الاثنين، 10 أغسطس 2009

أنا؟؟؟؟؟


أنا ؟؟ أنا أصحو كل يوم بمود ومزاج مختلفين..يوم أنا محلقة وأشعر بامتنان لوجودى هنا على الكوكب..ويوم أخر – ربما اليوم التالى مباشرة – أنا لا اشعر بانتمائى لتلك الحياة من الأصل..

أنا؟؟؟ أنا تفرق معى جدا ان اصادف اشخاص لطفاء لا اعرفهم..افرح عندما يقول لى احدهم وانا احاول النزول من الاتوبيس(امسكى كويس)او عندما يقف سائق السيارة النقل ويقول(والله لانتى معدية الاول)او عندما تقول لى احداهن( والله انتى عسل)

أنا؟؟ أنا لا تخلو حقيبتى غالبا من سكاكر بطعم النعناع واخرى بنكهة القهوة – بونبوناية بالقهواية سولا سولا- وافرح عندما يطلب منى احد اصدقائى أن (هاتى واحدة من الفراولة اللى معاكى) رغم انها ليست بطعم الفروالة اصلا..

أنا؟؟ أنا أصرح بحبى الشديد لدكتور احمد خالد توفيق ناعتة اياه بأنه (الحتة الجوانية) أو فى احسن الاحوال الكونت..

أنا؟؟ أنا أقرأ لمحمد هشام عبية واشجعه كأننى اعرفه شخصيا ولا استطعم كتابات عمر طاهر واختنق من خفة دم اشرف توفيق..أحب حماس حسام مصطفى ابراهيم ولم انتمى يوما لجمهورية خالد كساب..اتابع بص وطل واحب بلال فضل حب شخصى واعشق طلة منى الشاذلى واحب ضحكتها عندما تضيق عيناها وتقول تحياتى..أعشق نوارة نجم وارى انها التطور الطبيعى للحاجة الراقية..اشجع معتز الدمرداش واطالبه ان يخفف من جرعة الظرف اليومية وانجذب لمحمود سعد وانحنى احتراما لرولا خرسا واتعاطف مع خيرى رمضان..اشعر بسذاجة اهداف احمد عبدون وغيرت نظرتى تجاه محمد سعيد ولا اطيق اسامة منير..
وأرى ان تامر امين ليس هو احلى اختراع بعد المارون جلاسيه كما يعتقد..

أنا؟؟ أنا أحب اللون الازرق ومناديل ايزى كير برائحة النعناع وحافظات الجيب الرجالى وميداليات المفاتيح الرجالى ايضا ..اعشق الفضة واتمنى شراء دبلة فضة – بس واسعين اوى – اشترى الكراسات باشكال وانواع مختلفة حتى اذا لم استخدمها..احب هاتفى المحمول حب هستيرى وامتن للعوينات وحقيبتى اكبر حقيبة يد عرفتها البشرية..

أنا؟؟ أنا أحب يوسف – حالتى فى المركز الذى اعمل به – واحافظ عليه وانهره والعب معه واحلم به ليلا واستقبله بحضن هاتفة (أووووووووووسو) ملحوظة:لم اكن هكذا ابدا تجاه الاطفال ويبدو اننى تغيرت او اتغير بسرعة فائقة..

أنا؟؟؟ أنا أشتاق من لا يشتاقوننى واحافظ على بشر لا يستحقونى فى حياتهم..أنا افى بوعودى وذاكرتى حديدية تجاه وعود الناس لى وابذل اقصى مجهود استطيعه كى اجعل من احبهم سعداء..ولكنى افشل بجدارة..

أنا؟؟ أنا ارفع مستوى توقعاتى تجاه البشر..ودائما اتعرض للخذلان..ليست غلطتهم فالتوقعات هى اكثر الطرق عبقرية كى يسقط الناس من نظرى ولكنى لا استطيع ان اتصرف بطريقة افضل..

أنا؟؟ أنا احتفظ بكم هائل من الاشياء تحت الوسادة وارى انه انسب مكان للاحتفاظ بأى شىء فى الدنيا..لا داعى لقول اننى فوضوية جدا..

أنا؟؟أنا لا اشعر بالشبع الا من طعام أمى مهما كان نوع الطعام ومدى فخامته..أستطيع الطهو ولكنى لا اتناول ما اطهوه اذ اننى اشعر انه بلا طعم ولا ملامح رغم انهم يقولون غير ذلك..لا داعى لقول اننى لا اطهو الا كل فين وفين واننى-فى الغالب- نسيت مبادىء اعداد الفول..

أنا؟؟ أنا انفق الاموال بلا عقل..بصرف الفلوس بهبل..وافضل طريقة كى اوفر اى اموال هى الا احصل عليها اصلا..لا اطلب نقود فى الغالب لكن ما ان تتوفر حتى اعود خالية الوفاض مستريحة الضمير..بمعنى آخر(وانا ويايا بعيييييييش زى المليونيرات واحلم وانا معييش ملعنش الازمات)

أنا؟؟ أنا لا احد يعرفنى ولا احد يهتم بمعرفتى حقا..لا أحد هذا شخص فى منتهى اللطف..فكر فيها انت بقى..

أنا؟؟ أنا ملكة القرارات السريعة والهوجائية..متسربعة دوما – متسربعة وليست متسرعة- استطيع ان اهدم اجدعها خطة بتصرف احمق واحد وعبقرية فى ترك انطباع خاطىء لدى من يعرفنى..

أنا ؟؟ أنا مؤخرا اعانى عسرا فى ترجمة الحروف داخل خلايا مخى..اقرأ الكلمة واحاول بفهلوة ان استنبط معناها من شكلها العام ثم اكتشف لا منطقية الجملة فادقق واقرأ الاصل ودائما ما يكون ابعد احتمال عما قرأته..على سبيل المثال..سوبر ماركت زمزم توصيل الطلبات للمنازل قرأتها أنا مدرسة المنار توصيل الطالبات للمنازل..وهناك أيضا ديتول حماية افضل من الجراثيم قرأتها انا ديتول حملة لافضل الجراثيم..وغيرها الكثير..

أنا؟؟؟ عدوانية جدا فى رأى الجميع..ولكن الحمقى لا يعرفون الحقيقة..حسنا انا لا يهمنى ان يعرفوها أصلا..

أنا؟؟ أنا أحتفظ باحلام كثيرة رومانسية للغاية وعاطفية جدا..ربما بدأت تتعرض للصدأ مؤخرا ولكنى اشعر مؤخرا بالتفاؤل..شعور لا مبرر له على الاطلاق ولكنى احاول..
أنا؟؟ أنا عندما امتلك قطة سوف اسميها براكسا وعندما امتلك كلب سوف اسميه انكيوبوس..وعندما امتلك طفلة سوف أجعلها كارمن..

أنا؟؟ أنا فى حاجة لجهاز مكيف يعمل بأقصى طاقة له وكنبة مريحة..وتفاصيل اخرى لن احكيها..

أنا ؟؟ أنا اعتبر الكتابة نصف ربيع الاخر..عفوا..نصف حياتى الاخر..والعلاج النفسى نصفها الاول..عاجزة انا عن اكمال ايا من النصفين الى الآن..

أنا؟؟؟ أنا لا احتفظ لمراهقتى الا بذكريات فى منتهى السوء..لا استطيع ان انسى اى ذكرى سخيفة..اشعر بمرارتها فى حلقى ..كل كلمة وجع اذكرها واذكر مناسبتها وووو..مبلاش نتكلم فى الماضى..

أنا؟؟ اسامح بسهولة ولكنى لا انسى اطلاقا..قساوة او سواد قلب..ربما ولكنى لا استطيع التصرف بطريقة افضل..

أنا؟؟ أنا اتمنى ان اتعلم الرسم..يسيطر على الهاجس بشدة واتمنى حقا ان انفذه..منبهرة أنا بقدرة قلم برىء على خلق كون آخر على ورقة بيضاء..

أنا؟؟ أنا لا اكمل اى دواء لنهايته ومعدتى مريضة مرض مزمن..أكره الألم و أدمن الفولتارين..يذكرنى الأمر بعشقى للبرفانات الرجالى..كما ترى فالرابط قوى بين الموضوعين..

أنا؟؟ أنا اعشق شارع بورسعيد واتنفس وانا مبتسمة فى شارع فؤاد واحفظ كل حجر فى المنشية واحب شارع ابوقير ولكنى اتمنى ان اراه مرة ­واحدة فقط سالك وماشى حلاوة قبل ما اموت..مش كتير على ربنا..

أنا؟؟ أنا اصاب بالدوار عندما اقرأ فى المواصلات..واحب الركوب بجانب الشباك واركب بجانب السائق كى اشعر اننى فى لعبة فيديو جيم..اعشق الترام واحب ان استقل الدور العلوى ان امكن..امقت عربة السيدات ولا اركبها فى الغالب..

أنا؟؟ أنا امقت ذوى السراويل القصيرة ومن يقلن اخواتى..أبغض اى معتوهة تسمع اسمى فتقول..تؤ تؤ تؤ ايه الاسم دة؟؟ دة اسم اعجمى...ومن موقعى هذا احب ان اقول لهم..طير انت..

أنا؟؟ أنا لا اندمج بسهولة ودائما ما اوجد فى المكان والزمان الخطأ..غلطتى اعرف ولكنى كالعادة لا استطيع التصرف بطريقة افضل..
أنا؟؟ أنا اتمنى ارتداء سارى هندى وثياب فرعونية وبدلة تشبه البدل الرجالى وملابس رياضية وفساتين سواريه..كل يوم اروح الشغل بحاجة منهم..

أنا؟؟ أنا امتلك الكثير من المشاريع المؤجلة..لا اعرف لأى مدى..

أنا؟؟ أنا لست تلك الشخصية اللطيفة التى من المحتمل ان تستشفها من الموضوع..دة بجد مش هزار..حسنا انا غير مسؤولة عن اى انطباعات خاطئة..ببساطة انا لم اخدعك..



أنا؟؟ أنا انجى ابراهيم..


..........انجى ابراهيم...........

هناك 47 تعليقًا:

عمرو يقول...

أنا؟؟؟؟؟
أنا أول واحد يعلق
راجعلك تاني
:)

عمرو يقول...

قوليلي يا إنجي..
بعد وابل الجمل دي, تفتكري مين ممكن يقول إيه. أنا منبهر بقدرتك على التعبير عن نفسك بصراحة. الكلام اللي قلتيه حتى الجمل المتفاءلة فيه تحمل ألم كبير.

أنا أجلس الآن على كرسي يشبه كرسي القيادة وأود أن أرسم ابتسامة على شفتيك لذا أقولها لك بصوت عال "والله لانتي معدية الأول" (ابتسمتي؟)

أغلب الأسماء اللي قلتيها شخصيات لا أعرف عنها غير الأسماء فقط.. أنا منعزل للغاية عن العالم وأدعوكي إلى الإنعزال معي
ههههه
أعتقد أن البشر الذين لا يستحقونك لا يدخلون إلى مدونتك وإلا لعرفوا أنك إنسانة تحمل الكثير من القيمة يا إنجي. معلش مسيرهم يعرفوا.
أغلب الأشياء الأخرى التي قلتيها تشتركين فيها مع أغلب المبدعين. بعضها أتى لأنك أنثى جداً (من الناحية النفسية عشان ما أتفهمش غلط) وتتطلب منك هذه الأنوثة صفات معينة في الوقت الذي تريدين فيه الإنطلاق والثورة.
كلنا لدينا مشاريع مؤجلة.. كلمة في سرك أصبحت أغلب مشاريعي ملغاة
:)

أنت ظاهرة جبارة تملأ الكون بالبهجة يا إنجي. أنت خليط نادر الوجود.

بس أنا برضه أول واحد يعلق
:)

أحمد الشمسي يقول...

ده ظلم، أنا كنت أول واحد داخل والأخده حجز مكان قبلي، الكلام ده مش نافع!

البوست ده فظيييع والله العظيم فظيع، هحاول أقاوم شعور اني اعمل واحد زيه، وعلى فكرة بقى، ادمان الفولتارين في حد ذاته سبب قوي لمرض معدتك المزمن اللي بتقولي عليه، مش عارف هنفضل نعالج فيكم لحد امتى؟ :)

أحمد الشمسي يقول...

نسيت اقول اني:

- متفق معاكي في أسامي كتير انتي قلتيها، بحب محمود سعد وبشجع هشام عبيه، لكن ده ما يمنعش ان عمر طاهر ليه مقالات حلوة في الدستور حاليا، ممكن نبقى نبعت بعض وصلات لعمرو عشان نزود مخزونه الثقافي.

- أحمد خالد توفيق لسبب ما خفي مش قادر أتعاطف أبدا مع ما يكتبه! وإن كنت قرأت له مقالا عبقريا منذ مدة لكنني لم أكرر التجربة... هو عيب في على أي حال.

- بفهم جدا انبساطك من التعامل الراقي، الزوق ده اختفى خلاص، اننا نلاقيه ده بيدي أمل في بكره أحسن.

- ملاحظ انك دايما بتصري على انك لا يمكنك التصرف بطريقة أفضل، وده بيفكرني بواحد صاحبي انتي تعرفيه، طالما عرفتي العيب يبقى ابسط حاجة ما تبنيش عليه مواقف، يعني مثلا ما فيش داعي انك تزعلي من شخص تصرف على غير توقعك طالما انتي عارفه انك انتي اللي رفعتي مستوى توقعاتك.

- فترة المراهقة لم أمر بها، تصوري؟! تقريبا عدت عليا وانا بذاكر وما كنتش فاضي، وزعلان من ده جدا

- كفاية كده طولنا عليكي

Unknown يقول...

عمرو:انت؟؟؟ انت رائع والله العظيم يا عمرو باشا...

يا فندم انت اول واحد تعلق واول واحد يخلينى ارتبط بكلامه بالطريقة دى...نسيت اقول انى مدمنة لكلامك نفس ذات ادمانى للفولتارين بالظبط..نياااااااهاهاااا يعنى حسب كلام احمد الشمسى انت بتوجع المعدة..


انت منبهر يا عمرو؟؟طب خلى واحد غيرك يقول كدة والله دة كتير عليا بجد..

على فكرة ابتسمت فعلا..ميرسى كابتن عمرو انك خلتنى اعدى الاول فعلا الشمس هنا حارقة وانا مش عايزة اقف كتير نياااااااااهاهاهاااااا

الاسماء اللى قلتها مش بتابعها الا بالصدفة البحتة وانا معدية من ميدان الصالة مثلا بس اصل مامى متابعة الناس دى فانا بشوفهم كتير..بس ساعات بتفرج عليهم عمدا على سبيل تعذيب الذات..

البشر الذين لا يستحقوننى..هما اه مش بييجوا..بس انا مش بحمل الكثير من القيمة ولا حاجة ومع ذلك هما فعلا بيخذلونى..تفتكر ليه؟؟ مش معقول يكونوا وحشين للدرجة دى يعنى..

عن الانوثة..دة جانب محدش بيعرفه اصلا..ومفتكرش ناس كتير هيعرفوه..على فكرة فى واحد صاحبى بيقولى انتى يا انجى واحد صاحبى وبشنب كمان..

المدح الكتير اللى انت قلته انا على يقين انى مستحقهوش..انت مقريتش اخر سطرين وللا ايه؟؟

ان خلص الفول انا مش مسؤول..معرفش ليه الجملة دى جت على دماغى دلوقتى..انا بقيت بهلوس جامد اوى على فكرة

اقعد بالعافية

Unknown يقول...

احمد الشمسى: النبى ما يتعب نفسه اكنه جه وزيادة..الجملة دى قالها هانى رمزى فى فيلم جواز بقرار جمهورى ومعرفش ليه افتكرتها دلوقتى لما قلت انك المفروض تكون اول تعليق..

حاسة انى هيجيلى سكتة قلبية..عمرو السيد يتبعه احمد الشمسى الاتنين ورا بعض واول تعليقين؟؟

اه اه قلبى قلبى..بجد انا مبسوطة جدا اوى خالص يعنى..

البوست دة مش فظيع بس انت اللى متعاطف معايا..على فكرة الفولتارين مكنتش اعرف انه سبب رئيسى بس بجد مينفعش انى استغنى عنه طب اعمل ايه من غيره ممكن افيص..

بالنسبة لتعاطفك مع محمد هشام فيختى كميلة والله عسل عسل وبحبه موت..عمر طاهر بيكتب اه مقالات عليها القيمة شوية من ساعة ما بقى بيكتب يوم التلات..هو فعلا محتاج يزود ثقافته الى حد ما..

احمد خالد توفيق..طب جرب معلش..اقرا مقاله يوم التلات وحاول..هتحبه اكيد..

اصر على انى لا استطيع التصرف بطريقة افضل لان هو دة الواقع فعلا..هحاول بس كل مرة بفشل معرفش ليه..يمكن لقصور فى دماغى؟؟ لا هو اكيد لقصور فى دماغى..

فترة المراهقة عدت عليك وانت بتذاكر عشان كدة دخلت طب لكن انا يععععععععععععع خريجة اداب نيااااهاهاهااااااا

احسن انها عدت وانت مش واخد بالك..لما يبقى عندك ولاد حاول تساعدهم فى الفترة دى ارجوك..بتسيب ندوب فى الروح..ندوب فى الروح؟؟؟ ايه الكلام الكبير دة؟؟

فكك يا عم انت منور والنعمة الشريفة

نعكشة يقول...

مكملتش قراية البتاع

رخمة
ميهمش

اكيد فضولي هيخليني أكمله بعدين

حسيت فجأة إن قلبي انقبض بعد ما ضحكت من الحتة بتاعت الجراثيم ضحكة متوقعتش إن المقال يضحكني أصلاً


أعتبريني مغرورة او أي شيء ولكن لا أشعر بالارتياح عندما أقرأ كلماتي على صفحات غيري

أو بمعنى أصح
احس إن اللي قدامي شبهي او أنا اللي شبهه
متفرقش معايا كتير

مبحسش اني مرتاحة برضو

رغم إني في بداية المقال محستش بدة

بصي
هوه أنا رخمة فعلاً

بس أنا جوايا كلام بالهبل
و مش قادرة أطلع ولا كلمة

...............
ششششششششششششششششششششششششش

هبدأ من الاول

مزاج .. أنا مثله يمكن أنا مزاجي بيختلف من لحظة و التانية مش يوم و التاني

تاني بتاعة .. وانا كمان
هتزهقي من وانا كمان على فكرة

السكاكر .. وانا كمان بس مش شرط بالقهوة .. أي نوع
و عندي حب فظيع إني اشتري بمبوني بالهبل الصبح يوم الامتحان و أوزعة عالعيال

احمد خالد توفيق و كمية الموزيعين اللي تحت
مش وانا كمان لإني مبقراش لأحمد خالد توفيق ولا بحب اتفرج على التلفوز

بعشق الفضة و بموت في الاسود و بحب نظارتي و بحب جداً اروح المكتبة و اشتري اي حاجة كراريس اقلام اي بطيخ

انا كنت بكرة الاطفال و كان شعاري الاوحد إن لو ابني عيط هرمية من الشباك
ولما أختي خلفت من شهر تقريباً طول النهار شايلة ابنها و ببوس فيه و بحضنه

مفهمتش حركة التوقعات و دماغي مش قادرة تشتغل عشان تفهم

انا بحب احتفظ بأي حاجة في أي حتة و فوضوية بطريقة بشعة بس بكرة جداً الفوضى و مبعرفش اركز في مكان مش نظيف

الشبع و الاكل و الطعام : مبيفرقش معايا لااكل المهم الناس اللي بياكلوا معايا
و مبعرفش اطبخ الاكل التقليدي و بحب دايماً افتكس

مبذرة بطريقة مؤرفة

أنا معرفش نفسي أصلاً يمكن الناس تعرفني بس هذا مبيأثرش فيا و مبهتمش اعرف اذا يعرفوني أو لأ

برغم ان عندي فضول فظيع إني اعرف الناس شايفاني ازاي بس انا مبحبش اسأل

قراراتي عشوائية جداً ولا اعتقد اني بفكر من أساسه

مبعرفش اكون جمل و مبعرفش اتكلم و بتهته في الكلام و عندي مشاكل في تكوين الجمل

عدوانية و انا اعترف بذلك

يمكن فيا جزء رومانسي اكتشفته مؤخراً رغم إني كنت موقنة إني معنديش مشاعر ولا أحاسيس ولازلت

نفسي في قطة و كلب فعلاً بس هسميهم إية مفكرتش

مش فاكرة اي حاجة من الماضي إلا مواقف تكاد تكون منعدمة

نفسي اتعلم الرسم جداً و خصوصاً الرسم بالزيت
و نفسي اتعلم فوتو شوب


مبحبش الادوية من لاساس .. ممكن اشتريها فعلاً بس مباخدش إلا اول قرصين و خلاص

بسامح سهل و بنسى بفظاعة ولكن يبقى في قلبي شيء معرفش اية هوه بس نادراً ما بفتكر حاجة لحد
ولو زعلت من حد جداً ممكن اكون زعلانة وانا مش فاكرة اصلاً إية سبب الزعل
فبنسى اني زعلانة

مبطيقش الحر بس اتعودت عليه مؤخراً

معرفش اسم اي شارع في اسنكدري اصلاً

بيجيلي غممان نفس لما بقرأ في المواصلات
وبحب جداً اقعد جمب الشباك و احط راسي برة و اسيب اللي يسوق يسوق
بس نفسي جداً اخد رخصة عشان اسوق بسرعة عالية
و في مرة اتخبط في اي حاجة و نخلص


البناطيل الضيقة .. مبتفرقش معايا بس ساعات بحس بالتقزز

الاندماج .. على حسب المود .. بس مش وانا كمان .. انا سريعة الاندماج لو انا عايزة


الملابس .. بموت في اللبس أصلاً . و خصوصاً الملابس الرجالي
ولولا انه حرام كنت لبست بنطلون و تيشيرتات و قمصان في حياتي
بحب الفساتين السوارية جداً

ساعات بحب الجيبات الجينز القصيرة وي وي
يلا في الجنة بقة

دة إذا دخلتها

يلا ولا دنيا ولا آخرة

احسن

مفهمتش اي حاجة في الاخر

...


لاحظت إني قريت البتاع للآخر ايوة

معوقة

اعلم ذلك جيداً

لسة فيه جوايا حاجات بالهبل

مش قادرة اقولها
مش عشان مش عايزة اقولها
بس
شعور بشع إني مليش نفس اعمل حاجة

يلا بلا بتاع

سلام عليكِ

Darsh يقول...

وأرى ان تامر امين ليس هو احلى اختراع بعد المارون جلاسيه كما يعتقد..

------------------

معااااااااااكي جدا

بس هو على فكرة افظع اختراع بعد الغرور جلاسية

حاجة تخنق بجد تامر ده انا زهقت منه

باين كل اللي اسمهم تامر كده!!!

إن كان تامر حسني او تامر امين :(

Unknown يقول...

انا بحب شارع فؤاد برده وكان نفسي ابقي موظف خمسيني في شركه قطاع عام واخده الدور التاني في اي عماره قديمه فيه
شارع بورسعيد هو اسكندريه الكوزموبوليتانيه اما ابوقير فهو نوستالجيا المدينه
بوست لذيذ تحياتي

كيكى عوووووو يقول...

دى أنا دلوقتى قلبا وقالبا!!!!!
أنا ؟؟ أنا أصحو كل يوم بمود ومزاج مختلفين..يوم أنا محلقة وأشعر بامتنان لوجودى هنا على الكوكب..ويوم أخر – ربما اليوم التالى مباشرة – أنا لا اشعر بانتمائى لتلك الحياة من الأصل
**********************
واود ان اقتل تلك المسمى ب**انا!!!

هبة خميس يقول...

ليه كدة بس يا انجي
الموضوع زعلني
يمكن لاني كل ما كنت بقرا انا
كنت بكملها من نفسي او بقارن
انا بقى هعمل واحد زيه فعلا
لانه عجبني قوي
تتكلمي عن نفسك كدة و بكل صراحة
حتى العيوب
دي حاجة جميلى
بجد خليتيني اتابعه من اوله لاخره
تحياتي

Eslam Eldosoky يقول...

أحم
أنتي
أنتي بنت مصرية بمعني الكلمة
وعشان ترتاحي من هواجس الرجال وبرفاناتهم وبدلهم ومحافظهم
أنتي بنت بعشر رجالة :)

موضوع من القلب مكتوب
بإنفعال وعواطف إنسانة بجد
ميهمكيش من أي حاجه
جمدي قلبك ودوسي
يكفي أنكِ أنجي إبراهيم

إحترامي

السنونو يقول...

يا إنجى أول مرة اقرألك وبعد ما أخلص أحس إنى عاوزة أحضنك زى بنتى
على الرغم إنه معدنيش ولاد هههههههههه
أعترضت على كلمةواحدة بس
لا تملكى طفلتك بل احتويها
الباقى كله مقدور عليه
و الواحد بيحاول يتغير ازاى أعتقد أن أى إنسان طبيعى وسوى مشاعره هترقى كلما رقى فكره وفكره هيرقى كلما رقت مشاعره
علشان كده متحاوليش هتلاقى نفسط طبيعى جدا متجهه للأفضل ليكى طبعا مش لأى حد تانى

Unknown يقول...

نعكشة: براحتك يا فندم كملتيه مكملتيهوش دة حقك الدستورى طبعا..

امممممممم..اعتقد انك مبتحبيش حد يكون شبهك عشان بتتخيلى انه عارفك كويس من جوة لانكوا زى بعض عشان كدة بتحسى دة...او ممكن لا الله اعلى واعلم..

كل اللى قلتيه وانا كمان معاكى فيه..التوقعات ببساطة انى اتوقع مثلا انى لما اموت انتى هيجيلك انهيار عصبى..فاموت وانتى تسمعى الخبر وتقولى معقول ماتت؟؟ الله يرحمها المهم هنتغدى ايه...فانا ازعل منك بقى..ايون عديها هزعل منك بعد ما اموت..مع الفارق يعنى بس دة المثال اللى جاى على دماغى دلوقتى..

البنطلونات الضيقة للاسف مش دى اللى كنت اقصدها انا كان قصدى الرجال اللى بيقصروا بنطلوناتهم كمظهر من مظاهر التدين..مبحبهمش..

تعليقك من الاسباب المهمة اللى بتخلينى انزل بوست عشان تيجى وتعلقى عشان بتوحشينى

سلام

Unknown يقول...

درش: اممممممممممممم تامر حسنى دة عسل عسل عسل يخربيت اللذاذة..منور......


شمعون:منور وابقى تعالى كتير..اسكندرية دى حبيبتى......


كيكى:تقتليها ليييييييييييييه يا جبارة يا مفترية..فينك يا بت وحشانى....


هبة خميس:بلدياتى..الحمد لله انه عجبك نورتى.........


اسلام الدسوقى:ربنا يكرمك..انا اه بميت راجل طبعا..بتاع مية وخمسين كمان....


السنونو:ليه هو انا رقيقة كدة؟؟ وبعدين على فكرة مبعرفش اسيب حد يحضننى بتخشب كدة ومبريحش اى واحدة صاحبتى تحاول يعنى..حاضر هحتويها دة لو جت يعنى....نورتى والله

أبو العريف يقول...

البوست ده بيقول

انك حد حلوو قوي

كلم ما اقرالك حاجه احترامي ليكي بيزيد

تحياتي

R-H-S يقول...

التفنيطه اللي انتي فنطيها بتاعها الناس اللي في البرامج الحواريه دي ملهاش حل بالذات مني الشاذلي لما تغمض عينيها

واسلوب الكتابه جامد وجميل جداا
اما اروح اقرا المدونه من اولها بقي

تحياتي

adel يقول...

اصحو مثلك كل يوم بحال

اي شخص بيفرق معاه الكلمة الحلوة خصوصا لو حد منعرفوش

ما احلي السكاكر (جبتي الكلمة دي منين)
هههههههههههه

بحب احمد خالد بس اكيد مش الجوانية و احتمال اشوفه التلات اللي جاي مش بكرة اللي بعده

بحب بلال فضل و مبحبش عمر طاهر دايما بس فين اسمي ؟؟

بعشق الازرق قوي

انا عاشق للاطفال اكثر من نفسي

ده شعور نبيل

ده شئ اكييييييد

لا احب اي شئ تحت المخدة

انا عاشق للفاسا فووووود (الاكل السريع) بيجري يعني

انا فعلا بمشي بنظرية وانا ويايا بعيش زي المليونيرات دي

انا اسمي الحقيقي (لا اخد)

يا حمقاء :):)

خليك انت للترجمة الصيني يامسعود

عدوانية عدوانية المهم رأيك في نفسك

ما احلي الاحلام

انا نفسي اسمي كارمن لاني بحب الاسم ده قوي ....مبحبش القطط و بعشق الكلاب و لو جبت كلب (مش هاقولك الاسم عشان السرقة) .... عاجبني براكسا ده
يامفترية

ياسلام انا عاوز نفس التفاصيل

انا بحب الكتابة و نفسي اتعالج نفسيا

كل ذكريات الطفولة مصائب هههههه

انا اساسا اعاني من الزهايمر حتي لو شلت من حد بنسي الحد نفسه
هههههههههههه

كنت اتمني التعبير بالقلم كراسم ولني فشلت

اكرة الدوا و الاطباء بشكل مرضي (مش النفسيين)

اعشق القاهرة عفوا

نفس الاحساس بس انا بركب عربية الرجالة لاني منفعش اشاسا اركب مع الستات

ماشي يابهيج ...

صباح الدماغ بجد :)

انا مؤجل كل شئ حتي حياتي

انا لم انخدع بعد

انا من مؤيدي انجي ابراهيم :)

حسام غانم يقول...

على أقرب دار نشر يا بنتي

ريم وجيه يقول...

اولا وحشتينى - ازاى ما اعرفش !!-
ثانيا ...تانى برفان رجالى اشتريه خلال اقل من شهر ...بس ريحته عجبانى جدا ..ومش ناوية اتنازل عنه لاخويا ...بس ممكن اديكى رشة منه- اعمل ايه بقه ..بحبك!!
بالنسبة لموضوع المعدة وكراهية الالم - طلعتى شبهى زيادة عن اللزوم يا بنتى ، وبالتالى ..ربنا يصبرك على اللى انتى فيه!!
والحاجة اللى قبل الاخرانية ...انتى بكل بساطة ..انسانة يا انجى ...وانسانة جميلة اوى اوى وحساسة اوى اوى
الحاجة الاخيرة بقه ..نسيتى تقولى انك بتحبى الرز بلبن!!!!!!!!!!!!!!

Hossam يقول...

صديقتى الجميلة جدا انجى
اشتقتلك كتيييييير
بجد موضوع جامد جدا جدا جدا مع ان فى شخصيات كتيرة انتى قولتى عليها وانا معرفهاش بس انتى زيى بظبط فى اعجابى الشديد برولا خرسا ومنى الشاذلى خصوصا ضحكتها ولون الازرق واهتمامك بالناس مع ان ممكن يكيونوا مش مهتميين بيكى والكتابة نصف حياتى الاخر برده بجد حبيت كلامك اوى وعرفت عتك حجات كتير
بجد انا فخور ان عرفت شخصية زيك
تحياتى صديقتى
كل سنة وانتى بخير

طوبه فضه وطوبه دهب يقول...

anty anty t7fa bgd sare7a wwad7a kfaya awy ank 3arfa anty men bsrf el nazar 3n araa el nas bgd 3asl

KIMOOOZ يقول...

أنا ارفع مستوى توقعاتى تجاه البشر..ودائما اتعرض للخذلان..ليست غلطتهم فالتوقعات هى اكثر الطرق عبقرية كى يسقط الناس من نظرى ولكنى لا استطيع ان اتصرف بطريقة افضل..

ديه فى رأيي من اكثر الجمل العبقريه اللى قريتها فى حياتى

مش فاهم ازاى يعنى دبل واسعه و ايه دخل التنفس بشارع فؤاد و مش فاهم ازاى بتتعاطفى مع خيرى رمضان و مش عارف ايه مشكله الاسم الاعجمى لدرجة انهم يقولوا تؤتؤتؤ

Unknown يقول...

كنت أمر بالمصادفة على المدونة، وجذبني هذا البوست لكي أقرأه، لتلقائيته وحميميته، لأفاجأ باسمي ضمن من تقدرينهم، هذا شرف كبير لي، أردت أن أشكرك عليه، لكن بعد أن اشكرك على هذا الأسلوب الجميل، والإحساس المرهف، مودتي.

Foxology يقول...

الحقيقة انا مندهش من أسلوبك فى الحكى عن نفسك خصوصا انه فيه كتير من أسلوب العبقرى الدكتور احمد خالد توفيق :)

تحياتى ليكى وشكرا على اللخبطة :)

Unknown يقول...

ابو العريف: لااااااااااا مش اوى كدة يا باشا ربنا يخليك ويكرمك.....


جهاد:الحمد لله انها عجبتك..روح بقى اقرا معطلكش.........


عادل:باااااااااااشا..انت كل يوم تصحى بمود مختلف؟؟؟ انت مريض نفسى على فكرة نياااااااااهاهاهاااااا
انت فعلا شخص لطيف جدا يا عادل والله بجد انت انسان حلو اوى وانا بعتز بيك......
الا صحيح يا دووووولة اسم الكلب ايه؟؟ عايزة اعرف هاه؟؟


حسام غانم:واقولهم ايه لما اروح؟؟


ريم:صديقتى الجميلة...انتى كمان وحشانى وبرفاناتك وكتبك وكلك على بعضك حلو..بالنوسبة للفولتارين فما خفى كان اعظم...البرفانات الرجالى حلوة بس ابقى ادى محمود منها حرام غلبان يا عينى...انا فعلا بحب الرز بلبن بس بحب اكتر انى اكله معاكى............


حسام:صديقى الجميل النقى التحفة..انا اللى فخورة بيك يا حسام ياريت ربع الناس زيك كان زماننا حاجة تانية خالص.........



طوبة دهب وطوبة فضة:ذا ترانسليشن بليز........

Unknown يقول...

كيموز:لا يا راااااااااجل..مالسة بدرى والنبى غيب عن المدونة كمان شوية...عايزة اعرف مبتجيش ليه؟؟؟ هاه؟؟؟ يللا اعترف ولفق اى حجة...لالالالااااااااا مش مصدقاك متحاولش....
الجملة عبقرية؟؟؟ ربنا يخليك بس الاحساس دة شنيع فعلا حاجة مش لطيفة خالص والله..
مش عارف يعنى ايه دبل واسعة؟؟؟ يعنى دخلت محل فضيات فى المنشية قلتله فين الدبل الرجالى قالى اه قيست كام واحدة لقيتهم واسعين...هو ممكن يتضيقوا بس دماغك بقى لسة هضيقهم؟؟
ايه دخل التنفس بشارع فؤاد؟؟؟ لا فى دخل للابتسام بشارع فؤاد يعنى كناية عن سعادتى وانا ماشية فيه..
بتعاطف مع خيرى رمضان كانسان اسلوب كلامه بيخلى موقفى متعاطف مع اى قضية بيطرحها حتى لو مش مقتنعة بقوته كاعلامى..
مشكلة الاسم الاعجمى هى الجهل المطبق للخلق..نورت كتير..........



حسام مصطفى ابراهيم:والله ما كنت اعرف انك هتشوف الكلام دة ..فعلا من قلبى انا مقدرة حماسك الشديد تجاه شغلتك اللى واضح جدا انها هوايتك الاثيرة..نورت..............



فوكس:اسلوبى شبه دكتور احمد؟؟؟ يا نهار يا نهار والنبى الموضوع دة بيخلينى مونشكحة جدا اوى خالص..نورت........

إيناس حليم يقول...

:)) انا بحبك اوي يا انجي

اول ما فتحت مدونتك قلت يااااه ايه البوست الطويل ده ابقى اقراه مرة تانية.. بعدين قلت اقرا كلمتين وبالطبع كعادتي معاكي مقدرتش مكملش للآخر..

مش بس اسلوبك في التعبير عن نفسك عجبتني.. لكن نفسك كلها عجبتني.. باهتماماتك وافكارك والحاجات اللي بتحبيها وبونبوني القهوة اللي في شنطتك :) -هاتي واحدة بالفراولة- :)

مش عارفة اقول ايه
بس بحب اجي هنا اوي

أميرة علي كوكب مهجور يقول...

كلام بسيط و معاني عميقة وقدرة حلو اوي عن التعبير عن نفسك بجد بوست تحفة وطريقتك حلوة اوي واتمني تنوري مدونتي

كراكيب يقول...

أوووووووووف ايييييييييه الجماااااااااال ده
انتي عارفة
والله والله والله انا لسة كنت بفكر اكتب موضوع عني اسميه انا
يالهووووووي على البلوتوث المزمن ده
وبعدين تعالي هنا انتي اضلا كنت تطووووووولي انك تبقي من جمهورية خالد كساب حبيبي حياتي عمري قلبي شقي
وبعدين انا كمان بحب اووووي منى الشاذلي بس ما بستسقلش دم اشوف توفيق
بس بكره عنتظة بلال فضل واحساسه ان اجمد كاتب ساخر حصل في التاريخ رغم اني فعلا بعشق قلمه

صحييييييييح بقى
انتي جاية حفلة عيش وحلاوة؟؟
قوليلي علشان لو جاية اشوفك يا جوجا
اشطاط؟؟

mariam يقول...

والله انتى عسل :* (دى بوسة)

بحب روحك جدا يا انجى فى الكتابة و متبعاكى ديما و قريت كتاباتك القديمة خالص و لو مش بعلق على طول بس بكون متابعة بردو ..

عجبتنى الصورة اوى ...مش عارفة لية ديما بركز مع الصور.. لايئة اوى على الكلام و حساها انتى:)

سولا سولا ..اساسى بحبه اوى لكن مش بلاقيه فى حتت كتير

منى الشاذلى ..وصفتيها صح جداا والله

أنا؟؟؟ أنا أشتاق من لا يشتاقوننى واحافظ على بشر لا يستحقونى فى حياتهم..أنا افى بوعودى وذاكرتى حديدية تجاه وعود الناس لى وابذل اقصى مجهود استطيعه كى اجعل من احبهم سعداء..ولكنى افشل بجدارة..

مش عارفة اقولك الجملة دى عبقرية اد ايه...اكتر حاجة عجبتنى

بتحاولى تستنبطى معنى الجمل من شكلها :) انا بحاول اقرا سطرين فى نفس الوقت ..جينياس ..هحول فى مرة و انابعمل كدة انا عارفة

حاولت اقرأ مرة فى المواصلات حسيت ان المسافة قصرت بس لما روحت قريت نفس اللى قريته تانى عشان حسيت انى مكنتش مركزة

تمقتى ذوى السراويل القصيرة..لأ انا مش لاقية سبب يخلينى اكرهم بالعكس.. اصل عادى معظم اللى بيعملوا كدة بيعملوا كدة من كتر حبهم وتأثرهم بالرسول (ص) فبيقلدوه حتى فى التفاصيل الصغيرة اللى كان بيعملها و ادام اللى بيعملوه ده مش بيأذى اللى حواليهم ليه اكرهم..

اللى تقولك تؤتؤتؤتؤ على اسمك عشان اعجمى قوليلها اه اعجمى و معناه الملاك و تبقى تتكلم عالملايكة بقى :) كمان فى معنى تركى لأنجى و هو اللؤلؤ يلا يا عم ملاك و لؤلؤ مين قدك؟!

بس كفاية طولت انا عارفة ... فى انتظار الجديد :)

سلام

سقراط يقول...

السلام عليكم
العزيزة جدا اوي خالص مالص
بصرف النظر عن تحذيرك فى اخر التدوينة
الا انى متمسك بانطباعاتي حتي لو كانت مش صحيحة
انت انسانة تلقائية جدا وشفافة لابعدالحدود
بتفق معاكي فى حجات كتير من "الانا" دي
اهمهم ما يخص عمر طاهر وتامر امين
وبختلف معاكي فى حاجة مهمة جدا ممكن تزعلك منى
بس الاهم من كل ده
انى ببقي مبسوط ومرتاح جدا وانا هنا
...
تدوينة جميلة جدا يا انجي
تسلم ايديكي

غير معرف يقول...

حصلنا الشرف يا أفندم ؛؛؛
كلك علي بعضك حلو ؛؛؛... أنتي توليفة ذات نكهة خاصة ؛ أحببتها كما بدت لي من بين سطورك ؛؛ .
د/ إنجي إبراهيم - دي فرصة سعيدة جدا.
* أرجو أن تتقبلي مروري ؛
ديدي

أسما يقول...

انجي،

بجد انت ت ح ف ة، يعني ما حصلتيش، و احلي حاجة بقي انك عارفة تتكلمي عن نفسك بوضوح كدة، انا صورتي عن نفسي مشوشة خالص، تقريبا مش شايفاها، بس انا دايما باعرفني من التشابه ف الصفات مع الآخرين... مرض نفسي ده يا اوختشي؟! يعني اقصد اني لما اقرا بوست زي ده اقف من وقت للتاني عند جمل بعينها و اقول " و انا كمان" :)

يا رب ييجي اليوم اللي اقدر احدد فيه انا مين من وجهة نظري انا، مش اللي حواليّا

و الف مبروك كمان مرة عالخبر الحلو اللي سبتيه ف مدونة عمرو

سلام

Unknown يقول...

ايناس حليم :وانا والله يا ايناس بحبك..بحب كل كلمة بتكتبيها عشان بتكون خارجة من جوة..اقولك على سر؟؟؟؟ من ساعة قصتك قفزا نحو الاحلام وانا بشرب كابوتشينو بندق وافتكرك واستمتع بيه وابتسم...........



اميرة على كوكب مهجور:ربنا يخليكى يارب الحمد لله انه عجبك..اكيد هزورك.......



كراكيب:والنعمة ما هعبرك الا لما اعرف هشوفك السبت وللا لا...طب اجيبك منين وانتى قافلة الموبايل يا مرام بتستهبلى...........



مريم:سيدة العالم افتقدتك جدااااااااا طب والله طول الوقت بقول هى مبتعلقش ليه هى مش بتيجى ليه....متبقيش تغيبى كدة والنبى عشان بحب ارائك اللى بتكتبيها بمزاج وتفصصى البوست كدة كلمة كلمة...منورة ابقى تعالى كتير........

Unknown يقول...

سقراط:العزيز جدا اوى خالص سقراط..
وانا ببقى مبسوطة كمان لما انت بتيجى هنا يا سقراط...افهم من كدة انك مبتقراش لدكتور احمد خالد؟؟؟؟ امممممممممممممم ماشى مش مهم برضو انت صاحبى وحبيبى وكفاءة........



ديدى:دة انا اللى فرصتى سعيدة بس سؤال انتى ليه جيتى مرة وغيبتى كل دة على ما اخدتى قرار الزيارة التانية؟ظ؟؟



ايزولد:اممممممممم هو مش مرض نفسى يا اوختشى دة اسمه تشوه صورة الذات...بس مش مزمن والنبى بيتعالج نياااااااااهاهاهاااااااا
انتى رايحة بلاد الافرنج وهناك هتتعالجى..ربنا يجعلك فى كل خطوة سلامة ويوقفلك ولاد الحلال قادر يا كريم..رب يكرمك وينورلك طريقك...
الله يبارك فيكى يا ايزو..انا مبسوطة الحمد لله

micheal يقول...

أنا؟؟ أنا ارفع مستوى توقعاتى تجاه البشر..ودائما اتعرض للخذلان..ليست غلطتهم فالتوقعات هى اكثر الطرق عبقرية كى يسقط الناس من نظرى ولكنى لا استطيع ان اتصرف بطريقة افضل..

أنا؟؟ أنا اصاب بالدوار عندما اقرأ فى المواصلات..واحب الركوب بجانب الشباك واركب بجانب السائق كى اشعر اننى فى لعبة فيديو جيم..اعشق الترام واحب ان استقل الدور العلوى ان امكن..امقت عربة السيدات ولا اركبها فى الغالب..

أنا؟؟ أنا لا اندمج بسهولة ودائما ما اوجد فى المكان والزمان الخطأ..غلطتى اعرف ولكنى كالعادة لا استطيع التصرف بطريقة افضل..

دول بقي كوبي وييست مني بالضبط يا إنجي
:)
تصدقي أنا النهاردة كنت بسمع في أغنية المليونيرات
:)
تحياتي

نوسه وريمان فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

وياريت تضيف اللينك عندك
ومش هتندم ابدآ

مودتى

غير معرف يقول...

علي فكرة يا آنوجه" بتعطيش الجيم "، أنا لسه مباركالك عند عمرو ؛ مش سامعه الزغاريد!!!!.
أما في حكاية قرار الزيارة إللي بتقولي عليه ؛ فأنا للعلم زورتك مرتين ؛ وبالأمارة أقري بوست " اللهم إجعله خير " هتلاقيني برده كنت بباركلك ؛ بس إنتي مش رديتي عليا ؛ ففهمت إني غير مرحب بيا!!!!.
يارب كل مأدخل عندك أكون ببارك وأهني ؛ وعقبال الفرحة الكبيرة إن شاء الله .
هارجعلك تاني بعد ما أصلي الضهر.سلام
ديدي

Unknown يقول...

مايكل: بااااااااااشا الحمد لله انه عجبك يا فندم ربنا يكرمك..فى انتظار الالبون.........



ديدى: اممممممممممم اخص عليا بجد..على فكرة انا احيان كتير مش برد على التعليقات لانى مبعرفش ارد..والله انا مكنتش مش مرحبة بيكى ابدا..والله ابدا انتى متعرفيش انا ازاى فرحت بتعليقاتك دة غير انى اعتبرت ترحيبى بيكى اول مرة دة ضوء اخضر انك منورة الدنيا
اسفة يا ديدى بجد واتمنى تيجى كتير والله........

آيــة يقول...

إنجي هو أنا بصراحة مش قريت البوست ، و قريت بس كومنت عمرو و الشمسي ، و بصراحة كمان مش قادرة افتح عيني م الصداع و النوم ... بس معدية في مدونة عمرو لقيت كومنتك حسيت انك وحشتيني

فقلت آجي اقولك أولا وحشتيني
و ثانيا : مبروك الماجستير يا ست البنات ... نحن السابقون و أنتم اللاحقون :)
ربنا يوفقك و يفرحك يا جميلة

Unknown يقول...

آية مش هنا: آيه هنا؟؟؟؟؟
يا مراحب يا مراحب
انتى تنورى يا آية والله وحشانى بجد بجد..مستنياكى ترغى كتير بقى..وبجد مستنية عندك بوست جديد بقى حرام عليكى......

nono يقول...

مدونة رائعه

micheal يقول...

يا ناس يا عسل..الألبون وصل
:)

mregypt7 يقول...

السلام عليكم ورحمه الله وبركاته
هلا والله اخت انجى
زى ما عودتينا مدونتك لم تفقد اى بريق ولمعان لها طوال فتره غيابى
بسم الله ماشاء الله عشان ماتقوليش انى بحسد
اولا حبيت انى اهنئك بحلول شهر رمضان قبل كل الناس اعاده الله عليكى بكل خير
وفى الموضوع اللى كاتباه
فى تعليق صغير شويه
هو كان من الافضل ان تبداى بانا واعوز بالله من كلمه انــــــــــا
وتنهيها بانى مش بحب اتكلم عن نفسى كتير
بس لفتت نظرى ان قراراتك هوجائيه وسريعه وفوضاويه بس تعرفى عموما ديه بتبقى عاده وحشه اوى وانا حاسس بيها جدا لانها جزء منى بس جد بتدخلنى ف مشاكل كتر القرارات السريعه
ربنا يسهل ونتخلص منها
بس السواقين عندكم جناتيل اوى
انهم يعدوكى الاول
ده انا لما باجى اعدى الشارع
بحس انى بسابق السواق مين اللى يلحق يعدى الاول وياويلك لو انتى عديتى وهو كان هيخبطك بتلاقى كم هائل من الاحترام المتبادل بينكم ربنا يكترلنا من امثال سواقيكم
هو موضوعك جميل وحيلو اوى بس كنتى ممكن تلخصيه ف اغنيه انا مش عارفنى وانا مش انا
وكل سنه وانتى طيبه تانى
وياريت لو نبقى نشوف جمال تعليقاتك مره اخرى
تحياتى
الباش مهندس بوحميد

sab7al5air يقول...

لا بجد انت عسل
حلو البوست ده وقريته مرتين واقولك في حاجات كتير عجبتي حتي انك فوضويه وبدسي الحاجات تحت المخده
لا انا الظاهر حاصاحبك وابقا ازوركم يوم
تحياتي
واتمني انك تعدي علي مدونتي تنورينا
اصلي سنه اولي تدوين بس بديت ادمن رغي

مرام يقول...

حلوة أوي انت يا انجي أنا احب يكون في حياتي شخصية مثلك عجبتني اوي الحاجات اللي تحت المخدة.