الاثنين، 24 أغسطس 2009

عندما أضحى الفانوس مسخا



اشتريت فانوس اليوم..فانوس صاج له زجاج ملون بلونى المفضل توضع شمعة بداخله كى يصبح الزجاج الازرق براقا اكثر..
لم اشترى فانوس منذ فترة طويلة جدا..تقريبا منذ ان اصبحت الفوانيس مسوخا..
لم احب يوما الفوانيس التى لا تمت للفوانيس بصلة ..لم يبهرنى فانوس كورومبو – احدث صيحة فى عالم الفوانيس – ولم تأسرنى تلك العروسة البلهاء ذات الاجنحة والتى تمسك بيدها شمعة وتغنى رمضان جانا..رمضان جاها ازاى وهى باربى مش فاهمة..ايضا لم احب فانوس التوك توك..ومن قبلهم لم ابتلع فكرة ان يكون الفانوس لعبة تغنى وتتحرك ومعلق بها ميدالية سخيفة على شكل فانوس ..

اتذكر اننى كنت امتلك فانوسا صاج اصفر وله واجهات زجاج كل واجهة لون مختلف وله باب وبداخله مكان للشمعة..كان فانوس تحفة اوى..ولكن ببراءة الصغار المعروفة وحبهم الطبيعى لكل ما هو جميل ورقيق دمرت الفانوس قبل ان اتخلص منه..اى رغبة شريرة دفعتنى لارتكاب هذا الجرم..

هذه السنة قررت ان اشترى فانوس..لا اعرف لماذا ولكن شىء خفى جعلنى ارغب فى امتلاك فانوس صاج ..ربما لان كل ما كان جميلا فى رمضان اختفى..ربما لان عمر ومينا ومحمد واحمد وحمادة لم يعودوا صغارا يجمعون من أمى وباقى أمهات الشارع – نص جنيه يا طنط عشان الزينة – ولم يعد هناك تلك الكعبة العملاقة فى مدخل شارعنا..ربما لانى لم اسمع المسحراتى هذه السنة وحتى لو سمعته مستحيل ان ينادى اسمى فجيلى كبر وعيب البنات يتقال اساميها فى الشارع..ربما لان المسجد استكثر حتى تلك الخيمة التى ينصبونها فى شارعنا كمصلى مرتجل للسيدات..ربما – وارجح هذا السبب – لاننى كبرت جدا وعقلى قد وعى لاختفاء تلك الحميمية..

حتى اغنية منير الجديدة الرائعة جدا – رمضان جالنا – لم تشعرنى اننى لازلت صغيرة و-فرحان من قلبى زى زماااااان – كما قال منير..شعرت انهم فى الكليب من كوكب اخر..يصنعون الزينة ويعلقونها ومبتسمين ..عالم آخر غير الذى نحيا فيه نحن..احنا خلاص كبرنا للاسف..لم نعد اطفال سخفاء نحاول بشتى الطرق اثبات ان فلان غير صائم و – طب ورينى لسانك – و نستعجل اذان المغرب..انا شخصيا كنت اقول لهم والله لو ماذنش دلوقتى لانا فاطرة..الان لا يجوز ان استحلف للمؤذن..عشان خلاص كبرت..

عندما اضحى الفانوس مسخا مسخ كل شىء آخر..الياميش لم يعد مقدس لانه ببساطة الناس مش لاقية تاكل عيش عشان يجيبوا ياميش..برامج الاطفال لم تعد بريئة جدا – طرائيع النهاردة كان بيفكر ايه انسب مشروع يدمر بيه عقول الناس مجلات البورنو وللا المواقع الاباحية – هكذا نصا وبوضوح فى برنامج ظاظا وجرجير..التليفزيون اصبح غاية فى الاملال مع كم النجمات اللاتى لا تشخن والنجوم الذين يتظاهرون بالشر ..البرامج الدينية اصبحت اكثر من اعلانات بيريل استرجل..

ربما لاحساسى انى لا انتمى لهذا الرمضان وانه يجب ان يكون رمضان اكثر حميمية واعبق رائحة قررت ان اشترى الفانوس المعجزة والذى من فرط عدم ملائمته للزمان والتقنيات قالت لى جارتنا عندما رأته..حلو الانتيكة دة..اصبح رمضان كما اتمناه انتيكة تثير الاستغراب..كل سنة واحنا طيبين..


...........انجى ابراهيم...............



ملحوظة: الفانوس اللى فى الصورة دة فانوسى الجديد..لفيت المنشية شبر شبر عشان الاقيه وطبعا مفيش فانوس بالمواصفات الخزعبلية دى ابدا..المهم انى اشتريت فى الاخر انا واحد وريم واحد واشترينا علبة شمع..شمع صغنتوت اوى بس الوانه حلوة..كل سنة وانتوا زى الفل..

هناك 24 تعليقًا:

adel يقول...

ممممم
بجد من اجمل ماكتبتي
تعرفي اني بحب الفانوس الصاج ده قوي و نفسي اشتري واحد بجد
وانا للاسف مش حاسس رمضان
ممكن تفتكري اني بهرج
مسيحي اكيد مش هيحس رمضان
بس علي العكس انا اتربيت انا بفرح في رمضان و بستناها حاجات بعينها
والسنة دي كان نفسي في فانوس و مجبتش
وكمان شوفت اول حلقة من بوجي و طمطم كنت هاعيط لاني حسيت قد ايه الناس دي بتتلاعب بذكريات و قصدين يبوظوها

الحاجة الوحيدة اللي حلوة من زمان (ونيس و احفاده) يمكن فكريتني بطفولتي زمان و محفظة شوية علي الماضي ...(وده يرجع انها مش كتابة صبحي الحمدلله)

reem يقول...

بجد كان يوم جميل وفانوس عسول
والوان الشمع تهبل بجد ...ميرسيه بجد يا نوجا على الاحداث الحلوة اللى بتعيشينى فيها...بجد ربنا يخليكى ليا يا قمر
***************
البوست تحفة بجد....على الرغم من انه حزين
بس عجبنى بشكل مش طبيعى
تسلم ايديكى وتسلمى لى يا نوجا
*******

بجد فرحانة اوى انك صاحبتى ...يارب يديم مابينا صداقتنا الجميلة دى ...ويخليكى ليا ويحفظك من كل شر يا قمر

The Confused يقول...

على فكره بقا ده ظلم وافترا وتفرقه عنصريه .... وانتي عارفه اكيد ليه يا انجي :D

وال ايه انا اللي مش هان عليا اغيظك ماشي ماشي :(


بالنسبه للبوست فعجبني جدا جدا جدا جدا جدا فوق الوصف ... بجد روعه اسلوبك واحساسك يا انجي ف البوست ده لاني كمان برضو حاسس الموضوع ده اوي وبالزات السنادي ... فعلا زي ما يكون كل حاجه بركتها قلت ورمضان بقا من غير طعم !!

مواطن مصرى نايم يقول...

جميييييييييييييييييييل جدا يا انجى المقال و الفانوس
تعرفى انا مش طايق كرومبو و لا فانوس و لا كرتون جتهم القرف
بس تعرفى يا انجى انا مش بحس برمضان من زمااااااااان
من ايام ما دخلت ثانوى و انا مش بحس بحاجة
رمضان دلوقتى بالنسبة لى
الصلاة و القرأن و سحور و ضيفى لده السنة دى لذه جديدة بالنسبة لى
انى هذاكر فالصيف و فرمضان و همتحن فرمضان و هستنى النتيجة تانى
شايفه بقى قمة اللذه

لما يبقى الفانوس صينى يبقى لازم منفرحش بالفانوس
و كل سنة و انتى اجدع اخت

لو موضوع الخيمة ده عاوزاه بجد انا ممكن اكلمهم فالجامع انا اعرفهم كلهم
بس هما هيعملوها فيوم ليلة القدر بردو زى كل سنة

و لو طالبه معاكى تصلى فالجامع يعنى
تعالى التحرير

غير معرف يقول...

وانتي طيبه يا انجي يا قمر
انا جيت أهو أشوف الفانوس
جميل جدا
انا برضه جبت واحد زية بس أكبر عشان احطه في البلكونة عشان احس يعني برمضان وكده
بس انا بقالي حوالي سنتين مش حاسه برمضان نهائي
وأكتر السنة دية
فعلا عندك حق احنا كبرنا ومبقناش نحس برمضان :(
بس عارفه
دايما اما بقرأ تعليقك بضحك حتي لو كنت زعلانة عشان انتي بجد عسل عسل عسل :)
وكل رمضان وأنتي بخير

غير معرف يقول...

نسيت أقول
انا angel
:)

عمرو يقول...

إنجي
مش عايز أفضل كل ما تتكلمي في مشكلة أقوم أنا أطلع كده وأقول إني عندي اللي أنقح منها.. بس أعمل إيه إذا كانت هي دي الحقيقة.
أنا رمضان الحالي بالنسبة لي مختلف جدا. أول سنة أفطر لوحدي وأحضر فطاري بإيدي. أول سنة رمضان يجي عليا يلاقيني وحيد. أول سنة ما أبقاش فرحان بدخلة الشهر.. مش عارف ليه.
الأسوأ من كده إني مش عارف أصلي.. تخيلي؟ آه والله مش عارف. باروح الجامع أقف زي أي حيطة وباعمل حركات مع المصلين ونفسي أدعي مش عارف.
بالنسبة بقى لفوانيس والتلفزيون فدي رفاهيات بالنسبة لي لم أفكر فيها لأن م يطلق عليه تلفزيون والموجود في شقتي ما بيجيبش غير القناة التانية هههههه فلا يجوز الحكم على التجربة التلفزيونية من قناة واحدة إذا شئنا الموضوعية زي ما انتي عارفة. أنا كان عندي فانوس لذيذ كده وأنا صغير, ورغم إني لسة لحد دلوقتي صغير فأنا مش عايز أشتري فانوس.. أناعايز رمضان اللي أنا عارفه يجي
:(

mariam يقول...

و انتى طيبة يا جمييل :)

اول مشفت فانوسك اتبسط اوى ...انا اشتريت واحد زيه بظبط من سيدنا الحسين نفس الصفات الخزعبلية :) و نفس الحجم الهولامى و كلو بس الأزاز بتاعى لونه اورانج ..هقولك على حاجة تخدى بالك منها عشان ميحصلكيش زى :) لما تيجى تحطى شمعة فى الفانوس ده قصريها على قد متقدرى عشان الفانوس متركب فى بعضه بزى غرى و النار لو عليت بتسيحه

عمرى ما اقتنعت بالفوانيس البلاستيك الصينى..و معرفش الصين عرفت كرومبو منيين يعنى كولومبو مشهور عالميا انما كورومبو ده مصرى اخر حاجة ..

معاكى فى ان رمضان زمان كان احلى و كل سنة احساسى بيه للأسف فى النازل و واضح ان ده نفس الحال مع الجميع ..سبحان الله

اما التلفزيون فأنا حسة انو ممكن ينفجر من كتر المسلسلات و البرامج و اسوأ برنامج ممكن تشوفيه فى حياتك هو برنامج اشتغالات ساعة الفطار على otv يااااااه على الرزالة بكرهه بسببه خليت التلفزيون مقفول وقت الفطار امبارح و الله ..لحد مطمنت ان معاده عدى و فتحته

بس رغم اى حاجة مازال رمضان خير من الف شهر و بعتبره فرصة يا اكسبها يا اخسرها بس انشاء الله مخسرهاش ..ان ربنا بلغنا رمضان دى فى حد ذاتها بعتبرها نعمة الحمد لله.. انا لحد وقفة رمضان كنت بعزى فى ناس اتوفيت و الحمد لله بردو ميزة السنة دى ان رمضان جه فالأجازة مش فالدراسة و الصداع

انا قريت تعليق (عمرو) و مش عارفة دى هتبقى حشرية منى ولا ايه بس اصل مرت علية نفس المشكلة بتعته فى انه مش عارف يصلى او يدعى و حاسس انه بس بيعمل حركات الصلاة ..بص هقولك حاجة مشكلتك دى محدش هيطلعك منها غيرك يعنى محدش هيخليك تدعى بالعافية او هيدخلك فى مود الصلاة انت روح مسجد يكون الأمام بتاعه صوته حلو و بيأثر فى الناس و صلى وراه و لما يدعى قول امين ..بس انشاء الله هتبتدى تعرف تدعى لوحدك جدد نيتك هى بس تكة لو دخلت فيها هتسلك انشاء الله .

نعكشة يقول...

مش فاكرة اى حاجة ف رمضان

مكنتش بجيب الفوانيس الصاج

كان والدىى بيجيبلى البلاستك اللى شبة الفانوس

مكنتش بحب اللى بيغنى
ومن ساعة ما طلع فانوس بابا اوبح وانا مبجيبش فوانيش

بس بحب قوى اشوف الراجل و هوه معلق النصبة بتاعة الفوانيس دية

رمضان دة
بالذات
ربنا يستر عليا

مش حاسة بأي شيء إيمانى فيا من ساعة ما دخل

كنت من سنتين تقربا لإن السنة اللى فاتت كنت حاسة بالفتور شوية إلا إنى جيت على يوم 10 كدة فوقت لنفسى

كنت بحس ان رمضان بيجي ينقينى عشان اروح العيد بيضا زى هومى

الحاجات اللى بيعملوها ف رمضان
اللى بتحكى عليها

معمريش عملتها اصلاً

مبتفرقش معايا من وانا صغيرة ف ياميش او مفيش
و المسحراتى مكنتش بسمعة اصلاً إلا الساعة 1
فية حد بيتسحر الساعة 1 :|
لية يعنى
ومكانش بيتكلم اصلاً
كان بس بيدق بالبتاعة الل معاه دية

مكانش عندى طقوس معينة اعملها ف رمضان
زى المسلسلات و الافلام القديمة
و الحاجات اللى انتِ نفسك ( المفروض انك ف سن مقارب ليا) حكيتي عليها

لما اشعر بطقوس رمضان و لم تكن تهمنى ف شيء

بس انا فاكرة زمان كنا بنتجمع احنا الصغيرين و نتسابق مين هيخلص القرآن الاول
ومين اللى هيعرف يصوم اليوم كامل
مش لحد العصر
و ف الخباثة يدخل ياكل و يتقفش برضو
مش عارفة ازاي

كنا بنفضل نشد الحتة اللمتجعدة ف الصوابع دية عشان نعرف هوه صايم بجد ولا لأ

ولو لاقينا حد فاطر نقولة

يا فاطر رمضان يا مخاصم دينك ....
كنت بحب اتفرج على بوجى و طمطم و عم شكشك
و كنت بحب الف ليلة بتاعت زوزو نبيل و شريهان
كانت جدتى عايشة و كنا بنروحلها فى بيتها
و كانت جدتى التاني لازم تعزمنا ف رمضان و تجمع قرايب بابا كلهم
دلوقتى بح
كبرت بعد شوية و حسيت ان رمضان بيمدنى بطاقة ايمانية غريبة ؟( حلوة ينى)
حتى لما مبكونش مجهزةة نفسى ليه من قبلها
كنت اول ما يجي واحد رمضان احس بالهمة
و كانت الذ حاجة بعملها لما بروح المسجد و اروح بيتى قبل الفجر
و اتسحر ف المسجد
شعور اعتقد إنى لن أنعم به هذه السنة
الله يخربيت الامتحانات و يسامح اللى بيحددوا مواعيدها
عارفة انه مفروض الانسان الطبيعي متفرقش معاه حاجة
بس انا مبقولش انى طبيعيه
السنة دي رمضان لم اشعرر به اطلاقاً حتى الان
يمكن اخلاقى اكثر سوءاً عن الحالة الطبيعية
و ايمانياتى ف الحضيض
اعتقد إنى مش هيجى عليا رمضان الجاى يمكن اكون من عتقاء الجاى عشان الشهر دة انا ف الضياع

ربنا يهديني

بعد هذه الجرعة المكثفة من التفاؤل

احب اقول

رمضان كريم

و جعلك الله من عتقاء الشهر

آمين

سلام عليكِ

enjy يقول...

عادل: دووووووووولة..ربنا يخليك يا ابنى..طب متشترى فانوس يا ضنايا ايه المشكلة يعنى اوعى تحرم نفسك من حاجة..
وعلى فكرة مش مستغربة انك مش مستمتع برمضان زى زمان لانى اصلا قلت ان مينا كان بيلم مع عمر عشان يعمل الزينة اصلا...بس خلاص بقى ماشاء الله كبروا وبقوا صيع قد الدنيا نيااااااهاهاهاهااااااا
ونيس حلوة فعلا ومشوفتش بوجى وطمطم ومفتكرش هشوفه.........



ريم:احم احم ايون طبعا بما انى مشيتكوا خمسين كيلو عشان نشتريه يبقى اكيد انبسطتى نياااااااهاهاهاااااا
نتفاهم فى باقى التعليق بعدين بقى....



عبد الله: نياااااااهاهاهااااااا
باشا دة احنا كنا بنتساءل ازاى هنغيظك يا فندم..احنا شريرييييين
الحمد لله انه عجبك يارب دايما.........



مواطن مصرى نايم:احمد باشا اخويا العزيز..ازيك يا فندم وعامل ايه كدة واحشنى والله..من زمان فعلا رمضان اتغير بس بالنسبة لى رمضان اللى فات كان امور..حصلت لى فيه حاجات كتير حلوة يمكن عشان كدة انا فعلا حاسة انى مش مبسوطة السنة دى..ممكن..
ربنا يوفقك والله وتمتحن والنتيجة تطلع حلوة..وبلاش نسيح بقااااااااا
الصلاة مش هى الازمة انا السنة قبل اللى فاتت كنت بسيب المسجد عندنا واروح اصلى فى الحق..عارفه؟؟ اللى على طريق الملاحة..بس نصب الخيمة دة حاجة تانية بتعمل جو كدة وبتاع..يللا خير نبقى نتصرف بقى بس التحرير زحمة اوى يا احمد ماله الصلاة فى البيت؟؟
كل سنة وانت اخويا الحلو.......



angel:منوووووووورة وعمرو هيضربنى عشان بسرق زباينه..نياااااهاهاااا
احنا مجبناش فانوس للبلكونة تصدقى..يللا خير..ربنما يخليكى والله انتى اللى عسل ومربى وسكر وهتلمى علينا النمل هنا فى المدونة..انا بهرج طبعا........



عمرو:بس قريب مش هتكون لوحدك اكيد يعنى..هيبقى فى بنوتة تسكب على راسها كل الرومانسية اللى عندك دى وتفطروا مع بعض باذنم الله..ليه يا ضنايا القناة التانية بس؟؟؟؟ عيش حياتك بقى وجيب دش وكدة..هتزهق جدا على فكرة خليك كدة احسن..كل سنة وانت زى الفل..........



مريم:سيدة العالم..تصدقى اه النصيحة دى اخدت بالى منها وقصرت الشمعة على الاخر بس الفانوس بيسخن اوى من برة وحيطانه بتسود كمان..بس برضو حلو اوى..كلامك اكيد وصل لعمرو كل سنة وانتى طيبة.........



نعكشة:انا كمان كنت بجيب البلاستيك بس اللى مش بيغنى بس كان عندى واحد صاج حلو اوى..احنا بقى مكناش بنتجمع خالص..عيلتنا صغيرة اصلا وبعدين انا مبحبش الدوشة
فاكرة اخدع بتاعة صايم وللا لا...
انا اعتقد من ساعة ما كبرت وانا رمضان بيروح منى..هحاول الحقه المرة دى..بس ساعات ببقى مكسوفة الحقه..احساس عبيط صح؟؟
يللا يارب يعتقنا كلنا برحمته مش بعملنا..ربنا يوفقك يارب

مسدس صغير يقول...

بعيدا عن الفانوس السحرى بتاعك ده
ههههههه
كل سنة وانتى طيبة
رمضان كريم

Rannon يقول...

الله نفسي في فانوس صاج
انا كمان ماحبيتش الفوانيس الجديدة ولو اني مجاليش فوانيس من وانا في 3 ابتدائي :)

انت بتأكدي الفكرة العامة اللي الكل مؤمن بيها وهي ان رومضان مباقاش زي رمضان واننا بالتدريج بنفقد حاجات واحاسيس جميلة عشناها زمان

بوست حلو قوي
تسلم ايدك :)

يا خوف فؤادي من غدي يقول...

رمضان كريم
تعرفت من خلال تدوينتك على عادة من عادات رمضان في مصرهنا في المغرب لاوجود لفوانيس رمضان وايضا موضوع الزينة في البيوت او اللمبات في البلكونات هدا كله غير موجود
هده الزينة تكون في المساجد ليلة السابع والعشرين من شهر رمضان
ساحاول في تدوينة قادمة ان شاء الله ان اكتب عن عادات رمضان في المغرب لاعرفكم عليها
مع تحياتي

سقراط يقول...

انجي
كل سنة وانت طيبة
ورمضان كريم عليكي
انامتفق معاكي قلبا وقالبا فى اللى قلتيه
انا كمان بيحب الفانوس الصاج جدا
وكنت بجيبه زمان وانا صغير
بس لما كبرت فقدت الاهتمام
الفوانيس المسخ سيطرت
لاننا اتخلينا عن الفانوس الصاج
وبطلنا نطالب بوجوده
يعني م الاخر
احنا اللى ضيعنا حقنا وحقه
...
تدوينة جميلة قوي يا انجي
وكل سنة وانت طيبة

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

أبو أسامة يقول...

بروك الفانوس
وكل سنة وانتي طيبة
بس نصيحة في التصوير :
كنتي حطي جواه شمعة منورة واستعملي الفلاش من بعيد شوية من غير زووم
بيتهيألي كانت هتكون صورة حلوة .

Isolde يقول...

Enjy, i have to write in English cuz i have no arabic here, but may b Amr can help u translate...anyway, Ramadan, 4 me, has gone so many years ago, i've felt wht u r talking about when i was 12 or 13, that was when the Arabian nights were no longer a part of ramadan as we know it, beside all wht u've said... i have no Ramadan zay zaman, except 4 prayers n Qur'an, and even tht isn't perfect.

As 4 my Ramadan this year, I'm like Amr, alone... but wht is worse is tht i have no muslims or even Arabs around so far. All wht i have is a turkish Muslim who doesn't fast, may b doesn't pray either, a serbian guy, and an athiest roommate, ya3ny she's neither christian nor muslim, she's just luna, from spain... they r nice people, but this is all the company i have, but being alone wud b much better in 4 now, anyway say Alhamdulellah that u r among ur family, neighbours, and friends
Happy Ramadan dear
:)

أحمد الشمسي يقول...

يعني هي جت ع الفانوس؟
كل حاجة حلوة تحولت لمسخ مشوه!

KIMOOOZ يقول...

و الله ما بقيت عارف
هو الفانوس و ما شابهه هو اللى بقى مسخ
و لا احنا اللى اتحولنا لمسوخ غير ما كنا عليه من قبل
فأصبحنا نرى كل شىء ممسوخ مثلنا او بمعنى ادق اصبحنا نريده ان يصبح مسخا حتى نتهم الاشياء بالتحول و ننأى بأنفسنا عن هذه التهمه البشعه

ايه الكلام الكبير اللى بقوله ده

شمس النهار يقول...

ازيك
هي جت علي الفوانيس
ماكل حاجه اتمسخت في حيتنا خلاص
بس اللي حزني ان برامج الاطفال فعلا انحدرت جامد جدا
حتي مفردات الحوار بين الشخصيات انحدر
ربنا يتولانا برحمته
كل سنه وانت طيبه

Mo7ammed يقول...

مفيش احلى من الفانوس الصاج وسيبك من كرومبو وهيفاء وبابا اوبح

معلش جيت متأخر كالعادة بس اعمل ايه اخوكى راجل عامل ^_^

كل سنة وانتى طيبة يا انجى

micheal يقول...

أحترم بساطتك يا إنجي في دنيا كل شيء فيها أصبح متكلف وزائف
تحياتي

أحمد علي يقول...

أنا كنت بحب الفوانيس المربعة اللي ليها باب، عشان هي اللي عادة بيبقي فيها عفاريت :-) وكانت بتطلع دايما في بوجي وطمطم... رحم الله اسماعيل ياسين، ورحم الله يونس شلبي.

البنفسج الحزين يقول...

انا فاكرة اني زمان برضه كان عندي فانوس صاج بشمعه الله يرحم زمان وجماله.