السبت، 12 سبتمبر 2009

فى فقه البهججة


هنا اللللللللللللللللللل بى بى سى..لالا معلش..هنا مدونتى انا انجى ابراهيم..
النهاردة عيد ميلادى..الساعة عدت 12 اذن احنا بقينا بكرة..بكرة اللى هو 12/9
انا كبرت يا بنى آدمين..بقى عندى واحد وعشرين سنة يعنى دلوقتى أقدر اتحكم فى كل أملاكى و أطيانى وعقاراتى ..و اتصرف فى كل الاموال بتاعتى ..نياااااااااهاهاهاااااااااااا..
خلاص مش هيبقى عندى عشرين سنة تانى..النهاردة قعدت أسمع امبارح كان عمرى عشرييييييييييين كان عمرى عشرين عشريييييييييين..مع انى والله ما فاهمة ولا نص كلمة من باقى الاغنية ومعرفش منير بيغنيها بأى لغة بس بحب الاغنية دى أوى يعنى..

أحكيلكوا بقى على ملابسات عيد ميلادى الواحد والعشرون..أختى عملت معايا احلى واجب..ادتنى فلوس اشحن موبايلى..وجابت لى لوح شوكولا من اللى بحبه..وجابت لى النهاردة عروسة سميتها فرانشيسكا..ايون هى فرانشيسكا اللى فوق فى الصورة دى..وماما هتغنى لى بكرة يا نور جديييييييد فى يوم سعيد دة عيد ميلاااااااادك أحلى عيد..اصلا ماما بايعة عليا اللى وراها واللى قدامها واللى جنبها ويللا الله يكون فى عونها..

كيكى صاحبتى الانتيخ.. عملت لى عيد ميلاد عالتليفون زى كل سنة وشغلتلى انزل يا جميل فى الساااااااحة واتمختر كدة بالراحة..طبعا انا كنت ماشية فى الشارع ساعتها بس كنت مبسوطة وميتة من الضحك..سبحان الله كيكى دى انا مكنتش اعرفها خالص..من سنة وشوية كنت عاملة عملية وكنا نعرف بعض من المدونة اخدت نمرتى من دعاء وكلمتنى..كنت تعبانة ومش قادرة اتكلم راحت معيطة فى التليفون وكانت بتكلمنى كتير عشان تطمن عليا..ومن ساعتها بقينا اصحاب..كل ما اروح القاهرة اشحططها معايا..واجيبلها شوكولا كادبورى سادة رشوة يعنى..

ايزولد..انا مش عارفة هما شلة كدة كلهم عرفتهم من عند عمرو السيد صاحب مدونة مرارة روح..انا روحت هناك وفجأتن بقى عندى اصحاب كتير..معرفش الناس دول بيحبونى من غير اى سبب منطقى..كلهم قالولى كل سنة وانا طيبة وايزولد عملت لى حفلة عندها فى المدونة وكلهم بيحتفلوا هناك..انا فرحت اوى بالبوست دة خصوصا ان ايزولد دلوقتى فى امريكا بترفع راسنا هناك وقالت انها هتفتح توقيت مصر على توقيت امريكا عشان نحتفل.. دة غير انها كان ممكن تكتفى بانها قالتلى كل سنة وانا طيبة فى تعليق هنا بس ايزولد دى اصلها شخص راقى جدا وجميلة اوى وحاجة كدة تتحب على طول ومبتاخدش بالها من الحاجات الوحشة بتشوف فى البنى ادمين الحاجات الحلوة بس..شخصية عجيبة اوى المشكلة انها لاقطة تفاصيل صغيرة اوى حاطاها كلها فى الحفلة يعنى مثلا التورتة بالنعناع..والمشروب كاكاو باللبن..يعنى حد غيرها ميعلقش معاه تفاصيل انا قلتها كدة عرضا يعنى..انا مبسووووووووطة بالحفلة دى اوى وفرحانة بتهنئة ابناء مدونة مرارة روح.. احمد الشمسى كان نوباتشى وعشان كدة جه قالى كل سنة وانا طيبة بدرى..الحركة دى فرحتنى جدا ..الناس دول حلوين اوى والله.. زهرة كمان قالتلى كل سنة وانا طيبة..زهرة صديقتى التى لا اعرفها ربنا يسعد اوقاتك يارب يارب وانتى فاهمة وانا فاهمة..جارة القمر بعتت لى ميل رقيييييق وفى تورتات حلوة اوى..بونبونة جت قالتلى كلام حلو اوى وراقى جدا دة غير انها اصلا كلامها كله حلو وعليها شوية نقد فنى يالهوى بيبقى نص ادبى لوحده اصلا..عمرو شخصيا برضو جه قالى كل سنة وانا طيبة دة غير انه فتح التعليقات عنده صفحة اجتماعيات بسببى..نيااااااااااهاهاهاااااااااا..

عبد الله غنيم قالى كل سنة وانا طيبة من يومين عشان يبقى اول واحد..دودى دة صاحبى واخويا وكفاءة ومعرفش يعنى من غيره الحياة كانت هتبقى عاملة ازاى..محمود محمد حسن هيجيبلى شوكولاتة ويدينى مالك الحزين اقراها بس معرفش الوعد دة كان فى وعيه وللا لا لانه مبيحبش يسلف كتبه لحد..وعنده حق الصراحة.. رورو ريم وجيه صاحبتى الجديدة الرقيقة العاقلة الامورة بغباء صاحبة صاحبها بجد اللى عندها استعداد تقعد تسمعنى بوررررررر سنة وتبقى مركزة وتقولى حلول كمان وغالبا بتبقى مواضيع تافهة ومكررة..قالتلى كل سنة وانا طيبة برضو بدرى وهنخرج نفطر برة ونحتفل لما ان شاء الله ربنا يفرجها علينا ونعرف نرتبها..كام رسالة موبايل حلوين كدة وصلونى وكام مكالمة موبايل اسعدونى اوى خاصة لو حد عارفة ان عنده زهايمر حاد ويفتكر دة يبقى سبق..باكينام لسة ماخدتش هديتها بس كانت عايزة تعمل لى عيد ميلاد عندها..اسراء واحمد برضو كانوا عايزين يعملولى عيد ميلاد عندهم.. رضوى برضو هتفسحنى بكرة ونحتفل بعيد ميلادى..انا مبسوطة ان كل دول فاكرينى وانى افرق معاهم كدة..


مش هتكلم بقى اى كلام حمصى عن انجازات السنة الفائتة ولا بقى الحاجات اللى عملتها والحاجات اللى معملتهاش..كفاية ان السنة اللى فاتت دى حصلت فيها كمية احداث بالهبل وخلاص...كل سنة وانتى طيبة يا انجى يارب السنة الجاية تبقى مرتاحة اكتر وتكونى متبهججة كدة على رأى عمرو السيد..كل سنة وانا طيبة بجد..


.........انجى ابراهيم.............
مداخلة: نعكشة..عملتى ايه فى الامتحان اللى كان عندك؟؟؟؟ لعلك وفقتى...يارب كمان باقى الامتحانات تكون كويسة ولطيفة يارب...

هناك 63 تعليقًا:

ريم وجيه يقول...

كل سنة وانتى طيبة يا نوجا
كل سنة وانتى انسانة جواكى طيب ورقيق زى ماانتى
كل سنة وانتى صاحبتى الجميلة ..وبنتنح للبحر سوا
ويارب كل سنة تكون اجمل من اللى قبلها وتحققى كل ماتتمنيه ويسعدك ويكون لك الخير فيه
بس فين نصيبى فى التورتة ؟؟
يعنى احنا اصحاب اه ...بس انا ما اعرفش حد فى نصيبى فى التورتة على فكرة!!!
كل سنة وانتى فرحانة ومطمئنة يارب يا نوجا

محمود محمد حسن يقول...

كل سنة وانتي طيبة يا انجي ..

هوا انا قلت شيكولاتة واسلفك مالك الحزين ؟؟!!!!! .. متأكدة ؟؟!!!

اصلي مش فاكر ؟؟!!!

على العموم يعني لو انتي فاكرة خلاص يعني .. !!!...!!!!...!!!!

متأكدة ؟؟!!!


:)))))

جارة القمر يقول...

كل سنة وانتى طيبة يا قمر و عقبال مليوووووووون سنة يارب و دايما ناجحة و مبسوطين و فخورين بيكى كدا دايما

ponpona يقول...

بنت يا أنجي عارفه أنا لو عندي مدونه
والله كنت عملتلك فرح أنا كمان

أقولك ايه أنا لسه حالا جايه من عند أيزولد

بجد دي أحسن حفله حضرتها ف حياتي

سأذهب الآن ، وسأصنع لكي زهرة بيضاء ...
أثبت فيها جناحين صغيرين وأدعها ترتفع
وهي بالتأكيد تعرف الطريق
فالهدايا الصغيره لا تضل طريقها أبدا ...
أنا أعلم هذا

:)

adel يقول...

اولا كل سنة و انتي طيبة و عقبال مليون سنة و اشوفك كده اكبر دكتورة طب نفسي و شغالة في مكتب محامي و مسؤلة عن الري

ثانيا : انا معرفش بجد الا دلوقتي و البت كيكي دي مقلتليش :(
لانك انتي وهي مش بشوفكم علي الميل
بس لما اشوفها و بقولها مقدما لو هاشوفك الحد في اللقاء هيبقي يوم بجد :@:@

ثالثا : تعالي القاهرة و هديتك عندي و انا احتمال اجي اسكندرية علي 10-10 مع باقي الناس و لو جيت قبل كده هاقولك و ساعاتها هاجيبلك هديتك

رابعا : اسمي مش مكتوب
عملوها الابطال
ياريتني كنت معاهم
:(:( :'(

Eslam Eldosoky يقول...

كل سنه وأنتي طيبة
كل سنه وأنتِ إنجى
تحياتى يا دكتور

روابط يقول...

كل عام وأنت بخير وصحة وسعادة, ورمضان كريم

تحياتى

KEBLAWYAT يقول...

كل سنه وحضرتك طيبه يا فندم

مبروك حق التصرف فى الأطيان :D

الست فرويد يقول...

عيد ميلاد سعيد يا انجى
وكل سنة وانت جميلة ورقيقة كده
وبخير وسعادة يارب

Mohammed Salaheldeen يقول...

اولا كل سنه وانتي طيبه وعايز حته من حرف التورته بس اتوصي بالكريمه اللباني
وكبايه حاجه ساقعه وتبقي عملتي الواجب
وعداكي العيب وأزح
ثانيا مبروك على ضياع املاكك من دلوقتي مقدما
ثالثا اثبتي على 21 سنه عشان البنات مبيحبوش يكبرو خليكي 21 للابد بقا
وبعدين رشوه باكو شيكولاته ...طب اديها 500 جنيه ناشفين تجيب اللي هي عايزاه اشعرفك مش جايز مش بتحب الشكولاته

يلا المهم كل سنه وانتي طيبه وان شاء الله السنه دي تكون احلى واحلى من السنه اللي فاتت

مدحت محمد يقول...

كل سنة وانتى طيبة وعقبال ميت سنة

نعكشة يقول...

وش واحدة حاطة ايدها على خدها و مبتسمة
و بربشت مرتين بعنها

ربنا يسعد ايامك يا رب يا نوجا
لا مش عاجبانى نوجا مع انها طلعت كدة

طب عامة عامة انا اول ما دخلت بيتنا
غيرت هدومى
و غسلت رجليتى
وص ليت الظهر
و فتحت المدونة بتاعتك اشوف لو فيه بوست
لاقيت البوست دة
صحابى خبطوا
قعدنا نشتم فى ام الامتحان
وفتحت اقول يا رب يا رب الاقى حاجة تبسطنى

انا مبسوطة قوى
رغم ان الامتحان كان قرف صراحة
بس بجد
تسلم مدونتك
عارفة
ساعات كدة
لما باجى هنا ببقى محتاجة اجى هنا
كذا مرة اجى وانا مكتئبة
يا اما اضحك
يا اما ابص وانا مبسوط
وساعات باجى بكتئب اكتر والاقى الحال من بعضة
فبصبر نفسى و ادعيلنا

كل سنة وانتى دايما يا رب
يا رب
يااااااااااااااا رب
سعيدة و مبسوطة و ربنا راضى عنك
و محققه كل اللى نفصسك فيه

.........
بحس بالاوحراج على فكرة
مش بستريح انا كدة
...................
بس عامة هما امتحانين لحد دلوقتى
الاول عجيب
و الثانى عقيم

الحمد لله
و إنا لله و إنا إليه راجعون

سيبك انتِ
والله ادخلتى السرور على قلبى

تسلمى

سلام عليكِ

mariam يقول...

:) :) :) :) :) :) :) :) :) :)

كل سنة وانتى طيبة و حلوةو امورة و لذيذة و بتدونى فى مدونتك الحلوة يا انوجة :) و عقبال سنين كتيييييييييييييييييييرة اوى تحققى فيها احلامك انشاء الله و بأذن الله سنة سعيدة عليكى ..و عقبال كدة منلاقى بوست فيه صورة فرحك و نزغرطلك مع انى مش بعرف ازغرط :) بس يوم فرحك هزغرط انشاء الله و انا فى بيتنا قدام الكمبيوتر و تطلع زى متطلع بقى D:
يا رب تحققى كل اللى نفسك فيه و ربنا يوفقك فى شغل جديد و تلاقى نفسك فيه ....سلامى لفرنشيسكا اسمها حلو وهى امورة..هجيب لبة عروستى الصدوقة و اعرفهم على بعض من وراء الشاشة :)...سلام و استمتعى انهارده

عمرو يقول...

كل سنة وانتي متبهججة يا إنجي
على فكرة مش لازم يكون فيه سبب لحب لأنه لا يخضع للمنطق خالص.. دي مشاعر يا بنتي
كل سنة واحنا فرحانين بيكي
:)

blue-wave يقول...

كل سنه وانتى بالف الف خير

noon kiko يقول...

بصى يابت يا فقريه انتى
انا خالتى زفت اولا الكمبيوتر فرقع
اى والله فرقع من ييجى اربع تيام وكنت هتشل ونزلت ف عز الضهر وديته لواحد اعرفه يصلحه قاللى ده قرب يطلع معاش
عيطت على يوتوبيا اوى
جهازى اسمه يوتوبيا
والله ده مسلينى
يامهشتكنى يامبشتكنى
المهم ضربنا نسخة الويندوز
وروحت
لقيت النت فاصل
قعدت الطم
اتصلت بصاحب وصلة النت ياعم صلحه قاللى متصلح
بس فاصل عندى
طلعت تظبيطات النت عندى ع الجهاز بايظه
قمت ظبطته
بعدها سيادته رفض رفضا تاما يجيب لى اى مدونه
وانا ابكى
وبعد معاناه بقا يجيبهالى عشر دقايق بس
ويفصل
انا برغى ده كله ليه
عشان تعرفى انى والله العظيم كنت هعمل بوست مخصوص لحضرتك واقولك فيه كل سنه وانتى طيبه يابت يا انجى يا عسوله انتى
بس اعمل ايه حظك فقرى

بالنسبه لسؤالك السهن عندى
بلاش تنخورى يابت ف الكلام الكبير
بس عارفه يا انجى بجد نفسى احكيلك واتكلم معاكى
بقولك
ابقى بجد سبيلى اميلك
عايزه اسيبلك اوف لاينات رغى كتيررررررررررر
يالا بقا كفايانى رغى
امشى بقا
وكل سنه وانت طيبه يا ام عزب واطيان وعقرات
عملناها قبلك وعدينا العشرين
ولا مال ومحتال يا حسره
يالا اللى خدته القرعه
ابقى انزلى يابت سوهاج واحنا نعمل معاكى اجدعها واجب وابقى قولى

:)

غير معرف يقول...

حبيبىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى
كل سنة وانت طيب@@@@@@@
انا مش عارفة اكلم دلوقتى بس مينفعش كل دلوا يسبقونى عاااااااااااا
انا مش هتنمالك غير امنية واحد ياااارب الانبساط دة مايروح منك ويارب عمر ماحد يخزلك تانى فى حياتك
انت يا بو جودة عايز ايه يااد انت معناها ايه دى ان شاء الله@@@@@@@@@
مفهمتش حاجة من كومنتك
طب كنت جبتلى ليا انا هدية انا الاقرب انت مش بتشوف ولا ايه؟؟!!
هاجئ تانى بس لمة وولاد خالتى ينزلوا اه صحيح انتى شوفتى البوست بتاع عيد ميلادك ها
عوووووووووو

إيناس حليم يقول...

هههههه
انتي عسل والله يا انجي :)
كل سنة وانتي طيبة وسعيدة يا رب وسنينك الجيا تبقى اجمل واسعد من اللي فاتت بإذن الله
اكيد انتي شخصية عسولة والا مكنش بقى عندك صحاب حلوين وبيحبوكي كدة
ربنا يخلهوملك ويخليكي ليهم :)

أسما يقول...

:)

عقبال (عايزاهم كام؟) سنة... هع هع هع

نطفي الشمع بقي... هوفففف

هييييييه :)

ponpona يقول...

ايييييه دا .. هتطفو الشمع من غيري !!

استنوا ... ياللا ياجماعه هنطفي الشمع

سيبو الجاتو دلوقتي وقومو ياللا .. الله
هابعت لأيزولد تجيبلكو تاني جاتو أمريكاني

ياللا بقي
ضموا علي بعض كده شويه عشان كلنا نطلع ف الصوره

أيون ... اكده مظبووط

اضحكو ياللا ياولاد

1 ... 2 ... 3

هييييه

كليك

ياللا يا انجي
ايه رأيك بقي .. حلوه الصوره ؟
آديك طالعه ف النص أهو زي القمر
و أنا اللي واقفه هناااك ع اليمين دي

:)

Unknown يقول...

ريم : طب يا رورو على فكرة قدامك عدد اتنين يوم لو مخرجناش نفطر برة انا هفجر نفسى........



محمود محمد حسن:لالا الرجالة مبيرجعوش فى كلامهم...وانا عارفة انك راجل..احرجتك صح؟؟ نياااااااهاهاهاااااااااا........




جارة القمر:ربنا يخليكى يا رب والله دعوتين زى الفل..يارب يجعلى فيهم نصيب ويتقبل منك..........




بونبونة:هى فعلا حفلة محصلتش انتى متتخيليش انا ازاى فرحانة بالحفلة دى...على فكرة الوردة اكيد مش هتضل طريقها عشان انتى اللى عاملاها..انتى بجد احساسك حلو اوى وعالى جدا........




عادل:لا انا عايزة ابقى مهندسة وافتح صيدلية هع هع هع..انا عارفة يا باشا الغلط على كيكى طبعا ..بجد هتيجى اللقاء بتاع اسكندرية..بجد انا نفسى تيجى اوى يارب ينفع معاك وتيجى ..اسمك مش مكتوب؟؟ نكتبه يا باشا انت تؤمر.........




اسلام الدسوقى:ربنا يخليك يارب بس يارب تكون انجى دى حلوة لدرجة انى افضل هى على طول...........




حازم سويلم:ربنا يخليك وانت طيب يارب........





قبلاوى:وانت طيب..انت صدقت؟؟دة انا من الشعب............





الست فرويد:وانتى طيبة يارب ربنا يخليكى...........





ms3a-miso:اولا ايه يا عم الاسامى الصعبة دى تحيا مصر...حاضر بس مفيش تورتة اصلا والله..يمشى معاك ايس كريم؟؟
ثالثا املاكى ضاعت اه الثورة اممتها..وعلى فكرة انا عايزة اكبر مش عايزة اثبت..انت منور على فكرة والله ابقى تعالى كتير............





محمد مدحت:وانت طيب يارب.........

Unknown يقول...

نعكشة :بتعجبنى الوشوش اللى انتى بتوصفيها كل مرة..وانتى طيبة يا مريم ونوجا لو مش عاجبك متقوليهوش تانى انتى تلاقيكى علقت معاكى من تعليق ريم بس.....
طب يعنى مدونتى اول حاجة عملتيها بعد ما جيتى من الكلية؟؟؟
الحمد لله انك ساعات المدونة بتغير مودك للاحسن يارب دايما..
الامتحان كان قرف؟؟ مش مهم اكيد الجاى احسن المهم تركزى وتنسى اللى خلص خلاص وطالما كلهم بيقولوا نفس الكلام يبقى العيب مش فيكى..
انا عارفة انك مش بترتاحى من الحركة اللى انا عملتها دى بس انا كنت هسال عليكى ازاى؟؟ منا مكنتش ضامنة انك هتيجى تقوليلى اخبار الامتحان من غير ما اسالك..طب خير عموما..المهم انى اطمنت..ايون انانية دى المهم اطمن..
يارب الامتحانات الجاية تكون احسن..الحمد لله انى ادخلت السرور على قلبك..ادعيلى يدخل السرور على قلبى انا كمان..ادعيلى بجد...........






مريم:انتى يا بت يا سيدة العالم انتى مبتجيش ليه؟؟؟؟
وانتى طيبة يارب وبعدين فرحى اكيد كلنا هنزغرط مع بعضشينا..عجبتك فرانشيسكا؟؟ ابقى عرفى عروستك عليها بقى..الا هى عروستك اسمها ايه؟؟؟




عمرو:وانت متبهجج يا عمور..حلو مصطلح بهججة دة اوى والله..الحب لا يخضع للمنطق فعلا..الحمد لله..............





بلو ويف:وانت طيب وبالف خير.........





واحدة من الناس:اييييييييييون انا عارفة الحالة دى..كنت كل يومين اشيل الجثة وانزل بيها لحمدى واصلحه يرجع يبوظ تانى..عارفة عارفة..نيااااااااهاههاهاااااا
بالنسبة للكلام السهن انا هسيبلك ايميلى ونقعد نلوكلوك ونرغى براحتنا بقاااااااا واعرف كل المستخبى..
بالنسبة للاطيان والعقارات احم احم انا من الشعب دة شوية هجص كدة عالماشى..عايزانى اروح سوهاج؟؟ طب متيجى انتى تصيفى وانا اعمل معاكى واجب برضو.............





غير معرف اللى هى كيكى:انتيختى..ادعى ادعى يارب يسمع منك..هبقى الوك لوك معاكى بعدين مش هنا..متجيبى بوسة.............





ايناس حليم:ربنا يخليكى يا ايناس وانتى طيبة يارب..ممكن اكون عسولة وممكن يكونوا هما اطيب من اللازم.............




ايزولد:عايزاهم كام؟؟ عايزة اموت بصحتى يا بنتى كح كح كح ..هنطفى الشمع اه يللا بينا هففففففف هييييييييه
بس طبعا الحفلة اللى عندك هى اللى حفلة اللى هنا دة عك كدة عالماشى..للا نطفى الشمع اللى عندك..........





بونبونة:لالا نطفوا الشمع من غيرك؟؟؟ لا طبعا ايه التهريج دة..بس تصدقى حلوة اوى الصورة..بجد حلوة مكنتش اعرف انها هتطلع حلوة كدة..وانتى قمر فى الصورة والله والطقم اللى انتى لابساه كمان يجنن..لايق على الاضاءة اوى نياااااااااااااهاهاهاااااااااا
بس ازاى حكاية الصورة دى جت فى بالك؟؟؟؟
والله انتى تحفة وعسووووووووولة بونبونة فعلا لايق عليقى الاسم..........

غير معرف يقول...

كل سنه وانتي انتي .. :)

"أحلام حقيقية" يقول...

كل سنة وانتى طيبة ياانجى عقبال يارب ما تحتفلى بعيد ميلاد كل سنة فى وسط الناس اللى بتحبيهم والغريبة انك فرحانة انك كبرتى سنة :)

كراكيب يقول...
أزال المؤلف هذا التعليق.
كراكيب يقول...

http://krakeeb-miro.blogspot.com/2009/09/blog-post.html

ايه البت الرخمة دي.. طب انا كتبت البوست ده قبل ما اشوف انك كاتبة عن عيد ميلادك
يووووووووووووه بقى

noon kiko يقول...

وحشتينى كده ولقيتنى مبسوطه كده
قلت اجى كده اسلم كده وامشى
وحشتينى ياقمره انتى يا ام واحد وعشرين سنه
يابت انتى اخبارك ايه
مش عارفه ايوتها خبر عنك غير من جرايد المعارضه
عمالين يقولوا انجى ابراهيم هتترشح لكرسى الرئاسه واقول لا ممكن ابدا
ازاى
دى البت لسه ف عز شبابها
هنضحى بيه بدرى كده
يالا معلش
فدانا
نموت نموت
ويحيى الرئيس
ههههههههه
طبعا مالى كده مش طبيعيه
مش عاره بقا
المهم
اكيد طبعا هتنتظرينى ان شاء الله السنه الجايه هصيف عندكم
ده لو لسه فيكى النفس
طبعا لان الحكومه بعد ماهتشم خبر ترشحك للرئاسه هتقطع خبرك
وتقول قضاء وقدر
مالى كده مهيسه خالص
مش مهم
المهم انى كنت عايزه حبة لكلكه ولقيتك اولا من الغريب
ومالها سوهاج
انتى مبتحضريش الرحايا ولا ايه؟
احضريه طيب
وانتى تشوفى بلدنا حلوه ازاى
المهم ياسكره
اروح مشوار لحد امى وارجع اكمل رغى
سلاموزا
:)

Unknown يقول...

هاجر زعبل:وانتى طيبة يا جوجو.......




احلام حقيقية:وانتى طيبة يارب..انا فرحانة اه بس لاسباب مختلفة خالص عن اللى فى دماغك..معظمها اسباب سوداوية............




كراكيب:طب ارد عالبوست بتاعك اقول ايه؟؟؟؟ مفيش رد عندى غير انى والله بحبك...........



واحدة من الناس:زهزه مالك يا بنتى انتى سخنة وللا ايه؟؟؟ قلقتينى عليكى..بجد هتيجى تصيفى هنا؟؟؟ مستنياكى يا جمييييييييييييل........

mariam يقول...

انتى يا بت يا سيدة العالم...والله ضحكتينى ازاى سيدة العالم يتقالها يا بت ..كدة انتى بعترتى برستيج اللقب المتواضع جدا اخر بعترة :)

بس بجد متزعليش والله غصب عنى.. رمضان بقى انتى عارفة.. اصلا مش بلحق اعمل حاجة بس اول منفع جيت عندك اهو على طول ..انا اقدر بردو ده انا حبيتك من اول بوست :)

بس قريت اللى فاتنى و عجبتنى اوى انهزام احمق ..تحفة يا انجى بجد و طريقة الأيام و التاريخ اللى استخدمتيها حلوة اوى و اغنية هشام عباس بحبها جداا و اغنية فيروز و باك ستريت بويز ..و كمان عرفت اخبارك ..ايوة عرفت انك سبتى الشغل صح!!!..بس انا مش عايزة اكلمك فحاجة انتهت خلاص ..ادام سبتيه يبقى اكيد مستريحتيش ...بس بأذن الله تلاقى مكان تانى و تنجحى و تكونى مستريحة فيه انشاء الله

عروستى الصدوقة اسمها (لبة)..اتعرفت عليها قبل امتحناتى على طول هى صغنتوتة كدةمتعديش ال 7 سم عبارة عن راس طلعلها عروسة :) لأ متضجكيش لو سمحتى عيب تضحكى على لبتى انا بس اللى اضحك ..تحبى يعنى اضحك على فرانشيسكا.. هااااه؟؟! ..D: اكملك.. بنتواصل انا و لبة ذهنيا اخدتها معايا فى كل الأمتحانات بحطها جنبى.. لما اتوتر او حاجة ابصلها و ابدأ اتواصل معاها ذهنيا اقولها فاكرة الحتة دى شرحتهالك امبارح تقولى اه اقولها طب فكرينى تقولى لأ انتى هتفتكرى لوحدك و ارجع ابوص فى الورقة ولا بفتكر لوحدى ولا حاجة :)

طولت عليكى كالعادة بس كنت مفتقداكى والله و كل سنة و انتى طيبة سلامى لفرانشيسكا :)

VÖltaa يقول...

مين فين ؟
اانا فاكر انى رديت هنا يارداالة !!

هوه ردى اتمسح ولا ايه
اللى بنعمله عالناس هيطلع علينا ولااييييييييه


طب كل سنة وانتى طيبة
لحد مانشوف اللى حصل ده

أميرة علي كوكب مهجور يقول...

كل سنة وانتي طيبة يا انجي وبعودة الايام تفرحي وتتهنئ وفي عيدك نغني ونضربك سلام:)

كل سنة وانتي قمر يا قمر وايامك كلها سكر زيادة وربنا يحقلك كل اللي بتتمنيه

أبو العريف يقول...

كل سنه وانت طيبه يا انجي

وعقبال 22 سنه

وساعتها يكون منير عمل غنوة

امبارح كان عمري واحد وعشرين

اه نسيت اقولك

دي فلكلور جزائري

نعكشة يقول...

معنديش حاجة اقولها

فقولت بقة اية
بق اية بقة اية
اى حاجة تقوليها والسلام

الامتحان انهارة كان حلو

اينعم غلطت
بس حسيت اوان بجاوب الامتحان بواحدة كانت بتدرس المادة دية
و فاهمة الكلام المكتوب

اة انا احب افهم و اغلط
مش ابقى طور الله فى برسيمة قدام ورقة الاسئلة

مممممممممممممم

معنديش حاجة اقولها


امبارح كنت جيت بليل
عشان اقول اى حاجة
حكم كنت مخنوقة قوى
و جيت
و فتحت صفحة التعليقات
و بعدين ملاقتش حاجة اقولها
و بعدين كنت هقول كلام غم
واحنا عندنا عيد ميلاد
فمقولتش بقة

الحمد لله
انا مبسوط دلوقتى

مش مبسوط مبسوط يعنى
مرتاحة
مش مكفهرة ولا موتضايقة

حاسة انى راضية

رغم انى مبحبش عمرو خالد
بس سمعته انهاردة وانا مروحة
مروحة ولا تكييف

المهم يعنى
سمعته و كان بيتكلم اننا لازم نبقى راضيين
فقولت لازم ارضى
اقول انى راضية
لحد ما ابقى راضية قلباً و قالباً

يا رب يا رب يا رب يرزقنا الرضا
ارضى عنا يا رب
و خلينا راضيين
ونحس من جوانا قوى بالرضا يا رب
محتاجين الرضا يا رب
يا رب
انا
و انتِ
و كل المسلمين

..............

لو عندك حاجة تخلينى ارغى باقى قولى
عشان نفسى ارغى

هروح انام عشان منمتش كويس

سلامٌ عليكِ أيتها السيدة الفاضلة

نعكشة يقول...

معلش رخامة حكم انا نفسى ارغى

اقتباس من mariam
" لما اتوتر او حاجة ابصلها و ابدأ اتواصل معاها ذهنيا اقولها فاكرة الحتة دى شرحتهالك امبارح تقولى اه اقولها طب فكرينى تقولى لأ انتى هتفتكرى لوحدك و ارجع ابوص فى الورقة ولا بفتكر لوحدى ولا حاجة :) "

انا ركزت قوى
و حسيت انى نفسى يبقى عندى عروسة اشرحلها
عشان تفكرنى
بس فى الاخر ضحكت قوى

لأ مش حاسة كدة انك حسيتى انى ضحكت
حسيتى انى ضحكت؟؟
والله ضحكت
هههههههههههه
لأ بجد مش بهرهر
اقولك
انتِ سكر

يلا سلاح

Unknown يقول...

مريم:انتى يا بت يا سيدة العالم..هع هع هع متنسيش ان انا اللى خلعت عليكى اللقب يعنى من حقى اعك براحتى..المهم..طب هعذرك كل سنة وانتى طيبة بس بعد العيد بقى لازمن تيجى تثبتى حضور كل مرة..
حلو انهزام احمق؟؟؟ عجبتك؟؟ يعنى مش مشوشة ولا حاجة؟؟ وبتاعة كيفك انت كمان عجبتك؟؟ طب الحمد لله والله مع انى كنت خايفة منها حسيتها تقليدية..
انا كمان بحب الاغنيات دى..اكيد واضح..
سبت الشغل انا..وطالما عرفتى يبقى اكيد شفتى ردى على نعكشة..انتى ايه رايك طيب بعد ما عرفتى ملابسات الموضوع؟؟
على فكرة عاجبانى علاقتك بلبة اوى وكمان اسمها حلو خليتينى احب فرانشيسكا اكتر..والله بحبك يا بت يا مريم يا سيدة العالم انتى..





محمد:اللى بنعمله فى الناس هيطلع علينا وللا ايييييييييه؟؟؟
الاستاذ رمضان ابو سرة؟؟انا اللهو الخفى...طب وانت طيب لحد ما نشوف عاطف مين اللى خطفه............





اميرة على كوكب مهجور:وانتى طيبة وشكرا عالدعوات يارب يجعل لى فيها نصيب..........




ابو العريف:امبارح كان عمرى واحد وعشرين والله حلوة واهى تبقى تغيير برضو..اه عرفت انها جزائرى قالولى..........





نعكشة:اييييييييييييون انا بحب كدة زيك بالظبط..عارفة ممكن اكون قاعدة محتاسة فى امتحان وغالبا مابيكون احصاء سيكولوجى بس مبسوطة انى فاهمة الراجل عايز منى ايه...ومبحبش الامتحان اللى يحسسنى بالعته المغولى ويستهين بذكائى...ومبحبش انا استهين بذكائى ومذاكرش وابقى قاعدة فى اللجنة حمارة ولا فاهمة حاجة..

انا موافقة نتكلم عن الرضا..انا مش عارفة اوصل للرضا دة خالص..معرفش مهما حصل والله طول الوقت فى حاجة منغصة عليا عيشتى..كتير بدعى انى ارضى والله كل يوم عالفطار بقول اللهم ارضنى..وكتير وانا ساجدة..دة انا حطاها رسالة ترحيب عالموبايل عشان كل ما افتحه اقولها وبرضو مفيش فايدة..

انا عبد غير شاكر..ليه؟؟ لانه مقصر ومنيل بستين نيلة..معرفش بقى انا عارفة ان العيب فيا بس مش عارفة اصلحه..عامل زى مايكون بعند مع نفسى..

طب متدعيلى؟؟ انا فرحت لما قلتى ربنا يرضينا..انا حتى باوصى كل الناس يدعولى كدة..بس تفتكرى حتى لو انتى ربنا بيتقبل منك الدعاء هيتقبله لحد زيي؟؟؟ مهو انا اصلا مستاهلش يبقى هيقبله منك ازاى؟؟

على فكرة انا كمان عجبتنى الحكاية بتاعة بتواصل ذهنيا مع العروسة دى..انا امبارح الفجر كنت قاعدة بكتب فى الكراسة الزرقا وبصيت جنبى لقيت فرانشيسكا بتبص عليا..فرحت..ايه الهبل دة؟؟؟ مش مهم عادى عادى...ربنا يوفقك فى الامتحانات الباقية..........

غير معرف يقول...

كل سنة و انت بخير
من الأردن ....

بسمة انور يقول...

كوووووووووووووووووووووووووووووووووووووووووووووووول سنة وانتى طيبه
وكووووووووووووووووووووووووووووووووووووووول سنة وانتى سعيده ومبسوطة
وكوووووووووووووووووووووووووووووووووووووووول سنة وانتى قمراية المدونين
وكووووووووووووووووووووووووووووووووووووووول سنة وانتى مرتاحه يارب دايما

عقبال السنة الـ1000002010001230 ياااااااااااااااااااااارب

مصعب رجب يقول...

كل سنة وانتي طيبة
وعقبال 1000 سنة
وكلهم في طاعة الله
تحياتي واعتذاري على التأخير
مصعب رجب

نعكشة يقول...

ممممممممممممممممممممممم
كنت ناوية ارد الصبح
بس معرفتش
عندى مشكلة فى انى لما حاجة بتلعب فى دماغى ببقى بتنطط جوايا عايزة اعملها عايزة اعملها

عامة
طيب

الرضا

مين جاب السيرة
( وش واحدة بتضحك بشئ من الخوف و الريبة)
هم

بصى
انا هتناسى خالص
تماما
انى تقريبا اللى كتبتيه يمثلنى
و انى اسوء مما تقولين حالاً
هتناسى دة كله
و اقولك ازاى نحاول نرضى نفسنا و نخلى ربنا راضى عنا
ولا اقولك
مش هتناسى
انا حالتى كدة تقريبا
و يمكن انيل

اصل المشكلة ان الموضوع انهاردة بالذات
تداخل مع حالة من النفاق و الرياء و الغشاوة على القلب ماسكة فيا لحد ما قعدت اعيط فى وسط الشارع و عملتلهم فضيحة

المصيبة بقة يا ( برهة من التفكير مش عارفة اناديكى باية)
المهم
المصيبة ان صحابى اللى حواليا
فاكرنى بعيط خشوع
حسيت انى منافقة قوى
ببشاعة
وبقيت بعيط زيادة
انهم افتكرونى آل إيه كويسة و قلبى حلو و بعيط

وانا كنت بعيط اصلاً عشان طول صلاة التراوييح محستش بولا كلمة من اللى الراجل قالها
والراجل يعيططططططططططططط
وانا واقفة زى الصنم
دخلت فى حتة تانية صح

بس اصلى مش عارفة ليه انا حاسة بغشاوة كدة على قلبى
مش حاسة بحاجة
مش حاسة برمضان
مش حاسة انه راح منى و معملتش حاجة
مش متضايقة
انا متضايقة انى مش متضايقة

حتة كمان كدة عشان كان نفسى اتكلم فيها و ملاقتش حد اكلمه

عارفة
وساويسى دلوقتى شغالة تقولى
انك كدة بترائى
رياء يعنى
انىب قولك الكلام دة
بس انا بالعند فى نفسى مش همسحة
عشان نفسى حد يقولى اتنيل اعمل اية

حاسة انى عندى فصام او سكيزوفرينيا

سيبك من دية

حتة كدة على جمب و ارجع لموضوع الرضا

عندى نفاق بشع

كل الناس شايفانى بصورة
وانا حاجة تانية خالص

اسئلى اى واحدة من صاحباتى عنى
هيقولولك دى طيبة و خدومة و ى وى وى
وانا نيلة نيلة يعنى
اهلى تقريباً هيتبروا منى و من اخلاقى

بصى مش هقولك مباحولش
وخصوصاً مع والدتى

بس مبعرفش .. كتير بفشل
هفضل احاول اوك

غير الاخلاق
حتى الافعال اللى بعملها
طبعاً مش هقول اللى بعمله عشان مبقاش بجهر بالمعاصى
بس
بعمل بلاوى بلاوى يعنى
اللى فقعلى مرارتى
انهاردة صحبتى وانا بعيط
تقولى انتى كدة كويسة
كويسة مين يا ماما
انتى مش عارفة باللى جوة
قلبى لسة اسود و منيل بستين قرف
و مش حاسة بحاجة

اة حتة كمان
معلش بقة اصل نفسى ارغى من زمان قوى قوى قوى قوى قوى قوى قوى لحد حتت بعيدة
راعى واحدة غلبانة عندها صحاب بالهبل و مبتحكيش لحد حاجة ولا حتى اهلها

كنت من فترة بقول يا رب نفسى اموت بقة عشان اتعذب و اخلص
كنت واقفة انهاردة و الراجل بيشوى الدرة
واقفة متسمرة قدام النار اللى هيا ولا حاجة جمب نار الاخرة
و الشرارة تطلع منها وا لناس تبعد
وانا كمان ابعد خايفة لحسن تدخل فى عينى
او تيجى على هدومى
بصيت لنفسى بقرف كدة
من جوة
وانا لسة باصة للحطب
و قولت اذا كان خايفة لحسن الشرارة تلسع هدومك
بتقولى اموت بقة و خلاص عشان اتعذب و اخلص؟؟؟؟!!! انتى هبلة؟؟

انهاردة الصبح صحيت على آيه بتقول ( فإنها لا تعمى الأبصار ولكن تعمى القلوب التى فى الصدور )الحج
قولت يمكن صدفة
وبعدين بيقول ( و يستعجلونك بالعذاب و لن يخلف الله وعده و إن يوماً عند ربك كألفِ سنةٍ مما تعدون )الحج
الّه؟؟؟؟؟ إية دة بقة.. انت بتكلمنى يا عم
انا بقيت اخاف اقول يا رب اموت عشان اتعذب و خلاص
و بقيت بخاف اعيش عشان مرتكبش ذنوب اكتر من الذنوب اللى عندى
وبقيت بخاف اموت لحسن ماتوبش
بقيت خايفة من كل حاجة

واحد قاللى فى احدى ذلاتى يعنى ( اعرفى الله حق معرفة )
و بعدين سمعت الراجل بيقول ( و ما قدروا الله حق قدره إن الله لقويٌّ عزيز)
الحج
ربنا مش محتاجلى فى اى شاء
( ما أريد منهم من رزق و ما أريد أن يطعمون) الذاريات

بس ربنا برضو قال فى حديث قدسي ( أنا عند ظن عبدى بي)
أوم إيه .. أنا أصلاً عارفة الحديث دة
كنت ساعتها ( الكلام دة من اسبوعين تقريباً) المهم يعنى كنت ساعتها
بقول
ربنا مش هيغفرلى ولا يرضة عنى
لإنى تيــــــــــــت سيل من الشتايم
بس أنا هفضل أصلى و ادعى و اطلب منه يهدينى فلما اهتدى ادعى ساعتها إنه يغفرلى
(سورى التعليق مكفاش فهكمله تحت)

نعكشة يقول...

المهم يعنى
كنت بقول كدة لنفسى
و فتحت كتاب الاحاديث القدسية على أى صفحة
طلعلى الحديث دة
ألّه .. طب مانا عارفاه
طب ما تقرى التفسير بتاعه؟؟؟
استنى اروح اجيبلك التفسير
ههههههههههههههه

خرجت من الاوضة
قمت عملتلى سندوتش جبنه و رجعت الاوضة تانى
و بعدين افتكرت انى اصلاً خارجة عشان اجيب كتاب الاحاديث القديسة
والله انا عاتهه
هههههههه

سبحان الله
جيت افتحه
قام فتح على الحديث دة

المهم اسمعى

يقول الله تعالى ( أنا عند ظن عبدى بى) أى إن ظن أنى أقبل أعماله - ركزى - الصالحة و اثيبه عليها ، و اغفر له إن تاب ، فله ذلك منى . و إن ظن أنى لا أفعل به ذلك فسيكون له ذلك .
( كتاب الاحاديق القدسية الجزء الاول )

تخيلى منظرى و انا بقول ربنا مش
هيغفرلى عشان انا وحشة
انا ازبهليت اصلاً
بقيت مش عارفة اقول ايه

المهم يعنى
استغفرت ربنا انى كنت بقول كدة

نرجع بقة للرضا

بصى انا للمرة المش عارفة كام بقولك
انى معرفكيش
ومعرفش انتى عملتى ايه شايفاه وحش
ومش هقولك انى انيل منك رغم انك ممكن تكونى جمب اللى بعمله مبتعمليش حاجة

ومش هنتناقش هنا مين انيل من مين

ومفيش وقت دلوقتى
و رمضان هيخلص
و الرسول عليه الصلاة و السلاة بيقول ( خاب و خسر من أدرك رمضان و لم يغفر له)

و بصراحةب قة
بصراحة
نفسى انا وانتى نحس بالرضا
و اى حد تانى نفسه يحس بالرضا يحسه

بصى
بغض النظر عن حالتنا
و بغض النظر عن اى شيء

احنا نحاول نتوب
نندم
و نعزم اننا مش هنعمل دة تانى
فيه حاجات قد لا نستطيع اننا نوقفها
من البلاوى اللى بنعملها
عرفنا نوقف منها حاجة كان بها
معرفناش
نوقف حاجات تانية

نبدأ بالحاجات البوشيعة البوشيعة

عارفة انى نفسى ضعيفة
وانى ممكن ارجع لها تانى
بس وانا بعقد العزم انى اسيبها
هدعى ربنا ميخلينيش ارجعلها

انا نفسى احس انى عملت حاجة تخلى ربنا راضى عنى

احنا نعمل ولو حاجة صغيورة او كبيرة

اى حاجة و خلاص

و احنا بنعملها
نظن ( أى نعتقد ) ( أى نؤمن ) إن ربنا هيرضى علينا بيها

ندعى ربنا و نقوله اقسمنا عليك تحسسنا بالرضا
و احنا متأكدين انه هيستجيب عشان ربنا سبحانه و تعاله
قال
( ادعونى استجب )
يعنى أمرنا بالدعاء
مقالش الدعاء لناس و ناس لأة
كلنا
حتى احنا
حتى الناس المنيلة اللى مش راضية
هتدعيله انه يخليها راضية
انا هدعيلي و ادعيلك
بإذن ربى
و ربى هيستجيب

بفتكر قول الرسول ( أفلا أكون عبداً شكورا) و احس إنى ولا حاجة
عارفة

و عارفة كمان ان احنا ولا حاجة فى ملك ربنا

و لو غفرلنا او خلانا راضيين و رضى سبحانه عنا
مش هينقص من ملكه شئ

ربنا هيكرمنا يا انجى

أقسمت عليكِ ما تقولى غير كدة دلوقتى
ادعيله وق ولى ارضى عنى يا رب و انتِ متأكدة انه هيرضى عنك
خلينى راضية يا رب

خلينى اعمل حاجة تخليك راضى عنى يا رب
استخدمنى يا رب
متستبدلنيش عشان انا وحشة يا رب
بنحاول والله نبقى كويسين و مش عارفين
نفسى ضعيفة قوى

مع إنك انت اللى قولت ( إن عبادى ليس لك عليهم سلطان )

خايفة يوم القيامة قرينى يقول ( ربنا ما أطغيته ولكن كان فى ضلال بعيد ) ق

حسسنى بالطمئنينة
نفسى احس بيها يا رب

نفسى احس ان جوايا ساكن كدة و خاضع و بيحبك و حاسس بالنور كدة يا رب

نفسى احس بالاخلاص
نفسى احس انى مش منافقة ولا مرائية
نفسى احس إنى كلى ليك يا رب

مش قادرة اعمل كدة لوحدى
عشان انا لوحدى
قوينى يا رب

مين غيرك ليا
محدش

محدش عارف بكل اللى فى قلبى غيرك
محدش عارف هل انا دلوقتى بنافق ولا لأ
انا حاسة بايه
و نفسى فى اية
عملت اية
وندمانة على اية
ومش قادرة اتوب عن اية
و توبت عن اية

انت العالم بالصدور
قوينا

ادعيلى جامد يا انجى لإنى محتاجة دعاء

انا حاولت اتناسى حالتى عشان اعرف اقولك

بس انا فى الواقع اسوء منكِ حالاً
فادعيلنا احنا الاتنين
وانا هديعليك

دعيتلك انهاردة و امبارح

ربنا يقوينا و يصبرنا و يرضينا و يرضى عنا
و يشيل الغشاوة اللى على قلبى
بشعة قوى يا انجى
لما تحسى ان صخرة جواكى
كاتمة على نفسك
احساس وحش قوى
ادعيلى احس انى فى رمضان

ادعيلى احس

عشان انا مش حاسة بحاجة
خالص
سلام عليكِ

نعكشة يقول...

انجى انا مستريحتش برضو لما رغيت

اعمل اية؟

استغفر الله العظيم

انا وحشة قوى :(

بالله عليكِ ادعيلى ربنا يهدينى للطريق الصح

عشان انا مبقتش عارفة انا ماشية ازاى

حاسة انى ماشية فى اسود X اسود و ظلمة و مش لاقيانى

انا نفسى ضعيفة قوى قدام الذنوب و المعاصى

حاسة اكن جوايا ملبد و مكتوم و ملزق فى بعضه

أنا عندى كل ما يخلى اى شخص مبسوط و راضى

يا رب ارضينى و ارضى عنى
بقة

مش لاقية كلام

مش دايماً الرغى بيريح

عارفة

نفسى اغسلنى

مش عايزة اغيرنى لأ
انا حاسة إنى انا لو بقيت واحدة كويسة هبقى كويسة
مش عارفة اجيبهالك ازاى

يعنى الحمد لله ربنا انعم عليا بمميزات لو كانت فى واحدة كويسة روحانيا و دينياً كانت استغلتها استغلال كويس

انا عايزة اعمل حاجة عدلة ف حياتى

عايزة الغى حاجات بالهبل من حياتىا للى فاتت

عايزة يبقى جوايا مقياس

ضميرى بقة مخسع قوى
او هوه من زمان مخسع

بصى
احنا ندعى ربنا و احنا متأكدين انه هيستجيب

(انا كنت وانا صغيرة دعواتى مستجابة .. كنت بقى)

المهم ندعيله
حتى لو كان فينا العبر

اصل انا تعبت من الاكتئاب بقة
تعبت منه قوى قوى قوى
ظهرى بيوجعنى

انا ماشية

هدعى ربنا و هجبر نفسى انى اتأكد انه هيستجيب
خلاص

هنقسم عليه
يرضينا
و ينور قلوبنا

ادعيلى يا انجى
سلام عليكِ

نعكشة يقول...

افتكرت آيه
( و آخرون اعترفوا بذنوبهم خلطوا عملا صالحاً و ءاخر سيئاً عسى الله أن يتوب عليهم . إن الله غفور رحيم )

التوبة

فيه امل يا انجى

قولى ان فيه امل

ربنا يهدينا

سلام

micheal يقول...

هابي بيزي يويو هابي بيزي يويو
كل سنةى وأنتي طيبة يا إنجي وربنا يخليلك أصاحبك
تحياتي

mariam يقول...

امممم..ابتزاز يعنى ..ماشى ماشى مقبول منك عكى براحتك بس متعكييش اوى عشان انا صدقت اللقب و ده بسببك

ههههههههههههه و متقلقيش هنطلك كل شوية ..انتى اللى جبتيه لنفسك :))

اه انهزام احمق دى حلوة جدااا ..لأ هى مشوشة بس هى صح كدة.. هى لازم تبقى مشوشة و محيرة لن الأتنين حالتهم كدة.. و الحلو فيها انها تحسيها فعلا بتحصل ممكن يكون فى ناس كدة ..اظن فيه فعلا

كيفك انت ..انا بحب الاغنية دى اوىىى.. و انك تدخليها كدة فى قصة عجبتنى جدااا ...بس هى النهاية اللى خدتنى انها مفتكرتوش ..حساه انه راح كلم واحدة غيرها يا اما سيادتها بتستعبط و عاملة مش فاكراه لأن 6 سنين مش زمن يخليها تنساه ... كدة تبقى نهاية مؤلمة بس منطقية.. عارفة.. فكرتنى بأغنية (واما) مش فاكرة اسمها بس اللى بيقولوا فيها... لما قبلتها يوم و انا ماشى قلت يا ريت اليوم ده مجاش ..عرفاها؟


عرفت من ردودك على نعكشة منسبة للشغل ...بيتهيألى ردى هيكون شبه ردها شوية..بصى يا ستى انتى لسة حابة انك ترجعى تانى فعلا مع نفس الناس اللى كنتى معاهم فى الأول؟؟!
لو لسة حابة ترجعى.. ممكن تستخيرى الأول و بعدين تروحى تسألى لو ينفع تشتغلى مع نفس الجروب اللى كنتى بتشتغلى معاه.. و لو نفع تمام انتى هتبقى مع اللى كانو مريحينك ..منفعش خلاص.. يبقى انتى حاولتى و عملتى اللى عليكى ...و واضح ان لما الناس اللى كنتى بتشتغلى معاهم اتغيروا انتى مبقتيش مرتاحة و كمان قلتى ان فى ناس زميلك مشيوا و سابو المكان و اللى قاعديين عايزيين يسيبوه.. فاكييد الوضع مش مريح و ان انتى مش بتدلعى و فعلا مش مرتاحة ..بصى عمتا انا لو مكانك دلوقتى اللى هيصعب عليا او ممكن يهمنى فى ااحكاية دى كلها هو الشخص اللى كنت هناك عشانه (يوسف) فا اللى كنت هعمله لو خلاص انا مش عايزةاشتغل هناك هو انى كنت هزوره و اطمن عليه من وقت للتانى عشان اكون مرتاحة منحيته.. متكتفيش بانك عملتيله برنامج جديد.. ..يعنى كأنك لسة فى الشغل بس على مزاجك بتابع حالتك بس من غير ضغوط فهمانى ..بس .. يا رب اكون افدتك فى حاجة

منسبة لكلامك الأخير ده حاجة تسعدنى و انتى عارفة ان من القلب للقلب رسول :)

منسبة لأقتباسك يا نعكشة متعتذريش مفيش اى نوع من الرخامة...يسعدنى انها ضحكتك ..ده حوار حصل حقيقى بينى و بين لبة فى احدى الأمتحانات... انا خايفة تقولو علية مجنونةههههههه بس اصل و انا بذاكر بحب اذاكر بصوت بقى و اشرح و كدة فماما يا عينى بتهرب منى... فملقتش غير لبة ادامى.. و الله بحبها جدا صغنتوتة كدة و منعكشة هتحبيها على فكرة ممكن تجيبى واحدة زيها و تسميها نعكشة مش بتريق والله بس هو هيليق عليها فعلا ...و لو تحبى اسلفهالك تشرحيلها اتفضليها ..دى عندها قدرة على استيعاب جميع المواد شرحتلها عربى و انجلش و اسبانى و هى مركزة و مبتقاطعش اللى بيتكلم خااالص ...اكيد هتفهم اى حاجة عايزة تقوليهالها انتى طب صح...متقلقيش لبة بتفهم فى كل المجالات زى مقلت لأنجى هى راس و شعر طلعلهم عروسة فهى دماغها كبيرة اوى و بتستوعب كتييير D:

على فكرة كلامك عن قوله تعالى (انا عند ظن عبدى بى) ده موضوع كبيير اوى بجد ممكن يكون ذنبى الدائم هو ده انى بشكك كتير فى ان ربنا ممكن يتقبلنى..بس لازم ناخد بالنا من ده

شاب فقرى يقول...

الف مبروك
قصدى ربنا يتمن بخير

يووووووه

كل سنة وانتى طيب :p

ويارب كل سنة تبقى بخير وتبقى احسن من اللى قبلها ويارب يوفقك و تتخرجى وتحققى كل امالك فى الحياة

بس يارب تتخرجى دى اهم حاجة

عشان تعالجينى :$

لانى لحد دلوقتى مش لاقى طبيب نفسى ثقة اروح له :((

كل سنة وانتى طيبة وسنة سعيده عليكى ولكى منى اطيب تحية وأحلى وردة عطرة :)

شاب فقرى :)

شاب فقرى يقول...

معلش

كمان تعليق بقى

ما هوا عيد ميلاد :$

بجد حلوة اوى اوى اوى اوى اوى اوى اوى اوى العروسة فرانشيسكا

عجبانى موت

ويارب الاقى حد يجيبلى هديه زيها :$

تحياتى

وكل سنة وانتى طيبة بمناسبة العيد

شارب فقرى :)

أحمد بكر يقول...

...كل سنة وانتى طيبة يا انجى يارب السنة الجاية تبقى مرتاحة اكتر وتكونى متبهججة كدة
معلش بقى عرفت متاخر بس عيد ميلادك جاى قرب العيد كل سنة و انتى ديما بخير و عيد سعيد

نعكشة يقول...

mariam

كنت زمان ايام ما كان عندى نظر
قصدى ايام الشباب
قصدى قبل كدة يعنى
كنت بمسك عروستى
و اقعد اشرحلها

بس مبقتش اعمل كدة
تفتكرى كدة كبرت؟؟؟

او عجزت بمعنى اصح؟؟

عامة
هجرب حركة العروسة دى ابتداءً من السنة القادمة بإذن الله

هسميها اية
مش عاجبنى اسم نعكشة
:D
صحبتى عندها واحدة شبة اللى بتقولى عليها راس و طالعلها رجلين
و اسمها نجفة
وواحد تانى اسمه بلاهة

صحبتى التانية قامت سمت عروستها تناحة

تحسى اسامى حلوة كدة

مش عارفة اما اجيب عروسة

هبقى اقول هنا
وانتى هتعرفى بقة باذن الله
و هبقى اقول الاسم

سلام عليكِ

mariam يقول...

نعكشة..

لا كبيرتى ولا حاجة مش الأخت بردو 12 سنة زيىىى D:

لا تقلقى.. ده تهيوئات بتجيلى ساعات بردو.. و ساعات بحس العكس ..

حلو اسم نجفة.. بلاهة و تناحة مقولقيش لا تعليق :)

عارفة انا بردو لما جبتها و سمتها لبة راحت صاحبتى جابت واحدة زيها بس اكبر شوية و سميتها.. نص لبة (زى فيلم الكرتون البحث عن نيمو لو شفتيه )بعد كدة قعدت تقنعنى اننا نبدل الأسامى عشان هى عروسيتها اكبر فوافقت لمدة نص ساعة او اقل و مقدرتش حسيت انى بقول لواحدة صاحبتى (يا انسة) قبل اسمها متخيلة ازاى.. فقلتلها لأ كل واحد و الأسم اللى كان مختاره فى الأول.. عارفة بقى حركات العيال دى انا اللى اخترت الأسم الأول و كدة ..

خلاص لما تجيبى واحدة ابقى قولى ..
و انشاء الله هبقى اعرف لما تقولى

سلام عليكِ

صبرني يارب يقول...

كل سنه وانتى طيبه

واول مره ادخل مدونتك الاقي احتفال كده وعيد ميلاد

كل سنه وانتى بكل خير وسلام

نعكشة يقول...

mariam

انتِ سكر بجد
قلتلك انا دة قبل كدة باين صح
دة زيادة تأكيد بقة

لا من جهة المعيلة فانا عندى منها كتير
مش انتى لوحدك يعنى ... عارفة الشعور دة بتاع صحبتك و حضرتك و بتاع
بس انا مشكلتى فى الاسامى انى عندى زاكرتى مخسعة شويتين تلاتة
فبنسى اسمى انا نفسى
فمعنديش مشكلة فى الاسامى يعنى لو اتغيرت

بس تصدقى
محبش حد ياخد الاسم الى هختارة لعروستى
ههههههههههه

صح
لا بجد بتكلم جد

هستنى اخلص امتحانات و اروق كدة و اشوفلى عروسة مميزة و اجيبها

مبسوطة انك مستنية تعرفى الاسم
فى حاجات كدة صغيرة بتعلق معايا


عليكِ السلام
..............

انجى

الامتحان بتاع النهاردة شبة بتاع المرة اللى فاتت على طول

يعنى كنت فاهمة الموقف
بس مقدرتش افتكر
كانوا جايبين من بين السطور
جاوبت الحمد لله
و كل اللى يجيبه ربنا كويس

مش مشكلة
الحمد لله على كل حال

مبقتش بتضايق زى زمان

كلو بيطلع فى الغسيل
الامتحان حاجة و النتيجة حاجة تانية
و ربنا يفتح علينا يارب

عشان اهالينا
و عشان احنا تعبنا

سلام يا كوكو
..................

funckydoctor يقول...

خابى بيرس داى :D

funckydoctor يقول...

فرانشيسكا عسل قوى على فكرة :D

Unknown يقول...

نعكشة: انا تعبانة بقالى كام يوم بس انا قريت تعليقك...تعليقك الاولانى خالص بتاع انا عند ظن عبدى بى معرفش لقيتنى بقرا تعليقك ومتنحة وبقول يا نهار اسوح...انا مكنتش اعرف المعلومة دى خالص...يعنى كتير اوى بيقولوالى تفائلى خيرا تجدى خيرا بس ان ربنا يقولى كدة يعنى اللى هظنه فى ربنا هيكون؟؟ يالهوى دة انا مستقبلى ضايع بقى...بس تعرفى..معرفش ليه الحديث دة ريح قلبى..حسسنى انه سهل اوى حياتى تتغير لما اثق فى ربنا ويكون ظنى فيه ظن كويس..طب والله من ساعتها وانا مطمنة خالص وعارفة انى لو وثقت اكتر حياتى هتتحسن اكتر وان الموضوع كله فى ايدى..فرق معايا بجد الحديث دة والله يا مريم...الحمد لله تعرفى اصلا ربنا بيعمل لى حاجات كتير حلوة فى مصلحتى وبيحمينى من حاجات هتوجعنى لو حصلت انا حتى لما ببقى عارفة انه ربنا منعها عنى عشان مزعلش بعدين الا انى برضو غبية وبزعل من فقدها..يللا الحمد لله اكيد لما اتعود اثق فى ربنا اكتر واظن فىه الظن الاحسن مش هيبقى هاممنى اى حاجة..

بالنسبة للامتحان بقى يللا مبروك انه خلص..تعرفى فعلا الامتحان بيبقى حاجة والنتيجة حاجة تانية يللا الحمد لله بس انا مش قادرة اسامح دكتور عباس عوض اللى كان بيدينى علم نفس عام فى سنة اولى..ادانى مقبول وانا مقفلة الامتحان..تعرفى بالمناسبة يعنى مش بس الراجل دة اللى انا مش مسامحاه فى ناس كتير انا مش مسامحاهم فى اذيتهم ليا..

انا مش بس مش مسامحاهم دة انا متنمناش يتحطوا فى موقف ضعف احسن يصعبوا عليا واضطر اسامحهم لانى من جوايا مش عايزة اسامحهم..حاسة انى كدة باخد حقى منهم..وفى ناس منهم نسوا خلاص الاذية اللى وقعت عليا منهم بس برضو لازلت مش مسامحاهم..انانية انا؟؟

يللا مش مهم عموما انا عمرى ما باذى حد حتى اللى مش مسامحاهم..يكفى السواد اللى جواهم واللى خلانى مسامحهومش..ايه بقى لازمة الرغى دة؟؟ معرفشض والله

سلام عليك

Unknown يقول...

مريم:سيدة العالم ايون كدة عايزاكى تتواجدى بقوة ...والله شكرا على اهتمامك انك تفصصى البوستات كدة وتدينى راى..هارفة؟؟ اسراء صاحبتى حامل ولو جابت بنت هتسميها مريم..انا مبسوطة لانى بحب الاسم دة وكمان انا هدلع بنت اسراء اقولها يا لبة..ايه رايك ممكن؟؟؟؟؟ ميرسى مريم ابقى تعالى كتير وحسسينى انك هنا لانى مفيش طريقة انا اوصلك بيها اوكاى؟؟؟؟؟؟






شاب فقرى:انت تؤمر يا عم..انا روحت عندك وعجبنى الموضوع يعنى مدونتك لذيذةو ابقى تعالى كتير..........







صبرنى يارب:طب يارب متبقاش اخر مرة..ابقى تعالى كتير بقى........





فانكى دكتور:ياااااااااااه بقالك كام سنة مجتش هنا بذمتك؟؟؟؟ وانت طيب يا دكتور وهبقى اقول لفرانشيسكا رايك فيها لا تقلق..........

ponpona يقول...

انجي ...

أنا قولت البنيه مانزلتش بوست جديد آجي أنا أرغي شويه وامشي

ازيك بقي عامله ايه ؟ ايه أخبارك
وايه أخبار اسكندريه علي حسك كده ؟
تصدقي أنا عمري ماروحت اسكندريه دي قبل كده ، أعرفها من الصور بس ، نفسي آجي علي فكره واقعد كده علي كوبري ستانلي "مش هو اسمه كده برضه "
هه مش مشكله الاسم ، أنا نفسي ف ايه بقي؟ نفسي أقعد واربع وافرد درعاتي للهوا كدهو وحد ياخدلي صوره ... عبيطه صح ؟ أنا عارفه

بس نفسي آجي ف الشتا والدنيا تمطر والموج يعلي وانا أضحك
هيييه دي أحلام يقظه أنا عارف بس وايه يعني لا هاروح ولا هاحلم كمان

أنا ليا واحده صاحبتي أصلا اسكندرانيه كانت معايا السنه اللي قبل اللي فاتت ف الكليه بس السنه اللي فاتت حولت طب اسكندريه قالتلي ماقدرتش أقعد ف القاهره أكتر من كده

تعرفي .. القاهره دي فعلا بلد مضحكه أوي
آه والله ولا السيرك بس تعرفي بردو أنا بحبها

قاهره الساعه 6 الصبح بجد حاجه غيييير
بتبقي كل حاجه نضيفه وهادياااا والهوا بيبقي هاين عليه ياخدني ويطير

فعلا مابتتحولش لبلد عايزه الرمي الا بعد البشر اللي فيها مايصحو وتبدأ بقي سيمفونيه الكلاكسات والزعيق
طب والنبي لما الطريق يبقي معشق ف بعضه وواقف من أول ميدان التحرير لحد ميدان الجيزه (مسافه كبيره علي فكره)
ساعتها بقي الكلاكسات والزعيق هايعملو ايه!!!

ياللا مش مهم ، آديني رغيت شويه وقعدت معاكي

استأذن أنا بقي :)

سلاموو عليكووو
:)

Unknown يقول...

بونبونة:ايه دااااااااا..معنى كدة انك هتيجى كتير وكمان بتدورى على بوستات نزلت وللا لا؟؟؟ طب اسمحيلى ارقع زرغوتة بقى لولولولييييييييييييييييييي

بصى يا بونبونة يا اوختشى اسكندرية دى جنة الله فى مصر..مش ممكن حلاوتها..لا صحيح مش ممكن يعنى فى مكان حلو كدة فى الدنيا؟؟ خصوصا فى الشتا يالهوااااااااااى عالجمال..عارفة انا بحب اسكندرية دى كانها واحدة صاحبتى انتيم كدة..تحسى انها بنوتة سمرا ورشيقة وشعرها اسود وناعم وطويل ولابسة هدوم رياضية وحاطة ام بى ثرى فى ودانها وبتجرى عالبحر الصبح..هى دى اسكندرية فى نظرى..حاجة كدة جميلة..بونبوناية بالشوكولا..

اقولك..احلى من ستانلى بكتير القعدة على البحر عند القلعة..مكان ساحر..مش معقول النقاء اللى هناك بس فى الشتا بيبقى مسخرة بتغرق من الموج العالى بس لازم اروح واضحك لما البحر ييجى فى وشى..حلوة اسكندرية اوى بحبها..

ربنا يعينكوا على عيشتكوا فى القاهرة..بجد يعنى ربنا يعينكوا كفاية الشوارع الواسعة اوى اللى بحس فيها بتوهان فظيع..بصراحة محبتهاش مقدرتش اتفاعل معاها من كتر ما هى كبيرة حسيت بالغربة ومعرفتش احتفظ لها بذكريات حلوة..

انا كدة عرفت انك فى كلية طب..ناقص اعرف اسمك الحقيقى بقى..مرة تانية اكيد هالح عليكى لحد ما اعرفه..اكيد هو اسم رقيق وشفاف زيك كدة..

ربنا يعزك يا بونبونة ويكرمك ويفرحك زى ما فرحتينمى بالتعليق دة..

سلامو عليكوووووو

جارة القمر يقول...

جرا ايه يا انجى كل دا نووووم انا قلتلك بلاش نسهر يوم الحفلة بتاعت ايزولد مش سمعتى الكلام

وحشتينى جداااا و كل يوم ادخل الاقيك مش هنا و بعديييين بقى شكلى كدا هجيب الفلكة اللى بضرب بيها العيال فى المدرسة هههههههههههههه شوريرة انا

يلا كدا اعقلى و نزلى بوست حلو كدا و عسول زيك

Unknown يقول...

جارة القمر:انتى تؤمرى حضرتك...تعالى كدة كمان شوية وهتلاقى بوست بس مش متبهجج..يعنى هو مش كئيب ومش لذيذ على العموم ابقى شوفيه.......

ponpona يقول...

امممممممم
أيوه ياستي ، انا أصلا باجي باستمرار من أول يوليو 2009 بس ماكنتش بسيب كومنت

ليكي عليا انطلك كل ماتحطي بوست جديد بس انتي حطي بس كده وابقي شوفي

والله يابنتي القاهره دي عسل عسل بجد والله مش هزار بس انتي عندك حق ماتحبيهاش ، مايحبش القاهره دي الا اللي يعرف كوبري الجامعه وكوبري عباس وكوبري قصر النيل .... اللي يشوف القاهره بالليل ، بالليل أوي ويمشي ع الكورنيش ويزور الحسين ويفطر مره ف شوارعها ... الشوارع الواسعه أوي دي اللي انتي بتتوهي فيها أنا ممكن أمشي فيها ساعات ولا أزهقش ، أصلها بتبقي واحشاني قوي

عارفه القاهره دي بقي زي ايه ؟ زي بنوته أموره بس جدعه بتصحي الصبح بدري تلف ع البيوت وتصبح ع النايمين وبعد كده بقي تسيبهم يروحو أشغالهم وتروح هي كمان شغلها وباليل بقي تاخد دش دافي وتتزوق وتخرج توزع فرحه بيضا علي قلوب السهرانين

بالنسبه لأسمي تتخيلي كده ممكن يطلع ايييه؟ اييييه؟

تصدقي أنا عمري ماتخيلتني باسم تاني غير اسمي أصلي بحبه أوي

قوليلي كده ممكن يبققي ايه اما اشوف كده هاعرف ارسمني باسم غير اسمي

:)

Unknown يقول...

بونبونة: اممممممممممممم اللى ميحبش بلده يبقى شخص يعععععع ووحش..

حتى لو انا مبحبش القاهرة لازم انتى تحبيها عشان بلدك كنت هزعل لو كنتى مبتحبيهاش..لازم تحبيها دى بلدك..

طب انتى عارفة؟؟ القاهرة سابتلى فى اخر زيارة ذكرى حلوة يمكن اكون مش بكرهها زى الاول بس عشان الذكرى الحلوة ارتبطت بيها..

تعرفى اغنية هنا القاهرة بتاعة على الحجار؟؟؟ تلخص موقفى ناحية القاهرة..

مش عارفة اسمك ممكن يكون ايه..مش متخيلة حاجة غير بونبونة..ممكن بسبوسة؟؟ نيااااااااااهاهاهاهااااااااااا

Unknown يقول...

كل عام وانتي بخير
وان شاءا لله يارب تكون سنة خير وسعادة على قلبك
وفيها تتحقق كل امنياتك وأحلامك

KIMOOOZ يقول...

انجى
كل سنه و انت طيبه و بصحه و شغل حلو و صحبه حلوه و حاجات كده حلوه كتير

و هديه عيد ميلادك هو توضيح معنى اغنيه كان عمرى عشرين فى اللينك ده لو مشتركه فى الفيس بوك يعنى
http://www.facebook.com/topic.php?uid=14921910181&topic=7364
و علش التهنئه متأخره عشان مكنتش بخش على اى مدونات فى الفتره الاخيره
نوع من الملل بسبب الغربه اللى الواحد فيها
تقبلى تحياتى