الثلاثاء، 18 أغسطس، 2009

فى السريع









بوست فى السريع كدة اقول فيه آخر الاخبار..ليه البوست فى السريع؟؟؟
عشان اسراء العرورة – اللى هى العروسة ايون – عندنا وعندها صداع وشكلها هتتعب عندنا واحمد ييجى يوم الخميس يلاقيها عيانة ويحسبها علينا نفر..يللا ربنا يستر مش عشان انا خايفة عليها اطلااااااااقا لكن عشان احمد ييجى يلاقى العهدة سليمة..

أول خبر انى كسبت فى مسابقة عيش وحلاوة..المركز الخامس مقال..حلو مش بطال يعنى المهم ان الاعمال الفايزة – الفائزة مش فايزة جارتكوا – هتنزل فى كتاب..ايووووووووون هتنزل فى كتاب والكتاب هينزل السوق والطامة الكبرى – ايه رأيكوا فى الكلام الكبير دة – ان حفل التوقيع يوم الخميس فى مكتبة البلد فى القاهرة..يا جدعان حفل التوقيع بتاع الكتاب اللى نازل لى فيه نص ..متخيلين الموضوع..المهم عايزاكوا تروحوا وتشتروا الكتاب وتحضروا حفل التوقيع عشان احتمال كبير انا مروحش يعنى..اى نعم هموت واروح بس شكله كدة مش هينفع..بالمناسبة من موقعى هذا احب اقول لاسامة امين..واد يا أوس هتروح حفل التوقيع وللا ايه؟؟؟ ماهو انت لازم تروح يا باشا..اسامة تانى مقال وخامس قصة..هاااااه هتروح وللا ايه؟؟ طب ابقى ادينى خبر..

تانى خبر..انا قدمت فى الدراسات العليا..ماجيستير..الصور اللى فوق دى صور مهزلة الورق وسحب الملفات ودفع فلوس مالهاش اى لازمة فى الدنيا..اى نعم لسة متقبلتش بس ان شاء الله هتقبل..يللا ربنا يستر حاكم الموضوع دة حصل فيه خزعبلات بالعبيط..

تالت حاجة..مفيش تالت حاجة على فكرة الاخبار خلصت خلاص بس فى شوية كلام واقف فى زورى هقوله لان زى ما انتوا عارفين انا ديموقراطية والمدونة مدونتى وانا حرة فيها..

ميرو..اللى هى مرام قابلتها مؤخرا وكنت انا وهى وكيكى..البت دى طلعت تحفة..احلى من اى توقعات توقعتها عنها..ميرسى ميرو على ازازة المياه اللى ب12جنيه..متشكرين اوى يعنى واحتفظى بالازازة زى ما اتفقنا والفسحة كانت حلوة بجد والله واكيد هنتقابل تانى..سلميلى على عبير بقى..

كيكى..صاحبتشى..حبيبتشى..انتيختشى..اقول وللا بلاش؟؟؟ اقول؟؟؟ عموما والله يا كيكى حاولت بس مفيش اى نتيجة خالص والله..بس بجد موتتينى من الضحك وانتى فاهمة وانا فاهمة..بقولك ايه..اوصلك اتجاه الجيزة؟؟؟؟؟؟؟؟؟؟؟؟

احمد عبد الله..جارى العزيز..حمد الله عالسلامة يا باشا وسلامتك وابقى سلملى على دكتور سامى وسلى اصلى مروحتلهوش من وانا عندى اربع سنين.. .نيااااااااهاهاهااااا.
عودا حميدا للتدوين..بلوجر كان مضلم من غيرك..مش مضلم اوى يعنى متتغرش.. عموما زى متفقنا هتشيل الواح السرير عشان يغنى عن التابوت عشان لما يكتمل التحول..وانا عليا التوم واختك عليها الوتد..

ريم وجيه..صاحبتى الامورة..شكرا على المشاركة الوجدانية والدعم المعنوى..على رأى واحد صاحبك انتى صاحبة متتعوضش..الا صحيح دكتور صلاح ازيه؟؟ طب هناكل رز بلبن بالجيلاتى امتى طيب اعراض الانسحاب ابتدت تظهر..

الى هنا اعزائى اللى مش مشاهدين تنتهى اخر فقرات حفلنا الغير ساهر..نلتقى وقت ما نلتقى بقى سيبها لله..


.........انجى ابراهيم.......... .

هناك 24 تعليقًا:

محمود محمد حسن يقول...

نمرة تليفونكم شيك اوي اوي اوي اوي

:))

مبروك الشهادة عقبال الماجيستير

محمود محمد حسن يقول...
أزال المؤلف هذا التعليق.
محمود محمد حسن يقول...

يعني انا أقولك نمرة تليفونكم شيك تقومي تمسحيها

:D
:))

مسدس صغير يقول...

الف مبروك
ربنا يكرمك
كل سنة وانتى طيبة
رمضان كريم

نعكشة يقول...

ومن بابا و ماما و توتو و عمو صلاح و عمو اشرف و جدو و جدتو و ننة امينة و خالو احمد عبد الصبور
و بحب اهدى الاغنية لصاحبة المدونة
ماما زمانها جاية
تعاليلى يا ماما شوفى اللى جرالى

1- معنى معرفش مين اسراء بس متوقعاها حد من عائلتكم و متوقعاها اخت سيادتكم
بس لو المعلومات خطأ فمش مشكلة برضو
و الف مبروك ليها

مش قولتلك هتكسبى ان شاء الله .. الحمد لله يا رب
معتقدش غنى هروح التوقيع
طبعاً لإنك مش هتحضري
هع هع هع
إنى امزح .. اكيد عشان عندى امتحانات و مش و مزاكرتش و لله الحمد
بإذن الله شهر عشرة كدة إن شاء الله اشترى الكتاب
لو عشت و كان لسة باقى فيا نفس

و الف مبارك ليكِ يا قمر

..........

يا رب يا رب يتمملك بخير موضوع الماستر كدة يا رب
و نصيحة اخوية
هوه انتوا ممكن تاخدوا معادلات او حاجات من برة ؟؟؟
لو تعرفى تعملى حاجة من الشهادات الخارجية الغير مصرية و ترجعى تشتغلى بيها هنا
هتبقى حلو جداً
ركزى بس فى الماستر و الله معكِ و يوفقك و يعمللك اللى فيه الخير

...........

اعتقد بعد كده من أحداث هبقى بحشر مناخيري وانا مش فاهمة حاجاة
و انا صراحة رغم إنى فضولية جداً بس مبحبش احط مناخيري

يلا خير

.........

ربن ا يكرمك يا رب و يعملك كل اللى فية الخير

كان معكِ .. نعكشة من أمام مراية الدولاب .. من على الكرسى .. القاهرة

سلام عليكِ

الفراغ يقول...

ايه يا انجى
انا دايما ادخل واقرا..وبيعجبنى كل كلامك
لكن النهارده فى ايه
؟؟؟؟؟؟؟
طيب عرفينا مين هما الاخوه اللى عماله تكتبلهم
ومافيش سلام واحد يوحد ربنا للناس اللى دخلت تقرا
بس برضه استمتعت بكتاباتك
والف مبروك حفل التوقيع للكتاب
وسلامة العروسه
وربنا يوفقك فى الماجستير وعقبال التقديم للدكتوراه
واحنا كمان بنشكر ميرو وعبير معاكى والله كتر خيرها ...زجاجه ب12 جنيه
والله فعلا تستحق الشكر
وكمان احمد عبدالله رجع للتدوين...والله خبر سعيد...بس ياريت نعرف مدونته...علشان نقوله سلم على دكتور سامى بنفسنا ...اشمعنا انتى
ولا صاحبتك ريم وجوزها صلاح..يا سلام على الرز بالايس كريم
جريتى ريقى...بس الحمد لله مش قوى ..انا عندى سكر
بس جريتى ريقى على الصداقه الحلوه ولدعم المعنوى
كل سنه وانتى طيبه
بس شفتى انا بتاثر بكتاباتك ازاى
الى اللقاء

adel يقول...

مبروك الجايزة و ده كان منتظر و قوليلي اسم الكتاب عشان صعب اروح الحفلة دي الا لو هتيجي يعهني
هههههههههه

انت شاء الله اباركلك ساعة الدكتوراة كمان :):)

الكلام ده مكنش ليا بقي
ههههههههههه

سقراط يقول...

انجي
مبروووك ع المركز الخامس والكتاب
وربنا يوفقك فى مشوار الماجستير

Foxology يقول...

اولا : الف مبروك على الجائزة وفى انتظار الكتاب :)

ثانيا : ربنا يوفقك فى موضوع الماجستير وان شاء الله بالنجاح :)

تحياتى ورمضان كريم :)

غير معرف يقول...

صباح الروقان يا آنووووووووووجا؛
والله وشي مليته الإبتسامة وأنا أقرا سطورك ؛ ربنا يسعدك ويتمم فرحتك علي خير ؛ مش بقولك كل ما آجي عندك أقول مبروووووك.... أنا بقول تسمي نفسك إنجي تباريك؛ أو مباريك .........؛اللهم زيدك كمان وكمان ، تعرفي أنا كان نفسي أبقي مذيعة!!!. آه والله ؛ وكنت ساعتها هأعمل معاك حوار جامد !!وعشان كده ؛ أممكن أسئلك سؤال ؛ واحد كفاية : إحم إحم... معنا اليوم الكاتبة إللي محصلتش "أ.د/ إنجي إبراهيم - أهلا بيكي ؛ ومبروك عليكي المركز الخامس ؛ يا تري يا هل تري إنتي بتكتبي تجارب شخصية ولا من خيالك الوسيع!!! ؛ ده مش فضول ؛ آبسلوتللي!!!؟؟. كنت أنفع مش كدة ... مذيعة ربط إللي إتلغت من التلافزيون!!!!.يا رب من نجاح لنجاح دايما علطول؛ ألا صحيح يا إنجي إزازة ميه إيه دي إللي ب12 جنية!!!؟؟.
لولولييييييييييييييي؛؛
ديدي

عمرو يقول...

مبروك على كل الأخبار الحلوة دي يا إنجي.. أنا كمان نازل أقدم ماجستير في جامعة اسكندرية بكرة
إدعيلي
:)

مواطن مصرى نايم يقول...

يعنى انا النت يفصل عندى الاقيكى بتنمى عليا
و هتحول هه ؟
مااااااشى
خلى بالك بقى هتسمعى صويت فالعصافرة عند اكتمال القمر
حضرى بقى الفضه و التوم
ههههههههههههههه

ربنا يخليكى يا اوج يا رب و الف الف الف الف الف الف الف الف الف الف الف جنية سلف لو معاكى يعنى
ههههههههههههه
D:
لا بجد الــــــــــف مبروك ( بتاع احمد حلمى ) عاوز ادخله
عقبال يا رب لما يكون ليكى كتاب لوحدك و يكون فى علم نفس الاسرة مثلا بصفتك دكتورة بقى
الاقيش عندك اتنين انتيبايوتك و لا مرهم تروماينيس

مبروك يا اجدع اوج بجد فرحت لك جدا على الدراسات و على الكتاب انتى تستاهلى كل خير و الله
ربنا يكرمك يا رب

reem يقول...

نوجا ...مبروك اولا وثانيا
اما بالنسبة لاسراء ...قولى لها احمد جاى ..هتلاقيها زى الفل D:
احم ..ده اسمى مكتوب!!!!!!
بتسيحى لى يا انجى ...دى اخرتها !!
لا ده كلام حلو ..مش سياح الحمد لله ...بس ماتقوليش كلام حلو كتير لاصدق بس وتبقى مصيبة!!!
بالنسبة لدكتور صلاح ..هو الحمد لله بخير ...باعت لك السلام كتيييير ...
اشوفك قريب يا الذ بنوتة ..واطيب صاحبة
**************
الفراغ
الله يخليكى يا طنط ...انجى بتبالغ فى تقدير لفتات بسيطة مش اكتر ..واكيد اتشرف بصداقة حضرتك
بس هو صلاح مش جوزى فى الواقع ..ده دكتورى وصديق للعائلة ..وبيعتبرنى زى بنته

عمرو يقول...

إنجي تاني
أصلي في المرة الأولانية كنت في الشغل فما عرفتش أرغي وانتي عارفة الإنسان طاقة
شوفي يا ستي القصة المأساوية دي بتاعة الحفلة وجعتني قوي. كان نفسي الحفلة تطلع منظمة ويندهوا اسمك وتقومي زي الطلبة الشطار في مسابقة أوائل الطلبة تستلمي جايزتك بس عموما خيرها في غيرها. قوليلي بقى انتي بتكتبي إيه؟ عشان لما أبقى أعرف عن مسابقة أبقى أقولك.. أصلك ما تعرفيش , أنا صاحب صاحبي وجدع وأعجبك مش زي واحدة صاحبتي
:)
بالنوسبة بقى لحكاية الماجستير فهي خطوة لابد منها لأن الشهادات في مصر فقدت قيمتها. متهيألي لازم كمان تكملي الدكتوراة بعد الماجستير كمان. استمري يا إنجي ابراهيم
بابا قبل كان كل امتحان يجيني في القوضة ويقولي "نم نوم العروس" مش عارف إيه اللي فكرني بالموضوع ده دلوقتي المهم
على فكرة أنا النهاردة نشرت بوست مخصوص عشان جملة يوم الأربع بعيد قوي يا عمرو دي وبعدي أفوجأ إنك ما قرتيش.. ينفع الكلام ده؟
يظهر إني اتعديت منك وبقيت بارغي كتير هههه
سلام بقى
:)

نعكشة يقول...

أنا ممكن أطلب طلب رخم و غبى

أنا مش معترضة تماماً إنك تردى فى أي وقت
أو مترديش
أو تردى على أى حد معين

بس معلش أعذرى تطفلى
و راعى عاجز مسكين معندهوش وقت

لو مثلاً موضوع و قررتى إنك متردش فيه على التعليقات
ابقى قولى
عشان مش كل ساعة أدخل و اشوف علقتى ولا لأ
ابقى قولة مثلاً كلمة السر بروروم
او حاجة

هاجى و هعلق عادى جداً زى ما أنا
بس مش كل شوية هاجى المدونة أضوف رديتى عالكلام ولا لأ

معلش أنا بس بطلب دة فى الفترة دية بالذات الكام شهر الجايين دول و بعد كدة كونى على راحة راحة راحة راحة راحتك
ردى انشالة بعدها بشهر هاجى و ابص برضو .. معلش عشان أنا من النوع اللى لما حاجة بتشغلنى بتشغلنى
وانا عندى امتحانات
و ساعدى عاجز مسكين
و حسنة قليلة تمنع بلاوى كتيرة

بصى معلومة على جمب
لو مش عاجبك أى كلمة من الكلام
ولا يهمك خالص
ولا كأنى قولته حتى
و ارميه ف اقرب باسكت

هفضل آجى و اعلق برضو
انا زى العلقة
معلش يعنى

يلا خير

سلام عليكِ

أسعد الله أيامك

Mo7ammed يقول...

ربنا يوفقك يا انجى

رمضان كريم

enjy يقول...

محمود محمد حسن:اه حلوة يا عم اللذيذ قلتلك ماما كانت مدير المكتب الفنى فلازم شوية كوسة........



مسدس صغير:ربنا يخليك يا فندم والله.....



نعكشة: اولا والله انا ببقى عايزة ارد عالتعليقات والله العظيم بس النت عندى اهبل هبل موردش فى اى حتة..البشرية كلها بيكون النت عندهم شغال ويفصل ساعات انا العكس...
اسراء دى صاحبتشى حضرتك متجوزة قريب وكدة وخايفة تقعد فى الشقة لوحدها واحمد مسافر فجت تقرفنا عادى جدا ..
بالنوسبة للمسابقة والله قلت نعكشة قالتلى هتكسبى سبحان الله..الحمد لله والله كان اسبوع حلو اوى حصلت فيه حاجات كتير جميلة..
طيب ابقى اشترى الكتاب يا نعكشة باتناشر جنيه مصرى بحالهم..شجعينا والنبى..
الماستر..اكيد لو فى فرصة هستغلها..انا نفسى اصلا..بس دة بالنسبة لجامعتنا احنا يتطلب كورسات بريتيش وانا واخدة اميريكان..ربنا يسهل بقى ويعديها على خير..
لا مش بتحشرى مناخيرك والله بس كل الاحداث اللى بعد كدة متعلقة بحد من اللى قلت اساميهم وانا عملت كدة لمجرد السياح الرخم بس لا غير..اصلى شريرة بطبعى.....بتنورى على فكرة..كل سنة وانتى زى الفل يارب...........




الفراغ:ربنا يعزك يارب يارب..طبعا احلى سلام للناس اللى بتقرا..تارات تراراتااااااااااا
ميرو اشترت ازازة ميا ب12جنيه من البرج اصلنا كنا فى برج القاهرة وهنموت من العطش فاشترينا بقى..على فكرة دكتور صلاح مش جوز ريم دة دكتور الاسنان بتاعها..على فكرة انا بحب الرز بلبن بالايس كريم لدرجة انى حلمت بيه..يللا خير..نورتى على فكرة والله بجد......



عادل:دووووووووووولة الكتاب اسمه عيش وحلاوة يا باشا روح اشتريه من مكتبة البلد...ربنا يخليك بس الدكتوراه انا هبقى اعزمك فى المناقشة..حاول تفضى نفسك............




سقراط:ربنا يعزك يا سقراط يارب ويقبل منك دعوتك الحلوة دى..........



فوكس:ربنا يخليك..الكتاب اسمه عيش وحلاوة اشتريه من مكتبة البلد.......




ديدى:ديدى هانم ازيييييييييييك...انا انجى تباريك؟؟ ربنا يعزك يارب يا ديدى دة انا حتى مسميينى انجى احباط..يللا خير الحمد لله على اى حاجة حلوة بتحصل لى الحمد لله والله من قلبى..
على فكرة انا كمان كان نفسى اكون مذيعة..انا بكتب عن تجاربى الشخصية احيان كتيرة مع تحريفات تخبى اللعبة دى..يعنى جزء من جوايا بيبقى عاش التجربة بس مش كلها والخيال بيكمل عشان تطلع مفهومة مش مبهمة...عموما انا مطلعش حاجة اصلا عشان اجاوبك يعنى يا فندم متشكرين عالتشجيع دة..

enjy يقول...

عمرو:ربنا يكرمك ويوفقك ويقدملك اللى فيه الخير ياااااااااارب...



موطن مصرى نايم:يا باشا ولا بتفرق معايا طب جرب كدة هتلاقينى بنم برضو عااااااادى جدا...
انت بتخلط بين التحول لمصاص دما والتحول لمذؤب والله ما انت نافع كدة ممكن ازعلك على فكرة...يللا حمد الله عالسلامة يا باشا.........



ريم:انتى مين قالك ان كلمة السر بتاعة اسراء هى احمد جاى؟؟؟؟
بينى وبينك كلام كتير هنقوله فى الخباثة..........



عمرو:اممممممم عشان كدة بقى...والنبى يخويا وجعتنى انا كمان..على فكرة المرة اللى اختارونى فيها فى اوائل الطلبة عييت وروحت للدكتور ومروحتش المسابقة..نيااااااااااهاهاهاااااا
انا بكتب مقال وكسبت فى المقال زى منت عارف يعنى ...ابقى قولى اه عشان انت صاحب صاحبك فعلا مش زى واحدة يععععع
ان شاء الله هكمل دكتوراه بعدها ربنا يسهل بس..هو يعنى ايه نم نوم العروس دى؟؟؟؟ مفهمتهاش على فكرة..عموما انا مبناش اصلا قبل الامتحانات..
انا مجيتش عشان النت كان فاصل وبايظ عاااااااادى جدا جدا...ارغى يا باشا انا بحبك ترغى........



نعكشة:انا رديت عالموضوع دة فى التعليق الاول بس بجد انا فعلا بيبقى نفسى ارد عليكى بس والله انا بقفش النت ساعات شغال مش على طول يعنى..دة الطبيعى بتاعنا.........



محمد:ربنا يخليك يا محمد..الله اكرم.......

واحده من الناس يقول...

بت يا انجى تخيلى حنا جيران ف مدونة عمرو من اد ايه ومزورتكيش ولا مره
ويوم ما اجى الاقى الدنيا زايطه كده
مبروك يا جميل على الفوز وعقبالنا اما نكسب ف مسابقة كرومبو
ههههههههه
ومبروك للماجستير اللى لسه مقبلوكيش فيه
وانشاء الله تتقبلى وتسقينا كركديه طبعا انا وعصابة استاذ عمرو طبعا

المهم بقا مش هرغى كتير
كل سنه وانتى طيبه ياقمر ورمضان كريم
انا كان عندى حاجات كتير قالبه دماغى الايام اللى فاتت عشان كده اتاخرت ف زيارتك
بس انا غبتى عن مدونة عمرو قلت اجى اشوف ايه الحكايه لقيت الدنيا مقلوه راسا على عقب
يالا الله يعينك
باى باى بقا وتعالى زورينى
زهره ربيعيه سابقا

Die يقول...

الفين وتسعه مبروك علشان المسابقة

وربنا يقويكي علشان المعترك القادم من بعيد عليكي الا وهو الماجستير

شكرا علي تعليقك علي مدونتي

و ارجو التواصل انشاء الله


dieorfree@yahoo.com

mr_ahlawy2005@hotmail.com

and in facebook

die or free

هتلاقي صورة كريس مارتن وهو بيشاور علي مخه

ثلام
وشكرا مرة تانيه

نعكشة يقول...

كل سنة و انتى طيبة :D

رمضان كريم
................

بالنوسبة لل اسمو اية نسيت

كل شوية انزل تحت و اطلع و هوه ف دماغى و آجى اكتبه انسى

لحظة

أيوة

بالنسبة للكورسات إن شاء الله هيوافقوا عليها
ربنا يعينك يا رب و يفتح عليكِ كدة بموضوع ماستر جديد و مبتكر و رسالة تفيد البشرية
و تحسى كدة بشعور من جواكِ إنك عملتى حاجة

بالنوسبة للتعليقات خلاص اوك .. وش أليط كدة و بيبص مش عارفة ازاى بس بألاطة ... هحاول أعذرك
ههههههههههه
مافى مشاقل ... و ربنا يجعل كلامنا خفيف عليهم
و انا هحاول اظبط امورى ف تنظيم الوقت و ربنا يستر

كان فيه حاجة كمان
..........
آه

ربنا يخلي يا رب العرورة لعريرها و يجمع بينهم ف الخير يا رب و يرزقهم الذرية الصالحة

و عقبالك عالعيد كدة
تيجي تقولى جالى عريس :)

سبحااااااااان الله ( الآذآن أذّن)
شكلك هيجيلك عريس عالعيد ولا حاجة

يلا ان شاء الله تستجاب الدعوة

.................

سيحي براحتك يا كوكو
مدونتك يا كوكو

.............
على فكرة مكتبة البلد دية عملت فيها اسراء حامد توقيع كتابها
و جبته
و كان تحفة

هبقى اجيب الكتاب إن شاء الله يا قمر
بإذن الله
بس آخر شهر عشرة كدة بإذن ربى
يلا

دعواتك بقة عشان رمضان
وعشان امتحاناتى ف العشرة الاواخر بعيد عنك
و عشان الحالة النفسية

الله يسعدلى أيامك

............

سلام عليكِ

micheal يقول...

كل سنة وأنتي طيبة وبالتوفيق في الماجستير وبإذن الله المرة الجاية مركز أول
:)
تحياتي

mariam يقول...

مبروووووك عالفوز :)..اسم الكتاب ايه؟

و ربنايعينك و يوفقك فى الدراسات العليا امين يا رب انشاءالله ...

و رمضان كريم :)

norahaty يقول...

مبروك الفوز والكتاب
عقبال الكتاب الخاص
وسلامةأسرررررررراء
الف سلامة عليها
اقولك أنا كمان
فى السريع اووووام
كل سنة وانتِ طيبة
رمضــــــان كريم
والله أعز وأكــرم