الجمعة، 1 مارس، 2013

جثث

المشكلة مش ف اللي حصل..المشكلة ف كم الجثث اللي انا مضطرة اتعامل معاها

مثلاً عندك جثة العلبة القطيفة اللي كان فيها الشبكة..عندك جثة طن الصور..عندك جثة الشنطة اللي مليانة هدوم العروسة اللي كانت هتبقى أنا.

عندك مثلاً جثة النيم تاج اللي كنت عاملاه له هدية ومكتوب عليه إسمه بالبنط العريض ونسيت اديهوله.

عندك مثلاً طن هدايا..برفانات على ساعات على هدوم على كتب على أقلام على كراسات.

المشكلة ف الجثث دي كلها انها مش للدفن..أنا محكوم عليا احنطها وابروزها واقدملها فروض الولاء والطاعة كل يوم عشان افتكر القفا.

ضوافره مخربشة كل حتة ف حياتي..قدامي مستقبل باهر من مداواة الخرابيش بس فيها خرابيش غويطة هتعلم..المشكلة ان الخرابيش الغويطة هي الخرابيش اللي عملها ف وشي وكل مشكلتي دلوقتي في الجثث دي..هعمل فيها ايه؟؟

آكلها؟؟؟

بيتهيء لي دة الحل الوحيد..أنا محكوم عليا آكل الجثث دي عشان احس بالألم جامد أوي واتعظ..عشان تبقى جزء مني وفي نفس الوقت مشوفهاش تاني.

.........إنجي إبراهيم.........

هناك 12 تعليقًا:

Foxology يقول...

الواحد مننا بيكون مضطر انه يتعامل يومياً مع جثث من النوع ده ومن النوع الآدمي كمان بس جثث حية للأسف.

تحياتي

شيرين سامي يقول...

خرابيش الوش مش بس بتوجع دي بتفضل معلمه طول العمر..اللي بيخربشها قصده تشويه مش بس إيذاء.
إحرقي الجثث

حفيدة عرابى يقول...

بتوصفى حلو قوى ياانجى
أنا معرفتش انطق من العنوان ومن الحيرة فعلا ننصحها تخلص من الجثث دى ازاى

ربنا يهون ويساعد ويشفى ويطبطب

غير معرف يقول...

"لاتقنطوا من رحمة الله"

Bent Ali يقول...

البنات القويات ، اللى فى لحظات الضعف والفتفتة بيكرهوا الكلمة دى، ما بينتظروش نصايح حد، اغطسي فى حزنك لحد ما تزهقى يا اسكندرانية، لكن وقت ما تقولى كفاية اضربي برجلك بقوة، هتلاقي نفسك طلعتي عالسطح تاني

hanan khorshid يقول...

انجى وجعتى قلبى جداااا
عشان خاطر كونى متماسكة وقوية قد ما تقدر لحد ما تتخطى الازمة

ziza يقول...

تحية خاصة جدا لانجي التي لااعرفها لكني احس انها زميلتي او ابنة الجيران
لااعرفك حقا لكني احس بداخلي كاني اعرفك
صدفة وجدت مدونتك استرعت اهتمامي جملة من الجمل وبقيت اقرا الى ان المتني عيناي,وسابقى اقرا دائما,انا كنت احب القراءة لكني فاجاة كرهتها صدقي او لا مدونتك اعطتني رغبة لاقرا,اسلوبك احس معه في الراحة لقرائته,اجد توازنا غريبا في تفاصيلك وبعض الشبه...اكتبي دائما وان شاء الله اشياء تثلج القلب سنقراها معك,كوني قوية وخلي ايمانك اقوى

سميحة ميحة يقول...

انا مش مسامحه غير ان الكلام ده حلو جدا و يوما ما هتبقي حد كبير اوي اوي و هو ولا حاجه في الكون اصلا !
انا بقول كلام عبيط بس لو قدرتي تفهمي مشاعري المتداخله بين اني حابه كلامك و بين اني مش طايقه الفكره كلها علي بعضها و غضبانه !
و بحبك !!

افكار مبعثرة يقول...

وجع..هي فعلا الكلمة اللي حسيتها اوي
مشكلتنا مش بس في الوجع لا في الجثث اللي بتفضل معانا كل لحظة مبنعرفش نعمل فيها ايه و ساعات فعلا بتفضلي حاطاها قدامك و كانك بتختبري قوة احتمالك كل لحظة بتبصي على الجثث و كأنك برده عاوزة تدي نفسك درس يعلم فيكي ومتنسيهوش ابدا كل لحظة
تحياتي

P A S H A يقول...

فيه حد يبقى معاه ربنا ويزعل ؟؟

قولي يا رب

sab7al5air يقول...

I like what strong statments you put here
i like to come here
stay well
Ola

nour wnar يقول...

مررت هنا وقرات كلماتك اذا كانت اعجبتنى مره فهى آلمتنى مرات
ولا ادرى كيف اجيب على تساؤلك ماذا افعل بالجثث ؟؟!!
ولكن احمل لكى بعض الكلمات
دروب الحياه ليست دروب محمله بالورود والمخمل الناعم وهذه الدنيا لم يطلق عليها دنيا من فراغ واننا فى شقاء وكبد الى يوم الدين ولحظات تكون فارقه فى حياتنا نتألم بعمق ولكن صدقينى بعدها نشعر اننا تغيرنا لاننا وقتها قد تلقنا الدرس ولكن بصفعه الحياه تعلمناه بالطريقه الصعبه الذى لا ينسى
تالمى لحد الثماله
ثم افيقى تجدى كل شىء تغير ليس للحياه الورديه ولكن للاعمق
ابحثى هتجدى دروب ممتده ولكن هذه المره احسنى الاختيار ...