة فى الفرح..و ألطف واحدة فى الفرح..وووووكل الصفات التحفة بس اهم حاجة انى كنت مبسوطة أوى جدا خالص ..اسراء أخيرا اتجوزت أحمد وهتقرفه بقية حياته..اسراء ربنا هيكرمها أوى عشان اتحملت كتير ورضيت بالقليل..ربنا يسعدها.

أنا اشتركت فى مسابقة عيش وحلاوة الادبية الجديدة..المسابقة دى أسامة أمين هو اللى عرفنى عليها والمسابقة اللى فاتت كانت لطيفة أوى..المسابقة دى كمان لطيفة ويارب أكسب ولو ان المشاركات قوية جدا مما يدل على انى بلعب فى وسطهم أصلا ومفيش أمل..مش مهم بس انا مبسوطة يعنى انى معاهم وانى مشتركة فى المسابقة دى..ربنا يستر بقى والله نفسى أكسب.

علاقتى ببعض الناس باظت وبناس تانيين بقت ضعيفة او فاترة وبناس تالتين بقت حلوة أوى..اللى بيخسرونى هم أحرار..أنا شخص اعتقد انه كويس وخسارته هتأثر سلبا على اللى يخسروه لمدة اربع ثوانى وربع بعد كدة هينسوا..اللى علاقتهم بيا بقت فاترة هم أحرار أنا مش هكون تقيلة على حد وبرضو هما الخسرانين..اللى علاقتى بيهم قويت أنا فخورة ومبسوطة و بحبهم من أعمق حتة جوة قلبى.

ولكل ما سبق ذكره انا لايام دى بقول اللهم اجعله خير كتير لانى مصرية متعصبة ولأننا شعب لطيف ظريف كئيب لما بيضحك عنيه بتدمع ولما بيفرح بيخاف ولذلك..اللهم اجعله خير.

هناك 31 تعليقًا:

VÖltaa يقول...

ياعينى
اللى يقرا كلامك قبل كده وكلامك دلوقتى
يعرف ان الفرحة بتنط من جواكى
وانك عديتى حوار الاكتئاب ده

ربنا يسعدك يا انجى

وان شاء الله تحققى كل احلامك

VÖltaa يقول...

وكمان اول تعليق
ده انا بعوض غيابى بقى على كده

VÖltaa يقول...

يلا بقى والتالت علشان خاطر النبى وسمعونا زغرووووووووطة

adel يقول...

/بروك علي النجاح و علي الشغل و علي الخمسين جنية اللي مش هيدخولوا جيبك و علي المسابقة اللي هتخديها ان شاء الله

مبروك علي صحبتك و عقبالك ان شاء الله

مبروك علي العلاقات الجديدة و هارد لك في اللي باظت

حمد الله علي السلامة لوك نت خفيتي خلاص

نعكشة يقول...

هوه دة الكلام
بجد قشطة قشطة قشطة

لأ و قشطة كمان إني أنا نفسي حالتي المعنوية منشكحة

لأ بجد فل

ماشاء الله
اقول اي اقول ا
ممممممممممممم


اة

مبارككككككككككككك عليكي
مبارك عشان مبروك يعني قاعد و مبرك في الارض
إنما مبارك يعني بركة و حركات و انا عايزة البركة

وليكن مش وقت فلفسة

عارفة لما تلاقي عينيكي بتجري في البوست و صوابعينك مش لاحقة تكتب
وو الكي بورد اصلاً معوق

مش هقول مبسوطة بس
عارفة لما تحسي شعور جواكي غير الانبساط
حاجة كدة زي الراحة
الانشكاح
الانشراح مش عارفة


يا رب شغلك دايماً يبقى في تطور
و كمان يا رب تبقي اديبة كبيرةةةةةةةةةةةةةةةةةةةةةة
قد كدهو
وش واحدة فاتحة ايدها و رافعت راسها فجأة للسقف و سمعت صوت طقطقت رقبتها

و كمان و كمان
تعملي كتاب عن وجهة نظرك في الحياة و ازاي تربوا عيالكوا و الفكرة السيكلوجية في التعاملات البشرية

ربنا رحيم قوي
الحمد لله
و الف مليون مبارك عالنجاح


انا قولتها قبل كدة
اصبري بس
ايوة دية وانا بدوس على سيب تعليق كنت بفكر فيها

ياااااااااااااااااا رب يا انجي يا بنت طنط امو انجي يرزقك بابن حلال كدة يسعدك دنيا و آخرة يعينك و تعينيه

ممكن ساعات صغنونة تتخانقوا شوية بس ترجعوا اصفى من لااول

يا رب رب فرحك يبقى قريب يااااااااااااا رب

ان شاء الله هتنجحي في المسابكة و تطلعي بالمركز الاول بلا منازع و تكسبي سنكوتش حلاوة طحينية بالفستق

اية كمان إية كمان
آه

سبحان الله النت كان فاصل و مكنتش ناوية افتح البتاعة و سبحان الله لاقيتني بدوس عالبتاع و بفتح عشان اقرا البتاعة قبل ما اسافر

لأ بجد تسلمي على هذه الجرعة
و تسلمي على هذا التوقيت
و ربنا يباركلك يارب و يبارك فيكي
و يحقق بيكي شيء من رفعة هذه الامة


بالنسبة لعلاقات لااشخاص مبعرفش افت فيها عشان آرائي فيها مبتعجبش حد :D

يا رب يخليلك كل حد بتحبيه و يفرح بيكي و تفرحي بيه
آمين
يااااااااااااااااا
رب

سلام عليكِ

نعكشة يقول...

اكتشفت إن كدة يعني مبسوطة
و اثار الانبساط لاتزال تكلل فمي

افتكرت حاجة حصلتلي زمان و بعد ما عملتها فضلت عاملة نفس الوش دة
.............
وش تاني بقة سنانة ظاهرة

طيب هسألك سؤال

ملوش علاقة بالموقف

معرفش ليه بحس جوايا إن فيه ناس ربنا بيحبهم

مش قصدي

يعني مثلاً فيه ناس أنا معرفهمش قوي قوي و أول ما بشوفهم شيء جوايا بيقولي اقولهم إن ربنا بيحبهم قوي و ان ابتلاءاتهم دية عشان ربنا بيحبههم

انا حسيت كدة معاكي

قولتلك إن ربنا بيحبك قبل كدة؟؟؟؟؟؟؟
مش فاكرة بس انا حاسة بكدة

يعني أنا تقريباً معرفش عن حياتك أي شيء سوى بعض الكلمات اللي بتكتبيها و حسيت بذلك حتى لما كنتِ بتيجي و انتي منبعجة

ناس تانية كدة كمان

تفتكري دة عشان انا عايزة ربنا يكون بيحبهم
ولا دية رسالة اصلاً وانا مليش دخل فيها و المفروض عليا اني ابلغ و خلاص
ولا دية هلاوس

أصل فعلاً بكتشف إن معظم الناس اللي بحس معاهم كدة بكتشف اني معرفش عن جواهم حاجة

أنا رخمة صح

خرجت نفسي من مود الانشكاح

طيب بالعند

وش منشكح و بيقولك عقبال يا رب بوستاتك الجاية تبقى مليانة فرحة بتنط من البوست كدهون

سلام يا قمر

سيبك من كلامي انا ساعات بهلوس

سلام عليكِ

صوت من مصر يقول...

يابنتى بحسدك والله

موناليزا يقول...

ربنا يسعد ايامك دايماً

غير معرف يقول...

هههههههههههههههه
استمتعى بالفرحة و متفكريش ان ممكن حاجة وحشة تيجى لأنها كدة كدةجاية لان الحياة مش فرح على طول..فبالتالى افرحى اوى اوى اوى لما تلاقى الفرحة و تفكريش فى حاجة تانية غير انك حتفرحى

مبروك لإسراء و عقبال ما نباركلك على المسابقة

عمرو يقول...

أهلا إنجي
يا رب على طول مبسوطة يا ستي. تعرفي أنا قلقت عليكي الفترة اللي فاتت. خفت تكوني مش هاتكتبي تاني أو تكوني مكتئبة ولا حاجة, خصاة بعض التعليق المكون من أربع كلمات اللي سيبتهولي في مدونتي, أصلك مش متعودة على كده خالص. بس الحمد لله أنا اطمنت النهاردة
هي إيه المسابقة دي بقى؟ أنا عايز أشترك
ما ليش دعوة
بس

غير معرف يقول...

دة احنا اللى ربنا فرجها علينا من الوش الجبس اللى كانت لابساهولنا طول الوقت .......بس دلوقتى بعد الانجاز العظيم اللى انا شخصيا بحسدها عليه انجى اصبحت (الليدى)انجى شكلا وموضوعا .يعنى بقت شايفة الى حد كبير ان الحياة لا باس مليانة ورد وفل و

اصبحت بتلبس جيبة حمرة واسعة ((حمرة وواسعة))

بالمناسبة نسيت اعرف نفسى انا الليدى اسراء اختها بس ملحوظة انا ليدى من الاول.....هع هع

Unknown يقول...

مبـــــــــــــروك النجاح
الف مبروك والف مبروك لكل الحاجات
الحلووووووووة اللى قلتيها دى بس
بجد فى رأيى المتواضع احلى حاجة نجاح
المذاكرة دى لها فرخة تانية!!:):)
فرخة اية بس؟ قصدى فرحة تانية :)

ريم وجيه يقول...

يارب يفرحك دايما يا قمراية
وان شاء الله ربنا هيجعله خير دايما ومقدمة لفرحة اكبر
مبروووووووك النجاح يا قمر
انا كمان نجحت ...تخيلى!!!
ياللا يارب اشوفك قريب يا قمر
ريم

مصعب رجب يقول...

ألف مبروك على النجاح
وعلى جواز صاحبتك (عقبالك بالمناسبة)
وربنا يعينك على تواصل
ومبروك برضو على الجواب بتاع المجلة
وممكن لو مش محتاجة الخمسين جنيه قوي يعني ممكن تتبرعي بيهم لأي غلبان (أنا مثلا ) :)

أخيرا : إن شاء الله تاخدي المركز الأول في المسابقة

ربنا يوفقك
سلام

كيكى عوووووو يقول...

كع كع كع بت يا اسراء والله عرفتك علطول من غير ماقرء امضتك وانا من هذا المزنق اضم صوتى لصوتك واسمع اغنية
نادااااااااااااله نادااااااااله
لست الكتكوتة انجى ع موضوع عيش وحلاوة وربنا يتمها عليكى ع خير وازورك بيهم قريب!!!
لم اشوف خلقتك

The illusionist يقول...

ربنا يديم افراحك دايما
البوست الفرحه بتنط منه
والله وصلت ان الواحد بقى قاعد فرحان
بسم الله ماشاء الله
مشوفتش حد بيتكلم عن حاجات حلوه وفيها فرح وزقططه بالشكل ده
هتتحسدى على فكره خلى بالك
وربنا يعينك على الشغل
وتفضلى فرحانه دويما

غير معرف يقول...

وانا كمان مبسوطه اوي عشان انتي مبسوطه :)
ومبروووووووك عالنجاح ويارب تحققي كل اللي بتتمنيه :)

حلو انك تشتركي في مسابقه .. مش مهم تكسبي، المهم تحققي حاجه .. وحلو اوي ان مجله تبعتلك .. مش مهم تروحي تاخدي الفلوس بس احساسك بالنجاح في حد ذاته يكفي ..

نسيت اقولك
مبروووووك لاسراء :)



معلش كان بقالي كتير مش باجي .. كان في ظروف كتير :)

تحياتي

كراكيب يقول...

جوجااااااااااااا
انا عايزاكي تكسبي في عيش وحلاوة بقى علشان تييييييييجي
وعموووووووووما انا عارفة اني منافس قوي
علشان كدة قررت انسحب
وده بجد وجداني على فكرة مش هزار انا فعلا هنسحب من عيش وحلاوة
المهم بقى عقبال يا اوختشي لما تتجوزي زي صاحبتك وتقرفي عريسك طول حياتكو سوا برده
ومبروك النجاح يا جوووووجا
وينفع اروح انا اخد الخمسين جنيه دي بدالك؟؟؟
:)

اممممممواااااااااااه

miro el niro kwaniro

أبو العريف يقول...

اولا مبروك النجااااح

ومبروك لاسراء
واكيد طبعا كنت احلي واحده
واجمل واحده
والطف واحده

ايه هو محدش راح غيرك ولا ايه
( وش بيلعب حواجبه )


اما بقي بالنسبه للخمسين جنيه بتوع مجلة بص وطل
انت ممكن تعمليلي توكيل
مش هيتكلف اكتر من تما نين تسعين جنيه
وانا لما ارجع مصر ان شاء الله بعد كام شهر كده
ابقي اصرفهم

شريكة في المطعم يقول...

الف الف مبروك على النجاح
وعلى كل الأخبار الحلوة دي
وربنا يسعدك دايما

micheal يقول...

حمد الله ع السلامة وألف مبروووووك للنجاح وبالتوفيق في المسابقة ومبروك لاسراء
:)
صدقيني مفيش أحلي من ان الانسان يعمل شغلانة هو مقتنع بها
عقبالي يا رب
:)
تحياتي

نعكشة يقول...

ونامت رابعة

كان الله في عونك يا بنتي

بس ابقي قولي إنك لسة عايشة في المنطقة

سلام عليكِ

غير معرف يقول...

ألف مليون مبرووووووووووووك علي كل حاجة قولتيها في البوست يا ليدي إنجي وعقبل ما نفرح بيكي زي إسراء عن قريب إن شاءالله .كلامك مزأطط ؛ الفرحة بتفط منه ... ربنا يسعد أيامك يا إنجي
مش عارفه ليه يا ليدي لما بنفرح أوي بنخاف أوي!!؟؟ جايز لإننا مش واخدين علي الفرحة لما بتيجي مرة واحدة!!!عموما اللهم إجعله خير عشان إنتي تستاهلي كل خير ؛؛
ديدي

shicooo يقول...

مبرووووووووووووووووووووووووووووووووووووووووووووووووووووووك

عقبالى يارب



مبروووووووووووووووووووووووووووك
على الفرح

وعقبالى برده يارب

:))

سقراط يقول...

انجي
العزيزة قوي جدا خالص مالص
ان شاء الله خير
من غير ذكر اسامي
مبروووك على كل الحجات الحلوة
النجاح
..
ايميل بص وطل
..
فرح اسراء واحمد
..
اشتراكك فى المسابقة وقريب جدا -ان شاء الله- يبقي فوزك فيها كمان
..
انت فعلا عندك حق تخافي
بس ماتخليش خوفك يلغوش على فرحتك
وربنا يفرحك كمان وكمان

Zika يقول...

طب انا اقولك مبروك علي ايه ولا ايه
مبروك فور اال
:D
انا كمان مشترك في مسابقة عيش وحلاوه انت داخله في قسم ايه قولي اعترفي

dina يقول...

لا لييييييييه القفلة دى....ان شاء الله كل خير...انا مبسوطة ان الناس اللى عارفة تتبسط بحياتها دى لسا منقرضتش و الله...ربنا يوفقك و يسعدك كمااااااااان و كمان

Darsh يقول...

أنا بقالي كتير قوي مولود و ما فكرتش اشتغل ابدا عمل تطوعي

بس من أمبارح قررت أغير رأيي

لأن لقيت ان ناس محتاجه نساعدهم مش ماديا بس و لكن الاهم معنويا

انا بحييكي و ما تسمعيش لأي حد يسخر من مجهودك

مبروك النجاح:)

هبة خميس يقول...

على فكرة انا حاسة انك بتكتبي البوست و انتي بتضحكي
عالعموم الف مبروك و ان شاء الله تكسبي
انا اديتك درجة حلوة على فكرة
تصدقي انا كمان مشتركة بس مكملتش تعليقات لاني عايزة انسحب
و انا كمان بص و طل بعتتلي عشان ليا 50 جنيه بحالهم
لو فكرتي تروحي انا معاكي
الف مبروك عالنجاح
انا برضه نجحت
:)
تحياتي

yasmina يقول...

السلام عليكم . انا اسفة من التدخل المفاجىء دة بدون استئذان بس والله العنوان عجبنى وقلت اشوف الموضوع الجميل دة وبجد احلى حاجة فى حياتك انها حقيقى بسيطة . مش بحسد والله ربنا يسعدك. اتمنى انك تقبلى مرورى وتنورينى كمان فى اى وقت .

yasmina يقول...

اه صحيح الف مبروك على النجاح والتقدير كمان . و ادعيلنا بقى